أحببتك في الخفاء باللهجة الجزائرية 💌

05

"توحشتك بزاف " رمشت زوج مرات .. كان قريب ليا بزاف ولازم نخرج من هاذ سوجي جيت راح نوض بصح عاود جبدني و ثبتني برجليه  ... أنا : حابة نروح ل دار و نرقد ... تعبير تع وجهو كان هك 😶 طبعا انا علابالي علاه هو يقولي توحشتك وانا نخمم في هربة .. إبتسم على جنب إيتام : يماك بعتلها ميساج بلي راح تباتي في جامعة و متخافيش ردت و قبلت و رقاد كاين أنا و فراشي  و شمبرتي ومع أخر كلمة طلع حواجبو مع نظرة تع مكر .. نسفت في وجهو يعني حتى و لو كان عندي إحساس من جيهتو أما هادا ليصرا يحسنني بقذارة ... كل منكون قريبة لراجل نتفكر بابا و ديك حالة و نخاف نكون كيفو مرة من مرات غير على هداك شعور منعرف كيفاش فكيت روحي منو و قتلو : مدابيك متزيدتش تقرب ليا مانيش**** كيما لي تعرفهم تفوت الوقت و تروح
شفت فيه و ياليتني مشفتش ملامح وجهو و عينيه لي كانو يفيضو بالحنانة وانه راح يكون سندي رجعو ظلام
إيتام : هدا واش جا في مخك أني حاب نلعب بيك ؟   جيت راح ننطق
جبدلي يدي معاه حسيتها نملت بصح مقدرتش نمشي رجلي كانت توجع كي شافني هكاك رفدني بين يديه بصح هاد مرة بلا عاطفة... منكذبش عليكم اني ندمت على واش قلت ... بصح مستحيل نتراجع على مبدأ تاعي ... خرجني من شمبرة وانا بين يديه و مقدرتش نسقسيه وين رانا رايحين شكل تاعو كان يخوف لدرجة عينيه زرقين كنت راح نحسهم ولاو نواغ ... وصلنا عند باب تع شمبرة كان باب تاعها أسود ... كي وصلنا حطني و شعل ضو و دورت عيني على شمبرة و ل أول مرة في حياتي نحس بحاجة بيزاغ
شفت كامل تصاوري معلقين في حيط .. نهار لي فوتت فيه باك ... نهار لي دخلت نخدم ... أول نهار ليا في الجامعة ... كل صوري في وكامل حالات تاعي ... لمحت على طابلة لي كانت فوق شمبرة ... تريكو بيض ....قربهدا تريكو تاعي ....درت ليه ووجهي صفر ... "حلم لي حلمت بيه قبل عامين أنت "
__________________فلاش باك ______________خرجت من ليسي عيانة باك و مدار فيا كنت نحس روحي بيزاغ و راسي سخون بزاف ..هدا كامل بسك رقدت و تاقة محلولة ...دخلت ل دار قريت شوي و بغيت نرقد بصح مقدرتش حاسة بوجاع و صداع في راسي ... و مع ضغط تع قراية منعرف كيفاش وليت نبكي و بديت نحس بتعب بداو عينيا يتغلقو و في كل مرة يتغلقو فيها نشوف بابا يقرب مني و انا نعيط بصح صوتي مكاش ميحبش يخرج... كنت نقاوم مانيش حابة نشوفو.. مانيش حابة نرقد... نفتح عيني و نغلق يجيني هداك مشهد .... ونبكي بصح مكاش صوت وليت نحس بالبكا يخنق فيا و عينيا تغمضو مقدرتش نفتحهم و حسيت روحي دخلت ل حلم لي كنت نهرب منو قعدت نشوف في بابا جاي عندي و عينيه حمرين كان يشبه ل شيطان وكان يخنق فيا وليت نشهد معرفتش اذا حلم و لا حقيقة ... حسيت بحاجة باردة و تنفس يرجعلي ... فتحت عيني لقيت ملاك ماشي بنادم كان لابس شيميزي و عضلاتو خارجين منها و شعرو كأنو أشعة لي تخرج من غروب الشمس بصح مقدرتش نشوف وجهو من ظلمة نطقت بصوت مرتجف : ش....كون أ..نت ؟
قرب مني باسني في جبهتي و همسلي في وذني : راكي في حلم  
مفهمتش واش راه صاري بصح صدقت أنو حلم و دخلت في حلم لي كان حقيقة بصح كنت متاكدة بلي واحد كيما هذا مراحش يكون حقيقة و خاصة في حياتي لي فيها مشاكل كنت نغلق عينيا يبانلي ظلام و نفتحهم نلقى هاذ بنادم يمسحلي على وجهي باه الحمة تهبطلي كنت متاكدة أنه هلوسة وخاصة دواء لي شربتو يدير هلوسة بصح معرفتش علاه قررت نهدر مع هدا حلم : أنت تحبني ؟ ودمعتي نزلت على خدي حط واش كان فيدو و مسحلي ب إبهامو دمعتي لي نزلت على خدي حتى نطق : مكاش لي راح يحبك كتر مني و راح نبقى دايمن معاك في كل خطوة .. حسيت بيدو مور ظهري لي نوضتني .... وحركتو لي خلات ظهري لاصق في صدرو ... أول حاجة دارها نحالي تريكو  ... جبد من يدو لبرة نطقت بصوت متقطع : و..اش ر..اح د..ير  ( معرفتش هاذي حقيقة ولا حلم و حتى جسمي نحسو ثقيل منقدرش ندير حركة نحس روحي مشلولة معناها راني راقدة بصح هاذا حلم و لا حقيقة ... كون جا حقيقة راح نكون قادرة نحرك روحي )  .... جاوبني وهو يفتح فيها : راح نديرهالك باه ترقدي و تنوضي ناشطة ... أنا : حاسة بالبرد ..تريكويا ... قبل منكمل كان دارلي لبرى في جزء خلفي من كتفي وين منقدرش نعرف أثر تاعها ... و مع عيني لي كانت تتغلق ... جا حظني و دخل معايا في الفراش  ... حسيت بصدرو دافي وريحتو لي خلاتني ندخل فيه كتر و غمضت عيني و رقدت ..
نضت صباح على صوت رافاي ... اه نضت و راسي نحسو باغي يطرطق ... حلم لي حلمت بيه كان واقعي لدرجة أول مرة نحس حلم حقيقي 😃 ... نضت من فراش و لقيت روحي بالبيستي لي كان تحت تريكو ... وجهي صفار و خضار و دم جمد فيا نطقت بخلعة وين راه تريكو ؟؟  نضت قفزت من فراش نحوس مكااش .. قعدت نحوس و نقول بلاك انا لي نحيتو جريت ل تاقة لقيتها مبلعة و بلاصة مخايد و شمبرة كل حاجة في بلاصتها مكاش حاجة تبدلت و مع لي كنت روطار رحت نلبس و خرجت نقرا حشية وليت لدار وكان كلشي عادي حتى تريكو تاعي لقيتو مع حوايج في خزانة مالقري قماشتو كانت تبان جديدة بصح حاجة عادية مع أومو وصابون يرجع جديد .....
__________________________ رجوع __________________
معرفتش واش ندير نضربو الانو دخل عندي و لا نشكرو الانو داواني و بقى معايا  كي عائلة تاعي مكانتش سامعة بيا
مكاش أحسن من هذا يوم انو نفهم كلشي رحت نمشي عندو وصلت عندو و أول حاجة درتها و معلاباليش علاه  "حظنتو" حسيت بجسمو تقبض متوقعش مني تصرف في وضع كيما هك صراحة انا و معلاباليش و كون تقولولي من قبل بلي هذي ردة فعل تاعي راح ننكر بسك أي مخلوق يقرب ليا نبدا نعيط و نكسر عليه لي تجي قدامي ... اما انا مكنتش نشوفو إيتام عادي .. كنت نشوفو ملاك لي كان في حلم تاعي هبط ل وذني من فارق طول بينا و همسلي في وذني : راح نفهمك كلشي و راح تعرفي كلشي بصح لازم دوك تقبلي بيا .... ( طلعت راسي نشوف فيه ) ... و نديرو عرس في أقرب وقت بعدها راح تفهمي كلشي ... و بعدما سهيت معاه...جاوبتو وعلابالي مكانش أحسن الجواب ليه : بصح انا منعرفكش حق معرفة كيفاش راح نتزوج بيك ومراكش حاب تحكيلي سر هدا لي مارانيش قادرة نفهمو واش حكاية قبل 5 سنين هادي و شنفت عليه بسك اذا راح نولي مرتو لازم نعرف واش هذا
إيتام : صدقيني في فترة خطوبة راح تعرفي كلشي لازم دوك نرجعك ليا ... شدني من وجهي و سلم عليا في جبهتي ...حتى أنا مكنتش حاب خطوبة تاعنا تكون بهذي طريقة ... طريقة وحيدة لي نقدر نحميك بيها انك ترجعي تحت مسؤوليتي 
كنت راح نهدر بصح مالقيت ما نقول في نهاية راه يقول ل حمايتي كان يستنى إجابة تاعي .. قتلو قابلة  ... بصح طبعا في داخل مراحش نفوتها لازم نعرف هاد سر و فضولي ياكل فيا راح نحاول نزيد في فترة خطوبة و نكتشف كلشي واش علاقة ملاك و بما انو ملاك داخلة ف بابا تاني داخل في حكاية ... تنهدت و رجعني ل شمبرة بين يديه بما انو رجلي راحت فيها و من تعب رقدت بعدما بدلت حوايجي لي ولاو كامل تراب و طبعا لبست حوايج إيتام لي كانو يجوني كي شكارة حسيت براحة فيهم كتر من حوايجي  ___________
نضت صباح على صوت الحس برا لي كان داير حالة نضت من فراش و و خرجت من شمبرة وانا نتبع في صوت لي كان في إيطاج تحتاني و أول ما وقفت عند درج قابلني بنادم يحظن في إيتام كان واشم في كل طرف من جسمو وملامحو متاكدة انها ماهيش غريبة عليا و منقدرش نقولكم انو مخفتش الانو أي واحد يشوفو راح يخاف من منظر وشوم لي في جسمو بعدما شفت هاذي مسرحية قررت ننسحب بصمت .... " سما " مكانش صوت إيتام ... ولا صوت زاك ولا سام ... كان تع هذا مخلوق فضائي ... بلعت ريقي و درت ليه ... و طبعا انا دايمن ندير نش ل روحي خرجت بحوايج إيتام... شفت زاك و سام شادين ضحكة على حوايج إيتام  .... طبعا شكون راح يسلكني من موقف كيما هذا و ينحيلي توتر لي كان حاكمني من مخلوق فضائي لي مقابلني من غير إيتام ... و غير شفت فيه فهم نداء تاعي ... وصل إيتام وين كنت حابسة .... و شبك يديه معا يديا ... جاست هذا خلا وجهي يروح ألوان و يجي ألوان ...قربنا من هداك شخص لي معلاباليش شكون ... غير شفت فيه عاود ولالي خوف ... شكلو يخليك تهابو بسيف عليك ... و أول ما قرب ليا خزنت مور إيتام ... علابالي بلي جاست تاعي كانت وقحة و قليلة أدب بصح خوف خلاني نتصرف هكاك ... دار ليا إيتام و ضحكة في وجهو باينة ... و همسلي قدامهم بنية أنهم ميسمعوناش : متخافيش مراح يديرلك والو ... إيتام بعد عليا و جا هذا مخلوق حظني بقوة قريب كسرلي عظامي ... جمدت في بلاصتي وفهمت بلي لي يعرفهم إيتام مكاش بنادم صحيح 😀 غير تمتم جبدت روحي عليه بسك صراحة كنت منحمل حتى واحد يحظني و لكن دوك هاد مبدأ نحيتو على إيتام بسك مخلوق راه فات سطاج تع حظن ... بصح حاجة لي خلات خليقتي تتقلب هو إيتام يعني مغارش عليا ؟ من هدا شخص لي حظني ؟ و بالعكس حتى هو لي خلاه يحظني  ... هدا كامل باه يحميني برك ماهوش حب ؟ ... إبتسمت مع هدا مخلوق وأخيرا و قتلو تشرفت بيك و عرفت بلي إسمو رائف صراحة مورالي كان زيرو ومكنتش قاع معاه ...طلعت ديراكت ل شمبرة لي كنت فيها لبست حوايجي و جيت خارجة... و عارضلي أخ لي هو إيتام  : وين رايحة ؟ ... أصلا غير نطق جنوني شعلو مكانتش بيدي بصح فكرة انو هدا كامل باه يحميني برك و مكان ني حب ني والو خلاتني نحس بخيبة و كي العادة خيبة تاعي نخرجها ب عياط  ... هدرت معاه بالعياط لي خلا زاك و سام و حتى رائف يخرجو :  واش دخلك ؟ راجلي ؟ خويا ؟ بابا ؟ قاعد تسقسي فيا وين راني رايحة و خطبة نساها مراح يكون بيناتنا والو.... وكانت أول مرة نعيط على إيتام بهذي الطريقة ... إحساسي أنو كان يستغل فيا باه يحميني برك كان يحرق فيا من داخل ... يمكن الاني توقعت أكثر من لازم ... جيت راح نخرج ... وقبل ما نعتب الباب سمعتو طار من بلاصتو ... درت ليه و بلعت ريقي من نظرة تاعو ...