قلوب أرهقها العشق 🇲🇦 (مكتملة )

الجزء 18

🖤الجزء  171🖤

خلصات و خرجات و زينب تابعاها من اللور و كتمسح فدموعها ؛ أما منانة عاد بدات كتسترجع الكلام اللي كانت تقول ليها خنساء من ديبار على قبل زينب ...

🔙فلاش باك

خنساء:  غانقولك واحد الحاجة  و ما ديريهاش من قلة الصواب ، زينب نتي درتي فيها الخير و جبتيها  من العروبية بعد ما ماتت ختك اللي هي خالتي خفتي عليها من مراة باها تكرفص عليها  الله يجعلها فميزان حسناتك و لكن أ مي  البنت جبتيها منين كانت كتقرا فالتاسع ياك و دابا عندها الباك يعني ربع سنين و فكل عام كتمشي تحفظ مع صاحبتها و تبات معاها  داكشي اللي عايشاه مع صحاباتها ما عايشاه معانا و كن غير كانت كتجيب شي معدلات عاالية هي فكل عام كتجيب عشرة وااقفة  واش هادشي جايك طبيعي

منانة: شوف أ بنتي زينب مربية و غير نية و حتى صاحبتها اللي كاتمشي عندها كنعرفوها مزياان  لا هي لا ماماها و زايدون بلا ما تبقاي دخلي ليا لراسي هاد الافكار البنت راها كبيرة و عارفة راسها اش كدير و زايدون راه باباك مرة مرة كنشوفو ما حاملهاش حيت زايداه فالمصروف و نتي عارفة باك مقشاش،  مزيان نيت تمشي عند صاحبتها منها تستافد و منها باباك يبقى على خاطرو

خنساء مررات يديها على وجهها بقوة الفقايص و قالت ..
خنساء: انا ماشي سوقي ما غانعاودش ندخل بيناتكم المهم انا غير قلت  حسبوني غير هبيلة  المهم تصبحي بخير

🔚🔚 نهاية الفلاش باك 

وصلو للعمارة فين ساكنة الياقوت طالعة منانة فدروج و كتحس بدوخة و دنيا كتطيش بيها ما بقاتش قادرة توقف على رجليها خيبات أمالها لدرجة كبيرة  شنو دارت ليها خالتها من غير انها رباتها  و حسباتها وحدة من بناتها هادشي باش تجزيها تجيب ليها العاار لحد ساعة مازال كتقول واقيلة كاين شي غلط و لكن خبر بحال هاكا امبوسيبل يغلط فيه طبيب ....

حلات ليهم ياقوت الباب بعدما دقات منانة فالباب ..

ياقوت :امدرا شنو قال ليكم الطبيب

على إثر هاد الجملة طاحت منانة على طولتها الشيئ اللي خلاهم يتغاوتو بجوج بيهم ...

ياقوت : ويييلي مي مااالك

زينب : خااالتيي

ياقوت : عاونيني ندخلوها ويلي شنو وقع ليها ؟؟

زينب :م..م..ماعرفتش

تعاونو دخلوها لداخل و هي ساايخة و سخفانة ؛ ياقوت فالبلاصة رشات عليها الماا  باش تفيق و ما هي الا بضع دقائق حتى فتحات عينيها قابطة فقلبها  كتنهج و زينب  كتبكي و تقول شي ما بكاتو و ياقوت قابطة ليها فيديها مخلوعة عليها ...

ياقوت: مي مالك باش كتحسي ما تخلعيناش عليك عفاك [ حلات ليها درة باش ما تزيدش تخنق ]

منانة ساهية فالفراغ و ما كتقول والو و كلام طبيب كيتكرر ليها فودنيها لدرجة بدات كتبكي و تشهق و ياقوت ما عارفاش مالها عكس زينب اللي عارفة و فاهمة كلشي  ما كرهاتش تنتاحر باش تهنى من هاد تأنيب الضمير اللي تايكل فيها كي العافية ...