قلعة الشيخ مهران

بارت 30

#قلعة_الشيخ_مهران

           الى كل شخص كتوم أعانك الله
                    على ضجيج قلبك

                 ...................................

أمامة :- جدو وعمو سند بقوا يمنا أربع أيام وراها رجعو للعمارة لان جدو باله  باقي يم عائلته و الوضع جان صعب ويخاف لا احد منهم يروح بيها

مرت الايام علينا وانتقل العراق من حقبة زمنية سيئة الى حقبة زمنية اسوء الفوضى بكل مكان القتل بكل مكان التسليب التفجيرات بكل الشوارع اللي يطلع ما يعرف بنفسه راح يرجع العائلته لو راح يشيع المثواه الأخير

رجعنا نداوم و بابا جان حريص علينا بشكل مو طبيعي ما نطلع الاي مكان هو يقضي كل أحتياجات البيت ويرجع ومثل قبل ياخذني للمدرسة بأيده ويرجعني بأيده

خلصت سنة ( ٢٠٠٣ ) بكل اوجاعها ودخلنا بسنة جديدة و اوجاع جديدة الحال بالنازل بس اللي اختلف بيه رجعنا نتواصل وياه بيت جدو مثل قبل واليوم جدو مصبح بيتنا من الصبح

أمامه :- جدو ليش متبقى يمنا

مهران :- لو بأيدي يبعد جدج ما افارگكم ولا ابعد عنكم ساعة وحدة بس ما اگدر مناك اعمامج والاولاد كلهم بحاجتي والسلف وطلايبة

_ عوف السلف وجيب اعمامي وتعالوا عيشوا هنا يمنا بـبغداد

_ هههه بعد جدج شـأجيب واحد ثنين ثلاث مية
عشيرة كاملة گاعدة بالقلعة يراد نشري نص بغداد
يله تكفيهم 

مؤنس :- السلام عليكم

الجميع :- وعليكم السلام

مؤنس :- يابه شـرأيك بسيارة ابو عمر يريد يبيعها

مهران :- شنهي بعد ابوك تريد سيارة

_ اي والله اريد الي وحدو اشتغل بيها تكسي

_ وعليش تشتغل تكسي يبعد ابوك والخير عندنا من الله چثير

_ يزيد خيركم يابه بس اني احب اشتغل

تاضي :- يمه انتَ غير عندك راتب شتعمل بالسيارة والدنيا تخوف

مؤنس :- الوضع صعب وكل شي غالي و آراي يحتاج علاج مستمر وساعة الساعة يفوت للعمليات وين يكفي الراتب

مهران :- انه اعملك راتب كل شهر حگك وحگ اخيك عليه

_ يطول بعمرك يابه انتَ تنطيني لو اني انطيك

_ ما شفتوا شي مني انحرمتوا من خيري وعشتوا بالعوز

_ هاي قسمتنا من الله والحمد لله هسه الله مكني وعايش تحت رحمته بس اريد شيء ثاني وياه راتبي

_ يبويه القلعو جبيرة والحلال اللي بيها يسد عين الشمس والخير العندنا يعيش احفاد احفادنا ما تگلي عليش تعاند وتظل هنا ترد وياي غاد ويو ما تهوى العيشه بالگصر ابني الك دار بالقلعة واگعد بيها