مكاتيب🤍

الحلقه 13

#مكاتيب🤍
#الحلقه_13🤍
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
دف الباب وخش .. ومازن مزال يبحت فيه .. قمعز ع الصالون وحط كراع ع كراع وهو يبحت فيه .. سكر مازن الباب وجا قمعز ف الصالون اللي مقابل ..
مازن>>اليوم كيف روحت وع عينك "وشير ع الشناطي .."
انس>>"قدم وحط يديه ع كرعيه وبعدها شبكهن ف بعضهن .."لا واضح عارف .. بس ماتسألش ماتقولش ماتحكيش ماتشاورش ماتقولش عندي مراه نسأل عليها ..
تنحنح مازن وصبا .."استنا ندير قهوة ونجي نهدرزلك .."
هز راسه بإيجاب وهو يبحت فيه بنظرات هزوة .. اتكا ع الصالون من جديد .. رن نقال مازن بحت فيه ..كان هزاز مد يده وهو يبحت ف المطبخ وخذاه .. بحت فيه كان رقم بلا اسم ..
قعد يطلع ف نقاله من جيبه .. فتحه وقعد يسجل فالرقم اللي طلعله مسجل بأسم .."فل"
فنص عيونه .. وبلع ريقه .. حط نقاله وفتح عليها من تليفون مازن وحطه ع وذنه .."الو .."
فنص من جديد .. وبسرعه سكر عليها وحط التليفون ف جيبه وصبا ..
مع طلعت مازن بالقهوة ..
مازن>>كنك صبيت قمعز ..
انس>>لا كلمتني ميسان امي ناضت ماشي انا ..
ومشا بسرعه فتح الباب وطلع ومازن يبحت فيه بأزدراء وتنهد براحه وخش يكمل باقي اللي كان يدير فيه ..
.....
"احتمال انها تنوض واحتمال لا .. اللي هيا فيه نفسي وبيني وبينك انا متأكد ان حتى اللي جاها نفسي .."
تنهد وهو يبحت ف البحر وف يده طاسه عصير .. وبعدها قال .."مافيش محاولة بكل ..؟"
وبحت فيه .. هز عمر راسه برفض وعيونه دموع .."كله ف يد ربي .."
سكت زكريا ورد بعيونه ع البحر .. اشوية وقال .."تعرف لتوا مش مصدق .. نقول مزال حلم وانوض منا .."
عمر>>تعبت واجد بعد خذوك منها .. نذكر لما جابت خشيت عليها لقيتها تحضن فيك وتبكي .. تعبت بعدها واجد بعد خذاك باتك ..بس ماعمريش توقعت انك تعرف بالشكل هذا سمر اختي كانت شخصيتها ع طول قوية وكلهم يخافوا منها .. بس فراقك انت كسرها .."وبحت فيه .."
عيونه تعبن دموع بدون مايحكي شي .. تنهد وقال .."لو نعرف من الاول ماكنتش خليتها .."
"لو خيروك حنان ولا سمر .."
بحت فيه بفجعه ..كأنه نفجع من السؤال وماتوقعش ..بعدين رد عيونه للبحر وتنهد وقال.." امي حنان هيا اللي ربتني وتعبت عليا .. ماعرفتش ف عمري غيرها ام .. اكيد فاهم عليا .."
هز عمر راسه بإيجاب وهو ساكت ..
رن تليفون زكريا اللي كان مربوط بالنت .. بحت فيه وبحت ف عمر ..
عمر>>من ..؟
زكريا>>ميسان .. مش خاطري نرد ع حد ..
ومسك تليفونه قفله .. ورد بعيونه للبحر ..
عمر>>تصبي ترقد اشويه ..
هز راسه وحط الكباية وصبا ..وهو يمسح ف وجه بأرهاق ..
......
الصبح ..
طلعت حنان بعد جا خذاها سيف هيا وميسان ..
ميسان>>انس وين ..
سيف>>قال عندي شغل روح بيهم انت ..
حنان>>ماسمعت شي ع خوك ..
سيف>>"تنهد .."سافر مع خاله لأمه ..
هزت حنان رأسها ودموعها ينزلن وميسان تبحت فيها بحزن ..
وصلوا للحوش نزلت ميسان ومشت لحوشهم وسيف خشش حنان لحوشهم ..خشت ميسان قابلتها ف دار المعيشه تُقى راقدة وع راسها فوطه ..
ميسان>تي كيف مرضتي اخره ..
بحتت فيها تقى بحزن .. خشتلها وخشت وراها فهريه ..
فهريه>>جيتي .."وقربت لتقى حولتلها الفوطه حطتها ف الميه وعصرتها وردتها لها"
ميسان>>جيت .. امي وين ..
فهريه>>باتت مع فوز امس قالتلها بدون علم راجلك ماتمشيش لأمك قعدت معاها ..
ميسان>>"هزت راسها .."كنها تقى اخره ..
فهريه>>ماني عارفه هالبنت ديما متلقيه .. خليك جنبها توا نجي .."وطلعت.."
هزت ميسان راسها وقمعزت جنب تقى اللي مسكت يدها وقعدت تبكي ..
تقى>>ميسان زكريا ..
ميسان>>تقى حرام عليك روحك زكريا قاعد عند أمه ووضعه كويس ..
تقى>>"تبكي وصوتها يقطع .."بس بحت فيا بنظرة واعره ي ميسان ياريتني قتله من الاول قلبي يوجع فيا عليه  .. شن عاش حبيبي وشن شاف ..
قعدت تمسح ع شعرها وقالت .."هذا مكتوب ي عمري وزكريا توا يرد كيف قبل واحسن قاعد مع امه مش حد غريب ..وانتي مادسيتي الا من خوفك عليه .."
تقى>>كنت راضيه يكون كويس وياخذ سارة ي ميسان ..
ميسان>>نصيب ي قلبي بعدين سارة معش تقولي عليها بكل المراه بتقعد مرات خوه ..
غمضت تقى عيونها بحزن ودموعها ينزلن .. وميسان تمسح ع شعرها وتقرا عليها .. لعند هدت ورقدت .. وميسان من التعب رقدت جنبها .. مافطننش لسالي اللي تسمع فيهم من ورا الباب ..
......
خشت سارة من برا .. طول ع الدار .. بحتت فيها أنوار اللي دوبها بدت تمشي للجامعه ..
أنوار>>كيف روحتي بدري اليوم ..
هزت سارة رأسها وهيا سارحه .."عندي اول حصه بس" .. بعدين بحتت فيها وقالت .."بوبكر ماجش خذا مالك .."
أنوار>>لا مالك مع ماما ف المطبخ .."بأستغراب .."عليش كنك ..؟
سارة>>"قمعزت ع سريرها .."أنوار نحكيلك حاجه خايفه منها ..
سكرت انوار الشيت وقمعزت كويس .."احكي .."
تنهدت سارة وقعدت تحكي لأنوار ع زكريا ..
سارة>>اليوم ماجش .. وسيف قبل يدزلي ع الاقل رسالة ف اليوم يطمن ومعش دز ي أنوار .. وماجش لبابا وهو ع اساس امس يجي .. خايفه يكون صارت مشكله ولا زكريا داير مشكله ..
أنوار>>انتي قلتي ان زكريا حكالك وهو مش عارف ان خوه اللي يبيك .. معناها ماعندش علم ..
سارة>>"بقلق .."انا خايفه يكون حكا قدام سيف وسيف فات الموضوع ..
أنوار>>لا نور الله يرحمها كانت تقولي خوت سيف يخافوا منا ف المواضيع هذين مايحكولش .. لذلك ماتخافيش ممكن عندهم شي ثاني والا كان هذا بوبكر مايسيبش مالك حتى اليوم عندنا ..ماتفكريش بالشي الشين طول ..
سارة>>"تنهدت .."ان شاء الله خير يارب ..
وصبت تغير وأنوار تبحت فيها بحزن بعدها بحتت ف شيتها وقعدت تقرا ..
......
اما ف المدرسة ...
خش إسماعيل وقمعز ع مقعده ..
إسماعيل>>بنات رن عليا انس توا راه هو يبي يروح بينا ..
بحتت فيه ورد .."ليش؟"
إسماعيل>>خوتك مش فاضيين وامك عند عيت محمد من الصبح .. قاله رؤوف يروح بيكن ع حوشهم ..
فل>>احسن بالك يقرينا انس اشوية ..
سامر>>"تنهد .."مافيش فيكم حد رن ع زكريا ..
فل>>"بحزن .."بابا يحكي لماما قاللها سافر لأمه وجعني بكل .."وقعدت تبكي .."
إسماعيل>>"دموعه ف عيونه .."فرخه فل فكيني منك توا تبكيني  ..
بحتت فيه ورد خطر عليها زكريا يقول فيها قعدت تبكي حتى هيا .. صبا إسماعيل وطلع .. وسامر يبحت فيه بحزن بعدها غير عيونه لبنات عمه وتنهد بضيق ..
......
مصبي ع روشن العناية وهو يبحت ف سمر اللي مزالت راقده .. حاط جبهته ع الروشن ويبحت فيها بحزن ..
قرب منا عمر وصبا جنبه ..
عمر>>رقدت وأخيراً ..
زكريا>>"رفع راسه .."تعبت واجد اليوم ..
عمر>>كنه متوقعين انها تنوض بعد تجي انت ..
زكريا>>توا تنوض ..ماتعبتش ع الفاضي ..
ابتسم عمر ..وهو يبحت ف اخته ..بعدين غير عيونه لزكريا ..
عمر>>مارقدتش الا ساعه انت بس ..
زكريا>>"بحزن .."مافيش نوم نفكر ف امي حنان شن دايره بلاي ...
عمر>>"حط يده ع شعر زكريا .."ان شاء الله مافيها شي ..
بحت فيه وابتسم ربع ابتسامة .. ورد عيونه لأمه .. وعمر تنهد وهو يبحت فيه بحزن وضيق ..
......
راقده ع كراع فريال وهي تمسح ع شعرها ..
حنان>>"بحزن .."انظر وليدي شن داير توا ..
فوز>>ماما بالله عليك ماتبكي ..حرام عليك نفسك ..
فريال>>لا ماتبكي يمي ماتبكي بكل وليدك توا يردلك .. وتفرحي بجيته زكريا يحبك ماياخذش منك موقف ..
قعدت تبكي حنان وهيا تقول "يارب ..يارب وليدي .."
فريال>>خبرتوا حنك ..
فوز>>"وهيا تبحت ف امها وعيونها دموع .."لا يمي ماما قالت ماتخبروهش ..
هزت فريال راسها وقالت "احسن .."
تنهدت فوز بحزن بعد ردت حنان تبكي .. وصبت من جنبها وخشت للمطبخ ونهارت بكاء حتى هيا بس ف الخفاء ..
كيف باتها اللي كان يشتغل ف المحل وعقله مش فيه .. حزن وضيق الدنيا تجمع ع صدره بذات وهو يحس ف روحه ف سبب حزن احب انسانة ع قلبه ..بس لا حول ولا قوه الا بالله 💔
......
درس قدام المدرسة .. وهو يطقطق ع الدومان .. ويبحت قدامه .. المظهر الخارجي يدل ان هو انسان بارد عايش ف برود الدنيا كلها .. بس اللي جوا فيه لو طلع حيحرق المدرسة باللي فيها .. فطن بعد نفتح الباب اللي جنبه وقمعز إسماعيل .. وصبا ع روشن إسماعيل سامر ..
سامر>>مافيش فيكم حد كلم زكريا ..
انس>>"تنهد.."نقاله مقفل ماحصلش حد ..
تنهد سامر بحزن .. وهو يمشي ف يده ع حافة الروشن ..
انس>>اركب هيا ماشي ماشي ..
سامر>>لا وين سيارتي قاعده هنا وامي تبيني نجيها ..
انس>>وبنات عمك وين ..
برم سامر وصفر لفل وورد ..اللي بحتن فيهم وجن يجرن ..
ركبت فل ورا إسماعيل وورد ورا انس ..
انس>>هيا سامر نشوفوك ..
سامر>>تم ي صقر ..
طلع انس بالسيارة .. رفع عيونه بحت ف فل اللي كانت مغمضه عيونها وراقدة .. وورد قاعده ع تليفونها جنبها ..
انس>>فل كيف مش راقدة ..
فتحت عيونها وبحتت فيه ابتسمت بحزن .."لا والله زكريا شاغلني ماقدرتش نرقد .."
رفع حواجبه وهز راسه .."زكريا اها .."
بحت فيه إسماعيل بأستغراب كيف قالها ..
انس>>مرات يجي مازن يتغدا عندنا ..
إسماعيل>>كيف روح هو ..
انس>>"وعينه ع المرايه .."روح وناوي يرد مراته قال ..
ابتسمت فل بفرح .."يخيه باهي ع الاقل تستقر فوز ..طول بكل وهو مسافر .."
رفع انس حاجبه وهو يهز ف راسه .. وياكل ف شاربه من جوا .. عيونه كانن ع فل وفرحتها بسماع الخبر بس حسها تكذب لدرجه ماكانش مصدق اي شي تقول فيه .. ماركزش ع ورد اللي وجها تغير وعيونها امتلن دموع ..
وصل للحوش ..درس ..
انس>>فل خليك اشويه ..
بحت فيه إسماعيل ..قال انس .."نبيها ف موضوع .."
هز راسه إسماعيل ونزل ومعاه ورد طول خشوا .. وانس حط يده ع لحيته .. وقاللها .."تعالي قمعزي مكان إسماعيل .."
استغربت فيه ..بس دارت كيف ماقال ..وجت وقمعزت جنبه ..مد يده قفل السيارة ..
مد يده الاخره وقال .."هاتي نقالك .."
فل>>عليش شن في ..
انس>>"بعياط .."هاتي الخرا ..
فل>>"بخوف .."تي كنك فجعتني شن في ..
انس>>مدي فل مدي ..
بخوف مدتله نقالها فتحه لقا فيه رمز .. مده لها .. وهيا ترعش قعدت تفتح فيه ..بعد نفتح كره منها ..وهيا تبحت فيه ..
فل>>انس شن في؟ ..مش دايره شي ولا حاجه انت تعرفني مش متاع طروح ..
انس>>"بصوت عالي .."سكري فمك واسكتي اسس ..
سكتت وهيا تبحت فيه بخوف رغم انها مش دايره شي وعارفه روحها ..بس وجه وطريقة كلامه خلن كل خليه ف جسمها ترعش بدون سبب ..
خش ع جهات الاتصال ..قعد يبرم فيهن ..خش ع المسجات مالقش شي فيه اشتباه ..خش ع الصور برم فيهن كلهن صورها ..وهيا تبحت فيه ..
للحظه فكر ان ظلمها ..بس كتب رقمه ف تليفونها ..ورن ..جاه رقم غريب .. ضحك بعصبيه ..وخبط الدومان مره واثنين وثلاثه ..
انس>>"بعياط .."التليفون الاخر وين ..
فل>>"دموعها ف عيونها .."انس والله خوفتني ماعنديش تليفون اخر هذا بس تليفوني ..
انس>>"عزق ف حضنها تليفونه .."وهذا رقم من ماه رقمك ..
مسكت النقال وبحتت ف الرقم .. بعدها بحتت فيه وقالت .."صح رقمي بس هذا القديم ..شن جابه لك .."
بحت فيها بنظره حاده .. كان ع شوية ويضربها بس تمالك روحه .. وقال .."شن علاقتك بمازن راجل فوز .."
فل>>كيف يعني ..؟
انس>>كيف .."وضحك بسخريه .."بتضحكي عليا توا انك انتي ماتكلميش فيه وبينكم علاقه ..وبسبب اللي فيه اختي توا انتي وياه .. توقعت النذاله من كل الناس الا انتي ..بس الموضوع مش انا نحل ونربط فيه ..مصعب هو اللي يحله ويعرف روحه شن ربى وكبر ..
فل>>"قعدت تبكي .."والله مانعرف ع شن تحكي .. انس واقسم بالله ليا زمان مااستعملتها الشفرة هذي ولل نعلم عليها من وين طلعت اخره .. انس نحكيلك جديات معقوله تفكر فيا هكي؟ معقوله انا ندير ف فوز هكي ..مستحيل والله لو نحق بعيوني مانصدق .. انس مستحيل انا نديرها مش خاينه انا نخون بنت عمي واخت خويا ..
انس>>انزلي "وفتح بطمة السيارة .."
ردت تبكي بأنهيار .."انس ماتظلمنيش والله مادرت حاجه ولا نعلم ع شي وقدامك نقالي ماعنديش غيره شفرتي قديمه .. انس بالله عليك ماتحكي لبابا يحسابه جد .."
مسكت يده وهيا تبكي ..فلت يده ..ونزل فتحلها الباب نزلها ودفها مسكت روحها بصعوبه ..ومشا وهو يقول .."حقيرة رخيصة تافهة .."
وركب سيارته ومشا وهيا تبحت ف السيارة وحاطه يدها ع فمها وتبكي ..
..
كيفها اختها اللي خشت سلمت وركبت لدار فوز ترن ع مازن مايردش .. قعدت تبكي بأنهيار وهيا تذكر ف كلام انس وان مازن بيرد فوز ..
........
يبحت ف ولد اخته كيف راقد ع الكرسي ..تنهد بحزن ..وقرب من الروشن ..
عمر>>توا انتي ياما تمنيتي ولدك يعرف بيك ويحس ويجي لعند .. ويوم جا ماحسيتش بيه ونضتي .."عيونه تعبن دموع .."مش حمل نخسر مره اخره ي سمر نوضي وراسي ..نوضي واقعدي كويسة وشوفي ولدك وافرحي بيه ..
بحت ف الدكاترة اللي خشو يجروا ..فنص عيونه وقعد يمسح فيهن بالقوة وهو يبحت فيهم بحزن وخوف كبير .. سكروا عليه الستار اللي بينه وبينهم .. خبط الروشن وقال بصوت عالي "عليش سكرتوه خلوه مفتوح اختي كنها شن فيها ..افتحوا الروشن اختي كنها .."
نط زكريا وبحت فيه صبا يجري وقرب منا ..
زكريا>>شن في ..كنهم سكروا الروشن ..
عمر>>"بعياط وهو يبكي .."مش عارف مش عارف ..ياربي اختي بين يديك ياربي هيا مادارتش اشويه بس يارب ماتاخذها ساد ماواتخذ مني مانبي حتى اختي تسيبني ياربي ..
بحت فيه زكريا بحزن .. قمعز وهو يسبح ع صوابعه وكله يرجف من الخوف والتوتر ..
......
وصل للمكان المعلوم .. نزل من السيارة وخش ..
بحت ف صاحبه اللي كان مصبي فم الباب ..
انس>>اطلع وخليني انا وياه بروحنا ..
"انس ماتهورش .. انا قتلك تم عشان عارفك مش حديرله شي .."
انس>>باهي باهي اطلع بس ..
بحت فيه بشك وطلع .. وخش انس وهو يذكر ..
بعد طلع من مازن ..كلم صاحبه اللي خبره ان مازن ف البلاد .. وقاله ان يبيه يجيب مازن لعنده ف الحوش اللي يتلاقو فيه ديما ..وصاحبه نفذ الاتفاق وجاب مازن .. وطلب منا طلب غريب ان يربطه ومايخليش يطلع نهائي ولان عارف انس وعارف مازن  نفذ اللي يبيه ..
فتح انس باب الدار وخش وسكرها وراه ..
بحت فيه مازن .."كنك اتمعيل انت معقوله رابطني هكي فكني ي راجل بلا لعب فروخ .."
ضحك انس وقمعز مقابله .."لعب الفروخ درته انت ..فل شن تعرفها .."
مازن>>"بأستغراب .."من فل انا مانعرفش وحده بالأسم هذا ..
عيط انس "ماتكذبش .."
مازن>>انت جاي ابتلى عليا .. جاي تحكي ف كلام مافيش منا .. عشان تستر ان اختك عقيم ..
صبا انس بسرعه وعطاه بوني خلا مازن يعيط بألم ..
انس>>"بغضب .."خسارة فيك اختي ي نذل .. تخون فيها ي حقير ..وف الاخر مع بنت عمها ..معش لقيت بنات خلاص ..
مازن>>"يبحت فيه .."بنت عمك هيا اللي باعت روحها وطلبت مني رقمي مش انا .. واختك نكديه مافيش راجل يتحمل يعيش معاها ..
رد انس ضربه ومازن يعيط ..وهو يقول .."بنت عمك بروحها جتني انا ماطلبت منها شي .. ماطلبت شي .. بعدين اللي كيف اختك ودارت معايا علاقه نتوقعها ادير مع اي حد وتخوني .."
هنا بس جن جنون انس وطاح فيه ضرب .. لعند خش صاحبه وفك مازن من تحت يديه ..
"معقوله ي انس هكي شوهت الراجل معقوله وانا دايرك العاقل الرزين .."
فك روحه منا وبحت ف مازن وبتهديد قال .."عليا الطلاق ي ..... اختي كان ماطلقها مانقعد ولد محمد المختار ..وانا حذرتك ..
وطلع بسرعه بعصبية وهو عارف وين حتكون وجهته بعد اللي سمعه ..
......
رن تليفون سارة اللي كانت راقدة ..
فتحت عيونها وبحتت ف الرقم اللي كان رقم سيف ..
تنهدت وكانت حاسه انها النهاية ..
ردت عليه وقالت "الو .."
سيف>>انا اسف ان رنيت عليك بس مضطر صارن معايا اشوية ظروف ف العيلة وهذا عليش ماجيتش لباتك لعند توا ..
ابتسمت وهيا تسمع فيه كيف يحكي بسرعه ..
سارة>>مش مشكله متفهمه الموضوع
سيف>>"ابتسم .."عارف ان طولت بس ماتخافيش جاي جاي ..
سارة>>ان شاء الله..
سيف>>انا لازم نسكر توا تمام ..
سارة(>>"بصوت واطي .."تمام ..
ابتسم وسكر طول وهو مبتسم .. وهيا مبتسمه بحب ..وعارفته مايبيش يطول قصه المكالمات عشان مايخشوش ف الحرام ..
تنهدت بحب .. وهو قمعز ع الطاولة ويبحت قدامه بأبتسامه بس قطع عليه سرحانه صوت سالي اللي قالت .."فرحان انط بتخطب ..؟"
بحت فيها سيف بأستغراب .."انتي من وين طلعتي .."
سالي>>نسأل فيك فرحان انط بتخطب ..مش عارف ان اللي تبي تخطبها خوك يحبها وحارب باتك عشان يخطبها له ..
......
فل>>"بخوف وهيا تبحت ف خوها .."عليش بابا قال روح ب فل ..
رؤوف>>مش عارف ي فل مش عارف اللي عارفه ان هو يبي يسافر ومايبيش امي تسيب حني وعمتي حنان ..
هزت فل راسها وهيا خايفه .. وورد اللي جت مع اختها مجبره كانت متكيه ودموعها ف عيونها ..
خشت ميسان للحوش ..سلمت وقمعزت وقالت .."كيف وين التؤام .."
مروة>>ي حنه كلمني مصعب قالي خلي فل تروح نبي نسافر توتيلي حاجتي وانتي اقعدي مع امي ..
ميسان>>هالبنية كيف النسمه معتمدين عليها ف كل شي ..
ابتسمت مروة .. وبحتن ف انس اللي خش بغضب وركب بسرعه لداره ..
..
وصل رؤوف بخواته .. نزلن وهو علق ومشا .. خشت فل بسرعه لدارهن وخلت ورد مقمعزه ف دار المعيشه .. دورت التليفون القديم متاعها .. فتحاته لقاته بلا شفرة .. بلعت ريقها .. وهيا تمشي وتجي بخوف .. فتحت ورد الباب وخشت بحتت فيها فل ..
ورد>>كنك انتي ..
فل>>شفرتي اللي كانت هنا من خذاها ..
ورد>>" بلا مبالاة وعفوية .."قاعدة عندي ..
تنهدت باستغربت وطلعت لدار المعيشة وقمعزت ع الصالون وهيا مش فاهمه شي .. فطنت بعدها وردت لكلام اختها .. اذكرت ان ورد كانت باستمرار تحكي ع مازن وقصة الشفرة واللي قاله انس .. وباتهن اللي جاي ف الطريق خبطت وجها كم خبطه وهيا تعيط بالخفيف ..وطلعت تجري ..
اما ورد اللي فطنت بعدها لروحها شن قالت .. خبطت ع فمها .. "عليش فل ادور ع الشفرة .."وفنصت بعد قالت .."انس اول مره يحكي ع حياة اخته الخاصه وأنها ترد لراجلها .."
خبطت وجها وقالت بخوف .."حي عليك ي ورد حي ع امك ي ورد حي عليا حي .."
مالحقتش تكمل كلام ..لعند ماخشت عليها بعصبيه ودموعها ف عيونها .. لقتها مقمعزة ع سريرها ..
فل>>"بعصبية"شن دايره انتي ..
تبحت فيها بحزن ودموعها نزلن طول ..
فل>>"عيطت بصوت عالي"شن دايره احكي ..
بدت تبكي أكثر وهيا حاطه يديها قدامها .. وكل مابتحكي نقطع عليها عبرتها وتقعد تبكي ..
فل>>اللي درتيه فيا جد ..؟" ..ودموعها ف عيونها .."جديات استخدمتي اسمي مش توصلي ف اللي تبيه .."؟ ..وبرمت وردت بحتت فيها .."انتي عارفه شن درتي .. ضيعتيني .." وقدمت قعدت تضرب فيها وهيا تبكي وتقول "ضيعتيني ضيعتي كل شي ..كل شي ..صايعه حيوانه قليلة ادب .." ووخرت وهيا تبكي وتبرم ف الدار وتحول ف شعرها من وجها ..
ورد>>"وهيا تبكي "انا اسفه مانحسبش ان الموضوع يوصل لهك ..بالله عليك سامحيني ي فل توا كيف فهمت كل شي توا بس ..
فل>>"بعياط والم .."كيف بنرقعهاا قوليلي كيف كيف .. كيف وهو حكا لبابا وجاي بابا ف الطريق .. ليش درتي فيا هك ..ليش ..انا اختك حرام عليك اختك ..
ورد>>"ببكاء"والله دايرته كساد مش اكثر مانحسبش هكي ..
فل>>"تبحت فيها بألم .."نهيتي كل شي بيدك .. خسارة والله ..
وكيف جت بتطلع سمعت صوت باتها يعيطلها بصوت عالي طلعتله تجري.. زاد صوت بكا اختها .. بذات لما سمعت الكف اللي صدح ف الحوش بسببها ومش حتقدر تقول انا درتها ..
.....

طلع الدكتور من جوا وجا لعمر قعد يحكي معاه .. وزكريا يبحت فيهم بخوف .. ضحك عمر وبحت ف زكريا ..
عمر>>"بفرح جا بسرعه وحضنه وهو يقول .."أمك ناضت ي زكريا ناضت ..
ووخر وبحت فيه .. "هيا توا طالبتني لازم نخشلها بسرعه .."
ومشا وسيبه وهو مزال تحت تأثير الصدمة ..ماجاتش الجرأة ان يشوفها لذلك قمعز ع الكرسي وهو يفرك ف صوابعه بتوتر ..
خش عمر ع اخته اللي اول ماشافاته ابتسمت ..
سمر>>عمر ..
عمر>>"قرب وباس راسها .."حبيبت خوك الحمدلله ع سلامتك ..
سمر>>"بتعب .."الله يسلمك .. شن صار جبت زكريا كيف ماواعدتني ..
ابتسم عمر بعيون مليانة دموع .. وقال .."جبته ي عمر خوك جبته .."
وصبا بسرعه ع الروشن ودق عليه بعد مارفع الستار .. بحت فيه زكريا شيرله عمر يقرب .. بلع ريقه بتوتر وصبا ع الروشن ..قلبه نبض بالقوة بعد شافها .. وهيا تبحت فيه بعيون تعبانه .. وقعدت تبكي وعمر جنبها يسكت فيها ..رد برم وطلع من المستشفى كامل وهو يبكي ..
بحت عمر ف سمر .."كلها فترة ويتقبل المهم ولدك جنبك .."
سمر>>"ببكاء .."كبر وليدي ي عمر كبر ..
عمر>>خلاص حبيبتي خلاص .. دوبك نايضه حرام اللي اديري فيه ف روحك .. انا ماشي نجيب امي ونجي ..
هزت راسها .. رد باس راسها وطلع وهيا تبكي بحزن ..
قرب من زكريا اللي مقمعز ف الحديقه .. وحط يده ع كتفه ..
عمر>>امك بحاجتك خليك اقوى من هك ..
بحت فيه .. مشا عمر وسيبه وهو تنهد بحزن ..
قعد فترة مقمعز برا وهو حاس بالوحشه والحزن مالي قلبه .. تنهد بقلة حيلة .. وقال .."اللي بديت بيه لازم تنهيه ي زكريا .. عارفك مش مصدق ان امك مش حنان بس لازم لازم تكمل جميلك للأخر .." وصبا بعد ماعطا لروحه طاقه .. خش وصبا من جديد ع الروشن ..قلبه نفطر عليها حزن رغم ان ماقربهش ولا لمسها بس قلبه كان ينبض بقوة وكأنه يبي يطلع من ضلوعه ويمشي لعندها ..ويحضنها .. شعور حس بيه مالش اي علاقه ان هو عاش معاها سنين او لا ..حقها تحركت ..خشتلها طول ممرضه وصبت جنبها تشوف فيها ..بوجع قعد يبحت فيها .. يد حطها ع قزاز العناية واليد الثانيه ع فمه وهو شاده بالقوة .. عيونه دموع .. يشوف فيها كيف قعدت تبحت فوق وبعدها نزلت عيونها له وبحتت فيه .. ابتسمت وحركت يدها تحيي فيه .. ابتسم من بين دموعه .. وحول يده اللي ع فمه وشيرلها .. شافها برمت ع الممرضه وحكت معاها .. اشويه وطلعت الممرضه وجاته حكتله انها تبيه يخشلها .. تنهد بوجع .. رسم ع وجه ملامح القوة المزيفه .. وقعد ياخذ ف شهيق وزفير اكثر من مره .. بعدين فتح الباب وخش .. خشته اللي خلتها تضحك بفرح ودموعها ينزلن .. قرب منها .. نزل مستواها .. حضناته زين ونهارت بكا وهو اللي داسه الأيام اللي فاتن كله طاح عزمه قدام امه .. أمه اللي حس حضنها ادفى من حضن اي حد ف الدنيا ..🤍
......
.
.
#يتبع🤍
#فافي🤍