رائف يحكي : ليوم كان لازم نحكي سر لي خلاني بلا قلب ل أختي لي بعدني عليها بابا قبل منشبع منها ... شفت أختي تعاني من بعيد و ماكنت قادر ندير والو حتى ولو كانت سما ماهيش أختي من أم أما حنا زوج عندنا نفس الدم تع شيطان هداك ... كنت نراقب فيها من بعيد ... اما كي لحقت 18 كان لازم نبعد عليها و باينة مراحش نخليها وحدها ... كاين إيتام لي حطيت فيه ثقتي ... وكان قد مسؤولية و قد ثقتو مالقري ب غض النظر على ذراري لي شوهلهم وجهم و أعضاءهم من غيرة عليها شفت فيها و بديت نحكيلها على حياتي علا أقل تتعرف بخوها الغايب : قبل 25 سنة كانت مرة تحب ولد عمها بصح هاد الراجل مكانش قد الثقة و إغتصبها و بعد إغتصاب صحح غلطة تاعو بالزواج فقط بسباب هدرة تع الناس و للأسف حملت منو مكانتش هماتو لا هيا ولا ولد لي كان في كرشها كانت تتعرض للعنف حتى لي ولدت وجابت طفل قررت تهرب هيا و هاذا طفل أما ... مكنتش قادر نقولها و خاصة قدام بنتو حسيت بضيق في التنفس و نظرات إيتام باه منكملش خبطت يدي على الطابلة و نضت مارانيش حاب سما تشوف غشي ________________________________ سما : شفت في رائف كيفاش كان يهدر ووجهو لي كان يزيد يحمار منظر تاعو خلا كور تاعي يرجف حسيت بيدين إيتام يزيرو على يديا من تحت طابلة ... كنت نشوف في النظرة لي كانت بين إيتام و رائف و لي خلاتو يحبس الهدرة و يخرج يجري من دار حسيت بدموعي لي كانو يطيحو ... طلعت عيني ليه و قابلني بعينيه بلو : بابا هو لي إغتصب أم رائف ... (صوتي كان يرجف) ... يعني رائف خويا ؟ حركلي راسو بعلامة إستجابة دفنت راسي في صدرو و خليت دموعي يطيحو متوقعتش بلي بابا يدمر عائلتين بلا ضمير دمر حياة رائف و دمر حياتي و حتى ملاك من شوفتها في سبيطار ماراهيش سالكة منو ... كيفاش و علاش جامي سمعت ب رائف و حتى ماما كيفاش قبلت تكون زوجة الثانية !! حتى إيتام يحاول يحميني أما من شكون وعلاه ؟ و كيفاش يعرف رائف وحتى إيتام منعرف عليه والو واش يدير شكون والديه حتى عمرو ولا مرة هدرلي عليه ... وأهم كيفاش كان لمدة خمس سنين وهو من جيهتي وحتى تحركاتي و تصرفاتي يعرفهم ... كامل هاذ أسئلة واحد ماجاوبني عليهم من نهار ظهر إيتام في حياتي وأنا في دوامة أفكار .... أما الحاجة الوحيدة لي متاكدة منها أنا و إيتام مراح يكون بينا والو حتى نعرف سر و حتى هاداك الوقت راح نأجل الخطبة
"راح نعرف كلشي قبل خطبة "همست بيها بيني و بين نفسي قبل منوض من حظنو و للمرة الثانية رجعت تريكوه بالدموع حط يدو تحت عيني و مسحلي دموعي لي كانو يفيضو وحدهم و هدر : وجدي روحك نوصلك لافاك أنا : أحم ... وصلني لدار مراحش نروح لافاك شاف فيا بحواجبو لي عقدهم من إجابة تاعي ... عضيت شافتي( كشفت روحي) ، أنا منغيبش غير في حالات قليلة ... بلا مانحس شديتلو يدو لازم نروح لدار علابالي ماما تتقلق عليا من البارح صباح وأنا برا ... إيتام : وجدي روحك مالا راح نستناك في طنوبيل قبل ماينوض حسيت بشفاهو لي علا جبهتي ، حسيت وجهي لي تلون ب غوز ... طلعت نجري الشمبرة و أنا نسمع في صوت ضحكتو على لون وجهي ... جبت تلفوني و هاديك لافوتو معايا ولبست من حوايج إيتام مخلوق راح نستعمرو بصح حقيقة حوايجو شابين و حتى ريحة إيتام فيهم .. بلا وعي مني لقيت روحي نشم في حوايجو ... نزلت عندو كي فقت بلي طولت كنا في نص طريق لدار و يدو لي كانت حاكمة يدي و يد لخرى كان يسوق بيها ... ياربي كيفاش نقولهالو ... حمحمت باه نلفت إنتباهو على طريق و نجحت باه نخلي تركيزو عليا : إيتام ... حابة نأجلو الخطبة ل بعد 15 يوم حسيت بطنوبيل كيفاش فرينات ضربة وحدة ، مزية كنت دايرة لاسانتور قبل ما يخرج راسي من تاقة شفت فيه و مع عينيه لي حمارو و جاني صوتو لي خلاني نتكمش في بلاصتي واش هادي شخصية خطرة حنين و خطرة نحسو قريب يقتلني 😑 إيتام : مفهمتش !! سماا كون نصيب نتزوج بيك اليوم و نتي ناوية تأجليلي الخطبة شفت يدو لي تكورت قبضة متاكدة كون جيت واحدأخر كون راح ماركاها في وجهي أما حتى أنا زعافي كان صعيب ، خطبتي و تكون تحت أمر واقع بواحد منعرف عليه غير إسمو غمضت عيني قبل منطرطق فيه : علاه !! معنديش حق نأجل أنا أصلا معلاباليش من شكون راح تحميني ولا علابالي واش راك تخمم ولا علابالي شكون خطيبي الحاجة الوحيدة لي نعرفها أنو إسمك إيتام و عندي سمانة ملي عرفتك إذا كنت تعرفني فأنا منعرفكش بما أنك مراكش باغي تهدر مراحش نرجع في قراري و راني نعلم فيك برك و اذا كنت راح تعارض فأعرف بلي مراح يكون بيناتنا والو حتى بعد 50 سنة ... معلاباليش أصلا اذا صح عندي مشاعر ليك تنفست بعدما حسيت النفس إنقطع بيا من هدرة لي خرجتها ضربة وحدة علابالي بلي هدرتي مكانتش في محلها ... أما هو قابلني بسكات و مجاوب حتى الجواب حاجة الوحيدة لي سمعتها منو " أشربي دواك راه في كرسي لوراني " حسيت بتأنيب ضمير من واش قلت و عينيا تحجرو بدموع ، أكره حاجة أنو يعاملني شخص بشفافية حتى يدو لي كان حاكم فيها يدي طلقها ... ركزت براسي على تاقة ... طاحت عيني على تلفونو لي كانو قايسو بإهمال في طونوبيل ... هادي هيا فرصتي ... عضيت شافتي قبل منزيد في بكا تاعي لي كان مسموع ليه و نغمض عيني حسيت بطنوبيل لي حبست و يديه على وجهي : سمااا واش بيييك شفت في عينيه بلو الخوف و قلق لعنت روحي مية مرة على تخمامي ... : رجلي أي توجع فيا من طيحة تع البارح شكيت بلي تحركت من بلاصتها حسيتو كي دور طنوبيل 180 درجة : وين رانا رايحيين ؟؟!! إيتام : راح نديك لسبيطار لازم يعاينولك رجلك ومع أخر كلمة شدلي يدي : لاااا حبس عرفت روحي بلي راني نكحل فيها بالكذب ....واش ندير دوك ... واش نقلو دوك راني نحوس عليه يخرج من طونوبيل ... ونربح الوقت ...خطرتلي فكرة لي مكانش لازم تخطرلي أما هيا مبرر الوحيد لي لواش كذبت شفت فيه وفي وجهو معمر علامات إستفهام : رجلي ماهيش توجع فيا .. كذبت عليك إيتام : سما واشبيك ليوم ؟؟ نفخت في وجهو و خرجتها ضربة وحدة : انا راني في ديك فترة هبطت وجهي لي قريب دفنتو في حجري من إحراج لي حسيت بيه ... سرقت نظرات ليه و ضحكة لي كان شادها عليا ... حسيت بيه كي حبس أما هاد مرة كانت عند فارماسي ... إيتام : راح نشريلك دواء دوك نجي قبل ماينزل شديتو من يدو : أحم ... جيبلي معاك قرعة ماء إيتام : أوكي يا ماي برنساس غمزلي قبل ماينزل و أنا وجهي تلون راح يشدهالي شفت فيه شعال كي دخل عند فارماسي و بما أنو طنوبيل كانت فيمي مراحش يعرف هجمت تلفونو و فتحتو بنفس رقم خزنة 2299 و لقيت تصاور ليه مع زاك و سام و حتى رائف بعتهم ل تلفوني و مع تالي طاحت عيني على تصويرتو وهو في البحر
Oops! This image does not follow our content guidelines. To continue publishing, please remove it or upload a different image.
و عيني لي كانت على كرشو مسطحة بلعت ريقي قبل منمحي كلشي و نرجع تلفون لي بلاصتو
بعدما وصلني إيتام و تأكدت بلي راح بقيت واقفة عند باب تع دار و أنا نحك في يدي و حتى حوايج لي لابستهم تع إيتام قعدت ندور في بلاصتي حتى جاتني فكرة ... ريتال الوحيدة لي تقدر تعاوني ... رحت نحوس على حجرة ... رفدتها و دعيت ربي تكون غير هيا في بيت و بعدما قعدت ساعة و أنا نقرا في كامل أدعية رفدت حجرة و درتلها ڨول في تاقة ... مكان حتى واحد جاوب ... هبطت راسي و أنا نخمم في هاد يومين لي راح يجيب لي صدمة نفسية ... سمعت تاقة و هيا تنفتح طلعت راسي و نشوف في ريتال تشوف فيا ب صدمة وعينيها لي دارو على حوايج إيتام ياربي و ماتفهمش نقص ريتال : سمااااا واش هذااا أنا : عاونيييني ندخل لدار و دوك نفهمك كلشي كنا نهدرو كيما محابيس لي يجو يهدرو أه يا إيتام كون قعدت في حفرة ولا هاد تبهديل شفتها كي حلت عليا الباب و دخلة تع السراقين لي دخلناها قبل ماتحكمنا خالتي تقيسنا من تاقة غير دخلت رميت روحي على السرير
أفكاركم للبارت جاي لي راح نزلو غدوة شكرا و سمحولي اذا راني نطول عليكم أما منحبش ندير بارت و مع تالي ميخرجش متناسق مع أحداث 🥺🥺🙏🏻
