أحببت بدوية (ليبية_منقولة)

الحلقة 6

نعموشاتي ياريت تقدرن ظروفي لاني أم وربت بيت ومانفضش واجد😒 ,,, فإذا تأخرت في التنزيل ماتزعلنش 😔 المهم يوميا تلقن حلقه 😐 والحلقه الإضافيه هذي اللي زرقتلي بيها مش ديما راه 😡
#عالفضووووووة تم ? وسامحني عالاطاله يامافيا ☺ نبدو في الروايه 👇
🌴🌴🌴🌴🌴🌴🌴🌴🌴🌴🌴🌴🌴

رواية #أحببت_بدويه
الحلقه (6)
وصلنا لعند ,,في الليل بعد العشاء والبنات الشبابات قعدن ايدربكن وايغنن وجواهر اتفرج عليهن وسارحه بس في نفس الوقت خايفه وحاسة باحساس خلاها مخنوقه وجتها عايشه وقالتلها : جواهر كنك ?
جواهر : ماكني شي متضايقه بس ,
وتقمعز يالاها رنده اللي مسكت يد جواهر وقالت : ماتخافيش ,,ماما قالتلي ان كل عروس ايجيها خناق عرايس ,,واكيده هضا اللب اتحسي بيه ,
عايشه بضحكه : هابا خناق العرايس هضا ايجي للوحده ماعاد لا تاكل ولاتشرب وينكد عليها 😂
رنده : ههههه ممكن من الخوف او التوتر ,,اكيد كل بنت تحزن لما يحي يوم وتبعد عن هلها وناسها وتبدا حياة جديده ,, بس حتكسب عيلة ثانيه ,,وصدقيني ياجواهر مش شكيره في عيلتنا حتعيشي معانا وتعاشرينا مش حنحسسوك انك غريبه بككككل ,, ونادر طيب وحنون مغير مايبينش بس ,
جواهر شافت لرنده وقالت : انشاءلله خير ,, والله بدون مانجاملك ,, اول ماهدرزت معاك ومع امك تريحتلكن والحق امك تنحب وليه ريحها باينه وشكلها طيبه ,وخالتك ماتخير عليها ربي يحفظهن ,,
عايشه : حتى نا حبيتها امك وخالتك وتبي الحق جواهر طيبه راهو وكريمة ومش قابيتها اختي والله اتهببل ولولا النصيب راهي معانا ومتجوزه شي واحد من ضنا عمامنا ,, لكن النصيب الله غالب,
رنده : الحمدالله من حظنا الحلو تقعد مرت خويا نا ,, وبعدين انشاءلله حنكونو خوات مش مرت خو وحماتها ولا ?
جواهر هزت راسها بتأكيد وبفرحه قالت : أكيد باذن الله ,
وفعلا سمرن الصبايا وهن يلعبن كسك وزغاريت وغناء وحجيل وحنن جواهر وعالسحور دارن مثروده وحليب ولبن وزميتا وخبزه تنور مع جبنه وزيتون وهريسه حوش ,,, ورنده وكلت جواهر لانها منحيه طبعا ,,ونشا جوهن سمح ضحك وتهدريز وتعليقات علي جواهر وعايشه طايحة في المثروده بكبدها وشاطره وحره اتمد واتشيل واتجيب وبصاره واتضحك في الصبايا ومنى تضمك علي كلام عايشه وعجبتها صراحتها وطيبتها ,,
طبعا,,(مش كان في بر معاناها مابعرفوش الحاجات هذين ,, بس في ناس بدو ايحبو الاكل الشعبي واجد😒 ,)
ورقدو وفي الصبح ناضو الكل بدري وجهزن الصبايا الفطور وبنت دخاخين التنانير طابقات والديوك ايأذنن والجو فيه تسقيعه اتهببل والشاهي والقهوة عالنار وطبعا حليب الصبح سوا باكو والا حكاكي وتمر ورطب والدحي المطبوخ عالنار وطيبن سحلب وجو ايهبل وبعد وتن السفر الشباب خذو سفر الفطور للرجاله والصبايا شالن للصبايا والكل فرحان والأجواء تهببل ,
وبعد فطرو بدن في تطيب الغداء مااصلا سريب مبعبط في جرت بعضه 😒 وحطب وخبر يدره الكبد بس الناس الطيبه واهل البدو هم اصل وسعت البال والطعام السمح ,,
المهم جواهر ناضت حتحتت حنتها وجتها حنها فوز : صباح الخير يايام ,😊
جواهر : صباح الورد ياحني ,☺
فوز : ماشاءالله حنتك سمحه ,,هاكي جبتلك زيت وسكر ادهني حنتك والبسي شخاشيرك ياحنه ,
جواهر خذت الصونية الصغيره فيها زيت زيتون وسكر وبدت تدهن في يديها ورجليها والبست القفازات اليدين والشخاشير ,واتكت في فراشها وهي سارحه وتفكر ومافطنتش الا لحنها اتغطي فيها بباطنيتها ,
جواهر : شكرا ياحني تعبتك سامحيني ,😔
فوز : اتعبك راحة يايام ,,ررقدي مازال بدري خوذيلك غفوة حتي ساعه امبارح رقدتي وخري واعيونك تاعبات من السمور ,😊
جواهر : حاضر حنينتي ,,
وفعلا غفت جواهر ,, ونادر ناض مع الرجاله وغسلو وتوضو وصلو وفطرو وهو متوتر وايشوف للرجاله ويبي يطلع بس متحشم ايقول بنطلع يعرفوه يبي ايشوفها وفعلا الشوق بيطيره تطيير ,, مغير ايكابر ,
مؤيد وقف بيطلع سأله نادر : وين ماشي ?
مؤيد : بنطلع مع الشباب ,,تبي حاجه ?
نادر وقف وقرب من خوه: باهي خوذني معاك ,
مؤيد باستغراب : باه هيا ,, شكله خناق العرسان طلع جديد حتى هو 😉
نادر 😒
وطلعو وهو ايشوف للنجع والناس اللي كل واحد يخدم علي حاله واحد ايهزب في ولده متعارك مع ولد ثاني ووحده مروحه ومعاها بنيتها وجايبات حطب ووحده معاها راجلها جايبين اميه وهضا يلعب وهضا ايبصر والعزايز عالرحا والصبايا عالتنانير ايطلعن في خبزه وجو مانحكيلكن عليه ,,😍
المهم فات وقت وماشافش جواهر غمتلا وروح للبيت الرجاله وخش بيتريح من المشي .. وجواهر كانت نايضه وغسلت حنتها وجت بتساعد الصبايا ماخلنها وطبعا رنده كانت شاطره في المكاج وبعد الغدا كانو رجالة النجع نصبو بيت للعرسان مؤقت وفرشوه وطرحوه ونادر بدو ايلبسو فيه طبعا عوايد عربنا زمان مافيش ايجو العرسان بعد المغرب لاااااااا 😁 زفتهم في العشيه ,, المهم جواهر لبسنها لبستها بدلة عربية اتهبل ومشطلها شعرها وخلانه لها نطلوق طويل وناعم لخصرها ورنزه جتها مكجتها بلمسات لسيذه طلعت اتهببببلوطبعا الشي هضا في بيت جدها وصفقة الصبايا وغنن وبعدها جاهم واحد من الرجاله جايب جمل وعليه الكرمود واللي مش عارفه الكرمود تبحث عليه عالقوقل ياحناتي 😑 وطلعن الصبابا جواهر بعد غطنها بالجرد الابيض وركبوها عمامها عالكرمود وزفوها بالاغاني الليبيه الجميله والزغاريد وجدها وحنها فرحانين ,, والكل مبسوط الا ثلاث وخدات شكلكن مافقدتنهن ,,😂 قاعدات وحتعرفن شن دارن ,, والرجاله يطلقو في الرصاص في الهوا ووصلو لبيت العرسان اللي كان شبه بعيد عن البيوت ,, ونزلو العروس وخششنها الصبايا للبيت وقمعزنها وخلنها مغطيه وطلعن وفي الوقت هضا جو الرجاله بزفتهم المعروفه ونادر لابس اللبسه العربيه اللي اتهبل عليه وعليه الجرد وقبابا النجع ايتغومزن وايتهومزن وحده اتقول : عليك راحل اتقول نصراني طول بعرض ,, ولخرا اتقول : محظوظه لنت دهب راحل سمح وفلوس ,,ووحده تدعيلها بالهنا ووحده حاقده ووحده فرحانه لها ووحده واجعتها حواهر اللب حتبعد عنهن المهم كل وحده وتيتها وتيتهن مردوده عليهن باذن الله ,,سوا خير والا شر بيردلها ,,
المهم كشك رابخ وخششو نادر عالعروس وكملو صفيقهم وتفريغ من جد جدهم وبعد وقت تباوع نادر وحاه واحد من الرجاله ,,همسله نادر بكلمة ,, وقعد الراجل يفرغ بالسلاح ودارو ميفه الرجاله اللي معاهم سلاح ,,
مؤيد لابس عربي ومعاه عمر همسله : تحلف عليهم كتيبه خاشة محور 😂 عليش هالرصاص كله 😁
عمر وهو مركز علي بنيه عجباته وايشوفلها من اول ماشافها وقال : مش جدك هكي يبي عادات وقاليد العرب اللولا ,, خلاص هذين العادات 😊
مؤيد : شن في بالزبط من اول ماجينا وانت تشوف للصبايا وسارح ,,قبل مش متاع وجيج انت كيف صار ياولد خالتي 😉
عمر توتر ونزل اعيونه وقال : لا مش هكي بس والله جو سمح واجواء ايهبلن وبنستغل مل لحظه بنصورها بس ,,
(طبعا عمر جايب كاميرا فيديو وصور الزفة والرجاله والعرس الا الشبابات والصبايا الصغار ,,عيب عاد 😒 بعدين بيذبحوه هل النجع مكان القعود ,, 😂)
المهم روحو الكل وخطو العشا وعشو العرب وجت عايشه مع بنات شبابات جايبات عشا العرسان ,,
ستوووووب 😂✋ انسيت ماحكيتش عالعرسان ,, طبعا اول ماخش نادر للبيت جواهر كانت ترررجف وخااايفه وقلبها بيطلع يرقص قدامها من الخوف 😂 المهم خش القيها مغطيه بالجرد تنحنح وقال : السلام عليكم ,
جواهر بصوت واطي : وعليكم السلام ,
نادر قرب منها ورفع الجرد وبانت عليه بزينتها ولبستها وقعد ايشوفلها وسارح في ملامحها وهي اعيونها في يديها اللي علي اركبها ورفعت اعيونها بشويييش نين تلاقن العيون مع بعضهن نادر ذاااب وساااح وانصهر الراجل مكبد مغير ايكابر 😂
وسرح بلون اعيونها اللي الكحل زاد سماحتهن والمايكب البسيط ,,طلعها ملااك ,
جواهر بصوت عالي اشوي : كنك?
نادر استغرب وقمعز ايشوفلها وقال : انتي راضيه عالزواج ?
جواهر نزلت اعيونها وقالت : مش عارفه اللي نعرفه ان كل بنت نهايتها زواج ,وبعدين انت فزت التحدي ولا نسيت ,
نادر بابتسامه : لا مانسيتش ,, لكن نبي انوضحلك اني نش نستعحل علي شي حاليا نعيشو كاننا نتعرفو علي بعضنا قبل ,, ونشوف روحي انتقبلك ولا لا ? 😏
اووووو والعب يلا 💃 بدا التحدي الثاني ,,
جواهر انقهرت من غروره وقالت : تعرف انك مغرور والغرور يقتل صاحبه راه ,😒
نادر برفعت حاجب : عارف اني مغرور لأني عارف روحي شنو ,, وعشان هكي بنعطيك فرصه انشوف روحي انتقبلك والا لا ? 😏
جواهر : والله اذا انت بتعطي روحك فرصه وبتشوووف اذا بتقبلني ,,فأنا انحب انوضخلك اني مش متقبلتك بككل ,, ولولا خسارتي في التخدي ماوافقتش عليك ,,وياما خطبوني من خطاب فرسان قبلك ورفضتهم ,
نادر حس بالاهانه من كلامه ووقف ونزل وجه قريب من وجهها وقال : ومافيش راحل زفك وقدر يمسر خشمك الا نا ,,عارفه ليش لاني نادر ولد ناصر مش اي حد ,
جواهر : حاجة والله كبيره ,, ولا تهمني ,,انت اللي شرطت اني انكون جايزتك مش نا اللي جريت وراك ,
نادر : عشان نكسر كلمتك ونفوز بالتحدي بس شكله عندي مهمه ثانيه وهي انقصلك السانمثك هضا اللي يبي قص 😡
جواهر لفت وجهها بعيد منه وهو تنرفز في اللحظه عذي جن البنات بقصعة العشا وطلع نادر اللي انحرح بعد شافهن وخذاها منهن وهن يضحكن ويوشوشن وراااحن وهو تنهد وخش وفي سره ) عليش يضحكن توا ,, علي اساس عريس بجديات)
وحط العشا ,,
نادر : هيا تعالي بيش اتعشي ,
جواهر بعناد : مانبيش ,
نادر تنهد : يابنت الناس بااش اعناد هنا بر يعني لا ثلاجه بيش كان جعتي بعدين اطلعي حاجه وتامليها فتعوذي من الشيطان وهيا كولي لأني لعند توا صابر عليم ومازال ماوريتك الوجه اللاخر ,,
حواهر بينها وبين نفسها افت ووقفت وحولت الجرد والذهب وفكت الردا خطاته علي جتب اقعدت بالسوريه والسروال بس متظرها ايهبل وايضحك 😂ونادر ايشوفلها وخلاص وتعشو وبعد الغشاء فرشت حواهر فرلشات وخطت فراش نادر وحده وهو غمتلا وهش فراشه بعد قعد بالسروال والكانتيرا اللبسه المفضله عند اغلب الليبيين طبعا 😂
وهي خشت في فرلشها وتغطا ماعاد وجهها خلاته وعطاته بظهرها وكانت جنبه بس بعيييد منه ,,
عند الثلاثي اللي بدري تلثمن وجن في الخلا بعد رقدو اللي في النجع وشايلات اشوال واول ماقربن بيت العرسان رجعه ارفعت البيت اشوي وسالمة تفتح الشوال وتحط فمه عتد بيت العرسان واطلقت ال ...... خشت عالعرسان ,,نجية شايرتلهن ببسرعه وصبن مشن وهن ايتخنسن ويتسللن ومل وخده هشت بيتها ولا كانهن دايرات حاجه,
وجواهر اول مالفت وهي تلقا 🐍 جنبها وتشوفلها وقريبه منها مش بعيده وحواهر انصدمت وقعدت ااشوف للفعه وخلاص ونادر قمعز وشاف لحواهر القيها راقده بنفس وضعها تنهد بقوة سماعته جواهر بس ماقدرتش اتخرك واتلف عليه وحطت يدها ورا ظهرها وقعدت اتحرم فيها تبي نادر يفطنلها و
....................
زعما شن بيسير فيها جواهر ونادر يفطنلها والا يرقد 😒
انتظرني بكره ,,

قراءة ممتعه ,,💋
#Hamelo ✒