مكاتيب🤍

الحلقه 6

#مكاتيب🤍
#الحلقه_6❤️
.
.
.
.
.
.
.
.
.
.
.
.
.
.
.
.
.
.
.
.
"بسم الله كيف بدينا .."
هذا المدير اللي حكتله سارة كل شي داره زكريا ..وهو يبحت فيها ومبتسم بعبط ..حول نظرة للمدير بعد قال جملته هذي ...
"زكريا خوك شاب خلوق ونعرفه معرفه شخصية .. وعارف ان الحركات هذين مش لك ..هو حطك ف هالمدرسة مش تبني نفسك اكثر .."
زكريا>>"حط يده ع راسه .." ع راسي والله غير اول يوم وانت عارف الجو ..
سارة>>"بحده .."معليش استاذ فرج بس انا مانبيش يحضر عندي ..
رفع زكريا حاجبه وهو يبحت فيها .."انا ماعبتش فيك راه .. كل اللي قلته ان انا في نقطه مافهمتهش ..يعني عادي تقدري تعاودي الشرح .."
سارة>>مش مرة ومش اثنين ..
زكريا>>ان شاء الله عشرة انتي مهمتك تفهميني ولالا ي استاذ فرج هذا اللي حكيته لسيف حضرتك ان الكادر التعليمي كويس ولا غلطان؟"ويبحت ف فرج .."
وسارة تشطاط غضب😂
فرج>>لا معاك حق ي ولدي ي زكريا .."وبحت ف سارة .."استاذة سارة معليش لو مشيتي مع الشباب اشويه بعدين ماغلطش هو وعادي لو سألك هذي مهمتك ولازم تأديها ع اكمل وجه .. ولا .."ورفع حاجبه .."
ابتسمت سارة بالغصب
."لا معاك حق .."
ابتسم زكريا وهو يضحك ف داخله ع وجه سارة
زكريا>>"بحت فيهم .."يعني نقدر نطلع توا؟ ..
فرج>>تفضل واخر مره نشوفك عندي ..
هز راسه بإيجاب وهو مبتسم .. بحت ف سارة .."سامحينا استاذة .."
تبحت فيه سارة بحده وهو ابتسم اكثر .. وبرم فتح الباب وطلع .. وهيا بحتت ف المدير وتنهدت وطلعت وراه ..
"اشويه اشويه تفهمي الوضع كيف .."
برمت بحتت فيه لقاته مصبي ع الساس وحاط وحده من كرعيه عليه .. ومربع يديه ..
سارة>>حركات لوي الذراع مش عليا .. لو انت جاي هنا بفلوسك نقدر نسقطك ودور مكان تبني فيه نفسك "وضحكت بهزوة .."
وهو يبحت فيها .. كل شي فيها يجذب فيه اكثر .. يحق فيها جذابه بكل .. حركاتها كلامها .. عيونها .. نظرتها .. حتى طريقه دبشها ووقفتها كلهن ثقه وعزة هكي ..
ابتسم وهو يبحت ف عيونها .. نزل كراعه ويديه وصبا قدامها ..
زكريا>>قتلك سامحينا عاد خلي قلبك حنون ..الباين عليك طيبه مش لك القسوة ..
عقدت حواجبها وهيا تبحت فيه .. نظرة عينه خلتها اتحشم .. ووجها ينحمر ..برمت وهيا تقول" عدي خش فصلك وبطل قلة ادب .."
ومشت وهو يبحت فيها ومبتسم نفس الابتسامة ..
والعيون اللي يلحقن فيه مزالن معاه .. تشوف ف نظرته لسارة ودموعها ينزلن .. قد ايش تمنت ان هالنظرة تجيها هيا .. نظرة الاعجاب اللي قاعده واضحه ع وجه .. كل يوم تيأس اكثر من اليوم اللي قبله ان ممكن ف يوم من الأيام تاخذه ويصير منهم .. رن الجرس قطع عليها افكارها وخلاها تخش فصلها وهيا حامله اثقال ع قلبها لو قلب غير قلبها كان وقف من زمان ..
......
تبرم وهيا تحس بوجع .. وولدها جنبها يلعب .. مسكت نقالها ورنت ع اختها اللي كانت مصبية قدام المصرف ..
وبين عيونها نظرات زكريا .. وصلت ف الصراف .. مدتله بطاقتها بعد رن نقالها استلمت الفلوس .. طلعاته وحطت الفلوس ف شنطتها ومشت ..
"الو نور .."
نور>>"بوجع.." سارة بالله عليك تعاليلي بوبكر مش قاعد وانا عندي ليه من الصبح ..
سارة>>"بخوف قعدت تبحت حواليها .." انا بعيدة منك .. مافيش حد من هل بوبكر يوصلك؟..
نور>>"وهيا داهشه .."سكري توا نرن ع عمتي حنان ..
سارة>>وقوليلي ف اي مستشفى توا نجيك ..
سكرت منها .. ورنت ع حنان ..
اللي كانت مصبيه ع الحوض توتي ف الغداء ..وعقلها يشتغل ..
بحتت ف نقالها بعد رن .. مسحت يديها ف المريول .. وقربت منا ..
حنان>>ايوا نور نراجي فيك تنزلي من مبدري ..
جاها صوت نور التعبان .."عميمه بالله عليك لو حد من  الشباب قاعد معش نقدر عندي الم مش طبيعي .."
حنان>>"بخوف .."سيف قاعد .. افتحي باب شقته وراكبه معاه ..
سكرت نور .. وقربت بصعوبة فتحت باب شقتها .. وقمعزت جنبه .. وولدها فطنلها قعد يبحت فيها وهيا تبحت فيه ومبتسمه بألم مش ماتحسسه بشي ..
فتحت حنان الباب وبحتت فيها ..
حنان>>نويره تقدري تنزلي؟ ..
نور>>"هزت راسها بإيجاب.."المهم مالك ي عميمه ..
بحتت حنان ف مالك ومسكاته وهو طول قعد يبكي يبي امه ..مسكت بيدها الثانيه يد نور ونزلت بيها ..
خذاه سيف وشاله لميسان وركب سيارته وطلع بمرات خوه .. كان يشوف ف ملامح الألم ع وجها .. وعارف ان مش الم الحمل بس ألم حتى قلبها معاه .. يفكر ف حالة خوه اللي ياما حارب ع شانها لو صار فيها شي .. يفكر فيه وهو لعند اخر لحظه شاغلته ويحكي ويوصي عليها ..
بوبكر اللي كان مش عارف شن داستله الدنيا .. كان وسط الحقول يشتغل بقلب .. مش خاطر ع باله شن حيسير فيه بعد كم ساعه .. وصل سيف للمستشفى درست وراه سارة طول وجت لأختها تجري ..
فتحت عليها الباب وصبت قعدت تبحت فيها .. نظرة عيون نور خلن سارة مصبيه وتبحت فيها مش اكثر .. لعند حست بحد دفها وجا مكانها .. بحتت فيه .. لقاته ينزل فيها .. ومعاه مجموعه من الممرضين .. وخرت وخلتهم لين حطوها ع البريلا ..
حنان>>"حطت يدها ع ذراع سارة .."ماتخافيش يمي ما هناك الا الخير .. اكيده تعب بس ..
بحتت فيها ..وهزت راسها بإيجاب.. وقدمت لأختها مسكت يدها ..
نور>>"بوجع.."كنك خايفة هكي .. مافيش شي يخوف توا نطلع انا ومعين مافينا شي ..
ابتسمت وعيونها امتلن دموع .." ان شاء الله ي ماما ان شاء الله .."
نور>>"بحتت ف حنان .."بالله عليك بوبكر ماتخليه يعلم دوبه مشا للشغل ماتشغلوه ..
حنان>>ان شاء الله حبيبتي ..
خشوا بنور لغرفة المعاينه .. وقعدوا هما برا ..
سارة>>"بحتت ف حنان .."كيف صار فيها هكي ي عميمه ..
حنان>>والله مانعرف حد معرفتي ان هيا اتوجع بس ..
بحت فيهن سيف وتنهد ..رفعت عيونها سارة وجن عليه .. وهو بنظرة عابرة بحت فيها .. عيونهم تلاقن .. تنحنح هو ونزل عيونه وزاد ابتعد .. وهيا ابتسمت ابتسامه بسيطه وقمعزت جنب حنان يستنوا ف حد يطمنهم ع نور ..
.......
مصبيه مع صديقات معاها ..
"معليش بس الزواج ف السن هذي غلطه كبيرة يرتكبوا فيها الأهل يعني انا عايشة معززة مكرمة مع هلي .. وجوي سمح ونطلع ونخش .."
ردت عليها الثانيه .."مش كلنا عايشين عيشة مرفهة وجونا سمح مع هلنا شوفي انا عايشة مع مرات اب مانودعها حتى للعدو كان نلقا اليوم قبل بكره نزوج .."
طلعت عن صمتها "انا عكسك مش مقتنعه براجل وعيال وانا ف السن هذا حتى نور اختي صبيت انا اول وحده ضدها بذات انها ازوجت ف عمر اصغر من عمري هذا .. بس مسؤولية وانا بصراحه نحب نطلع ونخش مانحبش ندفن روحي ف الحياة.."
"القصة مش ف هك القصة ف ان الوحده تنغصب ع الزواج "وحطت يدها ع بطنها .."وتقعد نهايته كيف هذ مش معروفه مع بوه ولا بلاه"
انوار>>"بحتت بحزن ف صاحبتها ".. >>يارب نعيش قصة حب قبل الزواج مش مانتعبش ونتعبه معايا ..
ضحكن صحباتها .. "ان شاء الله ي حنه .."
.......
مزلت نقول ان مافيش فينا حد عارف شن المكتوب له .. مهما طار او نزل المكتوب لازم نعيشوه مهما كان شنو .. كانت انوار تحكي عادي بس ماكانتش عارفه ان المكتوب عكس التوقعات بالنسبة لها .. عكس ماهيا تبي .. بس هيا مش عارفه ان المكتوب اللي من عند ربي خير بمية مرة من تفكيرها هذا .. مش عارفه هيا ان مش كل امنية ف حياتنا فيها خيره لنا .. مهما كان مدى تعلقنا بيها شنو ..
مش عارفه ان اختها تؤمها ممكن تفكر عشان مصلحه عيالها تدفن حياة اختها للأبد .. مع راجل قلبه وعقله مش معاها وهيا اللي كانت تبي تعيش قصة حب كبيرة ..
........
وزكريا مش عارف المكتوب .. وهو يسوق ومولع اغنية بصوت عالي ويدندن معاها وجنبه عمه يبحت فيه بنص عين ماحد فيهم سأل ع الحاله اللي هو فيها شنو .. بس هيا كانت عارفه .. اللي هو يغني ويضحك وفرحان وهيا قلبها يبكي قبل عيونها .. قلبها اللي مش ىاضي بالمكتوب ان مش لها .. قلبها اللي حبه بدون أراده مش راضي يقول ان مش له ومستحيل يكون له ..
"تُقى .."
اسمها بصوته .. خلاها تفطن للواقع .. بحتت فيه ..لقاته يبحت فيها بأستغراب ..بحتت ف خالها كان مش اقل منا استغراب ..
إسماعيل>>كنك ..؟
تُقى>>كني؟ ..
زكريا>>"يبحت فيها .." تبكي!..
رفعت يدها لعيونها ..ومسحتهن ..وهيا تبحت فيه بصدمة ..هما الإثنين يبحتوا فيها بنفس النظرة ..
تُقى>>"ببحه .."اذكرت بابا بس ..
بدت ع ملامحه الشفقه .. وقعد يبحت فيها بحزن .. هيا برمت وجها وبحتت ف الروشن ونهارت بكا .. وهما الإثنين يبحتوا فيها بحزن ..
نزل إسماعيل وركب معاها من لاوره وحضنها ..
إسماعيل>>بكايه ادعيله ربي يرحمه ويغفرله ..
هزت راسها بإيجاب .. وقعدت تمسح ف دموعها ..
رد لمكان السواق .. وقعد يسوق لعند درس قدام محل ونزل يجري ..
إسماعيل>>"بضحكه .."العيل هذا اسعاد الشخص عبارة عن شوكلاطه وحلوة ..
ضحكت تُقى من بين دموعها .. وفعلاً جا زكريا وفتح الباب من جيهتها .. ومدلها شكارة مليانه شوكلاطات ..
ورد ركب ..
زكريا>>"بحت فيها "وقولي زكريا ماينفعش ..
ابتسمت ..وهيا تبحت فيه بنظرة سمحه .. خلاته يبتسم ويبرم وهو يحس بنفس الاحساس كل ماتبحت فيه ..
ضحك وقال" هيا عاد بنولع اغاني واحتفلوا معايا .."
إسماعيل>>شن المناسبة ي ولد امه ..
زكريا>>"وهو يحرك ف يده .."اظن ي عم اني لقيت حب حياتي ..
إسماعيل>>العب مره وحده ..
هز راسه بإيجاب وهو يضحك ورد ولع اغاني .. وهيا كيف اللي كان قاعد ف سحاب وعزقوه لين ارتطم ف الارض ..
مسكت دموعها بالسيف مش ماتبكيش من جديد وتنكد عليه فرحته ..
تنكد عليه فرحته! .. اه وصلت بيها ادس ف قلبها بس اهم شي هو يقعد يضحك .. هو مايتنكدش .. حاولت جاهدة انها تبتسم ونجحت .. وهو يضحك ويهدرز مره مره معاها بدون مايكون عنده ادنى شك ان هيا ميته فيه ..او تحبه حتى بالتلميح ..
.......
فتحت امهن الباب وهيا تبحت فيهن ..
ورد>>في حاجه؟ ..
فل>>مامصبيه هالتصباية الا في كارثه ..
مروة>>ع من فيكن كان المطبخ امس .."وضيقت عيونها .."
ورد>>انا ..
وسعت من الباب"تغيري دبشك وطول تمشي للمطبخ تلمي حوستك اللي عقبتيها "
خشن ..
ورد>>"تبحت فيها بصدمه .."ماما مش من جدك معقولة معقبه الماعين من امس مش غاسلتيهن ..
مروة>>"مربعه يديها .."مادخلكش توا تخشي تغسلي المطبخ ..
فل>>"ضحكت وبرمت تبي تمشي لدارها .."معناها بابا مش متغدي عندنا ..
مروة>>اليوم عند هناء ..
فل>>لذلك ورد ديري معاك دحي مافيش غداء ..
ورد>>"بعصبيه .."شن ذنبنا نحنا بابا متغدي برا معناها مانتغدوش؟ ..
مروة>>"فنصت .."ورد ..!
تنهدت بعصبيه وعدت وهيا تخبط وامها بعيونها معاها ..بعدين قالت بصوت عالي .."فل رني ع عمتك حنان اسألي ع نور قالو ف المستشفى غير تليفوني طافي .."
فل>>"وهيا تبدل .."حاضر ..
ضحكت وهيا تبحت ف اختها اللي تخبط وبعدين طلعت وهيا تلم ف شعرها وسيبتها تزيد ف الخبط ..
......
خش من برا برم بعد حق خوه خاش وراه ..
أنس>>شكله الحوش فاضي ..
زكريا>>هك الباين .."وقعد يضبح .."اومييي يمييي..
وقدموا مع طلعت امينه ..
أمينه>>جيتوا حبايبي هيا غيروا مش نغديكم ..
زكريا>>"بأستغراب .."امي وين ماتقوليش تعبت اخره .."وبخوف قال .."لها كم يوم مش عاجبتني ..
أمينه>>"بحزن .."لا حبيبي مافيها شي الحمدلله نور بس شكلها بتولد مشوا معاها ..
تنفس براحه وبعدين ابتسم" وأخيراً بيجي معين .."
ضحك أنس"ي طفل ي بيبي انت .."
والتفت بعد شاف تليفون امه يرن ..مع رنت الجرس ..
أمينه>>زكريا افتح الباب خليني نشوف غداكم ..
هز راسه بإيجاب ومشا شور الباب .. وأنس قرب من تليفون امه لقاه مسجل "حبيبتي .."
استغرب الإسم مسكه وفتح الخط ..
أنس>>الو ..
سكت الطرف الثاني ..
أنس>>"بأستغراب .."أنسه حبيبتي امي مش ف الحوش وانا ولدها الكبير شن تبي ونقوللها ماناكلش ف الحبيبات راه ..
ضحكت فل ..
فل>>ي تافه هذي انا فل ..
أنس>>"بضحكه .."اووووو صبار شن حالك ..
فل>>الحمدلله عميمه حنان وين ..
أنس>>والله ماشيين يشروا ولد بوبكر وين بتكون يعني..
فل>>مبرد دمك مش قاعده يعني ..
أنس>>لالا داسها ف جيبي ..
سكرت ع وجه ..بحت ف التليفون بصدمه وبعدين ضحك وحطه .. وبرم .."زكريا ساعه تحل ف الباب .."
كان مصبي ع الباب ويبحت ف اللي مصبيه قدامه ..
سليمه>>باتك محمد قاعد؟ ..
زكريا>>"هز رأسه بلا .."لا مافيش حد ف الحوش ..
بحت ف فريال اللي جت ورا سليمه ..
فريال>>تفضلي ي سليمه كنك مصبيه هنا .."وبحتت ف زكريا .."حول ي ليد خلي المراه تخش ..
ابتسم بربكه وفتح الباب ومد يده بمعنى تفضلن ..
خشت فريال ووراها سليمه وهو سكر الباب وخش وراهن ..وهو مستغرب ..
فريال>>"تحكي لزكريا وهي مزالت تمشي .."هذي مرات عمك فتاح .. فتاح يكون خو جدك الله يرحمه ..
زكريا>>"هز راسه مسايرة ..وبحت ف سليمه .."نورتي ي حني ..
ابتسمت .."بنورك حبيبي
.."
خشن جت امينه استقبلتهن وانس مصبي يبحت فيهن ..
قرب منا زكريا وصبا جنبه ..
فريال>>شن صار ف نور ..؟"وبحتت ف امينه"
امينه>>ماعنديش علم والله ان شاء الله خير مشوا بيها واعيه ..
هزت فريال راسها..
سليمه>>هذي مرات بوبكر ..
انس>>اها ي حني بتجري ..
فنص زكريا وبحت ف خوه .. بحتت فيه فريال بحده ..ضحكت امينه ومشت للمطبخ ..
فريال>>امشي اركب دارك انت وياه عليش مصبيين هنا ..
بلع زكريا ريقه ومشا ركب وانس ضحك ولحق خوه ..
بحتت فريال ف سليمه اللي مبتسمه ..
فريال>>شن عندك عارفه ماتجي الا بالشر ..
ابتسمت سليمه ..
سليمه>>هالمره دزني لك فتاح .. بيخطب ميسان لعمر ..
فريال>>"ضيقت عيونها .."وشن المناسبة كني هبله نعطي بنتي للنار ..
سليمه>>"بحده .."كيف ماكنتي واخذه بنتي للنار ي فريال .. وعمها القصد منا الصلح بينا وبين عيال خوه ومافيش خير من النسب ف هالقصه ..
فريال>>لا والف لا خلي القطع قاعد ..
بحتت فيها سليمه .."معناها عطونا اللي عندكم مش نحنا نسيبوكم ف حالكم .."
.......
مصبيه ادير ف الغداء ..
سمعت صوت الشقه نفتح ..
فوز>>حبيبي روحت؟ ..
مازن>>اها روحت .."وخش عليها .."شن اديري ..
فوز>>"بحتت فيه بأبتسامة .."نديرلك ف بشاميل ..بس مزال اشوي عدي صلي وغير قبل ..
ابتسم ..
مازن>>تم ي عسل ..
مع رنت نقالها ..
فوز>>ترا حبيبي مده ليا ..
مسكه ومده لها .. قرا الإسم "حبيبتي .."
مازن>>"بإستغراب .."من؟
فوز>>"بضحكه .."فل .. مسميها زكريا ف التليفونات كلهن حبيبتي مشت فيها ..
دوبه ابتسم بالغصب ..
فوز>>ها فل ..
فل>>فوزو شن الاخبار ..
بحت ف مراته زين .. وبعدها طلع وهو يفكر ..ف اخت فل .. حسها عجباته مش لحاجه بس تضييع وقت .. تنهد وهو يحول من راسه الافكار هذين وخش للحمام ..
......
طلعت الدكتورة من جوا .. قربن منها حنان وسارة ..
الدكتورة>>حاله ولادة للأسف ..
سارة>>"بخوف .."هيا قاعده ف السابع راه ..
الدكتورة>>لازم ي انسة الضغط متاعها مرتفع واجد ..وماعرفتش السبب الاساسي لأرتفاعه غير هكي للأسف باذله مجهود مخليها مستعده للولاده الطبيعيه ..
مصبي بعيد بس يسمع فيهن..تنحنح ..وقال" عندها مشكله ف صمامات القلب صعب عليها الولادة الطبيعية ..".
بحتت فيه سارة بصدمه .. كيفها صدمه حنان اللي بحتت ف ولدها ..
سيف>>"وهو منزل عيونهه .."اكتشفتها ف جيبتها الاولى ..
سارة>>"بعصبيه .."وكيف ساكت عليها راجلها كيف مخليها تحمل من جديد ..
سيف>>"رفع عيونه فيها.."واطي صوتك قاعده ف مستشفى ..
سارة>>"بحده .."طبعاً وهيا تغطي عليه .. تغطي ع الغلط بغلط ..
تبحت فيها حنان وهيا ساكته ومزالت منصدمه ..
سارة>>"تحلف بيدها .."لو صار فيها شي حتلقوني قدامكم انتم وولدكم ..
كيف جا سيف بيحكي ..طلعت الممرضه تجري من جوا ..
"دكتورة المريضه ع وشك انها اتعرض لجلطه قلبيه .."
مشت طول وراها تجري .. وسارة تبحت فيهم بصدمه ..
.....
انوار>>"بضيق .."ماما قلبي مضايق ..
نزيهة>>حتى انا .. ان شاء الله خير .. اختك وينها لتوا ..
انوار>>"بضيق .."قالت بطول اشوية ..
تنهدت نزيهة .."ان شاء الله نور مافيها شي ترا رني عليها .."
انوار>>رنيت مبدري نبيها تجينا ماتردش ..
نزيهة>>ان شاء الله خير ياربي ان شاء الله خير ..
......
.
.
.
#يتبع❤️
#فافي🤍