أحببت بدوية (ليبية_منقولة)

الحلقة 4

اللي ماصلتش فرضها تصليه قبل وتلحق عالروايه ,, وربي يسعدكن ويحميكن نعموشاتي 😘
💋💋💋💋💋💋💋💋💋💋💋💋💋💋
رواية #أحببت_بدويه
الحلقه(4)

وجهزو الشباب اللي بيتسابقو مع نادر اللي خذا حصان ولبس اسود في اسود ,, وحددلهم الحاج الصافي من وين يبدو ولوين يكملو والنجع كله بيتفرج عليهم ومؤيد متخزرط وهمس لجده وقال: والله مايتعاندو الناس هاضوم ,, جراايين ,,فمابالك احصنتهم يستر الله ,,نادر في موقف لا يحسد عليه 😰
يونس بضحكه : ماتهزاش علي خوك ياللهبل وتفرج ☺
وبدت الاشاره بيش يجارو وفعلا انطلقو بكل فخر وعزيمه وسط فرحه الاهل وفخرهم باولادهم وتصفيق العيال والبنات الصغار اللي فرحانين بالأجواء ,,
طبعا في فارس من ضنا عم جواهر مكبد في جواهر ويبيها والشاب هضا اسمه حسين ولد عم جواهر اللي خطبها وهي رفضاته وبالرغم من انه متجوز وعنده ولد ,,لكن مازال راغب في جواهر ويبيها ,, وصمم انه يفوز بالسباق ويقنع باته وجده انهم ايجوزوه جواهر ,, ولحظه السباق كل المتسابقين بيحسمو السباق ونادر مصمم عالفوز وبين اعيونه اعيون جواهر وتحديها ليه ,, وكان حصانه سريع ونادر عرف يتحكم فيه وخلاه يسبق الكل ووصل للمسافه المتفقين عليها بيش ايرد لنقطه البدايه ويعلن فوزه ,, ولاحظ في اثنين من الشباب وصلوله وواحد منهم خبط حصانه بحصان نادر يبيه ايطيح بس نادر ثبت وخبط الحصان باللجام وخلاه يجري بقوة وحاولو يوصلو فيه وطبعا حسين واحد من الاثنين وهو اللي حرش خوه علي نادر بيش ايطيحه بس نادر كان ثابت ومانهزش ولحظه رجوع الشباب لنقطة البدايه بيش يعرفو من اللي يفوز وفي نص المسافه حسين قرب من نادر بحصانه ونغز الحصان بحاجه زي الابره طويله وماحد ركز عليه وشافه لكن حصان نادر وقف فجاءة وصهل الحصان ورفع رجليه القداميات ,, ونادر بشطارته وخبرته في امور الخيل تمسك بيه بقوة والكل شافو اللي صار لحصان نادر ومؤيد خاف علي خوه بالرغم هو وجده عارفين نادر وحبه للخيول وتربيته لهن ,, ونادر خذا وقت شوي وهدا الحصان وملس علي رقبة الحصان بيش يهدا وبدا ايكمل السباق وحسين كان فرحان انه قدر ايأخر نادر لكن مافطنش ان نادر قبل مايفوز حسين بوقت بسيط كان سابقه واحتل الترتيب الاول قبل الكل ,,, وفرح الجد يونس 😊ومؤيد قعد يصفر ويهتف لخوه 😃
ومؤيد كان معصب وغااامه عنده 😠 واول مانزل قعد ايملس علي الجيهه اللي انتغزت بالابره لانه لاحظ حسين وهو يمد في يده عالحصان وبعد ركز لاحظ مكان بزه وفيه دم وجعاته نادر في الحصان اكثر ماوجعه انه حسين حاول ايغش ,, وعلي طول مشا جيهت حسين اللي تعقد وقعد قارن حواجبه ويشوف لنادر بحقد ,, واول ماوصل لحسين يضربه بووني 👊 علي حنكه جابه طايح والكل انصدمو 😨
الحاج يونس : نااااادر ,, كنك ياولد ? 😠
الحاج صافي: ياساتر ياولدي شن في عليش ضربته شن دارلك ? 😕
نادر بصوت عالي ومليان غضب : الحقير هضا حاول ايخسرني السباق ونغز الحصان بحاجه مسسنه ووجعه واللي قبل طحت من عليه 😡
الصافي لحسين : صحيح هالكلام ياحسين ? 😠
حسين وقف ومسح فمه اللي دمم بظهر كف يده وقال : كذاااب ,,نا مدرتش شي للحصان 😒
نادر بغضب : ماتكذبش يارااا ,, عيب راجل وتكذب وتعالو شوفو مكان البزه اذا مش مصدقيني 😡
وفعلا مشو الرجاله للحصان اللي ماسكه واحد من الشباب من لجامه ,, واول ماوراهم نادر الجرح اللي واضحه وفيها دم ,, والصافي توجه لحسين وقال : ريت ياولد ,, قول ليش درت هكي ولا نعطبه علي خشمك ,, البهييمه واضح عليها الوجع ومكان البزه فيها دم بيش بزيته وعليش ? 😠
حسين سكت وانقهر فقال الصافي : علي الطلاق لو ماتحكي ياولد ماعاد يقعدلك مكان بيناتنا اتطق وقول خيرلك 😡
حسيت بتوتر : اها ,,نا اللي بزيت الحصان بيش نادر يخسر ونفوز نا 😒وبزيتها بابره ميبر كنت طامرها في كمي ,😒
يونس باستغراب : وعليش ياولدي شن في بيناتكم ? ونادر ولد عمكم يعتبر بينا علاقه دم ليش درتلا هكي وقبل طيحته من عالخيل 😐
حسين تنهد وقال : لانه كان فاز بياخذ جواهر ونا رايدها من قبل وخطبته ونبيها ونا ولد عمها واولالي من الغريب ,, 😠
ومايجيب علم نين ايجيه كف👋 نين برملا وجه ,,طبعا باته عطاه كف وقاله : بنت عمك مش لكي مش بالغصب الزيزه عاد ,, والبنت حاسبتك زي خوها ,,وانت بعمالتك هذي نزلت راسي لانا ماعمرنا غشينا ولاهي عادتنا ولا طبعنا انغشو بيش انفوزو 😠
نادر حس بنار ولعت فيه بعد حكا حسين علي جواهر وكان يحصل بيعفجه طريحه سمحه ومافاق الا علي صوت الحاج الصافي وهو ايقول: بنت ولدي بعد تحدت ولد ناصر استحمت بشجاعتكم ونخوتكم ورافعه راسها بيكم وماعمرها حسستكم بشي من ناحيتها وبالنسبه لكي ياحسين اللي صار معش بنسمعه مرة ثانيه جواهر ماوافقت عليك وانت بطولك ,, يابال توا متجوز وبعيلك اخرا ,, ربي يهديك مراتك وليه باهيه وبنيت عمتك واكويسه وفكك من موال الاوهام اللي عايش فيه ,,وبالنسبه لك يانادر انت فزت بالتحدي ومبروك طلعت فارس ولد فارس وماكان عندي شك فيك وحاكيلي جدك علي الخيل اللي عندك ومربيها وخبرتك فيها وجواهر بنت ولدي من حقك ومن اليوم نقرو فاتحتكم ,😊
يونس بفرحة : الحمدالله ,, يعني خلاص اليوم خطبتهم وفاتحتهم رسمي 😃
مؤيد ببصاره : الف مبروك يامان ,, تاريتك مانك ساهل. 😉
وبدو شباب النجع ايباركو لنادر وهو حس بفرحة مش عاديه وشاف لجيهت بيت الصبايا وشافها قارنة حواجبها من بعيد ,, وابتسملها ابتسامه شماته ورفعلها حاجبه اليمين وهي تعقدت منه قرنت حواجبها وطرمت شواربها زي الطفله وخشت للبيت وهو ابتسم علي حركتها ,, وطبعا في بنات في النجع اللي نسيت ماحكيتلكنش عليهن اللي هن خوات جواهر اصغر منها وحده عمرها 16 واسمها نعيمه بشرتها بيضا واعيونها عاديات لا صغار ولا كبار وبنيات ونقشها صغير خشمها وفمها وطويله اشوي وشعرها طويل بس لنص ظهرها اسود ,, عامة حلوة مش شينه بس اتغار من جواهر بشكل غريب ,,والبنت التانيه اسمها عايشه بشرتها خمريه وشعرها عسلي زي جواهر ومليانه يعني دبه 😂 وغاليه عليها بطنها الترتيب الاول لكن طيييبه وحنونه زي باتها واتحب جواهر عكس اختها نعيمة وديما عرايك هي واختها نعيمه علي جواهر ,, وعمرها 15 ,😊
المهم امهن اسمها سالمة وليه الشر في وجهها وكتومه متحكيش واجد بس خبيثه وديما اتحاول اتفتن الكل علي جواهر واتخليهم يكروهها ,,
وبعد فضت قصة السباق وبدو بيقرو الفاتحه جا محمد ولد ولد الصافي لجده وقاله ,: جدي تبيك عمتي سالمة تو ضروري ,
الصافي قرن حواجبه وقال : ياساتر يارب ,,عمتك سالمة هذي ماايجي من وراها مفيت المشاكل ويستر الله منها ,
محمد : والله مش عارف بس قالتلي انقولك اتجيها ضروري ضروري توا ,
وفعلا استأذن الصافي من الجماعه ونادر كان فرحان ومستغرب في روحه كيف قدرت بنت اصغيره تغيرله قراره او طبعه او تفكيره في الحب والارتباط ,, ورجع ايذكر في روحه انه مايحبهش هي مجرد تحداته وهو مستحيل يخسر اي تحدي ,, وان امه تبيه يتجوز واهو مجرد جواز علي قوله حتي ولو مش نفس المواصفات اللي يبيهن في شريكة حياته ,,
المهم عند الصافي اللي وصل لبيت سالمه القيها مصبيه ترجا فيه وليه كل ملها ارقيق وجها واعيونها وخشمها وحتى اشوربها والسم باين فيها ,,اعوذ بالله منها ,,😒
الصافي : انشاءلله خير يابنتي شن تريدي ?😐
سالمه بخبث : خير ? منين بيجي الخير ياسويدي , بنقولك حااااجاو وماتزعلش مني باهيو ,, 😔
الصافي غمت علي صدره وتنهد وقال : اطلعي براس حاجاتك شن في 😐
سالمة : امبااارحو ونا مروحه من المعطن ومعاي بنتي نعيمة شفنا جواهر. وهي تهدرز مع ولد ناصر اللي جاينا ,, 😟
الصافي بصوت معصب بس واطي : انتي فيش اتقولي ياوليه ,, عيب عليك هالكلام راهي خيت بناتك اللي تحكي عليها خافي ربك وجواهر. مستحيل ادير حاجه غلط واكيده انتي واهمه ,😬
سالمة : لا والله ماواهمة وانشد حتي بنات النجع والعيال الصغيرين اللي مفروض اتحفظ فيهن في القرآن قعدت تلعب معاهموو وبعدين مشت للي توا بيقرا فاتحتها وهدرزو وحتئ بعد جت بتمشي عرضلها وحكا معاها بس شن قالووو علمي علمك ,, ياسويدي نحنا بناتنا مفروض ايتحشمن ومايحكنش مع حد حتى لو ضنا عمامهم ,, وراهو حتي حسين مادار هالشي اللي داره اليوم الا منها تحكي معاهوو وفاتحتلا سريب راه ,, كان هضا متقوا عينه وايقول نبيها الا بيناتهم حاجه ,وكان ماحاسبتها زي بنياتي ماحكيتلك ,, في النهاية خيت بناتي واللي تعيرها بتعيرهن حتي هن ولا ياسويدي ,😏
الحاج صافي عارف سالمة شن بتقصد وفاهمها لكن لعند توصل بيها اتشوه سمعه حفيدته الغاليه لهنا لا ,,
الصافي وهو معصب منها وقال بقرنت حواجب : ريتي يابنت طه ,, كلا لعند هنا وسادك ,, جواهر كلنا في النجع عارفينها وعارفين اخلاقها زين ,, وان كان علي حسين كان تبيه زي ماتقولي راهي وافقت عليه اول ماخطبها وهو بطوله ,, وبالنسبه لولد ناصر خلاص انكتبت باسمه واليوم فاتحتها وريحي روحك واشقي ببنياتك ردي بالكن منهن ,, وكلام زي هضا معش بنسمعه منك والا نزعل منك ونكان زعلت منك مش حيصيرلك طيب وانتي فاهمتني زييين ,, وخشي لبيتك واشقي بروحك 😒
ومشا وسيبها واقفه وتحرق وتدعي علي جواهر وجدها وكل اللي في النجع ,, وطبعا بنتها نعيمه سمعت الكلام وقربت من امها وقالت. شن الدباره تو ياامي ? 😒
سالمة بحقد : وراها وراها ,,مانخليها يوم اتهنا ولا اتريح بنت ذهب واتقولي سالمة قالت ,,😡
والتفتن لقن عايشه حاطة قدامها ربيعت مثروده وكاس لبن وتاكل ,ولا معبره الدنيا 😂😁
سالمة بغل : سادك وانتي اترمرمي من نوضتك وانت تحشي في هالمصران اتقول معطن 😠
عايشه زعلت ومدت اشوربها وقالت : جيعااانه من بعد الغدا ماضقت شي ,,عصور هضا عادي يايمي 😟
نعيمة : بشواش علي روحك قعدتي اتقول بقرة راه ,, 😒
عايشه 😔
*******************************
طبعا عيلة الصافي كلها عندهم منازل في القريه لكن مايمشوش الا قليل وخصوصا اللي عنده اعيال يقرو بس ,, بس عامة عندهم حيشان واثاث بس هم عشقهم عيشت البر والبدو والطبيعه الخلابه,, وخصوصا في الجلامة ولا الحصاد عندهم حفله عاااد 😂
المهم الرجاله اطايبو وقرو فاتحه الطيبه ,,وتشارطو واتفقو ان بعد اسبوع او عشرة ايام ايجو ايديرو الفرح في البر عرس بدوي علي اصوله وكان هضا شرط الحاج يونس ,,رايف العطيب علي جو زمان ووافقو ,بس شرط نادر انهم ايديرو حفله عرس يروح بالعروس لحوشهم بالتقاليد العاديه اللي هو الفيلو والزفه المعروفه عشان ناسهم اللي يعرفوهم في المدينه ,,ووافقو ,
وثالث يوم قرورو ايروحو ونادر كان يبي يحكي مع جواهر بيعرف شي حيره ,
وفعلا كلم جده وجد جواهر وانجه الصافي لفوز وقاللها : يافووز جواهر وين ?
فوز : مشت لبنيات سالم اتهدرز معاهن ,
الصافي: عدي اندهيلها نبيها فيسع ,
فوز وهي اتحط في الحطب في زوايه البيت قالت : وحاضر حنكلم شي حد ينده عليها ,
وفعلا لقت بتية تلعب دزتها لها ,
بعد وقت جت جواهر لجدها ,
جواهر : نعن ياجدي تبيتي في حاجه ?
الصافي : تعالي يابنت الغالي ,,تعالي هطيبك يبي يحكي معاك قدامي قبل مايروح ,
جواهر غمتلها وقالت : شن يبي فيا ,? مانبيش نحكي معاه نا 😒
الصافي : عيب يايمي الراجل قرا فاتحتك واكيده بيسألك علي شي حاجه اتخصك ,,هيا الله يربحك اسمعي الكلام ,
وطلعت معاه جواهر وهي غااامه وقارنه حواجبها واول ماخشت للبيت لقت نادر بس واول ماشافها وقف ومد يده بيسلم عليها وقال : كيف حالك ياجواهر ?
جواهر شافت ليده وشافتلا وقالت : الحمدالله ,,اسفه مانسلمش باليد عالرجاله ,
نادر ازلط بس فرح في نفس الوقت وقال: لا عادي ,,احسن برضو , المهم بنسالك االسريع علي شرطم اللي بتشرطيه عليا لو خسرت ,😏
جواهر استغربت وقالت : بس انت فزت وخلاص مش من حقي نشرط شرطي او نقوله ,
نادر : لا بس نا نبي نعرفه شنو ونا الفايز ومن حقي تشرط وانتي تنفذي بس 😏
جواهر تنرفزت منه بس اصنعت الهدؤ وقالت : بصراحة كنت نبي تشرط عليك تقنع عمامي بحاجه بس خلاص توا ,
نادر : وشن هالحاجه ?
جواهر نزلت اعيونها لوطا وقالت : تقنعهم اني انكمل قرايتي ونخش للجامعه ,
نادر انصدم بس ابتسم وقال : بس كنت تقدري تشرطيه في شروط الزواج هضا عادي ,
جواهر : مش عارفه لاني مش حاطه في راسي جواز بالجديات وبعدين اللي تجوز معش ايخلوها تكمل قرايتها,,زي مايقولو للي تتجوز 😔
نادر ابتسم وشاف لجدها اللي وجعاته حفيدته وعارفها شاطره وعندها رغبه في القرايا وقال لجواهر : باهي شن رايك حنحكو في الموضوع هضا بعد الزواج وممكن اخليك اتكملي قرايتك عندي ,😏
جواهر انصدمت ورفعت راسها لنادر واول مره ايشوف اعيونها محتارات كانهن يبن اكيده بالكلام اللي سمعاته وقالت : صااح ? حتخليني انكمل قرايتي ? ماتبصرش ?
نادر حط ايديه في جيوب سرواله وقال : انا مانبصرش ,, ومازلتي ماتعرفيش طبعي ,, المهم اتوصي علي شي ?
جواهر ومازالت مصدومه : لا سلامتك ,
وسلم نادر علي الصافي وطلع هو والجد صافي اللي ودع يونس بالاحضان وطبعا مايخلاش من طبع الكرم اللي عبولهم شتطت السياره زبدة وطنيه ولبن وحليب وهدايا معاهم من زميطه وخبزة تنور وبسيسه وحويره وتمر لان المكان اللي فيه النجع مليان نخل ايهبل ,,
وروحو نادر وجده وخوه اللي لبس سوريه عربيه من شباب النجع عطوها له وودعوهم علي امل ايتلاقو يوم العرس ,
وجواهر مشت لبيت جدها وقعدت مستكه ومصدومه مش مصدقه ان حلمها حيتحقق وانها ممكن اتكمل قرايتها ,ومافاقت الا علي صوت جدتها : جواااهر جواااهر ياياام تعالي هيا بيش اتغدي واندهي لاختك عايشه غاليه عليها عصيدة الشعير امبدري قالتلي انكلمها عالغدا ,😊
جواهر : حاضر ياحني حنكلمها ,
ومشت جواهر لبيت مرت باتها واول ماخشت لقت سالمة .....................

%%%%%%%%%%%%%%%%%%%%%%
زعما شن دايره من بغدد سالمه هذي 😒
و شن رايكن في الحلقه ,, وشن اتوقعن في الايام الجايه ?
افجعوني 😒 قصدي ابهروووني 😅

قراءة ممتعه 💋

#Hamelo ✒