مكاتيب🤍

الحلقه2

#مكاتيب🤍
#الحلقه_2❤️
.
.
.
.
.
.
.
.
.
.
.
.
.
.
.
.
.
.
.
.
.
.
.
.
مصبي فم الباب .. وهو يبحت ف السماء .. الليل ليل .. والقمر متوسطها .. وصقع سم ..
التفت بعد سمع صوت كرعين عرفهن لأمه .. ابتسم وقرب مسك يدها وساعدها تمشي ..
محمد>>قالتلي حنان تبيني ..
فريال>>"وهيا تشير ع الكرسي .."تعال نقمعزوا هنا ونحكوا ..
هز رأسه بإيجاب وقرب بأمه للكراسي وقمعزها وجا مقابلها وقمعز ..
محمد>>نسمع فيك يمي ..
فريال>>"مسكت سبحتها بيديها الاثنين .."تسمعني بدون مقاطعه ي محمد الله يرضى عليك ..
محمد>>"بحت ف عيون امه .. وتنهد وهز رأسه وهو عارفها شن بتحكي .."
فريال>>خيتك عرسها توا ومانبي حاجه تمغص عليها فرحتها سلم وليدي .. فهريه غلطت ومافيش فينا حد مسامحها لتوا وغلط كبير وكلنا عارفينا بس نبيك تمشي هالعرس ي باتي مانبي الناس ترد تحكي من جديد ..
محمد>>من اول ماجت يمي وانا قلت مانبي احتكاك بيها تقعد وحوشي مفتوحلها هيا وبنياتها وزياده البنيات غاليات ع قلبي لكن يمي مانبيش اي احتكاك معاها ..
فريال>>الله تبيه يمي اللي تبيه ..
هز رأسه .. التفت بعد سمع صوت سيارة خشت .. ونزل صاحبها وسكر الباب ..
زكريا>>مقمعزين ف هالصقع ..
محمد>>طولت اليوم ..
زكريا>>والله ي باتي ليبيا كلها بتزوج .."ومد راسه من الروشن "انزل ي تافه .."ورد طلعه وبحت ف باته اللي ضحك .."
محمد>>باهي ي باتي باهي خش ..
سامر>>"فتح الباب ونزل .."اوووو فريال خانم انتي هنا وانا نقول كنها الدنيا مضويه ..
فريال>>"وهيا تصبي بشويه .."هابا عليك ي ملسن انت كيف باتك زمان ..
ضحك محمد وضحكوا معاه العيال .. قرب منها زكريا يجري ومسك يدها اليمين وسامر يدها اليسار .. وخشوا وهما يهدرزوا معاها ..
ومحمد يبحت فيهم بإبتسامه ..بعدين تنهد وبحت قدامه ..
......
ادير ف السحور وجنبها صبيتها .. هنا الاثنين ساكتات ..
مع خشت ميسان ..
ميسان>>العيال جو كان تبي تحطي ي حنان ..
حنان>>هيا حنه ..قولي للبنات يقربن مش يشيلن الصفر ..
خش سيف..
سيف>>امي راه بوبكر مش قاعد بس ..
حنان>>"وهيا تحرك ف الطنجره .."روح بالسنيورة وقاعد ف شقته ..
ضحك سيف وطلع ..
فهريه>>"بضحكه .."ماعمريش توقعت تقعدي عمة شريرة ..
حنان>>انا مانحبش الدلع وولدي هذا مرخي"وخذت الصواني تحط فيهن ف المثروده .."
فهريه>>ياما قالتها امي ع محمد زمان ..
ضحكت حنان ..
خش زكريا "اومييي روحت را .."
بحتت فيه وابتسمت .."مرحبتين بنور العين .."
ابتسم وقرب شرب اميه وطلع نكش شعر ورد اللي عيطت قبل مايطلع ..
ورد>>توا نوريك عليها ..
حنان>>"بضحكه .."تعالي ي ورد شيلي هذي لسيف ..
بحتت فيها وخذت السفره وطلعت ..
فهريه>>مايشبهلكش بكل ..
حنان>>"وهيا تصب ف اللبن .."من ..
فهريه>>زكريا ..
بحتت فيها حنان .. وكيف جت بتحكي خشت تُقى ووراها فل ..
"وين ي عميمه اللي نشيلها .."
فهريه>>اهي ي عميمه واتيه ..
خذتها وطلعت .. وطبست فهريه ع صفره ثانيه وطلعت بيها مخليه وراها حنان سارحه وتُقى تبحت فيها بإستغراب ..
تُقى>>عميمه حنان ..
بحتت فيها "اهي شيليها .."
هزت رأسها وطبست خذتها وطلعت ..وحنان تبحت ف الفراغ ودموعها ف محجر عيونها ..
"امييي تعالي كولي .."
مسحتهن بعنف بعد سمعاته يعيطلها .. وطلعت ..
.......
يبحت فيها من الصاله كيف مصبيه واطيب ..
بعيونه يتبع فيها .. وجنبه ولده لاهي يلعب .. برمت ..
نور>>نديرلك سندوتش ولا تبي تغمس ..
رفع يده وحركها بمعنى سوا سوا ..
هزت راسها وردت برمت .. وهو رد عيونه معاها .. بين عيونه وقت تعارفهم .. نور تعرف عليها وقت جايه هيا وامها مش يطيبن .. كانت نزيهة اطيب للمناسبات .. وهذك الفترة كانت عندهم مناسبة مرض فريال .. طيبتلهم .. وحق نور غادي .. صارن صراعات ازليه بينه وبين باته اللي كان رافض ياخذوا وحده اقل من مستواهم .. بس تمسك بيها لأخر لحظه ..
انتبه بعد حطت السفره ع الطاوله .. بحت فيها ورد بنظره لنور اللي قمعزت مقابلته بصعوبه بسبب حملها ..
"ف اي شهر توا .."
عقدت حواجبها وبحتت فيه"ماك عارف .."
رفع عيونه وعطاها نظرة جو جاوبي ..
نور>>"تنهدت .."السادس ..
هز راسه ومسك السندوتش ياكل وهو يهز ف راسه ..
وهيا بعيونها معاه ..
رد رفع عيونه .."تبي دبش اكيد للعرس .."
نور>>"ضحكت بينها وبين روحها ان يطلع ف مواضيع مش يحكي معاها .."لالا عندي مانبيش ..
هز راسه ورد ياكل .. وهيا تبحت فيه بابتسامه..
.......
نزيهة>>"وهيا حاطه يدها ع قلبها .."حاسه بيها مش متريحه مهما تحكي حاسه بيها ..
سارة>>هيا ماتحكيش ي ماما لمن بتحكي وتشكي .. لواحد ماصدق باعها؟
اسكتت نزيهة وعيونها مليانات دموع ..
سارة>>"بعيون مدمعه .."هك خير خليها مع راجلها خير من الذل حتى انا لو مانجيبش ف فلوس راه بايعني له زمان ..
مع طلعت انوار ..
انوار>>"بحتت فيهن .."كنكن فقرة المسامح كريم ..
بحتت فيها سارة بحده "اختصري شن تبي .."
انوار>>كان تحكن ع نور بطلن وهم .. المراه ماشكت من شي وعايشه متريحه وراجلها مدللها ..وسارة نبي فلوس ..
سارة>>لشن ..
انوار>>هاتي بس حاجه ضروريه ..
بحتت فيها بنص عين .. "تلقيهن ف دولابي .."
هزت راسها ومشت تجري .. وامها تبحت فيها .."ماتشبع بكل عينها فارغه .."
ضحكت سارة ..
.......
راقدات جنب بعضهن .. ع اليمين تُقى وورد وفل .. وع اليسار ميسان وسالي ..
قمعزت ورد وهيا تحول ف شعرها من عيونها .."توا ميسان انتي خطيبك ماتعرفيش كيف بتعيشي معاه ..؟"
بحتت فيها وضحكت "شن هو لازم نعرفه مش نعيش معاه ع اساس باتك وامك كانوا يعرفوا بعضهم .."
تُقى>>"وهيا تلعب بشعرها .."بس بعد تاخذيه ع حب يختلف الموضوع ..
فل>>"ضربتها ع يدها .."كيف مجربه فرخه تُقى ..
ضحكت وهيا اتحسس ف يدها "ماقلتش مجربه ي بليده نحكي .."
سالي>>اكيد الحب يختلف ع التقليدي ..
ميسان>>"بضحكه .."والله قدر ربي ان ننخطب تقليدي ..
ورد>>وليش ماحكيتي معاه ي همي تعرفتي عليه وهكي ..
زكريا>>"خبط باب الدار .."ارقدي ي سوسه ..
ضحكت ميسان وشيرت بيدها ع الباب "ماتعرفت ع حد من هذوم اللي لا يرقدوا ليل ولا نهار .."
ضحكن البنات .. وردت فل قالت "مش عارفه فوز كيف دارت علاقه مع راجلها وسط حوش ملغم .."
ميسان>>مسكينه ماخذاها لين بكل ..
دق باب الدار ..
ورد>>دروحه مؤدب توا وهو كان يسمع فينا شن نحكوا ..
قمعزت تُقى وكرت وشاحها .. فتح الباب وخشش راسه ..
زكريا>>انتي اللي صوتك عالي ي عوبه كان ماهذا ماسمعت شي ..
ورد>>"بقلبة عيون .."انننننننننننننننن..
دفه سامر "تي خش .."
خش وبحت فيه بحده .. ضحك وهو يبحت ف ميسان "احسن عمة صبي ديرلنا حاجه ناكلوها .."
ورد>>ي طواحين توا كنتوا تاكلوا ..
زكريا>>"قرب كر شعرها .."مادخلكش انتي ي لئيمه كنك ماروحتي مع هلك عليش بايته عندنا ..
ورد>>"بعياط وهيا تفك ف شعرها .."حوش بوك ماه ..
ميسان>>"كرت يده .." تي سيبها ..بكره جايه للمحل ديرولي تخفيض نصبي ..
زكريا>>امك مش تخفيض ..نجيبوا فيهن بمح كبد هلي وتقولك تخفيض ..
سالي>>تي عيب ي زكريا عمتك وبتشري منكم الفيلو. ..
فل>>قرقاذ ماتهون عليه تفلته ..
بجت فيها بنص عين .. ورد بحت ف ميسان"صبي هيا .."
سيف>>"من برا .."صبي ي ميسان ضاربنا الجوع ..
رقص زكريا حاجبه "سلم الاخ الكبير توا تصبي كيف الشاطرة .."
قلبت عيونها وصبت وهما يضحكوا طلعوا وراها ..
وخلوا تُقى عيونها مزالن معلقات ف مكانه اللي كان مصبي فيه .. فطنت للبنات صبن طلعن .. تنهدت بضيق وبرمت ردت رقدت .."ماتصبيش ماتفضحيش روحك ماتصبيش .." وهيا تردد فيها بينها يين روحها دموعها نزلن بألم من الشعور اللي تحس بيه ..
.....
اتقلب يمين ويسار ..وهيا تفكر بقلق .. ابتسمت بعد سمعت صوت ضحك العيال ..
محمد>>"بصوت ناعس .."ارقدي ي حنان ..
حنان>>"قمعزت .."مش جايني نوم ..
برم بحت فيها .."كنك .."
حنان>>"عيونها مليانات دموع .."خايفه وانت عارف خوفي من شنو ..لو يديرها مش حنقدر نتحمل ي محمد .."وقعدت تبكي .."
محمد>>"قمعز وضمها عنده .."ي بنت الناس لا إله إلا الله من وين بيعرف بس ماحد يعرف مش يقوله ..
حنان>>خايفه من فهريه ..
محمد>>تقول حاجه ننفيها ساد ماجانا من وراها الا الخراب ..
سكتت حنان .. ومحمد يمسح ع شعرها .."ماتخافي من شي وانا معاك ..تمام .."
هزت راسها باس راسها .. وهو يبحت قدامه بضيق ..
.......
راقده ومش راقده دموعها ف عيونها وتبحت ف السقف .. شوفت محمد خوها اليوم ذكرها بحاجات ماتبيش تذكرهن هيا مانستش مش تذكر اصلا .. بس تحاول تنسا تحاول ..
فريال>>شفت نظرتك لمرات خوك مبدري خاطي المراه ساد ماشافت ..
عقدت حواجبها وبرمت بحتت فيها..
كانت تحكي وهيا مغمضه عيونها "بنتي ونعرفك .. ونعرف اللي ف راسك فوتيه وخلي الوليد ف الحاله مش ذنبه شي .."
ضحكت بهزوة .."طبعاً امي المعتادة حنان عندها خير من بنتها .."
فتحت عيونها وبحتت فيها بنظرة حاده .."ماحد فينا مسامحك وانتي عارفه الشي هذا .. ماتخلينيش نزيد نغضب عليك ي فهريه .. ماتخليش غضبي يزيد عليك وماتربحي بعدها خلي العيل وامه ف حالهم .."
فهريه>>"بدموع .."مش قاربتها حبيبت قلبك .. أساساً الهم اللي فيا سادني ..
فريال>>هذي اللي ماتسمع كلام خوها وتحط راس باتها ف الوطا ماتلقا ربح .. انتي اللي سيبتي جمال وجريتي ف جرت الوهم وضيعتي خوك ف جرتك وضعيت وليد مسكين مش عارف شي ف هالدنيا بأنانيتك ..
تبحت ف امها ودموعها ينزلن .. تسمع فيها وتحس فيها تكوي فيها بكل كلمه قالتها .. هزت راسها بإيجاب.. وبرمت عطتها بالظهر وكملت بكاها .. وفريال تبحت فيها بألم ..بس هيا اكثر من عارف بنتها .."لا حول ولاقوة الا بالله العلي العظيم .."
.........
الصبح ناضوا الشباب كلهم بأمر من سيف ..
اللي واعاهم بجملة "الاحد مدرسة ولو كملتوا نوم مافيكم واحد راقد لعند يجي الاحد .."
ناضوا كلهم كيف الشاطرين .. زكريا نص واعي ونص راقد ف يده المق متاعه .. ويبحت فيهم بوجه حاد بدون مايحكي شي .. جنبه سامر اللي يفطر بدون صوت ..
ومقابلهم إسماعيل وانس اللي كان راقد ع الطاوله .. والبنات مفرشات ع الوطا ويهدرزن تقول عشيه وجنبن الصبايا حنان وفريال وفهريه .. ماعدا فل اللي مزالت راقده ..
ميسان>>نبي زيكو يخش معايا ..
حنان>>"بضحكه .."متعاركه مع انس معناها ..
ورد>>اطبل لزكريا مش يديرلها تخفيض ع الفيلو ..
ضحكت حنان"كان تبي روحه يعطيك بس تخفيض ماتحلمي بكل .."
ابتسمت تُقى وهيا تبحت فيه ..
خش أبوبكر وف يده مالك ..
بوبكر>>صباح الخير ..
"صباح النور .."
ميسان>>تعال ملوكه ..
حنان>>كيف مامشيتش للصحراء ..
بوبكر>>نحضر فاتحه ميسان وماشي "وقمعز جنب الشباب .."كيف سيف وين وباتي ..
حنان>>باتك برا يسقي ف ورداته وسيف عده الشغل ..
بحت ف الشباب وضحك .."كنهم ع وضع الاستكاك كلهم .."
فريال>>حكومة سيف ي كبدي ..
ضحكوا كلهم ..
خش محمد ..
محمد>>زكريا سامر سادكم صبوا انشطوا ..
سامر>>والله ي عمي محمد اسأل زكريا لنا يومين انا وياه مش راقدين راه ..
فنص زكريا ..وحنان فنصت ف زكريا ..
محمد>>"بإستغراب .."كيف يومين ..
سامر>>امس كان ساهر عندي زكريا ماروح مني الا وجه الفجر وجيناكم بعدها .. و
حصل خبطه من زكريا خلاته يسكت .. والباقي ماسكين ضحكتهم بالسيف حتى من انس قمعز مصحصح ..
محمد>>"بحت ف زكريا بوعيد .."تكذب عليا ي ضايل .. باهي ي زكريا باهي ..تشيل عمتك ادير تحليل ونسمع بيك قايل كلمه ي ويلك وتمشي شور المحل بعدها تيم مانبيش نشوف وجه غادي اليوم انت تمسك لعند الليل وتنق حي عليك .."وبرم بيطلع .."ربي ولدك ي حنان .."وطلع .."
زكريا>>"ضرب سامر ع ظهره .."كنك حمار ازح انت كنك ..
سامر>>"بضحكه .."نسيت وربي نسيت ..
فريال>>كم مره حكالك ع البيات برا ي صايع ..
حنان>>حسابك مش توا بعدين توا نوريك ..
زكريا>>"بعصبيه .."شن عيل صغير انا .. راجل كبير بشنابي رآه وانتم مش عاجبكم شي .. بعدين كنت عند عيت عمي كان قعدت هنا ي وووووه وكان طلعت ي وووووه ماعاد فهمناكم ..
انس>>واطي صوتك عارفها مش حتحمل طروحك وتضبطك وتقول يانعلي وليدي ..
ضحكت ميسان وهيا تبحت ف حنان اللي بحتت فيه بحده ..
بحت فيها انس وضحك ..وصبا وهو يصفق ويغني وزكريا يبحت فيه بنص عين بغضب .."اميمة يا وداده اميمة يا وداده اميمة يا وداده يا ضئ الحوش وميعاده "
ضحكت حنان وفهريه تبحت فيها ..
شاشن معاه البنات وقعدن يصفقن .. وزكريا يبحت فيهم بغضب وبوبكر معاه ع الخط وهو يضحك ..
ميسان>>اميمة يا الحنونة اميمة يا الحنونة اميمة يا الحنونة يا ضئ الحوش وكنانوه
اميمة محلاها في الفم اميمة محلاها في الفم اميمة محلاها في الفم سكر وامية زمزم
طلعت فل تجري من الدار وهيا تزغرت بحتوا فيها وهما يضحكوا ..
فل>>اميمة وين مشيتي اميمة وين مشيتي اميمة وين مشيتي يا طباقت فراشيتي لووووووووووووووولي ..
إسماعيل>>"بصدمه .."شن العيله اللي مش طبيعيه هذي ..؟
ورد>>غير اغسلي وجك ي عار ..
فل>>عرس عرس عرس ..
انس>>بحتي شعرها غير سلكي شعرك ..
صبا زكريا بعصبية وحط المق متاعه ع الطاوله .." ميسان وتي روحك خمس دقايق نلقاك برا .."وطلع ..
ورد>>ي عصبييي ي واااعر ..
حنان>>"وهيا اتبع فيه بعيونها .."ان شاء الله تنكلب ..
انس>>هيا ي وداده ديرلي فطور ..
حنان>>فل امي وانتي بديري فطور لروحك ديريله معاك ..
انس>>اومايقاد انا ناكل من يد هذي اللي حتى شعرها مش مسلك .."وبحت فيها بتقزز .."
بحتت فيه من فوق للوطه .."معليش مانديرش للحشرات ي عميمه ف فطور .."
وطلعت وهو يبحت فيها بصدمه ..
.......
طلعت تجري ..وجت ع روشن السيارة ..
ميسان>>زيكو راجي وراسك بتمشي معايا تُقى ..
زكريا>>"بنرفزة .."بسرعه ي ميسان بسرعه ورايه مليون موضوع ..قوليلها تسقد روحها ..
بحتت ميسان ف الباب لقتها طالعه وهيا لابسة عباية ووشاح ..
ركبت ميسان قدام وركبت طول تُقى ..وهو شغل السيارة وطلع بعد حرق العجل ..
بحت ف ميسان "انتي ماشيه عرس ..؟ عليش دايره مكياج قصدي هو تحليل راه بديريه وتمت .."
ميسان>>"نفخت بضجر .."وووووه منك من قالك شيلني انت بس من..
زكريا>>ميسان خلوقي ف خشمي وراس امك اسكتي ..
ميسان>>انت اللي تحكي راه منكدي بارد..
قلب عيونه ومعش رد عليها ..
وتُقى لاوره مقمعزه وراه وتبحت فيه من مرايه السيارة .. نزلت عيونها ع يده اللي ماسك بيها الدومان .. ابتسمت بعد شافاته كيف لابس الساعه بالمقلوب .. وماسك الدومان بيده اليمين ويده اليسار يمشي فيها ع لحيته اللي مره مره يحك فيها بسنونه ..وع عيونه لابس نظارات ..
رن نقاله .. بحت فيه ورد بحت ف الطريق وغير يده اللي يسوق بيها وبيده الثانيه خذا النقال وحطه ع وذنه ورد ..
زكريا>>ها ي طير ...
تيم>>وينك انت عمي محمد كلمني قالي جاي ..
زكريا>>طالع مشوار مع هلي نكمله وندورك ..
تيم>>خلاص ي باشا تم ..
سكر ورد نقاله مكانه.. ورد لوضعه الاول ..
زكريا>>باتي هذا مش عارف امتى يقتنع اني كبرت ويبطل طروحه هذين ..
ميسان>>خايف عليك هو ..
سكت زكريا وهو معصب ..
ميسان>>"برمت ع تُقى .."تُقى باتك جاي للفاتحه ..
كان يراجي فيها شن تقول ..
ميسان>>"استغربت نظرتها لزكريا .."تُقى وين رحتي ..
فطنت لروحها بعد بحت فيها من المرايه ولقاها تبحت فيه ..
تُقى>>"بإحراج .."نعم خويلة ..
زكريا>>اللي واخذ عقلك ي بنت العمة ..
ميسان>>نسأل فيك من مبدري ع باتك جاي الفاتحه!
تُقى>>مش عارفه اكيد عزمه خالو محمد ..
هزت ميسان راسها .. ورد الصمت ف المكان ..
وهيا بعد رفع زكريا عيونه من جديد ف المرايه وكانت تبحت فيه معش حاولت ترفع عيونها أما هو ماركزش وعقله مش فيها ..
درس السيارة .. ونزل ونزلن هنا معاه ..
ميسان>>مالقيتش وين ادرس الا هنا يعني ..
زكريا>>"وهو يقفل ف السيارة .. وحط المفتاح ف جيبة .. وينزل ف ماليته .."سكري فمك وامسكي الطفله اللي جنبك وهاتي يدك ..
تنهدت ومسكت ف يده .. وتُقى مسكت ف يد خالتها..
كيف جا يبي يقطع الطريق مدت كراعها تبي تطلع ..
زكريا>>"بعياط .."هو انتي ي ماما طريق سريع وين ماشيه ..
بحتت فيه .. ونزلت عيونها ..
زكريا>>"وهو يبحت ف الطريق .."جيبيها ف نصنا هنا ..هذي سارحه من مبدري ..
ضحكت ميسان ودفت تُقى جت جنبه وهيا من جنبها الثاني وخلوها ف النص .. وهو طول اول ماحصل فرصه ان يطلع بيهن بيده فك تشابك صوابع يدها وضم يدها بيده بقوة وطلع بيها بسرعه ومعاهم ميسان اللي ماسكه ف يدها الثانيه .. وقف عند الحاجز بين الطريقين .. وقعد يبحت من جديد .. رد قعد يجري وطلع بيهن لعند وصل ف المستشفى طلق يدها .. اما هيا كانت تبحت ف يدها كانت مسحورة ماعرفتش امتى وصلت هنا وكيف .. وهو بيده حرك شعره وقدم بيهن ..
خشوا وسألوا ع المكان متاع التحاليل وخشت ميسان وهما قعدوا يستنوا برا .. رن نقاله من جديد ..
زكريا>>خرفي ع تيم .."وتباعد منها اشويه ورد .."
وهيا تبرم بعيونها ف المكان لعند طاح نظرها ع حد تعرفه خاشين بيه .. عقدت حواجبها وقدمت .. كل ماتقدم كل يوضحن المعالم ..
وقفوا فجاءه ف وسط الممر وقدم الدكتور المسعف .. وحط يده ع مكان النبض .. وبحت ف زملائه وهز رأسه بلا .. طول غطوا وجه وكملوا طريقهم ..
وهيا تبحت ف المشهد بالبطيء .. كمل مكالمته بحت جنبه ماحقهش .. قعد يدور فيها بعيونه حقها مصبيه تبحت ف مجموعه ممرضين ماشيين بسرير عليه شخص ميت هك الباين .. استغرب وقفتها هكي .. قرب منها ..
زكريا>>كنك مصبيه هكي ..
رفعت عيونها فيه .. كانت نظرتها تايهة .. ورفعت يدها شيرت ع السرير .. ماعرفتش تدوي ..
زكريا>>"بحت وين ماشيرت .."الله يرحمه .. شكله توفى ماقظروش يسعفوه ..
تُقى>>"بتوهان قالت .."بابا ..
بحت فيها بصدمه .. مالحقش ينطق لعند هيا سمعن وذانها اللي قاله فمها .. مشت تجري لنفس الممرضين .. وهو يبحت فيها بصدمه ..
حقها وقفتهم .. رفعت الغطا من عليه .. وسمع صوت عيطتها اللي شقت قلبه شق ..
حضناته وهيا تعيط بقولة بابا .. تعيط وتقول لا .. وهو يبحت فيها ماقدرنش كرعيه يشيلنه لعندها .. يبحت ف الممرضين اللي يبحتوا فيها بألم .. فطن لعمته اللي طلعت تجري من جوا وبعد حقتها مشتلها طول ..
ميسان>>"مسكت تُقى وهيا تبكي .."اهدي حبيبتي اهدي ..
تُقى>>"بعياط وهيا تبحت ف باتها اللي كملوا بيه الممرضين .."باباا .. بابا ي خويلة بابا ..
قعدت تدفن ف وجها ف صدرها مش معش تشوف .. وهيا تبكي معاها ..
حسها تبي تفر .. ادف ف خالتها وهيا تعيط بعلو صوتها ..قدر يحرك كرعيه ويمشي ناحيتها .. مسكها بعد فلتت خالتها وتبي تلحقهم ..قعدت تضرب فيه وهيا تعيط ..
تُقى>>حول نبي بابا حوول ي باابااا ..
حسها ارتخت بين يديه .. وطاحت ف حضنه وهيا تقول بابا ..
.......
طلعت وهيا شايله ف يدها السطل ..
وقفت وهيا تبحت ف ولدها عمها اللي مصبي مع اخته ..
جمال>>خلاص متأكده هذين بس اللي تبيهن ..
حنان>>اها الله يربحك ..
كيف جا بيرد رفع عيونه .. جن ف عيونها .. عقد حواجبه ..وبحت ف اخته اللي برمت وبحتت وين مايبحت ..
جمال>>ماتبي شي اخره ..
هزت راسها بلا .. برم طول طلع ..
برمت حنان بحتت ف فهريه .. اللي خطر عليها كيف هربت بفيلوها ومسكت ف يد يمان وسط عياط جمال .. حست نبض قلبها قوى .. ونفسها ضاق .. وهيا تبحت ف حنان ونظرتها اللي تقوللها كسرتي خويا ..
......
..
.
.
#يتبع🤍
#فافي🤍🤍