مكاتيب🤍

الحلقه 10

#مكاتيب🤍
#الحلقه_10🤎
.
.
.
.
.
.
.
.
.
.
.
.
.
.
.
.
.
بوجع كان يبحت فيها .. يده حاطها ع قزاز العناية واليد الثانيه ع فمه وهو شاده بالقوة .. عيونه دموع .. يشوف فيها وهيا تبحت فوق وبعدها نزلت عيونها له وبحتت فيه .. ابتسمت وحركت يدها تحيي فيه .. ابتسم من بين دموعه .. وحول يده اللي ع فمه وشيرلها .. شافها برمت ع الممرضه وحكت معاها .. اشويه وطلعت الممرضه وجاته حكتله انها تبيه يخشلها .. تنهد بوجع .. رسم ع وجه ملامح القوة المزيفه .. وقعد ياخذ ف شهيق وزفير اكثر من مره .. بعدين فتح الباب وخش .. خشته اللي خلتها تضحك بفرح ودموعها ينزلن .. قرب منها .. نزل مستواها .. حضناته زين ونهارت بكا وهو اللي داسه الأيام اللي فاتن كله طاح عزمه قدام امه .. أمه اللي حس حضنها ادفى من حضن اي حد ف الدنيا ..🤍
..........
قبل أيام ..
سالي>>"بحتت ف تُقى .."
اللي تفنص فيها .. نطقت سالي .. وقالت "عندك فيه ثقه ولد خوك اللي مخليه بنتك معاه هذا؟ .. ولا حلال ع واحد وحرام ع الثاني ..فرخ كيف هذا تخلي ف بنتك معاه بروحهم ولد اللي باته طلعك غلطانه وتوا جاي ولده يدحنس ع بنتك هنا وانتي عادي ..؟ ولا بتعاودي اللي درتيه أنتي زمان ف بنتك .."كلام خلا امها واختها وزكريا ف حاله صدمه .. زكريا طول بحت ف تُقى وهو مش مستوعب شن قالت سالي .. وفهريه طول جت لبنتها وضربتها كف .. صدح صداه ف الحوش كله ..
الكف قعد زكريا يسكت كليا وقعد بس مصدوم من الكلام وهو يبحت ف عمته وبنتها .. اللي قعدت تقوللها بعصبية نبالغ فيها "خشي جوا ي قليلة الادب جوا .."
خشت سالي بسرعه وهيا تبكي .. وفهرية بحتت ف زكريا ..
فهريه>>سامحني ي وليدي حقك عليا ..
صبا وباس رأسها.." حشاك ي عمتي حشاك عادي معذورة خايفه ع خيتها ..واهو قدامك بالله العلي العظيم مافي حاجه ف بالي وعادها خيتي تُقى
ونقري فييها بنية طيبه .."
هز راسها"عارفتك ي باتي عارفتك ..كملوا قراية كملوا .."
وخشت وسيبتهم .. وهو مزال مصبي بحت ف تُقى اللي منزله راسها ..
زكريا>>حلي المعادلات هيا ..
بحتت فيها .. نظرة خلت قلبه يدق بالقوة .. حول عيونه من عليها وعقد حواجبه .. نزلت عيونها وقالت بصوت واطي .."اسفة .."
حاول يخفي توتره وفرد حواجبه وضحك .."حلي ي بنتي حلي ماعدلتش .."
هزت رأسها .. رد قمعز مقابلها .. ومسك نقاله .. شافه وبعدين ركز معاها وهيا تحل .. وقعد يوري فيها لو غلطت .. وهيا كانت ترجف بكل مافيها .. لدرجه هو كان ملاحظ رجفتها ف صوتها ويديها بس ماعلقش .. وتوقع ان بسبب موقف اختها .. مايندريش ان خايفه كانت خايفه من اختها تفضحها او تقول شي وزياده قربة للدرجه هذي ..
.....
خشت فهريه لقيت سالي ومعاها ميسان ..
سكرت الباب وقربت منها وتحكي بحده ..
فهريه>>ي قليلة الادب اللي مانك محترمه خسارة تربايتي فيك خسارة .. انا مادرتش معاك اللي درته الا وانتي. دايره الغلط وانا عارفه اختك ماديرش اللي درتيه انتي ..
سالي>>"ببكاء .."شن كفرت عشان حبيت ..انا خايفه ع اختي كيف ماانتي كنتي خايفه عليا وعزقتيني هالعزقه ..
فهريه>>انا اخترتلك الصح ماعزقتكش .. اخترتلك الصح ..الصحح مش وجودك مع ولد حنان مش معاه ..
ميسان>>"مسكت يدها .."فهرية خلاص توا يرقا عليك الضغط عدي جنب امي عدي ..
بحتت ف بنتها بحده .. وبرمت وطلعت بدون ماتزيد كلمه ..
ميسان>>"بأسف .."غلط اللي درتيه ي سالي غلط كبير ولد خالك شن ذنبه ..
سالي>>"وهيا تبكي .."خايفه ع اختي ي ميسان خايفه انا عارفه الحب من طرف واحد شن يدير عارفه ..شوفي نهايتي انا ..
ميسان>>انتي اعترفتي بحبك بس اختك داسه حبها لأن عارفه نهايه الطريق شنو .. انتي اللي مشيتي لسيف وقلتي كل شي .. ماتقارنيش روحك بيها .. لو سيف ماوقفكش لحظتها كنتي درتي أكثر ي سالي ..
زاد صوت بكاها .. وحضنت ميسان اللي قعدت اطبطب عليها .. بأسف ع حالها ..
.....
سكرت سارة ع سيف .. وهيا ترجف بكل مافيها .. قفلت نقالها وحطاته تحت مخدتها .. ورقدت عليها وهيا مبتسمة ابتسامة تكاد تبان .. ماردتش عليه ولا حرف .. وهو نزل التليفون وضحك .. وشغل سيارته وهو عارف شن حيدير .. ديما ف باله ان العلاقات مش حيجي من وراهن الا الخسارة لذلك يوم عجباته سارة .. اختار الحلال ..
بحتت سارة ف انوار مالقتهش جنبها .. استغربت وصبت .. لقتها ف الصاله وماسكه ف يدها ورقه تبان تقرا فيها ودموعها ينزلن ..قربت منها وقمعزت جنبها ..
سارة>>انوار ..
بحتت ف اختها وهيا تبكي .. ضمت الورقه اللي ف يدها لصدرها وهيا تقول .."لقيتها ف دبشي ي سارة .. تبيني نور ناخذ بوبكر وانا شاهدة ع قصة حبهم ي سارة .. تبيني ناخذه عشان نربي عيالها ي سارة .. كيف نقدر ناخذ راجل اختي كيف ..واحد يفهمني كيف .. تساول فيا بالله تقولي وصيه وانا باهي مافكرتش فيا؟ .. فكرت ف راجلها وعيالها وانا؟ .."ونهارت بكا .. خلت سارة تبكي معاها .. بعدين ضمتها لحضنها وهيا اطبطب عليها بدون ماتحكي شي ..
......
زكريا>>وبهكي كملنا ..
ابتسمت تُقى .."صحيت .."
زكريا>>تحشمي ي بنت بطلي حركات ..
ضحكت ضحكة خفيفه .. وهو ابتسم وصبا .."تصبحي ع خير .."
رفعت يدها وشيرتله .. عطاها بالظهر وطلع ..وهيا تنهدت وخشت للحوش ..
فتح باب حوشهم .. سمع صوت هدرزة امه وخوته .. خش عليهم وهو مبتسم .."السلام .."
ابتسموا وهما يبحتوا فيه ..ويردوا عليه ..
...
بوبكر كمل ليلة وهو يفكر ف اللي قاله له زكريا .. افكار يشيلنا ويجيبنا .. يسمع ف صوت ولده اللي يبكي وامه تعاني فيه .. بعدين سمع صوت خوته معاه يضحكوا .. تنهد بوجع .. ورقد ف مكانه ..
....
حنان>>انا بنرقد تصبحوا ع خير ..
فوز>>تريحي ماما توا انا نقعد معاه ..
هزت راسها ..
زكريا>>عطيني بوسة قبل ماتمشي ..
ضحكت وقربت منا باسها وبساته ومشت ..
أنس>>"بضحكه .."النية جاية ف عصير موز ..
سيف>>بتولع الخلاط وخلاط امي صوته يجيب من اخر البلاد وينوض باتك وتقعد ليلة عرس ..
أنس>>"بحت ف زكريا .."تصبي نديروه ..؟
زكريا>>ف عينك وادفها فيا لو ناض باتي وتقول زكريا يبي ..
فوز>>"بضحكه .."جيبوا الخلاط هنا صوته ماينسمعش ..
بحت فيها أنس وصبا طلع ..بحت فيهم زكريا وصبا وراه يجري .. ضحك سيف ..
خش للمطبخ ..
أنس>>"بحت فيه .."انت عارف مكان شوكلاطة امي متاع الصغيرة هذي ..
زكريا>>حتى انا نبيها جاي .. عارفها ادسدس فيها مني بس ع مين ي حنان ع مين ..
ضحك انس وكر الخلاط حطه ف صفره ومعاه طواسي .. وموز وحليب .. وبرم يبحت ف زكريا اللي راكب فوق الدولاب ينزل ف شوكلاطة داستها حنان .. يحق فيه يبحث حسه يدور بضمير لعند فنص .. وبحت ف أنس .. وانس يبحت فيه بتضييقه عيون وهو يراجي فيه شن يطلع .. كر اللي طلعه .. فنص أنس وضحك .. وقال "ي ابن اللذين .."
زكريا>>"حط شكارة اللوز ع قلبه .."قلبي يدق يدق يدق ..اصبر مزال ف حاجه اخره .."ورد يده للدولاب .."
كر منها حكيه كريم شانتيه الجاهزه .. ضحك انس وصفق .. ف الآخر وصل للشوكلاطه اللي يبيها وزقب جا جنب أنس ..
زكريا>>"بحت ف الخلاط .."تعال نقولك شن نديروا مش ماينسمعش صوته ..
أنس>>هي ..
وطلعوا بسرعه وطفوا الضي
ضحكت فوز بعد حقتهم .."حي عليكم من ماما .."
زكريا>>اس بس .."وقرب قعد يفك ف بطانية ولد بوبكر .."
فوز>>شن تبي فيها ..
زكريا>>تي هاتي .."وكرها وجا بيها لأنس .."حط المكونات بسرعه ..
قعد انس يحط بالحاجه وهو يبحت فيه .. وسيف يبحت فيهم وهو عارفهم شن حيديروا .. بعد كمل انس ..
زكريا>>اصبر ماتولعش .."وحط البطانيه ع الخلاط وغمه ..وشير بيده بمعنى ولع ..وحضن الخلاط زين .."
ولع أنس الخلاط وهو يضحك .. وفوز وسيف يضحكوا معاه وع زكريا كيف ماسك فيه ..
لعند كمل سكر انس الخلاط .. ووخر زكريا ..
زكريا>>حسني دخت من المخض متاعه ..😂
ضحك انس .. وبدأ يصب ف الطواسي ..مد لفوز ومد لسيف وآخر وأحد زكريا ..اللي دار صوت بفمه وقال "اطعم والذ عصير نص مكوناته مسروقه من امي.."
......
وفي من ليلة كمل ف السهاري .. اللي سكرت ورد وهيا مبتسمه ولا كأنها دايره شي بس عجبها كلام مازن اللي كان مره مره يعزق ف كلمة غزل بيها .. سكرت وبحتت حواليها ف المربوعه المليانه كتابات رقدت ع المخده اللي وراها وهيا هايمه .. اما هو كمل ياقي ليلته مع بنت ثانيه المهم يملاء الفراغ اللي فيه .. وفوز بعد رقدوا خوتها كملت ليلها بكاء .. بكاء وحده عارفه وحاسه بس مافيش ف يدها شي اديره ..
كيف ليلة تُقى اللي حاولت اتجنب اختها ورقدت ف دار إسماعيل اللي راقد ف المربوعه ع سرير زكريا🤍 .. وزكريا رقد ف فراشة نقلب يمين ويسار .. وتنهد وهو حاط يده ع قلبه اللي حاسه ينبض بقوة نقلب ع جنبه وبحت قدامه جت طيف سارة بين عيونه ابتسم بعيون ناعسه لعند جاه النوم ورقد .. نفس خوه اللي حتى هو جاه طيفها بس حاول جاهد ان معش يتخايلها اكثر وهرب من أفكاره واعجابه لله وقعد يصلي ف القيام .. عكس انس اللي كان واعي وبعد خطم من جنب دار اخته سمع صوت بكاها .. حس بحقد ع مازن وتحلف فيه وهو خاش لداره ..
عكس انوار اللي مارقدتش الليل كامل وهيا تعاود وتقرا ف رسالة نور وتبكي .. وسارة من التعب رقدت جنبها بدون ماتحس ..
.......
الصبح ..
كالعادة جا إسماعيل ونوض زكريا وطلع بيه مش يوصلهم للمدرسة .. طلعوا من الحوش كان محمد مقمعز برا ويشرب ف قهوة .. مع خشت تُقى من الباب الفاصل ..
تُقى>>صباح الخير خالو ..
محمد>>صباح النور ي خالو ..
ابتسمت وصبت قعدت تبحت ف إسماعيل وزكريا اللي يهدرزوا .. وزكريا يلبس ف الكويش .. كمل صبا وجا ناحيتها ..
زكريا>>صباح الخير ..
ابتسمت وردت عليه .. ركبوا للسيارة وهيا ركبت ف مكانها وشغل سيارته وطلع ..ومحمد بعيونه معاهم لين اختفوا .. احتلن ع ملامحه ملامح الضيق .. حاول يخفيهن بعد طلع بوبكر من جوا والباين ماشي لمكان .."صباح الخير .."
بحت فيه .."صباح النور .."
ركب سيارته وطلع حتى هو ومحمد يبحت فيه .. طلعت حنان من جوا وجت وقمعزت جنبه ..
حنان>>في شن لاهي ..
محمد>>بوبكر وين شاد الرحيل ..
حنان>>قال ماشي لعابد ..
هز محمد راسه ورشف من القهوة ..
حنان>>كنك ي حميده جوك مش هو ..
محمد>>رقالي من خوتي اللي عندهم علم بفسخ خطبة ميسان وانا اخر من يعلم ..
حنان>>كنت شاك انت ..
هز رأسه بإيجاب ..
حنان>>بس في شي ثاني ..!
بحت فيها محمد .. وملامح الضيق احتلن وجه من جديد ..
محمد>>سمر غلبانه خشت غيبوبة أمس ..
بحتت فيه حنان بصدمه .. وهو نزل عيونه وبعدين بحت فيها ..
محمد>>مازعلتيش؟ ..
قعدت حنان تبكي وهو يبحت فيها بحزن ..
حنان>>انت عارف شن تعنيلي سمر ي محمد تعرف ان انا وياها خوات مش صحبات بس ..
هز محمد رأسه وهو حزين بكل .. ويسمع بس ف رشفات حنان اللي قالت بعد فترة .."بتحكي لزكريا ..؟"
بحت فيها محمد .."لازم يعرف معش نقدر ندس عليه اكثر من هك ..ع الاقل تشوف ولدها قبل ماتموت .."
كانوا هما الاثنين عاطيين بالظهر ..
فوز>>"بصدمه .."كيف ولدها ..؟
برموا عليها هما الاثنين بصدمه وهيا تبحت فيهم بعيون مليانه دموع ..
فوز>>قصدكم زكريا مش ولدك ي ماما؟ ..
.......
وصلوا للمدرسة نزلو وع مسافه مش بعيدة منهم تُقى .. حقنهم فل وورد قربن يجرن وهنا الاثنين حاطات يديهن ع افوامهن مغطيات بيهن نص وجهن ..وصبن قدام زكريا اللي صبا وهو يبحت فيهن بإزدراء ..
إسماعيل>>"بضحكه .."امتحان كل شهر ..
زكريا>>"بملل .."خرف ..
ضحكت تُقى ..
فل>>هيا اعرف انا من وهيا من ..
ورد>>وتغلط تدفع الفلوس غصب عنك ..
قرب زكريا منهن وبحت ف عيونهن زين .. ضرب فل ع راسها .."هذي فل .." وورد ع يدها "وهذي ورد ..""واقلبن وجوكن .."
ورد>>خاطري نعرف كيف تعرف فينا ..؟
زكريا>>"وهو يمشي وهنا جنبه .."انتي نعرف فيك من عيونك فيك لقطه ف عيونك مش ف فل .. غير هكي باين ف فل المشاغبة ف عيونها عكسك انتي نظرتك بريئة ..
ضحكت فل .."هابا ع إسماعيل كان مش فينا الشامات مايعرفنا بكل .."
إسماعيل>>الحمدلله اللي فيكن علامه كان هذا مدخن من زمان ..
ضحكن ومعاهن تُقى ..
.......
بعد خذاني باتك .. سمر ام زكريا كانت صاحبتي وبنت عمي راس .. جبت سيف وجبتك وجبت بوبكر وجبت انس .. وف اخر سنين صارت قصة عمتك وخالك جمال .. دارت عمتك قصة خلت باتك ياخذ سمر ..
فوز>>"دموعها ينزلن .."شن دارت ؟ ..
سكتت حنان ومحمد صبا ومشا من جنبهن .. وحنان دموعها نزلن وردت تحكي لبنتها .."خلت سمر تخش لبوك ف الحوش وهو بروحه .. وعمي بات سمر كان صاعب وبناته مايحب من يقربهن ولا يحكي معاهن .. وكلمت عمي وباتي وجدك .. وشافوهم ماكان في شي بس عمي خلاها كبيرة وفرض ع محمد ياخذ سمر وخذاها .. وهذي عمر انس 6 سنين .. بعد سنة عرفنا ان سمر حامل .. وف نفس الوقت هربت عمتك مع راجلها .. ومن هنا وهنا عرف باتك ان سمر هيا السبب ف هربة اخته .. حلف ان ياخذ منها العيل اللي يجي .. وجا زكريا .. وحتى انا كنت حامل وقتها .. يوم اللي بتجيب سمر جبت انا بس ميت .. وخذا باتك زكريا منها وسجله ع اسمي .."وردت تبكي .." خلاص طلق باتك سمر ..وامه وباته كانوا معاه ويعرفوا وقالو باهي هما الاثنين واللي اديره نحنا فيه ومات الكلام بينا .. خوك ذاب ف قلبي كيف قطعة السكر .. وولدي واكثر .. والله غلاه فوق غلاكم وحبيته من قلبي .. وياما شفت ي امي ايام سود من عمتك وام زكريا .. بس حبه ذاب ف قلبي ماتحملته بكل .. حبيته كأنه واحد من عيالي صح .."
فوز>>"ببكاء .."بس انتي مشاركه ي ماما كيف هان عليك زيكو تاخذيه من امه وهو غافل حبيبي .. غافل ي ماما حرام تخيلي ماتت امه وهو مايعرفش ي روحي عليك ي زيكو ياروحي عليك ي عمري ..
حنان>>انا لو يعرف زكريا يكرهني ي فوز انا منتحملش ولدي يبعد عليا نموت بلا زكريا ي فوز نموت ..
وردت تبكي بأنهيار .. وفوز تبكي معاها ..
حنان>>بالله عليك ماتحكي لخيك حاجه ي فوز بالله عليك اسكتي ماتحكي لحد اللي يسير بعدها يسير بس اسكتي .. نموت بلا خيك انا بلا زكريا مانتحملش ..
صبت فوز وسيبتها وخلتها تبكي .. قرب منها محمد اللي كان بعيد وحضنها ..
......
مصبي بعيد ع الدكتور اللي يحكي معاه انجليزي ..
"النفسية هيا اساس العلاج وانت عارف اخت حضرتك نفسيتها شنو .."
عمر>>"بحزن ..هز راسه بإيجاب .."عارف عارف ..
"لذلك ادعولها ان شاء الله يكون في امل .."
هز عمر راسه وجا عند الروشن يبحت ف اخته .. بعيون مليانة دموع ..
قال"وراس خيك مايكمل هالشهر الا وولدك ف حضنك ..ومافي شي يمنعك عليه وراس خيك مايكون تعب هذا الا نهايته خير .." ونهار بكا ..
.....
يسمع ف صاحبه وهو يحكيله ف كل شي صار .. بعدها سكت وبحت فيه يراجي فيه يرد ..
عابد>>وانت ليش رافض الموضوع  ..
بوبكر>>عابد انت اكثر واحد حاس بيا ..
عابد>>ولأن حاس بيك مانبيكش تعيش اللي عشته .. عدي ازوج وخلي عيالك يعيشوا ف بيئة صح ..
سكت بوبكر ..
عابد>>انت ع بالك ان انت هكي تخون ف نور بس هذا لا .. نور حاسبتها صح وهيا تبيك تعيش حياتك وعارفه عيالك لمن يتريحوا ..
بوبكر>>"بحزن .."بس هذي اخت نور ي عابد ..
عابد>>ولأنها اخت نور حتحبها ي بوبكر وتعيش معاها صح ..
صبا بوبكر  بدون مايحكي معاه شي ..
عابد>>فكر بعقلك ف عيالك مش بقلبك ..مراتك مادارت هكي الا وهيا متأكدة من اختها ..
برم وطلع وسيبه وراه وهو يبحت فيه بحزن ..خذا فنجان القهوه ورد يشرب وهو يفكر بحزن ..
......
يبحت فيها وهيا تشرح .. عيونه كانن يحكن ف كل شي .. لعند رن الجرس .. صبا بسرعه وهيا بحتت فيه .. ابتسم بعبط ..
زكريا>>نبيك ف حاجه هك ..
وشيرلها بصوابعه .. شيرتله أن يطلع وطلعت وراه ..
زكريا>>حكيت لبوبكر ..
فنصت بصدمه ..
زكريا>>"بضحكه .."كنتِ متوقعه ان مانحكيش ولا انا عقلي مش كبير للدرجه هذي ولا .. انا عقلي ي سمحه انتي يشيل المدرسة هذي باللي فيها .. نقولها كيف ماتفهمي انتي كبير كبير يسد كل شي ..
سارة>>"بجديه .."صحيت بارك الله فيك ..
زكريا>>تحشمي مش بينا .. انتي كان تبي قلبي نعطيك ..
بحتت فيه من فوق لتحت وبرمت مشت مخليته وراها يضحك من جده .. والعيون اللي ادور ف التعب معاه  ..
.......
مقمعز سيف مع باته ف المحل متاعهم ..
سيف>>باتي انا بنخطب ..
محمد>>"وهو يبحت ف الحسابات .." ع بركة الله ..
سيف>>نبي الموضوع طول رجاله ... امي وشايفه البنت مانبيش طول سيرة ..
محمد>>ومن هيا البنت بنت من ..
سيف>>سارة اخت نور مرات بوبكر ..
بحت فيه محمد بحده ..
محمد>>البنت هذي بالذات لا ..
سيف>>"بإستغراب .."عليش لا؟ ..
محمد>>باتها معروف شنو لذلك سكر الموضوع ..
سيف>>وشن دخلني بباتها .. نور شفنها منها شي شين؟ .. لا وانا البنت رايدها ي باتي وانت عارف رايي من راسي يعني انا جاي ونحكي معاك وانا مقرر ..
محمد>>"بحده .."انت وخوك شوركم من روسكم بس يوم اطيحوا كيف ماطاح اللي قبلك ماتجيش وتشكي وتقول ي باتي باتها معروف شن هو لذلك بعد فيكم واحد يطيح ف مشكله من وراه انا مانصبي مع حد .. وقد اعذر من انذر ..
صبا من جنبه .. وسيف غمض عيونه بعصبيه ..
......
أنس>>انت تعرف كيف تهكر نبيك تهكره ليا ..
صاحبه بحت فيه.." شن تبي فيه .."
بحت فيه بنص عين ..
انس>>ياراجل غير ديرها مش شورك انت شن نبي فيه ..
"ايميل مازن هذا ..؟"
انس>>عارفه ايميل مازن ولان ايميل مازن نبيك تهكره ..
"شن في ي انس .."
أنس>>"بغل .."حاجات واجد ي سامي واجد اهكره بس ..
هز راسه صاحبه بإيجاب ..وبدأ يشتغل  وهو يبحت فيه ويدعي أن مايطلع فيه شي .. بعدين طلع تليفونه وقعد يفتح ف ايميل بنت مش يدزله بيه .. وهو عارف صاحبه شنو وحيرد ..
......
طلعت تليفونها ف حمام المدرسة ..
وصاحبتها جنبها .."هيا ورد .."
ورد>>اصبري ..
بحتت ف رسالة مازن اللي كاتبها لها ع الشفرة .. "صباح الورد ي سمحه .."
ابتسمت .. وردت عليه ..بعدها دست التليفون وبحتت ف صاحبتها ..
ورد>>يهبل بكل ..
"تخيلي بنت عمك تفطن بيك .."
ورد>>مش حتفطن تحركي من مكانك هو قال اصلا حيطلقها ف اقرب فرصه ..
هزت صاحبتها راسها ..سمعن الجرس ..
"هيا نطلعوا .."
.
.
.
#يتبع🤍
#فافي🤎