නොනිමි🌷✅

36

අපි දෙන්නා දවල්ට කාලා ගෙවල් දොරවල් වහලා දාලා දෙක හමාරට විතර ගෙදරින් මාතලේ යන්න පිටත් වුණා.. තෙහස් අයියා කාර් එකක ඇවිත් තිබුණා.. ඉතින් නුවරට යනකම්ම මම පැසෙන්ජර් සීට් එක රත් කර කර ආවා.. අතරමඟදි නවත්ත නවත්ත කන්න ගත්ත කඩචෝරු මලු ගොඩක් බාගෙට ඉවර කරලා පැසෙන්ජර් ශීට් එක ළඟ ඩෑශ් බෝර්ඩ් එකේ මන් ගොඩ ගහලා තිබ්බා.. නුවරට එනකොට හවස පහත් පහු වෙලා නිසා පාරවල් අයිනේ බඩ ඉරිඟු සෑහෙන තම්බ තම්බ තිබ්බා.. මන් හරි ආස කෑමක් තමා බඩ ඉරිඟු කියන්නේ.. ඒත් ගත්තට ඉවර නොකරපු බූන්දි මල්ලයි, වඩේ මල්ලයි, කඩල මල්ලයි, තව නානාප්‍රකාර කෑම මලු වල ඉතුරුවා තාම එහෙමම තියෙද්දි මම පාස් කරගෙන යන බඩ ඉරිඟු තම්බන අය දිහා බලලා සුසුම් හෙලුවා..

තෙහස් අයියා එක සීරුවට ඩ්‍රයිව් කලා.. බඬ ඉරිඟු කරත්ත පාස් කරන් යද්දි එන සුවඳ ට මගේ කටටත් කෙල උනද්දි මම තෙහස් අයියා දිහා බැලුවා..

" අරන් ඕනිද.. "

තෙහස් අයියා ඉස්සරහම බලාගෙන කියද්දි මම හිනා වුණා.. ඉර අවරට ගිහින් යාන්තමට නුවර අහස කළුවර වුණා.. තෙහස් අයියා එක යායට වැවුණ ගස් අතරින් ඇදෙන පාරේ කොණක බඬ ඉරිඟු කරත්තයක් ළඟ වාහනේ නතර කරලා වාහනෙන් බැස්සා.. මාත් බැහැලා එයා ළඟින්ම ගිහින් හිට ගත්තා..

" අපිට බඬ ඉරිඟු කරල් දෙකක් දෙනවද " 

හෝඳලම දිය වුණ සරමට අත් දිග ඇඟටත් වඩා විශාල කමිසයක් ඇද සිටි ඒ මහළු මිනිසා කහට බැඳුණු දත් ටික පෙන්නලා බොහොම යටහත් පහත්ව අපි දෙන්නා දිහා බලලා හිනා වුණා..

යාන්තමට වේලුණු බඬ ඉරිඟු කොලේකට විශාල දුම් දමන බන්දේසියෙන් බඬ ඉරිඟු කරලක් තියලා මට දික් කලා.. මම ඒක අතට ගත්තම තව එකක් තියලා මට ම දුන්නා.. මම ඒ දෙකම අතට අරන් තෙහස් අයියා දිහා බැලුවා..