أحببت بدوية (ليبية_منقولة)

الحلقة 9

سامحني طولت عليكن ,,بس فضيت روحي ونزلت حلقه ثانيه بالرغم الافكار عندي استكن من الأخير ,,😥 بس حاولت انزللكن حلقه اتنال رضاكن ,, ومالحلقه الثالثه حنزلها بعدين اوكي 😉
ادعلي ربي يفتحها علينا ولكن بالمثل غندوراتي 😘😍
🍄🍄🍄🍄🍄🍄🍄🍄🍄🍄🍄🍄🍄

رواية #أحببت_بدويه
بقلم الهميل الشارد هميلو
الحلقه (9)

وطلع نادر وهو مستغرب استعجال جده وركبو السياره وساقها نادر ومشو لواحد يعرفه نادر صديق لحياة باته وحده نازال ايتواصل معاه واول مانزلو والراجل سلم عليهم وضيفهم في المربوعه وخش ةصا علي قهوة ونادر علي اعصابه مش عارف شن في ,,
المهم ,,
الراجل خش بصفرة القهوة وضيفهم واول ماقمعز ,,حكا الحاج يونس,
يونس : ياعبدالله انا جيتك اليوم نبيك تحكي لنادر حاجه من زمااان واللي نبيك تحكيها كيف مات حياة فارس الله يرحمه وعليش مات وكيف مات ,,وبعدها اتكمل ميف مات ولدي ناصر ووين مات وكيف ,
نادر وهو حاير ومستك من كلام جده : شن في بالضبط وعليش يحكيلي ياجدي ?
الجد : اصبر يانادر وتو تعرف كل شي ,, انا اتصلت من. املارح بعمك عبدالله واتفقت معاه انجوه في الصبح وايقولك الكلان اللي نبيك اسمعه زيييين ,وحنقولك عليش ,
وبدا عبدالله يحكي لنادر وقال : طبعا المراحيم فارس وناصر الله يرحمهم مانو رفاقه وعز الرفاقه ,,مايتفارقوش بكل ,وناصر من حبه لفارس ديما يقعد معاه في نجع هله ويبات عندهم بالايام والليالي لدرجة قبل اخطبولا وحده من بنات النجع وفعلا كلملا فارس علي عرب عندهم بنت باتها راجل طيب وفي حاله راقد ريح وصلاي والراجل هضا اسمه الحاج طه عنده ثلاث اولاد وبنتين وواحد من اولاده مات وهو شاب وسببها مرض جاه عافانا الله وياكم ,والعيال التانيين كبرو واجوزو والبنتين الكبيره هي اللي قبل كلمو عليها لباتك ناصر وطبعا باتك ماكانش معدل عالزواج اكثر ماكان يبي النجع ورفيقه والعيشه السمحه وعيشت الباديه كانت عاجبته ,وبعد علم ان فارس حكاله علي عرب وعندهم بنت شافها مرة من بعيد اتجيب في مية هي وبنات النجع وعجباته وكان اسمها مبروكه بنيه كويسه وطيبه طيابت باتها بالزبط ,,المهم باتك كلم جدك يونس وحياة حنك وحياة عمك الله يرحمه كان يعيش في النجع ومشو غادي وخطبولا البنت اللي وافقت وهلها عطوها ,,
نادر بصدمة : معقوله ,,باتي خطب من بنات النجع ? باهي وبعدها !!
عبدالله : بعدها البنت قبل الزفة بيوم مرضت وتعبت وقالو جاها مرض بين يوم وليله وزمانات مافيش بني كيف توا ولا سيارات واجد ولا عياده قريبه اللي تو بنوها في القريه بيش يسعفها حد ,, المهم ماطلع عليها صبح ثاني يوم نين توفت الله يرحمها وانقلب حال العرس والجو السمح عزا وبكاء ,,
نادر بحزن : لا حول ولا قوة الا بالله العلي العظيم ,,
عبدالله : المهم بعد فض العزا فارس وناصر الله يرحمهم دز عليهم بات المرحومه وبعد جوه عرض الحاج طه بنته الثانيه علي فارس ياخذها ,,مكان اختها اللي قبل بيزفها ,,
نادر كيف كيف كيف 😨
عبدالله : وناصر انصدم واستك وماعجباش كلام الحاج طه وقاله انت كيف تعرض عليا بنتك الثانيه ونا كنت خاطب اختها ,,وبنتك المرحومه مازال تربتها ماجفت ,
فقاله. ان هو راجل كبير وماعندهم الا هالبنت وهي مش معارضه عادي ,,وكل شي نصيب ,, ممكن نصيبك في. بنتي اللي توا قاعده ,المهم ناصر طلع وفارس قال ان الموضوع هضا مايسيرش منه وطلع ,
المهم بعد مده اتجوز باتك من امك ربي يحفظها لكي وبدت حياته تستقر وفارس حتي هو بعده بكم سنة تجوز بنت عمه ذهب اللي هي ام مراتك وطبعا كان يبيها ومن هو صغير وياما دار بيش خذاها المهم بعد فتره طولو ومارزقهمش ربي بذريه فمشو للمدينه وعالجو وطلعت المرحومه ذهب عندها القلب ,,بحكم ديما تتعب ومايشغلوش فيها وبعد اتجوزت تعبت عليه واجد فعشان هكي مشا عاينها ,وطبعا الدكتور منع عليها الحمل وهي كان خاطرها في ذريه ,,وفارس من حبه لرفيقته مادورش وقال عادي مانبيش اعيال مادام مايجونيش من بنت عمي ,واصلا اعيال النجع وبناتهم زي اعيالي وبناتي ,
وفعلا كان حنووون وكريم وفزاع ..وطيب والعويل والبنات الصغار ديما معاه ومتعلقين بيه .. وبعد كم سنة وباتك جد عليه انت وخوك ويوم اللي جدت علي باتك اختك ,,سمع برفيقه جدت عليه بنيه حتي هو وكانت بعد جيت اختك يعني بينهن كم شهر هكي المهم المرحومه ذهب تعبت ومرضت لابيها لا عليها توفت وسيبت بنيتها وراها قزونه وفارس قبل مات في جرتها حزن عليها واكتئب وباتك مافارقاش بكل وكم سنة وهله يضغطو عليه بيش يجوز ماواافق نين اقنعه باتك عشان بنته وايخاويها وتتونس بيهم وماتقعدش بروحها ,,وفعلا اجوز وخذا وحده هكي الناس من هنا وهنا ايقولو انها غامضه شويه وباتها طول وماوافق بعدها وافق وخذاها فارس,
نادر بقرنت حواجب : ومن اللي خذاها نعرفها والاااااااا,,
بعدها نادر استك بالحكايه وفنص وقال : استنى ماتقولش مرت بات مراتي اللي توا قاعده ?
عبدالله هز راسه وقال : بالضبط ,,سالمة مرت بات رفيقتك ,وبعد جابتلا بنتين ومعش ضنت فكر الحاج صافي ايزوج باتك بوحده ثانيه بحكم ان سالمة هذي كانت ادير في مشاكل مع فارس وديما حرجانه ومره من المرات ضربها قبل قتلها وماعرفش حد السبب ,, المهم يانادر باتك وفارس قعدو مره مرات يمشو ايزورو في بعضهم,, وفارس وهل النجع عندهم وطايات وكل حد بنا حويش واطورت الحكايه والناس اقعدت ادير في حيشان واثاث بس جدك الصافي وفارس وهل النجع تعلقو بالنجع وماسيبوش بالعكس زادو ربو اعيالهم عالعيشه في الباديه والتراث الطيب ,ويوم اللي كان فارس مع ناصر في الصيد وطبعا كانو ديما يطلعو يصيدو ويطلعو كم يوم برا ,,وهم في الصحراء جوهم شله شكلهم عصابه والا مجرمين وصار بينهم عركه كبيره وطبعا المراحيم كان معاهم نسيب فارس اللي اسمه جبريل عيل منجوه ومتاع مشاكل واجوز مرتين مره من بنت من بنات النجع وفارقت منه وبعدها مشا لمصر وجاب مصريه وهي اللي قاعده عنده ,,المهم الجماعه اللي جو لباتك ولفارس مسلحين وهم متعاركين كانو حيضربو باتك برصاصه ,,وفارس شاف الراجل ايصوب السلاح علي باتك ,,وباتك غافل ويضرب في الراجل الثاني وفارس حما باتك وفداه بروحه وجت الرصاصه في صدره ,,والجماعه اللي جوهم شكلهم صياده لكن سراقه وشاربين ,,وجبريل هرب وانطمر واول ماهربو المجرمين طلع وجاب خيلهم اللي جو عليها ,, وروحو كلهم وفارس وصل للنجع وفيه النفس وحاولو ايعالجوه بس كان حاسس بروحه بيموت فدز علي بنته اللي من مراته لولا وجابها له باته ووصاهم عليها وقاللهم ايربوها عندهم ,,وتوفا طوول باتك حس بالذنب وياما صار فيه وقعد ايجي للنجع ديما ومره مرات ايجيب فيك معاه وانت كنت صغير ,,,وتكفل بمصاريف مراتك وخواتها نين قرن وعمامهن بطلوهن ,,لكن في يوم كان جاي وعازمينه هل النجع هو وامك وانتم صغيرين ,,وسالمة هذي دزت عالحاج صافي وجاها وطلبت منه طلب ,
نادر : وشنو كان طلبها ?
عبدالله تنهد وقال :طلبت من جدك انه هو يطلب من باتك يجوزها ويستر عليها وعلي بنياتها,لانه السبب في موت سندها وهي قعدت بلا سند وخصوصا بعد موت باتها وخوها الصغير سافر بمراته للمدينه ,وقعدت امها وخوها الكبير متجوز ولاهي علي قولها ,,وطبعا الحاج صافي رفض وهزبها وقبل ضربها ,,لكن الوليه هذي قادره ,بعد ركب ناصر وركبتو انتو وخوتك وامك جاته عالروشن السياره وطلبت منه انها تبيه بكلمة بعيد شويه عالناس ,وطبعا باتك يحاسبها تبي حاجه ضروريه او محتاجه وعلي طول نزل واول ماقالتلا الكلام اللي سمعه هزبها وقاللها : مش نا اللي انخون رفيق عمري وناخذ مكانه مستحيل وبعدين نا متجوز وبعيلتي وحقك عليا انتكفل بيكن نين انموت ,
وركب في سيارته وروح ,وبعد سالاته امك قاللها تبي تموين ودبش للبنات ,المهم حياة ناصر جاني وحكالي بكل شي وانه حس بالذنب ان خلا عيلت رفيقه هكي وحرمهم من باتهم وسندهم وكيف ايدير بحكم نا قاضي,,فقتله لو هو قابلها اتكون زوجته ويتكفل بيهن عادي ,,لكن اذا مجبور فماعليهش ذنب لانك مش ذنبك موت صاحبك لان كل شي بامر الله ومكتوب ,
نادر بصدمه ومسك راسه وقال : وووووواااااااك ,,الوليه هذي شنو? شنو بس ,انحس بيها جريئه بكل ,
عبدالله: الصدمة الكبيره مش هنا ,,في يوم مشا باتك وكان جايب تموين ودبش واستقبلوه اهل النجع وبعد الغدا جت سالمه واعتذرت منه ومدتلا صونيه مثروده عشان ايسامحها وكانت في تبسي واحد زي الطبق الصغير وباتك من طيبت قلبه وافق وخذا المثروده وكلاها واول ماروح في الطريق توجع ومعش تحكم في السياره ودار حادث واول وماسعفوه لقيو فيه نفس والدكتور بعد التحاليل لاحظ حاله تسمم حاد عنده وقبل مايسعفوه وايعالجوه توفا ,,وسبب الموت كان السم مش الحادث ,
وهنا تكلم يونس وقال : المشكله مش هنا المشكله في تسلسل الاحداث مالاحظتش شي ?
نادر : زي شنو ?
يونس : اول حد مات مسموم اخت سالمه وقبل الفرح بيوم وبعدها طلبت تجوز ناصر وبعد رفض وناصر تجوز وفارس تجوز ذهب الله يرحمها اللي عندها القلب وماتت بعد جابتلها سالمه برودو وهضا كان اخر شي تاكله ومن يد سالمه وماتت وبعدها تجوزت واللي عرفته من الحاج صافي انها طلبت تجوز فارس وتربي ذهب زي بنتها وتكسب فيها ثواب بالرغم صار للبنت العكس ,, وبعد مات راجلها رسمت علي باتك من جديد وبعد رفض وفي زيارته الاخيره شافوها عطاته زميته وكلاها اخر شي اللي دار الحادث وبعدها مات من السم ,
نادر بصدمة كبيره وقف وقال : هذي مجرمه مفروض انبلغو عليها وتنحبس هذي قتلت ارواح حسبي الله ونعم الوكيل ,,قتلت حتي اختها لاحول ولا قوة الا بالله ,
يونس ,: مانقدروش عشان خاطر الحاج صافي اللي مايهون عليه ولا علينا وليه ايصير فيها هكي اتبهدل وتنحبس عيب ياولدي ,,لكن نا لازم نكشفها قدامهم لازم.,
نادر وقف وقال : عندي لها دباره هيا ياجدي ورانا سفر ,وشكرا ياعمي عبدالله جميلك هضا انموت وماننساه ,
عبدالله : عيب مش بيناتنا المشكله نحنا في الشرطه اربطو الاحداث وعرفنا بعد التحقيقات مع هل النجع بدون مايضايقوها او يقربو منها ,, وحكالي الضابط بكل شي ونا حكيت لجدك بكل شي ,
وفعلا ودعهم وطلعو واول ماركبو نادر العيون انحمرن والقلب يدلف والنفس عالي وقال : ضروري تحكي للحاج الصافي ,,,مادام وصلت في جواهر فأكيد مش حتريح نين تأذيها ,لان السم اللي كلاته جواهر منها انا متاكد ,
يونس : يستر الله ياولدي يستر الله ,
وطلعو عالفيلا لان نادر حس بخوف علي جواهر وقلبه انغزه علي ميتت باته اللي مات بسبب وليه اللي نهت حياته وحرماته من حنانه وحبه ,

زعما شن بيسير تابعني فرنداااااتي للحلقه الجايه ,😘

قراءة ممتعه ,💋
#Hamelo ✒