قلعة الشيخ مهران

بارت49(ج2)

#قلعة_الشيخ_مهران

لا تكن المضحي دائماً تمرد
كن الشخص السيء المرة واحده
إستعد كل الأشياء التي سلبت منك
عند ما كنت مثالياً أكثر من اللازم

.......................................

أمامة :- ما عرفت منو عماد ولا فهمت ليش هيج اعترض طريقنا وضرب السيارة ولا حتى شفت شكلة كل اللي فهمته واحد اسمه عماد هو صار مقابيل السيارة وانصدمنا بيه وعمو من عرفه هو تخبل

نزل من السيارة سريع راح عليه منزل راسه عليه ويحچي وياه وهذاك باقي بداخلها ما نزل منها الناس تجمعت علينا و عمو صوته صار عالي ودفر السيارة مرتين برجله من الخوف وتجمع الناس الصار فتحت الباب ونزلت هسه بديت اقترب منهم عمو شافني بسرعه گال للولد

_انه الك نتحاسب ليش لا اصبرلي

حچى هيج واجى عليه باوعلي وهو يگول أصعدي صعدت بدون ما احچي شي وهو شغل ومشى

أمامة :- شكو عمو منو هذا وليش هيج سوى

متين :- ماكو شي لا تخافين

_ گلبي يدگ قوي

باوعلي بدون كلام  و رجعت عينه على الطريق ويسوق بكل سرعته انتبهت على كف إيده
اعصابه برزت بشكل مو طبيعي رجعت راسي على الجام گلبي يأذيني و الرجفه بكل أعضاء جسمي هو يسوق بسرعه جنونيه يريد بس يوصل عين على الطريق وعين عليه اخر شي ما تحملت حاجيته و بصوت يرجف من گد ما خايفه من سرعته

أمامة :- على كيفك عمو فدوه گلبي راح يوگف

باوعلي وبدأ يخفف لحد ما طبگ

متين :- شبيج ليش هيج ترجفين وصفريتي ماكو شي لا تخافين شو اهدأي بس ماكو شي انه يمج

أمامة :- عفيه بس لا تسوق هيج خفف شوية لا ننگلب عندي فوبيا من السرعه

ما رد شي بس اكو بطل مي يمه فتحه وطلب من عندي اغسل وجهي بيه غسلت وجهي وشربت
بقى طابگ كم دقيقه لا هو يحچي ولا اني احچي وراها شغل ومشى بشكل طبيعي لحد ما وصلنا للبيت نزلت واني ما باقي دم بيه من الرعب المريت بيه هم حادث وهم مشكلة عمو بنص الشارع وهم السرعه المشى بيها

دخلت بوجهي گبل للحمام حتى جنطتي ما نزلتها نسيتها بالسيارة تقيأت لحد ما طلعت روحي
نينه والبنات اجن عليه يسأل ما ارد شي انتهت على صوتهن اجى جدو سأل شبيج بعدني ما راده عليه شفت عمو متين اجى علينا

مهران :- شبيها شنهي الصاير وياكم

متين :- احتمال هبط ضغطها ، شو گومي أشوف

دخل للحمام گومني من الگاع و سلمني بأيد نينه

متين :- اخذيها ترتاح وانتِ حبيبتي غزاله سويلها شي تاكله