قلوب أرهقها العشق 🇲🇦 (مكتملة )

الجزء 1

لكي فقط
مازال كنحاول ننساك و نتوقف على حبك مازال كنحاول نمحي صوت ضحتك وشكل ابتسامتك من الذاكرة مازال كنتعهد لنفسي كل يوم قبل مانعس أنه آخر يوم غادي نفكر فيك وغانتوحشك !
مازال كنقلب على اسباب جديدة تخليني ننساك ولكن ذكرياتي السعيدة معاك كتوقف قدامي كلما حاولت وكتعاود ترجعني لنقطة البداية مازال كنحارب نفسي كل دقيقة كل ثانية باش نسا ريحتك حروف سميتك وصوت خطواتك ..
مازال غاضب من نفسي ومن القدر اللي خلاني نبغيك من بين نساء العالم مازال كنقلب على حب آخر يخليني نسا تفاصيل حبك ولكني كنصطادم بيك فكل امرأة تلاقيتها حيت كتفكرني فيك او لا كنكرهها حيت ماكتشبهش ليك
مازال كنحاول نساك كيفما واعدتك مازال كنسول نفسي
على شنو كيميزك وكيخليني مقيد بيك كنحس براسي عاجز باش نتخلص من لعنة السحر ديالك
مازال كندعي الله نتخلص من حبك ونتحرر منو بغيت نرجع نفسي قبل مانتلاقاك مازال كنقاتل ضعفي إتجاهك كنكتم صوت قلبي اللي كيصرخ بأعلى صوتو باغي يرجع ليك مازال كنحبس الدمعة اللي ماخليتهاش تغادر عيني كنتحرق من لداخل حيت البكاء ما تخلقش لرجال ما زال كنحاول بجهدي كامل ولكن على ما بانلي بدون جدوي !
مازال عاقل فاش اول مرة جات عيني بين عينيك كان خاصني نشوفك مثلك كمثل الآخرين تجاهلتك بزااف كأنني ما كنشوفكش امامي أو كأنكي مازال ماتخلقتي تجاهلت اشتياقي ووحشي ليك فكل ثانية كنت كنتقاتل مع نفسي ولكن فهاذ اللحظة وبكل وضوح وبكل هدوء كنعلن بلي خديتي بلاصة كبيرة لداخل فقلبي وتوسعتي و خديتي مني روحي وكل خلية فجسمي ولات كتنادي بإسمك كيفاش وقع والله ما عرفت ولكن الحاجة اللي عارف هو انا اللي عزلت نفسي عن الحب لسنين طوييلة جيتي فلمح البصر انتاشلتني من عزلتي كنتي بحال اليد اللي كتمد ليك فاش كتكون كتغرق بحال قطرات الشتاء اللي كتجي بعد سنين طويلة من الجفاف عارفاني ماكنعرفش نعبر على شنو كاين لداخل فقلبي حيت نتي عارفة شنو عشت ولكن ماعارفاش بلي امام عينيك الحروف كيخونوني وماكنبقاش عارف نركب جملة مفيدة بحال شي طفل صغير ماكنبقاش عارف شكون انا كأنكي كتلوحي عليا تعويذة خاصة بيك بخلاصة قلبي أصبح مرهق بعشقك 💔....
✨💕

💞 قلوب أرهقها العشق 💞
🎵🎶🎼 تمنيت شي ولد ناس قاري زين و داير لابس
الطوموبيل و دار بالعساس ما فيه لا صداع لا نكَير
يتهلا فيا يحنا عليا نقرة يغبر فيها نحاسي ...
فيقي يا بنت ناس باركة من الاحلام و كثرة الكلام لا تفوتك الايام
فينا هو ولد ناس اللي نلقا فيه كل ما بغيت فينا هو نغني عليه ديتو ديتو و الله ما خليتو ....🎵🎶🎼
حاطة راسها على زاجة ديال الطوبيس و كتسمع لكلمات الاغنية عن طريق ليزيكوطور اللي حاطة فودنيها 🎧و كتبتاسم و كتدندن مع كلمات الأغنية اللي كتعجبها و ساهية فطريق و كتشوف فطوموبيلات الغاديين و الجاايين كتشوف طوموبيلات فالأشكال و الألوان و الانواع من المخرششة للمجهدة و لكن اللي كيلفت إنتبهاها أكثر هو نوع سيارات الفاخرة من رانج روفر و بورش و كاط كاط الخ..
❣❣❣❣❣❣❣❣❣❣❣❣❣
طوموبيلات فاخرة تمنات شي نهار تركب فيهم كيبقى حلم عندها و ممكن شي نهار يتحقق على الأقل عندها أحلام و عندها أهداف باغا توصل ليهم ما كرهاتش حتى هي تمتالك مثل هاد السيارات اللي كتشوف و تكون حتى هي عندها فيلا و حياة رفاهية و تسافر و تمشي فينما بغات و تاكل فأفضل المطاعم و تلبس الماركات الغاليين و تعتامد على راسها و لكن هادشي باش غايتحقق ؟؟ هذا هو السؤال اللي كيطرح نفسو ..
واش الا بقات كتحلم و جالسة فبلاصتها واش غاتقدر توصل لشي حاجة ؟؟ ياك كيقولك اول خطوة باش تحقق احلامك هو تستيقظ من الحلم و تبدا تخدم عليه و توضع الخطط و الاهداف الصغيرة البسيطة باش توصل للحلم الكبير اللي بين عينيك و كيبقا المثل الشهير اللي كنقولو حنا المغاربة هو قطرة قطرة كيحمل الواد ما كايناش شي حاجة كتجي دقة وحدة من غير الموت طبعا ...
اي حاجة بغيتي توصل ليها خاصك تجزأها و تفكر فأسهل الطرق اللي تقدر توصلك ليها و كتبقى احسن حاجة باش تدير الفلوس و تحقق داكشي اللي كتطمح ليه هو تخدم فهاد البلاد السعيدة ..
كلمة خدمة او شغل هدا الكلمة اللي ممكن تنقدك من شحال من حاجة كتعيشها هاد الكلمة اللي ولات بمثابة وحش بالنسبة لكثير من الشباب شحال من واحد ما كيلقاش الخدمة كيكتآب و كيدخل فواحد القوقعة منعزلة عن العالم و كيبداو الأقوال الشهيرة المعروفة {هاد البلاد ما عطاتنا والو } { هاد البلاد واخا تعيا تقرا وتحفي دماغك والله لا لقيتي شي حاجة } {هاد البلاد كيخدمو فيها غير بباك صاحبي } و زيد و وزيد من الاقوال اللي كيرسمو من خلالها لجيل الصاعد بلي المغرب مفقودة فيها الخدمة و كيطيحو ليك اليد مع رجل و كتولي تكره البلاد و كتولي تكره راسك و تكره دوك السنين د القراية اللي ضيعتي فالقراية اللي ما دارت ليك والو ... ولكن بلاتي واش فنظركم الله غايضيع دوك السنين ديال التعب ديالك ؟؟ أكيد ما حدك كتاخد بالأسباب عمر ربي الحبيب يخيب العبد ديالو ياك كيقولك سبب يا عبدي وانا نعينك حتى واحد ما عارف شنو مخبي ليه القدر ...
❣❣❣❣❣❣❣❣❣❣❣❣
تنهدات و طفات التيليفون اللي كتسمع من خلالو الموسيقى ...وحيدات ليزيكوطور من ودنيها و دارتهم فحقيبة اليد اللي حاطة حدا رجليها فالارض ...
حولات نظراتها ل cv اللي هازة فيديها فيه الاسم و النسب و المهارات و القدرات ديالها مرفوق بصورتها فجنب كان آخر cv بقا ليها فيديها ...حولات نظراتها لصباط الاسود اللي تقطع بقوة الدوران على الشركات اللي كتقيل تحط فيهم cv ديالها لعل و عسى تلقا شي خدمة رجليها طابو ولا هاد الخدمة بغات تبان...
عندها إجازة فعلم النفس و ما قضات ليها والو كتقيل تدور ما خلات شركات د الخياطة ما خلات شركات د الكابلاج ما خلات اطباء نفسانيين ما خلات بانكات ما خلات محلات د الحوايج ما خلات فين قلبات ولكن واااالو الخدمة الوحيدة اللي قبلات عليها هي فام دوميناج فواحد المحلبة و مارضاتش تخدم فيها و حتى عائلتها ماخلاتهاش مايمكنش سنين د القراية و تخدم فام دوميناج واخا هو مافيها حتى عيب مادامها كتخدم بعرق جبينها و خدمة شريفة راه ناس معيشين عائلات من هاد الخدمة و تحية ليهم و لكن فالاخير فاش ما لقاتش قررات تخدم فيها قالت غير تبريكولي على ما يسهل الله و لكن ما تفاهماتش مع دوك ناس و خرجات من عندهم و هاهي رجعات لنقطة صفر من جديد رجعات تقلب كيفما العادة ...