أحببت بدوية (ليبية_منقولة)

الحلقة 14

اليوم مريضه والله زكمة علي حمى وحالتي منتهيه نكتب وباكو المناديل جنبي 🌚
يعني لو في اخطاء في الكتابه مشنها بالجو ياحناتي,😔 نكتب والعيون دموووووع 😢
وصلن علي رسول الله ,, ورد بالكن تلتهن عن الصلاة ,, والروايات ملحوقات حبيباتي ,,😊
🎭🎭🎭🎭🎭🎭🎭🎭🎭🎭🎭🎭🎭🎭

رواية #أحببت_بدويه
الحلقه (14)

وصلنا لعند خشت عايشه علي جواهر في جناحها وقالت : جواهر نبيك في موضوع ضروري ,
جواهر : انشاءلله خير عنوني ,,شنو في ?
عايشه بتوتر وقعدت تلعب علي اصابع يديها وعضت شفايفها وقربت من جواهر بعد ماسكرت باب الغرفه وقالت : اول حاجه نبيك توعديني ماتزعليش مني !!😔
جواهر شافتلها بحيره وقالت : وعليش نزعل منك ? شن درتي ياعويشه ?😕
عايشه قعدت تمشي في الغرفه وقالت : اوعديني قبل 😔
جواهر بتركيز : مانقدرش نوعدك الا بعد نعرف شنو درتي ,, بس نوعدك انتفهمك ومانخاصمكش قولي ياعويشه حسك شغلتيني 😓
عايشه قربت منها وقالت : بصراحة الموضوع خطير بس والله غصبن عني ,,وانزريت عليه لازم تفهمي اني خفت ,,خفت منها 😢
جواهر معش فهمت شي وقالت : نا مش فاهمه شي احكي يابنت شغلتيني والافكار معش رحمني شن في ?
عايشه : بصراحة مرضتك اللي مرضتيها في الطريق وقبل متي نا السبب فيها ,😔
وجواهر استكت😨 وشافتلها بقرنت حواجب وعايشه كملت ..
وقالت : اصل امي جبرتني وهددتني والله خفت خلتني درتلك مقروض والتمر اللي فيه هي اللي عصداته ونا والله ماني عارفه شن حطت فيه المهم قالتلي بعد انطيبه نعطيك منه قبل ماتركبي في السياره وتروحي مع عربك في الاول رفضت وقلتلها لا وحنكي لجدي ولحني لكن هي قالتلي انها تبيك تمرضي بس وكان مادرتش هكي حتقتلك وتقتلني زي ماقتلت عرب واجد نا مافهمتش عليها بس والله خفت منها ,, طول عمري عارفتها واعره بس مش متخيله انها تقتل وقعدت ايام لا ناكل ولا نشرب ونا انفكر وخايفه تصدقي حتي في النوم ماعاد رقدت وبعد تجوزتي قعدت انبات عند حني , و..وحتي يوم زفتك في النجع واول ليلة لكي مع نادر و اللي خشت عليك اللفعه ,,كانت منها انا متاكده ,,ومعاها حني نجيه ووحده ثانيه بس مش عارفه من لكن شاكة في عمتي رجعه مرت عمي ابراهيم ,, نبي نحكيلك بيش تاخذي حذرك بس نعيمه اتراقب فيا ومانقدرش نحكي وتوا هربت منهن علي اساس نبي الحمام والله يربحك ماتقوليش انك عرفتي ونا حكيتلك ,,لكن خوذي حذرك منهن وماتثقيش فيهن خاصة نعيمة وامي ياجواهر ردي بالك 😔
جواهر من الصدمة قعدت تسمع والعيون دموع والفم يرعش ماتوقعتش في اقصى تفكيرها ان مرت باتها ممكن يوصل بيها الحقد انها تفكر تقتلها وتخطط خطط خبيثه ضدها قعدت واقفه وتسمع في اختها وهي تعترف علي امها وحست كأنها طاحت في بير غريق وصوت عايشه قعد يججاوب معاها وهي تسمع في كلمة ردي بالك منهن ,, واختها نعيمة حتي هي تكرهها وتخطط ضدها وسؤال واحد قعد يتكرر في راسها ليش ? ليش? ليش? 💔
وكملت عايشه وقعدت تبكي وتقول : والنبي سامحيني ياخيتي والله نحبك ومافي يدي انضرك بس والله غصبن عني والله انصلي وندعي ربي يحفظك ويحميك ويهدي امي واختي ,😭
جواهر شافت لعايشه وقالت بنظره عتاب: وليش جيتي توا واعترفتي ? منين جاتك شجاعتك ?
عايشه : بعد شفت كتاب الله اللي كنتي تقري فيه اذكرت كلامه وان مهما انكون مش راضيه عالشي هضا مفروض نرفض انطاوعهن ومانديرش اللي يبنه ,, ولان الساكت عن الحق شيطان اخرس ,,مش هكي انتي اتقولي ديما ,,لازم انقولو الحق ولو السيف علي رقابنا ,😢
جواهر قمعزت عالكرسي وقعدت شارده بفكرها وقالت : لييييش ? ليش انا شن درتلهن ? ماعمري ضريتهن ولا زعلتهن ! عليش الحقد هضا كله عليييش?
وفي اللحظه هذي سمعن تخبيط عالباب وبسرعه وقفت جواهر ومسحت دموعها وهمست لاختها : امسحي دموعك وردي بالك يعرفن انك حكيتيلي وماتخافيش سرك في بير معاي المهم معش تبكي وبيني روحك طبيعيه قدامهن فااهمه ?
عايشه هزت راسها باوكي ومسحت دموعها,, ومشت معاها ناحيه الباب وجواهر تصنع في الابتسامه واول مافتحت الباب لقت نعيمة وهي ادور في اختها بعيونها
نعيمة بقصقصه: وين اعويشه عندك ?
جواهر بابتسامه : اها جبتها معاي لاني حنرايف عليها واااجد وخذتنا الهدرزة ,,بس يانعومه ردي بالك منها مش عاجبتني عويشه اتحسيها معش كيف قبل ولا ?
نعيمة مسكت في يد اختها وابتسمت بمجامله وقالت : من عيوني ,,وماتحطيش في بالك مغير تدلع ,, كان تشوفيها في النجع وهي طايحه في القصاعي بكبدها هههههه تحلفي عليها ماعمرها كلت ,, اسمحيلنا توا بنمشو 😅
وبعد طلعو يونس كان مقمعز مع الحاج صافي ومؤيد ونادر ويحكو بصوت واطي واول ما طلعن الصبايا نادر غمز لجده والصافي ووقف ومشا ناحيه الحاجه فوز وقال : مغير لو قعدتو معانا كم يوم اخرا ,
فوز بطيبه : يقعد الخير ياباتي ,,وخلاص بنتنا واطمنا عليها وربي يسعدكم ,, مغير دير بالك عليها راهي بنيتي ياولدي 😊 وجيبها لنا زياره عاد ,
نادر مسك يد الحاجه فوز وقال : بس جواهر حتزعل معقوله تمشو كلكم عالاقل يقعد حد معاها هاليومين ,,
يونس : اي والله عندك حق هاااا ياحاج صافي ?
صافي : والله انا ماعنديش مانع لكن من اللي يقعد مع جواهر ?تبي الحق جواهر غاليه علينا كلنا ,
فوز بنيه طيبه : عويشه ساع تقعد معاها كم يوم وايجيها واحد من عمامها ايروح بيها شن قولك ياسالمة ,?😊
طبعا الكلام صار قدام الكل جواهر وخواتها وصبايا عمامها. ومرت جدها نجيه عاطها رزيه 😒
المهم سالمة بخبث : والله كان الود والغايه تقعد مع خيتها لكن نا الايام الجايه نبيها معايا في حاجات بنديرهن في حوش القريه ونبيها اتساعدني مع خيتها 😒
فوز : يانعلي ,,بعد تبي امساعده بنات النجع واجد ,,وبعدين اعويشه وجهها صايف من يوم زيزة خيتها خليها معاها كم يوم وساع تروح مع واحد من عمامها مغير خليها هاليونين ,
والتفتت علي عايشه اللي منصدمة وقالتلها : هاا يايام تبي تقعدي مع هيتك هاليومين ?
جواهر اصنعت البسمة وقالت : اكيده ياحتي عويشه نرايفلها وااااجد ياريت اتخلوها كم يوم معانا ,,بعد اذن عمتي زهرة وحدي يونس طبعا ,
زهرة بمحبه : مرحبتين بيها زي بنيتنا بالزبط وبعدين رنده ابروحها تبيها ,
وفعلا عايشه قعدت مع اصرار الكل الا سالمة ونعيمة مايبنها تقعد ونجيه ورجعه قعدن موسوسات خايفات عايشه تحكي ونظراتهن لبعضهن وضحت للكل ,,المهم روحو وعايشه قعدت مع جواهر اللي خذت راحتها مع اختها وطبعا هذي كانت الخطوة الاولى في خطة الشياب ونادر ومشا يوم حلو علي عايشه اللي حست براحه نفسيه بس مازالت خايفه من امها وطبعا الحاج يونس قمعز مع جواهر وعايشه وحكا معاهن ,
يونس : احكيلي يابنتي اللي صار وعليك امان الله ماتصيرلك بصيرة ولا حد يقربك ,😐
عايشه وهي منزله راسها : والله مالاقيه وجه نحكي بيه ياجدي 😔
يونس بطيبه : ارفعي راسي واحكيلي نا علمت من جواهر انك اتحبيها ولا يمكن اتضريها ,,عشان هكي نبيك تحكيلي بكل شي عشان نقدر نحميك ونمنعو الغلط يابنتي ,
وبدت عايشه تحكي ليونس بكل شي ونادر معاهم ويسمع وهو منقهر من خبث وحقد الصبايا علي مراته وطبعا مازال ماعلمو بالاتفاق الجماعي متاع الخماسي لان عايشه ماحضراتاش ولا علماته لكن حكتلهم انهن يخططن في حاجه اخرا بس ماعرفتهاش ,
المهم طمنوها الكل انها مالهاش ذنب وعاتبها نادر بانها مفروض حكت لجدها وحنها وخبرت جواهر ,,المهم بكت عايشه ولانها صغيره في العمر مالاموش عليها بحكم ماعرفتش تصرف ,, وعايشه بكت وحضنتها جواهر بحب وضمتها لصدرها وقالت : عمري مانزعل منك انتي مش بس اختي انتي زي بنتي تربيتي علي يدي عش تبكي وربي يهديهن. امك ومرت جدي ومرت عمي نا مش دايرتلهن شي ,
ومشا يومهم عادي وباتت عايشه مع رنده بغرفتها وغيرتلها جوها ,,
وعند جواهر ونادر اللي رجعو لجناحهم باصرار من جواهر وسيبو الفندق وطبعا في غرفتهم جواهر كانت سارحه وباين عليها زعلانه ونادر حس بزعلها وقمعز جنبها وحضنها لصدره وهمسلها : حبيبي ماتحطيش في بالك ماتفكريش في الموضوع واجد ,,
جواهر : اللي واجعتني ان الشي هضا من هلي قصدي يعتبرن من هلي ولا ? مرت باتي ومرت جدي ومرت عمي ,, عليش شن السبب ,,صاح هن كانت معاملتهن ليا قاسيه وتوصل لدرجة يضربني بس عمري ماتخيلت انهن حاقدات عليا لدرجة يبن يقتلني !!
نادر وجعاته جواهر وحضنها بقوة وقال : ماتفكريش فيهن حبي ,,وخليها عالله ,,حينكشفن باذن الله ,,
وقعد يهدرزلها ويغيرلها في جوها وهي في حضنه نين نعسو ورقدو ,,
وفي الصبح ناض الكل بنشاط وعايشه حست كأنه حمل وانزاح من علي ظهرها بعد حكت وفشت خاطرها وعرفت ان اختها مش حتزعل منها وتكرهها ,وكامت في المطبخ مع رنده وجواهر اللي ايجهزن في الفطور واصرت جواهر اطيب فطير للفطور ووعايشه ورنده طيبن قهوة وشاهي خفيف وحطن جبنة وزيتون وحليب ونادر ناض علي بنت الفطور وهو فرحااان وزهرة اتملم في اختها منى عالفون واصرت عليها اتجي وتغدا معاهم ,, ويونس مقمعز عالقعده الارضيه اللي طرحتها جواهر وكانت في الحديقه وجلسة بدويه حلوة تحت اصقالة عنبة مظلله وطارحين ديسة وفراشات بسيطات وبخارة جنبه فيها فاصوخ وراديو يالاه مفتوح عالاغاني الصباحيه الجميله ومانحكيلكن علي اغاني فيروز 😍 وكانت اغنيتها (طيري ياطياره طيري ياورق وخيطااااان بدي ارجع طفلة صغيرة ع سطح الجيراان ) وطبعا طلعن البنات بالفطور ومؤيد ناض وغسل ولبس واول مرة اينوض بدون حد ايفيقه واللقي الكل في الحديقه القداميه وجو مانحكيلكن ونزل بيشاركهم صباحهم الحلو والرايق ,
يونس وهو يشرب في فنجان القهوة☕ : اااااه والله له زمان الواحد عالقعده البسيطه والجو البسيط 😊
زهرة : عندك حق ياعمي والله قعدة اترد الروح ,☺
نادر وهو ايشوف لجواهر اللي طبعا لابسه فستان بيتي حلو زهري بالابيض وكمامه نظام بدي ومخصر بشريط ساتان زهري غامق وطويل ومن اسفله فيها تبويجه بسيطه وخفيف في الحركه وفي ازهار علي رقبته زهريات صغيرات ولابسه عليه حجاب شافون زهري مخربش بالابيض والليموني وحاطه كحل بس ومع هضا نادر اعيونه عليها كانه ايشوف في ملكة جنال ببساطتها ونظافتها وطيبتها وابتسامتها علي وجهها للكل ,
مؤيد لاحظ نظرات خوه قرب منه ونغزه بمرفقه وهمسله : خف عالبنت ياولهان راك مفضوح 😉
نادر التفت لمؤيد وعطاه نظره اسكت خيرلك وشافت لجواهر وهي شايله الصفرة ومعاها عايشه اللي حتي هي لابسه فستان كحلي ساده ومخصر رطويل طبعا واكمامه اطوال وكانه من خامة الجينز وفيه اجيوب من نصه وخلو ولابسه عليه وشاح بيج بالكخلي الخفيف وكانت كيوووت الدبدووبه 😍 وطبعا وهن ماشيات وكل وحده شايله حاجه ومعاهن رنده خش عمر ومعاه امه واول ناوصلو في الكل سلمو ورحبو ,
عمر بضحكه : الله الله عالجو السمح وين عالقعده الرايقه ياحويج يونس ,ولا فاصوخ وفيروز اخرا 😉
طبعا الحاج يونس ايحب يسمع فيروز ,
يونس وهي متكي عالوساده بمرفقه : والله راحة نفسيه مانحكيلك والله يربح مرت نادر وخيتها هن اللي فكرن فيها ,,خير من فطرت الطاوله مليون مرة 😊
نادر ابتسم ومؤيد ضحك وقال : ومانحكيلك ياعمر وفيروز وحول من طريق الحويج عااد 😂
وضحكو وبعدها نشد يونس عمر : وين باتك ? كنه ماجا معاكم عابيين بيه عالغدا راه ,,رن عليه وكلمه ,
عمر : حتي هو بيجي ايتغدا معاك مغير عنده شغل ايدير فيه وبيجي ,
وطبعا غداهم كان بازين ومن تحت ديات جواهر ومانحكيلكن عالبازين وحركاتو 😋 والسلطه الخضراء وقرون الفلفل والمشروب والليم مع الدحيات وزهرة فرحانه بجواهر وبشطارتها ومنى عجبها كل شي وهمست لاختها : ماشاءلله عليها جواهر شاطرة وفالحه في كل شي اتحط في دياتها ربي يحفظها ,☺
زهرة : ربي يحفظها تبارك الله عليها وخيتها عويشه ماتتخير عليها الحق شطاره وخفة دم 😊
منى بنظرة اعجباب لعايشه : نجيها ياربي ,ينقنها عاجبتني ,😊
وطبعا عمر كان يبي امه لانه باته رن عليه ويبيه ايقول لامه اترد علي فونها ايرن عليها وماتردش علي طلعة عايشه من النطبخ وفي ممر السليفه تلاطمو عايشه نزلت راسها وعمر بنظره حب قال : شخبارك ياعايشه كيف حالك ?
عايشه بصوت يادوب طالع : الحمدالله بخير
عمر : دوم ياربي ,,ميف قعدتي مع جواهر مالا ?
عايشه بتوتر : اها يومين هكي ونروح ,عن اذنك بنمشي ,
ومشت من جنبه وعمر اعيونه عليها وحط يده علي قلبه وقال : اااخخخخخخخخخ نا وخلاص ,,مادخلنيش نا لا نعرف صغيره ولا سحنتي ضروري نحكي مع الحويجه والحويج 😍
علي طلعت امه من وراه من المطبخ وقالتلا : بسم علي وليدي كنك ياعموره تحكي بروحك 😕
التفت عليها عمر بتظره ضحوك وحب وقال : نبيها ياحريجه خلاص قررت ونبيها ايوااه 😍
منى بعدم فهم : من اللي تبيها ياليد?
عمر حط راسه علي كتف امه وهمس : عايشه ,,نببها ياحويجه ,, ومستعد نراجاها كان قالو صغيره نرجاها والله 😍
امه انصزمت وفرحت والتفتت عليه وقالت : تحكي جديات ?😀
عمر : جد الجديات 😍
منى : تعرف حتى نا عاحبتني بس مش عارفه هلها ايعاطوها والا لا خليني نجبد اختها وانشاءلله ربي يسهل 😊
عمر : ربي ايخليك ليا ومايحرمني منك يااحن ام في الدنيا 😘
وباسها علي خدها ومني التفتت عليه وقالتله : وانت شن جابك هنا ياعمر ماتقولش خشيت اتشوف للبنت رد بالك ? 😐
عمر خبط علي جبهته وقال : يييييي حي عليا من الشايب ,, رن عليا وقالي قول لامك اترن عليا ولا تفتح علي مكالماتي من بدري ايرن عليك وانتي ماترديش وهو يبيك في موضوع ,
منى : ينعليا وكنك ماحكيت من الاول يامنجوه ,, خليني نمشي انرد انشوفه كنه ,
وضحك عليها عمر وطلع وهو فرحاااان وقمعز مع الشباب ويوتس ويهدرز ونادر رن فونه القيه رقم هو يعرفه اكويس في الاول فات ماباش ايرد وبعدها كثر الرقم رنين استأذن نادر من الرحاله وتباعد ورد عالمكالمه ,
نادر : ايوووااه 😒
...........: كنك ماتردش عليا معقوله لهدرجه تسيت اللي بينا ,
نادر بعصبيه : نسيت ودفنت اللي كان ,,ونا توا راجل متجوز وياريت تنقدي علي وجك وتفهميها يارتاج 😒
رتاج : بس انا نحبك ومعترفه اني غلطت واللي تبي اتعاقبني بيه نا راضيه بيه المهم ماتسيبنيش يانادر انا نحبك انا حبيبتك اللي تحديت الكل عشانها ,
ونادر حس باحساس غريب ومشاعره تلخبطن وقال: انتي بعتيني عشان واحد ثاني واطلقتي مني عشان تتجوزيه ,😒
رتاج : غلطت وندمت وسيبته عشانك وجيت بنرجعك ليا وثرايفتلك ورايفت لحضنك وكلامك الحلو استاحشت لمانزعل وتراضيني استاحشت لما نبكي وتمسح دنوعي اقتنعت ان في حاجات مستحيل اشريهن بالفلوس تلقاهن عند اللي يحبك وبس ,, وماتنكرش انك حبيبتني واكيد مازال ليا عندك مكان ولو بسيط ,
نادر سكت وبعدها قال : شن تبي توا يارتاج ,,شن تبي مني ?
رتاج بصوت دلع واغراء : نبي انشوفك مره وحده بس ,,ونتافهمو وبعدها كان معش تبي تحكي معايا خلاص نطلع من حياتك نوعدك ,بليييز بيبي بليييز ,
نادر ...................

زعما شن بيسير مع اللصقه هذي ونادر يرضخ ليها ولا لا وشن بيسير ,,ارجني بكره الا حلقة اخرا والله مانقدر الليله ساحمني نعموشاتي مرييييضه 😷

قراءة ممتعه 💋

#Hamelo ✒