مكاتيب🤍

الحلقه 22

#مكاتيب🤍
#الحلقه_22🤍
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
ف دار حنان ومحمد .. ف الليل بعد روحوا من عند عيت جد زكريا .. كانت حنان راقدة وزكريا جنبها يهدرزلها ..
زكريا>>"بعيون مليانة دموع .."تمنيت ان عشت معاها اكثر ..عرفتها اكثر وشبعت منها .. كلامها كان مريح بكل .. "وضحك من وسط دموعه .."كنت نحس فيها تافها كيفي ..
ضحكت حنان وهيا تمسح ف دموعها ..
زكريا>>"دموعه نزلن .."بس ماتوقعتش انها تموت بالسرعة هذي .. كنت نبي نعاتبها انها سيبتني وخلتني بلاها .. بنهزب ونعيط ونبكي بس مش وجع ع حالها لا .. كنت نبيها بصحتها هكي تواجهني تعيط تهزبني .. "ورشف .."كنت متمني عرم حاجات معاها .. انتي فاهمه عليا ي امي حنان؟..
حنان>>فاهمه عليك حبيبي ..
زكريا>>"نزل عيونه وبعدين رفعهن فيها .."باهي انتي سامحتيها؟ ..
سكتت حنان .. وزكريا يبحت فيها ودموعه ف رموشه .. هزت حنان رأسها بإيجاب ودموعها نزلن وقالت بنبرة مخنوقه .."ماقدرتش نزعل ولا نشيل منها بكل ..حتى موتها قهرني وسمطني ف وسط كبدي .."
ابتسم وقرب باس راسها وبعدها باس يدها ..وقال .."ربي يخليلي قلبك الحنون هذا .."
ابتسمت ومسحت ع لحيته ..
وقالت بعد ضحكت .."شن اللي درته لخالك وعمتك مبدري مش عيب ..؟"
زكريا>>"ضحك بأحراج .."يبيها يمي ..وعمر ف هالمحنه كان ليا اكثر من خال ..
حنان>>"بانت ع ملامحها الضيق .."ربي يقربلهم البعيد ..
هز راسه وهو يقول ان شاء الله ..
دق باب الدار وانفتح .. بحتوا فيه هما الاثنين ..
ورد>>يعني انت مخلينا نباتوا مش تحضن عميمه حنان؟ ..
زكريا>>"برم حضن حنان .."امي ي لئيمه ي حقودة ..
ورد>>"بنرفزه .."عارفتها امك تعال معانا لوطه مرايفين عليك عاد ..
زكريا>>لا ثمود .."وضحك .."
كشخت ورد وحنان ضحكت وضرباته ع يده ..
حنان>>صبي لأختك صبي ..
زكريا>>تم ي حنان تم .."وباس راسها وصبا .."
قرب من ورد كر شعرها عيطت طلع يجري وهيا وراه .. وحنان تضحك عليهم ..
.....
راقد ع الصالون اللي ف الصاله .. هو اصلا دوبه واعي من النوم .. اجواء رمضان مزالت طاغية بجدارة .. لذلك النوم وتلخبيطة مزال ..
بحت فيها بعد خشت وف يدها رضاعة معين ..
انوار>>مش كنت راقد؟ ..
بحت ف شكلها .. لابسة توته طويلة اشوية نص كم .. ولامة شعرها ببعثره ومش حاطه ع وجها شي ..هز راسه بإيجاب وقال "نضتت توا معش عندي نوم .."
برمت بحتت ف مالك اللي قرب من بوبكر وهو رفعه وحطه ع صدره ..
انوار>>حتى مالك قالق ماقدرش يرقد .. روتين رمضان متعب
بوبكر>>بكل ..لو بتنزلي دزتلي ورد قالتلي ملتمين ف الجنان. ..
انوار>>"برمت .."ممكن كان رقد معين اما بيه لالا ..
هز راسه وهيا طلعت وهو قعد يلعب ع شعر مالك .. اللي كان بحد كبير يشبه شعر امه🤍 ..
......
اما تحت ف كانوا الشباب كلهم .. سامر وإسماعيل وانس .. وفل وورد وفوز وميسان .. وزكريا اللي وصل فيهم توا هو ومعاه ورد ..وقمعز جنبهم ..
فل>>زيكو عادي نكلموا تقى؟ ..
قرب خذا طرف عنبه وبحت فيها وقال .."وشن المانع ..؟"
بحتت فل ف ميسان .. اللي طلعت نقالها مش ترن عليها ..
زكريا>>"اتكا بظهره ع كراع ورد .."فوز كنك مش عند هل مازن اليوم ..؟
بحت انس ف خوه .. وبحت بعدها ف إسماعيل اللي نزل شاربه بمعنى مايعرفش ..
فوز>>"نزلت عيونها وهيا تحك ف يدها اليمين .."اطلقت انا ..
فنص زكريا بصدمة وقال بعيطه .."كيف ..؟"
..
اما تقى اللي كانت ماسكة نصحفها وتقرا منا .. رن نقالها بحتت فيه لقتها ميسان .. باست المصحف وحطاته جنبها وردت بصوت مبحوح .."الو .."
ميسان>>توتو تعالي حبيبتي كسدي معايا انا والبنات خير ماتقعدي بروحك ..
تقى>>"مسحت وجها ورفعت شعرها .."من معاكم؟ ..
ميسان>>كلنا شباب وبنات خالك وعيال خوالك ..
تقى>>"تنهدت .."زكريا معاكم؟ ..
ميسان>>"وهيا بعيدة وتبحت ف زكريا اللي حاضن فوز وهيا تبكي وتحكيله .."اها وتعالي ماتخليش يحس بشي سلم بنتي ..
تقى>>تمام تمام ..
وسكرت وقعدت اشوية تفكر شن ادير تنهدت وصبت وهيا تكر ف وشاحها .. بحتت ف امها لقتها راقدة ..برمت وطلعت بعد طفت الإضاءة الخفيفة ..
.....
مصبيه اديرله ف عشاه .. وهو مقمعز ع التلفزيون مقابلها ..
سيف>>لو بتنزلي معاهم انزلي ..
سارة>>"بربكه .."لالا خليني هنا نعسانة وبنحاول نعدل نومي اليوم ..
سيف>>"بحت فيها وضحك .."احسن انا أساساً مانبيش احتكاك بالشباب من لي نوع عارفتيني ..
سارة>>"بحتت فيه وابتسمت .."اللي تحكي عليهم الطلبه متاعي راه ..
رفع حاجبه سيف وضحك وهيا ضحكت وبرمت تكمل ف العشاء ..
....
زكريا>>"بعيون مليانه دموع وعصبيه .."كلب تفكيتي منا من الاول مش لك انتي غاليه مش لكل رخيص نعطوك ..
ابتسمن البنات .. مع وصلت تقى ."السلام عليكم .."
بحتوا فيها كلهم الا هو .."عليكم السلام .."
قمعزت جنب فل .. وهيا مربعه يديها ..
وخر زكريا فوز من حضنه وبحت فيها .. غمزلها ابتسمت .. باس ع راسها وقال .."خليك ديما بنت المختار تكسر وماتنكسرش .. مش نهاية الدنيا مزلتي صغيرة والعمر قدامك .."
إسماعيل>>وكأنه اللي يحكي واحد ثاني مش نفس التافه اللي نعرفوه نحنا ..
بحت فيه بحده .. ضحك بربكه ..
ورد>>سبحانه ربي حول حد وحط حد .."وضحكت .."
بحت فيها انس بحده وزكريا زحف كرلها شعرها عيطت .. وهو يضحك ويقول "سكري فمك .."
وتقى تبحت فيهم مبتسمة .. وخر من ورد وقعد كيف ماكان .. وبحت ف تقى اللي نزلت عيونها ..
زكريا>>تقى ..
حست روحها ترجف بكل مافيها .. يديها عرقن .. وخدودها نحرمن وتوترت بمجرد قال اسمها ..هذا كله داخلي بس خارجي بحتت فيه بعين قوية ..
زكريا>>"صبا .."تعالي نبيك اشوي ..
بحتت ف ميسان اللي هزت راسها .. صبت ومشت وراه وهما يبحتوا فيهم .
سامر>>"بضحكه .."من زمان نقوله مشروع حب تقى ..بس هو الله يهديه ..
إسماعيل>>بطل فتفته ..
بحت فيه بنص عين ..
انس>>قال عزم عيت جده صح؟ ..
ميسان>>"هزت راسها بإيجاب .."هو اصر يجوا وهما مارفضوش .. عشاء بس ..
فل>>وشن حديروا؟ ..
بحتت فيها ميسان وبدت تحكيلها ع العزومة .. والشباب كل واحد قعد ع تليفونه ..
ومقابلينهم تقى وزكريا ..
اللي كان حاط يديه ف جيوبه وهيا مربعه يديها وتبحت ف الفراغ ..
زكريا>>"بضيق .."عليش ماقلتي من اول ماعرفتي ..
تقى>>"بدون ماتبحت فيه .."ماليش حق .. بأي حق نقولك راه امك مش حنان وانك انت ولد وحده ثانية بأي حق؟ .. عليش نخربلك ف حياتك؟ ..عليش نخلي فيك مهموم وتفكر وحزين ..
زكريا>>"نزل عيونه .."وانا قعدت فعلاً هكي .. مهموم وحزين ونفكر ف الناس كلها الا نفسي .. ف الحالتين كانت حتكون حالتي وحده ..
تقى>>ولو ..المهم مش انا السبب"وبحتت فيه .."
رفع عيونه فيها بعد قالتها .. كانن عيونها مليانات دموع .. برمت وجها وقعدت تمسح ف عيونها وهو مزال يبحت فيها ..
زكريا>>حقك عليا لو زعلتك انا اسف ..
حطت يدها ع عيونها وقعدت تبكي .. وهو ارتبك وقال .."عليش تبكي مش قصدي .."
تقى>>"ضحكت من بين دموعها .."انا اللي مفروض نعتذر ..
زكريا>>"ابتسم وهو يبحت ف كراعه اللي يحرك فيها .."واحد .. المهم ان اللي صار مايأثرش ع حد فينا .. وجود امي سمر الله يرحمها خلاني نتعلم ان كل الناس ف لحظه تمشي ومعش تقعد .. ولازم الإنسان يعيش يومه لروحه مش لحد فهمتي عليا ولا فترشت ..
ابتسمت وهزت راسها وقالت .."فهمت عليك .."
زكريا>>كويس ..كويس ..
ضحكت وهو ضحك معاها ..
انوار>>ان شاء الله دايما ..
برموا بحتوا فيها هما الاثنين وابتسموا ..
تقى>>جيتي ..
انوار>>"بضحكه .."معين رقدت بصعوبة خليتهم لبوبكر ونزلت ..
ضحكت تقى وجت لعندها ومشن للبنات .. وهو بارم يبحت فيهن لعند قمعزن .. تنهد ورفع عيونه للسماء وغمضهن ..
إسماعيل>>زكياا تعال شوف ..
فتح عيونه وبرم بحت فيه وابتسم ومشا لعنده ..
......
مقمعزين كلهم الا ليلى كانت راقدة وفتاح ..
عمر>>"وهو يتفرج .."بتمشي عادي بكره؟ ..
سليمه>>"تنهدت .."الوليد اصر مانبيش نكسر بخاطره .. وبعدين هو يوم وتم ..
سميرة>>ونحنا مش لازم ي ماما انا بنروح ورايه مليون موضوع ..
سالي>>"بضيق .."حتى انا مش حابه نمشي بصراحه ..
سليمة>>"بصرامه .."تمشوا كلكم مافيش واحد يقعد .. قريب حب كراعي وهو يترجى فيا نجيه وقالي كلكم تعالو بلا قطع زايد اختكن من الاول قالت لو متت خليكم ع تواصل معاه كنكن قلوبكن حجر انتن ..
بحت عمر ف خواته وفنص فيهن وهنا سكتن وعيونهن دموع .. وهو قال .."خلاص يمي كلنا نمشوا ولا زعلك .."
بحتت فيها وبعدين صبت وطلعت ..
عمر>>توا انتن عليش تحكن ..
سميرة>>"بعيون مليانة دموع .."كلام وخلاص ..
عمر>>امكن حساسه ف الموضوع هذا انهن ..
سكتن هنا الاثنين وهنا ماسكات بكيتهن بالسيف وعمر عين فيهن وعين ف التلفزيون ..
......
فتح باب الدار وخش لقاها متكيه وتبحت ف السقف ..
محمد>>"وهو يحول ف جاكته .."مارقدتش ..
حنان>>لا مزال ماجاني نوم وين هذا كله؟ ..
محمد>>"قمعز ع السرير .."كل مره ف مكان واخر حاجه شفت المحل .. انتي كنك مارقدتش ..
حنان>>"تنهدت وقمعزت .."زكريا عزم هل سمر بكره ..
محمد>>"صبا وفتح الدولاب .."عندي علم كلمني عمر قالي وقتله تفضلوا كنك انتي ماتبيش؟ ..
حنان>>لا مش هكي .. بس انا عليك .. وبعدين شفت كيف زكريا يعامل فيك ..
محمد>>"تنهد .."معليش من حقه يحمق ويزعل وتوا يطيب خاطره انتي ماتحطيش ف بالك وشرفيه بكره قدام عيت جده ..
ابتسمت حنان .. وهو بحت فيها وابتسم ومشا شور الحمام ..
....
قمعزن البنات بعاد اشوية ع الشباب .. واللي كانت مستلمة القعدة معروفه من
ميسان>>"بضحكه خجل .."هكي ي بنات بعد شفته صارلي رجفه غريبة ..
ورد>>ميسو مرات قصة زكريا تقربكم ويسير منكم ..
تقى>>"بأبتسامة ..'حتى انا نقول هك ..
انوار>>"بضحكه .."صح ..
فوز>>بس حركات زيكو جو راه عارف ..
ضحكت ميسان ..وقالت .."حتى حنان حسيتها شكت .."
فل>>"عيونها دمعن .."ياربي ي ميسو نشوفك بالابيض ونفرح بيك ..
ابتسمت ميسان وتنهدت ..
وزكريا كان مركز عليها كيف تحكي مع البنات واضح شن اللي تحكي فيه .. ابتسم ..
"عارف ي زيكو شن اكثر شي يحبه عمر .."؟
"شنو .."
"ميسان عمتك .."
سامر>>"هزه .."تي زكريا ..
زكريا>>"انتبه .."تي نعم ..
سامر>>صبي نبيك ...
بحت فيه هز سامر راسه صبا معاه ..
انس>>"صبا .."انا طفيت تصبحوا ..
ردوا عليه خش للحوش ..
فوز>>"عيونها ع زكريا .."نحس فيه الحزن كبره اكثر من قبل اغلب وقته سارح وحتى لما يضحك من ورا قلبه .. حسيت سمر رغم عرفها اشوية بس مست ف قلبه شي كبير ..
ميسان>>مهما كان امه ..
تقى>>ياربي سامحني ياربي سامحني .. زايد جاذبيه وسماحه ..
عيطن البنات وهيا تضحك بخجل ..
ورد>>"بضحكه .."كنت حاسه وربي ..
فل>>انا سمعتك مره تحكي مع ميسان بس مابيتش نحرجك ..
ميسان>>"بضحكه .."انظني نهاية زكريا سامعها تحكي معايا كلكم سمعتوها هك ..
ضحكن البنات وتقى ضربت ميسان ع كتفها ..
..
مد سامر تليفونه لزكريا اللي بحت فيه باستغراب ومد يده وخذاه .. ضحك ..وبحت فيه ..وقال "مافهمتش مشيت شهر ومعاها درتوا كوارث كان اكثر شن صار ..؟"
ضحك سامر وهو حاط يديه ف جيوبه وبحت ع الجنب وقال .."كنت نعرفها من قبل بكل .. كنت نقرا انا وياها ف مدرسة وحده وبعدها انتقلت لمدرسة ثانية ..لذلك نعرفها معرفه شخصية يعني .. وخشت سألتني شن نعرفك وانا الحق خفت تحكيلك وتفهم غلط .."
ضحك زكريا من جديد وبحت فيه .."انت تحكيلي ع وحده حتى شكلها مانجيبه ..اوكي بنت خالتي بس حتى شكلها مانجيبه شنو .. لذلك ي ولد عمي مش حنديرلك جو الشلتت وانا عارفك انت شن .."
ومدله التليفون .. ابتسم سامر وخذا تليفونه..
برم زكريا بعد سمع صوت تليفون يرن .. صبت انوار وهيا تقول "هيا هي .." وبعدها برمت وقالت .."تصحبوا ع خير .." ومشت ..
بحت ف سامر واسماعيل اللي جا لعندهم وصبا ..
زكريا>>شن وضعها مع بوبكر ..
إسماعيل>>انا عارفني مانقعدش واجد بس نسمع ف امي تقول ان باين عليهم مش منسجمين ابدا ..
ابتسم زكريا بأسف وقال .."من فيهم حينسا اصلا .."
وبحت ف شقه سيف .. وبعدها نزل عيونه ..برم بحت ف فل ..وضبحلها ..
برمت بحتت فيه وصبت .. وصبت معاها تقى ..
ميسان>>كنك باتي معانا ..
تقى>>لالا عاد ماتجيش توا نجيكم ف الصبح ماما بروحها ..تصبحوا ع خير .."وبحتت ف الشباب .."تصحبوا ع خير ..
شيرولها وردوا عليها مشت بعدها طول ..
وصلت فل ف زكريا ..
إسماعيل>>انا خاش مش راقد بكل من امس ..
سامر>>خوذني معاك ..
ومشوا بعد قالولهم تصبحوا ع خير ..
والبنات حتى هنا انسحبن وقعد ف الجنان فل وزكريا بس .. اللي قمعزوا وهو يحرك ف العشب ..
زكريا>>كنه مصعب ماحتك خلاكن تباتن؟ شن الجديد ماه نمسك فيكن من قبل تباتن معايا ..
نزلت فل عيونها وبعدها بحتت فيه وقالت بربكه .."مش عارفه بابا رايح غريب الايام هذينا وصايرله مشاكل ف الشغل هذا ليش .."
زكريا>>"بتضييق عيون .."فل ماتعرفيش تكذبي راك .. شن في اخر مره نحكي ..
فل>>"رفعت عيونها ف شقه سيف .."شن كان شعورك بعد شفت سارة ..
سكت زكريا وتفاجأ بالرد اللي رداته .. بحتت فيه وهيا مرتبكه وتراجي فيه يرد .. رد بنبرة مخنوقه .."مافيش شعور هيا توا بمثابة فوز زوجة خويا يعني اختي لذلك مافيش شعور حتى شعوري ناحيتها مافيش .. كنتوا عارفين ان يبيها سيف من الاول؟" .. وبحت فيها ..
هزت راسه بإيجاب بحزن ..وقالت .."كلنا عارفين بس خفنا عليك من نفسك .."
زكريا>>"تنهد .."يلا ربي يهنيها .. ماتغيريش الموضوع كنه مصعب ؟ ..
تنهدت فل بحزن وقالت .."صايره مشكله بيني انا وانس وورد وبابا علم بيها هذا ليش مايبيش احتكاك مع انس بكل .."
زكريا>>"بأستغراب .."انس خويا؟ .. غريبة وشن هيا المشكله اللي صايره ..
بحتت فيه بحزن وضيق وعضت شاربها وبرمت وجها بعدها وقالت .."بالله عليك ماتسألش اكثر .."
زكريا>>"هز راسه .."تمام تمام فهمت ..صبي خشي خلاص ..
بحتت فيه فل وصبت ..وبعدين قالت .."وانت .."
زكريا>>اشويه ونلحقك ..
هزت راسها وخشت .. وهو تنهد من قلبه وبحت ف السماء ..
لحظات وبعدين صبا بتعب وخش وسكر وراه الباب وهو يسمع ف صوت البنات يهدرزن .. ركب من الدروج .. لداره فتحها بحت ف إسماعيل وسامر راقدين تحت .. قرب من السرير ورقد عليه وهو يبحت ف السقف .. كل شي عاشه قاعد يمر قدام عيونه .. لعند واخيرا جاه النوم ورقد ..
......
ف الصبح ..
ناض بوبكر اول واحد بعد نوم متقطع .. بحت ف دار العيال لقاهم راقدين ف حضن انوار هما الاثنين ابتسم ومشا صلى وبعدين فتح الباب ونزل لهله ..
ابتسم وهو يسمع ف صوت الهدرزة .. فتح الباب وخش ..
"صباح الخير .."
ردوا عليه بأصوات متقطعه "صباح النور .. صباح الورد .."
قمعز جنب حنان ..
حنان>>نصبلك حليب ..
بوبكر>>صبي باه .. كيف زكريا راقد مزال ..
حنان>>"مدتله الطاسه .."مزال .. إسماعيل وانس وسامر دزهم باتك ع حاجات وانس دزه شور المحل قاله ديرله جرد قبل مايكمل العيد مش يفتحوا الفرع الاخر .. وهو طلع هو وعمامك ..
بوبكر>>باه ماشاء الله ناشطين ..
هزت حنان راسها ..
ميسان>>"وهيا تشرب ف قهوتها .."حنونه جايينك هلك اليوم ..
حنان>>اها قالها ليا جمال يستر الله ف امي وسليمه ..
فل>>"وهيا متكيه ع الصالون .."مش حيصير شي ..
ورد>>زكريا حيكون قاعد مش حيديرن شي ..
حنان>>"تنهدت .."ان شاء الله .. "وبحتت ف بوبكر ..'خوك عازم عيت جده مش تمشي ..
بوبكر>>ماعنديش وين ماشي انوار وشلتها لأمها امس عيدت عليها ..مزالت راقدة اكيد توا تنزل معاكن ..
حنان>>سيف شال مراته توا مالهم شي طالعين .."وصبت .."كملن ي بنات ووحده تبرم ع الحوش ووحده ادير الغداء .. انا ماشيه شور عمتي ع بال ماناض زيكو ..
هزن البنات روسهن وهيا طلعت ..
وبوبكر بحت فيهن .. وضحك "كنكن تقول ميتات .."
ورد>>"بعيون منتفخه .."باتك لا يطاق بصراحه نوضنا كلنا من 9 .. وتوا 11 ونص ..
بوبكر>>"ضحك .."خلاص احسن مش اتعودو ع الروتين جايات امتحانات ..
فل>>عليك نكد عدي بالله لأنوار ..
ضحك بوبكر وصبا وهو يحط ف الكباية وبحت ف فوز .."امينه امتى تروح .."
فوز>>نهاية الاسبوع ..
هز راسه وطلع ..
ميسان>>هيا بنات هذك هو راه ..
تنهدن وصبن وهنا يلمن ف السفرة ..
...
مع الساعه 12 ..
فتح عيونه .. ابتسم وهو يسمع ف صوت ضحك البنات والهدرزة متاعهن .. شم بنة قهوة وف حليب وشاهي .. حس روحه استطعم طعمته .. ضحك وهو يتقلب .. ورفع راسه بحت جنبه مافيش حد .. قعد يتكسل وبعدين رد رقد وهو يبحت ف السقف .. حوشهم ... داره .. كل شي كان يدل ع الاول كيف كان عايش .. بس هو توا مش عايش ..
ف شي فيه انكسر بشدة مش قادر يرقعه .. حس قلبه متفتفت مش قادر يلمه .. تنهد بحزن .. دق باب الدار ونفتح .. بينت ورد راسها من الباب .. ابتسم وهو يبحت فيها بعيون ضيقه ..مزال فيها نوم ..
ورد>>"ابتسمت .."نضت غزالي صباح الخير ..
رد عليها بصوت مبحوح .."صباح النور .. ريحة شاهي وحليب .."
ورد>>"بضحكه .."الفرخه تقى قاعدة تشرب فيه دايره فته دوبها ناضت جت طول .. صبي هيا مش تلحق عليها ..
قمعز وهو يحك ف شعره وقال .."ليا شهر ومعاها ماشربتش ..غادي ماعندهمش ..مرة مرة المرات ضحكت عليا امي سمر عشان طلبته من كافي .."
بعد قال جملته هذي سكت .. وبان ع وجه الحزن ..وورد اللي كانت مبتسمه وهيا تسمع فيه بان ع وجها الضيق وهيا تبحت ف ملامحه .. فتحت الباب زين وقربت قمعزت جنبه ومسكت يده ..
ورد>>زيكو مش مضطر راك تخفي حزنك علينا هيا امك من حقك تحزن عليها ..
زكريا>>تعرفي شن اكثر واجع قلبي ي ورد ..؟ ان ماشبعتش منها.."حط يده ع قلبه .."فيا غصه هنا ماعرفتش نطلعها .. نحس ف روحي قعدت ناقص قاعد وسط هلي بس نحس ف شي فيا ناقص واجد ..
ورد>>"عيونها دمعن .."حبيبي حقك اللي تحس بيه اللي مريت بيه مش ساهل بكل ..
رفع عيونه فيها .. بعدين برم وجه وهو يمسح ف عيونه ورد عيونه عليها وضحك .."عدي ع بال ماصليت قولي لتقى تحسبني .."
ورد>>زكريا! ..
زكريا>>"فنص فيها .."صبي ..
ضحكت وصبت وهيا تبحت فيه بقلق بعدين طلعت ..وهو صبا وراه طلع للحمام وخش وسكر الباب
....
ف شقة خوه .. فتح الباب بعد ماكان يشوف ف حنه وقعد معاها اشوية .. سمع صوت العيال وهيا تغنيلهم ابتسم وخش ..
بحتوا فيه هما الثلاثه بعد خش ..ضحك بعد حقهم وكأن حتى هيا طفل معاهم .. ابتسمت ..
انوار>>صباح الخير ..
بوبكر>>صباح النور .. تأخير اليوم ..
انوار>>"هزت راسها .."بعد رنيت عليا امس طول معين مارد رقد اخره ..
بوبكر>>مش مشكله .. عندهم عزومة اليوم عندك علم .."وقرب شمر معين وقمعز بيه .."
صبت انوار وقالت .."اها عارفه بندير نوع مالح هنا .."
بوبكر>>كثري الكمية حتى عيت جدي جايين خوالي ..
انوار>>تمام بس طلب صغير هكي .."وشيرت بصوابعها .."
ابتسم وهو يبحت فيها .. وشير ع عيونه ..
اختفت ابتسامتها وهيا تقول .."امسك معين ومالك .."
بوبكر>>انطلقي ماعليك فيهم ..
ضحكت ومشت شور المطبخ .. وهو قال بعد ماوصلت .."عندي مشية للصحراء الايام الجايه .. تقعدي هنا ولا عند هلك .."
بان ع وجها الضيق وبرمت عليه وهيا تقول .."لا هنا .."
هز راسه بدون مايبحت فيها وهيا تنهدت وكملت طريقها للمطبخ ..
.....
تحكي لعمتها ع اللي شاغلها ..
فريال>>ماتخافيش مافيش فيهن وحده تقدر ادير شي ..
حنان>>"تنهدت .."ان شاء الله ي عمتي ان شاء الله ..وانتي فهريه بالله عليك فكينا وتعالي اليوم زكريا مش مضايق منك بكل ..وسأل عليك امس يخي غير الشباب ماخلوش بكل ..
فهريه>>"بضحكه .."والله ي حنان سليمه وفجريه مايتلاقن ي بال انا معاهن ..
ضحكت حنان غصب عنها ..
فريال>>"بضحكه .."معفنه ان شاء الله مايصير الا الخير ..
ردن بأصوات متقطعه "ان شاء الله .."
.....
نزل من فوق .. رفعن عيونهن فيه .. ضحك وقال .."صباح الخير ع جميلات ال مختار كلهن .."
ضحكن وردن عليه ..
ميسان>>الصباح الورد ع اجدع راجل ف ال مختار ..
ابتسم وقرب باس خدها وقمعز .. بحت ف تقى ..وشيرلها بيده ع اللي ف يدها اللي كان مق مليان فته حليب وشاهي وبشكوط ..
تقى>>"بضحكه .."باهي .."وصبت .."تبي بشكوط؟ ..
زكريا>>تؤ كان في اي نوع شوكلاطه جيبي ..
هزت راسها وطلعت .. وهو اتكا ع يده يبحت فيهن شن يديرن ..
زكريا>>شنو هذين ..
ميسان>>موالح جايين خوالك من الجهتين البوم ..
ضحك ..وقال .."كنت ع اساس عندي خالين وخاله توا الله يبارك .."
فوز>>ماما خايفه عشان حيتلاقن امي وسليمه ..
زكريا>>فجريه هابا عليها عارفها انا ..ماتعدلش عليهن تخليهن يحكن لين يشبعن ..
ضحكت ورد ..وقالت .."صراع عزايز .."
ضحك وهو يبحت ف تقى اللي خشت ومدتله المق متاعه ..
زكريا>>احسن وحده ..
وشرب منا .. تنهد بعدها وقال .."الله ليا زمان عليه .."
فل>>اوكي بدير جو كنت ف بريطانيا واهني ..
زكريا>>"رقص حواجبه .."غصب عنك ي صبارة كنت غادي .. بس ماعندهمش حليب وشاهي ..
ضحكن البنات .. مع خشت اسماعيل وسامر وف يديهم اكياس ..
سامر>>"بتذمر .."طبعاً انت ي بابا ماواصل فيك شي ترقد وتنوض بجوك ..
إسماعيل>>حسبي الله ونعم الوكيل منوضنا محمد من 8 تقول جنود عند هل امه من سوق لسوق التيس ..
ضحكن البنات ..
وزكريا بضحكه قال .."تستاهلوا تعالو قمعزوا كنت نحكيلهن ع بريطانيا .."
بحتوا فيه هما الاثنين ورفعوا حواجبهم ..
سامر>>بريطانيا امك .."وطبس عزق فيه شبش ورد .."
بلده وهو يضحك .. بحت ف إسماعيل لقاه طايح عند الصالون وهو ماد يديه وكرعيه قدام المكيف ..
زكريا>>قالك محمد بيفش غله فيا جت فيكم .."وضحك بالصوت .."
قرب منا سامر يضري وقعد يضرب فيه وهو ميت ضحك والبنات يضحكن ع ضحكته ..
.....
وقرب موعد جيت العرب ..
والتحضيرات ع قدم وساق .. ضمن البنات الحوش كامل .. وضمن المربوعه الخارجيه للرجاله .. دارن غداء سريع مكرونه ودارتها تقى .. تغدا بوبكر فوق سندوتشات شاورما مع انوار اللي كانت حايسة بكل ..
وبعد العصر لقرب المغرب كانن البنات يجهزن ف ارواحهن .. جن تركية ومروة .. اما هناء اعتذرت ومشت لهلها .. وسارة برضوا عند هلها ..
لبست ميسان اول وحده وطلعت تبخر .. وكانن قبلها حنان وفريال مقمعزات ويهدرزن مع تركية ومروة .. والبنات ف دار فوز كلهن يجهزن ف روحهن ..
اما الشباب .. ف كانوا كلهم راقدين .. الا انس اللي ماجش اصلا مزال ..
وع الساعه 6 بعد العصر وقبل المغرب ..
جوا اول الزائرين ..
تسلم عليها وبعدين باست راسها وقالت .."كل سنة وانتي طيبة يمي .."
فجريه>>وانتي طيبة وقريبة ي غاليه ..
وكانت حنان اخر من سلمت ع فجرية اللي قمعزت جنب فريال ..
فجرية>>"بمعاتبة .."لواه عليك ي حنان ماحكيتي ي بنتي شي .. ماحكالي الا خوك امس .. وقالي حنان مش حتقدر تجيك يمي راهو صار وصار .. ليش ماحكيتي ..
حنان>>"بضيق .. تنهدت .."ماكنت بنشغلك يمي بيا .. الحمدلله عدت ..
فجرية>>ايييه الله لايسامح اللي كان السبب ..
قلبت فريال عيونها بملل ..خشت ميسان ووراها البنات ..
ميسان>>كل سنة وانتي طيبة شن حالك وحال صحتك ..
سلمت عليها فجريه بدون ماترد .. وسلمن عليها باقي البنات .. وقمعزن معاهم ..
..
بحت زكريا ف المرايا .. كان إسماعيل متكي ع سريره وسامر جنبه يبحتوا فيه ..
زكريا>>كنكم تبحتوا هك ..
سامر>>غير قولي جديات جديات .. انت نسيت سارة ..
قلب عيونه بملل .."نسيت هلها فكونا ي شباب عاد .."
إسماعيل>>"حاط يده تحت خده .."باهي قولي ماشفتش وحدات سمحات ف بريطانيا ..
زكريا>>"برم بحت فيهم واتكا ع الزيانه متاعه .."شفت مزز ..
سامر>>"قمعز .."ي مينا احلى من الليبيات ..
ضحك زكريا ورفع حواجبه بإيجاب ..
إسماعيل>>"تنهد وبهيام قال .."والله مافي احلى منهن الليبيات ..
بحت زكريا ف سامر ورفع حاجبه باستغراب شيرله سامر بيده بمعنى فايت فيه الفوت ..
سامر>>حب وعشق ي حبيبي .. هيا زيكو خلي عيت الولهان بروحه ..
ضحك زكريا ومشا وسامر وراه وإسماعيل ضحك عليهم وصبا بسرعه ف جرتهم ..
نزل مع خشت سليمة وبناتها وليلى ..اللي كانت تخشش فيهن حنان ..
ابتسمت سليمة وهيا تبحت ف زكريا اللي ابتسم وهو ينزل لعند وصل فيها ..
زكريا>>نورتي ي قلبي .."وباس راسها .."
سليمه>>منور بيك حبيبي بمينتك وبيك .. شن حالك ي حني ..
زكريا>>الحمدلله ي حني وانتي شن حال صحتك ..
هزت راسها وهيا تقول .."الحمدلله ي باتي الحمدلله .."
سمع صوت من وراه يقول .."ونحنا ي ولد محمد مايسلمش علينا .."
رفع عيونه ف حنان اللي غمضت عيونها وفتحتهن بمعنى فوت .. برم وابتسم بمجاملة .. بحت ف خالاته لقاهن يسلمن ابتسم وقرب من فجريه ..
وسلم عليها وباس راسها وقال .."نورتي ي حني .."
فجرية>>منور بيك ..
نظرة فجرية ضايقت ميسان ..كيف كانت تبحت ف زكريا .. خشوا وراه الشباب سلموا عليها وصبوا جنب زكريا اللي يراجي ف خالاته .. اللي برمن عليه ومعاهن ليلى ..
سالي>>"سلمت عليه بالخد .."شن حالك حبيبي ..
زكريا>>الحمدلله حبيبتي ..
ضحكت وبرمت تسلم ع إسماعيل وسامر ..
بعدين سميرة اللي قالتله .."الله يبارك عليك ويحفظك .."
ابتسم .. لعند وصلت فيه ليلى اللي مدت يدها وقالت بدهشة جت ف عين تقى اللي دوبها خشت ووراها انوار .."وأخيراً حقيت زكريا البطل .."
ضحك ومد يده سلم عليها .."كيف حالك بنت خالتي .."
ليلى>>الحمدلله كل سنة وانت طيب ..
هز راسه وهو يرد عليها .. بحتت جنبه ف إسماعيل وهزت راسها فهم انها ماتسلمش .. وبحتت ف سامر اللي ابتسم وهيا ابتسمت بخجل وقمعزت ..
قرب زكريا من سامر ومسكه من رقبته وهو يقول .."طلعنا ي حنونه .."
ضحك سامر وإسماعيل .. وحنان اللي تبحت فيه بأبتسامة ..بعدين غيرت عيونها لأنوار .."تعالي انوار سلمي .. هذي مرات ولدي بوبكر .."
"الله يبارك .. ماشاء الله .."
ابتسمت انوار بخجل وخشت تسلم .. وتقى اللي اداركت الوضع سلمت .. وع ليلى كان سلامها بالسيف ..كلهم عادي كانوا الا ثلاثه ميسان .. وتقى وحنان ..
.....
حقها ميسان ماتريحش .. بذات ف وجود طليقها السابق .. "مهند .."
اخ جمال وخال زكريا ..
خش فتاح قبل عمر .. وسلم ع محمد وخوته وقمعز .. بعدين خشوا الشباب زكريا وإسماعيل وسامر وبوبكر .. سلموا وقمعزوا حتى هما .. وضع زكريا بخواله عادي .. بس كان تناقضات بينا وبين مهند جداً دقيقة ..
زكريا>>باتي فتاح عمر وين ..؟
فتاح>>برا رن تليفونه يكلم ..
هز زكريا راسه وجا يبي يصبي ..
مهند>>قعد عندك خال واحد ثاني ي زيكو ..
رفع عيونه فيه وابتسم بغل .."خال أصلي مايوقفش اللي بدأ فيه ي خال .."
رفع مهند حاجبه وهز راسه .. وبوبكر قرص زكريا ف يده .. بحت فيه فنص فيه بوبكر هز راسه بإيجاب ..
خش عمر ..وهو يطلق ف السلام .. سلم ع الموجودين .. لعند وصل ف زكريا .. خبطوا يدين بعضهم ...
زكريا>>وين هذا كله ..
عمر>>سامحوني ي جماعه تليفون مستعجل ..
محمد>>معذور ي عمر شن حالك وشن داير ..
عمر>>والله حال الدنيا ي محمد قاعد مره هك ومره هك ..
فتاح>>الدنيا ديما مره فوق ومره لوطه ..
صهيب>>صدقت ي عمي ..
وشوش سامر لزكريا .."باتي تحسه نض ربوا فيه ..'
بحت فيه زكريا وضحك ..
رن نقاله بحت فيه .. صبا طول وطلع .. لقا فوز فم الباب ..
زكريا>>منورة ي طشه .. "ورفع عيونه ف الباب .."ام شدوق كنك مصبيه بعيد ..
تقى>>هك خير مانبي حد يشوفني ..
استغرب ردها وبحت ف فوز اللي هزتله راسها يخش .. برم وخش ..اشويه وطلع اسماعيل خذا السفرة من تقى وخشت بعدها هيا وفوز ..
...
تقى>>"بقهر .."ادير ف طروح شرايني تعرفه من زمان ..
انوار>>تقى بلا هبال بنت خالته ف الاخر ..
ورد>>ماه نحنا معاه عادي ماتكبريش الموضوع ..
تقى>>"بعيون مليانة دموع .."انتن خواته بس هيا مش اخته مش اخته ..
بحتت فوز ف فل وهزن راسهن بأسف ..
خشت ميسان وهيا تقول .."الوسط مشحون شحنه سوده .. حاسه ان حيصير شي .. فجرية تعزق ف الكلام ع سمر عيني عينك لو يسمعها زكريا حتسير مشكله كبيرة .."
فوز>>حني حقودة ركزت عليها بعد سلم زكريا ع سليمه ..
انوار>>يستر الله ..
خشت ليلى وهيا تقول .."بنات نساعدكن ف شي .. وضحكت بأحراج بصراحه مليت جوا بروحي وصبايا كبار وهكي .."
فوز>>طبعاً حبيبتي تعالي خليك معانا ..
ابتسمت وصبت جنبهن .. اشويه وانطلقت معاهن ف الهدرزة وكلهن معاها عادي الا تقى ..
..
إذن المغرب .. وصبوا كلهم صلوا ..
وقعدوا بعدها يهدرزوا ف مواضيع عامه .. خش إسماعيل بصفرة العصير للبنات من الباب الخلفي ..
فوز>>شن الاجواء عندكم ..
اسماعيل>>"بقرف .."خالك المقرف كان يبطل عزق ادواس وزكريا تورمن يديه من القرص ..
ضحكن البنات ..
انوار>>اكيد بوبكر ..
إسماعيل>>كل مايحكي كلمه يقرصه ..
ضحكن من جديد وميسان قالت .."حتى هنا الجو مشحون بس ماحد قرص حد..."
ضحك إسماعيل وطلع .. والبنات يكملن ف عزومتهن ..
ليلى>>زكريا مانعرفش واجد حتى ف عزاء خويلة كان هو حزين بكل لدرجه ان مشيت وروحت ومافطنش بيا ..خوالي كانوا يحكوا عليه ديما لدرجه كنه متشوقين نحنا الشباب نعرفوه بكل ..
فل>>عسل زيكو مافيش منا ..
ابتسمت ليلى ..
وتقى تبحت فيها بنص عين ..
..
بدن البنات يحطن ف العشاء .. وكان الصبايا كل وحده وتبسيها .. رز بالخلطه .. واربع انواع موالح .. والرجاله صفر ..
عطن الصبايا قبل .. وميسان من كلام فجرية معش طلعت ومعاها تقى .. جو الشباب ..
زكريا>>ميسو دسيلي من كل شي تمام ..
ميسان>>حاضر حبيبي عدي بس توا يصقع ..
بحت ف تقى اللي تغسل .. وبحت ف ميسان بمعنى كنها ..غمضتله عيونها بمعنى بعدين هز راسه وطلع ..
خش اسماعيل وطلع الثانية واخرهم سامر بصفرة المشروب ..
...
وقمعزوا كلهم يتعشوا عادي ..
وشوش جمال لمحمد .."نبيك ف موضوع بعدين .."
محمد>>"بحت ف عمه وخوته .."احكي توا شن في ..
جمال>>"بحت حواليه ورد بنفس الهمس .."بنخطب منك فهريه ..
"تؤتؤتؤ عليك غباء .."
بحتوا هما الاثنين ف زكريا اللي مرفع يديه بعد طاح عليه طرف الموالح وصبا ..وهو يسمح فيهن بالمنديل ..
عمر>>ني ساهل تغير قمعز كول ..
زكريا>>"وهو ماسك نقاله .."لالا توا نقوللهن يجيبلي شي نلبسه .."وحط التليفون ع وذنه .."ها ميسان
ومشا من جنبهم .. بحت إسماعيل ف مهند اللي بعيونه كان مع زكريا .. وركز عليه حتى عمر ..
صبا مهند وخش للحمام اللي مقابل .. بحتوا عمر وإسماعيل ف بعضهم وقعد ياكب إسماعيل بشي من العصبيه وركز عليه سامر ..
اما محمد رد ع جمال وهو يقول .."نحكوا بعدين .."
..
صبت عند الباب الفاصل ..
ميسان>>هاك ..
مسكها منها وقعد يحول ف سوريته اللي ملبزة .."راجي خوذي هذي.."
صبت تراجي فيه ..
ركز ع الصوت جت ميسان بتحكي حط يده ع فمها ..
فجرية>>اللي مات تريح واللي قعد عايش هو اللي يعاني ..
سميرة>>"بعصبيه .."من مبدري ونقول معليش مراه كبيرة ونفوت عشان ولد اختي بس وين ي مراه انتي فتي حدك واجد .. احترمي نفسك والميت اللي تحكي عليه ..
بحتت فريال ف حنان .. قبل ماتحكي نطقت فجرية ..وقالت .."ولد اختك من وين لوين ي ماما .. اللي رضعت بنتي واللي كبرن بنتي وقت اختك كانت تجري وراه الرجاله .. وتجري مش اطيح حيشان الناس .."
هنا سمعها زكريا .. اللي فنص وبحت ف ميسان اللي عاضه شاربها .. دفها وخش ..
قبل ماتلحقه ميسان .. سمعت صوت قال .."ميسان .."
بحتت فيه .. وفنصت بصدمه .. ف نفس الوقت انفتح باب الحوش وخش انس ..
......
.
.
.
#يتبع🤍
#فافي🤍