بسم الله الرحمن الرحيم
وبعد ما انتهت رحلتنا قررت أوضح شوية نقط ورسايل جوة الرواية يمكن ناس لاحظتها وناس ملحظتهاش فقولت أعمل الفصل ده كملخص للرواية وأهدافها ..
أولًا هبدأ باسم الرواية إللي كان واضح إنه بيعبر عن القصة، وبيعبر عن الأمل والطموح وهو ده إللي أنا عايزة أوٌصله من خلال الرواية دي، لأن النجوم حاجة عالية، وفوق النجوم هتبقى حاجة أعلى وده معناه إن الطموح مش بيوقف عند حاجة مُعينة وبيفضل مكمل مهما كِبر الانسان وحقق حاجات في حياته ...
نيجي بقى عند أهداف الرواية :.
بعيدًا عن الطموح والإرادة إللي كانوا واضحين، في حاجة مهمة كنت عايزة أوٌضحها ..
إختياري إن يكون حلمها ليه علاقة بالاستعراضات ده كان ليه سببين، السبب الأول إني كنت عايزة أضيف جو جديد على أجواء الروايات العائلية، وده كان موجود في حتة الاستعراضات والمسابقات والطابع الرياضي إللي كان موجود في الرواية وإللي نادرًا ما بيكون في روايات تانية خصوصًا العائلي ...
السبب التاني بقى هو صعوبة الحلم ده، لأن في ناس شايفة إن موضوع الاستعراضات دي حاجة ملهاش لازمة ومش حَِلم أصلًا، بس هنا كنت عايزة أقول إن الأحلام صعبة مهما كانت هي إيه ...
نيجي بقى عند الرسايل التانية وإللي كانت ظاهرة بردو في الرواية، وهي الأهل ..
الرواية صحيح عائلية، بس تقريبًا مكنش في عائلات كاملة، ده بطلة الرواية أساسًا كانت يتيمة، والباقيين يإما حد من أهلهم مات ويإما عندهم مشاكل معاهم زي ولاد عم سما، ودي النقطة إللي كنت عايزة أوصلها، نقطة تأثير الطلاق على الأولاد لما يكبرو مش وهما صغيرين وغياب الأسرة ممكن يعمل إيه وإزاي تحقيق الأحلام بيكون أصعب من غيرهم، وبالنسبة لشخصية مُراد فكنت عايزة أوٌضح من خلالها إزاي هو كان مُخلص لوالده على الرغم من إخواته العاق وأمه الخاينة وإللي أثرت على حياته في المستقبل وخليته بيشك بسرعة في إللي حواليه ومش بيطلب مساعدة من حد ....
وبالنسبة لنهاية الرواية فهي نهاية عادلة جدًا، صحيح مكسبوش في المسابقة بس ده كان متوٌقع لأن دي كانت أول مرة فمش منطقي يكسبو من أول مرة، كمان سما حققت حلمها، أه بطريقة تانية بس حققتو في الآخر رغم كل الصعوبات إللي واجهتها ...
وبالنسبة لنهاية مُراد وإني خليته يتفرق هو وسما، فدي بردو نهاية منطقية لأنه كان مُحطم وعايز يبدأ حياة جديدة، ده غير إني لو رجعته لسما هيبقى فيلم تركي، لأن في الواقع مش كل إللي بنعوزه بيتحقق، والحياة مش وردية لازم تعدي بخسارة وفُراق، ده غير كمان إنه مش هيكمل معاها وهو عارف إن بنت عمها هي السبب، أكيد مش هيقدر يسامحها وغصب عنه هيعمل مشاكل معاها وممكن المشاكل دي تأثر على علاقته بسما لو كانت كِملت عشان كدة فرقتهم ...
أنت تقرأ
فوق النجوم ( مكتملة )
Randomكم هي بعيدة تلك النجوم رغم بريقها الذي يظهر في الآفاق ... وعلى الرغم من صعوبة الوصول إليها، إلى أنني سأتخطى الصِعاب، وأصل إلى نجمتي وحُلمي الذي لن أتوقف عن تحقيقه ... فلما لا تُشاركونني رحلتي الشاقة وتتعرفوا على عائلتي الصغيرة التي تدعمني كما يدعمني...
