أحببتك في الخفاء باللهجة الجزائرية 💌

24

سما : 

كنت لاصقة في تاقة و عينيا ولاو قلوب من منظر لي نشوفو قدامي ، ثلج كان مغطي كامل دار   كشخص عندو اكثر من 10 سنين مشافش ثلج فمنظر بالنسبة ليه يكون منظر اسطوري ،

تفكرت صوفيا و لي كان لازم نشوفها ليوم ، نزلت عند إيتام بما انو خدمتو متكملش 

: أحم 

إيتام : قولي 

سلبية وحيدة فيه أنه يكشف كلشي و أنا حياتي كامل عشتها نهدر بأسلوب غير مباشر بصح مع إيتام من مستحيلات اني ندور و نلعب لانني نتفضح قبل ما نبدا -_-

: حابة نشوف صوفيا 

حسيت بيه كي ناض من كرسي و جا مقابلني ، شدلي خدودي بين يديه 

إيتام : البسي مليح و دفي روحك راني نستنا فيك 

تخمام لي كان يتصورلي في مخي في هاديك لحظة خلاني نأكد نظرية ايتام بلي انا مغتصبة ماشي هو 

بلعت ريقي ، كنت عارفة بلي حنانة زايدة راح ديرلي اعراض جانبية و اذا زدت شوي معاه راح نندم 

طلعت نجري ل فوق و صوتو وهو ينبه فيا على جري واصل لطرف دنيا 

و بما انو جو بارد برا لازم ندوبلي حوايج ، و مراحش يكون اسمي سما اذا مسرقتش حوايج ايتام ، حاسة بأنوثتي و هيا تروح و انا قاعدة ندور بحوايج رجالية ، و اخيرا كملت من شوط حوايج  كنت حاسة روحي في الاسكا و انا لابسة زوج تريكوات و زايدة فوقهم مونتو و شال و بوني فوق راسي و زدت سروال كحل كان من نوع مقطن من داخل على اساس برد ميدخليش و ختمتها ببوت من نوع فرو كنت قاعدة مقابلة مراية و نوري ل ريتال اوتفيت

ريتال : راح نعطيك موافقتي باه تخرجي 

: في كل أحوال كنت راح نخرج 

ريتال : امنيتي حاليا ندي منحة و نجي عندك نبدلك ستيل ذكوري هدا 

: راح يبقى اريح حاجة نلبسها

ريتال : استناي و نوريلك فاشن ايطاليا 

: اذا خلاك رائف ديري فاشن و ملبسكش حوايجو

طبعا من نهار جيت ل ايطاليا و اتصالات فيديو بيني و بين ريتال متكملش , ودعتها تحت توصياتها و نزلت تحت اول ما حطيت رجلي في درجة تالية 

قلبي قفز من بلاصتو ووذني صونات من عياط درت لجنبي لقيت سام يشوف فيا و يبتسم ، حطيت يدي على قلبي بعدما استوعبت بلي حاول يخلعني 

: خلعتنيييي 

سام : لازملك شوي اكشن في حياتك 

شفت موراه إيتام كان جاي و هو عاقد حواجبو 

إيتام : خبرتك تستناني في صالون 

حسيت ب سام لي زراق و خضار ، التناوب دايمن عليه بين زاك و إيتام