يدها على ثغرها وخوف الدنيا بصدرها وتتكلم مع نفسها :ياربي وش سويت انا الله يرحمني ياربي ساعدني الله يلعنك ياابليس اوووف اخذت جوالها ودقت على ايمان بس ماردت عليها نزلت الجوال من يدها وهي تدور بالصاله عيونها على خطواتها بالارض رفعت راسها من سمعت جوالها يدق مشت وشافت ايمان تدق اخذت الجوال وهي ترد وتنطق بخوف : ايمان الحقيني سويت مصيبه
خافت ايمان من صوت هيام ونطقت : وش فيك وش سويتي !؟
حطت اصبعها بثغرها تعض عليه : حرقت بدلة نايف
جلست ايمان على طرف الطاوله ونطقت
بستغراب : ايش ؟حرقتي بدلته !!!منجدك انتي !؟؟
تاففت هيام: اي والله تكفين ايمان بموت خوف
وضحكت ايمان ونطقت وسط ضحكتها : منجدك ولا تمزحين شلون حرقتيها
جلست هيام وهي ترد عليها: ماادري انا من الصباح اخطط عليها بس أكتشفت اني ماني قد الشيء الي سويته
ارتفع ضحك ايمان عليها : هيام والله منتي صاحيه لا انتي ولا هالنايف
عضت شفتها تكتم خوفها : ايمان بلاش ضحك شايفه حالتي اعطيني
حل باقي كم ساعه وياذن الفجر وش اسوي بموت وربي بيذبحني
وقفت ايمان تمسح دموعها من كثر ماضحكت عليها : طيب ماعنده
غيرها معقوله .."
هيام : ماادري يابنت مافي الا هي
ابتسمت ايمان ونطقت : اسمعيني هو بيعرف بيعرف عاد زوجك ذا مافي شيء يتخبى عليه بس اسمعي اذا عرف لاتبينين له انك خايفه خلي الوضع طبيعي روحي نامي الحين وقومي قبل الفجر سوي فطور وقولي له لايداوم اليوم وانك تعبانه ماعندك حل الا تفاولين على نفسك وبعدين نشوف لك حل
تنهدت هيام : انتي دلخه بيوديني المستشفى واذا رحت وقالو
مافيك شيء وعرف اني كذابه وش اسوي بعدها ايمان نايف
ماينلعب عليه اعرفه
تاففت ايمان ونطقت : حسبي الله على عدوك وانتي ليش تحرقينها تشبهين فستانك ببدلته حيوانه انتي !
وبكت هيام وسمعت ايمان صوت بكيتها ونطقت ايمان: هيام منجدك تبكين خلاص اسف احسن ادبيه علشان مايعيدها معليك هيام مو يحبك خلاص بيسامحك لاتبكين هيام تكفين "..
تاففت بضيق ونطقت :وش اسوي فطور
وضحكت ايمان بعلو صوتها : اي شيء وسوي اشياء دسمه
علشان يتخدر ويكنسل الدوام
وضحكت هيام وسط بكيتها : يلا بروح انام وبعدين بقوم قبل الفجر و
اشوف وش اسوي
ايمان : يلا روحي وقولي لي وش يصير معك
هزت براسها ونطقت لايمان : زين يلا باي
قفلت منها وقامت تطلع الغرفه وشافته نايم مشت تنسدح جنبه رفعت يده من على صدره ودخلت تحت ذراعه تنام ....."
~<<على الفجر >>~
قامت وهي تنزل المطبخ وفتحت جوالها تدور وصفات تسويها رفعت شعرها واخذت المريله تلبسها وبدات تطبخ خلصت وطلعت الصاله تجهز الطاوله راكنه خوفها على جنب رتبت الصحون وطلعت الحوش وهي تاخذ ورد تكمل فيه طاولتها انتهت وزفرت بضيق واخذت جوالها تصور الطاوله وارسلتها لايمان وكتبت لها : ادعي لي نزلت الجوال وفكت المريله ونثرت شعرها وطلعت الغرفه ومشت له ودخلت الغرفه وشافته يصلي وقفت عنده تنتظره يخلص سلم ورفع راسه لها ومشت له وحطت يدها على كتفه
ونطقت : تقبل الله ومشت تجلس قدامه
ونطق نايف: منا ومنك وش فيك اربع وعشرين ساعة صاحيه نوم
الايام الي راحت وين راح !!
بلعت ريقها ورسمت على وجها ابتسامه ونطقت : نمت يلا تعال ننزل
سويت لك فطور يحبه قلبك .."
رفع حاجبه نايف بصدمه ونطق : انتي ؟!!!
ميلت شفايفها ونطقت : اي انا ليه في احد عايش غيرنا هنا
وابتسم نايف ونطق: من وين شرقت شمس اليوم ماعرفتك وانتي تتطبخين !
عضت شفتها بربكه: يوه يانايف وش فيك عادي ترا وبطبخ لك كل يوم يلا
ضحك وهو ينزل معها فتح عيونه على الاخير من شاف الطاوله ونطق بصدمه : ييييييههه وش هالحركات هذي!
ابتسمت هيام ونطقت : ايش رايك ؟!
ابتسم نايف لها ونطق : صراحه ماتوقعت لك هذا يطلع منك
تغيرت ملامحها ونطقت : وش قصدك !
ضحك نايف ونطق وسط ضحكته: ماقصدي شيء بعدين تونا حلوين يلا
تعالي ناكل لاني بطلع ماعندي وقت ."
مشت معه وجلسو وحطت له اكل بصحنه اعطته الخبز واخذه منها
هيام : يلا كل واعطني رايك
اكل نايف ورفع حاجبها لها : انتي متاكده انك انتي الي مسويته ؟!
هزت براسها هيام ونطقت: ايه وش فيك مو حلو !
اخذ يدها نايف يقبلها : ياشيخه حرام عليك بطني انتهى من اكل
المطاعم ليش ماطبختي من زمان ""
ابتسمت هيام ونطقت: بالعافيه خلاص كل يوم بتكون هالطاولة قدامك
ابتسم نايف لها وكمل ياكل وهو يسولف لها وهي ميته خوف رجع ظهره
على الكرسي وحط يده على بطنه من شبع ولف لها : تسلم يدك ياحبيبتي انتي صراحه كل شيء كان بيرفكت حبيت نفسك بالطبخ .."
هيام : الله يسلمك وبالعافيه عليك
لف نايف على جواله من كان الفريق سالم يدق عليه اخذ جواله يرد عليه
تنحنح نايف ورد : سم طال عمرك
الفريق سالم: نايف نص ساعة وانت عندي يلا لاتتاخر
نايف : تمام يلا جايك
قفل منه ولف عليها : يلا انا بروح
بلعت ريقها ومسكت يده: نايف عادي ماتروح اليوم !
عقد حاجبه نايف ونطق : ليه وش فيك ؟!!!
حطت يدها على نحرها ونطقت وسط توترها : احس اني تعبانه اليوم ودي تجلس اخاف يزيد التعب وانت مو هنا ."
قرب منها ونطق بخوف عليها: وش فيك تعبانه من ايش ؟!
تلعثمت ونطقت : ماادري بس تاففت من ماقدرت تطلع كلمه على بعضها
نايف: شفيك هيام انتي مو طبيعيه اليوم ايش فيك يابنتي تكلمي المشكله مااقدر اليوم لازم اداوم ينتظروني عندنا تفتيش بالقرى وبتاخر اليوم
يمكن مااجي الا بالليل..."
غمضت عيونها ورجعت تناظره : نايف انت تحبني صح يعني لو سويت شي غلط ماراح تزعل صح ؟؟!!
تغيرت ملامح وجهه من المقدمات الي يسمعها منها ونطق : هيام وش هالاسئلة اكيد احبك ليه عندك شك بمشاعري لك هيام تكلمي وش انتي
مسويه بسرعه ماعندي وقت ."
وقفت ووقف نايف معها قربت منه وهي تحضنه عقد حاجبينه بخوف من تصرفاتها الغريبه ونطق : هياممم !!!!!
رفعت راسها وتجمعت الدموع بعيونها: نايف حرقت بدلتك
ناظرها بصدمه على ملامح وجهه ونطق : ايشششش!
رفعت يدها تبعد خصلات شعرها عن وجها : حرقتها نايف حرقتها كنت مقهوره من حرقت فستاني لف راسه من شاف الجوال يدق من سند ابعد عنها وهو يرد عليه ويركض مع الدرج : سند جيب لي بدلة معك
سند : ايش ؟؟؟؟
نايف: ياحمار جيب لي بدله بدله
ونطق سند وسط استغرابه : بدله ؟ ليش ! وين بدلتك
دخل الغرفه وهو ياخذ اغراضه ونطق وسط حوسته : ياحيوان اترك البربره الزيادة عنك الفريق سالم بيولع فيني وفيك اخلص علي جيبيها عند المركز بلبسها هناك اعجللللللل قفل بوجهه ومشى يطلع من الغرفه وصرخ بعلو صوته يناديها ونزل راسه من فوق سور الدرج : الرتب والنجوم وينها حرقتيها حتى هي قامت وهي تطلع له ومشت له ونطقت: بالدرج
دخل الغرفه : تعالي طلعيها بسرررررعه
مشت تدخل وراه وفتحت الدرج واخذتها وطلعت له مشى لها واخذها من يدها ونطق وهو ياخذها : طيب هيام طيب ماراح تخلين شغل وحده بوحده
ذي راجع لك فتح الباب وهو يسرع بخطواته وركب السياره وهو يحرك من عند الباب وصل المركز ونزل من السياره ووقف سند ونزل والبدله بيده اخذها نايف وهو يدخل مكتبه لبس وخلص ودخل سند ومن شاف نايف ضحك ولف عليه نايف واحتدت نظرته عليه : ودك اكفر فيك انت الثاني
بعدين كم وزنك انت ؟!
مسح على وجهه سند ونطق : يخوي انت عريض بزياده ولا انا وضعي تمام الحين ممكن تقولي لي وش صار معك
مشى نايف لطاوله يركب نجومه على كتفه : حرقت فستانها وردت
الحركه في البدله .."
وانفجر سند يضحك وابتسم نايف من ضحكته ونطق سند : يخوي انتو صاحين في شيء فئ عقلك انت وياها وش هالحركات خلصت فعالياتكم ورجعتو على الملابس وش ذنبها طيب الملابس !
رفع راسه نايف له : سد نحرك وامش طلع وسند وراه ودخلو مكتب الفريق سالم ورفع عيونه لهم من دقو له تحيه ووقف يردها لهم ونطق
بحده : الساعه كم يانايف ؟!
نزل عيونه نايف لساعته ونطق : سبعه وعشر ياطويل العمر
وهز براسه الفريق سالم وهو يمشي قدامهم ويده خلفه : سبعه وعشر
انا متى قلت تجي همم ؟!
تنحنح نايف ونطق: صار لي ظرف واجبرني اتاخر عن الوقت
مشى له الفريق سالم ورفع حاجبه له : صار لك ظرف ؟! والشغل والناس والعسكر والضباط ماعندهم ظروف صح انت الوحيد الي عندك ؟ وش العبط هذا انت وياه ارتفع صوته وهو يتكلم عليهم انا قلت لكم وحرصت عليكم ماتتاخرون لعب هذا عيال هذا ولا وشو ؟!!!
ونطق سند : ياطويل العمر صار ظرف صعب ولا تعرفنا ماعمرنا تاخرنا
هز براسه الفريق سالم : ماراح يعدي الموضوع وحط في بالك انت وياه المكان الي حضرتكم تشتغلون فيه اهم من ظروفكم مشى لطاولة المكتب واخذ سلاحه يحطه بخصره ومشى من بينهم وطلع وطلعو يلحقونه ومشى سند
جنب نايف ونطق :انا وش دخلني يفصل علي ليته يعرف
وش هالظرف الصعب ...""'
حط يده نايف ورا ظهر سند وهو يقرصه : جعلك الوجع امش وانت ساكت .."
جالسه على طرف السرير من تركها وطلع يدها على بطنها عضت شفتها وهي تتكلم مع زهر : ان شاء الله ماراح يقول لي شيء وقتها بنشوف اذا بابا يحبني صدق ولا لا قامت وهي توقف عند الدريشه تناظر حديقتهم المتواضعة وتناظر الورد ابتسمت بطرف ثغرها وهي تفكر واول انسانه جت ببالها مرام ونطقت : مرام لي شهور مارحت لها اوووف نسيت منها مشت وهي تدخل تغير ملابسها لبست عبايتها ولفت حجابها واخذت شنطتها ونزلت ركبت سيارتها ومشت لمرام وصلت وهي تنزل من السياره وطلعت لهم دقت الباب وثواني وفتحت لها مرام ودخلت هيام تسلم عليها : شلونك مرام ووشلون عيالك ؟
مسكت اكتاف هيام وهي تنطق : اشتقنا لك هيام وينك طول الشهور الي راحت كنت اسال ايمان عنك وقالت لي انك بالشرقيه
ابتسمت لها هيام : اي والله صارت لي ظروف بس رجعت من شهر تقريبا
مرام : افا شهر وماجيتي
هيام : انشغلت مرام مره
هزت براسها مرام ودخلت ودخلت وراها هيام وجلسو بالصاله وطلعت ربى ومن شافت هيام ركضت لها تحضنها وشدت عليها هيام: هلا ياهلا
ربى : اشتقت لك مره
مسحت هيام على شعرها ونطقت : ياعمري ياربى اكثر والله كيف الدوام معك
هزت براسها ربى : الحمدلله زين وانتي وشلونك
ابتسمت لها هيام : مو شفتك صرت بخير
رجعت ربى تحضنها وضحكت هيام ومرام معها وابعدت عنها : أشتقت للورد
إتسعت ابتسامة هيام : واشرت على عيونها ابشري من عيوني الثنتين اوديك له
مرام : ربى تبين تروحين مع هيام قومي خلصي الماده علشان
اختبارك بكره ولا مافي روحه
وميلت راسها هيام تأييد كلام مرام : تبين ورد ذاكري زين
قربت منها ربى وهي تبوسها على خدها : ابشري من عيوني
ابتسمت هيام: تسلم لي هالعيون الحلوه
بادلتها الابتسامه ربى وقامت تدخل الغرفه ولفت هيام لمرام
مرام : هيام ودي اطلبك شي
قدمت هيام بجلستها : قولي مرام اذا اقدر عليه ابشري
تلعثمت مرام ونطقت : ابي اروح لنمر
وتنهدت هيام من تذكرته وكيف انه كان جزء من انتقام
خالد: بشوف بكره اذا امداني وديتك
هزت براسها مرام ورجعت ظهرها هيام على ورا وقامت مرام تسوي لها قهوه وهي تفكر لو عرف نايف بنمر وعائلته الي صارت مسؤولة عنهم وش ممكن يكون ردة فعله وهي تعبت من الماضي الي جالس يلحقها بكل مكان
تنهدت بضيق من هالماضي الي رفض ينتهي .....
~<<بعد ساعات مرت عليهم بالطائرة وصلو روسيا موسكو تحديدا >>~
طلعو من المطار بعد ماانتهو من الجوازات وصلت سيارتهم وركب عزام وكنوز جنبه ومشو على الفندق ودقايق ووصلو ونزلو ودخلو الغرفه فتح البلكونه وطلعت تناظر الاجواء والثلج بكل مكان وبروده الجوو ابتسمت وهي تعشق اجواء الشتاء ابتسم عزام وطلع وراها يناظرون
الفيو لف لها ونطق : نطلع ؟!
هزت براسها له ودخلت تلبس وهو نفس الشيء وقف يلف سكارفه ولبس قفلزه الجلد وجاكيته وكنوز جاكيت جلد ابيض واسود وكاب اسود وبوت طويل لف لها ونطق : خلصتي ؟
اخذت شنطتها وهي تنطق له : خلصت
وابتسم عزام من شاف لوكها الشتوي واتسع مبسمه اكثر ونطق
وسط اعجابه : ياحلوك وحلو ستايلك حبيت صراحه
ابتسمت كنوز ومشى لها ومد كفه لها :تسمحين لي
بلعت ريقها وهي تناظره وهو يناظرها ونطق : ردك بيطول تجاه كل شيء !
مدت كفها له وابتسم عزام وطلع معها وصارو يمشون بين الثلوج والاجواء البارده كفها بكفه وهي تناظره وهو يسولف لها تحت صمتها ونظراتها له ودها تكسر كل الحواجز الي بينها وبينه بس مو قادره كل ماقربت منه تلقى نفسها راجعه عشرين خطوه ورا صدت بعيونها عنه وهي تناظر المكان ابتسمت باعجاب ولف لها وتنهد عزام وسكت من حس انها ماراح تتجاوب معه ."
بغرفتها والطفش ماليها ميلت شفايفها بضيق وهي تاخذ جوالها وتدق على ضحى وثواني وردت عليها ونطقت شروق : ضحى
ضحى : هاه حبيبي
شروق : تكفين ضحى ملل ايش هذا
وضحكت ضحى ونطقت وسط ضحكتها : والله ياروحي صار فيني نفس
الي صار فيك بعد ماراحت هيام
تاففت شروق وهي تنطق : ودك نطلع ولا تجيني !
مرت ضحى من عند الة البيانو وهي تمرر اناملها عليه من بدايته لنهايته وتطلع غرفتها ونطقت : شروق انا اقول دام عندنا جامعه نروح نشتري اغراضنا ومره وحده نغير جو بدل جلست البيت .."
شروق : اي والله يلا تمام بقوم اتجهز
ضحى : يلا زين قفلت منها وقامت تلبس وضحى نفس الشيء خلصت شروق وهي تنزل وشافت امها واخوانها بالصاله ودخلت عندهم
ونطقت : فهد انت ولا نهار ابيكم تودوني المول
نهار .: مالي خلق توي راجع من الجامعه وتعبان خلي فهد يوديك
لف فهد عليه ونطق : انت أعذارك ماتخلص وش فيها لو وديتها
تاففت شروق: انتو وبعدين معكم انت وياه اخلصو علي البنت تنتظر
رفعت راسها الجوهره : بنت مين ؟!
لفت عليها شروق : ضحى بنروح نشتري اغراض للجامعه
ورفع عيونه نهار لشروق : زين يلا انا بوديك
ولفت الجوهره لنهار : انت ماتستحي ابي اعرف وش طينتك انت رافض تودي شروق ومن عرفت انها ضحى الي بتروح معها نطيت تبي ارجع اعيد تاهيلك من اول وجديد ولا كيف انضبط يانهار الخفه الي فيك مو عاجبتني
رفع شعره عن وجهه ونطق : يمه وش خفه ماني خفيف بعدين
مشاوير شروق كلها انا اؤديها وش هالفصله
ضحك فهد ونطق : تستأهل يلا قوم ودها وانت ساكت
وقف نهار وهو يطلع وشروق خلفه ركبو السياره ولف نهار
على شروق : وين تبين اي مول ؟
اصبر اشوف لضحى ورجعت تدق عليها وردت عليها ضحى
ضحى : هلا شروق
شروق : ضحى وين نروح
وقالت لها ضحى ولفت شروق على نهار تقول له :طلعتي ولا باقي
ضحى : لا باقي الحين بطلع
لف نهار لشروق :حطي سبيكر
رفعت حاجبها شروق : نعم ؟!
وبادلها برفعت الحاجب : وش فيك زوجتي ترا ونزلت الجوال شروق وهي تحطه سبيكر ونطق نهار لضحى : ضحى مين بيودك
عقدت حاجبينها ضحى من صوته : نهار ؟!
ابتسم ونطق : اي نهار قولي لي بتروحين مع مين !
وابتسمت تنطق : مع تاكسي السواق مو موجود
اخذ الجوال من يد شروق وحطه على اذنه : لا تروحين مع احد
بيجي اخذك يلا شوي كذا واطلعي ومد الجوال لشروق ....."
رجعت بيتها بعد ماودت ربى محل الورد ودخلت وطلعت غرفتها وفكت عبايتها وجلست على السرير وتنهدت بتعب وقامت تاخذ ملابسها ودخلت الحمام تاخذ شور وطلعت تجفف شعرها وجلست على طرف السرير وهي تسحب المنشفه عن شعرها ورمت نفسها على السرير تنام على نفس مخدته وابتسمت من داهمتها ريحته الممزوجه بدخانه وعطره ونطقت
وسط نعاسها : حيوان اكره هالريحه بس من كثر حبي له حبيتها نامي هيام نامي وراك حساب ابتسمت وغطت بنومها ...."
<<المول >>~~
وصلو ولف نهار عليهم :يلا وجاء بينزل معهم ونطقت شروق
شروق :وين تبي
نهار :كيف وين بنزل معكم
شروق :لا ياحبيبي بنات ونازلين نغير جو وننبسط انت وش تبي !
عضت شفتها ضحى من شافت ملامح وجهه
ونطقت : صدق خليك هنا يلا شروق
ولف نهار عليها : طيب ياحيوانه انا اوريك
ضحكو وهم ينزلون مسكت ضحى ذراع شروق ونطقت بضحكه : كانه زعل
لفت عليها شروق : اقول اسكتي وامشي حلوه ذي ينزل معنا يلا
دخلو وهم يدورون بالمحلات ونهار بالسياره مر الوقت عليه وهو ينتظرهم وتافف ونطق يكلم نفسه : سواق انا صح سواق نزل وهو يقفل
الباب ويدخل وهو يتلفت يدورهم .."
واقفه ضحى وشروق قدامها ونطقت ضحى : وش رايك بذا
شروق : اشوف اممم حلو بس مو مره اسمعي ضحى بروح اشوف لي شنطه وبجيك انا ماعاد ابي ملابس زين
هزت براسها ضحى وراحت شروق ووقف نهار عند باب المحل وابتسم من لمحها تنحنح ودخل ومشى وراها ونطق وهو يحاول يغير صوته : ياحلوه انتي الرقم لو سمحتي شهقت ضحى ولفت عليه وغمضت عيونها من شافته نهار وضحك هو : شدعوه ماتعرفين صوتي
فتحت عيونها له: وجع نهار خوفتني وبعدين من صار يقول
الرقم الناس صارت ترسل ايدروب !
رفع حاجبه نهار وقرب منها : نعم وش عرفك بالاشياء ذي ليه في
احد يرسل لك ؟!!!
بلعت ريقها ونطقت تحاول تخفي توترها من نظراته : لا بس اقولك يعني وجت شروق من وراهم ونطقت : ويع نهار وش جابك مو قلنا لك لاتنزل وخلك بالسياره لين نخلص
رفع ذراعه لها : تبغين ادخله بعينك اشتغل عند وجهك انتي وياها يلا قدامي
تكتفت ضحى ونطقت : نعم ! ماخلصنا بعدين تبي تروح روح بنرجع مع تاكسي ولا بدق على سواقنا
هز براسه نهار ونطق : يافله تراك زوجتي وذي اختي سواق مافيه حلوه ذي وان شفتك ياضحى رحتي مع سواق باقي ترحمي على نفسك ودخلي شعرك من قدام طالع وامشو قدامي يلا
تاففت ضحى وشروق معها : ليتك ياشروق ماقلتي له
شروق : اووف انا غبيه مالقيت الا نهار ايش اسوي الدنيا رمتني عليه
مشى بينهم يفصل بينهم بعد ماحاسب ونطق : شفيكم لذي الدرجه ماتبوني ولف لضحى يرضيك اجلس بالسياره
تغيرت نظرات ضحى له ونطقت : لا خلاص اجلس معنا بس خليك مودب
ضحك نهار ولفت عليهم شروق ونطقت : ويععععع انتي وياه ويع صدق
ضحك نهار وضحى معه وهي تناظرهم بقرف ونزل نهار لمستواهم ومد ذراعينه لهم ضحكو ودخلو يديهم ومشى فيهم وهو ينطق : بنروح ناكل جوعان بعدين على البيت انتي وياها بلا دلع ،تاففو وهم يمشون معه."
<<الليل الساعه ٩م >>
خلص من مهمته لليوم وطلع يركب سيارته وسند معه ومن ركب تافف بتعب وهو يفك بدلته تارك تشيرته الاسود عليه وتنهد براحه ونطق : حسبي الله عليك ياسند متتت وربي انفاسي انقطعت وش ذا البدله فوق ان
دوام اليوم زفت البدله ضيقه كمان ."
ضحك سند ولف عليه : واضح والله انك بتموت روح روح خذ لك بدله واسمع خلها بالسياره واذا جيت بتداوم البس في السيارة وفكنا
من الحريق ماصدقنا ندفى ."
ضحك نايف وهو يحك دقنه : يخوي ماتوقعت انها تحرقها
ضحك سند : ماهي بسهلة والله احسن خلها تربيك وبعدين
انتي ليش حرقت الفستان !
رفع حاجبه نايف له ونطق : لاتفلها بالاسئله لاحرقك انت بعد
ضحك سند ونطق وسط ضحكته: ياشينك انت وغيرتك الله يعينها عليك
لف عليه نايف بكل جسمه : انزل يلا انزل بسرعه اذلف
سند : تعقب والله ماجبت سيارتي حلو ذي انزل امش بس يلا
واخذ نايف دخانه وولعه وسحب منه وشغل السياره يحرك من عند القرى ونزل سند عند بيته ومشى لبيته وصل عند بيته ونزل واخذ بدلته الجديده معه ومشى يدخل و كانت واقفه عند الدريشه وبيديها كوب قهوتها ونزلت عيونها وهي تشوفه يدخل ركضت لسرير وحطت الكوب عند الكومدينه ورفعت المفرش ودخلت تحته وغطت نفسها فيه فتح الباب وطلع ودخل الغرفه وحك طرف شفته ومشى بتجاها ونزل عيونه لكوب القهوه وحط يده على الكوب وعض شفته يكتم ضحكته من شاف حراره الكوب وعرف انها صاحيه بس تمثل النوم مسح على خشمه وجلس جنبها على طرف السرير وسحب المفرش عن وجها ونطق : شوفي ادري انك صاحيه فقومي احسن لك ماردت عليه ولاحتى فتحت عيونها هز براسه واخذ كوبها يشرب منه وكمل كلامه: طيب واجهي اذا انتي قد الشيء الي سويتيه وكانت على حالها وضحك بدون صوت من شاف جفنها يتحرك ووقف يدخل غرفة الملابس وفتحت عيونها من شافت الباب تسكر وعقدت حاجبها ونطقت تكلم نفسها : هذا شفيه يمه خفت زياده وش هالبرود حطت اصبعها بثغرها ووقفت تمشي وشهقت من سحبها مع خصرها يحطها على الجدار غمضت عيونها وحط يده الثنتين يحاوطها من كل اتجاه يمنع خروجها ونطق بحده : ارفعي راسك وافتحي عيونك وحطيها بعيوني
بلعت ريقها وفتحت عيونها تناظره ونطقت بهدوء : نايف تعوذ من الشيطان تكفى نايف والله ماكان قصدي
وكان ثابت بوقفته وبتعابير وجهه ونطق : ياشيخه ! وش تبين توصلين له !
بللت شفايفها بخوف ونطقت : نايف خلصني سوي الي تبي وخلصني وش ذا مو معقوله وانا من امس وانا على اعصابي
ونزل عيونه يناظر نحرها وملامحها الي على حدتها لانت له : اي هيام انا كل شيء بسويه لك انت بترجعين تردينه لي ولا كيف !!
رفعت حاجبها له وسيطرت على خوفها ونطقت :اي والله عشان كذا احسب حساب تصرفاتك وحط ببالك كل شيء بتسويه لي ويزعلني برده لك يعني يانايف انا عايشه على مبدا وحده بوحده حتى لوكنت انت وبعدين يا حبيبي انت الي بديت فيها يعني حرقك لفستاني كان هذا رده وكذا تصافينا يعني مالك حق تزعل ولا حتى تسال عن السبب .."
هز براسه نايف ونطق: لا والله ودك بوجهي الثاني يرجع !
احتدت نظرتها له : رجعه اذا ودك بس لغيري مو لي تدري ليه ؟
ونطق نايف بتساؤل: ليه يالحبيبه الي يكسها الغرور ؟!
عضت على شفتها ونزل عيونه لثغرها ونطقت : لانك تحبني ولاني انسانه اخطي واصيب اغلاطي بعيونك صواب وانا الي اخلي الغلط بنظرتك صح يعني من الاخر ياابو الزهر وقفتك وانت تمثل الثقل قدامي ماتناسب سموك لاني اعرفك واعرف نظرة عيونك واعرف اني اخر امالك واعرف اني حديقه بنظرك واعرف انك ماتقدر تزعل علي وعلشان هذا كله قلبي التفت لك لاني اشوفك معي واشوفك مع غيري ولو الي سويته فيك سواه احد غيري كان شاف نجوم الليل بعز الظهر وقربت منه وهي تحط يدها على صدره ونزل نايف يده عن الجدار وكملت كلامها اي وش ناوي تسوي فيني!
سكت نايف والابتسامة على ثغره من كلامها الي ميه بالميه صحيح وهالغرور هلكه هلك ونطق : وش يعني وقفتك قدامي ذي الي افهمه انك
تشوفين نفسك مو غلطانه !؟
رفعت يدها ترفع شعره عن جبينه وذاب نايف من حركتها وهي تعرف وشلون تجيب راسه وتريح نفسها من هالخوف الي بداخلها منه وهزت
راسها بنفي : لا تدري ليش لن خياراتي بعيوني كلها صح مثل مااغلاطي بعيونك صواب
رفع حاجبه نايف: غرورك زاد عن حده والشي اذا زاد عن حده ينقلب ضده
ابتسمت وهي تنطق : غروري سبب حبك لي او بالاصح سبب خلاك تتعب وانت تدور كلمه تعبر فيها لي عن حبك لي ولا يا حبيبي ؟!
صد نايف بعيونه وحك حاجبه ورجع يناظرها : مو من صالحك
هالحركات عقابك بيكثر ."
وحطت يدها على شعر دقنه ونطقت : قدامك وبين يدينك وعيوني بعيونك هالحلوه شوف وش يطلع معك !
ضحك نايف وهز براسه وعرف انها جالسه تختبر صبره مسك يدها الي على دقنه وغمز لها بعينه ونطق : وش ودك اسوي فيك ؟!
خفق قلبها وصار ينبض بشدة ونطقت دون وعي : يعني شيء يحيي عروق قلبك ويكون عقاب لي على قولتك مو تقول ودك تعاقبني ، اول شيء يجي في بالك سويه وخلصني ."
وضحك بذهول منها ومن حالتها الغريبه وعبطها الزايد قدامه ومشى بخطواته ورجعت هي على ورا لين لصقت بالجدار تماما ونطق : ارفقي فيني يالمغروره ثقلي جالس يتبخر قدامك ."
ضحكت ونزلت راسها وهي تحط يدها تحت رمشها بالضبط ترفعه ورجعت تناظره : هو صار فيك ثقل من الاساس وبعدين هالثقل برا البيت مو عندي
ونطق نايف بحده : بنت !
وارتفع صوت ضحكتها : وش فيك عندك شك بالي جالس تسمعه !
وابتسم نايف وهو يدعي الثبات مايبي يسوي شيء ومصر انها تتعاقب منه
ونطقت هيام: ودك انا الي اعاقبك لان واضح عقابك
مطول وانا تعبت من الوقفه !؟
رفع حاجبه نايف ونطق: لاوالله وش بيكون عقابك !
ابتسمت بواسع ثغرها وحاوطت عنقه وهو تقبله بعمق سكنت ملامحه وابعدت عنه وعضت شفتها وهي تنطق : رضيت ياحبيب هيامه ؟
ناظر عيونها نايف و هز راسه بهدوء بعدم تصديق وابتسمت تميل براسها تناظره وتفهم شعوره ونطق بهدوء: انا إلي تعاقبت مو انتي
رفعت ذراعينها وغمضت عيونها تحضنه وتنهد بكل شعور داخله من استقرت في حضنه ورفع ذراعينه يحاوط ظهرها ويشدها لحضنه ونطق وسط هيامه لها : ماحبيت نظرتك اليوم وخوفك الملحوظ كان واضح لي لاتنكرين وش كنتي متوقعه مني اني ممكن اسوي ياشيخه تفداك البدله وصاحبها كنت عارف ان الموضوع مانتهى بنسبه لك وانك بتاخذين حقكك بس الاكيد مو عارف ان البدله بتكون الضحيه وبهاذي احب اقولك لعبتيها صح وانت تمونين على قلبي وعلى كل شعور داخلي احرقي ماصارت تفرق معي مو هالنار نارك راضي لانها صارت تمشي فيني بس يسعد لي ام من جابتك تكونين هيام لي اتركي البدله لاني خذيت الي يكفي اليوم من هالحريق ."
وضحكت هيام وهي تنطق وسط ضحكتها: وش خذيت من هالحريق !؟
ومشى يدخلون الغرفه وجلس على الكنب وسحبها تجلس على فخذه ويحاوط خصرها بيده ونطق : يعني لبست بدلة سند الي كتمت على انفاسي طول اليوم
وثانيًا فصله على كيف كيفك علشان التاخير ."
مليت شفايفها ونطقت وسط ندمها : بعمري عنك
وابتسم نايف ونطق : بعمرك العافيه
ونزلت بوجها تقبل عنقه وبلع ريقه نايف وابعدت عنه
ونطق هو : رضيت والله خلاص رضيت
ضحكت وهي تحاول تمليه بالرضى : تبي عشاء !!؟
وضحك نايف: ودي فيه اذا كان من تحت يدك
ابتسمت تاشر على عيونها ونطقت : قوم البس وانزل لي قامت عن فخذه ونزلت راسها له وحطت يدها على طرف دقنه ؛ لاتتاخر
ونطق نايف : الله لايبارك في الي يتاخر عليك
ضحكت وهي تطلع من الغرفه ووقف وضحك يحط يده على راسه من الخلف وينطق لنفسه: عز الله انك انتهيت يابو الزهر ولا من متى ترضى بكم كلمه مشى يدخل الغرفه يبدل ملابسه وسط ضحكاته خلص وهو ينزل لها ...."
<<بموسكو >>
يمشون بين الثلوج وهالمره حتى عزام ملتزم الصمت وكنوز معه وكل شوي تلف عليه تنتظر كلمه منه شدت على جاكيتها وجلسو بكرسي من الكراسي العامه الطويله ومن اظلمت الدنيا عندهم والبرد زاد جمعت كفوفها ببعض تدفي نفسها وعزام يناظر حولها ولف عليها وهو يثني ركبته ولفت كنوز عليه
ونطق : بردتي ؟!
هزت براسها بمعنى لا ونزل عيونه عزام ورجع يناظرها وهو ينطق : زين خليك هنا بروح شوي وبجيك
ونطقت بهمس : وين بتروح !
وقف عزام وسحب سكارفه وهو يحطه على عنقها : بجيك
لف وهو يمشي لكوفي من الكوفيهات ياخذ لهم شاهي
وهي مكانها وتناظر المكان رفعت طرف السكارف وهي تشمه وأبتسمت وهي تغمض عيونها من شمت ريحة عطره رفعت عيونها من شافت اثنين قدامها يمشون وسط هالثلج كفوفهم ببعض والضحكه مرسومة عليهم ومسموعه لها واللمعه بعيونهم شدت على الاسكارف تقربه اكثر منها وطلع عزام من الكوفي ومشى لها وابتسم بواسع ثغره من شافها دافنه وجها بالاسكارف حقه تنهد وسط ابتسامته العريضه ومشى لها وجلس جنبها ونطق: شاهي
ابتسمت وهي تاخذ الكوب من يده تشرب منه ...""'.،
حطت الاكل على الطاوله وجلست جنبه وهي تاكل معه ونطقت : نايف تصدق هاذي اول وجبه لي فطور الصباح كله واقف بنص حلقي
وضحك نايف ولف يناظرها : افاااا والله تخافين مني ؟!
اخذت صحنها تحط لها ونطقت : مدري حسيت اني بموت على
يدك امس اول مره اخاف من شيء اسويه .."
ابتسم نايف وهو ياكل ونطق : اجل ياهيامي لاتنعاد انا افدا وجهك الحلو هذا
ضحكت وهي تاخذ عصيرها تشرب منه ونطقت : على حسب اذا
انت ماسويت شيء لي ماراح اسوي شيء انا لك
ونطق نايف والابتسامة على ثغره: البسي زين وماراح يصير شيء
لفت عليه ونطقت: لا ياشيخ ترا فتحه بسيطه وشعري كان مغطي عليه
نايف: بسيطة! حتى لو شعرك مغطي وبعدين كل مناسبه لازم اشوفك قبل نطلع سالفه اني اشوفك اخر واحد هاذي مو جايزه لي "
رفعت حاجبها ونطقت: معليش والله اخاف المره الجايه انا الي
انحرق مو الفستان ."
وضحك نايف ونطق وسط ضحكته: على حسب بفكر بالموضوع
ضربته على كتفه بخفه ونطقت : وشو الي تفكر بتحرقني يعني !
هز براسه ياكد كلامه : اي نعم
ونطقت بصدمه : وجع نايف خير اشفيك انت !بجهنم حنا !؟
وضحك يرجع ظهره على الكرسي واخذ الملعقه ياكلها
ونطق : احرق نفسي قبل افكر اضرك بشي
وضحكت بنتصار وهي تنطق : اي ياحبيبي خل منطوقك هالمعسول ماينطق الا بالحب والكلام الحلو وفكنا من الحريق ماصدقت ادفى معك ولا ياعيوني انت !
حك حاجبه نايف وصد بعيونه ورجع يناظرها: شوفي احلف لك وابصم بالعشر بعد ان المنطوق المعسول عندك انتي واني رهينه لك انتي ومنطوقك وكلامك ورمشك وعيونك ومبسمك وحدة انفك وشعرك الاسود المنثور على اكتافك ونزل عيونه لخصرها ورفع حاجبه ياشر على خصرها وكمل كلامه وهالخصر
الي كنّه خـصر باقَة أزهار سهل على خمس اﻷصابع تضمه وسحب كرسيها يقربها منه وهو يقبل طرف ثغرها ورجع ظهره لورا وهو يتنهد وحطت يدها ترفع خصل شعرها فوق اذنها من احراجها منه خلصو عشاءهم وقامت تشيل الصحون وهو يساعدها ولفت عليه: المواعين ياحبيبي
ضحك نايف ورفع يده يحك حاجبه : ماتحسين قويه في حقي
رفعت حاجبها له ونطقت: انت تشوفها كذا زين انا بغسلها
مشى لها نايف : حطيها بالغسالة
هيام: لا مايحتاج كم صحن انا بغسلها
سحب الصحن من يدها وهو يغسل مكانها وعضت شفتها تكتم ضحكتها وجلست على الطاوله وتناظره خلص ومن لف شافها تصوره ومشى لها ونطق : تصوريني ياحيوانه ليه ؟
ضحكت هيام: هاذي الصوره لازم تكون اول صوره بالالبوم
رفع حاجبه نايف ونطق: لا ياشيخه قولي والله بس تعقبين يالحبيبه
وعضت على شفتها السفليه تناظر صورته ورفع راسه يناظر السقف ونزل بطوله لها ووجها يقابل وجهه ونطق: لاتعضينها لو سمحتي يعني
شوفني قايل لو سمحتي .."
ونطقت هيام وسط ابتسامتها : ليش !
ونطق نايف: لان النتايج مابترضيك يالحلوه
تاففت هيام ونطق هو قبل تنطق : عرفنا وفهمنا مو جبر ولا حتى تهديد
ودك تعرفين ليش ؟؟
ونطقت بتساؤل: ليش؟
قرب منها وهو يطبع قبلته على ثغرها ويرفعها بين يدينها يطلع فيها فوق دخل وهي بحضنه وحطها على السرير وقرب منها يرد على تساؤلاتها ووو...""
<<فندق موسكو >>
كانت جالسه على طرف السرير وتلف خصلات شعرها على يدها وعزام بالبلكونه وهي تناظره ونطقت بداخلها : حرام عليك كنوز وش هالي تسوينه مايتساهل هالمعاملة وانتي تعرفين ان ماله ذنب ليش مطوله السالفه قامت واخذت وشاح على اكتافها وطلعت له ووقفت جنبه ولف عليها
ونطق : اشفيك مانمتي
لفت له ونطقت : مافيني نوم
هز براسه ولف يناظر قدامه وكنوز تناظره ونطقت بهدوء: عزام وش فيك ؟
لف لها من سمع نبرتها الهادئة وقابل وجها : ودي فيك ياكنوز
وانتظرك ترفقين علي قبل اتهور ويطول زعلك اكثر هذا الي فيني
ونطقت بدون ادراك منها : تهور طيب وش تنتظر ؟
عقد حاجبينه بصدمه منها وبلعت ريقها من استوعبت كلمتها وحطت يدها على نحرها الي بدا يصعد ويهبط ودخلت الغرفه وسحبت المفرش وهو واقف مكانه ونطقت لنفسها : وش قلت انا وكل الي تسمعه حاليا صوت انفاسها شدت بيدينها على مفرشها من دخل ووقف يناظرها ونطق بضحكه : وش قلتي !!
تصددت بعيونها عنه وضحك هو من شاف توترها اثر كلامها الي نطقت فيه بدون أدراك منها وبلعت ريقها بخوف من سمعت ضحكته وبانت عروق نحرها اثر ربكتها ومشى عزام لها وانقبض قلبها وصارت تتنفس بسرعه لدرجه ان انفاسها كانت مسموعه له وجلس قريب منها ونطقت
وسط رجفتها: عزام ان..
قطع كلامها ونطق : صح اني انتظر كل حرف يطلع منك بس
الليله مابي اسمع شيء
اختل توازنها وفاض شعورها من تمدد ينسدح بحضنها يتوسد احضانها بلعت غصتها وحط راسه على صدرها ابتسم من سمع نبضات قلبها وحاس برجفتها ابعد عنها ورفع كفه لفكها يلف وجها له ونطق : ودك نقطع كل المسافات ؟!
سكتت كنوز ونزلت عيونها عنه وهز براسه عزام : الي افهمه انها زلة لسان !
ووقف عزام يبعد عنها ونطقت قبل يخطي خطوه: وين تبي تروح ؟
لف عليها ونطق بهدوء: اسف اني فهمتها شيء ثاني اعتذر من حضرتك ولف بيمشي ووقفت كنوز تتبعه ونطقت : عزام
تافف ولف عليها: شفيك كنوز شفيك وش تبين وصلت لمرحله صعبه معك ماادري وش تبين ولا ادري وش اسوي لك تعبت كنوز تعبت ايش الحل قولي لي وش مطلوب مني اسوي وترضين العيشه هاذي كنوز ماتناسبني
شبكت كفوفها ببعض وهي تنطق : ابيك ومو زلة لسان انا فعلا ابيك وودي انك تقطع المسافات شوفني قدامك واقول لك اخطي مسافاتك واقطعها
ونطق عزام بملامح جامده وثباته: اخاف اخطي وترجعين عشرين خطوه ورا
ونطقت كنوز بهمس : ماراح ارجع
ورفع حاجبه ونطق : وش يثبت لي كلامك ؟!
بلعت ريقها وسيطرت على رجفتها ونطقت : اقرب وتشوف بعينك
ونطق عزام يحذرها : كنوز ان خطيت خطوه ماني براجع
لين يصير الي ابيه متاكده من كلامك ؟
هزت راسها بالايجاب وهي تشتت انظارها ؛ متاكدة
قرب منها خطوه ووقف وهي قدامه وما تراجعت للخلف مثل عادتها وابتسم عزام :ملهوف عليك وابيك وضحك يكمل كلامه الدنيا برد وانا محتاج ادفى ودفاي عندك احتاج منك شيء واحد بس وهو انك تبادرين ومااحتاج مبادرتك افعال ابيها كلام بس هذا طلبي منك تقدرين تسوينه !!
سكتت تشتت انظارها ونطقت بهدوء: اي اقدر ودامك تبي مبادرتي كلام ابشر فيه انا ابيك و ابي قربك وابيك بدنيتي تبقى وابي منك اذا سكت تفهم سكوتي عزام تكفى انا اواجه مشكله بالكلام مااحبه عزام مااحبه بس بحاول عزام بحاول لاجلك اوعدك بحاول اشبعك كلام واغرقك حب واملي حياتك سعاده و اغليك واشريك بالغالي ولا ابيع وامشي دروبك ولو انها طويله انا احبك اي وشفت السوال الي كان بالورق من كتبت هل الحب كافي لتخطي ؟!!
ابي اشوف اجاباتك افعال لاني انا مايملي عيني كلام انت قادر تبادر لي افعال ؟!
كان ساكت ويسمع كلامها بقلبه فعلا كان يسمع بقلبه حروفها الي تنطقها ونطق : قادر كنوز قادر ابي وصالك الليله وبعدها بكون
قادر على كل شي تبينه "".
سكتت تناظره من امتلت عيونها دموع وهزت براسها له وقرب عزام يقطع كل المسافات كل الصبر كل الخوف وكل الزعل يحبها فعلا ويبي قربها ويبي يملكها ويكسر حواجز الدنيا معها منفرده بنظره عن العالم اجمع ، يحب صمتها بس بنفس يكرهه يحب صوتها وحروفها الي تعرف كيف ترتبها ومعه الحق يحب حروفها ويطلب منها المبادره بالكلام يحبها بشعور مايقبل المقارنه يحبها ولو انها كيان منفصل عن العالم يحب اختلافها وفعلا كنوز مختلفةً بكل شيء ثقلها مستفز احيانا له مثل ماثقته مستفزه لها قرب منها يطبع قبلاته عليها ويثبت لها انها ملكه وحده متوتره وخايفه وترجف بس كان متحكم بكل تصرفاتها مو قالت تبي مبادرته افعال ، جالس يثبت افعاله وصار الي يبيه واستسلمت له وهذا الشيء الي يبيه عزام وصارت له وصار لها ...".
فتحت عيونها بتعب وصعوبة وعقدت حاجبينها من صوت جوالها الي يدق وتافف ونطق وسط نومته : ردي فجر راسي
اخذت الجوال وفتحت عيونها من شافتها مرام تدق عليها وقفت وهي تقفل الجوال وتدخل الحمام تاخذ شور خلصت وطلعت ودخلت غرفة الملابس تلبس ومشت للغرفه تاخذ جوالها وتدخل فيه الغرفه ودقت على مرام من شافت نايف نايم وردت عليها مرام ونطقت هيام: هلا مرام وش فيك كنت نايمه
مرام : هيام كيف نايمه مو قلتي بتوديني عند نمر !
تاففت هيام ونطقت: نسيت مرام زين اسمعي تجهزي ساعه كذا وانا عندك
مرام : تمام وقفلت منها وهي تدخل الغرفه وشافته على حاله وتنفست براحه ومشت له ونطقت : نايف تاخرت ترا على دوامك
فتح عيونه ونزل راسه لساعه وفز من شاف الساعه وتافف : ايش يفكني من لسانه الحين اووف قام يدخل الحمام وقامت تجفف شعرها وطلع واخذ بدلته يلبس ومشت له : شعرك غرقان بتمرض
اخذ رتبه يعلقها ونطق وسط عفسته: ماعندي وقت اوف ليش ماقومتيني
ولفت عليه: توي قمت حتى انا مشى يوقف جنبها وهي تستشور شعرها رش عطره وجاء بيطلع ومسكته مع يده : تعال بجفف شعرك
وضحك نايف ونطق : بتستشورين لي !
وضحكت هيام ونطقت : اي وش فيها الاستشوار تعال بسرعه موناقصه تمرض علي مشى لها وجلس على كرسي التسريحه ورفعت الاستشوار تجفف شعره وهو يناظرها : بسرعه هيام بسرررعه
حركت شعره تحاول تجففه ونطقت : زين يلا
ونطق نايف: مين يدق ؟!
تلعثمت وحاولت تشغل نفسها بشعره ونطقت : وحده اعرفها
نايف : مين هي !؟
بلعت ريقها بخوف : وحده بالمستشفى تسال عن رجعتي
هز براسه وقفلت هيام الاستشوار ووقف : بتطلعين مكان ؟!
هزت براسها بمعنى لا ونطق هو : زين تمام بحاول اطلع بدري اليوم
ورجعت تجلس على الكرسي : تمام يلا انتبه نفسك
وطلع نايف من الغرفه ونزل لسيارته ومن سمعت الباب الي تحت يتقفل ركضت تناظره من الدريشه وشافته مشى مشت هي الغرفه تلبس عبايتها وتلف طرحتها واخذت شنطتها وجوالها وطلعت تركب سيارتها ومشت لمرام ودقايق ووصلت واخذت جوالها تدق عليها وردت مرام عليها : انزلي مرام انا تحت يلا
مرام : جايه وقفلت منها
ومشت لربى : ربى ماما انتبهي على اخوانك بروح شوي وبجيكم ماني مطوله
هزت براسها ربى وطلعت مرام تنزل لهيام وركبت معها ومشت هيام للمركز ووقفت بعيد عنه بمسافه ولفت على مرام : انزلي مرام وبسرعه لاتتاخرين
هزت براسها مرام ونزلت تدخل المركز واعطتهم اثباتاتها ودخلت تشوف نمر
<<مكتب نايف >>
جالس يخلص شغله وسند جالس بالكرسي الي قدامه ويسولف عليه ونايف يضحك عليه وعلى سوالفه وشهق سند ولف نايف عليه ونطق : وجعع ياحيوان
نط سند يجلس على المكتب من جهة نايف ونطق : تخيل ماقلت لك
نزل القلم من يده ونطق : وشو ياالمطفوق
وضحك سند : حيوان وش دراك !!
عقد حاجبينه نايف : بوش !!؟
سند : انها قالت لي مطفوق
ونطق نايف بعدم فهم: وش تقول انت !!!؟
ضحك سند ونطق وسط ضحكته: تخيل رحت المستشفى على اساس ابي اشوفها المهم ان صفقت فيها وطاح كوب القهوه عليها
وضحك نايف وتقدم بجلسته : ايوه كمل
وكمل سند : المهم قالت لي وش جابك قلت لها والله يا حضرة الممرضه هذا مستشفى وانا ظابط وانتي ممرضه فعادي اشوفك واصادفك وبعدين يقولك رب صدفة خير من الف ميعاد قالت لي وليش صدفة خير من الف ميعاد
مين انت علشان يجمعني معك صدفه وميعاد
وانهار نايف يضحك : انت دلخ شلون تقول للبنت كذا
وضحك سند يكمل له : الهم وجت بتمشي ولفت علي وقالت
ياحضرة الضابط صارت مرتين مره مويه ومره قهوه انتبه
لثالثه ودامك مطفوق كذا انتبه وانت تمشي.
رجع ظهره نايف على الكرسي يضحك : يخوي منت بصاحي انت
وضحك سند : اهاه يانايف لعنبو هالحب
وارتفع صوت ضحك نايف وسند يضحك معه : حتى البنت عرفت انك مطفوق
حك جبينه سند ونطق : يخوي الاعتراف صعب جدا وتدري وش الاعظم رايح
بعترف وكبيت القهوه عليها .."
نايف : انت ادعي انها توافق عليك انت وحبك بعد كبكبت المشاريب ذي عليها
وتلاشت ضحكة سند : وش يعني !؟
وتحكم بملامحه نايف ويحاول يخفي ضحكته ولف يمسك القلم ويرجع للاوراق ونطق : يعني البنات يبيون واحد جنتل وعاقل ورزين مو مطفوق
ولا ياالسند ؟!
ونطق سند وهو يحاول يستوعب كلام نايف : ولد انت صادق !
رفع عيونه نايف له : اجل وش خلك ثقيل زيي مثلا
وضحك سند بعلو صوته: مين الثقيل وحط يده فوق عيونه مااشوف احد
وضربه نايف بنص بطنه : ودك اوريك الثقل صح ؟
وضحك سند ونطق وسط ضحكته: ياعمي دز بس قال ثقيل قال هذاك اول الحين الثقل موب لك ومشى بالغرفه وكمل كلامه ويعد على اصابعه دوام وصاير تتاخر عنه بعد ماكنت تنام بالمكتب وطول يومك بالبيت ومن البيت للمكتب واذا مره خرجت رحت الإسطبل حتى الادهم عزتي له سحبت عليه والايام الجايه بصير انا والادهم واحد ونزل راسه سند من رمى عليه نايف القلم الي بيده : طيب ياالحيوان انا اوريك
ضحك سند وطلع من المكتب وابتسم نايف ونطق : كيف لو شافني امس الله يسامحك انتي وغرورك حك حاجبه وتقدم لطاولة المكتب يكمل شغله ."
جالسه بالسياره وتاففت بضيق من تاخرت عليها مرام ضربت بيده على دركسون السياره وتنهدت بخوف وهي تنتظرها : قلت لها لاتتاخر اوف مرام
داخل المركز كانت مرام قدام نمر ويدها بيده وتسولف له ويسولف عليها ومن جاء العسكري يعلن انتهاء الزيارة قامت مرام تسلم على نمر وطلعت واخذت اثباتاتها وطلعت لهيام وتنهدت هيام من شافته وركبت مرام ولفت عليها
هيام : اشفيك مرام وش قلت لك انا مو قلت لك لاتتاخرين
لفت مرام تسكر الباب : يوه هيام تعرفين اجراءات الدخول
تاففت هيام وهي ترجع على ورا وتحرك من عند المركز ونطقت
هيام بقرف من الطاري اللي طرا ببالها من تذكرت كلام خالد عن نمر وانه واحد من اسباب انتقام خالد : شلونه ؟!!
هزت براسها مرام : زين على حاله
ونطقت هيام بداخلها: جعله بهالحال واردى
وسكتت تكمل طريقها للبيت ولفت مرام على هيام : تنزلين معي
ربى تبي تشوفك ."
هزت براسها هيام ونزلت مع مرام ودخلو يطلعون للشقه ومشت مرام تنزل عبايتها وجت ربى تركض لهيام : هلا هلا بوردتي الحلوه
ابتسمت ربى لها : ورد امس مره حلو حطيته بالفازه
ضربت هيام بيدها على انف ربى بخفه : كفو عليك اي اهتمي فيهم
لفو من سمعو الباب يدق ولفت مرام تناظر هيام ونطقت هيام: تنتظرين احد!!
هزت براسها مرام بنفي : لا ولا احد
عقدت جايبينها هيام : مين اجل ؟!
رفعت اكتافها مرام : ماادري بس اسمعي افتحي انتي دام طرحتك على راسك
هزت براسها هيام ومشت تفتح الباب واختل توازنها ورجف داخلها بخوف وتغيرت ملامحها وتعابير وجها من شافته واقف قدامها
ميل راسه ونطق وسط غضبه وبحدة صوته : هاذي الي بالبيت !
خافت اكثر من نبرة صوته ونظرة عيونه الحاده والي بيطلع منها شرار اثر غضبه ونطقت هيام: نايف اسم....
قطع كلامها ونطق : اششششششش وتحركي قدامي يلا
ورفعت يدها تبي تفهمه : نايف تكفى اسمعني
رفع كفه يمنع كلامها : شفت كل شيء وعارف كل شيء
قبل ساعه من الان ~~~
من كان بمكتبه ويخلص شغله جاه اتصال من الفريق سالم ورد عليه نايف
نايف : سم ياطويل العمر
الفريق سالم: نايف ارسلت عسكري من الامن العام وانا مو موجود بالمركز اطلع قابله عند الباب وخذ الاوراق منه وحافظ عليها اكثر من نفسك ولو تقدر تدفنها ادفنها بس لايدري فيها مخلوق يخلق
وقف نايف: سم طال عمرك لاتوصي اعتبرها وصلت بامان وقفل منه وطلع نايف ومن شاف العسكري واخذ الاوراق منه ومشى لسيارته وحط الاوراق بالدرج وسكر عليه ورجع بيدخل المركز وطلعت مرام ورفع عيونه من شافه تركب بالسياره الي تبعد عن المركز وهالسيارة يعرفها صح عقد حاجبينه بصدمه من لمحها ورجع يركب السياره يتبعهم واخذ جواله
يدق على وليد ورد عليه
ونطق نايف :وليد في وحده توها طالعه من المركز شيك لي اسمها
ولمين جايه بسررررعه وليد اخلص ولاتقفل مشى وليد يسال العسكر عن اسمها وسبب زيارتها وقالو له اسمها و انها جايه لنمر ورجع الجوال وليد على اذنه ونطق : ياطويل العمر اسمها مرام سلطان وجايه تزور نمر
ضرب بيده على قزاز الدريشه وقفل منه وهو يصرخ : انا تعبت من هالحياة تعبتتتتتتتت كل ماقلت بعيش معها زي الخلق اكتشف ان وراها اسرار الدنيا كلها مشى وراها لين وقفت عند البيت ونزل وراها وسال الي بالاستقبال عن رقم الشقه وطلع وراهم نرجع للوقت الحالي
بانت عروق جبينه وسكتت هيام ونطقت : باخذ شنطتي واجي ودخلت البيت
ونطقت مرام : مين ؟!
وطلعت هيام بدون ماترد عليها ومشت ومن شافها لف ومشت تنزل معه وركبو السياره وهو ساكت ولفت عليه ونطقت: نايف اسمعني نايف اشفيك عندي اسباب خلتني اسوي كله هذا
سحب البريهه من على راسه يرميها على كبوت السيارة وارتفع
صوته عليها : انا ماني برجال صح ماني برجال !!
ونطقت بذهول من كلامه : ايش دخل مين شكك برجولتك !!
ونطق وسط غضبه : انا اقولك ياها ماني برجال ولو اني رجال ماكان صارت كل هالاشياء وانا ماادري عنها انتي ماتبين تنسين الماضي كل يوم اكتشف انك تحفرين فيه وانا الغبي الي اصدق كلامك وساكت معليه
انا اوريك الرجوله صح وقف عند البيت ونطق: انزلي
نزلت ونزل وراها ودخلها : شوي وراجع رجلك لو تعتب الباب والله اني لاقلب الدنيا عاليها واطيها تسمعين ومشى يسكر الباب بالمفتاح وركب
سيارته وهو مو شايف قدامه غير نمر وبس ....."
انتهى ✅
قراءه ممتعه
لاتنسون ⭐️
