دفنت وجها بالمفرش وهي تنهار من الضيقه اللي تجتاحها بهالوقت وهو واقف عند الباب وكلامها سكاكين بنص صدره ماتوقع يسمع كل هالكلام منها هي بذات مشى يطلع من المستشفى ويجلس على الدرج امام المستشفى ويناظر حاله وهز براسه ونطق بهدوء: فعلا انت السبب طلع دخانه من جيب بدلته وولعه وهو يسحب منه مر الوقت عليه وهو واقف عند كل كلمه قالتها له خلص من زقارته وقام يدخل المستشفى ومشى للغرفه وشاف الدكتوره طالعه من عندها مشى لها ولفت عليه ونطقت : لوسمحت انت وش تصير لهيام ؟؟!
ونطق نايف: زوجها ليه في شيء !
هزت براسها الدكتوره : ممكن تجي المكتب معي شوي
رفع حاجبه نايف ومشى وراها ودخل المكتب وجلس قدامها
ونطقت الدكتوره : اسم حضرتك ؟!
ونطق هو : نايف
جمعت كفوفها ببعض ونطقت : شوف يانايف زوجتك في بدايه اكتئاب ووضعها النفسي جدًا سيء واللي صار لها مو شيء سهل ابدا وانت بدورك كزوج
انك توقف معها كل شيء صعب بالبدايه بس مع الايام ان
شاء الله تتجاوز كل هالصعوبات ."
نزل راسه بين يدينه وتنهد والدكتوره تناظره ورجع يناظرها ونطق : شلون وهي جالسه تلومني على كل شيء !؟
الدكتوره : نايف ممكن اعرف وش مرت فيه من قبل علشان اقدر اساعدك ؟!
رفع راسه نايف وحكى لها كل شيء من اول يوم طلع من عندها لاخر موقف جمعه معها ونطقت الدكتوره : يعني هي كاتمه من زمان ؟!!
هز براسه نايف وكملت كلامها الدكتوره: غيابك اثر عليها بشكل سلبي واللي صار زادها زياده وزي ماقلت لك انت بدورك توقف جنبها وتتحمل اعرف ان الكلام اللي سمعته مو سهل ابدا خصوصا اذا جاء من شخص انت تحبه بس ماعندك حل الا انك تتحمل وتتقبل كل كلمه تسمعها وماتبين لها زعلك منها حتى لو كنت فعلا زعلان وان شاء الله تعدي كل هالايام وتتحسن حالتها وماتحتاج لدكتور ..."
رفع حاجبه نايف ونطق : دكتور ؟؟!!
هزت براسها الدكتوره تاكد كلامها : اي دكتور نفسي
رجع ظهره على الكرسي وسكت وكملت كلامها: شوف يانايف بنتك حول الثلاث ايام كذا يتعدل عنها الجهاز التنفسي وتستقر وظائفه وبعدها تطلع للحضانه على خير وبعدين تقدرون تاخذونها وانت خليك على تواصل معي عن حالتها اول باول وزي ماقلت لك خل عندك امل ان كل شيء بيصير تمام
هز براسه واخذت كرتها تعطيه واخذه وطلع من المكتب لغرفتها حط يده على مقبض الباب ونطق : تحمل نايف تحمل دامها منها تحمل
فتح الباب ودخل ومن شافته لفت وجها عنه ومشى يجلس على الكنبه بدون ماينطق بحرف واحد ...."""
وصلو اهلها المستشفى ودخلو كلهم ولف انظاره نايف ومشت فاطمه تجلس جنبها وقامت هيام تحضنها وشدت عليها فاطمه وقرب منها تركي واخوانها وضحى وكنوز ونطق تركي وهو ماسك يدها ونايف يناظرها : تصبري ياحبيبتي انتي تصبري الله عطاك والله خذاها من يدك وكل شيء مقدر ومكتوب وبيكون شافع لكم ان شاء الله بدخول الجنه ويجعله شفيعًا مُجابًا لكم وطير من طيور الجنة تحملي وانا ابوك .."
رفعت عيونها المليانه بدموعها تناظره وثبت نظراته عليها وانحرج نايف من لفو يناظرونه اثر نظراتها له وطلع برا الغرفه وطلعت كنوز تتبعه ولف عليها وحاوطت ظهره ورفع يده نايف عليها وابعدت عنه وابتسمت له
ونطقت : اشتقت لك
ابتسم نايف ورجعها على صدره ومن جاء بيرفع يده يحاوطها داهمه الالم عض على شفته ونطق نايف : انا بروح وانتي ادخلي لهم
هزت براسها كنوز ووقفت تناظره لين اختفى من قدامها ولفت تناظر الغرفه ومشت للممرضات وبلعت ريقها بخوف وطلبت منهم تحاليل وفعلا انتظرت لين نادوها ودخلت تسوي التحاليل وطلعت ومشت تسالهم من تطلع النتيجه وقالو لها بعد ساعتين ونطقت كنوز للممرضه: ممكن اعطيك رقمي وترسلين
النتيجه عليه بس تطلع ؟!
هزت براسها الممرضه واعطتها الرقم ورجعت للغرفه ومشت تجلس جنبه ولف عليها ونطق بهدوء: وين كنتي ؟!
ولفت عليه كنوز ونطقت : مع نايف
هز براسه عزام وسكتت وسكت عزام معها وعم الصمت عليهم كلهم ونامت هيام وطلعو كلهم ومشت فاطمه لتركي : انا ماراح اروح بجلس عندها اليوم
تركي : ليش ؟ نايف موجود تجلسين ليه !
فاطمه : خلاص تركي بجلس ماراح اروح اخاف تحتاج شي
هز براسه تركي وطلعو كلهم ورجعت تدخل فاطمه عندها وجلست قدامها ...
ركب تاكسي يرجعه لسيارته ووصل ونزل لها وهو بيموت من الم يده وحرك للبيت ودقايق ووصل ونزل وهو يصارع الالم وركض للغرفه وهو متجاهل كل شيء والالم اللي يحتوي يده ماسمح له يفكر بشيء دخل ورفع يمينه ونزل بدلته وشاف يده متوره اثر اهمالها لها ونطق : ياربي مو وقتها اوووووف
مشى ياخذ ملابسه ودخل ياخذ له شور ولبس وطلع وهو يرمي نفسه على السرير ونام ......"""
جالسه على الكنب والجوال بيدها وتنتظر رساله من الممرضه وبنفس الوقت ميته خوف ورفعت عيونها له وهي تشوفه نايم بعد تعبهم ليله امس
ونطقت بداخلها : اشفيها طولت يالله
تكت بيدها على ذراع الكنب ومن حست انه داهمها النوم
قامت تنسدح جنبه ونامت ..."
فتح عيونه الساعه خمسه مساء ~
رفع راسه من كان نايم على بطنه وناظر لساعته وفز وهو مايدري وشلون نام حتى قام وهو يلبس ويصلي ونزل لسيارته ومشى للمستشفى
وعند هيام جالسه وامها قدامها قامت فاطمه تطلع الاكل اللي جابته لها وحطته لها وجلست جنبها ونطقت : يلا ياماما كلي كل هذا ابي اشوف وجهي بالصحن
رجعت الصحن لها ونطقت : مابي يمه تكفين مالي نفس
نزلت الصحن فاطمه وتنهدت ونطقت : ياهيام ياحبيبتي انتي لازم تاكلين
ورفعت عيونها هيام تناظرها ونطقت بتردد: نايف وينه ؟!
رفعت اكتافها فاطمه : ماادري ماشفته من الصباح
وضحكت بسخريه على حالها ونطقت بهدوء وبصوت مسموع لها
وحدها : طبعا تعود يكون غايب الله يقوي قلبي عليك
ورفعت راسها لامها ونطقت : يمه ابي اشوف بنتي
لفت فاطمه لها : هيام البنت في العنايه يعني ماتقدرين تدخلين
ولا حتى هي تطلع لك
وهزت براسها هيام : معليك يمه نادي لي الممرضه انا بكلمها
قامت فاطمه وهي تنادي الممرضه ودخلت لهم وكلمتها هيام وهزت الممرضه براسها ومشت تجيب لها عربيه وقامت هيام تجلس عليها ومشت فيها الممرضه وفاطمه وراها ووقفت فيها عند القزاز الفاصل بينها وبين بنتها عضت شفتها تكتم بكيتها وهي تناظرها ورفعت يدها على القزاز ونطقت : سامحيني ياماما سامحيني وسكتت وهي تناظرها ودموعها على خدها وهي حرفيا غرقت فيها جت الممرضه وسحبتها تطلعها لغرفتها ودخل الغرفه بس ماشافها وعقد حاجبينه وطلع للممر وشافها بالعربيه وتنهد براحه ومشت الممرضه تدخلها الغرفه ومشى نايف يمسك العربيه ويساعدها تمشي للكرسي لفت عليه تناظره ونطقت : ابعد اعرف امشي
رفعت حاجبها فاطمه وهي تناظر هيام ورجع نايف ورا وجلست وسحبت طرحتها وانسدحت ونطقت فاطمه : الله جابك يانايف توها هيام تسالني عنك
رفع حاجبه نايف وابتسم ولف انظاره لها ولفت هيام تناظر امها
تكى بظهره على الجدار يناظرها ومسح على حواجبه ونطقت فاطمه وهي تناظرهم : انا بروح باخذ لي كم شغله من الكافيتريا وبجيكم
هيام : يمه ؟!
ضحكت فاطمه ونطقت : شفيك خلاص هذا نايف جاك
تاففت هيام وهي ماتبي تجلس معه وحدها وطلعت فاطمه وتقدم لها نايف
ونطق بابتسامة: ليش تسالين عني بغيتي شيء ؟
صدت بعيونها عنه ورجعت تناظره ونطقت : كنت بشوف عادمة المسؤولية وين بتوصلك بس ، واذا في بالك اني سالت عنك علشان اشوفك فانا اقولك مو طايقه اشوفك وكل ماشفتك يزيد اصراري انك سبب كل المتاعب اللي انا فيها ومن شافت ابتسامة تتلاشى كملت كلامها شلون قادر تبتسم وتكمل حياتك طبيعي وانت فاقد قطعه منك بس مالومك ماعرفته الا امس وش تبي نايف انا مو قايله لك مابي اشوفك كبدي تلوع من اشوفك اذا تبي تكفر
عن ذنبك احرمني من شوفتك .""
اخذ نفس من حس انه ضاق صدره وقام يطلع من الغرفه رفع يده على الجدار المقابل للغرفه وضرب بيده عليه وتكهرب من الم اللي داهمه وصار يضرب بيده الثانيه وعلى جبينه ونزل انظاره ليده من شافها ترجف شد على كفوفه و رفع عيونه وهو كل اللي يحسه حاليا رجفت جسمه واثقال الدنيا كلها تجمعت بعيونه وهو يسمع الكلام هذا منها ويحلف بداخله ان محد قدر يسوي فيه مثل ماسوا كلامها فيه انتفض داخله وجلس يسال نفسه سوال واحد مافي غيره شلون الانسانه اللي مايسمع منها الا الكلام الحلو واللي كان يزع بداخله بساتين الدنيا كله يطلع منها نفس الكلام اللي سمعه من شوي كلمتها تترد براسها من قالت له اذا تبي تكفر عن ذنبك احرمني من شوفتك بردت اطرافه وجلس على ركبه قدام الباب بالضبط وضم اكتافه وهو مو حاس الا بالم داخل صدره وكان كفيل انه ينسيه الم كسر ذراعه رفع انظاره لفاطمه اللي كانت تناظره ومشت له وجلست مقابل له ونطقت : وش فيك يمه ؟!
هز براسه نايف بمعنى ولا شيء ونطق : خليك عندها واذا احتجتو
شيء دقي علي انا برا وقام يطلع من المستشفى لسيارته وجلس فيها
وعقدت حاجبينها فاطمه من تركها ومشى ودخلت عند هيام
وسالتها : وش فيه نايف ؟!
وسكتت هيام وماردت عليها ورجعت فاطمه تكرر السوال عليها ونطقت: مافيه شيء بس ماقدر يتحمل حقيقه انه هو المسؤول عن كل اللي صار
رفعت حاجبها فاطمه ونطقت بستغراب: هو المسؤول ؟؟! ليه وش دخله هو !
ولفت هيام ونطقت بحده وخلت فاطمه تنصدم من ردة فعلها العنيفه : كيف وش دخله انتي تشوفين ان ماله ذنب واللي صار لي وموت ولدي ولا بنتي اللي بالعناية ولا حالتي النفسيه وتدهورها مين السبب بكل هذا
ونطقت فاطمه بنفس رفعت الصوت : ياشيخه ؟! في احد يبي يذبح ولده ؟ وش قاعده تقولين انتي ؟ انتي ماشفتي حالته بس عرف انك بالمستشفى شفته بالحاله تخوف وانتي تعرفينه انسان صامد ومايظهر ضعفه لاحد وضعف
قدامنا من عرف بالخبر زي مانتي امه هو ابوه
ونطقت هيام وسط ضعفها : اجل مين له ذنب بوجهة نظرك
اذا هو ماله ذنب انا ؟!
وقربت منها فاطمه وهي تمسح على شعرها : محد له ذنب هذا قدر مكتوب الله قدر انك تطلعين بالمطر ويصير كل هذا ياماما ياحبيبتي انا مقدره وضعك بس برضو ماراح ارضى انك ترمين الخطا على نايف حتى لو كنتي بنتي وبنفس الوقت ماراح ارضى انك تخربين بيتك بيدك ومسكتها مع راسها تقربها لحضنها .."
جالس قدامها ويصحيها : كنوز وش ذا النوم يلا قومي الساعه ٩تدرين ؟
فتحت عيونها وهي تناظر فيه وهزت براسها له ووقف : اسمعي انا بروح اودي ملابس لهيام امي توها داقه علي لا ارجع وانتي باقي نايمه صحصحي
وقامت تتوسط السرير وطلع عزام وقامت الحمام تاخذ لها شور خلصت وطلعت تلبس وتصلي وشهقت من تذكرت التحاليل وانها نامت وهي تنتظرها وركضت للجوال وهي تشوف pdf من رقم غريب وعرفت انها الممرضه
اخذت نفس وفتحه وهي تقراه وضحكت من شافت النتيجه ايجابية وتدل انها حامل عضت على طرف اصبعها من حست بشعور غريب يزورها
ونطقت وسط ضحكتها: بس مو بدري ؟!
ورجعت تناظرالنتيجه وهي تضحك من قلبها ونطقت : بس ماراح اقول له الحين بنتظر شوي لين تزين الاوضاع وبعدها بقول له الحمدلله يارب الحمدلله.""
نطق نهار بصدمه : ضحى منجدك وتوك تتكلمين
ضحى : نهار والله ماامداني اقول لك
مسح على شعره ونطق : يالله الله يعوضهم خير
هزت براسها ضحى : امين يارب اهاه يانهار هيام منهاره ونايف
مو باقل حاله منها
نهار : يوه امي توها قبل شوي تسالني عنه
ضحى : لاتقولها شيء الحين بكره وخير
هز براسه نهار ونطق لضحى : ماراح اقول لها واصلاً تاخر الوقت
ضحى : اسمع اخو جود جاكم راحت من عندكم ؟!
نهار : لا ماجاء ولا شفته علشان كذا انا مصدوم يوم قلتي لي نايف رجع
ضحى : زين اسمع نهار بموت تعب تخيل من امس مانمت انا بقفل
نهار : زين يلا أنتبهي لك قفل منها ومسح على راسه وهو مصدوم فعلا .."
جالس بالسياره والدنيا صاكه فيه نزل راسه لجواله اللي كان يدق من سند اخذ الجوال نايف وهو يرد عليه ونطق نايف : هلا سند
عقد حاجبينه سند ونطق : شفيه صوتك ؟؟
اخذ نفس نايف وسكت ونطق سند : ولد معي نايف الو ؟!
نايف : معك معك
سند : وش فيك خوفتيني صاير شيء !
نايف : قول لي وش اللي ماصار احسن من انك تسالني وش صار
سند : نايف نشفت دمي وش صار !
وسرد له نايف كل اللي صار : هذا اللي صار ماصدقت اطلع وتنتهي هالمهمه ومن انتهت شوف وش صار وتدري المشكلة وين انها جالسه تلومني على كل اللي صار وكل مادخلت عندها سمعتني كلام يسم البدن
تنهد سند ونطق : الله يعوضك ياخوك ويعينكم
وتنهد بتعب وضيقه وصلت احساسها لمسامع سند ونطق : يارب
سند : وينك انت اجيك ؟!
نايف : عند المستشفى لا مايحتاج تجي اخذت اختك !
سند : لا والله توي قايم من امس وانا نايم من التعب بروح اخذها الحين
نايف : لا تكفى ماابي اهلي يدرون والوقت تاخر اصلا ً بكره روح خذها
سند : زين نايف تبي شيء ولا شيء تراني موجود
رفع راسه نايف من شافها تمطر ونطق : ماتقصر
وقفل سند منه ونزل فكه على الدركسون يناظر المطر .."
كانت جالسه وتناظر حولها وفاطمه جنبها ونايمه عقدت حاجبينها من سمعت صوت المطر وخفق قلبها بخوف وشدت على المفرش بيدها الثنتين واعتلت انفاسها وصرخت وهي تحط يدها على اذونها تمنع الصوت يوصل لمسامعها
وفزت فاطمه لها ونطقت تسمي عليها: يمه بنتي جلست جنبها وهي تمسك يدها اللي على اذونها : هيام يمه وش فيك بسم الله الرحمن الرحيم
مستمره في صراخها وتهز براسها وفاطمه تبكي وهي ماتدري وش فيها: يمه لاتخوفيني وش فيك وش تبين تعبانه وش فيك ؟!!!
ماردت عليها وهي داخله وسط نوبة هلع ومو قادرة تنطق بشيء
اخذت جوالها فاطمه وهي تدق على نايف وهو جالس على. وضعيته ولف من شاف جواله يدق اخذه وهو يرد وقبل ينطق نطقت فاطمه : نايف الحق علي فتح الباب وهو يركض ويدخل المستشفى ومشى لغرفتها ودخل وهو يشوفها بحاله ماعهدها فيها وركض لها وجلس جنبها على الكرسي
ونطق لفاطمه : وش فيها؟!!
فاطمه : مدري عيت تتكلم
رفع يده لوجها ونطق بخوف : اششش هيام بنت اسمعيني ههههيييااامممم
صرخت بعلو صوتها من زاد صوت المطر وهي تردد وسط دموعها وصرخاتها : لالالالا مطر لالا
انتفض داخله من صوت صراخها وخوفها من المطر ورفع يدينه لوجها ورفعت عيونها له ونطق : شفيك لاتخوفيني عليك شفيك ؟!
ونطقت تترجاه : مطر نايف مطررر تكفى نايف تكفى مابي اسمعه
قرب لها اكثر وسحبها لحضنه ونزل ثغره لاذنها وهو يتكلم فيها ويمنع صوت المطر يوصل لها : اششش هيامي حبيبي عشقي وغرامي وكان يشبع سمعها بصوته الهادي وكل مازاد المطر رفع صوته اكثر وحاط يده الثانيه على اذنها الفارغه من صوته وكمل كلامه مشتاق لك عندك خبر ميت وله عليك مشتاق لحسك لعيونك ولكلامك ولنومتك على صدري لصوت ضحكتك وحتى لعنادك مشتاق ، مشتاق ارجع اشوفك تقصين اطراف ورداتك وانا اتاملك وامتع عيوني فيك شفتي غيابي عنك والله ويمين بالله محد ذبحني غيره بس اوعدك ماترجعين تعيشين شيء من اللي صار لك لاني بكون حولك بحاوطك من الاربع اتجاهات معك انا معك وحولك اطلبيني ، عاتبيني ، ارفضيني ، زعليني ، سوي اللي تبين راضي والله راضي كل شيء منك راضي فيه انا حياتي مسخره لك من بدايتها لنهايتها ماراح اتركك بعد ما سكن حبك في وجداني وتعوّض فيك حرماني اسف والله على كل شيء وحطي في بالك اذا ضاقت بك الدنيا الوسيعه لك في قلبي وطن ما ضاق جوفه والله ان القلب وراعيه يفداك بتعدي ياحبيبتي انتي بتعدي اوعدك بتعدي هدت وسكنت بحضنه وهي تسمعه تسمع الصوت اللي هرمت شهور وايام علشان ترجع تسمعه وهي بهالحظه حاسه بامان وحنان الدنيا كلها فتحت عيونها وهي تناظر قدامها وشدت عليه ومن وقف المطر سكت نايف وهو يمسح على شعرها ويسمي عليها ..."
وحطت يدها فاطمة على ثغرها تكتم بكيتها ومشت تطلع من الغرفه
دفن وجهه بشعرها وهو يحس نفسه رجع يدفى بحضنها ونامت وهي بحضنه ورفع نفسه على السرير ورجع يحتويها من جديد ....."
دخل عزام المستشفى ومشى للغرفة ودخل وهو يشوف امه جالسه قدام الباب رفع حاجبها واسرع بخطواته لها ونطق :يمه وش فيك جالسه هنا
رفعت عيونها فاطمه له ونطقت: اختك ياعزام
وجلس عزام قدامها ونطق: وش فيها ؟!
وقالت له فاطمه تحت حزنها وكدرها على حالة هيام ونطقت: خايفه عليها و
لو نايف ماكان موجود ماكنت راح اعرف اتصرف
عزام : معليك يمه بتعدي وبترجع احسن من اول كل شيء بياخذ وقته
وقام عزام بيدخل عندها ونطقت فاطمه : لا تدخل نايف داخل
رجع عزام وقامت فاطمه : برجع معك وبكره ارجع لها
هز براسه عزام ونطق : بعطي الممرضات الاغراض ومشى
يعطيهم وطلع هو وامه يرجعون البيت..."
ونزل عزام يدخل غرفته ومن دخل شافها واقفه وتناظر الشارع من شباك الغرفه مشى لها يحاوطها ويسند دقنه على كتفها ونطق : وش تفكرين فيه
ابتسمت من حست فيه ونطقت : بولا شيء شفت هيام ؟!
ونطق عزام: لا وحكى لها الموقف اللي حكته له امه
وتنهدت بحزن : ياعمري عليها صراخها باقي محفور براسي
ونطق عزام : الله يكون في عونهم
ونطقت كنوز وهي شاده على يده اللي تحاوط بطنها ونطقت : اكلت ؟!
ابتسم ونطق : ولا شيء
لفت عليه ونطقت :ودك نطلع ؟!
هز براسه عزام: يلا البسي
هزت براسها وابعدت عنه وهي تروح تغير ملابسها وتلبس عبايتها وطرحتها ولفت عليه : يلا خلصت
وقف ومشى يطلع وطلعت وراه وركبو السياره ومشى عزام للمطعم وقف عنده ونزلو ياكلون وهم على امل كل شيء يتعدل ...."
<صباح يوم جديد المستشفى تحديدا >
واقف قدامها وساند ظهره على الجدار وهي منزله عيونها من عليه ونطقت بدون ماتلف عليه : امي وين راحت ؟!
تنهد براحه من سمع حسها ونطق : راحت من امس جاء عزام واخذها وجاب اغراضك شوفيها هناك
هزت براسها وسكتت وهي تفرك كفوفها ببعض
ونطق : ليش تطلبين بعدي وانتي وانا كلنا عارفين ان راحتك بقربي زي ماراحتي بقربك !
بللت شفايفها ولفت عليه ونطقت : تعودت على غيابك وماصار
يفرق معي حضورك .."
هز براسه وضحك نايف: اي صدقتك
وناظرته بحده ونطقت بجديه : ومين قالك صدق ؟ على بالك يهمني هاذاك اول بس الخمس شهور كانت كفيله بانها تعودني على غيابك .
وتلاشت ابتسامته ونطق وسط جرحه اللي بصدره اثر كلامها عليه : ماراح تقدرين والله ماراح تقدرين تدرين ليه ؟!
وهزت براسها تجاوب عليه لانها تعرف الاجابه : لاني احبك ادري وخابره شعوري تجاهك بس صدقني ياكاسر قلبي وكل شعوره ماراح اسمح لك تضر قلبي انت وحبك .."
ارتخت عيونه بحزن ونطق : انا اضرك ! وضحك ورجع ينطق وسط ضحكته يابنت الناس عن اي ضرر تتكلمين وانا اضر نفسي قبل افكر اضرك
نزلت عيونها ليدينها ونطقت بدون ماتناظره : والمطلوب مني اصدقك ؟! هذاك اول بس الحين انا ماعاد اصدق الا نفسي وبس ورفعت عيونها له نايف وجودك جالس يضعفني انت جالس تشوف اللي انا فيه بسببك ؟!
ونطق نايف بتعجب : اعتبركلامك هذا جزء من عتابك اللي جالسه فيه تكوين ضلوع صدري ؟!
ونطقت بوعيد وتحذير : مابي ارجع اعاتبك لاني لو اطلقت عنان عتابي بحرق قلبك وبشب نار بصدرك وقتها اوعدك محد راح يطفيها حتى اللي شبتها ."
مسح على شاربه ونطق : واذا قلت لك اني راضي بحريق انتي صاحبته عاتبي مو تقولين الكتمان تعبك اجل اسدحي كل عتابك لي
بلعت ريقها من حست بحراره تحتوي بلعومها : ماانصحك بتتعب بيكون عتابي قوي عليك خلني ساكته افضل لي ولك
وضحك بسخريه ونطق : تتوقعين باقي شيء بيجرحني بعد كلامك امس من قلتي لي مابي اشوفك كبدي تلوع من اشوفك اذا تبي تكفر عن ذنبك احرمني من شوفتك صدقيني يالمغروره ، والله وتالله وبالله ان قلبي واقف عليها وكل كلمة عتاب بتجيني من بعدها بتكون خفايف
صدت بعيونها عنه ونطقت : جزاتك وصنع يدك
هز براسه نايف ونطق : اجل دامك مصره اني سبب في كل اللي حصل لك صح عليك بس الوقت كفيل يالحبيبه يعلمك ان مالي ذنب واني كنت اعاني بكل يوم عشته وانا غايب عنك وان مرد قلبك لي لنايفك طال الزمن ولا قصر
تنحنحت من الحراره اللي تحس فيها وهي تعبت من كثر مابكيت ونطقت : وكفيل بانه يعلمك يا صاحب الكبرياء اني عانيت ضعف معاناتك وان معانتك جنبي نقطه من بحر وتجاهلت الرد على اخر كلامه لانه تعرف
انه صادق باللي قاله
وقف قدامها بالضبط ونطق : بوش انا غلطان عليك فيه هاه؟! ليكون عشاني قلت لك دموعك لاتنزل في غيابي !!
ورفعت عيونها تثبتها عليه ونطقت : وهذا مو غلط بنظرك !
حك دقنه ورفع يده على خصره ونطق : لاني عارف لو نزلت دموعك بتغرقين فيها وكنت صادق لاني شفت بعيوني ، من رجعت وهي تجري على خدك مثل الحين بالضبط
عضت شفتها ورفعت يدها تمسح دموعها اللي رفضت تجف ومثل ماقال غرقت فيها ونطق هو : ناصحك من هالحركه كانك ناسيه اذكرك !
رفعت عيونها له ونطقت : اجل اسمع وحط في بالك كلامي زين نصايحك احتفظ فيها لنفسك واعرف زين ان كل كلمه تطلع منك واعرف انها بتضرني بسوي عكسها لاني جربت اسمع كلامك مره وندمانه قد شعر اني سمعته وانت تعرفني زين وخابرني اني اذا بغيت شي اسويه وغصبّ عليك بعد
رفع حاجبه ونطق : تتحديني يعني ؟؟ !
هزت براسها تاكد كلامها: اي اتحداك انا ماراح امشي الا تحت كلامي وشوري انا وبس وانصحك انت بعد ماتطلب مني شيء علشان مااحملك ضرر طلباتك اللي ودتني ورا الشمس وخلتني بكل هالضعف وخلت دموعي ترفض انها تجف وخلتني ارفض السيطره على نفسي بعد ماكنت انا احكم نفسي مو نفسي تحكمني .."
هز براسه وجلس جنبها على الكرسي وسحب فكها له وهو يقبلها بعمق ويرجع يحيي عروق قلبه من جديد ويرتوي بثغرها من جديد وهي انقطعت انفاسها من اثر قبلته ورجعت ظهرها على المخده من رجع عليها ونزل لمستواها وابعد عنها من حس انه كتم على انفاسها ونطق وجبينه على جبينها : لاتتحديني كان ماودك نرجع لسالفه الجبر ونخلي حياتنا تفنى واحنا نعيشها رد ومرادد اهجدي واعقلي وحطي في بالك ثغرك ملكي ارتوي منه متى ماودي وكل ماشفتك تسوين الحركه اللي انا ناصحك منها بتكون النتيجه كذا والعن واذا على انك انتي اللي تحكمين نفسك مو نفسك تحكمك فاحب اقولك هذا قبل مايصير قلبك مسجل باسمي ويكون من ممتلكاتي .."
كانت ساكته وتناظره وهو ماابعد عنها وارتفعت صوت انفاسها ونطقت وسط حراره جسمها : ومين بيعقلني ويهجدني انت ؟!!!
ومن حس انها تبي تبعد عنه رفع يده على عنقها من الخلف يمنع بعدها وهو بهالحظه حاس بحرارتها وكانها تفور وهي بقربه ونطق : اي انا ولو تبين ارجع أعيد تأهيلك من جديد عندي استعداد لن الواضح انك تبين ترجعيني لنقطة الصفر وانا بهالحاله اقولك تبطين عظم ارجع لها بعد ماتعبت علشان املكك.."
لفو من دخلو عليهم اهلها وفز يبعد عنها وهي بتموت من حريقها اللي يحتوي خلايا جسمها منه وقف وهو مبتسم ويناظرها حطت يدها على عنقها تخفف من توترها وابتسمت لهم وهم يسالون عن حالها واحوالها وهي ترد عليهم بس بنفس الوقت مو حولهم وكل بالها معه وحاسه بنظراته لها وهو مارمش وهو يناظرها ودقايق ودخلو اهله وامتلت الغرفه فيهم كلهم ومشت الجوهره تحضن نايف وتمسك دقنه ونطقت وسط دموعها: معوض خير يمه معوض خير
هز براسه نايف ومسك يدها وابتسم لها وابعدت عنه وسلمو عليه ابوه واخوانه ولف فيصل على هيام وهو يقرب منها ويقبل راسها وهو يدعي لهم بصبر والعوض هز براسه ومن جت بتعض على شفتها تذكرت كلامه وتحذيره لها ولفت عيونها تناظره وفهم نايف ورفع حاجبه يذكرها وصدت عنه ولفت للجوهره : شلونك يمه هيام ان شاء الله احسن
هزت براسها ونطقت : الحمدلله احسن
فيصل : الحمدلله
شد تركي على كفها اللي بكفه ورفعت عيونها له وجلس جنبها وقرب يهمس باذنها : عندي لك شيء بيحيي عروق قلبك كلها
عقدت حاجبينها ولفت تناظره وقرب اذنه تركي ونطقت هيام فيها : وش هو !
ورجع يهمس باذنها : بنتك وحفيدتي طلعت من العنايه
ضحكت وناظرها نايف وهو مشتاق لضحكتها وابتسم وهو يناظرها ونطق تركي : اششش بنسوي لهم مفاجاة مو تحبين المفاجات انتي
هزت براسها هيام وابتسمت وضحك تركي : خابرك من وانتي بهالطول .
وضحكت هيام وقبل راسها ونطق بحنان صوته : شعور اني صرت جد عظيم وجدا بعد ماتوقعت انه بيكون كذا صح اني زعلان شوي اني كبرت بالعمر وترا هاه ترا مو بس انا حتى فطومتنا زعلانه
ضحكت هيام وهي تناظر امها ولف تركي يناظر فاطمه ورفعت حاجبها فاطمه ونطقت : وش توشوش باذنها انت جالسين تحشون فيني ؟!
وضحك تركي وهيام معه ونطق : قاعد اقولها انك زعلانه انك صرتي جده
ضحكو كلهم على ملامح وجه فاطمه ونطقت : مسوي طالع منها !
اعتلت اصوات الضحكات عليها ونطق سعود : فطومه كبرتي يالله صرتي جده
ضربته على يده اللي تحاوط كتفها وضحك سعود ولفو من دخلت الممرضه بكرسي زهر ولفو كلهم بصدمه وعلى راسهم نايف وهو يذكر ان الدكتوره قالت له بتجلس ثلاث ايام مشى لها ومن شافتها هيام بكت ورفعها نايف بين يدينه ونزلت دموعه رغم عنه ونزل راسه يقبل خدها ونطق لها : جيتي يازهرتي يافرحتي الثانيه بعد امك اهاه يارب لك الحمد والشكر
رفع عيونه لهيام ومشى لها بزهر وهو يمد زهر لها واخذتها هيام تحطها على صدرها ونزلت دموعها ولف نايف يمسح دموعه بطرف كم ثوبه ورجع يناظرهم وهو يحمد ربي على هاللحظة صح ان فرحته ناقصه بعد موت ولده بس ماينكر ان الموقف كانت له هيبته.."
وكلهم يناظرون هيام وزهراللي بحضنها ومشى تركي ياخذها بحضنه ويسلم عليها ومشت فاطمه تناظرها معه وركضت ضحى جنب ابوها ونطق
تركي : بسم الله عليك ياحلوك ماشاءالله
ورفع عيونه لهيام نسختك
وضحكت هيام وهي تمسح طرف عيونها وابتسم نايف وهو ملاحظ الشبه الكبير بينهم وهذا اللي وده نسخه ثانيه منها ويرجع يعيش حبه مرتين
ونطقت ضحى وهي متخرفنه على الحجم : ياربي سعيله بابا تكفى بشيلها
ونطق سعود لنايف وهيام :خلف الله على بنتكم
ضحى :انطم انت
وضحكو كلهم على هواشهم ولف تركي لضحى :انتبهي لاتطيح
اعطاها زهر وضحكت ضحى :ياربي وسو هذا بنهار
وضحك نهار وهو يناظرها ونطق لسعود : اتحداك تفرق مين النونو !
ضحك سعود ونهار معه ونطق سعود : يبه حرام عليك شيل البنت توها جت
ودقه عزام : انطم مسوي تعرف تشيل انت ؟!
ومشى فيصل ياخذ زهر وهو يسمي عليها ونطقت الجوهره : بس دوري
واخذتها وهي تغني لها وضحكو العيال كلهم عليها
ونطق نهار : يمه وش الاغاني ذي
وضحك فهد ونطق وسط ضحكته : الاغنيه ذي مرت علينا كلنا من نايف لشروق
ونطق تركي : نايف وانا عمك اذن لبنتك
رفعت عيونها هيام له وناظر فيها ومدت الجوهره زهر لنايف واخذها نايف ورفعها له وعيون هيام عليه وعلى زهر اللي بين يدينه ونطق نايف بكل هدوء: الله أكبر، الله أكبر، الله أكبر، الله أكبر، أشهد أن لا إله إلا الله، أشهد أن لا إله إلا الله، أشهد أن محمدًا رسول الله، أشهد أن محمدًا رسول الله، حي على الصلاة، حي على الصلاة، حي على الفلاح، حي على الفلاح، الله أكبر، الله أكبر، لا إله إلا الله .."
ونطق فيصل : أسأل الله أن ينبتها نباتا حسناً ويجعلها قرّة عينٍ لكم
ونطق نايف لابوه : امين يارب
ونزلت عيونها هيام ولوهلة حست ان فرحتها ناقصه ونطقت بداخلها : يارب اني جعلته في ودائعك يارب اجمعني فيه بجنات النعيم .."
وجلس نايف على الكرسي وزهر بحضنه وعيونه عليها وعلى هيام وطلعو العيال كلهم برا بالممر ووقف فهد بنص الممر وهو ينادي شروق ومشت شروق له ونطق لها : وين جود ؟!
شروق :راحت من الصباح بس دقيقه ليش تسال عنها وش تبي !
سيطر على نفسه ونطق : لا ولا شيء بس ماشفتها معك وسالت
ومشى يطلع برا وهو يوقف عند الباب ونطق: ليش احس اني مهتم لها و
صوتها مو راضي يطلع من راسي وملامح وجها راسخه في بالي
تنهد وهو يتلفت وبلع ريقه من شافها هي وسند جايين بتجهاهم ونطق بداخله :لاعاد هذا وشو هذا نزل عيونك فهد شفيك لاتنسى نفسك
نزل عيونه فهد وقف سند يسلم عليهم وفهد يناظرها وهي واقفه بعيد عنهم بمسافه لفت عيونها وجت عيونها بعيونه ونطقت داخلها : هذا شفيه يناظرني كذا توترت من نظراته عليها وصدت بعيونها عنه بس هو مارفع عيونه من عليها ودخل سعود ينادي نايف ونطق :نايف سند برا جاي هو واخته
هز براسه نايف وقام يطلع وزهر بيده وطلعو معه تركي وفيصل
وضحك سند من شاف زهر بيد نايف وناد فيصل جود اللي واقفه
بنهايه المرر ومشت تدخل الغرفه عند البنات
سند :يا ماشاءالله ياحلواها حلواه اعطني ياها
رفع حاجبه نايف ونطق: تعرف تشيل ؟!
وضحكو العيال كلهم ونطق سند :وجع ياابوها خير ان شاء الله
ابتسم نايف وهو يمد زهر لسند : هاه امسك زين
احتدت نظرت سند عليه وضحك نايف وابتسم سند وهو يناظرها
ونطق: ياربي ماشاءالله انا لازم اتزوج ابي كذا
ضحكو العيال عليه ونطق نهار : يلا اصمل ونعرس سوا انا وياك
ولف سعود عليه : هاه كم باقي ؟!
رفع حاجبه نهار ونطق :قريب مثل قرب رمشك لعيونك
فهد : اي والله قريب
تركي : الله يتمم على خير ان شاء الله
لف نهار وابتسم وضحك عزام ونطق : هاه دام الوالد قالك الله يتمم اجل
قرب صدق.
ضحك تركي وهز براسه: قرب
بنفس المستشفى بس بقسم الطوارئ وهي واقفه وتدق على هيام بس ماردت عليها ونطقت : ياربي وينها ذي ماترد علي اووف
وبحكم ان هيام اغلب الايام الاخيره ماتداوم ماجاء شيء ببالها نزلت جوالها ومشت للكافتيريا وهي تطلب لها قهوه وجلست على احد الطاولات وهي تشرب من قهوتها و فتحت جوالها تقلب فيه .."
اخذ نايف زهر من يد سند وعض على شفته السفليه بالم ونطق لسند امسك امسك شوي رجع سند ياخذ زهر من جديد ونزل يده نايف وهي حرفيا تعوره بشكل يخوف ونزل راسه سند ليد نايف ونطق : ياحيوان وش قلت لك انا طيب يانايف ومد سند زهر لعزام واخذها عزام يدخل فيها الغرفه ومشت له كنوز من شافته ووقفت له وابتسم ينطق لكنوز : عقبالنا ياكنوزي
بادلته الابتسامه ومد لها عزام زهر واخذتها من يده ومشى يطلع ودخلت
كنوز تحط زهر على الكرسي حقها
سحب سند نايف من يده ومشو يطلعون ونطق سند بحده : وش الاهمال هذا اللي فيك خير انت تعرف الكسر وشو ولا ماتعرف وش انا قايل لك ؟! هاه وش قلت
لف نايف عليه : يخوي وش فيك انت نسيت بعد اللي صار ماعاد
دريت عن نفسي
دفه سند ونطق : امش قدامي يلا الله يعيني عليك
نايف : ابي قهوه اول شي راسي بينفجر ومشى للكافتيريا وسند يتبعه ودخلو ونطق سند : اجلس انا بطلب ومشى نايف يجلس وهو يتعصر
من الالم بس مع هذا يكابر كالعاده
اخذ سند اكواب القهوه ولف وشهقت ايمان ورجعت على الورا من حست اكواب القهوه بدات تميل عليها بس مسكها سند قبل تطيح عليها ورفع عيونه نايف ووقف يمشي له واخذ الاكواب من يده وابتسم سند بواسع ثغره
ونطق : يا أهلا ياأهلا
عقدت حاجبينها بصدمه ونطقت : بسم الله الرحمن الرحيم متى جيت انت وياه
ابتسم نايف وضحك سند ونطق سند: من يومين
ولفت وجها ونطقت بهمس : عشان كذا الحيوانه ماترد علي
ولفت ايمان لنايف : اتمنى انك تتفضل على وتعقله الارض تقهوت اكثر منه
ضحك نايف وهز براسه لها ونطقت : على العموم الحمدلله على السلامه
ونطقو الاثنين: الله يسلمك
ولفت بتمشى ولفت على نايف : وين هيام ادق عليها ماترد ولها
حول الاسبوع ماداومت ؟!
حك جبينه نايف ونطق : فوق بالتنويم
خفق قلبها ونطقت بخوف : وش فيها ؟!
ونطق نايف لها باللي صار وركضت تطلع لها ومشت للغرفة حقتها ودخلت تركض لها ومن شافتها بكت ايمان وحضنت هيام وشدت عليها هيام ونطقت ايمان وسط دموعها: كل هذا صار فيك وانا ماادري عنه بعمري عنك
ابتسمت هيام ونطقت: بعمرك العافيه
وابعدت عنها ايمان وهي تناظرها : انتي بخير ؟!
هزت براسها هيام وهي تمثل انها فعلا بخير : بخير الحمد لله
ورجعت تحضنها ايمان ونطقت: ليش ماقلتي لي ليه كيف ماحسيت انا كيف
زمت شفايفها هيام وسكتت من حست بدوخه اثر دموعها اللي ماوقفت وصارت تنزل على كل موقف يصير لها وابعدت عنها ايمان وشافت دموع هيام ونطقت هيام : فرحتي ناقصه ايمان قلبي بينفجر قاعده احس ان اشم ريحه حريق بداخلي شلون بقدر اكمل حياتي ايمان كنت انتظرهم الاثنين كلهم صدري يشب ايمان احس اني بموت باي لحظه من كثر الالم اللي احسه بداخلي
بكت ايمان معها ورجعت تحضنها وهي تهديها ورفعت عيونها هيام تضغط على جفونها ودخلت الممرضه تقول لهم ان الزياره انتهت طلعو كلهم وبقت ايمان عندها وهيام بحضنها ابعدت عنها هيام
ونطقت لها : مو طايقه اشوفه ايمان نايف ماعاد بلعته
وانصدمت ايمان ونطقت: شلون هيام ونايف وش دخله ؟!
صدت بعيونها هيام ونطقت: حتى انتي تقولين لي وش دخله ورجعت تناظرها وكملت كلامها هو السبب بكل شي هو ولا تقولين لي شيء لكن مااكون هيام اذا ماندمته على كل شيء صار لي من اول يوم راح لليوم اللي
ودعت فيه قطعه من روحي
رفعت حاجبها ايمان وهي تناظرها وبنفس الوقت مو فاهمه شيء بس التزمت الصمت ولفت انظارها تشوف زهر وقامت تشيلها وتسلم عليها
ونطقت ايمان : هيام نسختك مره
مسحت دموعها وهي تناظرهم وابتسمت: كلهم يقولونها
ومسكت ايمان يد زهر ونطقت لها : يازين الزين صدق وش هالحلاوه
هاذي هاه ياربي مقدر تجننن .""
ولفت هيام تاخذ علبه المويه وتشربها دفعه وحده وتنهدت ورجعت ايمان زهر بكرسيها ودخل نايف الغرفه ولفو عليه ونطقت ايمان لهيام : انا بروح انتهى البريك من عشر دقايق تقريبا اذا تبين شي دقي علي
هزت براسها هيام ومشت ايمان تبارك لنايف على زهر وطلعت
وهي مصدومه فعلا من حالة هيام الغريبه تنهدت ومشت ترجع لقسمها
ومن شافته واقف يناظرها تكروت على نفسها وصدت عنه
ونطق بداخله : يارب صبرك ومشى يجلس على الكنب ودخلت الدكتوره عليهم ونطقت : الحمدلله على السلامه اول شيء واخر الاوجاع يارب
وقامت هيام تتوسط الكرسي ونطقت : الله يسلمك
ونطقت لنايف : انا قلت لك ان بنتك بتجلس حول الثلاث ايام بس الحمدلله وضعها تمام وطلعنها قبل تكمل الثلاث ايام وعلشان كذا انا جايه
اقولكم تقدرون تطلعون من بكره
هزت براسها هيام ومشت الدكتوره تطلع من الغرفه ورجعت تنسدح
وسكت هو ولا نطق بحرف واحد ....""
ومن نزلت ترجع القسم كان واقف قدام الباب ونطق من شافها : اخيرا شرفتي
عضت على شفتها تكتم ضحكتها ونطقت : وش تبي ؟!
وضحك سند ونطق: عندي جرح بكتفي ويحتاج اناملك ممكن تتفضلين عليه
عقدت حاجبينها ونطقت : جرح !!من وش ؟
هز براسه سند : رصاصه
ونطقت ايمان بخوف : ياساتر !تعورك ! ومن متى ؟!
ابتسم سند من لاحظ خوفها عليه وهذا المطلوب عنده : اخر يوم بالمهمه
ايمان : تعال معي
مشى وراها ودخل يجلس قدامها وفتح ازرار ثوبه لين بان كتفه ومشت ايمان له وهي تفتح الشاش اللي يحتوي كتفه ونطقت بخوف : سند يعورك يالله وش هذا
عض شفته ونطق : يعني مو مره حطي يدك عليه واوعدك ماعاد احس فيه
لفت تعدل الشاش ونطقت وهي معطيته ظهرها و ضحكت : باقي فيك شده تغازل وانت كذا !؟
هز براسه سند بمعنى ايه وضحك بنفس الوقت : متى ودك نتمم ؟!
ابتسمت بدون ماترد عليه ولفت تغير جرحه وتلف الشاش
عليه : خلصنا تقدر تروح
رفع حاجبه سند ونطق: ماودك تجاوبيني ؟! متى يناسبك ؟!
ايمان : ماادري بس الحين الوقت مو مناسب انتظر شوي ولفت تطلع من عنده
وقام سند يطلع وراها ونطق لها : استعجلي ماعاد فيني صبر
ضحكت ايمان :اعرفك مايحتاج تقول
وابتسم سند وطلع من المستشفى وهو يركب ولفت عليه جود : وينك سند خير وش هالتاخير بموت حر شغل المكيف
ضحك سند ونطق:اسفين ياحبيبتي وحط يده يشغل المكيف وحرك من عند المستشفى لبيتهم ....""'
اصبحت الدنيا ووقفت تسند نفسها على الجدار وتجمع اغراضها وهي رافضه اي مساعده منه وهو حس ان صبره بدا ينفذ ونطق لجل يلطف
الجو : يلا زين بتطلعين من المستشفى عاد بيتك مشتاق لحسك
سكتت وهي تقفل شنتطها وتلبس عبايتها وتلف طرحتها ومشى يطلع يجيب لها عربيه ورجع يدخل عندها ومن شافت العربيه صدت عنه وتنهد ونطق
: اجلسي واتركي العناد عنك
تاففت ونطقت : مابي اجلس انا بمشي
سحبها مع ذراعها وجلسها على العربيه غصب عنها : اهجدي انا اقول ومشى ياخذ زهر وتكهرب جسمه من رجع الالم يزيد عليه وغمض عيونه وحط زهر بحضنها وطلع للممرضات وطلبهم يطلعون هيام لانه حرفيا ماقدر يحرك يده من تورمت وتغير لونها اخذ الشنطه حقتها بيده الثانيه ومشى وراهم واستغربت انه مو هو اللي يدفعها بس سكتت وطلعو لسياره وقامت تركب وزهر بيدينها ركب الاغراض وتنهد وركب السيارة ونطقت اول جاء بيمشي : ودني عند اهلي
لف عليها يناظرها ونطق : جالسه تزودينها ترا يكون بعلمك
رفعت عيونها بتعب من الحوار معه ونطقت : شوف مالي خلق اتكلم وكان ودك اني ماازودها ودني انا مابي اروح معك لاتجلس تشغلني حرك وان كانك بتمشي كلمتك علي قولي من الحين وخلني ادق على واحد من اخواني
يجي ياخذني
وضرب بيده على الدركسون وانتفض داخلها وعرفت انه عصب
ونطق بحده : لاتستفزيني وتختبرين صبري مافي روحه
تسمعين ويلا وريني وش بتسوين اعطيتك وجه انا
وتغير صوتها وهي فعلا خافت من رفعت صوته
ونطقت : تكفى ودني مابي اكرهك
ولف عليها بصدمه من كلامها اللي حرفيا جالس يذبحه : حرام عليك تكرهني لذي الدرجه ماتبيني !؟
شدت على زهر بين يدينها ونطقت : واكثر بعد ودني بيت اهلي
لاتجمعها على نفسك
هز براسه نايف وفعلا مشى يوصلها لبيت اهلها ونزلت وسكرت الباب وراها وهي تمشي شوي شوي لين دخلت البيت واعطت امها زهر وتسندت على سور الدرج لين وصلت غرفتها ودخلت وهي تجلس على السرير وهي ماسكه بطنها
ونزل نايف اغراضها وطلعت له فاطمه تاخذ الاغراض منه ونطقت فاطمه وهي عارفه ان هيام ماتبي تروح معه وكانت ملامح الغضب واضحه على ملامح وجهه : نايف معليك يمه كل شيء بيصير تمام انت خلها عندنا الفتره ذي وكل شيء بيتحسن
هز براسه نايف ومشى يركب السياره ورفع كم ثوبه وهو يناظر يده ومشى للمستشفى من حس انه ماعاد قدر يتحمل الالم وصل ونزل وانتظر دوره ودخل عند الدكتور وانفجع الدكتور من شاف يده ونطق : يادافع البلاء وش ذا من متى وهي كذا ؟!
ونطق وهو يصارع الالم حرفيا : من اربع ايام تقريبا
ونطق الدكتور: انت متحمل الالم اربع ايام ؟!
وسكت نايف ومارد عليه وسوا له اشعه ونطق الدكتور : كسر مضاعف
وانت اهملته و لازم عمليه لو جيت قبل كذا كان عرفنا وش نسوي بس الحين مانقدر ولازم جراحه وبتكون يوميه
لف نايف عليه فتح عيونه على الاخير : جراحه وش ؟! يادكتور حط لي جبس وخلصني .."
الدكتوره : لازم جراحه ماعندك غير هالحل
تافف نايف بضيق واخذ جواله يدق على سند وقال له وقفل منه ..."
وساعه كذا ودخل سند عنده بالغرفه ونطق وسط انفاسه اثر ركضته : وش جراحه من جدك انت ؟!
هز براسه نايف ونطق : اصمقني ذا الدكتور المشكله اني بموت من الالم خلاص ماعاد فيني شده الا ارضخ له
ورفع شعره سند عن جبينه ونطق : قلت لك بس هذا انت كذا ماتتغير لو تتغير الامه ذي كلها ماتغيرت انت انثبر مكانك وخله يسوي شغله وسد حلقك .."
طلعت فاطمه بصحن الشوربه لهيام ومشت تعطيها
ونطقت : امسكي هيام اشربي
واخذت هيام الصحن من يدها وهي تشرب منه ولفت هيام من شافت زهر تبكي ولاشعوريا بكت معها وزفرت فاطمه : وش له البكي ابي اعرف عيونك تورمت وانتي تبكين
ونطقت هيام وسط دموعها: ليش تبكي ؟!
تنهدت فاطمه: وشو اللي ليش تبكي طفله ترا ماتقدر تعبر
الا بالبكي بس انتي وش عذرك
اخذت فاطمه الصحن ووقفت ونطقت : رضعيها وبتسكت
هيام : وانتي وين بتروحين ؟!
رفعت فاطمه الصحن : بوديه واجيك
هزت براسها هيام ونزلت فاطمه ورجعت تطلع لها ..."
وعند سند كان واقف عند العمليات ينتظر نايف يطلع تنهد وهو يجلس على ركبه وينتظره ومر الوقت لساعات وطلع نايف من العمليات وبعد كم ساعه زياده قام من البنج وسند عند راسه فتح عيونه نايف بصعوبة ونطق وسط تعبه
لسند : جيب لي مويه
هز براسه سند وفتح المويه واعطاه وقام نايف يشرب
ونطق سند : الحمدلله على السلامه ماتشوف شيء لو سمعت كلامي
ماصار فيك كل هذا اهاه يا كبريائك ذا ذبحني
ونطق نايف وهو مو قادر يقول كلمه :البخ سند مو وقتك
ضحك سند ونطق:ابشر بس كيف تحس الحين
هز براسه نايف:احسن من اول ونزل عيونه ليده المجبره ورفع
عيونه لسند كم الساعه ؟!
نزل راسه سند ليده ونطق : اثنين الظهر
تنهد نايف ودخل الدكتور عليهم ونطق : الحمدلله على السلامه العمليه كانت ناجحه الحمدلله ولازم تراجع عندنا باستمرار لين يلتئم الكسر وبعدين نفك لك الجبس وساعه كذا وبعدها تقدرون تطلعون
هز براسه نايف ونطق سند لدكتور :كلمه يادكتور بيرفع ضغطي وماراح يجي المواعيد اعرفه
ضحك الدكتور ونطق نايف بهمس: ياسخفك يادكتور ولف على سند
انطم انت لاقوم عليك .
<<على الغدا ببيت تركي >>
مجتمعين كلهم ويتغدون ولفت فاطمه على تركي :دق نايف يجي يتعشى اليوم عندنا ولفت هيام ونطقت : ليش تدقون عليه ؟؟
رفع حاجبه تركي : وش اللي ليش ندق عليه بقول له يجي يتعشى
عندنا ويشوف بنته ليه وش الحاصل ؟!
صدت بعيونها عنه ونطق عزام : وش فيه هيام !
فاطمه :مافيه شيء بس الاخت محملته سبب كل اللي صار
ولفت هيام على امها ونطقت : ييييممممممهههه
لفت فاطمه عليها : ووشوو هيام تكلمي وشو !؟
وسكتت ونطق تركي بحده : تكلمي وش فيك رفعت عيونها لابوها
وهي حرفيا صارت تخاف من رفعت الصوت
وتشكلت الدموع بعيونها ولفو كلهم يناظرونها بصدمه
ونطق تركي : مو لك شهور تنتظرينه هذا هو جاء .."
ونزلت راسها هيام بدون اجابه ونطق عزام : تكلمي وش هو مسوي لك ؟!
ولفت كنوز تناظر عزام ونطق تركي : اكلمك انا !
هزت براسها هيام وهي تعرف انها لو قالت لهم محد راح يفهمها
وتكلم تركي : اجل دام ماعندك سبب بدق عليه بقول له يجي وبسوي عشاء بسلامتك وبعزم الكل عليه
ورفعت عيونها بصدمه تناظره ونطقت تترجاه : سلامتي ؟! ايه سلامه يبه انتو شكلكم مو مستوعبين اني ناقصه صفقت بيدها على الطاوله ولدي هذا عاش ببطني شهور ونايف اللي انتو جالسين تدافعون عنه ماعاش ربع اللي عشته انا تبي تسوي عشاء سوي براحتك ودق عليه بس لاتطلب مني انسى وارجع طبيعيه وكانه ماصار شيء وقامت من بينهم تطلع غرفتها
وتجمد تركي ونطق : بسم الله وش فيها البنت ؟!
سعود : انا ملاحظ انا مو طبيعيه من شفتها بالمستشفى
ضحى : منجد وضعها يخوف مو متحمله كلمه حرفيا من احد
عزام : بس الرجال وش دخله ابي افهم ؟!
وسكتت كنوز وهي مصدومه من كلامها
ونطق تركي : خلاص لاعاد احد يفتح معها شيء ولا احد يجبرها على شيء
تنهدت فاطمه بضيق وعم الصمت بينهم .....""
وقام نايف يطلع من المستشفى وركبو السياره وحرك سند لبيت نايف وصلو ونزل سند معه ودخلو ورمى نفسه على كنب الصاله وسند جنبه ويطلع ادويته على الطاوله : هذا مرتين في اليوم وهذا مره وهذا...
وقطعه نايف : سند مكتوب عليها صح ؟!!
هز براسه سند : صح
نايف : اجل خلها اعرف اقرا
وضحك سند: يخوي وش الاخلاق التجاريه ذي يلا نعذرك
توك طالع من المستشفى
وسكت نايف ونام من كثر تعبه."
...........................................................
<<يوم جديد الساعه ١٠ الصباح >>
متمدده على السرير وزهر جنبها وماسكه انامله الصغيره وكل تفكيرها فيه وتنهدت بضيقه وبغصه واقفه بنص بلعومها على كثر م هدرت دموعها ماراحت هالغصه من حلقها وقامت من جنبها تناظر الدريشه وتناظر اشعة الشمس وهي مو عارفه وش تبي بالضبط بس كل اللي تبيه حاليا تبعد عن نايف ."""
فتح عيونه بتعب وهو طول امس نايم اثر تعبه لف يناظر حوله وماشاف سند اخذ جواله يناظر الساعه وفتح رساله من سند محتواها :
انا رحت شفتك تاخرت بنومه وماحبيت اصحيك خذ ادويتك وكل زين .
اخذ جواله وطلع الغرفه وفتح ازرار ثوبه وهو يحاول يفسخه وبعد محاولات عديده نجح ورمى ثوبه ودخل يغسل وطلع وصلى فرضه اللي فاته ولف يناظر اتصال من تركي اخذ الجوال ورد عليه
ونطق تركي:شلونك يانايف
نايف : ارحب زين الحمدلله وشلونك انت عساك طيب
تركي : تبقى الحمد لله بخير ونعمه
نايف : دايمه
تركي : وياك اسمع ننتظرك اليوم على الغدا لاتتاخر ساعه كذا وانت عندي
ونطق نايف:يا عم مايحتاج خلها مره ثانية
تركي : لا ثانيه ولا ثالثه اعجل يلا وقفل تركي بدون مايعطيه اي مجال للرفض
تنهد نايف وقف قدام المرايا يناظر تفاصيل وجهه توسم الهالات تحت عينه والتعب الكثير والواضح عليه تنهد بضيق يناظر يده واسمرار بشرته اثر مهمته اللي ماشاف منها خير لف يدخل غرفه الملابس وطلع ثوب اسود وهو يحاول يلبسه ورفع اطراف كم الثوب علشان الجبيره سكر ازرار ثوبه ومشى يجلس قدام المرايا وهو يتذكرها ويناظر اغراضها حول التسريحة ابتسم بضيق على حاله معها واخذ ساعته يلبسها ويقفلها و يلبس دبلته ونزل عيونه لعطرها اخذه وهو يرش منه بارجاء الغرفه وكانها معه نزل العطر واخذ عطره ورش منه قام واخذ شماغه الاحمر يلفه على راسه عصبه وقام ينزل اخذ مفتاح سيارته وطلع يركب ورفع يده يناظر الساعه من كانت حول ١١ونص تقريبا وقف عند بيت تركي ودق الباب وطلع له عزام ونطق بستغراب من شافه : وش فيها يدك ؟!
نزل نظراته الشمسيه ونطق : كسر وطاب
بقق عيونه عزام ونطق : كسر متى توك قدامي امس مافيك شيء !
نايف : من المهمه بس معليك عدت على خير بنجلس نسولف عند الباب
ابتسم عزام: ادخل حياك
نايف : الله يسلمك ودخل المجلس وكلهم يناظرون بيده
ونطق تركي : عسى ماشر وش الحاصل ؟!
وقال له نايف انه كسر من كان بالحد وماجاب ابدا طاري العمليه
تركي : اجر وعافية
سعود : اي والله ماتشوف شر
نايف : مايجيكم ان شاء الله عزام ولا عليك امر بشوف هيام وزهر
وقف عزام ونطق : ابشر
وطلع ودخل المطبخ عند امه ونطق : يمه نايف جاء ويقول يبي
يشوف هيام وبنته روحي عقلي بنتك وخليها تنزل
فاطمه : زين روح وانا بقول لها هز براسه وطلع عزام للمجلس
ومشت فاطمه تطلع لهيام وكانو كنوز وضحى عندها ونطقت فاطمه : هيام نايف تحت يبي يشوفك خذي زهر وانزلي ."
تاففت من الطاري ونطقت : خذي بنته خليه يشوفها انا ماني نازلة
ومشت فاطمه عندها ونطقت بحده: هيام الكلام لا اعيده عليك مرتين قومي
اخلصي علي .."
ووقفت ونطقت بحده : ماراح انزل انا حالفه يمين اني لاربيه
واذوقه اللي ذقته جاء يبي يشوف بنته صح اعطيه انا ماني نازله
رفعت حاجبها كنوز وهي بهالحظه انحرق قلبها على نايف وقامت
تنطق : عفوا هيام بس تربينه على وش ؟! همم وش هو مسوي ليكون الولد اللي مات ولدك وحدك اتركي الانانية عنك وكلنا نعرف ان نايف راح مجبور هذا شغله ان كانك ناسيه ."
فتحت عيونها هيام ومشت لها ونطقت : وانتي وش دخلك هاه وش دخلك !
انفعلت كنوز ونطقت: شكلك ناسيه انه اخوي وانا ماراح ارضى اسمعك تتكلمين عنه كذا واجلس ساكته لك
ومسكتها هيام مع ذراعها ونطقت : اقصري حسك ولاتحشرين
انفك بشيء مايخصك زي ماهو اخوك هو زوجي وكيفي اقول اللي ابي
ووقفت فاطمه بينهم وسحبت يد هيام مع على كنوز ونطقت فاطمه بصراخ على هيام : ههيييااااااممممممم ابلعي لسانك ولفت على كنوز وانتي كنوز روحي غرفتك يلا
تغيرت ملامح وجه كنوز بقهر ومشت تطلع من الغرفه وقامت ضحى لهيام ونطقت : هيام منجدك خيررر !!
مسكت على راسها هيام ونطقت : اطلعو برا وموضوعي مع نايف لحد يتدخل فيه مالكم دخل كلكم وكنوز ذي انا اعرف كيف اربيها هي واخوها يمه خذي زهر وانزلي انا ماراح انزل له لو يموت ،،
سكتت فاطمه وهي تاخذ زهر وتطلع وطلعت ضحى وراها ومشت تسكر الباب ومشت لسرير ودفنت وجها فيه وهي تطلق شهقاتها ...
نزلت فاطمه بزهر ودخلت المجلس وانصدمت من شافت نايف بس ماقالت شيء من اشر لها تركي تسكت واعطته زهر واخذها نايف وهو يشيلها بيده الثانيه وقرب يبوسها ولف لفاطمه ونطق : وينها ؟؟ !
تلعثمت فاطمه وهي مو عارفه وش تقول له وهز براسه نايف
ونطقت فاطمه : الغدا حياك واخذت زهر من يده وقامو يتغدون وهي كل لقمه تنزل سم بحلقه خلصو ووقف من حس انه يبي يطلع اعتذر منهم وخرج ومشى عزام يتبعه عند السياره وقربت من الدريشة تناظر بصدمه من شافت يده ونطقت بخوف وربكه: وش فيه ؟! يمه بسم الله توه قدامي امس ماكان فيه شيء شدت على الستاره وهي خافت عليه فعلا دخل عزام واخذ دخانه وحطه بين شفته وولعه ورفع انظاره من حس ان في احد يناظره وسحبت الستاره بسرعه من شافته رفع عيونه يناظرها وتنهد ونفث دخانه وركب سيارته وحرك ..."
اما عندها خافت فعلا عليه ومشت تجلس على السرير ونطقت : معقوله صاير له شيء بس امس مادق ولا حتى سال ورجعت تفكر بكلام كنوز لها ودقت الباب فاطمه وقامت تفتح الباب لها ودخلت فاطمه بزهر وهيام تناظرها وهي تبي تعرف وش فيه وحطت فاطمه زهر على السرير وجت بتطلع بدون ماتنطق بحرف ونطقت هيام : يمه
لفت عليها فاطمه ونطقت وسط زعلها : نعم ؟!
رفعت حاجبها هيام وعرفت انها زعلانه ونطقت: وش فيها يده ؟!
ونطقت فاطمه وهي فعلا زعلانه من تصرفاتها: مكسوره ولك ان تتخيلين انها مكسوره من ايام مهمته ونسى نفسه عشانك وانتي ممرضه
وتعرفين وش هو الكسر انصدمت هيام وهي تسمع كلام امها وكملت فاطمه
كلامها وش تبين هيام علميني وش تبين، تبين نطلقك منه ؟؟
طارت عيونها هيام ونطقت : من جاب طاري الطلاق يمه ؟!
هزت براسها فاطمه : اي صح الرجال بيكون واقف عند باب بيتك لين حضرتك ترضين صح ؟؟ انا اقول اعقلي وفكري ببنتك وطلعت فاطمه من الغرفه وبلعت ريقها هيام وخافت فعلا ان نايف ينفذ صبره منها ..."
ونزلت فاطمه تجلس بالصاله وهي تهز برجولها ولف
عزام لضحى : كنوز وين مو كانت عندك ؟!
سكتت ضحى وصدت عنه بدون ماترد عليه
ورفع حاجبه عزام ونطق: اكلمك انا وش فيكم ماصرتو تسمعون ؟!
ولفت ضحى عليه ونطقت : تهاوشت هي وهيام
عقد حاجبينه بستغراب لانه يعرف كنوز ويعرف ان الكلام محسوب عندها ونطق : ليه ؟؟؟! وش صاير ؟!
ونطقت ضحى بكل شيء له وزفر بضيق وقام يطلع لها دخل وهو يشوفها جالسه على السرير ويدها بشعرها مشى يجلس جنبها ونطق : ليش كنوز ؟!
لفت عليه ونطقت : وش اللي ليش ؟!
عزام : ليش تهاوشتي مع هيام
رفعت شعرها بيدها ونطقت : ليش ؟! عزام انقهرت على نايف وانت تعرفني ماني من النوع اللي يخلق مشاكل بس هذا اخوي عزام مهما كان
ماراح ارضى عليه
وتنهد عزام ونطق : بس هي تعبانه الفتره ذي وجالسه ترجع ضغطها
علينا كلنا نعرف ان نايف ماله ذنب بس مصيرها تفهم صح ولا انا غلطان!
سكتت وصدت بعيونها عنه ومسك يدها ونطق: كنوزي خلاص عاد لاتزعلين
لفت عليه ونطقت : عزام انا مو زعلانه وماكان ودي اتكلم عليها اعرف وضعها اي بس ماقدرت امسك نفسي واللي بيسمع كلامها يقول انه طول الشهور اللي راحت كان يلعب ومبسوط وهي الوحيده اللي كانت تعاني
ونطق عزام : ككككنننوززز خلصنا
تاففت كنوز وسحبها عزام لصدره وتنهدت كنوز وتذكرت سالفه حملها ورفعت راسها تبي تقول له ونطقت : عزام
رفع حاجبينه الاثنين ونطق : قولي
اخذت نفس وجت بتنطق ودق جوال عزام ونطق لها : بس شوي
هزت براسها ورد عزام من كان نصار ونطق نصار : ياكلب وينك فيه لابو هالزواج اللي ابعدك عني ؟!
ضحك عزام ونطق : الناس تسلم بالاول
نصار : اقول لاسلام ولا كلام شغلك عندي ان شاء الله انزل لي انا عند الباب
ونطق عزام وسط ضحكته: يلا جايك
قفل منه ونطقت كنوز : وين بتروح ؟!
عزام : كنوز حبيبي نصار برا بروح له من زمان ماشفته ووقف وقبل يمشي نطق : وش كنتي تبين تقولين ؟!
هزت راسها بمعنى ولا شيء : ولاشيء روح انت الحين وبعدين اذا
رجعت نتكلم .."
قرب منها يقبلها ونطق : زين يلا انتبهي لك وطلع من الغرفه
وتاففت ونطقت : يالله هذا شلون اقوله وهو مايجلس ساعه معي .."
عند هيام وهي تفكر بكلام امها وبنفس الوقت خايفه عليه اخذت جوالها ودخلت على رقمه وسرعان ماترددت ورمت الجوال ونطقت :شلون اعرف طيب اوف ياربي ورجعت تمسك جوالها بسرعه من شافته يدق عليها وخفق قلبها بخوف وهي تناظر رقمه وردت عليه ونطق : اهلا وسهلا اخيرا قررتي تردين علي
ونطقت بربكه لاحظها نايف : وش تبي !
ونطق نايف بحرقه : وش ابي ؟! انتي وش فيك انتي وش النهايه هاه
ونطقت ساخره من كلامه معها : ابيك تبعد عني بس وتبطل دور البطل في عيون اهلي لان الكل صار يلومني
انفعل نايف ورمى عصبته على المقعد اللي جنبه ونطق : شوفي انتي تعرفيني مااصبر كثير لا تستفزيني وتطلعين من طوري وتخليني اسوي شيء يزيد زعلك اكثر تراني محترم قرارك بالجلسة ببيت ابوك ومقدر اللي مريتي فيه تعالي عندي وعيشي حزنك لين تفرغين كل اللي بداخلك بس شغل المسافات هذا بيخليني ازود زعلك رجعي عقلك براسك واطردي الشياطين منه
ضحكت بسخريه ونطقت : انت غبي او ان الكسر اللي بيدك اثر
على دماغك لامجال لعذر ثالث ..
ونزل عيونه نايف ليده ونطق : وصلك الخبر على طبق من ذهب
ولا حضرتك نبشتي فيه ؟!
وجت بتعض على شفتها وسرعان ماتراجعت وكانه يشوفها بلعت ريقها ونطقت :اللي هو وش يفرق ؟!
ونطق يوضح لها الفرق : الفرق اذا كان وصلك العلم على طبق من ذهب هذا دليل انك فعلا مو مهتمه لاني اعرفك ماراح تصدقين شيء لين تشوفينه بعيونك واذا انتي اللي نبشتي فيه فهذا يثبت انك مهمته لامري وشفتيني بعيونك من طلعت من عندكم ، حست فيك لا تنكرين ونفسي تراودني انه الخيار الثاني وازيدك من الشعر بيت داخلك بيموت لو ماتطمنتي علي تبين اريحك يدي بخير ونعمه انكسرت وراح تنجبر مع الايام بس قلبي اذا انكسر منك وقتها ولا دكتور بيلقى حل لحالتي وانتي اختاري وش ودك سلام وقفل منها .."
ونزلت الجوال من شافت الخط انقطع ورفعت يدها تتحسس
عنقها ونطقت : بسم الله عليك وعلى قلبك "
..............................................
انتهى ✅
قراءه ممتعه
لاتنسون ⭐️
