مكاتيب🤍

الحلقه 15

#مكاتيب🤍
#الحلقه_15🤍
.
.
.
.
.
.
.
.
.
.
.
.
.
.
.
.
.
.
مطار بنينا ماشي وهو يجر ف شنطته وراه .. وجنبه خاله اللي قال .."حتمشي لحوشكم ولا تروح معايا؟..."
"لا مروح ع الحوش  .."
"تعال نوصلك معناها .."
هز راسه بإيجاب ومشا وراه ..
طلعو من المطار قاصدين حوش محمد .. وكالعادة لأن يوم جمعه ف كان خوته كلهم عنده .. ومن ضمن اللي قاعدين فهريه مع تقى ..
هناء>>شن حال سالي ي فهريه ..
فهريه>>"وهيا تحبب ف الكسكسو وحنان جنبها .."الحمدلله .. حامل ي حنه هذا ليش ماجتش ..
هناء>>ماشاء الله ان شاء الله من قسمها ..
"سلمك .."
خشت تقى .."خويلة حنان شن ندير معاكن .."
حنان>>عدي حبيبتي لفوز ف الكوجينه الخارجيه تقلي ف البطاطا عدي شوفي شن صار فيها ..
تقى>>هي .."ومشت طلعت من باب الكوجينه ..الخلفي" ..
ميسان>>"خشت وف يدها صونيه فيها سلاطه .."هذي السلاطه ..
مروة>>"تضبح من الدار .."فل ي فل تعالي نقالي انظر كنه ..
فل>>ندهن ف امي ي ماما صبي فرخه ورد لأمك ..
ورد>>"نفخت وصبت .."جيت ي ماما فل ادهن ف ظهر امي فريال ..
مروة>>شوفي تليفوني كنه رنت خالتك وبعدها معش حصلتها ..
مسكت نقال امها تبربرش فيه ..
مع تخطيمت تركية من جنبهن خشت للمطبخ .."كيف حنان كناينك وين ماشفنا منهن حد .."
حنان>>ع رجالتهن ي حنه مادخلني بحد اللي بتنزل تنزل ماضربتهن ع يديهن وحكمت عليهن ..
هناء>>هذا الصح ..
مع دقت باب الكوجينه وخشت سارة .."السلام عليكم .." ووراها انوار ماسكه معين ..
"عليكم السلام .."
بدن يسلمن .. نطلعوا من المطبخ للمطبخ الخارجي .. خشت تقى ع فوز اللي تلبس ف البطاطا ..
تقى>>نساعدك ..
بحتت فيها فوز وابتسمت .."تعالي مزلت ماقليت نلبس فيها قاعده .."
تقى>>توا نقلي انا معناها ..
هزت فوز راسها .. وردت لشغلها وتقى جت تولع ف الغاز مش تحط الزيت ع النار ..
...
مش فاهمين صاح .. تعالو انردوا اشوية قبل كم شهر ..
........
مقمعز قدامها ويبوس ف يدها ..
سمر>>"بتعب.."ماما حبيبي كويسة انا الحمدلله ..
زكريا>>"بحت فيها بنظرة خوف .."خفت عليك ي عيوني ..
سمر>>خفت عليا صاح ..
زكريا>>كيف مش امي يعني؟ ..
ضحكت ومسحت بيدها ع لحيته .."سلملي حبيب ماما .."
زكريا>>"عيونه دموع .."شن ماما هذي راجل اللي قدامك راه ..
ضحكت من بين دموعها ..ومسكت يده زين .."يخليلي راجلي .."
ضحك وهو يبحت ف وجها وبعدين صبا .."هيا توا ي سلطانه خذيت اذن من دكتورك نطلعوا اشوية .."وقرب من وجها .."بالك تلقي لولدك وحده سمحه تخطبيها له .."وغمزلها ..
ضحكت من جدها وهيا تبحت فيه وهو يبحت فيها بأبتسامة .."هيا حبي .."
ابتسمت ومسكت ف يده مش يحطها ع الكروسة ويطلع بيها ..🤍
......
خش للحوش .. نزل من السيارة وقرب فتح باب الحوش الداخلي وخش ..
سلح كاويشه وهو يسمع ف صوت هرجه جوا ..
خش وين مافي الصوت .. لقا ميسان وحنه وفوز وتقى مقمعزات ويهدرزن مع امه ..
"السلام عليكم .."
"عليكم السلام .."
انس>>مجتمعين عند الرسول ..
بأصوات متقطعه ردن عليه .."أجمعين .."
بحت ف فوز .. ورد بحت ف ميسان .. بعدين قرب من فوز وقمعز جنبها .. طلع من جيبه ورقه ومدها لها ..
خذتها منا بأستغراب .. ركز مع امه بعد قالت .."مارنيتش ع خوك ."
انس>>"يبحت ف فوز وهيا تفتح ف الورقه .."لا ..تليفونه مقفل ..
فتحت فوز الورقه .. وقعدت تقرا فيها .. ملامح وجها خلان انس دموعه يملن عيونه ..
حنان>>شن هذي ..
بحتت فوز ف حنان وهيا دموعها ف عيونها .."ورقة طلاقي .."
شهقت حنان وهيا حاطه يدها ع قلبها .."طلاق شن دوته هذا .."
صبا انس وهو بارم وجه .."النذل طلق ودزلي الورقه مع واحد من الجماعه .. وسافر .."
وطلع وهو يسمع ف عبارات اخته المتلاحقه ف حضن عمتها ..
وامه اللي قمعزت وهيا تبكي وتمسح بيديها ع افخاذها .. "ياربي المصايب اللي ينزلن عليا هذينا ياربي .."
فريال>>"تمسح ع ظهرها .."هوني ع نفسك ي امي هوني عليها كله خير كله خير خيرتها فيها ..
فوز>>"ببكاء .."كنت حاسه ي ميسان كنت حاسه .. اللي يدير فيه كان يدل ع هكي وغيره لا ..
قعدت ميسان تمسح ع ظهرها ودموعها ينزلن وتقى تبحت فيها وتبكي ..
...
واللي كانت سبب ف بكاء فوز مقمعزة وتقرا .. واختها تبحت فيها ..
قمعزت فل .."راضيه ع نفسك .."؟
بحتت فيها ورد بحزن .. وردت وجها قدام وهزت راسها بلا ..
فل>>صلحي الغلط اللي درتيه .. اعترفي لبابا وانس ..
ردت هزت راسها بالسالب وقعدت تبكي .."مانقدرش ي فل مانقدرش .."
صبت فل وقربت منها وبغضب .."ماتقدريش عليش ي حيوانه عليش ..عشانك انانية ونذله وماتبيش اطيحي من عين حد نرجسيه حقيرة تبي كلهم يطلعوا الغلط فيا وانتي متريحه ..كلبه خفيفه .."
وخبطتها بالقوة ع ذراعها وورد تبكي بالصوت ..برمت فل وطلعت من الدار خشت للحمام وسكرت عليها الباب وقعدت تبكي وهيا تذكر ف كل شي ..اشوية وغسلت وجها وطلعت .. خشت من جديد للدار .. مع جيت امها وف يدها التليفون .."امسكي .."
بحتت فيها وخذت من يدها وحطاته ع وذنها .. طلعت امها ..
جاها صوته الغاضب وهو يعيط بعلو صوته .."بإذن الله اندمك عليها ي كلبه ي رخيصه والله دموع اختي نطلعهن من عيونك دمع ي نذلة .. جت ف باتك وعارف مصعب انا مش حيحكي لحد وعارف ان نهايتك ضربة منا وتمت بس انا ي رخيصة ي حيوانه ي خاينة نطلع كل شي من عيونك وقولي انس ماقالها .. وقولي انس ولد محمد مش راجل كان خليتك تكملي حياتك متريحه نقعد مش راجل كان خليتك اتريحي بعد ماخليتي اختي مطلقه .."
وسكر ف وجها ..قال اللي قاله وسكر عليها .. كانت تبحت فيها ورد باستعراب ف حالتها .. هيا كانت مصدومة مش قادرة تقول شي .. دموعها ينزلن حارات ع خدودها .. وف وذنها مزال التليفون .. صبت .. حطت التليفون ع الطاولة .. ومشت شور بدلة الصلاة مش تصلي .. مسكتها من طرفها .. وكيف جايه بتسحبها .. عيطت ورد بعد حقتها طايحه من طولها ..
.....
يجر ف كروستها .. ف نسمة سمحه ف الجو مخليتهم مخليين كل شي حاطينه ورا ظهرهم .. الجو .. الناس .. الطبيعة كل شي ..
لعند حكت سمر خلت زكريا يركز معاها .."زيكو امي .."
زكريا>>نعم ي امي ..
ابتسمت ..وشيرت بيدها ع كافي .."شن رايك نمشوا نقمعزوا فيه بنهدرز معاك اشوي .."
ابتسم وهو يبحت ف الكافي اللي شيرت عليها .."من عيوني ي سمح ي رايق انت .."
ضحكت بخجل وهو ضحك عليها .. قطع بيها الطريق وخش حطها وقمعز مقابلها ..
زكريا>>شن تشربي ي جميلة ..
سمر>>اللي تبيه انت ..
ابتسم وشير للنادل .. بعدين مط شواربه .."مانعرفش نحكي بريطاني .."
ضحكت سمر .. وبحتت ف النادل اللي جا وردت بحتت ف ولدها .."شن تبي ..؟"
زكريا>>عندهم حليب وشاهي؟ ..
ضيقت عيونها وبعدين ضحكت لين راسها وخر .. وهو ابتسم وحك رقبته ..
سمر>>"بحتت ف النادل .."وحكتله ان يجيبلهم هوت شوكلت .."
هز راسه ومشا .. بحتت ف زكريا .."طلبت شي اقرب للحليب والشاهي .."
هز راسه وضحك ..وبعدين حط يديه فوق بعضهن ورفعهن ع الطاولة ..
زكريا>>اسألي انا كتاب مفتوح قدامك ..
سمر>>هابا منك انت كيف عرفتني بنسأل ..
زكريا>>"بضحكه حزن .."امي حنان ادير فيهن الحركات هذينا بعد تبي تطلب مني شي ولا تبي تسألني وتقصقص .."وبحت فيها وضحك .."وشكلها العادة هذي وخذاتها من بعضكن !..
ضحكت سمر بحزن وهزت رأسها بإيجاب .. وتنهدت ..
سمر>>ان شاء الله تسامحني ع كل شي درته فيها .. تسامحني عشان ماكنتش الصاحبة اللي تنسند عليها رغم ان هيا كانت ديما ليا اخت وصاحبة واكثر .."وعيونها تعبن دموع .."تسامحني عشان بحتت ف حاجه مش ليا وهيا لها من الاول لو هك كنت انت توا معايا ومافقدتكش ف يوم ..
زكريا>>"مد يده ومسك يدها .."امي امي حنان طيبة واكيد مش شايله عليك ف قلبها ..
صدمة السؤال اللي ردت بيه وقالت .."وانت مسامحني..؟"
رفع عيونه فيها .. ابتسمت ودموعها نزلن .."عارفه ي امي انك غصب عنك قاعد ادير ف كل شي .. عارفتك انك ماطلعتش غضبك كله ومش عارف كيف تعبر عنه .. عارفه انك سكتت بعد شفتني هكي عيونك ي امي نعرفهن ونعرف من اول لحظه شفتك فيها انك زعلان مزال وغضبك ف قلبك ماطلعتش كله .."
زكريا>>"صبا وقمعز جنبها وباس راسها ..وبحت فيها بعدها .."بس انا عارف ان فرحان بيك ونبيك تصحي مش نعاتبك براحتي ..ونبكي ف حضنك واضميني .. نبي ندير معاك عرم حاجات مش مانحسسكش ف يوم أن انا كنت بعيد عليك يوم من الايام ..
ابتسمت وباست خده .."باهي اللي خذاتك حنان ورباتك .."
ضحك وهو يسمح ف دموعها ..
زكريا>>شن النكد هذا ي مراه خليك فرفوشة ..
ضحكت من جديد ..بعديه خبطاته ع صدره .."قولي ي غضيب ماحبيتش ف عمرك .."
حاول يخفي ضيقته بأبتسامة خجل ..وهو يبحت فيها ويقول بحشم .."امي عاد .."
ضحكت سمر عليه وقرصت خده ..
......
خبط يديه ف بعضهن وقال .."واهو تمينا فيها .. واهو بتقعد مراتي ..وحده غيرك بتقعد معايا .."
هذا بوبكر اللي مقمعز جنب قبر نور ويحكيلها .. يحكيلها ان خطب اختها .. وان حتقعد معاه وحده غيرها .. حتعيش معاه .. ترقد معاه ..تاكل معاه .. عيونه بس كانن يشوفن ف نور ف كل مكان .. دموعه ينزلن ويمسح فيهن ينزلن ويمسح ينزلن ويمسح .. حاس بحسرة ..
...
"بوبكر خويا عاش حياته يحب نور يعشق حاجه اسمها نور .. وبعد ماتت انا نقولك ان الدنيا بهتت ف عيونه وقعد انطوائي بكل .."
سمر>>"حطت يدها ع خدها .."قصة تعارفهم وحبهم نادرة ..
زكريا>>هذا عليش قتلك تعب واجد بعد ماتت .. عكس انس اللي كان من بنت لبنت رغم صرابة الحاج محمد"ضحك .."الا ان انس لا يكل ولا يمل ..
ضحكت سمر ..
....
انس اللي يحكي عليه .. كمل لتوا 3 قراطيس دخان .. وهو يحرق .. اللي قاهرة فوق من ان اخته نظلمت .. قاهرة ان الخونه جت من فل .. ديما كانت عاجبته فل بشخصيتها بمرحها بكلامها بأخلاقها .. لدرجه كان ناوي ان يفتح مع باته موضوعها حتى لو مايكنلهش مشاعر بس المهم ان هو متأكد من ام عياله شنو وشن أخلاقها .. قهرة ان الموضوع جا منها هيا مش من غيرها وطاحت من عينه بدرجه مايتصورهش عقل بني ادم .. نقوللكم عليش؟ .. عشان اي حد بتفكير انس عنده البنت اللي تكلم شاب مش محترمة .. لأن هو كلم وجال بلاد وبلاد وماعقب بنت ف حالها وحاله هذا حال اغلب شباب توا للأسف ..
....
"فل وورد خواتي الغاليات فيهن حن الدنيا .."عيونه دمعن .."حرفياً هنا اقربلي حتى من فوز ..حياتي بديتها معاهن نعرف عليهن كل شي وهنا يعرفن عليا كل شي لدرجه تقريباً انا وامهن وباتهن اللي نفرقوا بينهن بس .."
سمر>>مصعب من زمان يتمنى تجي خلفته كلامها بنات ..
زكريا>>وجن تؤم الشر بس بنات والباقي شباب كلهم ..
ابتسمت سمر ..
.....
سكرت عليها ميسان الباب ..
حنان>>"ببكاء .." شن صار ..؟
ميسان>>بكت بكت لين رقدت ..
حنان>>حسبي الله ونعم الوكيل فيه ..
....
فوز اختي حنونه بكل كيف امي حنان بالضبط .. قلبها ع الكل .. نعتبر فيها امي اوقات متاع نصائح ومواعظ بس نتحشم منها .."وضحك .."ربي طيحها ف راجل اعوذ بالله منا كان نلقا نطلقها منا ..
سمر>>مش كويس؟ ..
زكريا>>"بكره .."نذل وخاين ومش مزبوط بس هيا تحبه نعن جد قلب امها ..
ضحكت سمر ..
....
اما ورد وفل اللي وحده منهن قاعدة تراجي ف الثاني برا .. ف المستشفى .. كانت فل راقدة وحطوط ف يدها تغذية .. وبرا ورد مع مروة امها ورؤوف ..
رؤوف>>اكيد امتحانات اللي هاملة روحها ههك ..
قطع عليه نقاله اللي رن مشا بعيد مش يرد ..
مروة>>شن صاير معاها اختك باتك حكا عرم كلام وانها مسكها تكلم ف واحد بس ماقلش من وبعدها سافر وخلاني انا ف الهم ..
ورد>>"ببكا .."مانعرفش مانعرف شي ..
وقمعزت وهيا تبكي .. عارفه ومتأكدة ان فل مش حتبص عليها لأن تعبف تؤمها مش كيفها تعرف حب فل لها لدرجه ماتحملش فيها اللي صار .. وكانت متأكدة من الشي هذا لذلك قلبها كان يوجع فيها بكل ..
كيف فل اللي فتحت عيونها وجا طول ع بالها صوت انس وهو يسب فيها .. دموعها نزلن بتعب .. وقالت .."ياربي ع الظلم ماهو حار ياربي وريه الحقيقة وخليه يجي يبوس كرعيه مش نرضى عليه ..ولا اختي اللي كاسر ظهري انها اختي ومش حنقدر نتحمل فيها هذا كله مش حنتحمل النظرة اللي حينظروها لها الله يسامحك ي ورد .."
.......
كان مصبي ومبتسم وهو يبحت ف شقته .. كل شي فيها جاهز فاضل بس العروس .. ابتسم بسعادة .. وتنهد براحه ..
....
سيف خويا الشيخ سيف اقربلي واحد ف خوتي اي شي نبيه نقول لسيف وهو معتبرني ولده والله مرات نحس فيه خير من باتي ..
ضحكت سمر ..
زكريا>>امنيتي نشوفه متزوج ونفرح بيه ..
سمر>>ان شاء الله تفرح بيه وانا نفرح بيك ..بس قولي ماحبيتش بكل متأكد؟ ..
ضحك وقال .."واي واي واي ي امي عليك عش ماحبيتش ومش حنحب انا قلبي كاتينه حديد راهو مش اي وحده تملى عويناتي .."
سمر>>"بغرور .."ولدي صح توا ..
ضحك وهو يبحت فيها ..
....
ولو تعلم ي زكريا ع بنت العمة اللي متيمه بيك .. ولو تعلم ع مقدار الحب اللي تحبه لك ماكنتش قلت هكي بكل .. حب تقى لزكريا كان يفوق حب امهاته له ..
اللي كانت راقدة ف فراشها بعد روحن من عند فوز اللي بكت بكت لين رقدت .. وهيا بكت معاها واجد .. وتوا راقدة ع فراشها .. كانت تبحت ف صورته اللي ف تليفونها بحب .. قربتها منها بستها وتنهدت وبحتت ف السقف .. بعدين غيرت عيونها لسالي وبحتت فيها .. تعبن عيونها دموع وفاضن بعد اذكرت ان فاتحة اختها عليها يوم وبس وتمشي لراجلها ..
......
يمشوا مع بعضهم ومزال يهدرزو ..
زكريا>>ماجتش مناسبة ان نحكي معاه ونسأله بس الباين ان ماعنده حد ..
سمر>>"وهيا تلعب بخاتمها .."كان يحب وحده وماصارش نصيب قعد سنقل لتوا ..
زكريا>>ان شاء الله ربي يجيبله النصيب ..
سمر>>ويجيبلك انت النصيب ..
ضحك .."لا اله الا الله .."
ضحكت وصلوا للمستشفى لقوا عمر قدامهم ..
ابتسم بعد حقهم .."وأخيراً .."
زكريا>>سامحنا ي خال جلسة خاصة مع امي ..
عمر>>مسامح مسامح بس حنك سليمة مانظني روحت وهيا بتشوف سمر ..
زكريا>>قوللها روحي ..
سمر>>"بحزم .."زكريا ..
ضحك وقال .."ي عيونه .."
ابتسمت .."خششوني صقعت .."
ابتسموا ..وخشوا بيها .. رقدوها ع سريرها ..
زكريا>>انا ماشي للحوش نغير دبشي وندوش ونجي ..
عمر>>عدي ..
شير لأمه وعزقلها بوسه ردتها له .. ضحك وطلع .. وعمر مبتسم ..
قمعز قدامها ومسك يدها ..
عمر>>كويسة ..
سمر>>"قعدت تبكي .."ياريتك ماقتله ي عمر حاسه بيه مشتت .. حاسه بيه مش عارف روحه شن يبي وليدي عقله مش معاه .. عارفه وين عقله كيف ماكان عقل باته من سنين .. ياريتني ماخليته يجي هنا ولا قتلك جيبه ي عمر قلبي يوجع فيا عليه ..
عمر>>"عيونه دموع .."حتى انا قلتها قلت ياريت ماقتله وخليته غافل .. حاس بيه مشتت .. حاس بيه مش قاعد معانا ف دنيا غير علينا بس ماعنديش ماندير ..
سمر>>"بحتت في خوها ومسكت يده .."معش مزالي شي ولا؟ ..
نزل عمر عيونه ودموعه نزلن طول ..
ابتسمت وهيا تمسح ف عيونها .."هذا العقاب اللي كنت نستحقه اصلا .. بس عمر بالله عليك ماتخلي غير زكريا يغسلني ويكفني ..مانبيش نندفن ف ليبيا ادفني هنا عارفه روحي مش حنلقا اي احترام غادي .. كيف مالقيته وانا حيه .. وراس خيي .."
بحت فيها عمر بصدمة .. وهيا حطت يدها ع فمها وقعدت تبكي ..
عمر>>"مسك يدها .."انا .. انا عارفتيني مانتحملش فراقك مستحيل شن تحكي انتي .. حتعالجي وتروحي ..
سمر>>زكريا ي عمر ..كيف بديت نتعرف ع ولدي ي عمر بنموت قبل مانشبع منا ..
ونهارت بكا .. وهو يبكي معاها ..ضمها له بالقوة وهيا مسكت فيه وتبكي ..
وهو برا كان يسمع فيهم وحاط يده ع فمه وراسه ع الساس ويبكي بصمت .. كان حاس .. كان حاس ان خاله داس عليه شي بخصوص امه .. قلبه وجعه حيفقد امه مره اخره .. حس روحه تايه مالش مكان .. قعد يبكي وهو شاد ع فمه بالقوة وف داخله يقول .."وينك ي امي حنان تجي تواعيني من كابوسي وينك .. الله يسامحكم ع وجع قلبي .."
.......
حنان واه من حنان اللي ترقعها من تركينه تنشرط من تركينه.. اللي قالت لراجلها ع فوز .. وحكا مع انس اللي مابش يحكي السبب الأساسي وحكا للي معروف للجميع ان مازن عقيم وبس ..قعدت ساهره مره ع فوز ومره ع راجلها اللي حساته تعب .. وعقلها عند اصغر عيالها اللي قاعد ف بلاد غير بلادها .. تنهدت بوجع وهيا تقول .."رايفت عليك ي عيون امك .."
........
..
.
.
.
يوم فاتحة سيف وبوبكر ..
.
.....
#يتبع🤍
#فافي🤍