أحببتك في الخفاء باللهجة الجزائرية 💌

04 🌿

قاطع تفكيري تلفوني لي يصوني ب نيميرو منعرفوش رديت عليه و جاني صوتو
إيتام : يااا&#@# وين راك&##@ كيفاش &#@@( بعدت تلفون من وذني بسك حسناتي قاع راحت من موراه ) كي حسيتو حبس ترخاس قتلو : راني طايحة في حفرة في الغابة لي مور السبيطار
مكملتش نهدر و نحس حاجة مورايا حسيت عروقي بداو يبردو من خلعة و ندور ونلقاه كلب و باين بلي جوع حاكم فيه مليار عيطت عيطة تقدرو تقولو وصلت ل كامل الغابة إيتام منعرف واش كان يخلط في تلفون متاكدة بلي سمع عياطي بصح أنا كنت مركزة مع لي قدامي كان يصر على أسنانو حاجة لي نقدر نديرها دوك اني نهرب بصح كيفاش وجع تع رجلي و سطر غير يزيد ومنقدرش حتى نطلع و حتى كلب كان يقدم عندي و بدا صوتو يعلى معرفتش واش ندير شفت قدامي لقيت حجرة رفدتها وكان لازم نضربو ل بلاصة نبعدو عليا ولا نخليه حكمت هاديك حجرة و بكل جهدي رميتها على راسو علا أقل يفقد توازن تاعو و صح فقد توازن تاعو و طاح و حاول ينوض بصح هاد مرة مقربش هرب ... حسيت برجليا فشلو من الخوف ... كلشي تخلطلي وجع تعب دوخة .. طحت فلرض و شديت تلفون إيتام كان مزال يسمع و عرفت بلي راه مع زاك و سام يحوسوا عليا داك وقت غلبتني بكية حسيت برجلي راح تتقطع شديت روحي و هدرت في تلفون
أنا : إيتام
إيتام : سمااا وين راااكي اوصفيلي خليني نجي عندك متكوبيش
طرطقت بالبكاء و مقدرتش نتحكم في روحي قعدت غير نعاود في جملة أرواح خرجني قعدت ربع ساعة على ديك حالة حتى حسيت بنفس يروح عليا و عرفت بلي حكمتني بانيك أتاك و بدات صورة تروحلي و شاشة تع تلفون تتضبب ماحسيت غير بفلاش ضرب في وجهي للحظة خفت كنت نقاوم في عيني باه نفيق بصح كي سمعت صوتو رخفت روحي .... علابالي مراحش يأذيني .... ( بعد ما خرجت من سبيطار إيتام حوس في كامل سبيطار مالقانيش إيتام : وين رااااهيييييي
زاك : إيتام خلاص بلعقل مراحش يقدرو يوصلو ليها دار ليه إيتام بكامل غشو : مراحش نخليهم يوصلو ليه سمااا مكاش ##@# راح يأذيها خرج يتنفس راه عارف بلي مراحتش ل دار وهادي كانت أول مرة من خمس سنين تبعد على عينيه تنهد تنهيدة لي خلاتو يفهم بلي خائف على سما من أي حاجة تقدر تكون صراتلها و أفكار متشائمة

مور نص ساعة وهوما يستناو في خبر من عند رائف ( شخصية جديدة في كرونيك و يكون قائد في القوات السرية )
إيتام ( كان حاط راسو فلرض و يخمم وين تكون راحت ) حتى عيط عيطة خلات زاك و سام يقفزو من بلاصتهم
تلفون ... تلفون ...
راح يجري حكم pc لي في طونوبيل وقعد يحوس على مكان تع سما من Gps تع تلفونها عرف بلي راهي في الغابة أما بلاصة وين ؟؟ خطف سام pc لي فيد إيتام و حاول من Gps يجبد رقم تسلسلي ل إتصال ب هاتف و هكا راح يكون ساهل عليه يجبد نيميرو تاعها إيتام و زاك مهدروش راهم عارفين بلي سام راه يدير أكثر من طاقتو في نهاية سما ماشي شخص عادي ل ثلاثتهم كل واحد يحبها بطريقتو

بعد ربع ساعة قفز سام من فرحة أنو قدر يجبد نيميرو تع تلفونها
إيتام يحكي :
مقدرتش نخمم زوج مرات قبل منكونفيرمي نيميرو تاعها .... كي شفت بلي رفدت ... معرفتش أصلا واش راني نقول مقدرتش نستحمل أفكار لي كانت تجيني ... عرفت بلاصتها بعدما شيبتني و نطقت .. ركبت ديراكت في طونوبيل و خليت أبال على سبيكر منقدرش نغامر ونكوبي لازم حتى نوصل عندها ... بصح سمعت صوت عياطها وهنا حكمتني فشلة في كامل طرافي معرفتش واش راه يصرالها ... قعدت نعيط عليها باه ترد بصح مكاش ...نسمع غير في حركة ... وصلت للبلاصة لي نورمالمون تكون فيها ... قعدت نحوس عليها في كل بلاصة و بما أنها كانت كبيرة كان لازم نخلي طونوبيل في طرف و نحوس عليها