أحببتك في الخفاء باللهجة الجزائرية 💌

part 03

سمحولي بزاف بسك طولت عليكم راح نعوضكم ببارت طويل خلولي رايكم بليز باه نحسن من روحي  💗

إيتام : ملاك تعرفك (جمدت كي سمعت إسم تع ملاك هاد إسم يمثل قاع عزلة تاعي يمثل ماضي تاعي كنت نكرهو ، عينيا رجعو حمرين مكنتش حابة حتى واحد يعرف قصة تع ملاك من وين خرجلي هذا ؟ قربت ليه و عينيا أي واحد يشوفهم يعرف بلي قادرة نحرق لخضر و اليابس شديتو من كتفو )
أنا : شكون أنت ؟ من وين تعرف ملاك 
إيتام : اذا كنتي حابة تعرفي لازم تجي معايا أنا:  راك تشوف فيا مهبولة ؟ نركب مع واحد مانعرفوش إيتام : اذا كنت نعرف قصة ملاك معناها عندي كثر من خمس سنين نعرفك كنت نقدر نأذيك في كل لحظة منهم ( قرب ل عندي و هبط ل عند طولي و خلا عينيه يقابلوا عينيا ) سما ديري فيا ثقة مراحش نأذيك ( فتحلي الباب تع طونوبيل كان يستنى في إجابة تاعي كنت قادرة نعرف من عينيه بلي راه متاكد من واش راح نجاوب ) ركبت بلا نقاش اذا كان يعرف على ملاك هذا يعني إنسان هذا راه يعرفني حق معرفة أنا : وين رانا رايحين
إيتام : لبلاصة مقدرتيش تدخليها ( كنت راح نوض نخلطو اجابات تاعو كامل لغز 🙂)
معرفتش واش نجاوب فضلت نسكت دورت وجهي ل طريق كان منظر طريق خالية تحسها فوق الجبل مع أشجار و كل مانزيدو نمشو تقدر تشوف مدينة تحت حسيت بطنوبيل كي حبست شفت وين رانا كنا عند مبنى تقريبا بنيان تاعو مهجور و قديم بصح تقدر تقول عليه مزال صحيح و كي شفت لقيت كاين الناس طبة و مرضى كل واحد في كان لاهي خرج إيتام من طونوبيل و تبعتو كنت مستغربة من هاد بلاصة !! واش علاقة ملاك ب سبيطار ؟ ...... كنت نمشي و نخمم إيتام واش راه يدير هنا ؟ كملت نتبع فيه حتى وصلنا عند باب تع شمبرة ( وجهي كان ميتفسرش)
أنا : واش هذا ؟ إيتام : سما سمعيني داخل هذي شمبرة كاين وحدة عندها 5 سنين و هي تحوس عليك تعذبت و هيا تحاول توصل عندك  تقدري تدخلي تشوفيها راح تعرفي بلي واش صرا فيك راهي تخلص فيه ( معرفتش واش ندير إيتام بعد عليا و خلاني وحدي عند شمبرة فتحت الباب تع شمبرة و هنا شفت واش متوقعتش من صدمة حسيت رجليا فشلو )
___________________________فلاش باك ______________

قبل 5 سنين :

كنت خارجة من ليسي كيما قاع لبنات مع ملاك صحبتي و لي نعتبرها أختي لي معنديش معرفتش ليوم واشبيها تبان صفرة أنا : ملووكتيي واشبيك ليوم حصص قاع مركزتيش فيهم ملاك : لا والو تعب برك .. قعدنا نمشوا كنت لاهية بتلفوني حتى نطقت ملاك : سما معليش توصليلي كرطابي ل دار و هاكي مفتاح مكان حتى واحد انا نروح نشري و نولي .. قتلها أوكي كنت موالفة ندخل ل دارهم ماشي حاجة جديدة ( ياليتني مدخلتش ) كي جيت رايحة عيطتلي ملاك : سمااا ،  درت ليها أنا : أنعم ملاك : سمحيلي بديت نضحك واش ملوووكة تربيتي وليتي تطلبي سماح علاجال كرطاب ضحكت و رحت كنت طالعة في درج حنا كنا جيران تجي دارنا و وامبعد تطلعو في درج تلقاو دارهم لقيت ماما عند الباب تستنا فيا قتلها رايحة نطلع كرطاب تع ملاك طلعت في الدرج و صلت عند الباب دخلت مفتاح و حليت الباب أول حاجة قابلتني صباط تع الراجل استغربت بسك ملاك باباها متوفي من نهار لي كانت في كرش أمها زدت دخلت كانت شمبرة مغلوقة كلما نقرب نسمع صوت الحس تع مامات ملاك و حس تع راجل معاها .. صوت دا نعرفو ..... بدا قلبي يضرب و رجليا تحسهم ثقال ... فتحت الباب بكامل قوتي وواش شفت كان كافي باش يخليلي صدمة كامل حياتي .. بابا مع أم ملاك في وضع ( أستغفر الله )  ... ماحسيت بروحي غير وانا نخرج في وجيعتي على شكل عياط ... ماما سمعت عياطي لي متاكدة كامل جوارين سمعوه ... طلعت تجري عندي ... ماحسيت بيها غير و هيا مورايا .... صدمتها كانت أكثر مني ... في الوقت لي كنت نروح فيه محكمة باش نحضر جلسات طلاق والديا عرفت من الناس بلي بابا تزوج ب بيامات ملاك باش يسترها... قصة هاديك شاعت في حومة حاجة لي خلاتنا نبيعوا دارنا و نبدلوا ماما بعد حكاية ديك دخلت في إكتاب حاد مبقات تهدر مع حتى واحد .. و هكا رجع اسم ملاك كي شيطان بالنسبة لي
شفت ملاك راقدة و يديها مربوطين ... هدا واش قدرت نشوف قبل منخرج نجري و نبكي .. حسيت بإيتام يلحق فيا بصح انا ماكنت نشوف والو غير نجري حابة نهرب ( كرهتها دمرتلي حياتي بسبابها عشت و سمعت الناس تقولي نتي دخلتي ملاك ل داركم نتي خربتي داركم بيدك حتى ماما كنت قادرة نفهم بلي راهي تلوم فيا كي تشوف فيا و هنا تقدرو تقولو عشت 5 سنين ندامة تقتل فيا من داخل  ) ما حسيت غير بيد جبدتني وراسي ضرب في حاجة دافية .. حسيت بيديه دارو عليا و جبدني عنده ... معرفتش واش ندير ...في نهاية هو حظني خليني نكمل ...غرست وجهي في صدرو و خليت دموعي تنزل .. معلاباليش شعال قعدت هكاك بلاك ربع ساعة و أنا مغمضة عينيا عندو .. فطنت على روحي واش درت مالقري مورالي ميسمحليش بصح حسيت بلي خلطتها مخلوق حوايجو رجعتهم غير خناين .. بعدت عليه و قابلني ب عينيه لي كان فيهم إنعكاس لون السماء ( إسمي 🤭) أنا : سمحلي مفقتش بروحي ( قعد يضحك ) شفت فيه تع واشبيك 🫤 إيتام : مكانش علابالي بلي برانساس تحب حظني قاع هك كون كل يوم نحظنك خلعنى من واش راه يقول من وين جاب صحانية الوجه وجهي ولا كي حبة تع طوماطيش ، أنا : واش راك تقول واقيل حسبالك صح ( شنفت في وجهو 😒 كون زدت معاه شوي كون راني خلطتها معاه رحت نمشي ل جهة طونوبيل واش حسبالكم واقيل نروح وحدي 😎 هو جابني هو يردني ) درت ليه و نطقت أنا: وصلني ل لافاك  شفتو يتأففف إيتام : تحسب لافاك راهي هاربة 😑( وجهه كي جبدتله على لافاك رجع يضحك تحسب طفل صغير شديت ضحكة في وجهو لا يحاوزني من طونوبيل ) رميت عينيا ل تريكوه ل قيتو مشمخ ب دموعي ( حسيت بتبهديلة قد لرض ) حوست في سكادو على لانجات ،  شفتو مركز مع طريق و ساهي محبيتش نديرونجيه  قربت يدي بالعقل باش نمسح غير مسيت تريكوه  حسيت بيه كي حبس طونوبيل ضربة وحدة من قوة صدمة ماحسيت راسي غير داخل في رقبتو و يديا شدو في كتافو .... انا هنا كنت راح نبدا نعرشلو على فعلتو لي خلاتني نبان راني نتحرش فيه 😑 (عيطت عليه ) واشبيييك عمى حكمك !! شفت فيه لقيت إبتسامة شاقة من وذن ل وذن بصح ماقال والو جبدت روحي ل بلاصتي و رميتلو لانجات أنا : أمسح تريكوك إيتام : أمسحيلي أنتي ياك نتي دمعتي عليا 😌( شفت فيه بنص عين كون كان عندي شاقور كون راني قسمتو بين زوج 😑 ) قعدت نتمتم تحت نيفي ب كلمات جميلة لا ينزلني في نص الطريق .... ديمارا بطنوبيل و انا حطيت راسي على تاقةو قعدت نخمم ...( معرفتش واش ندير ووين طاحت عليا مشكلة تع ملاك وواش علاقتها بإيتام مقدرتش نسقسيه بسك كل مرة نجبدلو من وين يعرف ملاك و يعرفني يتجنبني زعما تكون حبيبتو ومراهش حابني نعرف حسيت ب عفسة بيزار داخل فيا بصح انا واش دخلني بلعت ريقي و سكت  ) قعدت نشوف فيه كيفاش يسوق و الشمس ضاربة شعرو لي مع الشمس بانت كولار تاعو و عينيه زرقين لي كل منشوفهم نغيس فيهم كان كالم بزاف مالقري دايمن يصرا بيناتنا لقطات بصح هدرتنا غير في أمور أساسية ... إيتام : مكانش علابالي بلي أنا شباب قاع هك 😌 ( نسحب كلامي مراهش كالم 😑) أنا : شكون قالك كنت نشوف فيك 😑 إيتام : كون مكنتيش تشوفي فيا متحركيش عينيك مع كل شبر من وجهي 😎 ( وجهي ولا حمر من هدرتو هو و الحشمة ميتلاقوش ) شفت فيه ب نص عين و دورت راسي لتاقة مور نص ساعة كونا وصلنا ل طريق لافاك
انا : حطني بعيد على لافاك وانا نكمل وحدي
إيتام : وعلاه يا لالة ؟ ( خذيت نفس و درت ليه ) أنا : معلاباليش واش علاقتك مع ملاك بصح مدابيا تبعد عليا كي أنت كي هيا مخصنيش مشاكل معاكم و هيا معلاباليش واش خلا حالتها هكاك بصح قولها تنسا اي حاجة كانت بيناتنا و دوك لازم نروح بسك من لول كانت غلطة كي قبلت نجي معاك .. ( جيت خارجة من طونوبيل بصح سمعتو كي غلق سكريتي قبل منخرج 😀💔) شفت فيه لقيتو يبتسم .. إيتام : زعما في رايك هكا راح نخطيك ؟ ( كان يقرب ليا و كل مايقرب إبتسامتو تزيد تبان و انا نحس قلبي راح يخرج بلاصتو  معاها ... بعدت عليه حتى لصقت في باب ..شدلي وجهي بيدو و همسلي
إيتام : Sei tutto ciò che voglio وجهي كان يبين بلي مافهمت حتى حاجة انا فرنسي مش مسلكتها 😀💔 بعد عليا و فتح سكريتي انا خرجت نجري من طونوبيل قلبي ديجا حساتو راح يخرج و من زهري كلب شافوني الناس يقراو معانا  خارجة من طنوبيلتو درت روحي معلاباليش و كملت لافاك راني ديجا راطيت حصص بصح كان مزالي حصة دخلت لونفي نقرا شفت واحدة من لبنات لي شافتني خارجة من طونوبيل تع إيتام مع مجموعة تع بنات كانوا يهدرو كي دخلت شافو فيا و سكتوو ضربة وحدة .. حكمت بلاصتي .. شفت وحدة هيا و 3 بنات مركزين معايا... مام خزرتها كانت باينة بلي ماهيش نورمال ليا جا بروف قرانا و أنا عقلي مراهش معاه قعدت نسترجع في أحداث مع إيتام ليوم علاه درت فيه ثقة ورحت معاه بلا مانخاف مانيش قادرة نفهم الموضوع مراحش نخمم زوج مرات قبل منعرف بلي إيتام عندو سر كبير و هدا باين من طريقتو بصح درت الثقة فيه ! علاه هو لي درت في الثقة من الناس كل ؟  دقيقة ذيك جاني فضول نفهم كلشي نعرف شكون هو إيتام بالضبط .....
كملنا درس و خرجنا و رجعت ل دار وانا قاعدة نخمم في سوجي هذا .. دخلت ل دار و غير دخلت قابلتني خالتي مع بنتها ريتال مع ماما في صالون غير شفت في خالتي قلبت وجها ... مام انا درت نفس الشي .. مزالت تحملني مسؤولية واش درت ... بصح علاقتي مع بنتها مكانتش علاقة لي نحكيلها كلشي بصح تقدروا تقولو عليها أحسن من علاقتي ب أمها مام ريتال كنت نحسها تحب تحكي معاي سلمت عليهم و دخلت ل شمبرتي مع ريتال دوشت و صليت صلاتي و دعيت ربي يبينلي طريقي من ظلام لي راني نعيش فيه و غير كملت بدات ريتال تحكي  كانت متحمسة بزاف و قاعدة تحكي على واش راهي دير و ..... كان علابالي بلي راهي تحكي بصح انا تخمامي مع إيتام حتى مسمعتهاش واش راهي تقول
عرفت روحي بلي راح تلصق فيا بصح مقدرتش نسكت
أنا : ريتال نسقسيك  كانت عند بيرو تاعي كي سمعتني جات قعدت حدايا ريتال : غير الخير ؟ 
( خذيت نفس ) و قتلها : كون تتلاقاي ببنادم و يدخل ل حياتك بطريقة غريبة بصح تكون عندك حاجة تخليك تبغي تدخلي في حياتو و تركزي معاه و في نفس لوقت خايفة من أنو يكون العكس توقعاتكهيا  (كنت نهدر ببرود مكنتش حابة نبين حتى حاجة اذا لصقت في حاجة واش يسلكها ) طلعت وجهي عندها لقيتها تشوف فيا بعينين يلمعوا و ابتسامة تاعها واصلة للحيط شافت فيا و هدرت بخبث ريتال : همممم واقيل راح نولي شاهدة على قصة حب 😏 وسعت عينيا فيها مخلوقة انا نسقسيها هك و هيا تهدر معايا على حب لا قدر لا والو حكمت مخدة ضربتها بيها وهيا مزالت تهدر على حب وصلتها عند الباب باه نخرجها قبل منخرجها نطقت ريتال : سما متخليش واش صرا في ماضي يكون عائق ليك في مستقبل لي صرا صرا بعدك على الناس و عزلتك مراحش تغيري بيهم الماضي وفي نهاية حاجة مراهي ذنبك متحمليش روحك مسؤولية حاجة مدرتيهاش هيا خرجت و انا قعدت نخمم واش ندير .. مسحت على وجهي و بديت نقرا ليكونترول قربو ولازم نبلع عام ..(  إيتام مراحش ينفعني كون ندخل لراطراباج 😀💔 )كملت قرايتي و خرجت نتعشا معاهم بما انو خالتي جات راح نتعشاو كامل مع بعض ... قعدنا ناكلو هوما يهدرو و أنا ساكتة علابالي كون نهدر خالتي راح تشعل فيا ..حتى نطقت خالتي : سما ريتال راح تقعد معاك في شمبرتك ... إبتسمت و قتلها معليش مكنتش من المعارضين بسك ريتال جامي أذاتني مالقري نشوفوا بعضانا من العيد ل العيد كملنا العشا و غسلت ماعين و ريتال قاعدة تقسر مع خويا وهو يضحك عادي منكذبش عليكم ونقول محسيتش بالغيرة مالقري خويا صغير عليا بصح علاقتنا كانت باردة نهدرو في أمور أساسية برك تمنيت كون حظني كيما حظن إيتام ... وحدي لقيت روحي نخمم و نبتسم  ... ريتال : و أخيرا قدرت نشوف ضحكتك تم تم زبطت وجهي و طحت خشينة أنا : 🙄 مكنتش نضحك بانتلك برك و طلعت نجري ل شمبرتي حتى و هو بعيد عليا مزالت نتبهدل في جرتو ... بدلت بيجامتي و دخلت في فراشي و غطست في رقاد نضت صباح كنت دايخة منعرف علاه و حاسة بوجاع خزرت في ريتال لقيتها تحسب جثة رجلها وحدة في سرير و لخرى طايحة منها يديها متعرفش وين راهم جابتلي ضحك غطيتها و خرجت وجدت روحي و خرجت من دار ريتال مكانتش تقرا في نفس لافاك وعلى حساب ما سمعت بلي تخصص تاعها بروقرام تاعو خفيف بزاف ... كملت نمشي للكوس و أول مرة في حياتي نقعد كنت دايمن نبقى واقفة 😑💔 ( معاناة لافاك 😭)  .. وصلت لونفي كان فارغ فيه غير واحدين يقراو حكمت بلاصتي .. و قعدت نريفيزي و نشوف في باب و نتنهد ( متوقعتش يجي بنادم يأثر عليا في أيام قليلة ) لهيت مع ريفيزيون ووجاع لي كان غير يزيد في كرشي حتى لقيت بنادم قعد حدايا عرفتو من ريحتو ( نفسها لي شميتها كي تلاقيت بيه عند ريسطو منعرف كيفاه حسيت بفراشات في كرشي شفت فيه لقيتو هو و صحابو يهدرو ) نطق واحد فيهم : وووو نتي هيا سما لي صرعنا بيها إيتام ( إبتسم و مد يدو)  أنا سام جيت راح نمد يدي حتى خطفلي إيتام يدي و دار نتوما معندكش كور تقراوه ؟ سام : هايا زاك نروحو علا حساب شوفة راه باغي يبقى وحدو معاها إبتسم زاك معايا و قالي : مديريش عليهم حنا نروحو دوك
( فهمت بلي حشمة في حياة إيتام مكاش 😑💔) حمحمت و درت ليه : واش دير هنا جاتك غير بلاصتي تقعد فيها و على حساب علمي قتلك منحبش نزيد نشوفك ضحك و شاف فيا إيتام : من اليوم راح نبقى لاصق فيك و متخميش تقولي لالا بسك راح توصل ل يماك بلي شفتي ملاك وعلابالي كون تسمع بيك و غمزلي 😉 ( وجهي هبط للرض راح يهدد فيا ؟ ) عينيا تغرغرو بدموع منعرف علاه حسيت بخيبة بعد كلامو كي شافني هكاك شدلي وجهي بيدو و مسحلي دموعي لي نزلو على خدي و قالي بصوت حنين إيتام : سما ( طلعلي وجهي باه نقابلو )  مراحش نأذيك و عمري لا خممت نديرها قتلك هكا علابالي بيك مراحش تتقبليني في حياتك بالساهل( بدا صوتو ينقص حتى قرب ليا وهمسلي ) سما مانيش قادر نزيد نصبر خمس سنين و أنا نستنا وينتا نكون قريب ليك منقدرش نزيد نصبر كتر ( جيت راح نهدر غلقلي فمي ب إبهامو ) علابالي بيك مراكيش فاهمة علاه خمس سنين مانقدر نزيد نقلك كتر من هك كل حاجة راح تعرفيها دوك راح تكون دونجي عليك زاد قرب ليا و باسني في خدي ( كنت نحس بالسخانة في كامل في جسمي من هدرتو وكي باسني منعرف واش صرالي حسيت راسي يثقال حتى عينيا ولا صعيب نفتحهم ) كان إيتام يعيط باش نفتح عينيا بصح صوتو كان غير يزيد و يبعد حتى مزدت حسيت بوالو ..... نضت و انا نشم في ريحة دواء و سبيطار فتحت عيني و قابلني إيتام مع زاك و سام و باين بلي كان دخان يخرج من وجهو حطيت يدي على راسي و قعدت نتفكر واش صرالي ... شهقت ب صدمة  كي تفكرت ل لقطة لي باسني فيها و حسيت جنون يدوروا بيا ( منقدرش نقلكم أنو محسيتش ب فراشات ديك لحظة بصح انا و إيتام مكان بيناتنا والو بلاك انا مارانيش نطبق في ديني 100./. بصح حاجة كيما هكا منقدرش نسكت عليها ) شفت في طابلة لي حدايا لقيت كاس رفدتو و رميتو بكامل جهدي على إيتام شفت ملامح صدمة على وجهو كان جاي عندي عيطت عليه بكامل صوتي : اخررررررج منااا قبل منزيد نقلب عليك شمبرة حكمو سام وخرجو وهو يعيط و يفرفط  بقى معايا زاك لي كان مصدوم بصح كان هو هادئ فيهم حتى نطق زاك : اه سما راكي مليحة ؟ صراحة حشمت منو إيتام يعرف هبالي بصح زاك جامي شاف غشي نطقت : أه زاك راني مليحة سامحني على واش درت ضربة وحدة حتى طرطق بضحك شفت فيه تع واشبيك ؟ شاف فيا زاك و ضحكة مزالت فيه
زاك : متوقعتش أنك تتعاملي مع إيتام هك جيت راح ننطق حتى دخل إيتام و باين بلي جنونو واصلين ل أخر صراحة دايمن والفتو هادي و حنين متوقعتش نشوفو هك سكت و شفت فيه هدر ب زعاف : زااااك أخررررج ( غمزلي زاك و خرج من شمبرة و خلاني مع هدا هايج ) جا عندي أنا من الخوف لصقت في ظهر تع سرير قرب ل عندي و قعد حدايا في سرير بلعت ريقي من نظرة تاعو متبشرش بالخير بصح أنا لي جبتها ل عمري
إيتام : ترمي عليا في كاس ؟ ( كان يهدر و عينيه كون كانو رصاص كون راني نسمع في 3 أسئلة ) بلعت ريقي و قتلو بصوت متقطع : أن..ت...قر..بت عليا ...قبل منتغاشا .. طلعت عيني فيه لقيتو يشوف فيا مستغرب حتى قالي : وين راه مشكل كي بستك 🤔
( كون نقلكم بلي مخرجتش من عقلي من هدرتو يهدر فيها نورمال كي شغل دار إنجاز ) شفت فيه بوحد النظرة وجدت حلقي باه نشبعو رخس حسبالو راني قاعدتلو حتى قال جملة لي خلاتني نتمنى كون قعدت متغاشية 👀  إيتام : نتزوجوا ؟
لحظة مافهمت لا راه يتمسخر ولا راه منيتو مخلوق ذا ؟ فتحت عينيا و كان باين بلي باقيلي خيط واحد و نولي نتغاشا كي شاف جو هكاك سيا يرقع الأمر
إيتام : مراحش تفهمينني دوك بصح اعطيني مهلة باه تتعرفي عليا و اذا حبيتي نجي نخطبك و نبقاو في فترة خطوبة لحد متعرفيني و دوك راح نخرج و نولي نوصلك لداركم ( كمل هدرتو بغمزة وخرج )
شوك كان حاكمني من كلمة نتزوجوا من عقلي يقولي منقدرش نتزوج غير هكاك منعرفوش علابالي حياة ماقبل الزواج و بعد الزواج ماشي كيفكيف و هو دايمن يقلي عندي سر و جامي صارحني بيه  و من ناحية قلبي أنو بديت نتعلق بيه .. علا أقل هو شخص الوحيد لي محملنيش مسؤولية واش صرا ... و انا نخمم هكاك شعل في مخي إنذار .. " نوصلك ل داركم " كون تشوفوا ماما و لا خويا و لا خالتي ليوووم نبات برا ومع خالتي تم راح تزيد في دوز نضت قفزت من بلاصتي لبست باسكاتي و شديت ساكودو جيت خارجة قبل ما يحكمني إيتام نمشي كي سراقين في سبيطار كون يشوفوني يقولوا راني نتاجر بالأعضاء بديت  نمشي و نتوه سبيطار كان كبير فيه ثلث طوابق بصح كل طابق فيه فروع فرع العيون ، أسنان ، جراحة و إستعجالات و فروع واحد أخرى شوية شوية بدات تحكمني دوخة و بسك أنا محروقة على هربة و الجري معرفتش حتى واش سبب لي خلاني نجي هنا ... ( نرجعوا عند إيتام )
داخل يتبسم عارف بلي تكون تخمم في قصة الزواج .. دخل ل شمبرة تاعها باه يخرجها مور ما هدر مع طبيب و سقساه على حالة تاعها كي دخل مالقاهش شاف في ساكودو تاني مكاش ...عرفها بلي تكون هربت ... رفد تلفون وعيط ل زاك
إيتام : أسمع قعد برا و ستنا سما تخرج اي هربت من شمبرة
زاك : كيفاش .. ( مكملش هدرتو وقطع عليه )
خرج من شمبرة يحوس عليها خايف لا طيح في كاش بلاصة
..........................…....…..........................
رحت نجري من بلاصة ل بلاصة سقسيت واحد مرأة على باب تع خرجة و قاتلي رحت نجري ل ديك بلاصة قبل منخرج شفت زاك عند الباب عاودت وليت خرجت من باب الثاني و من زهري طريق ديك كانت كي شغل غابة وامبعد تخرج ل طريق رئيسي قعدت نمشي وسط دوك شجر و كانت باينة بلي غابة ميروحولهاش بزاف و هنا بديت نخاف بسك طريق لي راني نحوس عليه مكاش و كل منزيد نمشي نزيد نتوه كتر حتى سبيطار مولاش يبانلي بدات تحكمني دوخة من تعب ووليت نحس بسطر كيما تع صباح بصح كان لازم نخرج من غابة و نرجع ل دار راني عارفة راح تخلا عليا ليوم.. بدات تظلام حالة وانا مزال ماخرجت ... كنت دايرة ونمشي كاش منلقا بنادم يعاوني ... ماحسيت بروحي غير ورجلي مولاتش في لرض و انا طايحة في واحد بلاصة جنون و ميشوفونيش كانت كيما حفرة معاها شجر مغطيين عليها و حداها كاين شغل بحيرة ..بديت نخاف و سطر غير يزيد و حتى رجلي راني مجروحة منها .. جبدت تلفوني نشوف لمن نعيط .. نيميرو الوحيد لي عندي هو تع ماما .... واش راح نقولها ... مراحش تفرق على هداك نهار .... تنهدت و قعدت نتفكر في داك نهار
قبل 5 سنين :
خالتي : واشبيك يا أختي علاه مراكيش تهدري مع سما
ماما : تشبهلو في كلشي كل ما نشوفها نتفكرو نحسو قاعد معايا موليتش قادرة نشوف في وجها راهي تفكرني فيه و كل منتفكرو نتفكر واش دار مع ديك عقرب . ..  و بدات تبكي قامت خالتي تسكت فيها ماما : مع أنها بنتي بصح كرهتهاا و علاجال باه منخليهاش وحدها دخلت ديك عقرب و بنتها ل داري مع أني مكنتش موافقة نخالطهم و مع تالي رجعت مطلقة ..... كنت مور الباب و نسمع فيهم ... خرجت من دار نبكيي ...
___________________________________
قاطع تفكيري تلفوني لي يصوني ب نيميرو منعرفوش رديت عليه و جاني صوتو