أحببت بدوية (ليبية_منقولة)

الحلقة 3

كلنا نحبو قراءة الروايات ,,بس ارجوكن ماتخلنش قرايتهن يلهنكن علي الصلاة ,,😘😍
🌷🌷🌷🌷🌷🌷🌷🌷🌷🌷🌷🌷🌷🌷

رواية #أحببت_بدويه
الحلقه (3)

ووصلنا لعند نزلو الحاج يونس ونادر ومؤيد من السياره ,, واول ماجا الحاج صافي وبيسلم عليهم اطب في نادر حيطه اصغيره علي جنب راسه فجخاته وانجرح والكل انصدم من الموقف اللي بعد التفتو لقيو اللي وج الحيطه لقيو بنت لابسه فستان بيتي مخصر احمر ومورد بالابيض طبعا الحاج صافي وهل النجع عرفوها من 😂 ايوااااه اللي خمنتنها جوااااهر بسلامتها 😁 المهم وهي تجري بتهرب التفتت لقتهم مصدومين وايشوفولها وهي الكرعين من الزر وصلن لظهرها ,,😆
ونادر الوجه انحمر وانعصر من كثر العصبيه وسلم عليهم الصافي وهو منحرج وقال : انشاءلله ساهله ,, سامحونا اعيال مهبوله ديما يلعبو ومايركزوش تعال وريني راسك ياولدي ,😰
نادر تحمل الالم وقال : لا ولا يهمك ياحاج ,, ساهله ,😒
طبعا الحاج يونس ضحك عالموقف نين نجه انحمر وقعد ايكح ,,
يونس: هههههههههه ههههههههه كحكح كح 😂 ساهله ساهله جاتك في الريش ياغالي لتزم تجمد وتقسي راسك اللي ايجي للبر ياما ايشوف 😂😁
نادر والعروق قريب ينقطعن من العصبيه : الله غالب اصلا نا من الاول مش راضي عال جيه ,,كان هضا نرجع في كلامي ماصرش وماعجبنيش الاستقلال 😒
مؤيد وهو ايتلفت يمين ويسار وايشوف للمنظر كيف يجنن وابتسم وبزون وعي قال : الله ,,مكان ولا في الخيال ,, طبيعه تبارك الله ☺
نادر قرب منه وهمسله : خلاص مادام عجبك المكان العروس لك ياغالي ولا تغلا عليك 😉
مؤيد : ااه 😨
وضحك عليه نادر وخشو للبيت اللي واااسع وايهبل والنار في وكن البيت وعليها براد الشاهي والقهوة واول ماضيفهم الصافي ,
يونس بتنهيده : اااااااااه ليا زمان عالجيه هنا ,, الله الله مسمح هالمكان ايريح نفسيت الواحد ,😊
الصافي وهو واقف : مرحبتين بيكم نورتونا والله وانستونا يامرحبتين ومرحب 😀
يونس : الله يسلمك ,,بنورك ياحاج صافي ,, تسلم ☺
ومشا الحاج صافي لعياله اللي برا البيت وقال : ياولد اذبحو شاتين بسرعه وحده للغداء ووحده للعشاء ☺
ابراهيم واحد من عيال الحاج صافي : حاضر يابوي ☺
وفعلا بدو في الذبايح وبدن الصبايا ايجهزن للغداء وواخد من اعيالهم مشا للقريه وجاب خضره طلعا في قريه اللي هلبو عليها نادر وجده وخوه وفيها محلين ولا ثلاث ايبيعن في البقاله ,
المهم بعد وقت ونادر مقمعز مع الشياب والرجاله ومايهدرزش عكس خوه نادر اللي ضحك وهدرزه مع الرجاله اللي لاحظو غرور ونكبر نادر وغمتلهم منه ,
ونادر عجبه منظر الطبيعه والمكان يرد الروح وخلاها في نفسه وقدمولهم قهوة وتمر ,, وبعد وقت طاب الغدا وكان رز بالتقليه 🍲🍛 وعصبان 🍘🍤واللحم علي حلة 🍖🍗 😂
ونادر انفجع من.كبر اللحم وكلا اشوي منه بس عجبه الوكال بصفة عامه وبعد الغدا جابولهم شاي حمرا وخضرا ومعاها خبزة تنور ساااخنه اتهبل 😍 وعمكن مؤيد طايح في الوكال من جده عجبه الجو ونادر ماخذاش شاهي والخبزه نين حلفله جده عليها ,, المهم في القايله مؤيد نشا مع شباب النجع بيتعرفو عليه ونادر مشا لسيارته والشياب قيلو ,,
طبعا نسيت انقوللكن عالعلاقه اللي بين الحاج يونس والصافي ,, بات يونس وبات الصافي يبقو ضنا عم وااااقف عظم رقبه يعني 😐 والباقي حتعرفنه مع الاحداث ,,
نجو لنادر اللي فتح باب سيارته وقمعز عالكرسي السواق ونيل المرايا وقعد ايشوف لمكان الفجخه القيها طشه بس وجعاته هيبته اللي تحتربت بعد انضرب قدام الكل 😁 وتحلف ان اللي فجخاته لازم يعرفها من ويربيها ولو من بعيد ,,
ونزل ومشا يتمشا بعيد عن النجع وسط الزرع وفي عويله يجارو من بعيد شافلهم والقي لنت تجري وراهم وماسكه عصا وهي تضبحلهم وهم يجارو ويضحكو ,,رمز القيها نفس البنت اللي فجخاته وشافها نجري نفس الفستان احمر وبورد ابيض ومحرمتها رابطتها لاورا صغيره كحليه ومورده بالأحمر ومشا ناحيتها والغضب عاميه واول ماوصللها شافته طبعا اللي هي جواهر 😅 والعويل هربو من قدامها وجواهر خافت اشوي من نادر لان منظره كان معصب وجت بتمشي من بعيد عرضلها ووقف قدامها وبينهم ديما متر هكي وهو ايشوفلها بتركيز شاف قدامه بنت جميله بكل بيضا واخدودها حمر وعيونها امبار ولونهن ايحير لا عرفه ازرق فاتح ولا رصاصي ولاحظ شعرها الطويل من تحت المحرمه الصغيره اللي واصل لخصرها وزايرته ظفيرتين. لبستها بسيطه وعاديه لكن عجبه جماله ورفع حاجبه اليمين وقال: شملك مجرمه انتي تضربي في الكل مش مخليه لا كبير ولا صغير , 😒
جواهر بصوت واطي : احترم نفسك انا مش مجرمه ,, وبعدين العويل هاضوم لازم ايعاودو معاي ويكملو الحفظ 😓
نادر : حفظ? شن اتحفظي فيهم بالزبط ? كيف يعزقو الحيط عالناس ? 😏
تنرفزت جواهر من ملامه او طريقته في الكلام وقالت : لا ,,انحفظ فيهم في القرآن ,, لأني مسؤوله عليهم وجدي معطيني المسؤوليه اني نحفظهم ولو بالضرب ,, وكان عالحيطه اللي مبدري مش قصدي اطب عليك ,,مش مقصوده ,اسفه. تعاندت نا وولد خوي اني نعرف نضرب بالمقلاع وبالغلط ضربتك انت ,😒
ومشت وسيباته ايشوفلها وهو قارن حواجبه وقاللها بصوت عالي : وانتي تبي تقنعيني انك حافظه سور من القرآن ? 😏
جواهر تعصبت من غروره وقالت بصوت عالي وهي بعيده عنه : اكيييد انا حافظه القرآن كااااامل ,, ونعرف نكتب ونقرا ,,مش عشان نعيشو هنا معناتها جاهلين يااستاذ 😒
وسيباته محتار ومعجب ومنقهر من نرفزتها له وعاود للبيت وهو ايفكر فيها وايتخيل في ملامحها وشكلها وعيونها اللي جذبن انتباهه بشكل غريب ,,
طبعا لحظه وقفت جواهر مع نادر في وحده شافتهم وفرحت ونويت علي نيه ,, يستر الله منها وخلاص 😐
وفي الوقت هضا.مؤيد وصل للبيت وهو داااهش وقمعز وهو تعبان جنب نادر ,
نادر : منك داهش ? ووين كنت ? 😕
مؤيد وهو داهش : كنت نسابق نا ومحمد ولد ابراهيم دهشني الفرخ 😵
نادر رفع حاجبه اليمين وقال : تسابق ? والله الا فاضي تي كلا انت ,, وبعدين اعيال البر جرايين عمرك ماتسابقهم ولا تراهنهم 😒
مؤيد خذا كاس ميه وقعد يشرب وبعد حط الكاس قال : مانا عرفت عن تجربه اخرا ,, اتقول نعامه رفع سوريته لفمه ومسكها بسنونه ورااااح والله من الفجعه قبل طحت نحساب روحي متسابق مع جن 😒
نادر ابتسم وهز راسه علي كلام خوه ,,
وفي العشيه ناضو الشياب وطلعو بيتوضو للعصر وصلو الفرض جماعه مل اللي في النجع ,, وبزا واحد من الرجاله يعجن للدفينه ,,(ملاحظه اللي ماتعرفش الدفينه هي عجينة خبزه فيها يبسه شوي وتطيب عالجمر وبعدها تنردم بالجمر وتقدم مع الشاهي او تندار مثروده يمممم 😍😋) ,,
المهم عجنها هضك الراجل وفطحها وحطها عالجمر ومؤيد عاجبه اللي يشوف فيه ويبتسم ويهدرز مع الشباب ويضحكو ,,
ونادر سارح وقارن حواجبه ,, وطبعا خش واحد من الشباب جايب خبزه تنور ساخنه في طبق سعف وخش واحد تاني جايب القليه ,,واللي ماتعرف القليه تسأل حنها ولا جدها 😬
والشاهي عالنار والجو يخبل ,, وايهبل 😍
الحاج يونس للصافي : ريت ياحاج نحنا جينا اليوم بنوفو الوعد اللي وعدكم بيه المرحوم ناصر زمان لكم ,,وادا مازال ايسير من الوعد نحنا جايين عليه ,😊
الصافي فهم عليه وابتسم وقال : بالجوده بيكم ياحاج يونس لكن نبي نعرف راي العريس قبل موافق عن طيب خاطر ولا مجبور 😊
نادر التفت علي كلمة عريس انفجع 😂 والقيهم ايشوفولا وحده يشوفلا بنظره راك تكسر كلامي ونادر فهم عليه لكن حب يستغل الموقف وقال : موافق اكيد بس عندي شرط 😑
الصافي : وشنو شرطك ياولد ناصر ? 😕
نادر : انقابل العروس قبل ,,والتظره الشرعيه من حقي وحقها ياحاج ,, وادا ماصارش قبول نعتذر عالوعد واتسامحو باتي في وعده لكم ,😑
يونس سكت وقرن حواجبه وانقهر والصافي ابتسم وقال : عداك العيب هضا الصح وبيني وبينكم حتى نا مانوافق نين العروس اتوافق لان الحق مربيها نا بعد مات حيات باتها ,,ومانحمل فيها حاجه ,,ولازم اتكون متقبلتك حتي انت كان هضاوالله ماتسير بصيره من الوعد عندي هي اهم ,غير راك تقبلها وهي ماتقبلك بس 😁
نادر ابتسم بثقه علي غروره وثقته في نفسه وقال : انشوفو ,, والحق مرات ايسير نسب بس مش في نفس اللي تبوني ناخذها ,
يونس بصدمة : شن قصدك ? 😮
نادر ضحك وسكت ومعش عرف كيف يحكي لكن الحاج يونس شايب محنك وفاهمها وهي طايره وقال : باذن الله ماتروحو الا راضيين ,,مع اني عندي احساس انك حتنصدم باللي اختارها لك باتك ناصر الله يرحمه ,😏
وبعد العصريه طلع الحاج يونس ناخيه بيت الصبايا وكلم مراته فوز وحكالها اتجهز جواهر للمقابله الشرعيه ,, وحواهر كانت اتلعب في ولد عمتهاطفل صغير عمره عامين واتبوس فيه والعيل يضحك واتجيها حنها وقالت : يايام ,,جواهر يابنيتي ?☺
جواهر لحنها : نعم ياحني شن تبي ?😀
نوضي يايام غيري لبستك واغسلي وجك والبسي محرمتك وتعالي نبيك هيا سقدي روحك ,😊
جواهر باستغراب : وعليييش ? 😕
فوز بفرحه : هيا عشان نظرتك الشرعيه توا مع ولد ناصر نرضي هيا 😊
جواهر انصدمت وقالت : شنووووو ? نظرة شرعيه ? كيف وامتا ? 😨
وخش عليها جدها وقالقيها مازالت مقمعزه وقال : مازلتي ماوتيتي روحك ? هيا سلم بنتي البسي وغطي راسك وتعالي معايا هيا الله ايربحك ☺
ووقفت جواهر وهي منصدمه وغطت العيل الصغير لحنها ومشت ناحية صاكوها وطلعت قفطان ازرق وعليه زي التزليز خفيف بالابيض ومخصر اشوي ولبست وشاح ابيض وهي متضايقه من الموقف وكيف جدها وحنها ماياخذوش رايها ويجبروها حبر عالتظره الشرعيه ومن هو ولد ناصر اسأله في راسها واجد وبعد كملت لقت جدها يرجا فيها وخذاها معاه للبيت وكان طبعا فاضي من الرجاله الا من نادر ويونس بس واول ماخشت كانت منزله راسها خلطت عندها احراج علي غضب علي توتر علي خوف واول ماخشت مع جدها قالت : السلام عليكم ,,
ونادر نقد عالصوت وذول رفع رلسه القيها قدامه زي الملاك بوشاحها الابيض زي الطفله وقعد يرجا فيها اتشوفلا ,,
ويونس اول ماشافها قال : بسم الله ماشاءلله ,,تبارك الخلاق ربي يخفظك يابنتي وانشاءلله اتكوني صاحبة النصيب 😊
جواهر بصوت واطي : تسلم ياجدي ,,
الصافي لجواهر : قمعزي سلم بنيتي هنا ,😊
قمعزت جنب جدها الصافي وكانت مقابله نادر اللي مانزلش اعيونه من عليها ,,
يونس لجواهر : ارفعي راسك يابنتي واحكيلي تقري والا لا والا مسيبه ,
جواهر ارفعت راسها وايقابلها نادر وهو يبتسم وهي قرنت حواحبها مع انها انصدمت بيه بس بينت روحها عاديه جدا ,, وقالت ليونس : انا قاريه لثالثه اعدادي وخذيتها الاولى عالمدرسه ,, ومعش كملت ,
يونس بصدمة : ولييش ?
الصافي كمل : لان عمامها خافو عليها قعدو مل مره ايجي في جرتها واحد مره استاذ يطلب فيها وكل مرة جاينا حد وكثرن المشامل في المدينه بعد قعدت تقرا وماحوتك كملت الاعداديه وبطلوها ,, مع انها شاطره والابلات وجعتهم لكن الله غالب عماها قرورو والاكثر عمها سالم قبل يبيها لولده حسن لكن جواهر حاسبته زي خوها ,,
نادر شاف لجواهر وبعدها قال للصافي انا الحق من شروطي ان اللي ناخذها لازم اتكون متعلمه وميتواها يكون زي مستواي او اقل ,, عشان تفكيرنا يكون مشابه ونتفقو في المستقبل ,😒
جواهر انقهرت من كلامه وحست انه اهنانها بكلامه وقالت : بعد اذنك ياجدي حتى نا لازم اللي يكون فيه النصيب يكون فااارس قبل مايكون متعلم ولا لا ,, ويكون ركاب خيل بالدرجة الاولي ,, وايفوز في سباق ضد الفرسان كان هضا سامحني مش اي حد نوافق عليه ,😒
الشياب شافو لجواهر وشافو لنادر اللي حسها اهانت رجولته وكرامته ووقف وقال : كان االفروسيه يابنت الاجواد نحن من يوم يومنا فرسان مش كلن عشنا في المدينه ولا تحضرنا ننسو اصلنا ,, وحنثبتلك كلامي ونسابق مع فرسان نجعكم ,لكن لو فزت شن جايزتي 😠
جواهر شافتلا وقالت : اللي تبيه نعطوه لكي 😒
وعمكن نادر يبتسملها عالجنب وايقول : انتي جايزتي وقدام جدي وجدك ,,😏
يونس فرح والصافي فرح حتي هو لان خطتهم نجحت وطبعا كان بينهم اتفاق من المرسول اللي دزه يونس للصافي وكاتبلا فيه الخطه ,
المهم جواهر وقفت وجت بترد قاطعها جدها وقال : موافقين ياولدي لان مش عادتنا نخلفو وعودنا ,
وشاف لجواهر وقال : ولا لا يابنيتي ?
جواهر جنعت شتات افكارها وقالت : اكيد ياجدي ,, لكن لو خسر عندي شرط وحنقوله بعد السباق مايتم مش توا 😒
نادر بثقه : تم ,, ولو اني واثق من فوزي وننصحك تجهزي روحك من توا 😏
جواهر بتحدي : ماتفرحش لان شباب نجعنا فرسان ومن يوم يومهم متربيين عالخيل ومن هم اطفال ,,فننصحك اتجهز روحك انت للخساره 😏
وطلعت من البيت وهي معصبه وتخبط تخبيط ونادر لانه واقف ايشوف فيها من فوق الرواق وابتسم علي حركتها ,,
وطبعا باتو في النجع ورقدو بعد تعشو وطيبولهم خروف مشوي علي سلطات وعصاير ومايخلاش الامر من الشاهي اتقول مشروب طاقه ينقحو فيه 😐
ونادر قعد ايفكر في تحديه مع بنت خس انها نش متقبلته بالرغم انها عجباته بس انقهر ,,لان اول مره بنت ماتعدلش عليه واتفوته وتتحداه بيش يخسر وماتوافقش عليه,, وكل مايذكر تخديها ليه يعصب بينه وبين نفسه : باهي ياجواهر ساهل ,, حتفوز وحتكوني ليا غصبن عنك وحتشوفي 😠
وعند جواهر اللي قعدت اتقلب في فراشها وقمعزت تدعي انها تكسب التحدي وتشرط شرطها عليه ,, ومايفوزش بيها ,,حست كانها لعبه يبي يفوز بيها واهانها بكلامه خصوصا لما قال انها يحب يرتبط بوحده تكون متعلمه وفي نفس مستواه التعليمي, وتوعدتله ورقدت بعد ستين عركه مع النوم 😅

في صلح ثاني يوم مكا الحاج الصافي عالتحدي بين نادر وجواهر وطبعا ضنا عم حواهر فرسان وواعرين طول جهزو ارواحهم للتحدي ونادر خذاه واحد من الرحاله عشلن يجهز روحه للتحدي. وفي اللخظه هذي جواهر كانت مقمعزه مع الصبايا في بيت الحريم 😅 حسيت روحي نحكي في مسلسل بدري اردني بعد هالكلمة الحريم 😁
ماعلينا طلعنا من الروايه المهم
جهزو الشباب ونادر اللي خذا حصان ولبس اسود في اسود ,, وحددلهم الحاج الصافي من ويت يبدو ولوين يكملو وللنجع كله بيتفرج عليهم ومؤيد متخزرط وهمس لجده وقال: والله مايتعاندو الناس هاضوم ,, جراايين ,,فمابالك احصنتهم يستر الله ,,نادر في موقف لا يحسد عليه 😰
يونس بضحكه : ماتهزاش علي خوك يالهبل وتفرج ☺
وبدت الاشاره بيش يجارو
و..................

ونبي نرقد سادكن لعند هنا ايوااااه 😡 عارفه روحي دلعتكن ووحلت فيكن نشرط مانشرط ضروري انراضيكن ونلبي طلباتكن 😏
بس علي قلبي زي العسل 😍
رايكن مليشياتي 💋
قراءة ممتعه ,,

#Hamelo✒