مكاتيب🤍

الحلقه 4

#مكاتيب🤍
#الحلقه_4❤️
.....
.
.
.
.
.
.
.
.
.
.
.
.
.
.
.
اول شي قبل مانبدأ الحلقه اي حد مش حاب الرواية مش ضاربه حد ع يده ان يقراها .. ثاني شي اللي مش فاهم كويس الشخصيات يعاود يقراهن .. وثالث شي قراءة ممتعة ..
....
..
.
.
.
قبل نص ساعه من اللي صار كله .. كانت ورد حاضنه بنت عمها ..
بعدين وخرت وبحتت فيها ..
فوز>>"بضحكه.."شن جوك شن دايره ..
ورد>>"مبتسمه .."الحمدلله وانتي الباين هك ان جوك تمام ..
رمشت عيونها بهيام وورد ضحكت عليها ..
"فوز .." .. برمت بحتت ف راجلها اللي حتى ورد بحتت فيه.. رفع شنطتها ضحكت ومشتله تجري وورد تبحت فيهم .. شافتها ضحكت وهو ضحك معاها .. بعدين شيرتله وجت شورها .. قدمن هنا الاثنين من الخيمة ..
فوز>>كيف مات راجل عمتو فهرية ..
ورد>>حادث ..
وخشن وهنا يهدرزن ...
مسيبات وراهن مازن راجل فوز عيونه معاهن لين خشن بعدين ابتسم ومشا لخيمه الرجاله ..
....
بعد نص ساعة ..
فتحت عيونها وهيا تبحت حواليها ..العطر اللي ع المخده اللي راقده عليها خلاها تعرف هيا وين ..
نفتح باب الدار .. وخشت حنان وسكراته وراها .. تبحت فيها تُقى بعيون تعبانة .. قربت منها وقمعزت ع السرير ومدت يدها تمسحلها ع شعرها ..
حنان>>شن تحسي ف روحك توا؟ ..
ردت بصوت مبحوح .."احسن الحمدلله .. شن صار؟ ماما وين ..؟"
حنان>>ماما برا عندها ناس جايه تعزي فيها كانت عندك من اشويه .. وسالي معاها .."وسكتت اشويه ..وبحتت فيها .." خايفه ي تُقى انتي؟ ..
قعدت تبحت ف حنان وهيا ساكته ..
حنان>>احكي ي ماما ماتخافيش .. خوالك مش حيخلوكم .. و
قطعتها وقالت .." عميمه انا نعرف ان ماما هربت مع بابا .. بس شن اللي دراته ماما وصل ميسان لحالتها هذي ..؟"
سكتت حنان وبان ع وجها الضيق .. وبحتت قدامها ..
تُقى>>"بنبرة باكية .." احكيلي بالله عليك .. انا عارفه ماما غلطت وقت هربت مع بابا .. بس شن دخل ميسان ف القصه .. ي عميمه تحسابي الموضوع ساهل انك قاعده ف مكان ماحد متقبلك فيه .. يشوفولك ع أنك حشرة بلا معنى ..
حنان>>حشاك ي ماما مافيش حد يشوفلك هكي وهذا حوش جدك ماحد يقدر يشوفلك هكي فيه ..
مسكت يدها بتوسل .."بالله عليك قوليلي بالله عليك.."
تبحت فيها بألم .. بعدين هزت راسها .. وبدت تحكي .." خويا كان خاطب امك .. تقدري تقولي كان ف اتفاق تبادل بين باتي وعمي الله يرحمهم .. ان انا ياخذني محمد وان جمال خويا ياخذ امك .." وتنهدت وردت تحكي .." طلع عرسي انا قبل ع خالك وازوجنا .. وبعدها بسنين جا باتي وطلب امك من جديد لجمال .. ووافق عمي بدون ماياخذ شور امك .. "دمعن عيون حنان وهيا تحكي .. مسحتهن .."خلاص تمت الخطبه .. وانا كنت نعرف ان فهرية خاويه ف يمان .. اللي هو باتك"وبحتت ف تُقى اللي تسمع فيها بوجه تعبان .."يمان كان صاحب محمد راس .. ولأن جمال ومحمد اصحاب من زمان كان يمان صاحب حتى جمال خويا .. تمت الخطبه .. واعتراض فهرية ع جمال خويا رغم ان عمي ارغمها عليه رغم كنت متأكدة انها حدير شي .. رفضت فهرية رفض قاطع ان تنقرا الفاتحه الا ليلة العرس .. وهددت جدك ان تش.نق روحها لو ارغمها ع الشي هذا .. ومحمد كان من حبه لأخته موافقها ف الموضوع هذ .. سمع يمان بعد ماروح من السفر اللي صار .. وجا خطب .. ولأن باتك كان من الميتم لزه عمي وصارت قصه طويلة وصلت بمحمد يمد يده ويضرب اخته ويجبرها اجبار ان تنقرا فاتحتها ع جمال .. رغم عياطها .. ماحد سمعلها .. ومحمد كان رافض باتك رفض قاطع .."وبحتت ف تُقى .." عمي ومحمد عقليتهم ان لو الشخص مش نفس مستواهم مستحيل ياخذوا او يعطوله وباتك كان ع قده .. تمت الفاتحه .. وقعدت فهرية مرات جمال .. وماحد جاب سيرة لجمال ان هيا رافضته حتى مني انا ماطلعتش.. "وحكت مقدمة انفها ..وبتوتر .."امك دارت واجد مش ترفض هالزواجه .. بس امر الله صار .. وجن ايام العرس .. ومن الكوافير جا خذاها يمان وهربت معاه ..وكيف ماتشوفي توا ف الوضع ..مش غابي عليك شن صار بعدها .. خويا الثاني بعد كبر وعرف .. صارت مشكله كبيرة بين باتي وعمي وعمي الثاني ونهايتها قاطعوه نهائي .. انا ماقدرتش نسيب محمد .. وبعد سنين مش يردوا العلاقات قروا فاتحه خويا الثاني ع خالتك ميسان .. بس طلقها قبل يوم العرس بيوم .. خشت خالتك ف حاله نفسية مايعلم بيها الا ربي ونجت منها بأعجوبة .. منها قاطع عمي باتي نهائي وخوته الاخرين لين مات ..وهذي القصه كامله ..
قعدن ينزلن عيون تُقى وهيا ترشف .. رفعت عيونها للسقف .. وجعتها ميسان واجد .. وحقدت ع امها واجد باللي دراته .. كيف قدرت ادير هكي ف هلها وف روحها وفيهن .."حطت يديها ع وجها ونهارت بكاء .." وحنان تبحت فيها بألم .. ألم حنان اضعاف مضاعفه من ألم تُقى حنان اللي عاشت حاجات اصعب بواجد من اللي حكاته لتُقى اللي ياما نحذف من القصه .. بس مش ماتسودش صورة امها ف عينها اكثر من هك .. لو تعلم تُقى اللي دراته امها ف حنان .. قلبها الصغير اللي يعشق زكريا حيحرج منا ومعش يلتفت حتى له مش ما يأذيش ..رغم هك .. احتوتها وتُقى قعدت تبكي عندها بألم .. عذرت ميسان ع كل كلمة قالتها وتوا حطت عرم اعذار لأي شي يصير معاهن ..
.....
اما اللي تحبه .. واللي اليوم حصل رعشات من الصبح .. راقد ف داره ف حوشهم .. يذكر فيها كيف كانت كيف الميته بعد شمرها وحطها ف دار إسماعيل اللي فيها سرير له غادي .. كيف بعد ناضت قعدت تعيط .. لعند هدت بروحها ورقدت .. تنهد بوجع ع حال عمته وبناتها ..
زكريا>>ربي مايذوق حد نارهن ..
سمع شخير خوه جنبه بحت فيه بأزدراء .. وحط يده ع فمه سكره له ..نط انس مفجوع طول دار روحه راقد ..
بحت انس حواليه .. وبعدين تنهد وحط راسه ع المخده ورد رقد وزكريا يضحك بالهزاز ..
سامر>>ارقد ي زكريا ..
زكريا>>"رفع روحه وبحت فيه .."توا بالله عليك قادر ترقد من هرجت هذا ..
سامر>>لا بس اللي غالب داره فيها الشياب الكبار ماقاللكم حد ماتزيدوش ديار ..
زكريا>>"عزق فيه المخده .."ارقد ..
سامر>>"خذاها وحطها تحت راسه .."الله منور كنت نبي وحده اخره من مبدري عيني ع متاعك ..
زكريا>>نذل ..
سرمد>>"وهو راقد .." تؤتؤ ارقد انت وياه وريحونا ع هالليله ..
بحتوا زكريا وسامر ف بعضهم وضحكوا ..وردو رقدوا ..
.....
حل الهدوء عند الرجاله .. اللي عكسه عند الصبايا .. اللي مش بايت حد غريب .. وقعدت تُقى ف دار زكريا وإسماعيل وخشنلها البنات مش يباتن معاها دارت روحها راقده وهيا تذكر ف كلام حنان طول الوقت .. حستها داسه شي .. بس مابتش تضغط عليها .. تسمع ف البنات يهدرزن .. ابتسمت بينها بين روحها .. انها راقده قاعده ع مخدته هو وفيها ريحته .. تنهدت بضيق وردت تفكر اخره وهيا تسمع ف البنات كيف يهدرزن من ضمنهن فوز اللي اقنعت راجلها تبات ..بس مش معاهن ميسان ..
ميسان اللي غارقه ف حزنها.. ورقدت ف دارها ومعاها سالي اللي ماسيبتهش .. الاثنين راقدات هاربات من كل شي .. وف الدار اللي جنبهن .. كانت فهريه راقده ع صدر امها بعد ماكنت تبكي عليه رقدت وفريال تفكر ف بعدين شن حيصير .. رقدن عيون كل من ف الحوش ..
.....
راقده وهو راقد جنبها بس مافيش فيهم حد راقد ..
ابوبكر>>باتك جا للجنازة مبدري ..
هزت نور راسها .."صاحب واجب .."
بحت فيها ورد بحت قدامه ..
نور>>"بعيون مليانة دموع .."عارف ي بكي .. بكاء وانهيار بنات عمتك اليوم خلاني نسأل روحي .. لو صار لبابا حاجه حنبكي عليه؟ وننهار هكي ولا حنقول احسن وتفكيت؟ ..
بحت فيها .. وهيا بحتت فيه ..شاف نظرة حزن ف عيونها واحتياج لأهم حد ف حياتها ..
نور>>"ردت بحتت ف السقف .." الباين باتهن مسلفلهن كل خير .. بذات تُقى .. تحس ان كان لهن سند مش اب ف حياتهن وخلاص .. عزوه .. حتى وقت اطيح تلقا باتها .. بس اللي كيف حالتنا .. يبكن ع بوهن؟ يوجعهن .. يذكرن حاجه حسنه له ويترحمن عليه بيها؟ .. نخاف نكون انا هكي نغضب ف ربي بتفكيري هذا بس انا ماشفتش منا خير بكل .. مش نذكرله حتى حسنه وحده ..
طول ماهيا تحكي كانن دموعها ينزلن منها ..دمعه وراء الثانية .. تحكي بنبرة مخنوقه وهو يبحت فيها بحزن .. قرب منها وضمها عنده زين ..
ابوبكر>>انا بوك وخوك وحبيبك وراجلك واللي تبيه ..
نور>>"بخنقه .."ربي يخليك ليا ..
ابوبكر>>ولا يحرمني منك ي عمري كله .."وباس راسها .."زعلتي وليدي هكي ..
بحتت ف بطنها وضحكت من بين دموعها وهو ابتسم وتنهد وهو يبحت فيها ..
........
الصبح .. ناضوا الكل طبيعي كيف حوش اي عزاء ..
فطروا الناس اللي جت الصبح بدري .. وتُقى اللي مارقدتش الليل كامل كانت راقده الوحيدة بينهم ..
فهرية>>"بصوت مبحوح خشت للمطبخ .."بنات درتن دورة ع تُقى ..
فل>>راقده ي عميمه مزالت ..
هزت راسها وطلعت ..
ميسان>>"بوجه تعبان .."هيا بنات وحده فيكن تكلم واحد من الشباب اطلعله ..
حنان>>امي ورد كلمي خيك قوليله تعال شيل ..
ورد>>هيا .."ورنت ع زكريا ..رد عليها بصوت غاضب .."هاا الهم ها ..
ورد>>"بخوف.."تعال شيل الفطور ..
سكر ف وجها .. بحتت فيهن بصدمه .."قليل الادب سكر ف وجي .."
حنان>>"ضحكت .." مواعيهم سيف بدري راح عليكم يومين توا من المدرسة ..
فل>>اكيد مش حيعطو شي جديد توا ..
حنان>>"خذت السفرة وجت بتطلع.." بعدين ي ام لسان انا قتلك خيك كنت كلمتي رؤوف بدل خيك محروق الدم ولدي المغضوب ..
وضحكت وطلعت.. ضحكن البنات ...وردن يشتغلن ..
رن نقال فوز ..بحتت فيه وابتسمت وطلعت ..
ورد>>راجل فوز سموح اول مره نركز عليه ..
ميسان>>قصدك مش شايفتيه قبل ..
ورد>>لا ف العرس ماخشش ..
ميسان>>صاحب انس راس وديما هنا كيف حباته فوز اماله ..
ورد>>نسيت بس ماعمرش مر عليا ..عجبني"وضحكت .."
زكريا>>"وهو مصبي ع الباب .."من هذا؟ ..
بحتت فيه بخوف .."فجعتني .."
قعد يبحت فيها بشك ..
ميسان>>"بربكه .."هيا ابدأ طلع الشباب وين ..
زكريا>>جايين ورايه خشن جوا ولا البسن خرا ع روسكن ..
ميسان>>خاشين بكل اقعد فيها ..
وبرمت طلعت ووراها فل ..وورد ..
زكريا>>توا نمسكك توا يكمل العزاء ..
بحتت فيه وطلعت لسانها وطلعت تجري ..
طلع ورد خش خذا السفرة الثانية ..مع خشت فوز ..
فوز>>"بابتسامة .."زيكو حبيبي شن الجو ..
بحت فيها وابتسم .."طشه شن الجو .."
فوز>>تمام "وقربت سلمت عليه .."كيف بروحك ..
زكريا>>الشباب برا ..كيف خلاك السبع تباتي ..
فوز>>"ضحكت .."مبردك تقول ضرتك ..
زكريا>>حاصل ف رقبتي معش نزل ..
مع خشت انس ..
انس>>انت فاتح هدرزة هنا سقد روحك باتك يعيط ..
زكريا>>امتى ماعيطش هو اصلا .."وطلع .."
انس>>طشه شن الجو ..
فوز>>بيك احلو .. كيف مازن ماجش؟ ..
انس>>لا جا يبيك برا ..البسي شي ع راسك بس
هزت راسها وطلعت لراجلها ..
خذا انس باقي الفطور وطلع ..
بحت ف اخته وراجلها وكمل طريقه ..
مازن>>"وهو ماسك يديها .."رايفت عليك امس ..
ضحكت .."وانا مرايفه ع هلي بكل .."
مازن>>"تنهد.."اه وخلاص ..جوك تمام مش ناقصك شي ..؟
فوز>>سلامتك بس ..
ابتسم وقرب باس راسها ..
ورد>>"طلعت من باب المطبخ .."فوز تبيك عميمه حنان ..
بحتت فيها .."جيتك هي .." وبحتت ف راجلها اللي كان يبحت ف ورد لعند اختفت .. "حبيبي بنخش انا وبكره تعال روح بيا تمام .."
هز راسه وابتسم ابتسامة صفرة ..
وقرب باس راسها ..
فوز>>نحبك .."وخشت تجري وهو يبحت فيها .. تنهد ومشا طلع.."
...
ف خيمة الصبايا .. خشت نزيهة ام نور وانوار ..
سلمن وعزن وقمعزن جنب نور ..
نزيهة>>تحسي ف روحك كويسة..
نور>>الحمدلله .. كيف سارة وين ؟ ..
انوار>>ف المدرسة اليوم ماشيه تشوف الوضع ..
هزت راسها ..
فريال>>صبي ي مراه عيب هذوم انسباتكم عيب عليك ..
حنان>>"بازدراء.."عارفتيني مش متقبلتهم ي عمتي عارفه انتي ..
فريال>>"دفتها بكراعها .."صبي قتلك انا ع الاقل عشان ولدك ..
تنهدت بضيق وصبت .. وفهريه بعيونها معاها .. شافتها بعد قمعزت جنب نزيهة وقعدت تهدرز معاها تنهدت .. وبحتت ف باب حوش هلها وسرحت ..
...
فتحت عيونها .. بحتت حواليها .. حست روحها كانت تحلم .. لعند سمعت صوت الهرجه .. اذكرت كل شي ..قمعزت وهيا تحول ف شعرها بأطراف صوابعها .. تنهدت .. بحتت ف الباب بعد انفتح وخشت سالي..
سالي>>"ببحه .."نضتي ..؟
هزت راسها .."نبي دبش .."
سالي>>اهي الشنطه جنبك ..
رد نفتح الباب بحتن فيه هنا الاثنين .. خشت ميسان وسكراته .. قعدت تبحت فيها تُقى بوجع ..
سالي>>تاتي حكتلي ميسان امس شن صار بينك انتي وياها .. هيا مش قصدها لو عشنا ربع اللي عشاته كنه حكينا نفس الشي ..
تُقى>>"بحتت ف ميسان .."مش زعلانه منك بكل .. وعاذرتك بكل .. وتقعدي احسن وحده استقبلتنا بدون ربع مجامله .. بس انا كنت تعبانه مش اكثر ..
قربت منها ميسان وحضنتها .. وتُقى قعدت تبكي ..
ابتسمت سالي ودموعها ف عيونها وصبت طلعت ..
وخرت ميسان وبحتت فيها ..
ميسان>>"وهيا تمسحلها ف دموعها .."تقعد اختي مهما صار .. ومش مفرطه فيها .. صاح عشت ايام صعبه بس اكيد مش بقدها هيا ..
هزت تُقى راسها .."مش زعلانه منك والله .."
ميسان>>"تنهدت .."تاتي بنسألك ..
بحتت فيها ..
ميسان>>انتي تحبي زكريا ؟ ..
قعدت تبحت فيها بصدمه .. عليش هيا شن دارت امس مش بينت الشي هذا وبان عند ميسان .. خافت ليكون هو فهم ..
ميسان>>ماتخافيش ..ماحد فطن غيري .. بعد شالك امس وحطك هنا ونوضاتك امك .. مارضيتيش تجي لحد وقعدت ماسكه فيه وتبكي .. قعد هو يهدي فيك لعند هديتي ورقدتي .. مش اول مره نركز عليك .. ركزت عليك قبل ف كذا موقف ..
تُقى>>"بدموع .."بالله عليك ماتقوليش لحد حتى سالي .. سالي من اللي داره فيها سيف خايفه عليا من الحب بالله عليك ..
ميسان>>ماتخافيش سرك ف بير .. مش حيعرف حد .. صبي هي دوشي واطلعلي الناس بتعزيك ..
هزت راسها .. صبت ميسان طلعت وتُقى تبحت فيها .. كانت تقدر تسألها ف وقت ثاني .. بس كانت تمنع ف تُقى انها تسأل هكي فهمت هيا وفعلا كانت ميسان تمنع ف سؤال تُقى ع اي شي له علاقه بالماضي .. تجاهد انها تقعد قوية ومايكسرها شي ..
.....
مقمعزات جنب بعضهن ..
كانت نظرتها ع بطن اختها وبعدها غيرتها وبحتت ف الباب ..
انوار>>يعني توا العرس معش صار منه ..
نور>>"بحتت فيها "تستعبطي انتي ؟ راجل اختها توفى تقولي عرس ..؟
ضحكت انوار فنصت فيها نور ..
انوار>>"سكتت .."
مع طلعت تُقى من جوا جنها البنات يجرن ..
انوار>>باهي قوليلي من هذي اللي طالعه توا ..
نور>>"بحتت ف تُقى .."بنته الصغيرة ..
انوار>>واللي تبكي غادي ..
نور>>مراته ..
انوار>>هيا كانت هاربه صح ..؟
نور>>"هزت رأسها بإيجاب "ردت لها سنتين بس ..
انوار>>وعمك مزال معاها مش صافي ..؟
نور>>"بغضب بحتت فيها"احترمي العزاء اللي اتي فيه واسكتي ..
انوار>>غير جاوبي لعند تجي سارة..
نور>>"بملل"مزال ي انوار مزال ..
انوار>>وعليش هالطروح اخته وهربت وردت وخلاص ..
نور>>"رفعت حاجبها وبحتت فيها .."نعنجد هربت وعادي مع صاحب خوها راه ..
شهقت انوار ..وردت بعدها بحتت فيها"وعاشت ..المهم انها عاشت .."
نور>>عدي ي مريضه .. اهي سارة جت ..
انوار>>"بحتت ف حنان اللي تسلم ع عرب .."وعمتك كنها تسلم وتكشخ ..مزال جوك معاهم مش صافي ..
نور>>"بصوت واطي بعصبيه ..'صبي من جنبي راه والله نعيط ع طول حسي ..
ضحكت وحطت يدها ع فمها ..
.....
درست سيارة قدام الباب .. نزلت سارة وسكرت بابها .. وقعدت تقفل فيها ..
مع طلعته هو يكلم من خيمة الرجاله وصبا قدامها ..
لفتت نظرة .. قعد مركز معاها ..
زكريا>>اها ي ابله ان شاء الله اليوم امشي حتلقي طلبك ..
برمت بحتت فيه بنظرة عابرة رفع حاجبه بإعجاب.. وهو يهز ف راسه ..ونها المكالمه بعد ماخشت سارة ..
سيف>>ف شن تبحت ..
بحت فيه وأبتسم ابتسامه صفرة "كنت نكلم ف زبونه نبي ناخذ حق التوصيل انا .."
خبطه ع رقبته .."معش تبحت ف حاجه مش لك وخش ..بتمطر .."
قلب زكريا عيونه وقبل مايخش بحت ف السيارة ..
سيف>>زكريا ..
بحت فيه وخش وراه ..
....
مع فتحت سارة لرواق الخيمه .. وخشتها ..
انوار>>اهي سارة جت ..
قابلتها ميسان قعدت تسلم عليها .. كيف قعدت توصفلها ع اختها بعد سألتها لفتت نظرها وحده خاشه ..
رفعت حاجبها بمفاجأة ..
بس مش كيف مفاجأة حنان اللي كانت تسلم ع سارة وشافتها بعدها .. خلت كرعيها يرقدن .. وكل اطرافها تصقع .. طول بحتت ف فهرية لقتها تبحت ف نفس المراه .. بخوف وترقب لجيتها اللي مش لخير بكل ..
.....
صبا محمد بعد حق اللي خش ..
وجنبه مصعب اللي مصدوم ..
قرب الشخص منهم .. وسلم عليهم ..
محمد>>كيف حالك ي عمي ..
فتاح"عم محمد ..">>كان تريد تعرف حالي راك سألت عليه ي ولد مصطفى..مش تقطعوا عمكم وياريت هو الغلطان ..
مد مصعب يده وسلم ع عمه .. متجنب لخوه الاحراج ..
كمل سلام فتاح وقمعز ومحمد يبحت تحت بدون كلمه ..
مصعب>>شن خطرها جيته توا ..
محمد>>"بقلق .."انا عارف ان جيته مش لخير بكل ..
مع خشت زكريا مع سالم ..
سالم>>قصدك عمي محمد مايعلمش بفسخة خطبة ميسان ..
زكريا>>ماحد حكاها له لعند تفض هالقصه ..
إسماعيل>>"صفرله .."زيكو تعال اجري ..
بحت فيه ومشا شوره .. رفع محمد عيونه ف عمه .. حقه يبحت زكريا .. لعند اختفاء عليه بحت ف محمد من جديد اللي كانت نظرته ثاقبه بس اللي يركز فيها يعرف انها مليانه خوف ..
......
بعد اسبوع ....
درست سيارتها ونزلت تمشي بسرعه ع المطر ..وصلت جوا ..سلمت ع المدير وفهمت منا كل شي ..وركبت طول للفصل ..
دقت الباب ..وخشت ..
شباب ثانوي وبنات ..اول ماخشت برمو كلهم بحتو فيها ..وسقمو قعدتهم الا هو ..كان مقمعز ع الدرج ..وبعد حقها اذكرها طول وقعد يبحت فيها بصدمه ..
صبو الطلبه كلهم بعد قالت "السلام عليكم" ..شيرتلهم يقمعزو ..الا هو كان مقمعز ومزال تحن تأثير الصدمه ..
ملامحها الحاده كانت باين فيهن العصبيه من حركته ..
سارة>>المقهى سكر ي استاذ تقدر تقمعز كويس ..
بحت فيها .. وابتسم ع الجنب بعد عرفها تحكي عليه ..وصبا قمعز جنب سامر ..
بحتت فيهم كلهم ..وتنهدت بكتم ..
سارة>>انا استاذكم ف الاحياء ..اسمي سارة ..محضرة ماجستير ف الاحياء ..وهذي ثانيلي مدرسه نقري فيها .. الجدول خذيتوه من امس صاح ..
ردو بأصوات متقطعه .."اها .."
هزت راسها ..برمت فتحت شنطتها ..وطلعت دفترها ..والخطاطات ..
وقربت من اول واحد ف اول صفه ..وحطتله ورقه ع درجه ..
سارة>>اكتب اسمك ومرر ع زملائك ..
هز راسه ..وطبس يكتب ..
وهيا برمت ع السبورة ..
"ماعندنش مزاج لحصه اليوم اول حصه واحياء لقنك فكينا .."
فنصت ورد وبرمت بحتت فيه .. وهو يبحت ف سارة بأبتسامة ماعمرهش شافتها ع وجه ..
عقدت حواجبها وبرمت ..ف نفس الوقت اللي برمت فيه سارة وهيا معصبه ..
سارة>>من اللي حكا توا؟ ..
زكريا>>"رفع يده  .."انا ..
سارة>>ترا صبي..
صبا ..وربع يديه ..
سارة>>"وهيا تحكي بيديها ..بحده .."باب الفصل اهوا ..تقدر تطلع اذا تحب ..انا جايه نعطي حصه مش نهدرز ..
زكريا>>"بأبتسامه"ارخي روحك ..انا ماقلتهش هدرزي انا قلت مش جو احياء صبح ..
فل>>"بهمس .."شن يخرط ولد عمك ..
هزت ورد كتوفها بعدم فهم ..
سارة>>وبما ان مش جو احياء صبح .."شيرتله ع الباب .."تفضل ..
ابتسم ع الجنب وتنهد وتنحنح ..ورد قمعز ..
وهيا تبحت فيه بحده وبعدها غيرت عيونها من عليه ومررتهن ع الفصل ..
سارة>>افتحو كتباتكم ع اول صفحه ..وركزو معايا ..
وقربت من طاولتها وصبت عليها ..وحطت يديها ع الكتاب ..
واما هو ف عيونه كانن عليها ..
......
...
.
.
.
#يتبع🤍
#فافي🤍