قبل ماتنفصلن وتبدن فيا الضي كان مقطوع ,,😁 وبغددونا وماجا 😭,, تشفشفت وانشويت وتحمرت وعالبطيئ اخرا 😒 وماجا نين عاطيت كل شيخ وعده. علي قول حني الله يرحمها ,😔😢
وطبعا انتن عارفات اني نكتب وانزل طووول يعني اتجيكن الحلقه طااازه 😌
كان مانحرقت من النو اليوم 😥
المهم ,, هذي حلقه والاخيرة قررررربت 😉
💐💐💐💐💐💐💐💐💐💐💐💐💐💐
رواية #أحببت_بدويه
الحلقه (25)
في الحلقه السابقه وصلنا لعند رن فون نادر وكان طارق الانتيم متاعه ,,👇
ورن فون نادر وكان طارق ,,
نادر : الووو ياصقع ,😊
طارق : صباح الخير يانادر ,,نبيك ضروري ,😐
نادر : انشاءلله خير شن في ? 😕
طارق : ماينفعش عالفون بنحكي معاك طبيعي ,😐
نادر : تمام انا في الطريق ماشي للشركه نلقاك غادي ?😕
طارق : اوكي نتلاقو 😐
نادر بعد سكر من طارق طلع لسيارته ووكب واول ماولعها قال : غريبه طارق صوته مش عاجبني يستر الله كان ماسايره حاجه ,,
وطلع بسيارته ومشا طووول للشركه
انجو ياحناتي للفيلا ولجناح جواهر بالتحديد اللي ناضت ومالقتش نادر وعرفاته ناض قبلها ومشا للعمل وخشت للتواليت ادوشت ولبست فستان بيتي حلو 👗 ازرق فاتح بقلوب بيضا صغيرة ومخصر بشريط ساتان ربطته من الخلف علي قصاد الخصر وطوييل وخفيف في الحركه وكمه ساتان وفي ثنيه عند الرسغ ولبست عليه حجاب زهري وفيه خربشه بسيييطه زرقا وحطت كحل بس وشويه عطر خفيف ولبست الاسدال عشان اتصلي فرضها اللي فاتهاوبعد كملت شالت الاسدال ونزلت لقت الالجد يحكي بالفون واول ماشافها ,
يونس : اهي ناضت تو نعطيها لكي وتطمن بروحك ,
جواهر خذت الفون وهي قارنه الحواجب واول ما سمعت صوت جدها الفرحه بانت في عيونا ,
جواهر : الو ,,جدي كيف حالك وحال حني وعايشه ?
الصافي : الممدالله نحن بخير كيف حالك انتي يايمي وحمدالله علي سلامتك ,,شن دارو فيك انشاءلله ماضروكش ?😰
جواهر : اطمن ياجدي انا كويسه والله ,, ونادر ماخلاش الليله اتعدي الا ونا في حوشي وسط عيلتي ,😊
الصافي : الحمدالله زايرين خير اللي ماصارتلك بصيره ,,حنك فوز تبكي من اول ماعلمت وعليما حاولت انهدي فيها مابت ,,شايلة الصوت عليك 😞
جواهر والعبرة اخنقتها : ربي يحفظها وايطولي بعمرها حني الحنونه ,, هذي امي مش حني ,,عاطيها ليا ياجدي بيش تهدا ,😢
الصافي : انا بعيد من البيت وهي معاها صبايا النجع وهرجة ,,قلت نحكي مع يونس ونطمن عليك ,,لكن يايمي لازم اتجي للنجع بيش الكل يطمن عليك باهيو ? ☺
جواهر : حاضر ياجدي عندي امتحانات الاسبوع ااجاي انكملهن وانجيكم والله مرايفه ع النجع وجو النجع واعيال النجع اللي كنت انقري فيهم ,, ☺
وحكت اشوي ولعدها عطت الفون ليونس اللي نها المكالمة بعد ماحكا شوي مع الصافي وساف لجواهر القيها مقمعزة عالصالون وباين عليها الحزن ,
يونس : عارفك مرايفه علي جدودك والنجع ,,وتبي الحق حتى نا مرايف عالنجع ,,كملي امتحاناتك وحنمشو بإذن الله نقعدو اسبوع غادي 😊
جواهر بفرحه : صاح ياجدي ?! 😀 ربي يطولنا بعمرك ومايحرمنا منك ☺
يونس ضحك : ههههههه يالمنجوهة ,, طلعتي امرايفه صار ?? ولا يهمك يابنتي مغير رمزي علي قرايتك توا وارفعي روسنا عاد 😊
جواهر : اكيد ,,كون هاني القرايه انحبها ومهما صعبت انا قدها بإذن الله ,☺
علي خشت زهرة ورنده كانن في المطبخ ,,
رنده : صباحو ياجوجو 😙
جواهر : اما صباح قولي قايله ☺ اول مرة نرقد للظهر 😅
زهرة بحب : عادي يابنتي ,, انتي وضعك تغير توا واكيد جسمك اللي ارغمك عالنوم ماتنسيش انك حامل ,,😊
وجواهر نزلت وجهها وهي منحرررررجه والوجه (طماطم ,,الله الله وين البنات اللي يتحشمن من عمتهن وجد راجلهن من الحمل 😅 تقريبا انقرضن 😒 تو يزابن بالحمل كأنه انجاز ماعمر داراته وحده قبلهن ,,😤)#Hamelo
ماعلينا ✋
المهم رنده قالت : وماتنسوش ليلة امبارح ينعلي انموت وماننسا اللي صار,, هي اللي انخطفت جواهر ونش نا وقريب انجلطت ,,يابال نقعد نا نش نرقد للظهر تي نرقد اسبوع من الفجعه 😫
زهرة ويونس وجواهر ضحكو علي كلام رنده ,, 😂
ومؤيد خش عالضحك علي طول جاهم وقال : ضحك واجتماع عائلي اكيد الموضوع عليا 😌
يونس : وعليش متأكد انت ? مافي حد ايضحك فينا الا انت ولا كيف ? 😁
مؤيد : لا ياحاج قصدي فرحانين ان موضوعي قريب وهكي ,,خليك فري وافهمها وهي طايره عاد ,😒
يونس حب يقهر مؤيد وقال : لا يافالح لا طايره ولا قدم ,, نحن نضحكو علي كلام اختك المريوحه ,, وانكان علي موضوعك خلاص قريب نمشو وانحددو موعد العرس ,,تريحت توا ? 😏
ةمؤيد يحضن جده وباس علي راسه ويده وقال بحركات دراميه : تسلم ياأفضل جد في العالم ,,وحق ربي صقوع وطوفوش اخرا باهي ,,😉
رنده بضحك : عاطك الخير هضا انهبل رسمي اشحال كان اول مرة اتشوفهاو خطبتها ,,كان درت قصة حب وبغدد زي خوك شن درت بس ,,😂
وهنا زهرة انغزت رنده اللي طبعا قالن الكلام بدون قصد ,,وجواهر نزلت راسها وحاولت ترسم ابتسامه علي شفايفها ,,بس زهرة بحكم خبرتها عرفت ان جواهر وجعتها الكلمة ,
زهرة : وانتي الصادقه هكي احسن ,,شافها تريحلها خطبها وانجوزها زي مادار نادر لما تجوز جواهر ,,وانشاء حوشه عامر زي نادر وتطلع العروس زي جواهر هكي انتريح ,😊
جواهر فرحت بكلام عمتها اللي طبعا قالاته عشان تنقذ اللي قبل فركشاته بنتها ,,ماعليكن منها رنده مريوحه ومرعوشه 😁 في كل حوش لازم طرف يررعش ,,😅
المهم ,, يونس : كليتي حاجه يابنتي ?
طبعا يقصد الكلام لجواهر ,
جواهر : ماعنديش نيه ,
زهرة مسكت يد جواهر وكرتها معاها وقالت : لالااااا لازم تاكلي وبعدين انتي معقوله لاتوا بدون وكال ? والفطور اهم وجبه يابنتي ,
وخشن للمطبخ والمرعوشه رنده في جرتهن ,,
جواهر : والله ماعندي نيه ياعمتي. ,
رنده : ياجوجو حرام عليك انتي توا معاك بيبي لازم اتغذيه وتهتمي بصحتك عشانه ,,ريتي لازم اتكون بنوته ايوااااه ,😍
زهرة هزت راسها يمين ويسار وهي اتصب في العصير وقالت : علي أساس اتشكل فيه ولد ولا بنت ,,ربي يهدي ,😒
جواهر حست بفرحه مش عاديه وهي متحاوطه بحب عيلة كامله ام واخت واخ وزوج ,,وتدعي للعالي انه يحفظهم ليها وماتنحرم منهم بكل ويقدرها علي اسعادهم و ترفع راسهم ,
وطبعا حطتلها زهرة عالطاوله فطور كامل دحي مقلي 🍳 وخبزة 🍞وحليب 🍶 وعصير فريش 🍹 وزيتون وجبنه 🍙 وحطتلها كم نوع فاكهه 🍓🍎🍌🍐 وشجعت جواهر انها تاكل وتقوي روحها وفعلا بدت جواهر تاكل وبدون وعي منها قعدت تاكل بدون توقف نين مسحت الطاوله مسح 😂
وتحشمت بعد لقت روحها تاكل في التفاحه وكأنها مش واكله ,,, ورنده اتقرض في السلطه عالطاوله ولاخظت حشم واهر لان الوجه يقعد حمر زي التفاحه اللي تاكل فيها ,,
رنده : كنك ياجوجو ? شكلك انحرجتي ولا تتألمي ? 😳
جواهر بصوت واطي : لا حبيبتي ,انا كويسه ,,ب.بس ا.اا. قصدي اني ماكنتش جيعانه و.ومستغربه كيف كليت الوكال كله 😓
رنده زفرت براحه وقالت : فجعتيني حرام عليك اعصابي مش متحمله ,,معقوله متخشمة عشان كليتي ? وانتي حاسبه روحك غريبه ولا كيف ?😒
زهرة فهمت علي جواهر وقالت : اسكتي يارنود وانتي عالقه افصلي اشويه ياماما ,,😌
رنده 😒
زهرة قمعزت عالمرسي اللي جنب جواهر وقالت بحب امومي : حبيبتي جواهر ,,رولا انتي من العيله يعني حتي لو تاكلي الثلاجه كلها هضا حوشك وانتي بنتنا زي رنده هذي بالزبط ويمكن اكثر ,😊
رندة بجو غيره : ياسلااااام ياماما ,,بنبدا انغار راه 😒
زهرة وجواهر ضحكن وقالت زهرة : ثانيا انتي توا حامل واي تصرف ممكن تصرفيه مرات مش من نيتك او انتي اتقولي شي وتلقي روحك اديري في شي زي توا انتي حسيتي روحك مش جيعانه واول مابديتي تاكلي نيتك انفتحت ,,واكيد هضا البيبي اللي حيعان ,,فأكيد مش حيهون عليك اتخلبه جيعان ولا ?
جواهر هزت راسها باها ,,
زهرة وهي تمسك في يد جواهر بحب وقالت : وثااثا وهو الاهم اعتبريني امك صاح مش حنقعد زيها بالزبط ,,بس اعتبريني امك واللي تبيها قوليلي عليها ونديرها لكي بعيوني ,,فاهمه ? الا اذا مش حاسبتنا عيلتك وهلك هذي حاجه بروحها ,
جواهر مسكت يد عمتها وباستها وقالت والدموع في عيونها : بالعكس ,,والله انحبكم ومش حاسبتكم ,,انتم عيلتي صاح ومن اول ماحيت للفيلا ماحقياش منكم الا كل خير وانتي ياعمتي ربي يحفظك لنا وايطولك بعمرك ويدومك علي روسنا ,,ماحسيتش انك عمه لا بالعكس حنيتك وحكمتك وطيبتك زي امي بالزبط , ربي مايحرمني منك ,😢
زهرة واعيونها بدن ايدمعن وقربت جواهر لحضنها وقالت : وانتي بنتي اللي ماجبتها حبيتك والله زي رنده ,,كنت نتمنا في بنت مع رنده وربي جابك لنا خيه لبنتي وبنيه ليا ,😢
وجواهر حضنت عمتها اللي حست بحضنها حضن ام حنون وعجبها احساس الامومه إللي حست بيه من عمتها وفرحت وبكت من الفرحه وفي وسط مشاعرهن فاقن علي صوت ابكاء 😨😨 التفتن لقنها رنده شايله الصوت فاتحه فمها واعيونها خط والدموع شلال : عاااااااااااااااااااااا 😭
زهرة : رنده حبيبتي كنك ? 😨
رنده بعد جتها امها وجواهر منفجعات وجواهر خافت اتكون رنده غارت من معامله امها لها ,,ردت رنده بصوت متقطع لانها تبكي :ق..ق..قط.. قطعتيلي قلبييي وجعتني ..ج..جواهر لان ا.اامها ماتت و...وهي انحرمت ..من.حنان امهاااااااا 😭
جواهر اعيونها دمعن واحضنت رنده وقالت : نجك ليا ياخيتي ,,ربي عوضني فقدها خير ,,لاني تربيت علي يد جدي وحني وبعدها جيتكم وماقصرتو معاي ,,ربي مايحرمني منكم يارب 😢
رنده : 😭
البنت هذي مالهاش حل دموعها قريبات علي ابسط شي وطبعا اغلبنا هكي واولهن انا والله 😢
المهم انخلوهن إيكملن في حط الغداء وبيبدو ايتغدو ونمشو للشركه وعلي لقطه نادر اول ماوصل وخش للشركة بهيبته وشخصيته ومانحميلكن االموظفات اللي قلوووب فوق راسها واللى اعيونها برواحهن قلوب واللي تدعي انه يشوفلها مرة بس ,,لكن هيهات القلب احتلاته وحده وبس ,,حبيبته البدويه 😍
المهم اول ماوصل لمكتبه وقفت السكرتيره وحياته : صباح الخير استاد,😊
نادر بعمليه : صباح النور اتصلي بالمهندس طارق ايجيني عالمكتب ,😐
السكرتيره بدلع متصنع : الباش مهندس طارق يرجا فيك من بدري في المكتب جوا ,☺
وقرن نادر حواجبه وخاف اتكون في حاجه صايره وخش القي طارق مقمعز عالمرسي اللي قدام المكتب وايهز في رجله دليل عالتوتر ,
نادر : انشاءلله خير سغلتني شن في 😕
طارق بعد شاف نادر وقف وتنحنح وقرن حواجبه وقال : احمم .لا ماتخافش كل خير انشاءلله ,😓
نادر خط شنطة اللاب عالمكتب وقمعز عالكرسي اللي مقابل طارق وقال : احكي شن في ,😐
طارق مسح وجه بيده وقال : الصراحة يانادر انا قاصدك في موضوع ونبيك ماتتسرعش في الجواب ومهما ايكون ردك توعدني ان الصداقه اللي بيناتنا ماتنهزش ولا تتغير ,😓
نادر ابتسم وقال: معقوله ياطارق ! انت لو تطلب روحي نعطيها لكي اطلب يارا وانشاءلله طلبك مجاب ,😊
طارق وهو قريب ينزح عرق : انا بنطلب منك اختك المصون علي سنة الله ورسوله ,😓
نادر تفاجاء بالاول بس بعدها فرح وقاله : وعليش متوتر لهدرجة ? وبعدين اعتبر طلبك مجاب ,, مغير نسالوها هي بس ,وبالنسبه ليا ماعنديش مانع ,😊
طارق تريح وتنهد وفرح من كلام نادر وقال : يعني انجيب هلي يخطبو ونتوكل علي الله 😊
نادر : اكيد ,, بس في الاول نحكي للعروسه ونجيبلك منها الزبده وبعدها اتجيبهم علي ثقه ,😉
فرح طارق واتفقو انه نادر يعطيه الرد في الليل وبدو في شغلهم ونادر فرحان ان رفيقه وصاحبه يبي يرتبط باخته لانه مش حيكون متريح علي اخته الا مع طارق لأنه رااجل وحيهني منها ,,,
المهم مشا اليوم عادي وجا الليل وسأل نادر رنده والعطيبه تحشمت والخدود انحمرن وراحت جري من قدامه وطبعا جواهر جاته بعد شافت رنده تجري لغرفتها والضحه والفرحه في اعيونها ,
نادر : هذي كنها هربت ? 😨
جواهر وهي اتحاوط في رقبة نادر واعيونها عليه : الجواب عطاته لكي لما مشت تجري والا انت مافهمتش ?
نادر : والله مافهمت تبيه وموافقه ولا اضايقت وهربت ,,انتي قالتلك حاجه ?
جواهر : لا ماقالتليش بس شفت الفرحه في عيونها ووجها تورد وانحمر معناها وافقت ,,مش ايقولو الصمت علامة الرضا ,😊
وفعلا مسك نادر فونه والقي طارق ران عليه قريب عشر مرات ضحك ورن عليه وطووورل رد وعطاه الموافقه وحيدن من طريقه طروقه عاااد 😂 يافرحة ويش انديرلك طيريلي والا انطيرلك 😁
المهم جواهر بدت في امتحاناتها ورنده عطلت السمتر اللي فيه من جامعتها وعمكن مؤيد حددولا موعد عرسه ورنده جتها ام طارق واخته الكبيره خطبنها ودارو جو انفكرو ونردو عليكم ومايغباكن في الطروح 😁 وبعد ثلاثه ايام ردو عليهن موافقات ,, وحددو حفلة خطوبتها بعد عرس خوها مؤيد لان رنده تبي اتكمل السنة في جامعتها عند هلها والسنة الجايه عادي تكملها عند النعموش 😍
وجا يوم اللي كملت جواهر فيه امتحاناتها واول ماخشت لقت نادر موتيلها شنطة سفر و......
وبكرة انكملها كان ماقطعو علينا الضي عاطه كي وزير الكهرباء 😠ومن امبارح امنزلتها راه قصو حتى النت عليا 😭
توقعاتكن مليشيا 😘
قراءة ممتعه 💋
#Hamelo ✒
أنت تقرأ
أحببت بدوية (ليبية_منقولة)
Storie d'amoreاحببت بدوية 💕😆. منقولة للكاتبة هميلو الشارد 💕. 27حلقة💕. قراءة ممتعه 💕.
