قلعة الشيخ مهران

بارت33 ولاخير

#قلعة_الشيخ_مهران
#الأخيرة_من_الجزء_الاول

خايب يواشك يا حلو الطول
ينويعم تريض يمدلول
عيونك بعد بيهن دللول
وما ندري ياهو البينه مجتول
يصويحبي ويبني ويا كل شي
يابعد بيتي وبعد هرشي
رمشك طبگ وانفتح رمشي

......................................

دخل جدو يلطم على راسه وعمو عاصي سانده طلعنا كل أحنه نركض على صوته نينه صارت وجهه بوجهه وياه بس شافها بقى يضرب براسه اكثر واكثر ويعيط بصوت عالي ويگول

مهران :- الگوه براسج يا تاضي مات ابو الغيره
الگوه براسج يا تاضي مات ابو الغيره

يلطم فوگ راسه ويردد بهاي الكلمات ما اگدر اوصف الحالة اللي صابتني ولا اگدر اشرح الدمار اللي حسيت بيه كلمات جدو احسها نبتت بنص گلبي

مات بابا راح خلص بعد ما يجي ما اسمع صوته
ما اشوفه انتهت خلص تيتمت من الاب مثل ما تيتمت من الام منو الي منو الاخوي المريض وعمي ونينه وبيبي شلون راح نكمل شلون نعيش

اريد انطق كلمة وحدة اريد اعيط ماكو ما اگدر الدنيا صارت ظلمه بعيني ما احس بلي حواليه ولا اسمعهم شلون دخلت للصالة ومنو دخلني ما اعرف كل اللي اعرفه و اتذكره اني بنص الصالة
و نينه مقابيلي ملخه شعرها ومشگگه ملابسها

درت عيوني ادور على أخوي شفته واگف على بايات الدرج ويبچي وحدة اتذكرت نفسي شلون وگفت هالوگفة بوفاة ماما گمت عليه حظنته وعطت وهذا اول صوت يطلع مني اني اعيط وهو يعيط وياي فقير وما يفهم زين بس يعرف صار شيء على بابا

عمو أسير واگف يم الباب يضرب براسه بالحايط بكل قوته بيبي الضعيفة اللي حتى ما تگدر توگف ملخت نفسها تملخ

ساعة ساعتين ثلاث انفتح الباب وادخلوا التابوت نفس المشية ونفس اللزمة ونفس الكلمة تتردد
بـ اذني لا اله الا الله

نفس منظر فقدان أمي بس هالمرة اني عقلي اكبر و جاي احس بحجم الخسارة اللي خسرتها

التمت الناس على التابوت ما اگدر اوصف حالة نينه ما اگدر اتذكر منظره الدم النزل من خدودها ومن صدرها بچت ولطمت وراها گامت من التابوت وجابت مقص وگصت شعرها وطشته فوگ التابوت

جدو وگع بالگاع ما يگدر يگوم عمو سند لطم لطم نسوان هاي كلها واني واگفة على بايات الدرج
و اخوي بيدي ما تقربت منهم لحد ما تقربوا يردون يشيلونه هنا حسيت هذا اخر وداع وياه اخر عتاب اخر مرة اشوفه بالبيت اخر مرة أأمن بوجودة ركضت من بينهم وشمرت نفسي فوگ التابوت

عمو سند منعهم يشيلونه من شافني شلون اجيت اخر الناس حاولت افتحه بس لزم إيدي عمو سند ما قبل رجعت راسي فوگاه واعاتبه

_ لا بابا بعد وقت بعدني ما شبعت منك بعد الطريق طويل ليش تعوفني مو تدري انتَ امي وانتَ ابوي الحمل ثكيل بابا آمانتك ثكيلة ما اتحملها ما اتحمل ما اگدر اگعد ما اگدر عليها