مكاتيب🤍

الحلقه 12

#مكاتيب🤍
#الحلقه_12🤍
.
.
.
.
.
.
.
.
.
.
.
.
.
.
.
.
.
.
.
.
.
.
.
صوتها الباكي كان صادح ف الحوش كله ..
"ليش تخلي فيه يمشي ليش ماخليتني نلحقه ليش لو صار فيه شي توا شن حيصير فيا ليش"
وهو كان مقمعز قدامها ضام يديه لبعضهن ويبحت فيها بخوف .. وبنته مقمعزه جنبه وتبكي ..
محمد>>حنان .. انا خليت زكريا يطلع بلا السيارة بالعاني .. اخره مافيش فينا حد توقع ان يطلع توا او يجي للحوش .. انا خليته يطلع بلا السيارة مش يمسكه خاله ويفهمه كل شي ..
حنان>>"بعد استيعاب .."خاله من؟
محمد>>حنان ماتهبلينيش حكينا فيه الموضوع .. خاله عمر خاله من ..زكريا لازم يعرف كل شي كل شي ي حنان خلاص العيل بعيد ع امه اكثر من هكي ..
حنان>>"بعياط وهيا تبكي .."ليش توا بس فطنت ان بعيد ع امه ماهو انت اللي خذيته منها وجبته ليا .. ليش خليتني نتعلق بيه ونديره ولدي .. هذا ولدي انا ي محمد مش ولد سمر ولدي انا .. لو يخليني ولا يزعل مني زكريا نموت ي محمد نموت ..
يبحت فيها بحزن وعيونه مليانات دموع .. صبت بنتها وحضنتها ..
فوز>>ماما حبيبتي اهدي .. اهدي ..
حنان>>"مسكت يدها وهيا تبكي .."رني ع خوك مايمشيش معاه ي فوز رني عليه قوليله امي تبيك .. قوليله تعال ي وليدي انا اسفه قوليله تعال وانا نزوجها له سارة هذي ..
غمضت فوز عيونها بحزن وزادت حضنتها .. ومحمد يبحت فيهن ..
....
يبحت ف الطريق ويهز ف كراعه .. وعمر جنبه مره مره يبحت فيه .. لعند درس قدام حوش رفع زكريا عيونه ف الحوش وبعدها بحت ف عمر ..
زكريا>>وين جايبني انت ..؟تلعب علي من ..
عمر>>"بحت فيه .."انزل بس ..
زكريا>>"فتح باب السيارة وعطاه بالظهر وهو ماشي .."
نزل عمر يجري .."زكريا وقف زكريا .."
زكريا>>"برم عليه وبصوت عالي .."وين جايبني انت ع من تلعب .. انا وصفتلك الحوش تي انت من اصلا اللي جايبني توصل فيا وتقول ف اسمي تي وين نعرفك انا .. اقلب وجك ..
وبرم ..صبا بعد سمع .."انا خالك عمر ي زكريا .."
برم بحت فيه وضحك من وسط ملامح العصبية والحزن اللي فيه .."تضحك ع روحك؟ انا عندي ثلاث خوال كني مش عارف خوالي لهدرجه ..؟ عدي والنبي اعرف ع من تلعب تحسابني شنو اللي جايبني لحوش انظر من ..اقلب بالله وجك .."
وبرم من جديد .. صبا بعد جاه صوت عمر يقول .."اها انا خالك خو امك .. حنان مش امك ي زكريا حنان مرات باتك .."
ضحك بصوت عالي وهو مزال عاطي بالظهر .. وقعد يصفق بيديه وبرم عليه .."نكته سمحه .. وانا توا عبيط لدرجه ان نصدقك ..؟"
عمر>>غصب عنك شن تحق فيا
زكريا>>"بحت فيه من فوق لتحت .."لمؤاخذه يعني مانشوفش فيك اصلا ..
ضحك عمر .. "امك امك ماخليت منها شي .."
ضحك زكريا اللي قال .."اختك..؟"
هز عمر راسه بأسف .. وقرب منا بعد طلع من جيبه ورقه ..ومدها له ..
مد يده وخذاها منا .. وقعد يقرا فيها ..
شهادة ميلاد .. ومتاعه هو .. حول الورقه وبحت ف اللي بعدها عقد زواج .. رد بحت ف شهادة الميلاد .. اسم الأم "سمر فتاح ال....."
ضحك من جديد .. وبحت فيه ..وقال بهزوة .."وشن ضمني ي خال انك مش مزورهن وتكذب..؟"
عمر>>خش معايا وكل شي حتفهمه جوا ..
زكريا>>"غمض عين وفتح عين .."عليش سمر اختك جوا؟ ..
عمر>>"بعصبيه مكتومه .."مزلت محترمك لعند توا ونقول طفل مش متحمل الصدمه اللي جاته ..
بحت فيه وهو ساكت .. قدم عمر وفتح باب الحوش .. وزكريا رد بحت ف الاوراق اللي ف يده .. بلع ريقه .. وبحت ف عمر اللي يبحت فيه .. ولحقه .. خش وخش وراه عمر وسكر الباب ..برم بحت ف الباب وبحت فيه .. وبعدها بحت ف الباب الداخلي لقا عزوز تبحت فيه عرفها طول من .."سليمة .." ..رد بلع ريقه ..
زكريا>>شن في ..؟
قربت منا سليمة وهيا تبكي .. حطت يديها ع وجه وهيا تبكي .."حبيبي وأخيراً ي عيون حنك باهي اللي حقيتك عندي هنا قبل مانموت .. ربي يفرحني بشوفه بنتي معانا بعد جيت انت .."
يبحت ف عيونها وهيا تحكي .. حط يده ع يدها وحولها ورد بحت ف عمر اللي شيرله بيده يخش .. فتح باب الحوش الداخلي وخش وهما وراه ..
من الربكه خش بالكاويش متاعه .. وشنطته اللي ناسيها ع كتفه كانت قاعده عليه .. بحت ف فتاح اللي بحت فيه بعد خش .. ثلاث بنات مقمعزات جنبه ..وحده شباب ووحده بعمر ميسان والثانيه كبيرة اشويه ..
زكريا>>"بحت ف عمر .."وبعدها امتى تكمل المهزلة هذي بنروح ..
خبط فتاح عكوزه ع الوطا بحت فيه زكريا ..
فتاح>>قمعز ي ليد وبطل كساحة راس ..
زكريا>>ماعندش عليش مقمعز تحسابني صدقت الختاريف اللي يقول فيهن ولدك ولا حفيدك ولا انظر من هذا ..
عمر>>زكريا! ..
زكريا>>"برعشه .."شن زكريا النم متاعكم هذا بنروح ع من جايين تبصروا انتم ..
وقرب من الباب بيطلع صبا قدامه عمر ..
عمر>>اسمع كل شي واطلع ..
بحت فيه بنظرة فهمها عمر .. وجعتله قلبه .. نظرة بين التايه بين الخايف مش معروفه ..حط يده ع كتفه وقربه قمعزه ..ضم يديه لبعضهن وهو يبحت ف الفراغ وعيونه تحت ..بين يديه الاوراق اللي مدهن له عمر .. البنات مقمعزات مافيش فيهن وحده حكت شي الصغيرة تبكي بس الكبيرة لا .. سليمة مصبيه ع الباب وتبكي وعمر جنبها وفتاح مقمعز مقابل زكريا ..
شير لبنته صبت ..
فتاح>>جيبي اميه لولد اختك ..
بحت فيها .."مانبي شي احكوا بنروح .."
هز فتاح رأسه لبنته صبت والثانيه صبت وراها جت للدولاب اللي ف صدر الدار فتحاته وطلعت منا البوم ..
شير ع زكريا فتاح ..وقال"مديه له .."
قربت منا ومداته له .. بيد ترجف رفعها وخذاه منها ..
فتحه جت طول صورة حنان وجنبها وليه من عمرها جميله جدا .. قلبه دق بالقوة بخوف .. كان مكتوب ع الصورة سمر وحنان ف عمر 23 سنة ..
رفع عيونه ف فتاح اللي يبحت فيه وساكت .. جت بنته وحطت الميه لزكريا اللي بحت فيها ورد بحت ف الالبوم وقعد يبرم فيه ..
صور حنان وسمر ف عرم مناسبات .. معاهن عمته فهريه .. ميسان وعمر .. اخر صور كانن ف عرس حنان ومحمد .. لعند اخر صورة كانت صورة سمر ومحمد ف عرسهم ..
ووقف عندها الالبوم .. وبدأ فتاح يحكي ..
فتاح>>سمر بنتي وحنان كانن عمر واحد .. ف كل شي كانن مع بعضهن ديما مع بعضهن وين حنان عند سمر ووين سمر عند حنان .. كبرن وكبر حبهن لبعضهن .. وصبت سمر مع حنان واجد بكل .. "وسكت ..وبعدها رد يقول .."لعند بعد حنان خذت محمد .. كنت نحس ديما ببنتي تبكي وماكنتش غبي .. ازوجت حنان باتك ف عمر صغير مش كبير .. وكنت حاس ان بنتي تحبه ومافيش اب يغفل ع بنته ف الحاله هذي .. بس كانت ادس حتى ع اقرب الناس لها .. وجابت امك سيف الدين .. وبعدها جابت اختك .. وجابت انس .. وبنتي نشوف فيها تذبل قدامي.. ترفض كانت ف اي عريس يجيها .. وبعد جيبت انس خوك بسنين مانذكرهنش .. شفت سمر ومحمد ف حوشه .. كنت عارف بنتي تكذب وان محمد مادارلها شي .. كنت عارف هذا كله بس دموعها اللي كنت نسمع فيهن في الليل خلاني نجنى ع بنتي وغصبت محمد يأخذها وخذاها .. نقولك بنتي ماكنتش ساهلة وبنت عمها حنان تعبت منهاا واجد مش مانقولكش ان حنان غلطانه بس سمر كانت اكثر سم .. كنت نشوف مش غبي بس حب حنان ف قلب محمد ماخفش .. لعند عمتك هربت .. ومحمد اللي كان يستنا ف سمر ع غلط سمع انها هيا اللي ساعدتها انها تهرب .. وطول بدون مقدمات طلق سمر وشتت العيله كلها حتى جدك مات وانا ماحضرتش عزاه .. "وقال بحزن .."خوي مات وانا ماحضرتش عزاه .. بسبب عمتك فهريه .. والعار اللي جاباته وتحساب حتى بنتي تستاهل الللي صار فيها لأنها ماصانتش راجلها .. بس عشان حقدها وحسدها .. بعد علم باتك ان امك حامل بيك حلف ان ياخذك منها .. وفعلاً اللي قاله صار .. خذاك من حضنها وانت لحمه حمره وعطاك لحنان  .. وحلف بالله ان لو صار ونحنا قربنا منك يدير شي مش حيتخيله ويفضح ف كل العيله والقبيلة سبب هرب فهريه سمر .. لذلك سكتنا .. سافرت امك مع خوها لبريطانيا .. ومن سنتين عرفنا ان فيها الخبيث ف الدم .."وسكت بعد معش قدر يحكي ونزل راسه ودموعه نزلن .."
بحت زكريا ف طاسة الميه وخذاها وشربها ف مره .. لدرجه نكب نصها عليه .. بحت ف سليمه اللي تبكي .. وبحت ف عمر اللي برم وهو يمسح ف دموعه .. وضحك ضحك بصوت عالي ..
يضحك ويضحك ويضحك ..وكلهم يبحتوا فيه بخوف .. خذا من بعدها نفس عميق وتنحنح .. وصبا ..
حس روحه بيفقد الوعي .. اختلط صوت الحركه اللي جنبه مع صوت فتاح وهو يحكي ..حط يده ع راسه .. وطبس ..
قرب منا عمر بسرعه ..
عمر>>تحس ف حاجه ..
رفع راسه وبحت فيه .. رد عيونه لسليمة ..
وقال بصعوبة .."تكذبوا عليا ولا ..؟ انا ماعنديش ام غير حنان .." وبلع ريقه .."انا كبرت ع صوت امي حنان .. مافيش وحده ادير مع ولد راجلها هكي .."وضحك .."حياتي 18 سنة كذبه .."ورد ضحك "كذبه .."
وعيط بصوت عالي وهو يدف ف عمر .."كذابين تكذبوا ..كذابين مافيش حاجه صح كله كلام تحكوا فيه .. وين الاثبات وين .."
بحت فتاح ف بنته من جديد اللي مدت ورقه كانت ف يدها لزكريا بعد صبت وقربت منا .. بحت فيها وبحت ف الورقه .. عض ع شاربه زين وهو يبرم ف عيونه يمنع ف دموعه ينزلن .. مد يده وخذاها ..يقرا بعيونه بسرعه .. كان تحليل DNA يثبت نسوب زكريا لسمر انها امه ..
هز راسه بلا .."لا .. " وقمعز وهيا ف يده ." لا   ياربي لا ..ياربي لا لا ياربيي ياربي انا ف شن قاعد نعيش .. شن قاعد نمر .. ياربي شن داير تحتك انا تعاقب فيا هكي .. "
ودمعته نزلت وهو حاط يده ع راسه ..
قربت منا سليمة وقمعزا جنبه ..
عمر>>لو مش مصدق مزال .."طلع نقاله ورن ع رقم جاه بعده صوت محمد .."
محمد>>ايوا عمر ..
عمر>>محمد زكريا مقمعز قدامي ومش مصدق كل شي قاله باتي ..
محمد>>"سكت اشويه وبعدها قال .."يسمع فيا هو ..؟
عمر>>يسمع احكي ..
محمد>>"تنهد .."زكريا ي باتي .. عارفك حتشيل عليا وع امك .. بس ي باتي هذي الحقيقة اللي كنت نحاول ندس فيها عليك خوف عليك من كل شي .. ي باتي سمر امك حنان مش امك ..
زكريا>>"رفع راسه وبحت ف عمر .." باتي عارفك زعلان مني عشان عليت صوتي عليك بس ماتوصلش لهك .. ماتوصلش ..
محمد>>"تنهد ورد سكت .."عمر روح بيه هنا ..
عمر>>تم تم ..
وسكر .. وبحت ف زكريا اللي صبا .. وهو يبلع ف ريقه ..
وكلهم عيونهم معاه .. طلع قبل عمر اللي لحقه بسرعه ..
قربت وحده من البنات من امها وحضنتها ..
سليمة>>يا روحي وليدي تعذب ي روحي وليدي مش مصدق تايه ي حبيبي تايه ..تايه ولد اختك شفتيه ي سميرة .. شفتي كيف تايه وليدي .. يانا ي قلبي عليك ي زكريا ..
سميرة>>"دموعها نزلن .."خلاص ي ماما بالله عليك حرام عليك اللي اديري فيه .."وبحتت ف بنت اختها .." صبي سويده جيبي دواء جدك ..
هزت راسها وصبت .. وامها تبحت فيها ..
.......
يسوق ومره مره يبحت فيه .. بحت زكريا ف الساعه .. لقاها قريب 10 الا ..
عمر>>زكريا ..
زكريا>>بالله عليك مانبي نسمع شي ..
هز عمر راسه وسكت .. رد زكريا فتح الاوراق اللي ف يده وتنهد .. وبعدها بحت قدامه وهو يفكر ف كل شي ..
..
ف نفس الوقت عند محمد .. درست سيارة سيف ..
تُقى>>"بتعب .."صحيت سيف سامحني تعبتك ..
سيف>>ولا يهمك المهم تحسي ف روحك احسن ..؟
هزت تُقى راسها .."الحمدلله .."
هز راسه وشيرلها وهيا نزلت ومشت وهو بعد حقها خشت مشا ..فتحت باب عيت جدها لقت امها وميسان مقمعزات ف الجنان ..صبتلها فهريه بسرعه ..
فهريه>>كنك روحتي توا وكنه وجك هكي ..
تُقى>>"بتعب .."شي ي ماما تعبت اشوية ف المدرسة كلموا سيف جا روح بيا ..
ميسان>>"حطت يدها ع راسها .."قلتها لك من الاول قتلك ماتمشيش ..
تنهدت تقى .."ممكن تحولن نبي نخش نرقد .."
ومشت وهنا يبحتن فيها ..خشت طول للدار وقعدت تغير ف دبشها بسرعه مش تمشي لحوش محمد تشوف زكريا شن صار فيه ..
......
ف نفس الوقت عند محمد ف الحوش ..
كان مقمعز يستنا وهو يهز ف كراعه ..
خشت حنان ..وقالت" مع من كنت تحكي توا صوتك عالي .."
ف نفس الوقت وصلت سيارة عمر لفم الباب .. نزل زكريا وسكر الباب بعد ماسيب فيها الاوراق اللي كانن ف يده .. فتح باب الحوش وخش وفتح باب حوشهم وخش وسكره وراه .. صبا فم باب الصاله بعد سمع صوت امه عالي ..
بحت فيها "مع زكريا .."
حنان>>"بلهفة ودموعها ف عيونها .."وينه وليدي ..كنه ماروح لتوا ..
محمد>>"بوجع .."حنان زكريا عرف كل شي ..
سكتت وهيا تبحت فيه بصدمه ودموعها نزلن ..
حنان>>لالا زكريا لا ماتخليش يعرف نموت ي محمد لو عرف اني مش امه نموت تعرفني كيف نحبه اكثر من عيالي اللي من صلبي محمد بالله عليك لا ..
محمد>>"بعيون مليانه دموع .."لازم يعرف ي حنان لازم امه بين الحياة والموت ..
حس بالموت خشتله .. حس روحه بيفقد الوعي من هول اللي سمعه ..برم وطلع بعد سمع صوت بكاء حنان بالصوت العالي .. فتح الباب وطلع ..يمشي وهو تايه يبحت بصدمة .. معش قدر يقدم مسك ف الساس واتكا عليه .. قمعز ع الارض بعد معش شالنا كرعيه .. فردهن .. وهو يبحت قدامه بصدمة .. دموعه نزلن .. ويتردد ع مسامعه صوت امه "زكريا لا ماتخليش يعرف نموت ي محمد لو عرف اني مش امه نموت تعرفني كيف نحبه اكثر من عيالي اللي من صلبي محمد بالله عليك لا .."
وصوت باته اللي يرد .."لازم يعرف ي حنان لازم امه بين الحياة والموت .."
امه .. مش ولدي .. امه بين الحياة والموت .. يترددن ف مسامعه .. حط يده ع راسه .. حسه بنفجر .. هو من ..هو ولد من .. هو شن اللي يعيش فيه .. شن الكذبة اللي طايح فيها ..
كلهم يكذبوا ؟ .. باهي وانا؟ .. انا من ..
زدن دموعه طاحن .. شافاته تُقى اللي خشت  من بعيد قربت تجري ..
"زكريا .."
رفع عيونه فيها .. بعد شافت دموعه قلبها وجعها وعيونها دمعن .."كنك ..؟"
وقمعزت قدامه .. حولت كل الحواجز ومسكت يده بين يديها ..
"كنك ..!" تسأل فيه بخوف ع بالها عرف ان اللي عقد عليها خوه سارة ..
بس صدمها بعد قال .."انا امي مش حنان ..؟" قالها بنبرة وجع وسؤال .."كيف ي تُقى هكي ..؟" "انا جديات مش ولدها .." وببكا قال "هيا امي اللي كنت معاها ديما .. اللي تخاف عليا ديما ..انا سمعت غلط؟ ولا"
طاحن دموعها .. ركز عليها انها مانصدمتش ..'بالله عليك ماتقولي انك عارفه حتى انتي .."
زادن دموعها ينزلن .. وهو يبحت فيها بتوهان .. كر يده من يدها وصبا ..مسك ف الساس وجا بيمشي
"وين ماشي .."
بحت فيها بنظرة وجعت قلبها وطلع وهو يمسح ف دموعه ..
وخلاها هيا تبحت فيه وتبكي لعند اختفاء من قدامها برمت بسرعه خشت لعيت خالها ..
اما هو اول ماطلع .. لقا سيارة عمر تستنا فيه .. قرب منها فتح الباب وركب .. بحت فيه عمر وعلق ومشا .. نهار بكا وهو حاط يده ع فمه يعض فيها زين وعمر بوجع يبحت فيه .. درس ع اليمين ومد يده حضنه .. وزكريا يبكي وهو يتردد ف وذنه كلام حنان ..
.......
مقمعزات جنبها وهيا تبكي .. بعد خبر محمد امه جت طول ومعاها ميسان ..
فريال>>حنان خلاص بكاء .. العيل سيوره عارف امه من ..
حنان>>"وهيا تبكي .."مش من حد غيري يعرف مش من غيري شن صاير فيك ي وليدي توا شن صاير فيك ي ماما ..قالتلي تقى طلع يبكي وليدي سمع كل شي قلته لباته .. اه ي زكريا اه ي امي شن اللي قاعد تعيش وتحس بيه ..
خشت فوز بسرعه وهيا ماسكه كباية اميه ودموعها ينزلن .."ماما حرام عليك اللي اديري فيه ف روحك توا يرقا عليك الضغط ..خلاص يعمري .."
قعدت تشرب فيها ف اميه .. وميسان تبحت فيهن ودموعها ف عيونها ..
صبت وركبت لدار فوز اللي كانت فيها تقى راقده بعد بكاء طويل عريض .. تنهدت بحزن .. ونزلت .. لقت سيف ومعاه بوبكر اللي دوبه خاش وانس مع محمد فم الباب .. مكت شواربها بحزن وخشت لحنان اللي ردت تبكي ..
..
محمد>>وهذا كل اللي صار ..
سيف>>"بوجع .."وشن ذنب زكريا ي باتي يعيش هذا كله ..
محمد>>مش ذنبه شي الا ان هو جا ولد سمر ..
بوبكر>>"بأسف .."ظلم وحرام اللي خليتوه يعيش فيه ..
انس>>"بغضب.."وينه هو توا ..
محمد>>كلمت خاله قالي قاعد معايا .. خش رقد ..
سيف>>"مسح وجه .."استغفر الله العظيم ..
ومحمد يبحت فيهم بحزن ..
......
فل>>"وهيا تبكي .."مش عارفه عمو محمد كيف يفكر معقوله يهون عليه زكريا بالشكل هذا ..
ورد>>"وهيا تمسح ف دموعها .."ولا حنان والله ماتوقعتها هكي ..
مصعب>>اسكتن مافيش وحده فيكن فاهمه اللي صار مش تحكي ..
فل>>وشن ي بابا اللي صار يخلوا عيل بعيد ع امه ..
مروة>>عدن خشن غيرن دبشكن صبن ..
صبن وطلعن من جنبهم ..
مروة>>عليش خبرتهن ..
مصعب>>"بأسف .."خبرتني ميسان وهنا معايا ف السيارة وسمعن كل شي ..
مروة>>وانا كلمتني تركية تهر وتبكي واتحسب .. شكله مخبرتهم حنان ..
مصعب>>لا حول ولا قوه الا بالله.. مش عارف محمد كيف يفكر كيف قدر يخلي ولده مش عارف هكي ..
مروة>>اللي صار صار تو .. بتمشي غادي؟ ..
مصعب>>لا مادخلنش الهي ببناتك أساساً قالو زكريا مسافر مع خاله لأمه ..
هزت مروة راسها ..وسكتت وهيا تفكر ..
......
اللي تفكر فيه مروة كان تركية اللي ركبها ولدها ف السيارة وطلع بيها وهيا تبكي واتحسب ..
تركية>>خلا اختي خدامه لولده ورضت مسكينه وسكتت .. سكتت خوف ع روحها من فكرة الطلاق ..مافي شي يخليها تسكت غير هكي .. يانعليا ي خيتي شن عشتي ..
سامر>>امي خلاص نفختي راسي من مبدري وانتي تبكي ..
تركية>>سكر فمك ي قليل الادب ..
مط شواربه بحزن .. ودرس قدام باب عيت عمه .. نزلت وخشت .. وخشت معاها فهريه اللي شافهن محمد صبا ..
مشت تركية مندفعه لفهريه ..
تركية>>"بصوت عالي .."تريحتي ي وجه الشر تريحتي توا .. كان خذيتي جمال شن كان صار فيك لا عذبتي اختي ولا العيل المسكين اللي مش داري ع الدنيا وين .. تريحتي ي مريضه ي انانية ..
تبحت فيها فهريه ودموعها ينزلن .. قرب محمد منهن ..
محمد>>سامر خوذ امك وخش بيها جوا ..
سامر>>"مسك امه .."تعالي يمي تعالي اهدي وتعالي ..
تركية>>حسبي الله ونعم الوكيل فيك ي فهريه تلقيه ف بناتك عذاب اختي هذا ..
خششها سامر وخش معاها .. ومحمد بحت ف فهريه اللي تبحت فيه وتبكي ..
فهريه>>محمد ..
محمد>>"شيرلها بيده .."فهريه لو سمحتي ..ساد ماصارلي بسببك ..
فهريه>>باهي سامحني انا غلطانه وخلي حتى زكريا يسامحني مش ذنبي شي ..
محمد>>ذنبك انك نسيتي روحك وبعتيها وكان السبب طفل برئ مايعلم ع الدنيا شي .. اطلعي من حوشي ..
بحتت فيه يكسره .. وبرمت طلعت وهيا تبكي .. وهو برم بحت ف عياله اللي يبحتوا فيهم بدون ردة فعل وتنهد ..
........
اما اللي يحكوا عليه ..
طلع عمر من عنده للصاله ..
سليمه>>شن ولد اختك توا ..؟
عمر>>رقد ..
سالي>>خلوه يرقد اللي صار كبير عليه ..
سميرة>>منظرة كيف خش وهو تايه يوجع القلب ..
ليلى>>"خشت .."ماما جدو رقد ..
هزت أمها راسها .. جت وقمعزت جنبهم ..
رن تليفون عمر ..بحت فيه وقال" محمد .."
بدن ع ملامح البنات الكره ...
عمر>>ايوا محمد ..
محمد>>شن صار ..
عمر>>راقد من مبدري توا الساعه 1 وهو راقد من ال11 قريب ..
محمد>>هذا الطبيعي متاعه ..حجزتله؟..
عمر>>ف الليل نكون انا وياه ف المطار ومعانا امي ..
محمد>>تمام ..هيا السلام عليكم ..
رد عليه السلام وسكر ..بحتو ف الباب اللي نفتح وطلع زكريا وهو فاتح اول بطمتين من سوريته ..بحت فيهم ..
تنحنح وقال .."الحمام وين .."
شيرله عليه عمر .. برم وخش وسكر الباب .. مجرد ماسكره بكت سليمه وبناتها يهدن فيها ..
.......
اما هو صبا قدام المرايه .. يبحت في وجه .. فتح الشيشمه وقعد يغسل ف وجه مره واثنين وثلاثه ..
بلع ريقه ورفع راسه وبحت ف المرايه ..مشا بيده ع شعره .. خطر عليه كلام حنان ومحمد .. خبط بيده حوض الوجه .. ودموعه ملن عيونه ..
دق باب الحمام .."زكريا .."
غمض عيونه بعصبيه .. وطبس قعد يتوضأ .. وبرم فتح الباب وطلع ..
بحت فيهم كلهم .. رفع يديه ع شكل ان يبي يكبر .. صبت ليلى وفرشتله الصلايه .. قرب وصبا وكبر وقعد يصلي .. وهما يبحتوا فيه ..
لعند كمل قال .."امتى بنسافروا .."
عمر>>انت كويس؟ ..
زكريا>>عمر احكي امتى بنسافروا ..
عمر>>ف الليل نقعدوا ف المطار مع الساعه 8 ..
هز راسه بإيجاب .. صبا وهو يطبق ف الصلاية .. وقمعز مكانه ..
سليمه>>نجيبلك غداء ي حني ..
بحت فيها .. "لا .."
عمر>>مش واكل شي راك ...
بحت فيه بنظرة فهمها عمر ..
تنهد وهو شابك صوابعه ف بعضهن ويبحت قدامه وكلهم يستنوا منا ف ردة فعل اكبر من هك ..
.......
مر الوقت ف توتر عارم عندهم كلهم .. الصمت كان سيد المواقف ف كل حوش .. دموع حنان مابطلنش نزول .. ومعاها دموع تُقى اللي شافت روحها السبب انها ماحكتش لزكريا من الاول .. لذلك سحبت روحها وروحت مع ميسان اللي روحت حتى هيا ..
محمد الوحيد ومعاه خوته كان عندهم علم بسفر زكريا ومعاهم خوت زكريا الشباب ..
للأسف باللي صار تنكسلت مشيت سيف لسارة ومعاه بوبكر مش يخطبوا البنات من باتهن .. وقعد همهم خوهم مش اكثر ..
مع الساعه 5 العشية ..
بعد مارد زكريا للدار وقعد بروحه .. ندق عليه باب الدار .. ونفتح وخش عمر وهو يبحت فيه ..
عمر>>هيا بنطلعوا للمطار ..
زكريا>>"بحت فيه .."توا ..؟
عمر>>"قرب يطلع ف دبشه .."اها لازم قبلها بكم مش يكملوا الإجراءات بدري ..
زكريا>>كنت عارف انك حتحكي اليوم اللي كملت حاجتي كلها قبلها بوقت؟ ..
هز عمر راسه وهو ساكت .. تنهد زكريا ..وبعد صمت دام لدقائق قال .."بنمشي للحوش ناخذ دبش قبل .."
بحت فيه عمر .. "صبي باه .."
صبا طول وطلع قبله .. وعمر وراه بعد طلع شنطته معاه ..
صبا فم باب الدار .. اللي كانن خواته يجهزن ف دبش امهن ..
سليمة>>ناض ولد اختك ..
عمر>>يستنا فينا برا هيا ..
هزت راسها سلمن عليها بناتها ومشت طلعت معاه ..
ونطلقوا لحوش محمد ..
اللي رقدت حنان بعد تعب ومعاناة .. مشت فوز لميسان وتركية روحت مع ولدها .. وقعد ف الحوش بس الشباب ومحمد ..
درس عمر فم الباب ..
عمر>>ننزل معاك ..
زكريا>>لالا ..
نزل وسكر الباب وراه .. فتح باب الحوش وخش .. فتح باب الحوش الداخلي وخش .. سمع صوت خوته ف المربوعه .. فتح عليهم بابها وبحت فيهم ..
سيف>>زكريا ..
صبوا كلهم .. ومحمد مقمعز ويبحت فيه ..
قربوا منا خوته سلموا عليه .. وبعد سلم نزل عيونه بدون مايبحت ف باته ..
زكريا>>واحد فيكم يخش يوتيلي دبش ..
انس>>"بعقدة حواجب .."كيف نحنا نوتوا دبشك؟ .. خش وتيه بروحك ..
رفع عيونه وبحت فيه ..
بوبكر>>زكريا امي مادارتش هك الا وهيا خايفه عليك ..
هز رأسه بإيجاب ودموعه ف عيونه ..
سيف>>ماتقعدش قاسي معاها هيا مادارت شي ..
زكريا>>"عض شاربه .."صح مادارت شي الا خلتني عايش ف كذبه ..
محمد>>انا السبب لو تبي تعاتب حد عاتبني انا ..
زكريا>>مانبي نعاتب حد .. مافيش حد نخش ..
هز سيف راسه بإيجاب ان مافي حد ..
برم وخش وهو منزل راسه باين عليه الكدر والحزن ..ووراه باته وخوته الثلاثه
هيا كانت دوبها فاطنه .. اول ماحقاته خش صبت بسرعة وقربت منا صبا بعد حس بيها قربت منا .. غمض عيونه زين ونزل راسه وصلت فيه رفعتله راسه وقعدت تبوس ف خدوده وهيا تبكي ..
حنان>>وينك ي قلبي وينك ي وليدي وين ي زكريا معقوله ي امي تختفي هكي ..
مد يده وبعدها منا .. وهيا نصدمت وبحتت فيه ..وخر خطوتين ..
ورفع عيونه فيها اللي مليانات دموع ..
زكريا>>عليش كذبتي عليا ..؟عليش خليتيني عايش ف كذبه .."وبحت ف باته .."ليش؟ .. عليش تخلوا فيا ف حياة كذب كلها .. "وبصوت عالي قال .."احكوا قولو ليش ..ليش يمي ليش انا شن درت "وقعد يبكي وهو يعيط .."شن درتلك يمي عليش .. شن ذنبي نعيش بعيد ع امي شن ذنبي .. ليش ننحط انا ف وسط احقادكم وكرهكم .. ليش ..
حنان>>"تبكي .."اسمعني يمي اسمعني وراس زكريا .. وليدي انت ومايجي حد كيفك يمي ..
زكريا>>"قعد يبرم وبعدين خبط الطاوله جنبه طيح اللي فوقها وهو يعيط بصوت عالي ودموعه يجرن ع خدوده .."معش تقولي وليدي معش تقوليها .. كيف رضيتي تربي ولد مراه وحده ثاني وترضي واديريه ولدك .. كيف قدرتي ترقدي الليل كيف كيف قدرتوا كلكم كيف .. "وقعد يخبط ع حديد الدروج وهو يعيط .."كيف كيف كيف ..
كيف جا سيف يبي يقرب منا مسك يده محمد وهزله راسه بمعنى خليه..
حنان>>"قربت منا وصبت قدامه .."زيكو ي امي انا امك ي حبيبي انا اللي تعبت عليك وكبرتك وتعرف غلاك ف قلبي شنو يمي .. انا نموت لو تفارقني انت ..
زكريا>>"بحت فيها .."ليش مافكرتي فيا وف حالتي بعد نعرف انك مش امي الصح .. ليش مافكرتي فيا يمي .."وقعد يبكي .."مزلت نقولك امي .. نقولك امي لأن ماعرفتش غيرك ام .. ليش درتي فيا هكي حرام عليك .. حرام عليك ليش خليتوني نعيش ف كذبه هكي ..؟ ..ليش مافكرتي ف حالتها المسكينه اللي قاعده بين الحياة والموت .."وبرم وهو يمسح ف دموعه .. وبعدها رد بحت فيها .."ليش قوليلي ..
حنان>>"مسكت يديه وهيا تبكي .."مش ذنبي ي زكريا .. انا حبيتك كيف عيالي .. ماعمري فضلتهم عليك .. انا نحبك كيفهم بالضبط انا جابوك ليا لحمة حمره يمي كبرتك انا مافكرت ف شي وقتها الا انك ولد الراجل اللي نحبه ..
غمض عيونه بألم وفك يديه منها وهو يمسح ف لحيته .. حط يده ع عيونه وزادن دموعه ينزلن ..
طلعت منا آه حسوها خوته ف وسط قلوبهم بس مابش حد منهم يدخل ..خلوه يطلع كل شي ف قلبه ..
قربت حنان وتمسح ف دموعه وهيا تبكي ..
حنان>>سلامة قلبك من الاه يمي ..
فتح عيونه وبحت فيها ..ورد يبكي بالصوت وهو يقول بكلام مقطع .."قوليلي كيف نصدق انك انتي مش امي .. قوليلي كيف نصدق ان امي وحده اخره مش انتي .. كيف ننسا اللي كبرتني وفتحت عيوني عليها .. ليش درتي فيا هكي يمي ليش هنت عليك يمي ليش .. كيف نصدق ان الحن هذا كله وانا مش ولدك .. كيف هنت علبك يمي كيف هنت عليك ..ياربي يطلع حلم .. ياربي يطلع حلم .."
وبرم وجه وهو يمسح فيه بالقوة ودموعه ينزلن .."ياربي انت عارفك تمتحن فيا .. ياربي يطلع كذبه يارب ..ياربي "وسكت بعد خنقاته العبرة وهو يبحت فيها بعيون مليانة دموع .."هنت عليك يمي .. هان عليك زيكو يمي تكسريه .."
حنان>>سلامة قلبك من الكسر ي قلبي ..
زدن دموعه ينزلن .. برم وهو يمسح ف عيونه ووجه زين وحنان تبكي وهيا منزله راسها ..برم ركب من الدروج وكانت ف مشيته جريه .. وهيا قمعزت ع الدروج ونهارت بكا قربوا منها عيالها يجروا وحضنوها وهيا تبكي ف حضن سيف .. وراجلها يبحت فيها بألم .. لحظات ونزل زكريا .. بوجه مقلوب .. دموعه ف عيونه .. وف يده شنطة سفر كبيرة .. حقتها حنان حست نفسها راح ..
حنان>>"بحتت ف محمد .."وين ماشي زكريا ي محمد ..
سيف>>"يمسك فيها .."امي زكريا بيشوف امه ..امه بين الحياة والموت لازم يقعد جنب امه ..
عيطت حنان .."الا لا لا اصرف ي محمد لا ماتخليش يمشي معش يجيني ي محمد اصرف .. "وردت تبكي وهيا تبحت ف زكريا .."ماتمشيش يمي خليك عشاني انا عارفته معش يرد ي سيف خليه يقعد .."
يرشف ف خشمه وهو يمسح ف دموعه بيده ويعض ع فمه زين .. عطاها بالظهر وهيا تعيط وراه بأسمه .. يجر ف شنطته وخاطره يبرم يحضنها .. بس خاطره ف نفس الوقت واجعه منها واجد .. موجوع منها واجد ..وقف ف السقيفه الخارجيه تنهد وقعد يمسح ف دموعه. ..وخذا شنطته وطلع .. لقا تُقى فم الباب تراجي تراجي فيه .. بحت فيها وهيا بحتت فيه ودموعها ف عيونها .. بدون كلمه وحده نزل .. فتح باب سيارة خاله وركب ..وطلع بيه عمر تحت عيون تُقى اللي حطت يديها ع وجها وقعدت تبكي بأنهيار ..
......
طول الطريق ساكت ودموعه مره مره ينزلن ويمسح فيهن ..يفكر ف حالة حنان بحزن .. حنان اللي خلاها وراه تبكي وتعيط لين فقدت الوعي .. وطول عيالها شالوها للمستشفى وطلع عندها ارتفاع ضغط ..بعد سمعت فوز بجيت زكريا بكت لين تعبت ورقدت من البكاء .. وهو وصل مع خاله وحنه للمطار .. خشوا وقعدوا يستنوا وهو بعد الدموع اللي حطهن كلهن قعد ساكت ويبحت ف الماشي والجاي وبس .. ماحاولش عمر يحكي معاه ابدا ولا حاولت سليمة اللي قعدت تقرا ف قراءن طول الوقت ..
لعند جا موعد الرحلة .. وركبوا للطيارة .. وهو طول حط راسه ورقد هارب من كل شي ..
عمر>>شكله صار شي بعد خش ..
سليمة>>اكيد العقرب ماتبيش يمشي ..
عمر>>امي كلنا عارفين سمر اختي هيا اللي غلطانه وحنان مش ذنبها شي ..
سليمة>>"دموعها ف عيونها .."اختك لو ماتسببتش ف اجهاض ولد حنان كان ولدها معاها توا .. اختك الله يسامحها تحساب الدنيا دايمه لكل حد .. باتك بعد حكا لزكريا مبدري حذف اهم جزء عارفته مايبيش يطلع بنته غلطانه بس هذي الحقيقه كان هك محمد ماقدرش ياخذ منها ولدها هكي وخلاص ..
عمر>>الله يسامحها وخلاص ..
سكتت سليمة وهيا دموعها ينزلن ..
ومر الوقت لعند وصلوا تونس .. ونزلوا ترانزيت .. قعدوا ساعه وطلعوا من جديد ع الطيارة ..
وع مشارف الساعه 3 الفجر كانوا واصلين بريطانيا ..
زكريا>>"وهو يجر ف شنطته .."شيلني طول للمستشفى ..
عمر>>تريح قبل وكول شي مش واكل شي راك ..
زكريا>>عمر بالله عليك فكني من القصص وفكني من اللي تقول فيه كله ودير اللي قتلك عليه ..لازم نشوفها مش نتريح ونصدق ..
عمر>>تمام هيا امي ..
مشت معاهم .. خذوا تكسي وطول مشوا للمستشفى وين ماقاعده سمر ..
......
رن نقال انس .. بحت فيه وتنهد وخذاه ..
انس>>ايوا ..
"انوس شن الاخبار .."
انس>>الحمدلله شن اخبارك انت ..
"ف نعمة والله ي طير .. قتلك الطير اللي قتلي نراقبه لك جا توا للحوش .."
بحت انس حواليه وصبا من جنب ميسان .."متأكد .."
"اكيد مليون ف المليون .."
انس>>تم انت توكل وانا جاي توا ..
سكر طول .. وبحت ف ميسان.."انا ماشي مشوار وجاي ..اي شي ديريلي رنه .."
ميسان>>تمام حبيبي توكل كان ف شي توا نرن عليك ..
هز راسه ومشا ..
طلع من المستشفى .. ركب سيارته وف طريقه لحوش فوز اخته ..
اللي كان فيه راجلها .. كان يكلم ف ورد .. اللي كانت تبكي .. وحصل كيف وسكر منها وهو يقول .."عيله نكد ف نكد .."
وصبا خش للحمام يدوش .. ماهيا الا لحظات ودق باب الحوش مع طلعته هو ..
طلع ..وهو يمسح ف شعره وفتح الباب .. جاوف وجه انس اللي ابتسم ..
"بو نسيب شن الاخبار ..معقوله ماتقولش انك روحت .."
نخطف وجه مازن اللي ابتسم بخوف ..ماتوقعش ابدا ان انس ممكن يجيه ف ساعه كيف هذ ..
......
اما عند زكريا .. صبا ع قزاز العناية وهو يبحت فيها .. حس بوجع فضيع ف قلبه ..
مع جيت عمر "سمحولك تخش عليها ممكن تكون عامل انها تنوض .. بس ماتعبهش واحكيلها انك جيتها .. وقول امي مش تحس بيك .."
هز زكريا راسه بإيجاب .. وبحت ف الممرضة اللي شيرتله يجيها .. ومشا لعندها .. وعمر صبا جنب امه وهو يبحت ف اخته وقال .."خايف عليه يصير فيه شي .. حسيته كاتم وجعه .. نحس فيه مزال مش مصدق بس يساير فينا مسايرة .."
سليمة>>حقاته .. حقه الوليد من يستقبل خبر كيف هذا ويقعد عادي .. توا يصدق توا يصدق ..
تنهد عمر وهو يشوف فيه خاش لعندها .. بوجع قعد يبحت فيها .. يبحت ف ملامحها الراقدة وهيا مش حاسه بيه ولا حاسه بكل اللي حواليها .. حنه وخاله كانوا يبحتوا فيه من الروشن .. هيا تبكي وهو يسكت فيها .. قرب منها .. كان بيمسك يدها وبعدين وخر وبرم وجه .. دموعه نزلن بوجع .. قعد يمسح ف وجه وعيونه زين .. وبعدين رد وبحت فيها .. قرب وطبس عند وذنها وقال الكلمة اللي قالها له خاله قبل مايخش .."امي افتحي عيونك انا زكريا جيتك .." .. نهار بكا وهو مزال قريب منها .. رفع يده اللي ترعش بصعوبة وحطها ع يدها ومسك أطراف اصابعها الهزيلة بين يده .. وهو يبكي ويمسح ف دموعه بيده الثانيه .. طبس باس يدها .. ورفع راسه وحط يده ع وجها يمسح عليه .. "سامحيني .. انا ماكنتش نعرف انا اسف .."ورددها بنبرة مخنوقه .."اسف واجد .."
......
#يتبع🤍
#فافي🤍