مكاتيب🤍

الحلقه 18

#مكاتيب🤍
#الحلقه_18🤍
.
.
.
.
.
.
.
.
.
.
.
.
.
.
.
.
.
.
.
.
.
.
فتح باب الحوش ..وخش وهو يسمع ف صوت بكاء معين ..
حط تليفونه ومفتاحه ع المدخل وخش حط الشكاير ف الكوجينه .. ومشا شور الصوت ..
قبل مايقدم ويفتح الباب يسمع فيها تقول .."كنك ي ماما والله ماعرفت كنك غيرتلك ورضعتك .."
دق باب الدار .. وفتحها ..
بوبكر>>كنه؟ ..
انوار>>"بدون ماتبحت فيه .."مش عارفه يبكي من مبدري ..
بوبكر>>"قدم وجا وراها مباشره .."وليش مانزلتي لأمي ..
انوار>>سادها اللي فيها نزيد فيها ع طشة عياط .."وصبت وهيا ماسكة معين ..وبرمت جت عينها ف عينه ..نزلت عيونها .."
قرب منها .."هاتيه .."
مداته له.. وطلعت من جنبه بكل ..ومشا ف جرتها مالك ..
اللي مش مركز .. بوبكر هذي اول مره يمسك فيها معين من اول ماجا ع الدنيا ..كان نافر منا وكأنه هو السبب اللي ماتت منا نور ..
حط يده ع ظهره وهو يمشي بيه ف الدار .. لفت نظرة قربجها اللي ع الطاوله ..بحت فيه بنظرة عابرة .. ورد يمسح ع ظهر ولده ..
لعند استكان وسكت ..
مع خشتها هيا ووراها مالك ماسك رضاعه ويرضع ..
انوار>>سكت ؟ ..
بوبكر>>"ابتسم .."شوفيه ..
قربت منا بحتت ف معين يبحت وساكت .."هاته .."
مسكاته منا وبرمت بتطلع .."لو بتغدا غداك ع الطاولة .."
ومشت طلعت ومالك وراها ..ضحك وهو يبحت ف مالك ..تطلع يطلع وراها تخش يخش معاها ..
تنهد بألم وفتح الباب وطلع وهو يسمع فيها تغني بصوت غافت لمعين ف دارهم مش يرقد ..كمل طريقة للمطبخ .. وقمعز ع الطاولة وقعد يتغدا بدون اي أفكار ..
......
ادير ف الغداء وامها مقمعزة جنبها ..
فوز>>امي أمينة امتة تروح ..
حنان>>بعد شهر قالت ..
هزت فوز راسها ..
حنان>>"ربعت يديها .."جاني خوك مبدري قالي طالع انا ومراتي ..
فوز>>"وهيا تغسل .."من منهم ..
حنان>>سيف ..
فوز>>نحسابه بوبكر ..
حنان>>خوك هذا يبي يجلطني .. قال بيبدأ شغل ..
فوز>>"بحتت فيها .."هكي خيرلهم ي ماما ف هالثلاث ايام ماركزتيش ان مش كيفهم كيف العرسان .. واضح عليش واخذها ولدك راه ..
تنهدت حنان بحسرة ..
برمت فوز وقعدت تقرض ف سلاطة ..مع خشت محمد
محمد>>السلام عليكم ..
"عليكم السلام .."
محمد>>كيف انس مش قاعد سيارته برا ..
حنان>>"وهيا تبحت ف فوز .."قال فيها طرف مفكوك .. خذا مني مفتاح سيارة زكريا ..
محمد>>"بحده .."العيل هذا مايتوبش بكل بعدين سيارة زكريا من قاله يقربها ..
فوز>>اكيد عنده مشوار ضروري ي بابا ..
هز راسه بوعيد وطلع وهو يخبط ف يديه ..
وفوز تبحت فيه .. بعدين حولت عيونها لأمها اللي لقتها تبكي  .. تنهدت بحزن وبرمت تكمل ف شغلها .
.....
فتح عيونه وهو يبحت حواليه بتعب ..
جن عيونه ع عمر ..اللي مربع يديه ويبحت فيه بحده .. من وسط ملامحه التعبانه ضحك ..
عمر>>عارف روحك يعني ..
زكريا>>"بتعب .."والله ي عمر ماطايق روحي ..
عمر>>"قرب منا .."زكريا شد.حيلك امك ماكنتش تبيك هكي .. توقعتك اقوى من هكي ..
زكريا>>"عيونه دمعن وهو يبحت ف السقف .. والتعب باين ف وجه .." مش قاهرني شي الا انها ماتت وانا دوبني عرفتها .. حاس روحي واحد مش كويس ..
عمر>>انت مش ذنبك شي ي زكريا .. انت مش ذنبك ي خالي ماتحطش ع ظهرك ذنب مش ذنبك ..
زكريا>>"بحت فيه .."انت مش فاهمني ..
عمر>>فاهمك فاهم عليك .. لذلك انا نقولك سمر انا عشت معاها عمر اكيد مش حتوجعك انت اكثر ماتوجعني انا اختي راه ..
زكريا>>"قطع عليه .."وامي راه
ضحك عمر بقلة حيلة .."ي حمار .. انا قاعد داير روحي نصبر فيك نبيك تشد حيلك امك ماكنتش تبيك تقعد بالضعف هذا .."
زكريا>>"شقلب عيونه .."فهمت توا نقعد قوي تم تم ..
عمر>>"ضحك .."تافه .. عندك انيميا حاده ي باشا ..
زكريا>>توا نقوللهم خالي مايوكلش فيا ..
رفع عمر حاجبه وهو يبحت فيه .. بحت فيه زكريا وضحك ع نظرته له .. وعمر وهو يبحت فيه كان مبتسم وهو عارف ومتأكد ان زكريا قاعد بس يجاري فيه .. وان اللي ف قلبه وجع مش حيقدر شي يجبره ..
.....
بحتوا هما الإثنين ف الباب اللي خبط .. قرب مصعب من الباب وفتحه بس ماكنش ف حد وراه .. رد بحت ف مروة اللي مزالت تبحت جيهته بدون ردة فعل ..
مصعب>>"رفع يده يهدد .." ي ويلك ي مروة نسمع حاجه برا .. وبنتك قوليلها لو اعترضت ي ويلها .. واخر مره نقولك ربي بناتك ي مروة راه اغلاطك عندي زادن .. وزاد شعور نفوري من هالحوش افطني لروحك .. ربي بناتك ..ربي بناتك .."والتفت يبي يطلع وهو يقول .."الراجل توا يرن عليا يخبرني امتى جاي .. وانتي بدورك خبري بنتك ..
ومشا طلع من جنبها .. سمعت بس صوت الباب اللي نفتح واسكر .. صوته كلامه يتردد ف وذنها .. حست روحها انها ف متاهه مش قادرة تطلع منها .. هيا عاملت فل كويس عشان ماكانتش عارفه حاجه .. كانت متوقعه انها طيش شباب بس اللي وصلت فيه فل كبير .. راجل بنت عمها ؟! .. لو سمع محمد او فوز؟! .. شن مصير بنتها .. ي ستي لو سمع واحد ثاني .. يعني بنتها سبب طلاق بنت عمها؟ ..
وسط شعور الوحشه اللي كانت حاسه بيه مروة ..وصبت بسرعه بغضب شور دار بناتها .. لشعور الصدمة اللي كان عند فل اللي سمعت كل شي قاله باتها لأمها .. وان في واحد خطبها .. خشت وسكرت الباب وراها .. بحتت ف اختها اللي اطلع ف توته تلبسها .. وهيا تضحك بعد ماقالت جملة هيا من صدمتها ماسمعتهش ..
بحتت فيها ورد بعد مالقتش منها ايجابة ..
ورد>>فل كنك؟ ..
تبحت فيها .. كيف هيا نظلمت هكي وتعيش ف هذا كله .. وورد اللي ظلمتها وكذبت بأسمها جوها سمح .. يعني هيا طول عمرها عايشه انها تاخذ واحد تحبه ويحبها .. تاخذ واحد لا تعرفه ولا يعرفها ولا فوق من هكي مطلق وعنده عيل والاكبر انها ع غلط هيا مادارتش ...
صبت ورد بخوف وقربت منها ..هزتها من كتفها وهيا تقول .."فل شن في .."
شعور غضب فل ع اختها هالمره زاد .. بقو جهدها عطتها كف وهيا تقول بعصبية .."بسبب غلطك بسبب غلطك حنتحمل حاجات اكبر مني ي كلبه .. ليش ي ورد شن درتلك انا" ودموعها نزلن .." شن درتلك مش اديري فيا هكي وتخلي صورتي مع بابا تشوه هكي ..شن درتلك انا؟ ..يبي يزوجني ي ورد تريحتي هذي نهاية طيشك ..ياربي شن ندير ..ياربي انا مزال ورايه طموح واحلام بسبب طيش وحده كيفك نخرب كل شي كل شي .."
وبرمت تبي تطلع وهيا تبكي وورد تبحت فيها بخوف ودموعها ينزلن ..كيف وصلت للباب تبي تطلع وهيا تقول .."بس سكتت مره معش بنسكت خلاص .. لعند هنا توصل بيهم مش حنسكت .. وانتي لو مره بس اقعدي قد اغلاطك وتحمليهن .."
ورد>>"بخنقه .."فل انس قالي حيصرف اليوم دزلي مع تقى انا حكيت لأنس كل شي وهو عارف وقال حيحكي لبابا ..حيقوله ان انا هيا اللي كنت تكلم ف مازن مش انتي ..
ف اللحظه هذي بالذات .. فتحت مروة الباب اللي كانت تسمع ف كل شي من البداية .. قعدت تبحت ف فل وورد ..وهنا الإثنين يبحتن فيها ..
.....
غدت امها وباتها .. وكملت المطبخ وهما ركبوا يقيلوا .. كانت ناويه تمشي لعيت جدها .. لبست جاكه كان الجو مزال مصقع .. وطلعت من الباب مش تمشي للباب الفاصل .. وقفها الباب الرئيسي اللي رن .. تنهدت توقعاته انس .. لمت الجاكه متاعها ومشت شوره مش تفتح ..
..
عند خوها فوق .. بعد صبا من صفرة الغداء .. لم الصواني الفاضيات واللي زايدات حولهن ع جنب .. ومصمص الصواني وحطهن ف الغسالة وولع عليهن .. عادي هذا الطبيعي متاعه من وقت نور .. بس الاختلاف ..
"خشت عليه من فم الباب وهيا حامل وحاطه يدها ع بطنها ..
نور>>"بأبتسامة .."ها بات مالك شبعت ..
بحت فيها وعزقلها بوسه ..
نور>>حبيبي كان كملت حط الصواني متاعك ف الغسالة ..
بوبكر>>نويره قعدتي تتعبي واجد ..
نور>>"بضحكه .."هانت ي قلبي قريب نجيب ونتريح ..
ضحك وصبا باس راسها ..
بوبكر>>ها مالك ولا احمد؟؟ ..
نور>>"شقلبت عيونها .."عباطه ماه قتلك ي بات مالك ..
بوبكر>>"ضحك .."نبيك تغيري رايك ..
شقلبت عيونها وهيا طالعه وقالت "تؤ ..""
فطن لروحه بعد سمع صوت انوار اضبح ..بحت فيها وهو وجه مليان لهفه .. صورة وجه انوار جاته للحظه نور ..
لعند حكت بنبرة أكثر حده وهيا تقول .."تليفونك يرن ..سكره توا ينوض العيل .." ومشت من جنبه ..هنا بس استوعب .. فطن ان نور ماتت خلاص .. واللي عايشه معاه حالياً مش نور مش نور ولا حتقعد نور ولا تجي مكانها ..
هرب من مشاعره ..وهو يكر ف نقاله ويطلع من الحوش بكبره .. وانوار كانت ف دار العيال ترقد ف مالك وهيا دموعها ينزلن منها بحرقه ..
..
فتحت فوز الباب لقت ف وجها عابد ..اللي كان عاطي بالظهر وهو يقول .."خرف ي بوبكر توا ماترد لين تقهر الواحد .." والتفت ع فجأة .. بعد حق فوز ابتسم .. وبعد فطن لروحه نزل عيونه ..
فوز>>انا حنمشي وانت خش كالعاده ..
ضحك وهيا ابتسمت .. ومشت وهو رفع عيونه بعد مشت وبحت ف السماء وهو يقول .."يارب .." نفتح الباب وطلع بوبكر ..يمشي بسرعه بحت فيه ..ومشا وراه وهو يقول .."شن في ي هو .."
اما فوز خشت للباب الفاصل ومشت لعيت جدها وهيا مبتسمه ..
......
عكس خوها اللي كان بين حيوط المستشفى .. كان مقمعز يلعب بخيوط الجاكه اللي هو لابسها .. يكح مره مره ..لعند خش الدكتور ومعاه عمر ..
زكريا>>"بملل .."بنطلع خلاص ..
عمر>>"بعصبيه .."مش حنقدر .. عندك التهاب قوي ع صدرك لابس تاخذ كورس مضاد حيوي كامل ..
زكريا>>انت دكتور ي عمر عطيني ف الحوش ..
عمر>>"بنته .."بطل نق واسكت ..
مط شواربه بملل وسكت .. وقعد يبحت ف الدكتور وهو يعلق ف المضاد ..
زكريا>>رمضان مزال عليه اسبوعين .. نبي نصيم ف الحرم تقدر ولا؟ .."وبحت فيه .."
رفع عمر عيونه فيه وابتسم .."نقدر ونص .."
زكريا>>طول الشهر بنقعد غادي .. ومن بعدها بنروح ليبيا ..
عمر>>متأكد .."وبحت ف الدكتور اللي قعد يحكي معاها ..هز راسه وودعه لعند طلع ..ورد لزكريا .."
زكريا>>"بنظرة توهان .."سادني بعد سيوري مروح ..
عمر>>قالتلي سميرة اختي ان حنان جت للعزاء .."وربع يديه وهو يبحت فيه .."
بحت فيه زكريا .. وبعدها نزل عيونه وابتسم .. ضحك عمر بخفه وقال .."عارف الطيبه اللي فيك وطيب اصلك من سببه .."
ابتسم زكريا ..
عمر>>قالو حتى عمتك هذي شن اسمها .."وقعد يطقطق بصوابعه .."
زكريا>>"بضحكه .."ميسان ..
عمر>>"نزل يديه لجيوبه .."ايوه
زكريا>>"بتضييق عيون .."توا ماتعرفش ميسان .. ي احا انت ..
عمر>>شن قصدك ي فرخ ..؟
زكريا>>"بضحكه .."الله يرحمك يمي كبت شوالك ..
عمر>>"بتفنيصه .."عيل بطل قلة ادب ..
زكريا>>شن قلت انا بس .. قتلك معش تعرف ميسان .. ايام العصافير والكيندر والمارس اللي يجرن ف الطريق ..
قرب منا عمر يجري وهو يغمله ف وجه بالمخده ..وهو يقول .."بلا قلة ادب اسكت اسكت .."
وزكريا ميت بالضحك ..
.....
"يعني العلاقه شينة .."
هذي تقى تسأل ف فوز اللي كانت تحكي ع زواجها ..
فوز>>"مدت كرعيها .."مش قصة شينة ..بس كيف نقولك .. مافيش فيها بركة حتى بعد تزوجي يقعد في شي غلط ف حياتكم .. لذلك قررت مره ثانيه معش بندير علاقه ..
تقى>>"ربعت يديها .."تقدري تحبي وتزوجي اخره؟ ..
فوز>>وين المانع؟ .. انا اخترت غلط كنت مع انسان غلط حبيت إنسان غلط وعارفه ربي داسلي الصح ..
سكتت تقى وهيا تفكر ف كلامها ..
خشت ميسان وهيا تضحك .."تسأل ف اسأله البنت هذي الهي بقرايتك .."
تقى>>"بضحكه .."خاطري كنت نعرف .. انا ماعمريش درت علاقه لذلك نسأل ف فوز ..وانتي ميسو ..
قمعزت ميسان وهيا تحط ف الصفره وتصبلهن ف نسكافيه .."انا شنو .."
فوز>>ماعمركش درتي علاقه؟ ..
سكتت ميسان ..
بحتن تقى وفوز ف بعضهن وضحكن ..
تقى>>اووووو معناها في قصه ..
فوز>>شكله ..
قبل ماتحكي ميسان خشت انوار ..
انوار>>سلام .."وقدمت قعدت تسلم عليهن .."تلاقيت مع عميمه فهريه وحني فريال قاللي البنات هنا جيتكن ..
فوز>>العيال مع ماما ..
هزت انوار راسها وقمعزت ..
تقى>>"بحتت ف ميسان .."باهي ميسو من؟ احكي ..
انوار>>"بضحكه .."شن في ..
فوز>>"ضحكت .."احكي ميسان ..
بحتت فيهن كلهن وضحكت بحزن .."كنت ع علاقه بعمر خو سمر خال زكريا .."
.....
زكريا>>حكتلي امي انك كنت ع علاقه بيها .."ورد ياكل .."
عمر>>"بحزن وهو يبحت قدامه .."كنت .. أساساً سبب علاقتنا انا ماكنتش نعرفها ولا هيا .. بعد صارت قصه باتك وامك هيا كانت صغيرة لذلك مانجيبهش واجد .. بعدين تلاقيت انا وياها ف مستشفى  .. هيا كانت ممرضه .. وانا دكتورها .."وسكت اشويه وزكريا يبحت فيه وهو مركز ع نبرة الالم اللي يحكي بيها عمر .." من هذك حبيتها .. من اول ماشفتها عجبتني بنت بلاد واصليه ..
...
"خلاص قعد يلمح .. كل مره يعزق كلمه .. كل مره اهني وبعدها اعترف .."
..
"بعد اعترفت عشت معاها الحب .. كانت إنسانة ملاك .. كانت اداوي الجروح .. اطبطب .. قريب من القلب .. خفيفه ظل .. حبيبه ع هيئه جبر .."
زكريا>>"بأبتسامة .."معانا كلنا ميسان ..
...
ميسان>>"خلاص .. لعند عرف بمرض سمر .. بعد عرف القصه .. حتقولن كيف ماحدش فيكم شبه ع الاسماء اه وقتها ماحدش فينا ركز .. لعند جن الكشوفات متاع الشهور .. وعمر شاف اسمي وهو كان دوبه عارف بمرض سمر .. "
...
بألم .."قلتلها كلام نادم عليه لعند توا ..كلام ماكانش يستحق ميسان .."
...
وسرحوا هما الاثنين ف خيالهم ..
كانت مصبيه قدامه .. وهو يعيط ويقول .."ضحكتي عليا .. كنتِ عارفه من الاول انا من ؟ .. كنتِ عارفه .. شن بيطلع منك يعني اخت فهريه اللي قتلت عائلات وراها .. اللي جابت العار لهلها ..وجابتلنا نحنا وكل اللي تعرفهم .. اللي بسببها اختي قاعده اتعذب .. كنتِ تعرفي ي ميسان ولا؟ .. كنتِ تعرفي انا من ..بس صحه لك .."وقعد يصفق .."صحه لك طيحتيني طيحه بنت كلب .. حبيتك من قلبي صحه لك .. خذيتي بثار اختك وخوك فيا صحه لك .."وقال بنبرة حاده وهو يشير بصبعه .."بس من اليوم اعتبري ان ماعرفتش وحده نذله كيفك وحده مايهمهش حد غير مصلحه عيلتها لعبت بقلب راجل حبها جديات .. اعرفي من هاللحظه انك انتي متي ف قلبي كيف ماخوك اذا اختي وخلاها تموت مليون مره ..مش حنقعد نذل ونذلك كيف مادار خوك ..بس قلبي ونيتي مخليهن لربي وربي ياخذ فيك الحق .."
ومشا وسيبها ..
...
دموع ميسان .. كانن كيفهن دموع البنات ع بكاها وهيا تحكي ف اللي قاله عمر ..
ميسان>>"بألم وبكا .."مافهمنيش .. ماحاولش يفهمني .. قال كل شي دفعه وحده ومشا معش شفته بعدها .. كمية الألم اللي سببها ليا كلامه كانت كبيرة .. ياريته سمعني رآه ماكانش لا حالي ولا حاله ولا حال زكريا هكي ياريت ..
قربت منها تقى وهيا تبكي حضنتها زين .. وميسان تبكي بالعبره وكأن المشهد توا بس صار ..
..
اما عمر فهرب بدموعه من جنب ولد اخته اللي سيب وكلامه وقعد يبحت فيه .. مش عارف ليش وقتها جن بين عيونه عيون تقى وهيا تبكي .. حس بالنفس غم عليه .. وإحساس المغص ودقة القلب ردن من جديد ..
......
تبكي تحت يدين امها اللي كانت تضرب فيها وهيا بروحها تبكي ..وبعدها وخرت وهيا تبكي بالعبره وورد تبحت فيها وتبكي وفل حتى هي ..
مروة>>"ببكا وعياط .." شن درتلكن مش اديرن فيا هكي شنو .. تبن تقتلني ناقصه عمر .. ساد ماعايشه ف ذل بس عشانكن ساد .. ليش ي ورد ليش ليش ي بنتي ليش تخلي فيه يوصل فيا وفيكن ..ليش ليش ..
فل>>"ببكا قربت منها .."ماما حبيبتي خلاص خلاص ..
مروة>>"بعصبيه .."حولي مانقربينش مش خلاص .. اللي دراته اختك شي كبير .. كبير واجد ..خليتي مراه تطلق من راجلها ي ورد ..كلمتي راجل متزوج ي ورد خنتي بنت عمك ي كلبه .. "وصبت تبي تضربها اخره مسكتها فل .."خليتيه يوصل ف تربيتي لكن ي ورد .. شن ناقصك مش اديري هكي شن ناقصك ..
ورد>>"ببكا بالعبره .." ي .. ماما .. بالله عليك افهميني ..
مروة>>شن نفهم ي عاري .. شن نفهم ..ولد عمك عارف .."ببكاء .."عارف بعارك ي بنت الكلبه عارف.. ليش اديري هكي وياريته خليتيني الموضوع مستور لا كذبتي بأسم اختك ..
وكرت روحها من فل ومشت تجري قعدت تضرب فيها من جديد وورد تبكي وتعيط ..
لعند فكتها فل من جديد وهيا تقول .."خلاص ي ماما خلاص ماتت بين يديك .."
مروة>>"بعصبيه ودموعها ينزلن .."ان شاء الله تموتي ي كلبه ونفتك منك ومن عارك .. انا عليش عايشه ف ذل ومتحمله ماهو عشانكن انتن مش ماتقعدن مستحقات لحد .. ياربي شن دايره تحتك اللي تكون بنتي هكي شن دايره ..
فل>>"ببكاء .."تعالي معايا ماما بالله عليك تعالي ..
وطلعتها معاها .. وورد اللي توا بس فطنت لحجم الغلط اللي داراته .. حطت يديها ع وجها وهيا تبكي بالعبره بألم .. وتمنت وقتها انها ياريتها ماكانت ..
......
وانس اللي كان يسوق بسيارة زكريا .. كان يسوق بدون هدف .. مش عارف كيف يصلح عملته ويمشي يقول لعمه ان بنته الاخره هيا اللي دارت علاقه مع راجل بنت عمها .. لعند رن نقاله ..
بحت فيه لقاه .."مروة مصعب .."
تنهد وفتح الخط وهو يقول .."ايوا مرات عمي .."
جاه صوت فل الباكي وهيا تقول .."عارف تقول لبابا حاجه نمشي ونقول لفوز كل شي وعليا وع اعدائي .."
انس>>"بصدمة .."شن تحكي انتي ..
فل>>"بعصبيه .."حكتلي ورد ع الرساله اللي دزيتها لها وانك عارف ان هيا السبب .. تعرف ي انس لو بابا يعلم ان ورد السبب فوز تعرف بكل شي ..
انس>>اضري روحك واختك انا مش شوري ..
فل>>"بهزوة .."اه لدرجه ماقلتش لأختك الحقيقه .. تسمع فيا ومانحكيش ببصارة..
انس>>"بعصبيه .."وانتي عليش ادسي عليها ..وادافعي ع اختك ساد اللي داراته فيك .. بالك حتى انتي مشاركة معاها ..
فل>>"بصوت عالي .."وانت شن دخلك انا بندافع ع اختي انت شن دخلك تحساب الناس كلها ماعندهش قلب كيفك .. وبعدين مصمص فمك بالزهر واعرف كيف تحكي كويس .. النشوله وشيل الكلام والبصاصه خليناها لهلها ..
وسكرت ع وجه .. وهو وسط ملامحه الحاده اللي كلها عصبيه ارتسمت ضحكه بسيطه وهو يذكر ف كلمة .."مصمص فمك بالزهر .."
اما هيا سكرت وبحتت ف امها اللي تبحت فيها وعيونها دموع مزالن ..نزلتهن وهيا تقول بألم .."انا حنصرف مش حنخليك انتي اتحملي اخطاء غيرك .."
غيرت عيونها من امها لدارهن اللي فيها اختها قاعدة تبكي من تأنيب الضمير..
.....
ف الليل .. خش انس ..
طلق السلام .. ردوا عليه ..
انس>>باتي وين ..
حنان>>ركب رقد ..
انس>>"مدلها المفتاح .."هذا المفتاح .. سلم واستلم اه ..باتي ماقال شي ..؟
حنان>>هداته حنك قالتله السيارة اتحرك خير بس قال مش مسامحه لو صار فيها شي ..
انس>>ماصار شي .."ومشا وهو يقول .."راكب بنرقد انا تصبحي ..
شيرتله حنان وهيا تبحت فيه لعند اختفا من قدام عيونها .. تنهدت .. وهيا مربعه يديها وتبحت حواليها ..
حنان>>اه ي زيكو ي امي ..لو نطمن عليك بس ..
..
وهو كان راقد ع الفراش بس مش بالنوم .. كان يبحت ف السقف .. دموعه ينزلن ع المخده .. وهو يذكر ف كل شي ..
اخر شي كان ف عقله ..
"راقد ع كراع سمر .. بس كان يهدرز معاها ..
بعدين سكتت فجأة .. بحت فيها ..
زكريا>>كنك يمي ..
سمر>>"حطت يدها ع راسه .."صبي حبيبي اشويه ..
صبا وهو يبحت فيها بخوف .. قرب منها ومسك يديها .. وهيا اللي كانت حاسه ان بتجيها نوبة .. ابتسمت بصعوبه ..
سمر>>ماتخافش ماما مافي شي حبيبي ..
زكريا>>امي! ..
بدون مقدمات بدت نوبة الصرع اللي تجيها .. يبحت فيها مصدوم ودموعه ينزلن مش عارف شن يدير .. اذكر ان الدكتور كان ديما يخاف تزمط لساني .. او تعضه .. قرب بسرعه وقعد يزر ف بطمه استدعاء الممرضه .. وطول قعد يفتح ف فمها بصعوبه وبعد معناة قدر يحط يده تحت سنونها مش ماتعضش لسانها .. تحمل عضتها ف يده .. لعند خش الدكتور وعطاها مهدء وسكنت وهدت .."
كان حاط يده قدامه وهو يبحت ف مكان اثر العضه .. ضحك وهو يبكي .."المهم قعدلي اثر منك مش مهم شن هو .. المهم منك المهم .."
وحط يده ع فمه وهو يبكي بالعبره ..
وحنان ف ليبيا كانت كيفه حتى هيا تبكي رياف عليه ..
......
اما اللي حالها لا يصر صاحب لا عدو ..
كانت مقمعزة برا ع طاولة قدام حوش محمد .. تبحت ف الفراغ ودموعها ينزلن .. نفتح الباب وخشوا سارة وسيف ..
سيف>>غير كان خليتينا نباتوا ف الفندق .. "وسكت بعد فطن لتقى .."شن اديري هنا ..
بحتت فيه تقى وهيا تمسح ف دموعها .."كنت مع فوز بس .."
هز سيف راسه ..بحتت فيه سارة وقالت .."اركب اشوية ونجيك نبي تقى اشوي .."
بحت فيها ورد بحت ف تقى ومشا وسيبهن ..
اما سارة قمعزت جنب تقى ..
"انتي تبي كل شي يجيك .. تبي حياتك تكون أحسن .. صلي .."
بحتت تقى فيها بأستغراب .. وهيا دموعها ع طرف عينها ..
سارة>>"بحتت فيها .. " كنك تبحتي فيا هكي ..صلي .. تعرفي تصلي ..
تقى>>"وكأنها اذكرت انها مسلمه ردت بنبرة باكية بخجل "لا ....
سارة>>"بصدمه .."كيف؟.. ..
ردت تقى ببكاء قالت"ماحد علمني .. مافيش رقيب ع تصرفاتي ماحد قالي .."
رغم الصدمه اللي جت لسارة  بس قالت وهيا اطبطب ع تقى .."وصلي توا ..مش مشكله اعتبري اللي فات كله مات .."
بنبرة الم ردت عليها"ويقبلني ربي ..؟ انا نشوف ف كل من يصلي يتريح .. يبكي .. يستنجد ..خاطري نجرب شعور الراحه هذا .."
سارة>>"بأبتسامه"صلي وادعيلي .. ونقولك حاجه ثانية ..
تقى>>"رفعت عيونها فيها..
سارة>>صلي الصلاة الابراهيميه حتى اللي ف بالح يجيك .."وسكتت اشويه بعدها قالت ..' ..عارفه من علمتها ليا ..؟
تقى>>من ..
سارة>>"بحزن .."نور .. الله يرحمها .. كانت تقرا ف رواية ..وتعلمتها منها وطول الوقت تردد فيها وتعلمتها منها .. بس مهما جاك يأس ومهما اسكرت ف وجك ماتيأسش .. واستمري ..
هزت راسها بإيجاب .. اذن الفجر ..
سارة>>للصلاة طول ..
تقى>>"بخجل .."مانعرفش ..
سارة>>"بضحكه .."تعالي نعلمك ..
ابتسمت وصبت بحماس وكلها طاقه
بس وقفت ف نص الطريق .."شن هيا الصلاة الابراهيميه كيف تصلى .."
ردت عليها سارة تقول .."رددي بس .. اللهم صلي علي محمد وع آل محمد كما صليت على ابراهيم وعلى ال ابراهيم وبارك على محمد وعلى ال محمد كما باركت على ابراهيم وعلى ال ابراهيم في العالمين انك حميد مجيد "..❤️
وفعلاً خشن الاثنين لحمام المربوعه ..ف حوش هل محمد .. ورت سارة تقى كيف اتوضى وتصلي واستأذنت ومشت لراجلها ..
اما تقى .. بعد الوضوء .. طلعت لبست ملاية ميسان ..
وكبرت بنبرة باكية .. وقعدت تقرا ف الفاتحه وهيا تبكي .. تبكي مش حزن .. لا تبكي فرح .. وخجل  .. سجدت وهيا تبكي .. وطلعت كل شي ف قلبها ف السجود .. وحكت لربي كل شي مش اتريح ومعش يقعد ف قلبها شي ..
اما سارة اللي ركبت لشقتها .. لقت سيف يراجي فيها ..
سارة>>"بضحكه .."مارقدتش ..
سيف>>لا نستنا فيك مش نصلوا ..
ضحكت وقربت منا .. قال .."كنها تقى .."
سارة>>سر .. ايوه مالقيتش مكالمات من عميمه ..
ضحك وقال .."واجد ..غير مش كان خليتينا نباتوا ف الفندق .."
سارة>>فندق شن دوته والطريق مسكره اسكت ترا .. واهوا وصلنا لحوشنا ..
سيف>>ع الفجر ؟ ..
ضحكت وهزت راسها بإيجاب ومشت وهو يبحت فيها ويضحك ..
....
مرن أسبوعين ف لمح البصر ..
معش جا مصعب لحوش مروة بكل .. كان يتواصل معاها بالتليفون بس .. وخبرها ان ف نص رمضان حيجوا هل الراجل .. وهيا لتوا متكتمه ع موضوع ورد وماحكتش لراجلها اللي كان احتياجاتهم يدز فيهن مع عياله ..
اما انس ف قعد لاهي بتخرجه .. اللي وقف مجرد خشت رمضان ..
اما جماعة المدارس ف عطلوا .. الا تقى اللي كملت اصلا .. تقى .. اللي كانت عايشه إحساس جديد عليها .. التقرب من ربي .. توا حست بيه .. قولو تقى توا بس حست بطعمه رمضان .. تقى توا بس تنفست .. بس عقلها وقلبها كان مع البعيد المهاجر ..
اللي كان ف السعودية .. قدام الكعبة صايم وهو متضرع بالدعاء لأمه اللي جاباته وامه اللي كبراته .. ودموعه حاضرات معاه ع الفراق ..
اما خاله ف كان معاه اول بأول .. يحاول ينسا ويعيش ..
وخوه .. اللي هرب بالشغل حتى رمضان مابش يروح بكل وقعد ف الحقول يصيم غادي .. رمضان اللي له فيه هو ونور ذكريات مش حيقدر ينساهن ف وجود انوار .. اللي كان ابتعاد بوبكر بالنسبة لها رحمه ونجاة لذلك كانت اخر روقان ..
.......
ف الليل كانوا بعد الفطور مقمعزين كلهم ..
واللي تحكي ميسان وكانت تقول .."رنت عليا فل تقولي بيجوا عرب يخطبوا ..قلتلها اي منكن قالتلي ورد .."
حنان>>غريبة ماحكتش مروة ..
فريال>>بالك كلام وخلاص ..
ميسان>>انظر كان هذا راه قال حتى مصعب ..
انس اللي كان يتفرج هو وباته كان عين ف التلفزيون ووذن معاهم ..
خشت فوز بصفرة القهوة ومعاها سارة وانوار قمعزن كلهن ..
فوز>>"وهيا مستغربه ..كيف ورد بتنخطب ..
ميسان>>"بحتت فيها .."وعليش مستغربه ..
فوز>>"بحتت ف عمتها .."لا ماهو .."وبحتت ف انس ..وقالت وهيا معصبه"مش انت تبيها عليش ماتحكي وتقولها عليش تخلي ف البنت تريح منك ..
بحت محمد فيها وبعدها بحت ف انس اللي وجه تغير ويفنص ف اخته ..
محمد>>"قمعز كويس .."اختك شن تقول ي ولد ..
حنان>>"وهيا تبحت ف بنتها .."شن تقولي انتي وليش ماقلت انت ..؟..
فوز>>"بحتت ف امها وبعدها ف خوها .."راجي ي ماما ..تي انطق ي انس مش تبي ورد احكي اهو بابا قاعد مش يعدي يفركش الموضوع ..
......

#يتبع🤍
#فافي🤍