أحببت بدوية (ليبية_منقولة)

الحلقة 11

نعموشاتي ,, ارجوكن صلاتكن واضبن عليها وماتخلنش قراية الروايات يلهيكن عنها ,, وربي يحفظكن جميعا ,,😘
🌳🌳🌳🌳🌳🌳🌳🌳🌳🌳🌳🌳🌳

رواية #أحببت_بدويه
الحلقه (11)

نادر : خلاص وصيت جدك ايجيبلك الملف متاعك من مدرستك القديمه ,وبنبدا انسجلك انتيساب بحكم فاتنك سنين ,
جواهر : اها ,, باه
نادر قرب منها وهمسلها : شن رايك انوريك المنهج توا تاخذي عليه فكره ,بس مش هنا فوق وحدنا ?😉
جواهر مافهمتش عليه وقالت : كيف هو المنهج عندك ?😕
نادر ضحك علي عفويتها وبرائتها تين وجه انحمر وقال : لا هو مش عندي بس عارفه وحافظه كله ,,😂
جواهر : ماشاءلله ,,تمام حنبدا في المنهج من توا عادي ,😊
ونادر معش سكت من الضحك 😂 وفي اللحطه هذي سمعو جرس الفيلا رن ,, وطلعت الخدامة فتحت الباب ورنده تهدرز مع نادر وجواهر اتشوفلهم والبسمة بدون وعي منها مرتسمة علي وجهها ,, وطبعا وهم يهدرز سمعو صوت خله رنده ونادر وقفو ضحك والتفتو علي صاحبت الصوت ونادر بانت ملامحه العصبيه والجاده ووقف وهو راسم وجه الغرور الشي اللي خلا جواهر تستغرب في تغيره ,, وشافت لوين ايشوفو لقتهم ايشوفو لوحده جمييله رقيقه بس طويله ومش محجبه وشعرها صابغته بالأصفر ودايرتلا خصلات ميش ثلجي وحاطه عرم مكاج بطريقه منسقه بينها اجمل ,,ولابسه سروال جبنز ابيض ظابط وعليه بلوزه لنص الفخذه بيصا بالبيج وكمامه للمرفق وماسكه فونها وشنطتها علي كتفها وباين عليها بنت راااقيه انيقه ,,
وقربت البنت بابتسامه علي وجهها وقالت : كنكم ماتردوش السلام ?.معقوله منصدمين لهدرجه ?
نادر ايشوفلها بغضب لدرجة ضغط علي اسنونه علي بعضهن ورنده لاحظت عصبيته فقالت : اهلين ,, شن خطرها جيتك عندنا ? انشاءلله خير ,
البنت : وااو رنده كبرت وقعدلها لسان ,كيف شن خطرها جيتي ? مش هضا حوشي حتى نا ومن حقي انجيه ولا كيف ?
والتفتت علي نادر وقالت : ماوحشتكش ?
نادر بصوت واضح انه ماسك روحه بالغصب : شن تبي جايه يارتاج ?شن مازال تبي ?
رتاج : نبي انرد لحياتي ,,نبي حوشي وعيلتي ,, نبي زوجي ,
رنده بعصبيه : مالا امتا ماتحبي او يصحلك اتجيه حوشك وزوجك ?
جواهر مش فاهمه شي ومتلخبطه ومايله من ورا نادر بتشوف البنت الجريئه اللي تحكي مع راجلها وعجبتها جواهر بلبسها وحلاوتها بس نقدت قعدتها بدون حجاب قدام نادر ,
وفي اللحظه هذي جت زهرة من المطبخ وشافت رتاج وبصدمه قالت : رتااااج !!😨 امتا جيتي ?
رتاج اتجهت لزهرة ومشت ناحيتها ودارت روحها اتسلم بالخد وقالت : اهلين اعميمتي ,, كيف حالك ? نا جيت ونا غلطانه ونبي انصلح اللي فات ,, و..
ويقاطعها نادر : كيف تجرأي واتجي بروحك هنا ?😠
رتاج بصوت دلع يذوب الصخر قالت : ناجيتش بروحي ,, جابني بابي ,,وقاعد مع جدك برا والرجاله ,, مازلت اتغار عليا بيبي 😍
وجواهر هنا استكت وانصدمت ووقفت وقالت لرنده : انا مش فاهمه حاجه ,,ممكن تقوليلي من هذي ? قريبتكم ولا كيف ?
رنده ارتبكت وارمشت بعيونها بعيد عنها وشافت لنادر اللي التفت علي جواهر وقال : ماتحطيش في بالك ,,هذي انسانه مش مهمه ,, وحنفهمك كل حاجه فوق ,, هيا ,
ومسك يد جواهر وجواهر شدت في يده ورتاج لاخظت جوار وحست بناااار رمبت فيها وقربت وشافت لجواهر من تحت لفوق نظام استكراد وقالت : من هذي يانادر ? ممكن اتعرفنا ?
نادر بعصبيه بس وطا صوته وقال : انتي اخر وحده تدخل في حياتي ياهانم ,,, ةمالكش دعوة بيا ,,بس عندك حق انحب انعرفك ,, المدام جواهر. زوجتي وعروسي ,,
رتاج لعصبيه : كييييف ? انت تجوزت ? وامتا وليييش?
زهرة بصوت هادي : رتاج ارجوك بلاش مشاكل ,, وبعدين انتي اللي سيبتي نادر واخترتي حياتك وباما حاولنا انرجعوك ليه وانتي صممتي اتعيشي حياتك ,, فمش من حقك اتجي في الاخير وتحاسبيه او تدخلي في حياته ,, هو توا راجل متجوز وياريت تفهمي الشي هضا كوييس ,😐
رتاج بتمثيل : كيف نادر تجوز غيري ? ومن امتا ? لا يمكن نادر ايحبني انا ونا انحبه وكان بينا طفل في يوم من الايام 😢
جواهر انصدمت وحاولت اتفك يدها من نادر وهي فاتحه فمها ومستكه من اللي تسمع فيه لكن نادر مسك يدها بقوة وقال : شي مايهمكش ولا يخصك ,, وعلي فكره نحن طلعنا فرحنا بس بكره حفلة زواجنا اللي بنعلن فيها زواجي من حبيبتي جواهر ,
رتاج بضحة استهزاء : جواهر ? هضا اسم قديم يععع مانحسابش ذوقك نزل للدرجه هذي يابيبي ,😏
نادر برفعت حاجب : بالعكس ذوقي نزل يوم ماعرفتك ,, وارتقيت يوم ماتجوزت جواهر ,,وحتى الاسامي بمعانيها اتسد ,, لانها اتدل علي صاحبها وفعلا زوجتي هي جوهرتي ,, وتوا اسمحيلي بنتريحو نا وزوجتي ورانا حفلة عرس وهلها علي وصول ,
والتفت علي جواهر اللي من الصدمة قعدت تسمع وهي سااكته والدموع علي سبلة وقاللها : حبيبي هيا نبيك في موضوع ,
جواهر شافتلا بعيون مليانات دموع ومشت معاه وهي انطبسه رايها وهو ايجر فيها من يدها وتعمد يحضنها ويحط ذراعه علي كتفها وضمها لصدره وهي ماقاومتش قدام هله بس اول ماخشو لجناحهم بعدت منه وشافتلا بقرنت حواجب وقالت : شن اللي صا. قدامي تحت ? ممكن نفهم !
نادر قمعز عالسرير وقاللها : حنفهمك كل شي بس توعديني اتخليني انكمل كلامي ,
جواهر سكتت وقمعزت عالنكبه اللي في الغرفه ,
انخلوهم وانجو لرتاج اللي بتنفجر من الغيره والقهر وقالت لزهرة : كيف تسمحي لولدك يتجوز غيري ? وكيف مانعلمش بشي ,?😬
رنده ربعت ايديها علي صدرها وقالت : وانتي شن دخلك ? مش سيبتيه وبدلتيه باللي مايسوا عفسة رجليه ?! جايه توا عليييش ,,وبعدين وين زوجك اللي تزوجك مش انت متجوزه والا سيبك والا انتي سيبتيه ? 😒
زهرة رفعت يدها لبنتها باشاره اسكتي وقالت لرتاج :رتاج من الاخير شن في عقلك ? جيتك اليوم مش ببلاش شن في عقلك ?
رتاج بصحة وجه قالت : نبي انرد لنادر روجي وانحبه وانا متأكده ان هو ايحبني واكثر مني اخرا ,, حتي ولو جوزتوه اربعه هو يعشقني وايموت فيا ومستحيل ينساني بالسهوله هذي ,وحنرجعه سوا برضاكم او غصب ,😏
ونشت جيهة الباب ايقابلها الحاج يونس وهو قارن الحواجب واول ماشافاته قالت : معقوله ياجدو اتجوزو نادر بوحده ثانيه ? وانتم عارفين بقصة حبنا وزواجنا ?
يونس : يابنتي نادر حر ومن حقه يجوز بعد مراته تطلب الطلاق عشان تجوز غيره ,, فأعتقد انك ماليكش حق اطالبه بحاجه مش لكي ,, واربحي هيا باتك يرجا فيك ,😒
ومانحكيلكن علي رتاج شن صار فيها من تهزيب محترم وطلعت وهي اتخبط في رجليها اللي لابسه الكعب بقوة عالسراميك الفيلا قبل شقته لهم 😒
المهم طلعت البلوة هذي ورنده قالت : ابرد منها الوليه هذي عيني ماشافتش ,, معقوله جايه بصحة وجه واتقول بنرد زوجي ?! اما زوج بس المكلوبه المطرشقه ناسيه انها حرمت عليه خزييي ,, قريب خنقتها قسمابالله 😡
زهرة تنهدت وقالت : من يومها مش لنادر مغير نادر الله يسامحه عاند عشانها وقاللي انحبها وحنغيرها والمشكله زادت في طبعها الشين واهو نتيجة اختيار سيباته غشان واخد ثاني خسبي الله ونعم الوكيل فيها ,بصراحة خفت علي جواهر البنت حسيتها انصدمت واستكت ,😞
وشافت ليونس وقالت : مفروض حكينالها انه كان متجوز من قبل ياعمي ,,كان هضا مانصدمتش ,,😔
يونس : انا حاكي لجدها وعمامها وجدها هو اللي قالي ان نحن مانقولولهاش وحيقوللها نادر بعد الزواج واميد حتتفهم لانها عاقله ,,
رنده : بس مهما كان كنتو حكيتولها ,,احسن ماتعلم بالطريقه هذي ,,ومن وحده حقيره زي اللي توا كانت هنا ,, اخخخخ حتي نادر الله ايسامحه ,,لولاه ماعرفنا الاشكال هذين ,😠
وطلعت لغرفتها وهي معصبه ,,وفي اللحظه هذي عند نادر وجواهر ,,
نادر : هذي كانت زوجتي السابقه ,
جواهر بصدمة : زوووجتك ?? انت كنت متجوز ? و.ووليش ماقلتولي ,
نادر : بصراحة ماحصلتش فرصه انقولك ,, وبعدين نحن تجوزنا بتحدي ولا نسيتي ? يعني الموضوع جا بسرعه ,
جواهر رفعت راسها وقالت : عندك حق ,,نحن زواجنا من الاول غلط والمفروض نصححو الغلط ومل حد يمشي في حاله حتى.تقدر اتراضي الغندورة ,😒
نادر رفع حواجبه وقال : شن قصدك ? وبعدين من قالك اصلا اني نبيها ,, هذي وحده بالنسبة ليا كان زواجي منها غلطه ودفعت ثمنها ,, ومانحبش حد يقولي شن اندير ,😒
جواهر بعصبيه : طيب بعد انك ماتبيهاش كيف تجراء واتجي لعند حوشكم وتقولك بيبي وتدلع اخرا ,, ولا عندها ثقه انك مازلت تبيها وادير في حركات يفصعن ,,😒
نادر ابتسم علي حركاتها وكلامها وعرفها غايره عليه قرب منها ووقف قدامها وقال : باهي بشويش علي روحك راك تنفجري ,,مانحسابكش اتغاري عليا واتحبيني 😍
جواهر تنحنحت وارمشت بعيونها وقالت : احمم لا. انا ..انا معارش ..وبعدين انغار من من ? انا واثقه من نفسي وعارفه روحي شنو 😒
نادر : باهي ياواثق انت 😍 بس تعرفي انقولك الصدق !
شافتلا جواهر ورد قاللها : انا صاح تجوزت رتاج عن حب ونحساب روحي انحبها وانحبني وطلعت غلطه كبيره ,, بس من اول ماشفتك حيرتيني مع اني كنت رافض فكرة زواج وارتباط ,عارفه ليش ?
حواهر بصوت هادي: ليش 😒
ابتسم نادر علي زعلها الطفولي وقال : لاني حبيتك بدون مقدمات انعاند في روحي وانقول خذيتك تحدي بي القيت روحي انتغزل بيك قدام حتى اختي اللي ماعنرها شافتني تضحك بالصوت العالي ,, البرستيج راح فيها معاك انتي ,,
جواهر بزعل : نش عارفه يانادر خايفه انصدقك ,, نطلع مغشوشه فيك ,
نادر بحب : عيب. ياعيون نادر والله والله مستحيل انخونك او نشوف لغيرك حتي مع عشرة زي رتاج ,,مش لانها سيبتني عشان راجل وبانت علي حقيقتها لا ,, لانها رخيصه ونا ديما غالي واللي في قلبي لازم ايكون غالي ونا يوم اللي زفيتك عالكرمود نا حاطك في روحي وقلبي وعيوني قبل ماتكوني باسمي ,, انحبم جوهرتي والله ,😍
جواهر بحب : حتي نا ,
نادر بخبث : حتئ انتي شنو ?
جواهر الوجه قوس قزح ونزلت اعيونها وقالت : نحبك ,
نادر حضنها وباس جبينها وهمسلها : ربب مايحرمني منك ,, ونرجا في يوم بكرا بيش اتكوني زوجتي رسمي مش غير علي ورق ,,نعش نقدر خلاص قدامي ومتحمل واجد عالشركة راه 😉
جواهر نغزاته في صدره وقالت : ناااااااادر ,,
نادر بضحة : اعيونه وروحه انتي ,
وفعلا راضاها وفهمها وجواهر ماحبتش اتنكد علي روحها وعلي عربها وراحبها وتقبلت انه كان عنده ماضي المهم حاضره ومستقبله معاها ولها ,
المهم نزلت غيرت جو عربها واصرت اطيب العشا هي وخشت رنده اتساعد فيها وسهرو بضحك وهدرزو بجو حلو ,, وثاني يوم بدو ايجهزو لحفلتهم وفي الصبح وصلو هل جواهر وكانو جدها وجدتها وخواتها ومرت باتها وصبايا عمامها الثلاثه وعمامها وضنا عمها وبنات عمها واستقبلوهم طبعا نادر بعد ماحكا مع عبدالله الحلقه اللولا قبل بيسافرلهم لكن زهرة وجده ذكروه بالحفله وخططو لخطه بيكشفر بيها سالمة قدام الكل بس شنو مازالو ماواثقين فيها ,
وفرحت جواهر وبدت فيهم احضان جدها وحنها وخواتها وبنات عمها وعمامها,, ولان الفيلا كبيره وحديقتها كبيره فصممو ديكور صاله في الحديقه والانوار الملونه والاجواء اللي تهبل والمسرح اللي فيه كرسي العرسان ايهببببل ,, وطبعا زهرة ويونس عزمو ناسهم وعربهم اللي في المدينه وجواهر جتها مزينه في الفيلا وجابلها نادر فستان فرح ايهبل مستور واكمامها مخرمات ومبوج وقررت جواهر تلبسه بطرحه بيضا وحجاب ابيض ملائكي واول ماكملت المزينة الصبايا فتحن فوامهن علي جمالها ,,
وسالمة وبنتها نعيمة بيموتن من الغيرة والحقد والحسد خصوصا بعد شافن الفيلا اللي قصر والاثاث وجناح جواهر وتزلو بالعروس من عالدرةج ونادر كان يرجا فيها تحت الدروج ببدلته السودا وقنيصه الابيض وقرواطنه الحمرا الغامقه وطالع فيها جنتل ايهبل بشخصيته ولحيته واشنابه طرفوووووش 😍 الحقن وحده من المتابعات اغمي عليها فوقنها بميه ولا عطر 😂
المهم اول ماوصلت فيه جواهر مد يده وهي مدت يدها ومسكت في يده وعطاها باقة ورد طبيعيه حمرا بالابيض من الجوري والزنبق ,, والصبايا يزغرتن وطلع بيها للمسرح علي اسما الله الحسني مشغلينهت بالدي جي ,, وهم طالعين اتجيهم .................

بكره تعرفن من جتهم 😂وتربحن تفاعلن فكني من التم والمم والغم راهن ايمرضن فيا😠 ,, واللي تقرا وماتتفاعلش مش مسامحه تقري وماتفاعلي 😒
ووقعاتكن عاد 😊

قراءة ممتعه 💋
#Hamelo ✒