أحببت بدوية (ليبية_منقولة)

الحلقة 22

بسم الله ,, والصلاة علي رسول الله,,
,,نعموشااااتي 😘
عارفه روحي طولت بس والله كنت بلا رصيد ,,😊 وعالمغرب جوني ضيوف من البريقه ,,😁
وحوسه وعشاء ومانحكيلكن ,,😥
المهم ,, هذي الحلقه ,,😉
🌱🌱🌱🌱🌱🌱🌱🌱🌱🌱🌱🌱🌱

رواية #أحببت_بدويه
الحلقه (22)

وصلنا لعند جواهر خبطها حد علي راسها وفقدت الوعي وشالها وحطها في سياره وراحو بيها ورنده خست ادور فيها مالقتهاش ,,👇

رنده : جواااهر ,,,جواااهر ,,وينك ?
وطلعت برا البراندا مالقاش حد لفت عالسور من جنب برمت ودورت مالقتش حد وقعدت تنادي بصوت عالي وخشت تجري علي جدها علي جيت مؤيد ونادر من برا وكان وجه رنده مايتفسرش ,,
يونس : خير يابنتي وين جواهر ?😕
رنده بتوتر : مالقيتهاش 😟
نادر بتركيز : كيف ? شن في بالضبط ?😕
رنده : جواهر خشت بدير قهوة ليا ولها ولجدي وبعد طولت خشيت بنشوف مرات تعبانه وتبيني نساعدها ,, لكن ...😟
نادر : لكن شنو ? احكي ,😐
رنده : مالقيتهاش ,,😫
نادر. بخوف : كيف مالقيتيهاش ? بالكي في البراندا والا عند حوض السباحه برا ?😐
رنده وهي متوترة : مش قاعده دورتها والله ,, بس مالقيتهاش 😓
وعمكن نادر زي اللي ركبت فيه نار خش للمطبخ ايدور فيها زي المجنون مالقيها ,, وطلع للحديقه وقعد ايدور فيها وشاف للبوابه القي الحرس مش قاعدين  في مكانهم طوول مشا ناحيتهم وبصوت عالي ناداهم واول ماجوه قال : ماشفتوش المدام.جواهر طلعت من الباب ?😠
واحد من الحرس : لا والله !! 😐
نادر : ماحد جا اليوم للفيلا ?😡
الحرس : ابدا مافيش ,, الا انت والاستاذ مؤيد بس ,😐
نادر بعصبيه : فتحو عيونكم زين انت وياه ,, وركزو اكويس ,, وياويلكم المدام ماتقعدش في الحوش ,😡
ومشا والحرس توترو وبدو مركزين وايتلفتو وكل حد خذا ركن من زوايا سور الفيلا ,,
ونادر خش وهو بينفجر من التفكير وركب لجناحهم بيتأكد مرات قاعده ,, ونفس النتيجه مالقاش حد ,, حس بضيق مش عادي ,, وعض شاربه بغل ونزل وهو متعصب عالأخر ,,😠
مؤيد : وسعو بالكم بس ,, بالكي طلعت مشوار والا فوق السطح يانادر ?!😕
رنده بتأكيد : ابدا والله خشت للمطبخ قدامي وقدام جدي اهو اسألوه ,, وحتي صفرة القهوة والكيكه مش مكمله تجهيزها ,,القهوة مطيبتها ومش مكمله باقي قص الكيكه ,😓
نادر بخوف : شن قصدك يارنده ? يعني الوطا انشقت وبلعتها 😤
رنده سكتت وهي متوتره عالأخر وفجاءة رن فون الفيلا الريفي والكل شافولا ومؤيد نشا رفع السماعه و,,
مؤيد : الووو ?..ايوا ... اشويه بس ,
مؤيد لنادر : المكالمة لك ,
نادر : من ?
مؤيد,: مش عارف ,, بس قال نبي نادر ناصر 😕
وقرب نادر من مكان خوه وخذا السماعه من يده ورد ,
نادر : ايوا ,
,,,,,,,,,,: ايوا نادر ناصر معاي ?
نادر : انشاءلله ,,من معاي ?
,,,,,,,,,,,,: بنخبرك بس ان في شخص يبيك اتنفذلا طلب صغييييير. والشخص هضا طبعا تعرفه اكويس ,
نادر بحيره : شخص من ? وانت من اصلا ? وطلب شنو ? خليك واضح وفكني من اللف والدوران ,😒
,,,,,,,,,,,,,: بالنسبه ليا حتعرفني لاقدام مش توا ,, واللي يبيك اتنفذلا موضوعه حتى هو حتعرفه ,,بس الأول لازم اتجيب معاك ثلاثة مليون كاااش ,,  سامعني واتجيبهن عالعنوان *********** والا حتندم ,😎
نادر بضحكه قهر : والله ?بالسهوله هذي ? وعليش بنندم كذا قولي ?ومن تطلع عشان اتندمني ?
,,,,,,,,,,,,,,,: ههههههههاااي ,, ماعلينا شكلك واثق في روحك وااجد ,, المهم ,,خليني انوضحلك ,, ونفهمك بالخط الكبير ,, ياسيدي ياتجيب الثلاثة مليون او تستلم جثه المدام ,, وانت حر ? 😎
نادر اعيونه فنصن واعروق رقبته بانن وغمض دده بقووة لدرجة انبيضت وقال : شن قصدك ياحيواااان ? ان جواهر عندكم ?😡
,,,,,,,,,,,,  عليك نووووور ,, مع انها صفقه فيها ربح لكي ,, لاني حنستفيد منها وااااجد خصوصا بجمال زي جمالها ,, وماتتخيلش المكسب اللي نحصله فيها لو رفضت ,, ونا اللي رابح في الجيهتين ونخليك اتلملي الموني 💵,,اذا تبي ترجعها زي ماخذيناها ,😎
نادر قطع كلامه وقال : حيووواااان وحقييير ,,والله لو انحصلك بين ايديا نقتلك ياكلب ,,😡
,,,,,,,,,,,,,,,: تؤتؤتؤ العصبيه مش باهيه عشانك يافندي ,, خليك محترم معانا عشان نحترمو مراتك ,,اتقل ادبك معانا حنقلو ادبنا مع الحلوة اللي معانا ,, وتوا انسيبك تلم الفلوس وماتفكرش تتصل بالشرطه لاني لو شميت بس انك بتتصل بيهم اعتبر اني استغنيت عن فلوسكم ,,وتنسى مراتك حنكلمك نهاية اليوم ونبي نسمع انك جمعت الفلوس تشاااو 😎 ,
وسكر الفون ونادر خلاااااص ببنفجر من العصبيه والغضب بان عليه وبقوة خبط المدخل اللي عليه الفون والجد يونس ومؤيد ورنده ايشوفوله وشبه فهمو يرجو فيه يحكي ,,
يونس بخوف : شن في ياولد احكي جواهر وين ?😰
نادر بقهر: انخطفت ,,, انخطفاااات 😡
يونس : كييييف 😨
مؤيد ورنده : 😨😱
طبعا رنده اللي خطت ايديها علي خدها 😊
نادر وهو يتنفس بصوت عالي يدل علي عصبيته : خطفوها الكلاب ,, ومن وسط حوشي اخرا ,,بنموووت ياجدي بنموووت انحس في روحي مش قادر انتحمل حد يلمسها او يأذيها ,,بننفجر ,😤😡
رنده قعدت تبكي ,,ومؤيد خط ايديه علي راسه ويونس قمعز عالصالون بهدت حيل ,,
مؤيد : كيف خطفوها ? وهي في المطبخ اخرا ? معش في آمان حتى في حوشك!! 😲
رنده : ياروحي علي جواهر اكيده خااايفه ,, شن دايرين فيها توا ,,? 😭
يونس: لا حول ولا قوة الا بالله العلي العظيم ,, من يقدر اصلا يجراء وايهش لعند وسط حوشنا ومن النطبخ اخرا ويخطفها من بس وكيف عرفو امتا يلقوها فيه ومن هم اصلا ?😟
مؤيد : فيش ترجا ?اتصل بالشرطه ,
نادر وقف وقال : لالا ,,شرطه لا ,, سكلها عصابه والنشكله قال كلام غريب في الاول اني لازم انلبي طلب لشخص معين وبعدها قعد ايهدد وطلب الفلوس شكلهم بعرفوني او يعرفو حد يعرفني لانهم مستقصديني نا ,,
يونس بحيرة : كم طلبو ?
نادر شاف لجده وقال : طلبو ثلاثه مليون ياجدي ,
مؤيد ويونس : كممممممم ?? 😨😨
رنده : حسبي الله ونعم الوكيل فيهم الحيوانات 😭 ادفعلهم كان عندك وجيب جواهر حراااام ماتنساش انها حاااامل 😭
يونس : ثلاثه مليون ? معناتها بنبيعو اللي فوقنا واللي تحتنا ,, والشركه وشبه بنفلس ,😔
نادر بحيرة : انا والله ماني عارف نقدر نصرف في مليون مليونين كحد اقصى ,,لكن باقي الرزق نش ليا ,,هضا رزقك ورزق امي وخوتي ,😔
مؤيد حط يده علي كتف خوه وقال : فداك وفداها جواهر اامهم ترجع مراتك وابنك سالمين وفي حضنك يانادر ,😐
رنده بطيبه والدموع اتقول شلال : حتى نا مسامحه المهم جواهر والبيبي حراااااام 😭
نادر محتار وخايف علي جوهرته وقلبه واجعه عليها وعلي طول نشا للهاتف القي الشاسه اللي فيه وذلع اخر رقم كلمه وطبعا هو رقم العصابه وحاول يتصل عليه بفونه النقال بس القيه مقفل غمتلا وخبط فونه في الساس جاب ستين طرف ,,
واتصلت رنده بامها وخبرتها وهي تبكي وعلي طوول روحت زهرة ومعاها عيت اختها وزوجها وعمر ولدهم ,, وطبعا مؤيد اتصل بطارق لان الانتيم متاع نادر ومؤيد شهدار ديني وبينكن 😅 وشكلها عيله ماتمسك بصيرة المهم ,,
طارق في المربوعه مع نادر ومؤيد وعمر وخالد ويونس ونادر متضاااايق عالاخر ,, وعنده الحق موضوع حساس خصوصا للليبي ,,وطارق حط يده علي يد نادر وقال : ماتخافش نادام يبو فلوس حيتصلو بيك ,, ونا عندي هطه لو اتوافق عليها باذن الله نرجعوها سالمة غانمه ,
نادر : خطة شنو بس ,,انا خايف يشعرو بشي يضرو جواهر ,,انا حتي الشرطه مش قادر نتصل بيهم ,
طارق : ماتخافش الظابط اللي مسك قضيه سالمة ,, كلمته مبكري وحكيتله ان في قصة خطف ومانبوس حد يعلم وتشهدر ونبو الموضوع سري ووافق وهو معانا المهم نبيكم تسمعو الخطه واللي هي ,,,,,,,
***************************
وعند جواهر كانت مربطه رجليها وايديها للخلف وهي مقمعزه عالمرسي ومغمضات اعيونها وفمها بشريط لاصق وطبعا فاقت من الدوخه وكان قلبها يدلف وبيزرق منها من الخوف ,, وكانت في غرفه نظلمة زي المخزن ريحتها رطوبه وعفونه وتراب ,,طبعا جواهر عندها ااحيوب الانفيه كيف حالي وحال بنات وتحد واتحسس من اي ريحه خصوصا التراب او ريحة العفونه ,,😷
المهم سمعت صوت رجلين وكأنهن كعب كندرة واستغربت كيف راجل يلبس كعب الا ادا كان اللي خش عليها مش راجل وفعلا اسمعت صوت انثوي ناااعم  ,
,,,,,,,,,,,,,,,,: هه كيف حالك يا..ياجوااااهر ?
وقربت من جواهر وشالت الشريط اللي علي فمها نين جواهر تألمت وعيطت ,
جواهر بحيرة : من? من انتي ? وليش تخطفي فيا حرام عليكي شن درتلك ?
,,,,,,,,,,,,,,,,,: : أولا انا وحده تعرفيها اكوييييس ,,وثانيا خطفتك عشان نعرف كمية الحب اللي في قلب زوجك لعند وين يوصل ? وبصراحه نبي منه شي اهم منه ومنك ,, وبعد اينفذلي  اللي نبيه حنشوف الحب والغلا حيستمر بيتاتكم ولا لا ?
جواهر : صوتك مش غريب عليا ,, واذا عالحب اللي في قلبي لنادر مستحيل ينقص وهذي أكيده ,, والحب قيمته اكبر من اي شي ,,لكن اذا تبي الحق وتبيني نثبتلك ارفعي الغطا من عيوني ونا انقولك ,
وفعلا ارفعت الغطا من علي عيون جواهر وحواهر انصدمت من اللي شافتها وبصوت مبحوح وصدمة بانت في عيونها ..............  

وهذي حلقه ولو متأخره ,,ومن تتوقعن اللي خطفت جواهر ?! توقعاتكن عاااد 😊
بكرة نكملو تصبحن علي خير 😘
        
                       قراءة ممتعه 💋
#Hamelo ✒