أحببت بدوية (ليبية_منقولة)

الحلقة 21

سلامات نعموشاتي 😊,, اسفه عالتأخير☺ ,, وردن بالكن من صلاتكن وراس غواليكن 😐
وصلن علي شفيعنا يوم الحساب ,,😘

💚💚💚💚💚💚💚💚💚💚💚💚💚

رواية #أحببت_بدويه
الحلقه (21)

طبعا وصلنا لعند زهرة اتحاول تقنع اختها منى بعايشه لولدها عمر ,,👇
منى بعناد وتسكيرت راس : لالالا يازهرة ,,شن بيضمني ماتطلع زي امها ,,مش العرب اللولى اتقول اقلب الجرة علي فمها تطلع البنت لأمها !!  لالا مش قادرة ,,ربي يعوضه باللي احسن منها ,
زهرة تنهدت وقالت : حرام عليك ولدك يبيها ورايدها ,,والحق البنيه عسل ,مغير ماتعنديش وماتحرميش ولدك وتنكدي عليه ,
منى قرنت حواجبها وقالت : خايفه ياخيتي خايفه من بكره ,
نادر بضحكه قال: عليش خايفه بس ياخالتي ,,? وبعدين تعالي هنا انتذ عارفه عمر طيب وحنون ومادام حبها ورادها فأكيد اختياره صح ومش غلط ,,نش ايقولو الطيبين للطيبات ,, وصدقيني عايشه بنيه اكوييه وبدليل كانت تشعر بالذنب من اللي انجبرت اديره في اختها واعترفت ,, وهضا اهم شي يثبت طيبتها وانها عكس طباع امها ,
منى : وشن بيضمنلي انها مش كيف امها يانادر? وبعدبن والله مش كريهة فيها بالهكس نا من اول ماشفتها عجبتني وحبيتها وماصدقت عمر حكالي عليها طرت من الفرحه ,,بس اللي دارته امها مش ساهل راه ,, اي طلعت مجرمه راه وينقنه موضوع يشخشب 😒 ,,
زهرة تنهدت وقالت : يامنى انتي تعرفيني أكويس ,, مش اي حد يخش راسي وعايشه خشت قلبي قبل عقلي ,, وحبيتها ويسد ان تربية جواهر اللي نش حنحكيلك علي اخلاقها وطبعها ,
منى بحيره : والله ماني عارفه يستر الله ,, انكان عنده فيها نصيب اساع ياخذها ولو الكل معارضين ولو ماعندهم نصيب في بعضهم مش حياخذها ولو الكل وافقو وراضيين ,, كل شي نصيب ويستر الله ,😓
نادر وقف وقال : انشاءلله خير ,,مغير ماتسكريهاش بس ,, وبعدين هي مازالت صغيره وعمر مازال يقرا ,,ديرو برنامج خطوبه وخلوها اطول مةلا سنة ومعاها ,,ومنها تعرفو طبعها وتبقي عاطيتها فرصه تكتشفي طبعها وتربيتها ولار,?
منى هزت راسها وقالت : انشاءلله خير ,,
نادر لأمه : نا طالع توا تبي شي ياامي ?
زهرة بحب : نبي سلامتك ياغالي رد بااك علي روحك ,☺
نادر : انشاءلله ,
وطلع نادر ويجل جواهر في المدرسه وطبعا كان وضعها انتيساب واتجي تحضر الأمتحانات وكان نادر يساعد فيها في كل شي ورنده حتى هي ماقصرت معاها ,, وجواهر تبذل في جهدها في القرايه ,,وطبعا خشت في جو الوحم والمرض وكانت تتعب بس نادر وزهرة ورنده محافظين عليها والصافي يتصل بيها ويطمن عليها بعد دارت فون واتكلم في حنها واختها عايشه ,,ومؤيد سأل علي هناء وعيلتها وطلعو ناس اكويسين ومحترمين وهناء بنوته علي خلق ومشكورة من جيرانها ومن كل حد سأله عليها وزاد اعجاب مؤيد بيها وحكا لامه طبعا وفرحتلا وفعلا مشو كلمو عليها وخطبتها امه وزي العادات بتفكر الغندورة ويسألو عليه ومن حقها خصوصا ماتعرفاش الا مرة شافاته ,, ☺ وقعدو يرجو في ردهم ,,
ومرن الأيام وكان الكل مشغول اللي في قرايته واللي في عمله واللي في حبه 😁 طبعا كل حد يغني علي قصاد مواله ,,😂
جواهر ونادر كل يوم ايزيدو ايحبو في بعض وايتعلقو اكثر واكثر في بعضهم ونادر كل يوم يكتشف حاجات في جواهر ايزيد تعلق بيها ,, ادبها وصلاتها وحجابها اللي علي راسها قدام سلفها ااجد يونس ,, ولبسها الطويل المستور وعدم خطها للمايكب قدام اي حد الا لزوجها بس وهضا الصح بعد تقلبنها في روسكن ولا ? 😐 المهم القيها تقرا في قرآن واتنشف في الحوش بمية وملح واستغرب نادر من حركتها ,
نادر: عليش اتسيقي بمية وملح ?
جواهر وهي اتنشف : عادي ,,الملح اكويس ,,وهذي عادة واخذتها من حني فوز بعد نمشو لحوشنا في القريه وانظفو الحوش وبنكنلو اتقولي جيبي سطل وحطي فيه مية عاديه وملح وسيقي بيه الحوش وخاصة العتب اكويس يبعد السحر والحسد والعين ,,
نادر ضحك وقال : وانتي مقتنعه بالشي هضا ?
جواهر : اكيد كلام العرب اللولى مانفوتش بكككل ,,  وبعدين البركه فيهم وفي عاداتهم ,
نادر ابتسم وقال : بس المفروض انتي قاريه ومتعلمه وعارفه ان الشي هضا تخاريف ,,والناس توا تحضرو واطورو ,
جواهر وقفت وحطت وقالت : بس حتي العلم توا اقتنع بالشي هضا ,,عندك علم ان الملح يبعد الطاقة السلبيه منك ومن الحوش لو رشيته في زوايا بيتك !, ولو حد بخره مع ورق حنه سوا نيحونه او ورق جاف يطرد كز الطاقه السلبيه وحني اتقول يبعد حتى السحر ,, ورد بالك اتقول تخاريف ,,لاني مجربته اكثر من مرة ,,
نادر رفع ايديه ببن راسه بطريقة استسلام وقال : لا ابدا ,,, الا العادات وكلام ناسنا زمان. ,
جواهر قرنت حواجبها وقالت : انا اسفه اذا ضايقتك ,, بس انا متعوده هكي اندير ,,
نادر قرب منها وحط ايديه علب خدودها وقال : بالعكس ياجوهرتي مش متضايق عليش اتقولي هكي بس ?
جواهر : لاني انطبق في حاجات قديمه وممكن انت ماتحبش الشي هضا ,, وتحب مراتك اتكون متحضره في كل شي فيها حتى في تفكيرها ,
نادر ابتسم وباسها علي جبينها وقال : بالعكس حبيبتي ,, عاجبتني وعلي مودي اخرا ,, واكثر شي عاجبني فيك تمسكك بعاداتنا وتقاليدنا والأكثر تمسكك بدينا وهضا اللي مخليني مدمنك ,,😍
جواهر خجلت ونزلت اعيونها لوطا ,, نادر قرب منها اخرا نين راح النفس من عليها وحست بروحها بيغما عليها ,,
نادر بحب وصوت وااااطي : عاجبتني باسلوبك💋 وباسها علي جبينها ,,وكلامك 💋 وزاد نزل باسها علي خدها اليمين 💋  واخلاقك وباسها علي خدها اليسار 💋 ,,وطيبتك وباسها علي خشمها 💋 ,, وحناطتك وهو بيقرب وايطيح السطل من يد جواهو تنكب الميه واتلبزهم من رجليهم نين ناضو مفجوعين ,,😨
نادر حب يغيضها : اخخخ طيرتي اللحظه اللي نبيها لبزتينا ياكبدي ,😘
جواهر الوجه قعد اتقول لابمة عرس تولع وتطفا 😂
ورااااحت من قدامه ,,
نادر : هيييي هيييي بشويش علي روحك ماتجريش ,,
وقعد يضحك عليها وطلع للحديقه رن فونه القيه طارق صاحبه فتح نادر عليه ,
نادر : ايوا يامان ,, شنجوك ?
طارق : الحمدالله تمام ,,شخبارك انت ?
نادر : والله الحمدالله ,, غريبه اتصلت صايره حاجه في الشغل ?😑
طارق : شن بنقولك والله محتار ,,ياسيدي  اللصقه كانت عندنا في الشركه وسألت عليك ,
نادر قرن حواجبه وقال : لصقه ? تقصد من ?😕
طارق تنهد وقال : اللي كانت مراتك ,,اللي اسمها رتاج ,😒
نادر كان ناسيها بكككل وطبعا عايش حياته مع حبيبته وزوجته واموره بدت تتعدل وقال بعصبيه : وشن تبي جايه الحيوانه غادي ?😡
طارق : مش عارف المهم جت وبدت اتلسون في الموظفات والموظفين تبي تعرف رقم فونك الجديد وبعد اصرت وزعتها وهددتها بالأمن لكن عاركت ودارت هرجة في الشركه وطواطي ومانحكيلك علي جلاطتها ,😒
نادر مسح بيده علي وجه وقال : شن اندير فيها بس ,, نقتلها وانتريح ?? باهي وشن صار بعدها ?
طارق : المهم هددتها ولزيتها من الشركه وخطرها سألت علي موضوعها وراجلها اللي كانت عنده ,
نادر : وشن عرفت ?
طارق : طلع مفلس عليه ديون بالملايين وحجزو علي املاكه حتى اللي في الخارج وعمنك رتاج طللت منه الطلاق وطلقها ورد لمراته اللولى ,,لانه زي ماتعرف كان متجوز بنت عمه ,,
نادر : وااااك علي ام وجيجها الفرخه هذي ,, تعرف لو نشوفها قدامي قسما بالله تحصل كف لها زمان عليه ,
طارق بقصقصه : نادر هو انت مازلت تبيها ومنقهر منها ولا نسيتها وفتتها من الاخير نحن صحاب ولازم تحكيلي ,
نادر : بالهمس ماعاد اتهمني بشي ,, ونسيتها بككمل لو ماحكيتلي عليها ونكدت عليا مش وقتها بكككل ,
طارق : اكيده يانادر ?
نادر انقهر : تي خطاني يارااا لا فاضيلك ولا فاضي لل××××××××××
طبعا سبها الغندور 😁😂
نادر : سكر خلاص وكان جت للشركة مرة ثانيه اطلبلها الشرطه طووول ,
وسكر من طارق وهو متنرفز ومنقهر من رتاج اللي اكتشف خيانتها وقسوتها وطمعها في الفلوس لدرجة تجوز وتطلق عشان الفلوس وزادت طاحت منعينه ونقم عليها ,,
المهم في يوم جواهر راقده في جناحها بعد قيلت هي ونادر بعد الغدا وزهرة مشت لأختها لتهدرز معاها وتزيد تقنعها بعايشه وطبعا بأمر من عمر اللي انقهر لعد امه رفضت طلبه بالارتباط بعايشه وقعد حزين ومجروح ,,
وشال خالته زهرة لامه اتحاول معاها مرة ثانيه ,,
ونادر ناض عالعصر ومشا للشركه طبعا لانها شركة خاصه بيه يمشي امتا مايكونو في حاجته في شي ضروري وكان عنده اجتماع والحاج يونس بعد قيل ناض صلى العصر وقعد يقرا في كتاب الله اشوي وناضت جواهو لقت جدها يونس بس وطبعا اتناديله بجدي ,, ورنده كانت ساهره تقرا عندها امتحانات وناضت مصدعه ,,
جواهر لحدها يونس : تقبل الله جدي ,
يونس بس صدق بكلام الله وسكر اانقحف وحطه عالطاوله قدامه وحول نظاراته الطبيه قال : منا ومنك صالح الأعمال يابنتي ,
جواهر : اتحب تشرب قهوة ولا شاهي ?
يونس بابتسامه : ياريت قهوة ,,كان مافيها تعب ,
جواهر ابتسمت وقالت : تعبك راحه ياجدي من عيوني ,
ومشت للمطبخ علي جيت رنده اللي رابطه راسها وشافتها جواهر ,
جواهر : لاباس كنك ?
رنده : مصددددعه راسي بينفجر ,
جواهر : بعيد السو عليك ,,خوذي اسبرين وحنجيبلك قهوة معايا نا وجدي ,,
رنده : توا خذيت حبة اسبرين ,,ياريت قهيوة بس ,
جواهر : حاااضر اشويه بس ,
وخشيت للمطبخ وفتحت باب المطبخ الخلفي اللي يفتح علي زي البراندا مكان في الحديقه بس من خلف ,,وبدت اتطيب في قهوة وطلعت من كيكه دارتها عالغدا وبدت اتقص فيها واتحط عالصفرة وطبعا الفيلا مافيها حد الا جواهر ويونس ورنده ,, وهي بتلف واتجيها ضربة عالراس افقدتلها وعيها واللي ضربها رفعها وشالها وطلع بيها من باب الفيلا الخلفي ,وطلع بيها وحطها في سيارة عاليه مظلمة ورااااحت السياره بجواهر ,,
في اللحظه هذي رنده تهدرز مع يونس وحسو بجواهر طولت ,
يونس : صبي سلم بنتي شوفي مرت خو كنها طولت بالكي تعابانه ولا شي حاجه ,
رنده : حاضر ياجدي ,, فعلا والله مفروض خشيت نا طيبت القهوة عنها ,
وصبت رنده وخشت للمطبخ بس استغربت مالقتش حد وكانت الصفرة جاهزه والكيكه عالطاوله ومقصوص منها طرف بس وجواهر مش قاعده ,
رنده : جواااهر ,,,جواااهر ,,وينك ?
وطلعت برا البراندا مالقاش حد لفت عالسور من جنب برمت ودورت مالقتش حد وقعدت تنادي بصوت عالي وخشت تجري علي جدها علي جيت مؤيد ونادر من برا و...........

وعدنا للأكشن من جديد 😎😂
خلاص بلا اسكنان وراس امكن بكره انزل 😘 هانت خلاص 😉

                            قراءة نمحه 💋

#Hamelo ✒