أحببت بدوية (ليبية_منقولة)

الحلقة 26

قبل كل شي ,, الضي والنت يقطعو فيه عليا والرواية نكتب فيها ونخاول انزلها عالوقت بس مرات يقطعو الضي عليا يعني اللي اتشوف الحلقه ولقتها متأخر تعرف اني بدون ضي 😢
وحسبي الله ونعم الوكيل في المسؤولين اللي سبب في معاناتنا ☝
ونتمنالكن قراءة ممتعه ورايقه 💋
💚💚💚💚💚💚💚💚💚💚💚💚💚

رواية #أحببت_بدويه

الحلقه (26)

وجا يوم اللي كملت جواهر فيه امتحاناتها واول ماخشت لقت نادر موتيلها شنطة سفر والتفتت جواهر عليه وقالت : عليش اموتي شنطتي ?
نادر بحب ونظرة عشق : عشان بنسافرو ,😍
جواهر : وين بنسافرو ?
نادر : ممم مش انتي تبي تمشي للنجع ? ولا غيرتي رايك ? شن رايك انفوتو النجع ونسافر بيك لكندا واا باريس ?😉
جواهر ضحكت وقمعزت عالسرير وقالت : لا كندا ولا باريس ,, النجع مايجي في مكان غلاه ولاااا مكان ,, انت ماتعرفش كبر غلاه في قلبي ,
وقرب نادر منها وقمعز جنبها وحط يديه علي وجهها وقال : اكثر مني انا ?
جواهر خجلت ونزلت راسها بس نادر رفع راسها وخلا العيون ايتقابلن وقاللها بهمس : عمرك ماتنزلي راسك للارض,, ديما خلي راسك مرفوعه وخليني نشبع من اعيونك ,, وملامح وجك الطفوليه ,😍
جواهر بصوت واطي  : نااااادر ,😶
نادر : اعيونه وقلبه 😍
دفاته جواهر بيديها جا طايح عالسرير وخشت تجري للتواليت وهي ذاااايبه احراج عالاخر ,,وبعد قفلت باب التواليت ضحكت وحطت يدها علي فمها وهمست لروحها : مجنووون ,,😍 بس انموت فيه 😍
وخدت شاور حولت تعب اليوم وتفميرها في امتحانها اللي كملاته ,, وطلعت لقت نادر مغير دبشه من توته بيتيه لملابس نازكه بنطلون جينز اسود وقميص اسود نص كم ضابط عليه من ذرعانه امبينه معضل وطرف العطيب 😍 وماشط شعره مشطة اتهبل مخليه لاورا وباخعطره اللي يدوخ وشكله دوخكن حتى انتن اسمله عليكن وانتن ذايبات 😂
ماعلينا خذيت عليكن وعلي ذوبانكن ,,😁 مشاعييير حناتي مشااااعير 😁
المهم جواهر اقعدت مبلمه وسارحه واتأمل في عمكن نادر وهو سارح في منظرها ببرنوس الحمام وشعرها المبلول قداش طالعه اتهبببل 😍
ومافاقو الا علي صوت خبيط علي باب دارهم ,
نادر : ايوا ايوا ,
وجواهر خذت دبشها اللي بتلبسه وخشت للتواليت وقلبها يدلف ويرقص ,,
ونادر فتح الباب القيها امه,,
زهرة : ها حبيبي ,,مازلتو ماوتيتو ?
نادر : لا خلاص جواهر تلبس بس كانت تاخذ في شاور ,
زهرة : تمام نحن جاهزين ,,وجهزت سندوتشات وعصير طبيعي ناكلوهن في الطريق ,
نادر : عليش تعبتي روحك حنشريلكم جاهز من الطريق ,
زهرة بعناد : لالا السندوتشات من الحوش احسن وانظف تبي تشري اشري حاجات معلبه بس ,
نادر ابتسم وقال : اوكي مافيش مشكله ,
ونزل مع امه بعد شال شنطة دبشه وطبعا معاه دبش جواهر ,, ولقيو الجد ومؤيد جاهزين ورنده انزلت بعدهم اتعانا مع صاكوها خذاه منها نادر ونزله لها وبعدها انزلت جواهر لابسه دبشها وفوقه عبايه سوده مخصرة وفيها تطريز خفيف في نصها من الخصر ونهاية اكمامها ولابسه وشاح بطريقة حلوة وكالعاده مكحله اعيونها بس ودايره اكريم ضد الشمس بس
وحاطه عطر خفيف وعمكن نادر مبتسم والعيون اقلوب والحب باين في وجه وهضا الشي اللي فرح امه زهرة وجده يونس ,,
وركبو في سيارة نادر الصحراويه ,,بصراحة مانعرفش اسمها لكن اللي زي سيارة ليلي علوي 😂 عارفه روحي  فضايح نا في نوع السيارات ,,عادي مشنها مشنها 😁
المهم الجد ركب في الكرسي القدامي جنب السواق وزهرة وجواهر في النص وعدل صاحبنا المرايا علي جوهرته ,,بدون كلام هذي معروفه 😌 ورنده ومؤيد في الكراسي الخلفيات ,, المهم كانت رحلة حلوة وخفيفه والجو ايهبل وتكا نادر علي استراحة في الطريق وخذا شقاشق من اللي انحبهن سوكلاطات علي شيبس علي بشاكيط  للعيله ومشاريب ,, وطول الطريق جواهر فرحانه ومتفائله بعيلتها وحياتها المستقبليه ,,
اامهم وصلو للنجع واستقبلوهم هل النجع بالأحضان والتراحيب وجواهر طووول لحنها وجدها اللي خذوها بالحضن ,,
الصافي : الحمدالله علي سلامتك يايامي ,
جواهر : الله يسلمك ياغالي ,
فوز وهي تبكي وتحضن في جواهر : ينعلاااي يايام باهي اللي ماصارتلك شي بصيرة عاطها مايرزيها عالمنجوهة هي وبوها الله لا تربحهم 😭
جواهر ابتسمت لحنها وباستها علي خدها وقالت : نجك ليا ياحنينتي يالحنونه ,,خلاص معش تبكي اهو نا قدامك ماصارلي شي ,,والله مابتت الا في الحوش والفضل يرجع لنادر ورفيقه ,
فوز وهي تمسح في دموعها بوشاحها واتملس علي شعر جواهر : الله يربحه ويربح ربايحه ولد حلال هو ورفيقه ,, هابا كان صا تلك بصيرة راني رحت فيها يايام ,😢
وباست جواهر علي خدها وطبعا زهرة ورنده في بيت الصبايا ويونس ومؤيد في بيت الضيوف مع الرجاله ,,
ومشت جواهر وفوز شور الصبايا وطبعا مجهزين الغدا لاستقبالهم وكان كسكسي علي لحم وطني علي حلة والمصير وعصبان 😍والشبابات دارن السلطات والموالح ,, والصبايا ايحطن ويمدن بعد سلمن علي جواهر وحمدلها بالسلامه هي وعمتها وصبيتها ,,وطبعا عايشه قعدت في بيت امها متحشمة من عمايل امها ومالقت وجه اتقابل بيه جواهر لكن جواهر مشتلها ,,
جواهر : كنك ياخيتي حابسه روحك بروحك ,, هيا معايا في حوش جدي ,
عايشه وهي منزله راسها : مش لاقيتلك وجه ياخيتي ,,والله متحشمة من عمايل امي الله يهديها وخيتي نعيمة الله يرحمها,, بالذات بعد مانحبست امي صبايا النجع ايغومزن عليا حتي لو مش قدامي  بس عارفتهن وعارفه كلامهن ,,وعندهن حق ,😔
جواهر رفعت راس عايشه من حنكها بايديها وقالتلها وهي اتشوفلها : مش بنت فارس اتنزل راسها وتنطمر من الناس ,,انتي صحيح بنت سالمة لكن باتك فارس الصافي وقلبك ونيتك زيه بتلزبط وعمر ماكنتي كيف امك ربي يهديها ,ارفعي راسك يابنت بوي وهيا معايا ,,واللي تحكي معاك قوليلها ماعمر جتين اختار من تكون امه ,, بس في النهايه امك ولازم اتكوني بنت باره بيها ياعايشه انا ربيتك عالتسامح والغفران ,,والمحبه ,,واكيد حتكوني قد ثقتي فيكي ولا لا ?
هزت عايشه راسها باها ومسحت دموعها وطلعتلها جواهر فستان ايهبل احمر ساده ومنقط بالاسود ولبست عليه رشاح احمر وطلعت معاها بعد راضتها وشجعتها وفعلا خشن عالصبايا واستقبلتها رنده بالاحضان : خزووو ونا اللي قلت حتقابليني بالأحضان ,,فيها حق هذي ياعويشه 😉
عايشه بابتسامه بسيطه : سامحني ,,
زهرة : ماشاءلله اعويشه باقيه قمر ,,سكلك درتي رجين وصرتي اتهبببلي تعالي حبيبتي تعالي في حضني ,😊
وفعلا مشت سلمت عليها وحضنتها زهرة بطيبه ,,نا قول خاطري هضا سلام من عمورة ولا لا 😂
المهم ,,
حطو الغدا وتغدو وكان الكل مجتمعين وفرحانين وجوهم ايهبل ,,
وعدا النهار وجواهر ماتريحت كل مرة في بيت حد من عمامها اتسلم وجايبه عرم العاب للعويله ونادر ايراقب فيها من بعيد خايف عليها ورن فون الصافي
الصافي : الووو ,,ايوا نا الصافي من معاي ,,من ? معقوله !! لا حول ولا قوة الا بالله العلي العظيم ,, تسلم يافندي صحيت بارك الله فيك ,,باذن الله حنجيكم بكره ,,في امان الله ,
وسكر وهو حزين ,,
يونس : من ياحاج انشاءلله خير ?
الصافي.:. هضا..............

ادعن مايقصوش الضي ونزللكن الحلقة الثانيه بعد الواحد ,,😊
وعطني توقعاتكن احلى مليشيا والله 😘

#Hamelo ✒