مكاتيب🤍

الحلقه 3

اسفه ع التأخير + لو في أخطاء املائية ماتركزوش نكتب بسرعه ونزلتها بلا تعديل
.....
#مكاتيب🤍
#الحلقه_3❤️
.
.
.
.
.
.
.
.
.
.
.
.
.
.
.
.
بصوت عالي .."باااااباااااا .."
صوت العياط هذا صوت عياط تُقى اللي لها قريب نص ساعه وهيا تعيط هكي .. والدكتور يحاول يعطيها ابرة المهدء وهيا مش راضيه تعيط وبس ..
يبرم وهو حايس ويسمع ف صوت عياطها .. وجعله قلبه وجعاته بشكل غريب .. مش عارف يصرف مش عارف شن يدير .. اول مره ينحط ف موقف هك ..
تنهد بعد سمع صوت تليفونه يرن .. طلعه من جيبه لقاه باته ..
فتح عليه ..جاه صوته معصب ..
محمد>>وينك هذا كله قاعد في المحل نراجي فيك ..
زكريا>>"بخنقه .."باتي .. يمان راجل عمتي فهرية توفى ..
سكت محمد .. معش سمع منا زكريا شي .. ع وذنه التليفون وعينه ع الدار اللي فيها تُقى اللي صوت عياطها خف ..
رد حكا بعد معش سمع شي بكل .."باتي ..؟"
محمد>>"تنحنح .." وين .."ورد تنحنح .."وينك انت وين قاعد ..ف اي مستشفى ..
زكريا>>1200 ..
سكر طول محمد بدون مايسمع اي شي ثاني .. قرب من الباب ودق وفتح ..
بحت ف ميسان اللي حاضنه تُقى وتبكي وتُقى عيونها مفتوحات وتبحت ف الفراغ ودموعها ينزلن ..
وجعاته عمته .. اللي فرحتها ديما ملطوط فيها ..
زكريا>>كويسة توا؟ ..
بحتت فيه تُقى ..
تُقى>>"ببكاء .."كيف نكون كويسة في دنيا بابا مش فيها .. كيف نكون كويسة وهو مش جنبي .. كان حاس ي ميسان حاس .. يقولي مش تمشي مع عيال خوالك للمدرسة .. عارف ان مش حيوصل مش يوصلني للمدرسة كيف مايدير ديما .. بابا حنون ي ميسان احن من ماما .. ماما قاسية ي ميسان .. نخاف من حياة بابا مش فيها ..نخاف .."وردت تبكي بالصوت .."اه ي بابا .. اه ي بابا ..
عيونه امتلن دموع وهو يسمع فيها .. بحت ف الدكتور اللي هز راسه بأسف وشيرله بيده ..وطلع وهو وراه ..
وسيبوا ميسان تقول بنبرة باكية .."ادعيله ي ماما ادعيله .. ادعي انتي بنيته ربي يسمع منك .."
زكريا>>"سكر الباب .."ليش المهدء مادار شي ..؟
الدكتور>>عندها حساسية ضد اي مهدء ماقدرتش نجازف ..
هز راسه بإيجاب .. وسكت
..
مشا الدكتور .. ورد هو قمعز قدام الباب وهو يسمع ف صوت تُقى تبكي ..
.......
تبحت ف وجه راجلها اللي قعد اسود .. قدامه سفرة الغداء .. حست بخوف ..
حنان>>محمد كنك ..؟ زكريا فيه حاجه ..؟
بحت فيها .. من نظرته عرفت أن في خبر شين حتسمعه ..حطت يدها ع قلبها ..
حنان>>"بخوف.." نعلي وليدي كنه ..
مع خشت سالي تاخذ ف المفرش اللي ف المطبخ .. سمعت اللي قالاته حنان صبت مكانها بخوف ..
رفع محمد عيونه فيها .. بعد شافت نظرة خالها خافت .. حست قلبها نقبض .. ورد نظرة لحنان اللي مزالت تسأل فيه ..
محمد>>"برعشه .." ي يمان راجل فهريه ..
جرت لعنده سالي ومسكت يده .."كنه بابا .."
خشت فهريه"هيا سالي هذا كله .."سكتت بعد شافت وضع بنتها ..
سالي>>"بخوف .."خالي احكي بابا كنه ..
فهريه>>كنه يمان شن في؟..
محمد>>"غمض عيونه بأسف .."إنا لله وإنا إليه راجعون ..
عيطت سالي بصوت عالي .. وفهريه تبحت ف محمد وهيا مش فاهمه ..
حنان>>"قربت من سالي وهيا تبكي .."تعالي يمي تعالي ..
سالي>>"بعياط .."قولل كذببه قول مش هوو ..ي خالي بالله عليك بابا لا عارفتكم ماتحبوش بس ماتوصلش للموت .."وصبت وجت لأمها .."ماما ماما بابا ي ماما بابا .. بالله عليك ي ماما بابا .. بابا ..زعلانه منا صح عارفتك بس بابا هو بابا وراس ماما ديري حاجه ..
تبحت ف بنتها وهيا دموعها ماليات عيونها .. نزلن وهيا مزالت نظرتها ع بنتها .. اللي وخرت وعيطت بصوت عالي بأسم باتها وحنان تمسك فيها وتبكي معاها .. بحتت ف محمد اللي يبحت فيها .. صبا وطلع وهيا مزالت مصدومه وتبحت فيه ..وطاحت فاقدة الوعي ..
.........
التموا خوت فهريه وعدوا للمستشفى .. مهما كان راجل اختهم قدام الناس .. وهما عارفين ان يمان من الميتم ماعنده حد ..أجر ..
وصلوا كلهم غادي .. وتأكدوا وداروا الإجراءات وكل شي تمام ..
طلع زكريا بميسان وتُقى ..
هنا الاثنين راكبات لاوره ومزالت تُقى ف حضن خالتها .. وهو يبحت فيها من المرايه .. قطعت قلبه .. معش حكت شي من اللي حكاته مبدري .. تبحت بس ف الفراغ ودموعها ينزلن .. درس قدام محل ونزل .. اشويه وجا فتح الباب من جيهتها .. وهو يفتح ف شيشة الميه .. وصبا قعد يقرا عليها بصوت شبه مسموع ف الفاتحه ..بعد كمل ..
زكريا>>هيا تُقى اشربي اشويه ..
بحتت فيه هز راسه بلعت ريقها وقمعزت كويس مدها لها قعدت تشرب ..
زكريا>>اغسليلها وجها .."وبحت ف ميسان .."
هزت راسها وخذتها منها غسلتلها وجها .. وردتها اتكت ع كتفها ..
رد ركب ..وطلع ..
وصلوا للحوش مع طلعت العمال اللي كملوا تركيب الخيمه .. اللي تبحت فيها تُقى ودموعها ينزلن .. الشباب كلهم مصبيين فم الباب .. يرجوا ف الجنازة والعصر يأذن مش يدفنوه .. درس زكريا بعد فتحوله الباب .. وفتح الباب لميسان اللي نزلت ببنت اختها .. والشباب يبحتوا فيها بألم .. سمع صوت سالي تعيط من جديد غمض زكريا عيونه بألم ..
زكريا>>إنا لله وإنا اليه راجعون..
سامر>>"مصبي جنبه .."عياطهن يقطع القلب ..
ردوا سمعوا صوت عياط سالي بعد خشت تُقى اللي ارتفع صوتها مع اختها .. مع خشت سيف بالسيارة ودرس ونزل .. تنهد بعد سمع صوت العياط ..
انس>>كيف روحت انت مش بتقعد معاهم ..
سيف>>لا حول ولا قوه الا بالله .. كلمتني امي قالتلي احكي معاهن بالك يهدن ..
رؤوف>>صاح خش جرب .. حكا معاهن باتي سالي زادت عياط طلع وهو قريب يبكي معاها ..
سيف>>هي خاش .."وخش وسيبهم يبحتوا فيه .."
سرمد>>وجعتني ميسان مامتلقيه ..
بوبكر>>الراجل اللي شفته بقولي مش حيصبر وحتفسخ ..
زكريا>>تفتك منا امسخ ..
ابوبكر>>"بحت فيه .."عارفك شايف عليه حاجه بس لأن صاحب باتي ساكت ..
مابش زكريا يبحت فيه .. اشويه وسمعوا صوت سيف يحكي ..
قرب من فهريه وقمعز عند كرعيها وهيا مغطيه وجها بالوشاح وتبكي وبناتها ف حضنها يبكن ..
سيف>>عمتي ي عمتي فهريه .. "وحط يده ع كراعها .."اذكري الله كلنا لها ..والله لو البكاء يرد اللي راح كلنا نبكوا وكلنا نعيطوا بس مايرده شي .. انتي مراته وهنا بناته هذين اللي طلع بيهن من الدنيا انتن اللي تفرحنا توا هو عند اللي مايزعل عنده حد ومايتوجع عنده حد .. هذا اللي نحنا كلنا نسعوله وانتن توا اللي تونسنا ف وحشته .. ادعيله ي عمتي .. والبنات اقرن قرءان لبوكن .. عارف فراقه واعر .. وعارف الألم اللي تحسن بيه مايحس بيه حد غيركن عارف مايعوضه شي عارف هذا كله عارفه .. بس لازم سلم خياتي تصبرن ربي ماينزل الابتلاء الا ومعاه الفرج .. ادعنله انتن بناته وربي يسمع منكن .. ادعنله ع قد الحن والحب اللي شفتنا منا ف دنيتكن ..
الكلام اللي يقول فيه سيف كانت تسمع فيه نور وتفكر لو يوم من الايام صار لباتها هكي .. حتبكي عليه وتحس اللي حسن بيه سالي وتُقى .. ولا تفتك منا وماتحس بشي .. دمعتها نزلت من جديد بعد سمعت صوت بكاهن من جديد .. وسيف يبحت تحت بألم ..
فريال>>"حطت يدها ع كتفه .."اقرا قرءان يمي ..
هز راسه وقعد يقرا ف سورة الأنبياء .. بصوت خاشع .. هادي .. يخلي اي حد يخشع معاه مهما كان شن فيه ..
كانن مقمعزات كلهن جنب البنات وامهن ويبحتن ف سيف ...
قْتَرَبَ لِلنَّاسِ حِسَابُهُمْ وَهُمْ فِي غَفْلَةٍ مُّعْرِضُونَ
مَا يَأْتِيهِم مِّن ذِكْرٍ مَّن رَّبِّهِم مُّحْدَثٍ إِلاَّ اسْتَمَعُوهُ وَهُمْ يَلْعَبُونَ
لاهِيَةً قُلُوبُهُمْ وَأَسَرُّواْ النَّجْوَى الَّذِينَ ظَلَمُواْ هَلْ هَذَا إِلاَّ بَشَرٌ مِّثْلُكُمْ أَفَتَأْتُونَ السِّحْرَ وَأَنتُمْ تُبْصِرُونَ
قَالَ رَبِّي يَعْلَمُ الْقَوْلَ فِي السَّمَاء وَالأَرْضِ وَهُوَ السَّمِيعُ الْعَلِيمُ
بَلْ قَالُواْ أَضْغَاثُ أَحْلامٍ بَلِ افْتَرَاهُ بَلْ هُوَ شَاعِرٌ فَلْيَأْتِنَا بِآيَةٍ كَمَا أُرْسِلَ الأَوَّلُونَ
مَا آمَنَتْ قَبْلَهُم مِّن قَرْيَةٍ أَهْلَكْنَاهَا أَفَهُمْ يُؤْمِنُونَ
وَمَا أَرْسَلْنَا قَبْلَكَ إِلاَّ رِجَالاً نُّوحِي إِلَيْهِمْ فَاسْأَلُواْ أَهْلَ الذِّكْرِ إِن كُنتُمْ لاَ تَعْلَمُونَ
وَمَا جَعَلْنَاهُمْ جَسَدًا لّا يَأْكُلُونَ الطَّعَامَ وَمَا كَانُوا خَالِدِينَ
ثُمَّ صَدَقْنَاهُمُ الْوَعْدَ فَأَنجَيْنَاهُمْ وَمَن نَّشَاء وَأَهْلَكْنَا الْمُسْرِفِينَ
لَقَدْ أَنزَلْنَا إِلَيْكُمْ كِتَابًا فِيهِ ذِكْرُكُمْ أَفَلا تَعْقِلُونَ
وَكَمْ قَصَمْنَا مِن قَرْيَةٍ كَانَتْ ظَالِمَةً وَأَنشَأْنَا بَعْدَهَا قَوْمًا آخَرِينَ
فَلَمَّا أَحَسُّوا بَأْسَنَا إِذَا هُم مِّنْهَا يَرْكُضُونَ
لا تَرْكُضُوا وَارْجِعُوا إِلَى مَا أُتْرِفْتُمْ فِيهِ وَمَسَاكِنِكُمْ لَعَلَّكُمْ تُسْأَلُونَ
قَالُوا يَا وَيْلَنَا إِنَّا كُنَّا ظَالِمِينَ
فَمَا زَالَت تِّلْكَ دَعْوَاهُمْ حَتَّى جَعَلْنَاهُمْ حَصِيدًا خَامِدِينَ
وَمَا خَلَقْنَا السَّمَاء وَالأَرْضَ وَمَا بَيْنَهُمَا لاعِبِينَ
تحت كلمات الله كان يندفن يمان ..
تحت بكاء بناته ومراته اللي معش عيطن وهداهن كلام سيف ..
الموت اللي مايعدوهش الناس .. اللي جا من هل فهرية .. الأغلب مشمته وجايه .. وكأن جايات عرس .. الهمز واللمز ف قولة لو ماخذتش راه توا ماتمرلتش .. الكلام تسمع فيه فريال وساكته ماتقدرش تحكي .. الغلط من بنتها ..هيا الأساس وياريت سلم الموضوع ع البرانية بس ..
تركية>>"وهيا تستف ف الحليب .."قلتها والله بنت عمي هذي ماتربح من اول ماخلت جمال وهو متعشم فيها خير ..
مروة>>نحكي فيها لمصعب هذك اليوم قتله ساد عمي اللي مات وهو ماهو مسامحها ..
تركية>>"هزت راسها .." ايييه توا تشوفيها مش ساهلة قادرة من زمان .. توا حقها تاخذه ثالث مثلث منهم كلهم وبذات محمد هذ ..
هناء>>ماوجعتني غير ميسان اللي ف المرتين مشت تحت الكرعين ..
مروة>>"بحتت ف هناء .."عندي بنيات بس من عمايل اختها واللي دراته جت ف هالمسكينه .. واكيد ف العزاء حيسمع عريس الغفله اللي راقد ع وذانه ويطفش كيف الاول اللي طلق وحتى عرس ماداره ..
نفتح الباب وخشت فريال .. بحتت فيهن كلهن وكلهن سكتن ..
فريال>>"بعصبية.." تفي ولعنت ع اللي ماتعد الموت .. تفي عليكن وع اللي حاويينكن .. بنات الاصول يسكتن ع اللي ف حوش عربهن كيف حوش هلهن مش يحكن بيهن .. تفي ..
وطلعت وهيا حاطه يديها ورا ظهرها .. وهنا يبحتن فيها ووجوهن صفر ..
......
سارة>>"وهيا تشرب ف قهوة" مسكينه والله حظها ..
نزيهة>>ياريت قروا الفاتحه قبل كان هذا ازوجت وريحت امها من همها ..
سارة>>"عقدت حواجبها.." بنت قاعدة ف حوش هلها معززة مكرمة مايوصلها شي ..
نزيهة>>"بحزن .."لا يوصل ي سارة ي بنتي يوصل .. بس تفشل ف تجربة وبعدها زواجها يلتغى يوصل ..
سكتت سارة بدون ماترد .. وامها بحتت فيها ..
قبل ماترد تحكي خشت انوار بعرم اكياس تجري .. بحتن فيها وقبل مايعرفن كنها سمعن صوت مسعود عالي عرفن بدون سؤال ...
مسعود>>"بعياط .."تعالي ي بنت الكلبة تعالي .. من وينلك اللي جايبتيه .. ولا السيارة اللي نازله منها ..
صبت سارة وخشت تجري لأختها .. وسيبت باتها مع امها اللي قعد يسب فيها .."ربي بنتك انتي وانتي مانافعه ف شي غير نوم ووكال مافالحه ف شي هم جبته لروحي وانتي اطلعي ي كلبة ي بنت الكلبة .."
سارة>>"تخبط ع وجها .."شن دايره شن دايرة ..
انوار>>"بغضب .."مادرت شي ولا حاجه دبش من الفلوس اللي خذيتهن منك وجيت مع صاحبتي يعيط وينتور ..شافتني العقرب مراته ..
سارة>>سطحيه لين تموتي وانتي هك ..
وطلعت وهيا تبحت ف باتها طلع بعد كمل كلام يحشم وسيب وراه نزيهة انسانة محطمه تبكي وخلاص .. وبنتها تبحت فيها بألم والثانية تشوف ف الدبش بدون اي اهتمام ..
....
من إنسانة محطمة بسبب راجلها .. لإنسانة ماشافت من راجلها الا كل خير ..
فهرية اللي قاعده تبكي .. وبناتها جنبها .. الناس يجوا ويمشوا والكل يحكي عليها كيف بتكون مع هلها وهيا باتها متبري منها .. كيف بيكون وضعها ..
ف وسط هذا كله .. كانت أم حنان او مرات عم فهرية قاعده ف العزاء قدام الناس ..
وجها شامت وجايه تشمت ..
تبحت ف عيونها ف كل شي .."هذا ولدي اللي بعتيه وخليتيه يكره الزواج وسيرته .. لعنك ماتردي .." وعيونها جن ع ميسان .. اللي كان وجها تعبان وعيونها منتفخات .. ضحكت نص ضحكه .."ردة فيك خوه صاح ماتستاهلي بس الله غالب .."
قمعزت جنبها مراه .. قربت منها ميسان تسلم عليها .. عرفتها عمتها ام خطيبها .. سلمت ميسان وعدت بعد ضيحتلها ورد ..
فجرية>>شن حالك ي حنه ..
أمال>>بخير ونعمه والحمدلله..
فجرية>>انتي ام خطيب ميسان ..
هزت امال راسها .. هزت فجرية راسها ..
فجرية>>اكيد موتيين كل شي ..
أمال>>"بحزن .."اي والله نصيبهم الحمدلله ..
فجرية>>اي والله الحمدلله .. رغم ان اختها هذي كانت هاربه 20 سنة ماجت الا توا تخرب ع خيتها ي نويرتي ..
أمال>>"بأستغراب .."هاربه؟ مش كانت مسافرة ببنتها مريضه من زمان وعاشت برا ..
فجرية>>لا ي يام هربت مع راجلها اللي مات هذ وياما صار وياما .. يوم عرسها بفيلوها  ..
أمال>>"شهقت .."يانعلي ..
فجرية>>يالله ي خيتي المهم خذاها وعندها بنتين الله يرحمها ..
قربت حنان "امي تعالي ف صبايا جنك .."
فجرية>>"مسكت يدها .."هي صبيت "وصبت .."
وامال صبت بدون صوت وطلعت ..
.....
فريال>>كيف ي همي هكي ..
صهيب>>"بعصبيه .."الراجل بايع يمي الراجل معش يبي ..
خبطت كفوفها ف بعضهن .."لاحول ولا قوة الا بالله .."
صهيب>>خبري بنتك ان شاء الله ربي يعوضها خير ..
وطلع ومخلي امه محروق قلبها ع بنتها الاخره .. بحتت فيها "ميسان .."
بحتت فيها شيرتلها مشتلها طول ..
ميسان>>نعم ..عمتي امال وين معش لقيتها ..
فريال>>تعالي معاي ..
وخشت بيها ..
.....
زكريا>>"بعصبيه .."تفي ولعنت والله مايجي راجل المسخ ..
سامر>>كان شفته كيف يحكي مع باتي قريب هبكتله وجه .. انزر شن صاير جوا اللي امه طلعت من جوا شحناته ..
زكريا>>وجه البنت الذكر ..الشباب ماسمعوهش؟ ..
سامر>>لالا انا كنت جنب باتي وعمي مصعب ..والباقي بعاد ..
هز راسه ..
سامر>>انت شايف عليه حاجه صح ..؟
زكريا>>"هز راسه .."ماتسألنيش لأن مش ناقص ..
وخذا نقاله رن ع ورد ..
ورد>>ها اوكا ..
زكريا>>ميسان وين ..
تنهدت ورد"في المخزن .."
سكر منها ومشا وسامر وراه ..
......
تبكي بألم .. وقهر .. سمع صوتها .. فتح باب المخزن وخش ومعاه سامر  ..
بحتت فيهم .. قرب منها وحضنها زين ..
زكريا>>شن ي ميسو .. كنت ناويه تسيبينا وتبكي عشان بتقعدي معانا توا ..
ميسان>>"بدموع .."فرحتي ديما ناقصه ي زكريا ..
زكريا>>الله غالب ي عيوني ان شاء الله توا تفرحي فرحه مايحلم بيها حد ..
ردت تبكي وهو يطبطب عليها ..
ميسان>>"وهيا ترشف.."الله يسامح عمتك وخلاص الله يسامحها .. كل شي يصيرلي بسببها هي ..
زكريا>>"يمسح ع شعرها .."هذا اللي مكتوب ي ميسان عاد الله غالب سوا بعمتي ولا بلاها ..
ميسان>>ماخرب عليا كل شي الا هربتها خربت فرحتي زمان وتوا..
وبعدت منا قمعزت كويس وهو يبحت فيها ماقدرش يحكي عارفها تحكي من حرقتها ..
سامر>>نصيب ي ميسان وان شاء الله نصيبك ف شي احسن ..
ميسان>>طول ماعمتك هذي معايا ومافيش احسن ف حياتي ..ياريتها ماردت ياريتها قعدت هاربه بعارها عمرها كله ..
"تُقى كنك هنا .."
رفعوا الشباب روسهم فيها كانت مصبيه ع الباب وجها باهت وعيونها حمر .. وجنبها ورد ..
تُقى>>"بربكه .."ماما تبي اميه قالولي تعالي هن .."وبحتت فيهم كلهم .."شكله مافيش ..
ومشت تجري خشت وميسان ردت نهارت بكا .. والشباب بألم ع حالها يسكتوا فيها وورد انسحبت بعد شيرلها زكريا تقفل الباب .. برمت وطلعت وقفلت باب الحديد عليهم سمعت صوت سيارة درست سرعت خطوتها .. وقفت بعد سمعت حد قال اسمها .."ورد .."
.....
بعد فترة .. سكتت ..
ميسان>>"صبت وهيا تمسح ف وجها .." بنصبي نشوف تُقى البنت مش ناقصه ..
ومشت تجري خشت من الباب اللي يفتح ع المطبخ وهما يبحتوا فيها ..
.....
موت الأب أصعب شي ف الحياة .. تحس مهما كان ف دنيتك ناس بس مايجوش كيف باتك .. السند هو والظهر هو .. ومافيش غيره ف هالحياة يعطي بلا مقابل .. مافيش حياة بدون أب .. وهذا اللي حاسات بيه سالي وتُقى توا ..
تبحت تُقى بنظرة جامده .. تفكر ف حياتهم .. كيف بيعيشوا ووين؟ معقولة يعيشوا مع خوالها .. وهيا عارفة قصة امها معاهم.. تبحت ف امها اللي مقمعزة وتستقبل ف العزاء من الجيران وهلها وهيا لابسة دبش الحداد ..وتفكر .. ليش دارت امها هكي ورضت الذلة لها ولهلها .. ليش؟ وهيا توا محرصه عليهن كل الحرص مايديرن شي غلط حتى سالي مانعه عليها تكلم راجلها .. فكرت للحظه لو امها ماخذتش باتها شن كان صار؟ .. باهي هيا كيف تعيش ف مكان مافيش حد يحبهم فيه ..كيف يصرفن كيف يعيشن .. اذكرت باتها واخر نظرة منا .. دموعها نزلن بصمت .. ف حين أختها بكت بصوت عالي .. بحتت فيها وعرفتها فكرت كيف ماتفكر هيا .. شن مزال داستلنا الدنيا .. اللي بين يوم وليله خذت بونا وقبلها طلع له ماضي مع ماما وخلت الكل يتخلوا عليها .. شن داسه لبنات ماعرفنش هلهن الا من سنتين .. اذكرت كلام ميسان واللي حكاته .. هيا حاسه من زمان ان ماحد مرحب بيهن .. حاسه بكل شي .. وخايفه من اللي جاي .. خايفه واجد ..فطنت بعد طبست عليها مراه تعزي فيها .. تحكي معاها وهيا تهز ف راسها ..
صبت .. حست روحها نخنقت .. تفك ف الوشاح وهيا تمشي ودموعها ردن ينزلن .. فكاته طاح ..
ونور تبحت فيها .. مشيتها مترنحه .. قعدت تفك ف بالطوها اللي لبساته لها ميسان .. معش عرفت تفكه .. قطعت البطم متاعه .. وتشهق وتبكي .. ركزن عليها باقي البنات .. برمت تبحت فيها ورد اللي توزع ف اميه .. الا فهرية اللي كانت لاهيه يعزن فيها صبايا ..مع طلعت ميسان من جوا وقربت منها رفعت يدها وحطتها قدامها .. صبت سالي بسرعه بس قبل ماتوصل فيها طاحت تُقى وطاحت معاها اخر بطمه كانت ف يدها ..
.......
مصبيين يستنوا ف ميسان او اي شي يصير مش يقعدوا ع استعداد ..
سامر>>خلاص مش حيسير شي اكيد فقدونا تعال نطلعوا ..
زكريا>>"بحزن .." هي وخلاص ماحتى ردت اخره ..
وقفوا .. بعد سمعوا صوت عياط بأسم تُقى ..
برموا بسرعه ..
وبحتوا ف بعضهم ف محاوله منهم لطرد ان عمتهم دارت شي ..
......
مصبي ع القبر وهو يبحت فيه ..
محمد>>"بحزن .." كنت ومزلت رفيقي هذك ..اللي وين نطيح نلقاه .. بس الطعنه جت منك انت .. ماعنديش مانقول غير الله يرحمك ..
سمع صوت وراه .."الله يرحمه .."
عرفه من صوته .. قرب وصبا جنبه .."رغم طعنته ليا الا موته كان فاجعه كبيرة ..رغم خذا مني حب حياتي وانا كيف بنبدأ معاها حياتي طعنة كبيرة من رفيق كان سند وظهر وكنت معتبره اخ .." وتنهد "ماعنديش مانقول غير الله يرحمه ويسامحها هي ع اللي دراته وودرت الاصحاب .."
برم بحت فيه بحده .. بدون مايقول شي نسحب جمال ومحمد يبحت فيه .. رد بنظرة للقبر .. وتنهد وبعدين برم وطلع مخليين يمان لمثواه الاخير ..
.......
..
#يتبع🤍
#فافي🤍