رجعت تناظره ومسحت دموعها بيدها : بتطلق وغصب عن خشمك ليكون في بالك اني بمشي معك بعد الي سمعته بعيد عن شواربك تكون كنوز لك روح لرخيصه الي كنت واقف معها روح كمل ليلتك عندها انا بعيده عليك .......
برزت عروق جبينه من كلامها له ومسكها مع ذراعها يشدها له ونطق :شوفي يابنت الناس كلامك بعتبر اني ماسمعته ولاتجبريني اسوي شيء اندم عليه خذي عبايتك وامشي اهلك داخل واخوانك عند الباب عدي الليله وبعد ماتسمعين الي عندي سوي الي تبين ولا راح اسمح لك تشوفيني بالنظره الي حضرتك الحين جالسه تشوفيني فيها انا عزام ياكنوز ارجع اقولك ياها انا عزام ""'.،
سحبت ذراعها منه ونطقت بحده وحطت اصبعها بنص صدره : ولعنه وش يعني عزام نبي انت ولا ملاك مُنزّه ! ماراح اروح معك ارض طلق عزام لاالم عليك الناس كلها "
بلل شفايفه وعض عليها ورفع راسه من سمع اصوات قريبة منهم لف عليها وهي تناظره ونطق بهدوء :ماراح تمشين صح ؟!
امتلى وجها بدموعها ونطقت وسط بكاءها : لا والف لا ولو يخلطون دمي بدمك مارحت معك ".
هز براسه عزام بمعنى طيب وفك بشته وهو يحطه على اكتافها ويمسكها مع اكتافها ينزلها مع الدرج وصرخت كنوز وحط يده على فمها يكتم صراخها :اششششششش اسكتي كنوز ماابغى اجرم فيك امشي تحركي اشتغلت اغنيه بالقاعه من كانو البنات يرقصون عليها وزفر براحه لانه كان واقف مو قادر يسحبها من كبر فستانها نزل يده من على فمها ونطق :الحين اصرخي لين تشبعين ".،
مشى قدامها وهو ينزل يسحب الفستان ؛الله يلعنه من فستان
لفت تصرخ تبي احد يلحق عليها بس كانو كلهم بالقاعه ومحد حولها ومشى للباب وفتحه ومسك يدها ونطق: الحين الرجال برا اقسم بالله لو اسمع حسك ان تزعلين امشي مشى فيها لسيارته وهي تقاومه فتح الباب وهو يدخلها ونزل عليها ودخل راسه يقابل وجها بالضبط شدت على عروقها من قربه الزايد منها وتكلم ووجها بوجه :بروح اجيب اغراضك واجي كنوز لاتجمعينها على نفسك كلامك قبل شوي حطي في بالك انك راح تتحاسبين عليه اجل بعيده عن شواربي !!هاه طيب رفعت حاجبها له ورفع اصبعه يحطه فوق حاجبها بالضبط :نزليه ودام اني ابيك باخذك غصب عنك نزل راسه لنحرها المكشوف غطي نفسك بالبشت لحد يلمحك فقسم بالله ان اخليك تتكفنين بفستانك الي عليك
كنوز : مين تحسب نفسك انت ميننننننن ابعد عني ابعد الله ياخذك وياخذني انا من سلمت نفسي لواحد خاين مثلك ياراعي البنات لعبت عليها زي مالعبت علي صح شد على يده من كلمتها :انا راعي البنات ؟! زين اعتلت اصوات انفاسه من غضبه وسكر الباب بكل قوته وامن السياره وحطت يدها على الباب تبي تنزل بس كان مقفل وصرخت بعلو صوتها وبكت تشتم فيه وفيها ...
رجع يدخل وهو يصارع انفاسه استفزته بكلامها حط يده على شاربه واسرع بخطواته وشاف البنات بنص الممر وصد بعيونه وعقدت حاجبها هيام من صراخ البنات ونطق عزام يكلم نفسه :هذا الي كان ناقصني !
مشت هيام له :عزام اشفيك ليش رجعت فيك شيء ؟
لف عليها ورسم على وجهه ابتسامه ساخرة: هيام جيبي لي اغراض
كنوز كل شيء لها اعطيني
ونطقت هيام: ليه انت ماخذت اغراضها
هز براسه عزام بمعنى لا : لا روحي هيام جيبيها بسرعه
ناظرته بنظره كلها غرابه وهي تشوف ملامحه وحدتها لفت تدخل الغرفه
وشافت ضحى وشروق فيها :بنات ساعدوني قربو الاغراض
عند الباب حقت كنوز ""
ضحى : غريبه مو راحو ؟!!
وقفت شروق من شافت اغراض كنوز جوالها وعبايتها وشنطتها :لا اغراضها كلها هنا قامو البنات يسحبون الاغراض عند الباب ومشى عزام ياخذها ومشت الجوهره وفاطمه له ونطقت فاطمه :يمه عزام انتو مامشيتو ؟
وعض على شفته يبي يمشي : لا يمه باخذ الاغراض وبنمشي "
ومشو له وهم يسولفون معه وهو يتلفت يبي ينزل ويخاف انها تفضحه وتنزل ولا احد يشوفها وكل ماجاء بيمشي يفتحون سالفه له بلع ريقه ونطق : يمه انا بمشي كنوز بالسياره يلا مع السلامه اخذ اغراضها ونزل وهو يسمع الدعوات من خلفه طلع وفتح الشنطه وحط اغراضها ومشى يركب ورمى
الطرحه عليها :البسي
اخذت الطرحه وهي تلفها على راسها حط يده على شماغه ويرميه بالخلف رفع شعره عن جبينه وشغل السياره ومشى حطت يدها على ثغرها تكتم شهقاتها ومشى يبعد عن القاعه بمسافه ودق جواله وطلعه من جيبه وهو
يشوفه نصار : نعم نصار ؟!
نصار : وينك ننتظرك عند الباب
عزام : مشيت
نصار :لا ياشيخ من جدك انت واحنا ننتظر علشان نزف....
قفل بوجهه عزام وابعد الجوال عن اذونه نصار يناظره بستغراب
ولف للعيال ونطق :قفل بوجهي الكلب مشى يقول
سعود :شوف الحيوان احسن انا بروح اخذ وضيح وامي وبروح تعبان
وكل واحد ركب سيارته واخذ اهله ومشى ....
غمض عيونه وهو يسمع بكيتها وحط اصبعه بثغره يعض عليه وهو يسمع بكيتها وهذا عزام مايتحمل احد يبكي عنده قلبه تقطع عليها ووقف على جنب الرصيف ولف عليها ونطق : كنوز اسمعيني
ولفت وجها له ونطقت: عزام انت ماعندك كرامة الي فيك مو ثقه الي فيك حب تملك الي فيك مرض كيف قدرت تلعب على الحبلين كيف قدرت تحط عيونك بعيوني وتنطق بحبك لي وانت في انسانه ثانيه بحياتك
رجع راسه على المرتبه وغمض عيونه ورفع راسه من جديد ولف بجسمه كله عليها وصدت بعيونها عنه ونطق : كنوز اسمعيني انا ماادري عن شيء ولا حتى اعرف وش السبب الي خلها تقول لي كذا
لفت عليه تناظره:ايش يعني ماتعرفها ؟! والمطلوب مني اصدق كلامك ؟!
وكمل عزام كلامه : اعرفها بس مو المعرفه الي ببالك هاذي ملاذ
رفعت حاجبها له :وتنطق اسمها ياعزام قدامي كمان
تنهد ولف بعيونه ورجع يناظرها : كنوز اسمعيني لنهايه وبعدها قولي الي تبين وبدا يسرد لها علاقة بملاذ كنت بمكتبي كالعاده اشتغل على القضايا الي قدامي ودخلت علي وهي تبكي ومتوتره وحكى لها كل الي صار من طقق لسلام عليكم
وكنوز تسمعه وهاذي كل السالفه وماكذبت بكلمه وحده كنوز انا احبك انتي وشاريك انتي وابيك انتي وقلب عزام مافيه الا انتي انتظر هالليله من زمان لاتخربينها بسبب شيء ماصار ولا حتى راح يصير
ونزلت دموعها وامتلى وجها بدموعها وحط يده على خدها يمسح دموعها لاتبكين لان اذا في احد مفروض يبكي مو انتي هي كنوز ياحبيبتي انتي افهميني والله اني ماشفتها غير وحده من خواتي والله ولو اني ابيها زوجه لي كان خذتها من زمان فكري بعقلك كنوز "
نزلت راسها وصدت بعيونها تناظر قدامها..""
هز براسه عزام ولف وشغل السياره ومشى ووقف عند الفندق ومشى لها يفتح الباب وابعدت عنه تمشي وحدها بعيد عنه مشى وراها ودخلو جناحهم ودخل قبلها وسحب فستانها من تحت ودخلت الغرفه وجاء بيدخل معها وسكرت الباب بوجهه وغمض عيونه من صوت الباب الي تسكر بوجهه رمت نفسها على السرير وهي تنهار تبكي عض شفته من سمع صوت بكيتها ودق الباب يناديها :كنوز افتحي الباب بتخليني انام بالصاله يعني ولا وش افتحي والعني الشيطان افتحي ماسمع ردها وكل الي يسمعه صوت بكيتها حط يده يفك ازار ثوبه العلويه وجلس عند الباب وسند ظهره عليه : لا عريس ماشاء الله .....
دخلت الغرفه تنهدت من اقصاها بتعب تنزل عبايتها وترميها على السرير انحنت تفسخ كعبها تقدمت تجلس على كرسي التسريحه ودخل نايف ووقف عند باب الغرفه يناظرها وهي تحرك شعرها بيدها وتحط يدها على نحرها وتناظر نفسها بالمرايا تكى بكتفه على الباب وتكتف يناظرها والابتسامه على ثغره وهو يشوف فستانها الاحمر القصير وكعبها المرمي بنص الغرفه نزلت راسها على بطنها وهي تتكلم مع زهر : زهر وبعدين معك هذا وانتي باقي نتفه ومالك شهر وسويتي كل هذا فيني ايش بتسوين الشهور الجايه احترمي نفسك مو من صالحك الحركات ذي وبعدين معك يعني وتاففت بتعب "
وانفجر يضحك عليها ولفت عليه ونطقت :بسم الله انت من متى هنا ؟
ابعد كتفه يدخل الغرفه ويسكر الباب :من لما قررتي تتكلمين مع زهر وش تقولين انتي للبنت هاه ؟!
ابتسمت هيام له : لو سمحت ياابوها خلني اعلمها الادب يرضيك
الي جالسه تسويه فيني ؟!!!
وضحك نايف ونطق وسط ضحكته: مايرضيني والله ولو انها مو زهر وبنتي كان عرفنا وش نسوي بس امر الله اقوى "
وابتسمت له ولفت عيونها للمرايا واخذت الشباصه تجمع شعرها كله فوق ونزل عيونه لظهرها ورفع حاجبه يناظره ورفع يده ينزل شماغه ويرميه على السرير ومشى يسحب يدها ووقفت له وحط يده على خصرها
ونطق: وش هالفستان ؟؟!!
رفعت حاجبها :وش فيه ؟!
شد على خصرها يقربها له اكثر : وش فيه ؟! تسالين كمان ؟! ظهرك كله برا ليه خلصت الفساتين ؟!!!
ميلت شفايفها له : نايف وش فيك توك تستوعب مو طلعت لك بالزواج
رفعت يدينها تحاوط رقبته من شد على خصرها : ماشفته من ورا ولو شفته ماكان صارلك طيب "
وابتسمت له ونطقت بحده : انت ياانك ماتفهم ياانك تستعبط وحده من الثنتين
نايف:لا والله! في ايش ؟!!
رفع يده على ظهرها المكشوف وعضت هي شفتها من حست فيه يمرر أنامله على ظهرها بلعت ريقها تحاول تبعد توترها ونطقت : في انك كل مره تهدد وانا ارجع اقولك التهديد ماينفع معي بعاند اكثر ترا وبرجع البسه
مره ومرتين وثلاث "
رفع حاجبه نايف ورفع يده يسحب الشباصه عن شعرها ينثر شعرها على متونها : ياشيخه!! احلفي بس اجل حطيها في بالك الفستان هذا حدك فيه عند باب الغرفه وبنتحاسب عليه بس ماراح افوتك الليله لاني اطلع غبي لو فوتك
غمضت عيونها و رفعت راسها من دفن وجهه بنحرها يقبلها رفعت يدينها تخلخل اصابعها بشعره وحط يده على سحاب الفستان من الخلف ورفع راسه يقبل ثغرها و''''''.......
سادحه على بطنها ويدها بشعرها وتكلمه فديو وهو بالسياره يسمع سوالفها
نهار: عقبالنا ياضحى عقبالنا
ابتسمت ضحى: ان شاء الله عاد هذا الموضوع بيدك انت شد حيلك وتخرج
اخذ الجوال يرفعه من الاستناد ويناظرها
وابتسم : ماشفتك اليوم كان بخاطري اشوفك .
ضحى :ييه ولا يجلس بخاطرك ولاشي شوف الي ارسلته لك
فتح المحادثه وهو يشوف صورتها بالمرايا بفستانها الزيتي وشعرها الي كان المرفوع نصه ".
ابتسم نهار بواسع ثغره ونطق وهو يتامل صورتها : فارقه عن جميع الناس والفرق كايد مثل فرق النجوم الباقيه .. و الثريا ليتني كنت هالليله من اول الناظرين لك ابتسمت ضحى ونطقت :احبك
وضحك نهار وابتسمت وهي تشوفه يضحك وكمل سوالفه معها .....
<~صباح يوم جديد ~>
فتحت عيونها بصعوبة من كثر مابكت قامت تجلس بنص السرير وهي تشوف نفسها بفستانها وطرحتها وحطت يدها على وجها وهي تتذكر ليله امس بلعت غصتها ووقفت وشافت بشته على السرير حطت يدها تسحب طرحتها وتحرر شعرها ولفت تبي شنطتها بس مالقيتها وتنهدت ونطقت :برا
فتحت الباب وشهقت من رجع على ورا وصفق راسه على الارض عقد ملامحه ببعض من الالم الي براسه اثر صفقته بالارض ونزلت عيونها له وفتح عيونه لها ونطق وهوعلى الارض ويناظرها :اخيرا قررتي تفتحين ورفع راسه ووقف قدامها ونزل عيونه يناظرها بفستانها ضحك من شافها عقد حاجبينها من ضحكته ومشى من جنبها دخل يوضي ويصلي ورمى نفسه على السرير ومشت هي تاخذ شنطتها من عند الباب وتدخل فيها الغرفه حطت الشنطه على الكنب وفتحتها وهي تدور لها على لبس تلبسه اخذت بجامه حرير بيج ولفت عليه تشوفه نايم حطت يدها تحاول تسحب ربطات الفستان من ورا تاففت من رفض ينفتح معها وهمست تكلم نفسها:اوووف مو وقتك انت الثاني جمعت شعرها كله على جنب وتنهدت من حست يدها عورتها وانشدت وربطات الفستان رفضت تنفتح معها مشت تطلع الصاله وجلست على الكنب وحطت يدها على وجها ومر الوقت عليها وهي الصاله وقفت وهي تروح المرايا وشهقت من شافت وجها و الماسكرا تحت عيونها وغمضت عيونها من تذكرت ضحكته تاففت ومشت للحمام ورفعت فستانها على ذراعه وغسلت وجها ورفعت شعرها ورجعت الصاله اخذت كوب مويه ومشت وهي تجلس على الكنب شربت الكوب دفعه وحده وحطته على الطاوله ورجعت راسها ورا وتنفست تشبع حواسها أوكسجين
تحرك من صوت الجوال طلعه من جيبه وهو يرد
ومغمض عيونه اخذه ونطق وسط نومته : نعم
تركي :نعامه ترفس العدو ياحيوان نعم هاه ؟!
فز عزام يجلس بنص السرير: المعذرة يبه بس نايم وش بغيت
اخذ تركي القلم بيده وهو يدق فيه على الطاوله :قم وتعال الظهر انت
وزوجتك على الغدا ، متى بتسافرون ؟!
حط يده يحك حاجبه: بكره الرحله
تركي : زين لاتتاخرون يلا وقفل منه
تنهد عزام ونزل عيونه لثوبه الي باقي عليه من امس وقف ومشى للحمام غسل وجهه وطلع وهو يستغفر ويلف رقبته يمين ويسار وخرج لصاله وهو يشوفها جالسه ويدها على خدها والفستان باقي عليها ومشى لها ونطق : لذي الدرجه الفستان عاجبك لين متى بيجلس عليك ؟!
رفعت عيونها له وقامت من جنبه تدخل الغرفه ووقفت عند المرايا ولفت ظهرها تحاول تفك ربطاتهً ونطقت: حسبي الله على عدوك ياشروق هذا شلون ينفتح تاففت تنزل يدها جلست على الكنب وهي تبكي ماتدري تلقاها من وين بالضبط من سالفه امس الي رفض عقلها يحللها ولا من حالتها معه ولا من ليلتها الي انهدمت ولا من حبها له ولا من الفستان تجمعت عليها ودخل الغرفه وهو يشوفها حاطه راسها بين يدها وتبكي مشى لها وجلس على ركبه قدامها يسحب يدها من على وجها وناظرت فيه وعيونها مليانه بدموعها ناظرها :اصرخي، اضربي، كسري ،اذبحيني لو تبين بس لاتبكين كل شيء يوقف عند دموعك راضي بكل شيء راضي حتى بصدك بس لاتبكين وحط يده على خدها يمسح دموعها دموعك غاليه لاترخصين فيها علشان احد حتى لو كنت انا ولن دموعك غاليه والله والي خلقني اني لابكي الي نزلها تكفين كنوز تكفين انا مالي ذنب والله مالي ذنب مسك يدها وصدت بعيونها عنه وشد على يدها ورجعت تناظره وكمل كلامه : وش يرضيك قولي لي وش الي اسويه وتصدقيني وترضين وقبل تقولينه اعتبريه عندك بس لاشوف دموعك
بلعت عضتها ونطقت بكل هدوء : الي ابيه ؟!
هز براسه بايجاب: الي تبينه لو انه باخر الدنيا رحت وجبته لك
ناظرت فيه وهز براسه عزام :قولي لاتترددين انا وعدتك اسويه لك ولك مابغيتي بس قولي ""
كنوز : ابي اشوفها واجلس معها هذا طلبي تقدر تسويه لي ؟!
نزل راسه عزام ورجع يناظرها : وش تبين فيها ؟شوفتك لها بتريحك ؟!
كنوز : ابيها ابي اعرف صدق كلامك ابي اعرف كل شيء ومابيك
تكون معي ابي اجلس معها وحدي ."
هز براسه عزام ومسح طرف خشمه ونطق : انا وعدتك وانا على وعدي بوديك لها اذا كان شوفتك لها بتريحك بسويها قومي غيري فستانك بوديك لها وبعدها بنروح عند اهلي ووقف يبعد عنها ووقفت هي تمشي ولفت عليه وناظر فيها وعضت على شفتها ونطقت : ربطات الفستان مو راضيه تنفتح
ابتسم لها ومشى لها ولفت تعطيه ظهرها وحط يده يسحب الربطات حست ببروده يده على ظهرها وشدت على عروقها وسحب الربطه ولف لها انتظرك علشان نفطر ومااتوقع انك بترفضين الاكل معي وطلع من الغرفه ومشت تسكر الباب من وراه ودخلت الحمام وهي تاخذ شور وتحط كريماتها على شعرها ترجعه لوضعه الطبيعي كيرلي تعطرت ورطبت وجها وجسمها وخرجت له فتحت الباب ومشت تجلس جنبه وابتسم من شاف شعرها وهو
يعشق شعرها وطبيعته ونطق : احب الكيرلي عليك
حطت يدها على نحرها ونزل عيونه من عليها قرب يحط لها اكل وهي تناظره ودها تصدقه بس مو قادره كل ماتتذكر كلام ملاذ له توقف الارض فيها ..
لبس بدلته وطلع من غرفه الملابس وهي نايمه مشى يشوف فستانها الاحمر بالارض اخذه وهو يطلع من الغرفه كلها والبيت كامل والفستان بيده مشى ورا البيت وولع زقارته ونزل من السياره والفستان بيده أشعل ولاعته يحرق الفستان وثواني ومشت النار بالفستان كله ورماه على الارض ورجع دخانه بين شفته يسحب منها ونفثه وضحك ونطق وسط ضحكته: قال ايش قالت برجع البسه مره ثانيه على جثتي يرجع يحتوي جسمك مره ثانيه مشى من احترق الفستان بالكامل تنهد براحه وركب سيارته ومشى لدوامه .......
قامت منه جنبه من انتهت من فطورها ودخلت الغرفه وهي تجلس وتحط مكياجها وتعدل شعرها اخذت جمبسوت اسود ولبسته وخلت شعرها على طبيعته ولبست عبايتها ودخل من وراها ولبس ثوبه ووقف عند المرايا يعدل نسفة شماغه ولف عليها : خلصتي ؟
هزت براسها بمعنى ايه ونطق هو : مشينا
طلع وطلعت وراه ونزلو لسياره وركبو ومشى عزام لبيت ملاذ ووصلو ولف عليها :يلا وحط يده على الباب بينزل
ولفت عليه ونطقت:وين
عزام :بنزل معك
رفعت حاجبها ونطقت : وش قلت لك انا ؟ قلت لك ابي اشوفها
واجلس معها لحالي صح ؟
سحب الباب يسكره وتنهد : كنوز بالهداوه ياحبيبي بالهداوه بخليك تنزلين
وحدك بس لاتبالغين بالكلام زين ."
نزلت وهي تسكر الباب ومشت للباب اخذت نفس ودقت الباب
كانت واقفه عند الدريشه وكوب القهوه بيدها تشرب منه ولفت من سمعت صوت الباب يدق وابتسمت ملاذ ومشت تاخذ طرحتها وعبايتها ولبستها وركضت تفتح الباب رفع عيونه عزام من انفتح الباب : الله يجيب العواقب سليمه هز براسه بضيق صباحيه مباركه ياعريس لعنبو
حظي الي عي يزين حسبي الله على ابوك وناصر من حطوك بيدي
ياناكرة الجميل ."
دخلت كنوز وسكرت الباب وراها ووقفت قدام ملاذ وعقدت حاجبينها ببعض ملاذ ونطقت بستغراب :مين انتي ؟؟!
ضحكت كنوز بسخريه ونطقت : الي خربتي ليلتها امس
انصدمت ملاذ وحطت يدها تاشر على كنوز : انتي زوجه عزام
هزت براسها كنوز :انا
نزلت يدها ملاذ :تفضلي مشت ومشت وراها كنوز ودخلو الصاله وجلست كنوز وملاذ قدامها ونطقت ملاذ : اي يازوجة عزام وش جابك
نزلت شنطتها كنوز وحطت كفوفها ببعض ونطقت : شوفي انا قليله كلام ومااحب كثرته واذا نطقت اعرف اثمن كلامي أعرف أطمن قلب وأعرف أخلي القلق والخوف يأكلون هالقلب اعرف اذبح بكلمه واعرف احيي قلب مات فيه الطمانينه بحرف وانعش روح انتهت ،حياتي ثمينه والي بحياتي اثمن وعزام جزء من هالحياة ولاانا جايه ارفع صوتي ولا حتى اغلط عليك بس يابنت الناس عمرك راح بما يكفي عوضي شبابك الي راح وايامك الي انتهت وانتي على امل الدنيا تضحك بوجهك لاتخلين مستقبلك ينتهي وتخربين بيت ماانبنى وتكسرين وتهدمين كل الي حولك بسبب ماضي وتورثين الي صار لك لنا توي بديت معه حياتي مالي يوم وهاليوم راح وانتي سببه انا زوجته واقولك لاتعيشين على اطلاله لانك ماراح تملكينه وحطي كلامي حلق بذنك طول ماانا حيه عزام بيكون لي وحدي ،لانه يحب والمحب مايبي شيء غير قربه من الي يحبه، اقولك شيء تدرين انه جاه فرصه ياخذك ورفض هالفرصه غرضه من كل الي سواه لك مساعده فقط لاغير وسكتت كنوز تناظر فيها ودموعها الي
خدها اثر كلامها عليها .."
ونطقت ملاذ وسط دموعها : طول عمري مااعرف الحنان ولا شفته وطول عمري ماشفت رجال شهم بشهامة عزام دخلت عنده وانا متدمره ،ميته ،عايشه جسد بدون روح وساعدني وامن حياتي وابعد عني كل شخص تسبب في تدمير حالتي النفسية وماحسيت بنفسي الا وانا احبه تخيلي اني مااعرف الحب ولاعمري جربته ولا ادري وش تحمل هالكلمه تدرين من حسيت اني بديت اميل له تركت له ورقه بالمستشفى واتوقع عزام قال لك بس كان يدور علي وكنت ادري انه يدور عني بكل مكان واني كنت عقوبه على راسه ولقيته مو هو لقاني انا ماني ناويه نيه له ولا حتى لك بس انا احبه مو بيدي مووو بيدييي
غمضت عيونها كنوز من نطقت ملاذ بحبها له وكملت كلامها ملاذ فعلا انا كنت اتمنى اكون بداك ليلة امس وكنت اتمنى لو انه زوج لي كنت اتمنى تضحك لي الدنيا فيه بس عرفت وفهمت ان الدنيا عمرها ماراح تضحك لي وعزام احسن لي وقدم معروفه لي وعدني وحده من خواته وادري انه مايحبني ولا حتى يفكر فيني بس كيف افهم الي بصدري "
وحطت يدها كنوزتحك طرف ثغرها وتنطق :و المعروف هذا نتيجة يوم جاء الوقت الي لازم تردين معروفه تروحين تدمرين حياته ؟؟؟!!!
قامت ملاذ تجلس جنبها : اجل اعتبريه مردود
رفعت حاجبها كنوز بعدم فهم لكلام ملاذ : مافهمتك !!!
نزلت عيونها ملاذ من على كنوز : بتفهمين قريب
لفت كنوز على جوالها الي يدق وكان عزام قفلت الجوال ووقفت تمشي وركضت وراها ملاذ ونطقت : ممكن اعرف اسمك ؟؟
لفت عليها ونطقت : كنوز اسمي كنوز "
ابتسمت ملاذ لها وهزت براسها: انا اسف وحقك علي انتي وعزام ماكان قصدي اخرب حياتك وتصرفي امس ماكان تصرف لايق فيني ولا حتى فيه وصلي له اعتذري والله يوفقكم يارب مع بعض ."
ولفت كنوز تطلع ومن شافها عزام نزل من السياره ومشى لها ومسك
كتفها :كنوز اشفيك طولتي ؟!
وطلت ملاذ تناظر فيهم ونزلت دموعها وهي تشوف عزام مع كنوز
كنوز : مافي شيء خلاص نقدر نمشي ابعدت عنه وهي تركب السياره
تشتت نظراته ومسح على دقنه ورفع عيونه وهو يشوفها واقف عند الدريشه وتناظر فيهم ومن شافته سحبت الستاره نزل عيونه وركب السياره
ولف عليها :وش صار بينكم ؟؟!
نزلت راسها كنوز: الموضوع اخذ وقت طويل وانا اسالك وانت تجاوب والعكس قفل عليه وانتهينا
رفع حاجبه عزام: ايش يعني انتهينا !!!!
لفت كنوز عليه : انتهينا وبس مالك دخل بالباقي
هز براسه ونطق : ارتحتي طيب
نزلت المرايا الي قدامها وفتحت شنطتها واخذت الروج الي بداخلها تحط منه وتنطق وهي تحدد شفايفها :حتى هذا مالك دخل فيه
رفع حاجبه وضحك بدون صوت وهو يناظرها ويتاملها ولفت عليه من انتهت رفعت المرايا بيدها : اشفيك يلا مو تقول بنروح لاهلك يلا وش تنتظر!
ابتسم ولف يشغل السياره ويحرك من عند البيت
ونطق : تصدقين من عرفتك لو اعد كلماتك انعدت لي
كنوز : لا ني مااحب كثر الهرج والبربره الزياده وخذيت
واحد هالصفتين متاصله فيه ،""
وضحك عزام وهز براسه :صح عليك صادقه حضرة الكاتبه انا كثير كلام وحط يده على ثغره يمنع كلامه وابتسمت تصد بعيونها عنه ووقفو عند بيت اهله ونزل ونزلت معه وفضول الدنيا كلها بصدره يبي يعرف وش دار بينهم تنهد ومشى معها يدخل ..."
فتحت عيونها بتعب قامت تاخذ شور وطلعت وهي تمسك جوالها وشهقت من شافت الساعه ١٢ الظهر ودخلت تشوف الاشعارات واتصالات اهلها : اوووف كل ذا الوقت نوم ياربي اوريك يانايف انت السبب اخذت جوالها تدق عليه
وكان بمكتبه ابتسم من شاف اتصالها وحط السماعه باذنه ورد عليها
نايف :ارحبي مليون
مشت تسحب المنشفه عن شعرها وتحط الجوال على سبيكر
وتكلمه :ليش ماصحيتيني ؟!
نايف : والله شفتك ميته نوم وماقدرت اصحيك او بالاصح ماقدرت لفصلاتك
جلست على الكرسي واخذت الجوال على اذنها : لا ياشيخ ومين السبب بنومي الي الوقت هذا مو انت ولاعندك زهايمر مبكر ؟
ضحك وهو يكتب على الاوراق الي عنده ونطق : اسمعي تجهزي
بنروح لاهلك الغدا عندهم
اخذت المشط تمشط شعرها وترد عليه : متى بتجي ؟
ونزل يده يناظر الساعه : الحين الساعه ١٢وحده ونص كذا وانا عندك
هيام : طيب اسمع وانت جاي جيب معاك حلويات تمام لاتنسى
الي عندي كلها خلصت
ضحك نايف ونطق : هيام وحامك ماخلص ؟
هيام : لا باقي مطولين وبعدين جيب وانت ساكت يلا باي قفلت
منه وقامت تختار ملابسها وتتجهز ....
وهز براسه نايف: نجيب ليش مانجيب
~<<بنت تركي >>~
من دخلو وكلهم موجودين ماعدا سعود جالسه وهو جنبها وعينه عليها
ضحى :يمه ترا هيام ماردت علي
عزام : وين سعود
فاطمه :قال بيطلع من الجامعه على الملعب
عزام : مابيتغدا معنا
فاطمه :بيلحق ان شاء الله
ولف تركي لكنوز ونطق بابتسامة على وجهه : بشري كنوز كيف ولدنا معك ؟
لفت تناظر عزام وهو نفس الشيء ينتظر ردها بعد الي صار بليلتهم ورجعت تناظر تركي وبلع ريقه عزام من طال سكوتها وعقد حاجبه تركي وفاطمه تناظر كنوز
تركي : عسى ماشر ؟!
ونطقت كنوز : كل شيء تمام ياعمي وتنفس براحه عزام
وهو يعدل شماغه وتقدم بجلسته
ونطقت ضحى : شوف يابابا هاذي كنوز حتى لما نجلس مع بعض
ماتتكلم الا لما انت تتكلم معها يعني عادي الموضوع
وضحك تركي : واضح انها عاقله
اكتفت كنوز بابتسامة ولفت تناظره ودق جوال تركي ووقف من بينهم : انا بروح المكتب عندي اتصال ولف على عزام اذا وصلو عمك
وعياله قم استقبلهم بخلص اتصالي واجيكم ."
عزام : ابشر
وقام تركي يدخل مكتبه ولفت ضحى لكنوز ونطقت :كنوز اشفيك لابسه العبايه ترا مافي احد ووقفت كنوز وهي تنزل حجابها وعبايتها ورفع عيونه لها وهو يشوفها لابسه جمبسوت اسود ماسك على جسمها وكان توب من فوق وشعرها الطويل الكيرلي يغطي ظهرها كامل ورجعت تجلس ولف عزام بوجهه ونطق بينه وبين نفسه: يارب اني وجهك حك حاجبه وهو يشوفها تسولف مع امه وضحى ومبتسمه لهم وهو يناظرها ومنتبهه لنظراته وتوترت منها وتنهدت براحه من دق الباب وقام يفتح لهم رجعت شعرها على ورا تهف على نحرها اثر توترها من نظراته ودخلو امها وشروق وقامت تسلم عليهم ..
دخل البيت وهو يتنهد من تعبه وحط الحلويات على الطاوله وطلع الغرفه وفتح الباب بس ماشافها ورفع صوته يناديها ووصله صوتها من غرفه الملابس : جيت ؟!!
نايف : لا باقي برا
وضحكت هيام ونطقت: ياشينك اسمع شوف ثوبك وشماغك على الكنب البس بسرعه الناس تنتظر تاخرنا ومشى ياخذ ثوبه وابتسم من فاح عليه العطر والعود ونطق : ياكثر الحب ياهيامي مشى وهو يدخل الحمام ياخذ شور وطلع وهي واقفه تناظر جوالها مشى لها وهو يجي من وراها يطبع قبلته على خدها وابتسمت له ومشى يلبس ثوبه وعدل شماغه وطلعو وركبو
السياره يروحون لهم ..
وبعد دقايق طويله اجتمعو كلهم ودخل سعود المجلس وسلم عليهم وجلس جنب نهار ولف عليه نهار : وين كنت ؟
وحط سعود يده على راسه من الخلف من تعبه : كنت بالجامعة خلصت المحاضرات وطلعت للملعب ولف عليه ونطق :تخيل يانهار وش صار
نهار : هاه وش صار ؟؟؟
سعود : شبكت المدرب
وانفجرو العيال يضحكون عليه ولف عليهم واستوعب
كلمته : لا ياحمير اقصد اني ضبطت وضعي معه وتخيلو انه
مصري مو سعودي .."
نهار : اي وكيف هو معك
سعود :اسكت اول ماشفته قمطت العافيه دخل علينا وقال :سلام عليكو ياشباب
وردينا السلام بعدين جلس يقول : اهنيكو على لعبكو في البطوله الي فاتت
وضحك نهار :لو يسمعونك المصاريه انهارو
ووقف سعود بنص المجلس يشرح لهم : الهمم بعدين قال انا مدربكو للبطوله القايه واسمي اياد انا يوم شفته قال انه المدرب الجديد واني اقوم له قال فيه ايه ياسعود فيه ايه فيه ايييييه انت اهلك ماعلموك على الادب ارجع مكانك تخيلو لفيت على الناس وهم ميتين ضحك وجهي صار احمر من الاحراج جلست خلص كلامه ونصه مادريت وش يقول خرجنا من المعلب وشفته عند الباب ومشيت له وقلت له : حضرة المدرب اياد ولف علي وتافف من شافني وقال لي : عاوز ايه
قلته :عاوز اقولك انك فشلتني قدام اللاعبين
ماحسيت بنفسي الا وهو ماسكني مع تشيرتي ويتكلم علي : انت واللهي مش محترم ماتقاطعنش يابني يابني دا انت كلامك كتيررر
طبعا لااحكي لكم عن وجهي وقتها
وضحك عزام: قسم انه ماكذب فيك
وضحك نهار ونطق وسط ضحكته: الله يعينه عليك
ونطق تركي : فينه المدرب ذا خليني احب راسه خله يربيك لاني عجزت انا
وضحك فيصل وهو يناظر وجه سعود وكملو العيال يضحكون
عليه وهو واقف بنصهم
ونطق نايف : وفين التشبيك في الموضوع ؟
وتكتف سعود : لانكم حمير ماخليوني اكمل حشا ابوي وعمي وينه المدرب يسمع الكلام الكتيررررررر
ضحك نصار : تكفى كمل
وكمل سعود : المهم نزل يده ورحت اركب السياره من الخوف وعاد هنا انا عرفت ان الدنيا دوارة جاء وهو يدق قزاز السياره انا قلت انه جاي يكمل علي نزلت القزاز قال لي :يابني ياسعوود العربيه مش عارف مالها مش راضيه تشتغل
هنا انا جاني لاق بنص راسي قلت له وش العربيه
قال لي : السياره
قلت له : ماشاءالله السياره اسمها عربيه عندكو""""
قال لي : ليه مش عاقبك
قلت له : لا والله انما انا بعشقكو انتو وكلامو
وانهار نهار يضحك عليه وكمل سعود المهم قال لي : حركب معك بالعربيه بتاعتك وتنزلني على بيتي
ركب معي حتى بدون مااقول له يركب وجلس يوصف لي تخيلو ساعتين وانا ادور بالشوارع وبعد ماطلعت روحي وصلنا عند بيته وقلت له : ياالمدرب اياد خف علي بالتدريبات ماانا وصلتكو
لف علي وقال : ماانا واحد ياسعود لكو دي ليه
الهمم جلس يشرح لي ساعه عن المصطلحات المصريه كلها وعرفت ان لكو ذي للجمع وهو نازل تخيلو وش قال لي قال : واللهي مانت تستاهل ياسعود يابني حاضر من عنيا حدلعك في الملعب وجاء بيروح ورجع لي قال لي
انزل معايه يابني مراتي عامله فسيخه ومحمره بطاطه انما ايه
قلت له وش الفسيخه تخيلو طلع سمك ني
المهم اني عيت واصر علي بس حلفت ماادخل ورحت يعني الوقت
هذاك كله وانا معه الله يشغله مثل مااشغلني
ارتفع صوت ضحك العيال عليه وعلى وصفه
نهار : والله انه بيحتفل فيك وقول نهار ماقال
عزام : حتى انا ماارتحت له
ونطق نايف : ليتك سكت
فهد : اهاه يابطني تبغى الصدق انت حمار
سند :اي والله كان سكت
سعود : الله ينكد على العدو انا مبسوط وانتو تنكدون علي ليه ؟
ودقت فاطمه على تركي تقول له ان الغدا جاهز قامو كلهم يتغدون ..
وعند الحريم نفس الوضع متجمعين على الغدا وياكلون وضحك وسوالف عن زواج امس ولفت ايمان على هيام :يابنت تخيلي شفتي حنان الي معنا بالمستشفى الي كانت ماسكه القسم الي نشتغل فيه
تخيلي زواجها الاسبوع الجاي """"
شهقت هيام:يووووه ياكرهي لها
ونطقت ايمان : المهم ترا عزمتني وعزمتك معي وقالت قولي لهيام تجي
هيام : والله مااحضر ويعع ماابلعها الله يعينه الي بياخذها
ضحكت ايمان : تصدقين انا بحضر نفسي اغير جو وابي اشوفها بس ابي وحده منكم تحضر معي هيام تكفين احضري معي
هزت براسها بمعنى لا: والله مااحضر اقولك ماابلعها وتقولين لي احضري
ولفت ايمان تناظر البنات :كنوز ماهي موجودة اكيد باقي انتو
الثلاثه وحده منكم تحضر معي
ضحى : والله انا عندي جامعه الاسبوع الجاي مااقدر
شروق : حتى انا
ولفت ايمان على جود : جود تكفين لاتقولين لا
وابتسمت جود لها : بس انا ..
وقطعت كلامها ايمان : لابس ولا شيء خلاص باخذك معي اقطعي الكلام
وسكتت جود من اصرت عليها ايمان
ايمان : وش البس طيب مالي خلق سوق وابي شيء فخم وفي نفس الوقت ناعم
هيام :شفيك ايمان البسي اي شيء تبين اعطيك انا عندي
فستان حلو اخضر مررره بعطيك ياه
ايمان :اي اعطيني وابي الاحمر الي امس بشوف وش البس منها جهزيهم وبكره وانا طالعه للدوام بمر اخذهم منك
هيام : زين ...........
•~~عند الرجال ~~•
جالسين يتغدون ويسولفون ولف نهار على سعود : اقولك ايش رايك نروح عند اياد بكره ونتغدا عنده هو ومراته
ولف سعود يناظره : ياوضيحححححح تعالي شوفي نهار وش يقول
وبعدين ليش وضيح ابوي موجود بياخذ حقها
غص نهار من حس انه جاب العيد وضرب على ظهره فهد
وضحك نايف وهو يشوف وجه نهار ونظرات تركي له
وضحك سعود : تستاهل
رفع حاجبه تركي يناظر نهار ونطق :ودك نكنسل يانهار ؟!
لفو كلهم عليه وفتح عيونه على الاخير نهار : وش تقول ياعمي امزح ترا
وضحك تركي : اي انضبط تراك تحت التقييم
وضحك عزام : الولد غص حرام عليك يبه
ونطق نهار : الله لايوفقك ياسعود انت واياد ومراته معكم
ونطق سعود : واللهي انت مش محترم وكلامك كتيرررررر
تركي : سعود البخ حامت كبدي منك
سعود :سم يبه بعدين لحظه قبل البخ انت تبيني اتغدا عند اياد ومراته فسيخ ني انا ماكلت السمك مطبوخ علشان اكله نيي
الكل :هههههههههههههههههههههههههههههههههههههههههههههههههههههههه
انتهى غداهم وطلع عزام واشر لنصار وقام معه وطلعو برا عند السياره
نصار : اي ياعريس كيف الزواج معك
وتنهد عزام ونطق :زفت
عقد حاجبينه ببعض نصار ونطق : ايش وش تقول انت ؟؟
عزام: هذا الصدق اكذب عليك !
نصار : وش فيك وش صاير لك وبعدين هذا الي مبسوط ويقول لي ماعاد راح تشوفني بعدين مو انت تبيها وش غيرك الحين ؟
ولف عزام عليه : ومن قال اني ماعاد ابيها !
نصار : وش فيك اجل ؟
ونطق عزام:عمرك شفت عريس نايم على الباب ؟
رفع حاجبه نصار : وليه؟ تكلم ياولد نشفت دمي
وحكى له عزام كل شيء تحت صدمة نصار من فعلة ملاذ وضرب كفوفه ببعض من قهره : ياولد انت متاكد متاكد انها ملاذ
عزام:انت دلخ اي هي كنت قدام وجها طول الايام الي راحت وماحبكت معها تحبني آلا باليلة زواجي انا اصلن غبي من رحت عندها ابشرها احسبها كفو وبتفرح لي شفت الليله الي لي شهر انتظرها مرت سم على قلبي وظهري مااحس فيه من نومتي على الباب
وجلس على ركبه نصار ويدها على وجهه ورفع راسه
لعزام : حسبي الله عليها بنت الكلب وطلع نايف برا يولع دخانه ونزل عيونه عزام لنصار وهو يسحبه ووقف نصار يناظره وينطق : وش فيك انت بعدين ليش ملا.....
قرصه عزام وتنحنح ولف نصار يناظر نايف وهمس عزام لنصار الله ياخذك انت الثاني كانك بتجيب لي مصيبه زياده فوق المصيبه الي على راسي
ومشو له وهو رافع رجله على الجدار والدخان بين شفته ..."
بينهم بس عقلها بمكان ثاني تجهل اسباب كثير بس بنفس الوقت جانب من قلبها يقول لها ان الحق معه وانه ماغلط وانه يحبها ومستحيل يكون الي صار من صنع يده والجانب الثاني من قلبها يقول لها لا تبعدين عنه ولاتفكرين مجرد تفكير ان عزام ممكن يسوي شي يضرك وينقص من قدرك سرحت بنظراتها وتفكيرها الي تعبها وتتذكر كلام ملاذ لها وحبها لعزام الي اشعل قلبها حرقه قامت من بينهم وهي تدخل دورات المياه ووقفت قدام المرايا ورفعت انظارها لها ونطقت داخلها بينها وبين نفسها : كنوز عزام مو كذا بعدين انتي من متى تتخلين عن الاشياء الي تحبينها اي كنوز انتي تحبينه ومستحيل تشيلين بقلبك له غير الحب ماله ذنب كنوز ماله ذنب بشيء نزلت دموعها على وجها فتحت صنبور المويه وبللت يدها وحطت يدها على نحرها تخفف من حرقتها وتقنع ذاتها انه فعلا ماله ذنب اخذت مناديل وهي تمسح نحرها واثر المويه عليه ومسحت دموعها وخرجت ترجع تجلس بينهم نزلت عيونها لجوالها وهي تشوف رساله منه : مشى الوقت واحنا عرسان ماودك نمشي ؟!
قرت الرساله وكتبت له :زين يلا
وقف عزام من بينهم وسلم عليهم ودخل عزام بعد ماقامو البنات شروق وايمان وجود وسلم على امه وخواته والجوهره وهو يسولفون معه
الجوهره : هاه ياعزام مااوصيك على كنوز
اشر عزام على عيونه : ابشري ياعمه بعيوني كنوز
صدت بعيونها عنه وفهم نظراتها له بس شيء واحد يتسال عنه عزام ايش سبب هالصمت امس مصره على الطلاق واليوم مطلعته بالشكل الي كان من المفروض يطلع فيه بنظرها قبل يطلع في نظر الي حوله ولف عليها ونطق بهدوء:يلا
هزت براسها ووقفت تلبس عبايتها وتطلع معه وقابلوها ابوها واخوانها وودعوها وطلعت معه ركبو السياره ولف عليها عزام بعكسها مارفعت عيونها له مسك كفها وكانت قطعه ثلج بكفه سكت عزام وشغل السياره وحرك من عند البيت ووقف ولف لها : يلا انزلي
رفعت عيونها تناظر المكان ونطقت بهدوء : وين ؟
ونطق عزام : المكتبه اعرف انه المكان الوحيد الي تتبرين من كل شعور بداخلك ادخلي فرغي الي بداخلك كله وانا هنا انتظرك بس اوعدك احاول اسعى جاهد في اني اكون مكان الورق يلا انزلي وقبل تنزلين امسكي حط يده على قلمه الي بثوبه يعطيها اكتبي فيه
جمدت نظراتها له وبلعت غصتها واخذت القلم من يده ولفت تفتح الباب وتنزل دخلت المكتبه واخذت لها دفتر وجلست على كرسيها المعتاد فتحت الدفتر ومسكت قلمه ورفعت القلم فوق الورقه بالضبط تفرغ الي بداخلها وكتبت :
صراع نفسي .
من انا ومن هو ؟!
ماذا فعلت وماذا فعل بي ؟!
أردت الحديث عنك.. أحسست بالعجز.. فبكيت.. بكيت لأنه، ولأول مرة أجدني عاجزة عن التعبير عبر قلم وورقة.. عاجزة عن إخراج كافة غضبي منك بالكتابة عنك ،كنت غامضة وبنفس الوقت واضحة حاضرة وغائبة معا لاول مره اشعر ان حروفي تساقطت مني ضاعت تبخرت ضايعه وفي قمه ضايعي وتخبطي ماذا افعل بشعوري بصدمتي احبه نعم واعترف لذاتي بحبه ورسمت على ثغرها ابتسامة بسخريه وكملت تكتب ماهو شعور الحب ؟ انا جاهله له بالفعل اشعر بمشاعر متضاربه وبدقات قلب عنيفه ونزلت القلم وهي تمسح دموعها وتجمع نفسها ورجعت مسكت القلم تكمل ولانك بداخلي ،بقلبي رغم أنفك وأنفي والمسافة وشتائم العالم أجمع إنني لا أرى في هذا العالم إلا أنت، وكل ما عداك لا يهمني في شيء نعم احبك وكل معاني الحب التي بداخلي خلقت لك لكن هل الحب كافي ؟؟! لتخطي ؟ .
كان واقف نهايه المكتبه ويناظرها بصدمه من قلمها الي ماوقف ودموعها الي كانت توقف الكتابه علشان تمسحها بلع ريقه عزام ونطق : كل هذا انا سببه الله لايهنيني ياملاذ ان هنيتك هز براسه يتعود فيها وتكتف يناظرها
انتهت من كتابه شعورها وتنهدت من حست انها فرغت كل الي بداخلها حطت القلم بنص الدفتر ورجعت ظهرها على الكرسي وغمضت عيونها براحه واخذت الدفتر وحطته بشنطتها وقامت وانتبه عزام من وقفت ومشى لسياره وطلعت من المكتبه ومشت تركب وحرك عزام بدون ماينطق بكلمه ....
طلعت معه ودخلو بيتهم ومشت تنزل عبايتها وشنطتها ودخل وراها وجلس بالصاله ودخلت توقف عند الة القهوه تسوي لهم واخذت الحلويات تحطها بالصحن ومشت تطلع والصحن بيدها ووقفت قدامه : تعال برا
ابتسم لها ووقف يطلع معها وجلس وحطت الصحن قدامه ورفعت عيونها للورد وابتسمت من شافته جالس يكبر قدامها وبانت الوانه اكثر ورجعت تدخل داخل اخذت فازه وهي تمليها مويه واخذت مقص وطلعت برا وحطت الفازه والمقص على الطاوله وابتسم نايف ونطقت له : باخذ ورد واجيك
هز براسه لها ومشت للورد وهي تقص منه وهو يناظرها ويشرب من قهوته وعيونه عليها ومبتسم وهو يشوفها واقفه وتختار الالوان بعناية فائقة وتقص منه خلصت ومشت له وجلست جنبه وحطت الورد على الطاوله وتقدم ياخذ ورده ويغرسها فوق اذنها وبين خصلات شعرها ويناظرها وأبتسمت تحط يدها على الورده الي فوق اذنها بالضبط فتح الحلاوه وهو ياكلها وهي مشغوله بالورد تقص اطرافه وتحطه بالفازه اخذ جواله وهو يصورها ابتسم من شاف الصوره ونطق من طرت بباله كلمات الاغنيه : يا بنت الغيمة والقمرة يا اخت الورد والازهار ملاك الزين لين اصبح يظن مرايتك داره مليتي ليلتك فرحة ضويتي هالوجود و صار يشع بزينك و حسنك و زانت فيك نياره ...
ورفعت عيونها له وابتسمت هيام شغلها نسمعها "
ابتسم وهز براسه نايف واخذ جواله يشغل الاغنيه ويحط الجوال قدامه ويردد ورا الاغنيه وهيام معه : يا اخت الورد والازهار ملاك الزين
لين اصبح يظن مرايتك داره ابتسم بواسع ثغره وهالحب بقلبه لها جالس يفيض بداخله اكثر واكثر يحلف ويقسم قسم انه مامر يوم الا وهو حابها اكثر حاب وجودها معه سكتت تدندن مع كلمات الاغنيه ونايف يناظرها حبه لها احيا كل شيء ميت بداخله حس بمعنى الحياه معنى الحب معنى الفرح والسعاده ومعنى كل شيء بالدنيا رفعت عيونها له من انتهت من فازتها وعقد حاجبينها من نظراته لها ونطقت : وش فيك ؟!
اعتدل بجلسته ينطق : اتامل صنع ربي ابتسمت هيام له وكمل نايف
"عندك خبر ان الورد يزهر بالمسة يدينك .."
ابتسمت هيام واتسعت ابتسامتها اكثر : احبك
ضحك نايف ونطق : انا ماعاد لقيت كلمه اقدر اقولها خلص كلامي عن الحب ولو اقولك احبك فانا كذاب الي بقلبي اكبر من كلمة احبك
رفعت حاجبها هيام تنطق : يعني ماصارت تملي عينك هالكلمه ؟!
هز براسه نايف بنفي : للاسف ولا صرت اشوفها شيء
عضت شفتها بتفكير ونطقت : وش اقول لك طيب ؟ في كلمه ترضيك ؟!
مسح على دقنه وقرب منها ينطق : ولا شيء قلت لك انا مو قادر ادور كلمه توصف الي بداخل قلبي وترضيه بس صدقيني انا مايرضيني الا شوفتك هذا اكبر رضا اعيشه بحياتي .."
ابتسمت ودمعت عيونها وهي تسمعه ونطقت : نايف خلاص ببكي ترا
نايف: خلاص بسكت واخذ الحلاوة من الصحن ومداها له امسكي
وضحكت وهي تضربه على كتفه بخفه ومسحت دموعها وهي تاكلها وضحك نايف وهو يشوفها كيف تعدلت نفسيتها وصارت تسولف معه
ونطق : لذي الدرجه الحلاوه سوت شيء انا ماقدرت اسويه ماتحسين
عيب في حقي اغار من حلاوه ؟
ضحكت وهزت براسها وهي تضحك : اي نعم الحلاوه اهم منك الايام هاذي
رفع حاجبه نايف: اهجدي لاوالله ماعاد تشوفينها
وتاففت هيام : انا تعبت منك خلاص اعلن استسلامي يابن الناس انا انسانه اعشق العناد اذا جيت بتمنعني من شيء قولي سويه لاني
انا في الحاله ذي بسوي العكس
رفع حاجبه نايف: وليش العناد من الاساس !
ونطقت هيام: لاني بكل بساطه مااحب احد يفرض علي شيء بس وسكتت وقامت تاخذ الفازه وتدخل شال الاكواب وقام وراها ...
من دخلو الفندق وهي جالسه وهو قدامها جالس على ذراع الكنب تنهد عزام
ونطق :بكل رحلتنا الصباح
هزت براسها بمعنى طيب
اخذ نفس ونطق : كنوز ابي اعرف وش دار بينك وبين ملاذ
لفت عليه ونطقت بهدوء: عزام لا تسال انا ابي انسى واتمنى انك
تحاول معي علشان انسى ولا تسالني وش صار خلصنا لاني ماراح اقول كلمه
تافف بضيق وقال : كنوز وش علاقتي فيك ولا حتى على
هاذي ماراح تجاوبيني !
تقدمت بجلستها ورفعت انظارها له : عزام انا اعرف ان مالك ذنب بس انا
احتاج شويه وقت لاتطلب مني انسى كل شيء صار بيوم "
سكت وقامت من جنبه وهي تدخل الغرفه سحبت المفرش وهي تدخل داخله وغمضت عيونها تنام اوبالاصح تمثل النوم "..
مشى يتمدد على الكنب بالصاله وهو يفكر وشلون يرضيها مر الوقت عليه وهو بالصاله وعينه على السقف يناظره ويفكر ووقف يدخل الغرفه وشافها نايمه وقف يناظرها ومشى يسحب المفرش بالجهه الثانيه وفتحت عيونها من حست فيه ينسدح جنبها بلعت ريقها بخوف وعضت شفتها ولف راسه يناظرها مسك اطراف شعرها وشدت على المفرش بيدها وسحبت نفسها تبعد عنه وحس انها تبي بعده وتغيرت ملامحه بضيق ولف للجهه الثانيه وسحبت
المفرش اكثر تكتم وجها وتكتم بكيتها .."
~<<بيت تركي >>~
كانو سعود ونهار موجود ماراح ويلعبون سوني وصراخهم مالي البيت كله
سعود بصراخ : الله ياخذك يانهار ماتعرف تلعب انت
نهار : والله إنك انت الدلخ وصرخ نهار بعلو صوته من فاز سعود عليه
ووقف سعود وهو يصرخ بفرحه ونهار يشتم فيه : والله انك
كذاب ونصاب وغشاش "
وضحك سعود : لاياشيخ والله آنك انت الحمار ماتعرف تلعب
فتحت الباب ضحى بخوف من صراخهم ولفو عليها واتسعت ابتسامة نهار من شافها وعقدت حاجبينها ببعض : وش فيه ؟!
وضحك نهار ونطق وسط ضحكته: مافي شيء نلعب
حطت يدها على قلبها وغمضت عيونها: الله ياخذ ابليسك انت
وياه خفت احسب تضاربتو "
وضحك سعود : مافي شيء بس شفتي ذا ياشر على نهار الله يعينك عليه ربي له حكمه من طال زواجكم ورفسه نهار وضحك سعود ونهار يناظر ضحى
وابتسمت له ونطقت : فاز عليك ؟!
وحك جبينه نهار : فاز
ضحكت ضحى وبانت غمازاتها وابتسم نهار ولف سعود يناظرهم
ونطق : وجع انت وياها خير تبي افقع عيونكم ؟
ولفت عليه ضحى : انت ماتعرف تتكلم بشويش ازعجتنا وترا ابوي راسلني عليكم ويقول لكم اقصر حسك انت ونهار لايدخل يكسر السوني على راسك انت وياه عاد انا جيت ابلغكم وما على الرسول الا البلاغ ."
تنهد نهار : ابوك بيكنسل الزواج والسبب هالحيوان
سعود : وش دخلني انا
ضحى : انت السبب من الاساس انت تصارخ وحتى لو نهار مو هنا ولفت عيونها له وغمزت له وضحك نهار : اي كفو عليك
اخذ سعود المخده وهو يرميها عليها وضحكت ورفعه نهار بتشيرته ولف سعود يناظره : نزل يدك علشان مايجي ابوي
ونزل يده نهار وضحك سعود بانتصار وابتسمت ضحى ونزلت راسها ليد السوني ونطقت : بالعب معكم
سعود : يلا تعالي
ومشت تجلس وسطهم ونهار جنبها قرب وهو يعلمها وهي تلعب معهم وزاد حماسهم وصارت تصرخ معهم وهم يضحكون عليها ..."
تنهد من تاخر الوقت والنوم مازاره ووقف ومشى بيطلع لصاله ووقف من شاف شنطتها ولف يشوفها نايمه وفتح الشنطه واخذ الدفتر وطلع لصاله وجلس وهو يفتح الدفتر يقرا كلامها ورجع يعيده مره ومرتين وثلاث لين صار يردد الكلام المكتوب ونزل الدفتر ورجع يرفعه له وهو يوقف عند اخر كلامها
هل الحب كافي ؟؟! لتخطي ؟
حط الدفتر على الطاوله ونزل راسه بين يدينه زعلان من نفسه وكيف انه خلها تكتب هالكلام عنه كيف امتلت بالتساؤلات والحيره كيف صعب عليها اكثر شيء تحبه "الكتابه " كيف خلاها تعجز ترتب حروفها وتصيغ كلامها هدوءها وصمتها عور قلبه يعرف ان ماله ذنب بس الي فيها منه وقف ومشى للغرفه يرجع الدفتريشنطه ومشى يرجع ينام جنبها ....""
<<الفجر بيت نايف وهيام >>
قامت وهي تصلي الفجر ونزلت الصاله وجلست واخذت الريموت تقلب فيه شغلت مسلسل وجلست تتابعه ونزلت عيونها لجوالها من شافت ايمان ترسل لها سنابات اخذت جوالها ودقت على ايمان وردت عليها ايمان
ايمان : لا لا مااصدق انتي صاحيه الحين مستحيل
وضحكت هيام : ماجاني نوم وقمت وينك انتي
ايمان : انا جالسه اتجهز بروح اداوم عندي مناوبه اليوم وماراح ارجع الابكره
هيام : تصدقين بخاطري ارجع لدوام مليت من البيت
ايمان : اي والله ارجعي حتى انا اشتقت ارجع اشوفك معي
هيام : بكلم نايف واشوف يلا اخليك انا
ايمان : هيام اسمعي بما ان عندي دوام اليوم ومناوبه بمر
اخذ الفساتين من عندك بعد شوي
هيام : يووووه نسيت منها يلا بقوم اجهزها لك
ايمان : تمام ارسلي لي موقع البيت
هيام : تمام ارسلت الموقع لايمان ووقفت تطلع الغرفه وفتحت الدرج وهي تدور الفستان الاحمر وتدور بالإدراج : وين راح ذا اوووف
مشت للغرفه وهي تشغل كشاف جوالها وتنزل بجسمها تحت الكرسي تناظر وصارت تدور وفتحت الانوار ومشت تدور بالغرفه كلها وعقد عيونه نايف ورفع راسه له يناظرها وهي تدور بالغرفه ونطق : وش تدورين ؟!
لفت له ونطقت : نايف شفت فستاني الاحمر مالقيته ؟
ورجع راسه وحط يده على عيونه ونطق : لانه مو موجود
مشت له وحطت يدها على خصرها : كيف مو موجود وين راح ؟!
سحب المفرش يغطي وجهه ونطق : حرقته
عقدت حاجبينها ببعض ونطقت بستغراب : ايش ؟!شلون حرقته ؟!
نزل المفرش من على وجهه ونطق :حرقته انا ماقلت لك بنتحاسب عليه على بالك امزح واحمدي ربك انه هو الي تحاسب مو انتي والحين قفلي الانوار بنام
فتحت عيونها بصدمه تناظره : انت مريض تحرقه ليه ليههه؟
تافف نايف ولف وجهه للجهه الثانيه وكمل نومته وصرخت عليه بقهر وتوعدت فيه ورجعت لدولاب وهي تاخذ لايمان كم فستان اخذت عبايتها ونزلت لها طلعت وركبت جنبها وهي بتفور من العصبيه وسكرت الباب بكل قوتها
لفت عليها بصدمه من صوت الباب : هووووووب يابنت السياره وش العنف ذا
هزت رجلها وعضت شفتها تكتم غيضها ورفعت حاجبها ايمان
تناظرها :وش فيك يابنت وش صايرلك.
لفت لها هيام :تخيلي ايمان حرق الفستان حرقه قال ايش قال احمدي
ربك هو الي تحاسب مو انتي
ايمان : لحظه لحظه كيف حرقه ؟ ضربت كفوفها ببعض زوجك هذا مريض نفسيا انا انصحك تعالجينه يعني انتي تركتي الدوام الفتره ذي استغلي الفرصه .
هيام : ترك البشر وصار يغار من الجمادات امس غيران من
الحلاوه وقبلها من الفستان
وعضت ايمان شفتها تكتم ضحكتها وتصد بوجها عن هيام
واحتدت نظرتها ونطقت : الحين انا اشكي لي وتضحكين وش
يضحك ان شاء الله !!!!؟
ولفت عليها ايمان: هيام والله يضحك لانك ماخذه واحد موصاحي
رجعت راسها على المقعد وتاففت ونطقت ايمان : ياحبيبي عادي لاتتضايقين بعدين انتي حامل وبطنك بيكبر والفستان مستحيل يدخل
عليك وانا عادي بدبر نفسي بهاذي
هيام : قهرني ايمان قهرني لكن وربي ان اوريه طيب يانايف
طيب اذا ماخليتك تندم مااكون هيام
وضحكت ايمان: اسمعي ايش رايك تنزلين تاخرت عن الدوام انزلي
ودوري لك على حل تسوينه فيه وقولي لي وش يطلع معك
هزت براسها هيام : شوفي لفساتين ذي ترا حلوه بعد
ايمان : معليك مني انا بلبس اي شيء قربت تسلم عليها ونزلت هيام
تدخل البيت وجلست بالصاله ولفت راسها تصد من شافته نازل ومشى لها وضحك من شافها صدت عيونها عنه وعرف انها زعلت
ونطق وسط ضحكته: الحين انتي زعلانه علشان فستان منجدك ؟!
لفت له ونطقت: نعم ؟علشان فستان ؟ انت تشوف الموضوع كذا خير نايف وش الحركات ذي نعم علشان الفستان ظهره مفتوح تروح
وتحرقه ايش التصرف هذا ؟!!!
تنهد نايف ونطق : لاني اعرفك لو قلت لا عاد تلبسينه بتروحين وتلبسينه علشان بس تعانديني اعرفك وانتي بنفسك قلتيها لي ومشى لها وحط يده على خصرها : هيام تعوذي من ابليس مافي شيء يستاهل بعدين انت
تاخرت عن دوامي وماودي اروح وانتي زعلانه
لفت هيام عليه وهي تناظره من فوق لتحت وابتسمت من خطرت بباله فكره ورفعت يدها على بدلته من فوق تعدل نجومه الي على كتفه : مو زعلانه خلاص وهو انا اقدر ازعل عليك يلا حبيبي روح مو تقول تاخرت روح
رفع حاجبه نايف بصدمه انها رضت بكل هالسرعه : متاكده مو زعلانه ؟!
هزت براسها هيام بالايجاب : متاكده مو زعلانه قربت وهي تبوس خذه
وابتسم لها وطلع ومن طلع تلاشت ابتسامتها ونطقت : انا اوريك طيب طيب .
<<الفندق >>
فتح عيونه ولف وماشافها وقام يدخل الحمام وهي بالصاله ورفعت راسها من سمعت صوت الباب وثواني وطلع لها ومشى يطلب فطور ودق الباب وراح ياخذه ومشى يجلس جنبها فطر وهي معه وكان الصمت سيد الموقف وهو يناظرها وهي تتصدد بعيونها ووقف عزام : يلا باقي شوي على الرحله يالله يمدينا نلحق على المطار قامت وهي تدخل الغرفه تغير ملابسها وتسكر الشنطه حقتها وطلعو ونزلو السياره وركب عزام وحرك للمطار وصلو ونزلو اخذو الشنط ولف عليها : وين جوازك اعطيني
طلعت جوازها من الشنطه واعطته وبعد ساعه جاهم نداء رحتلهم وقامو وتنهدت كنوز ولف عليها عزام وركبو الطيارة وقرب منها وشد الحزام عليها وناظرت فيه ورجع مكانه يجلس وبدات الطائرة تقلع وغمضت عيونها ونزلت كفها وشدت على كفه من خوفها ولف عليها عزام وابتسم يشد على يدها اكثر
وقرب منها وفتحت عيونها وهي تناظره وتشوف نظراته لها ونزلت عيونها لكفوفهم بلعت ريقها وسحبت يدها بس عزام ماسمح لها وظل ماسك كفها لفت بعيونها عنه وعزام عيونه عليها عضت شفتها اثر نظراته عليها
ونطق يحاول يقطع الصمت الي بينهم : بنروح الامارات اول
شيء بنام هناك الليله وبكره على موسكو"""
تنحنحت ونطقت بهدوء: تمام ."وبعد كم ساعه وصلو الامارات وطول الرحله وعزام يسحب الكلام منها سحب وهي تكتفي بكلمه كلمتين وقرر يحررها من نظراته لها ولف بعيونه من حس انه احراجها وتننفست براحه وهبطت الطائرة وقبل تهبط مسك يدها عزام وشدت عليها بدون ماتحس بنفسها ونزلو واخذو سياره توديهم الفندق ومشو يدخلون الفندق ويطلعون غرفتهم ولف عليها غيري ملابسك بنطلع هزت براسها ومشت تاخذ اغراضها وتغير ملابسها ..."
رجع من دوامه ودخل وطلع الغرفه لها وشافها على السرير وتناظر بملل مشى لها ومن شافته ابتسمت ومشى يجلس جنبها ونطقت قبل ينطق لها : نايف ابي أرجع لدوامي بالمستشفى مليت من البيت مااحب الفضاوه ذي
نايف : زين ارجعي احسن لك من الجلسه بالبيت
هزت براسها هيام وعضت على شفتها تكتم ضحكتها وهي تفكر باللي
يدور في بالها ونطق نايف: ودك نطلع نتغدا برا
هيام : اي تكفى ابي اطلع
اشر على عيونه : يلا قومي البسي قامت وهي تغير ملابسها ودخل هو ياخذ شور ويغير ملابسه وطلعو من البيت وهي مبتسمه وهي تناظره ووقفو عند المطعم ونزلو ودخلو وجلسو على الطاوله واخذت المنيو تختار وجاء اكلهم واخذ الملعقه يحط لها وهي تسولف معه وتنتظر رجعتهم
البيت بفارغ الصبر..."
~<<بالمستشفى >>~
جاء وقت بريكها ومشت تطلع الكفتيريا ودخلت وطلبت قهوه اخذتها وهي تمشي بممرات المستشفى طلعت جواله تناظر فيه وماحست الا بكوب القهوه ينكب عليها وعليه شهقت من حراره القهوه ورفعت عيونها له وعقدت حاجبينها بصدمه ونطق سند : اعتذر منك جدا جدا ماشفتك
رفعت حاجبها ونطقت : وش جابك
ونطق هو : والله يا حضرة الممرضه هذا مستشفى وانا ظابط وانتي ممرضه فعادي اشوفك واصادفك وبعدين يقولك رب صدفة خير من الف ميعاد
حاجبها مانزل وهي تناظره ونطقت : وليش صدفة خير من الف ميعاد ؟
مين انت علشان يجمعني معك صدفه وميعاد ؟!."
رفع حاجبه سند يناظرها وضحكت وهي تمشي من جنبه ولفت له
تنطق :ياحضرة الضابط لف عليها ورفعت يدها السبابه والوسطى صارت ثنتين مره مويه ومره قهوه انتبه لثالثه ودامك مطفوق كذا انتبه وانت تمشي وضحكت ومشت وحط يده على راسها من الخلف ونطق : ان قالها ربي ان الثالثة ثابته ....."
<<دبي تحديدا >>
في احد الكوفيهات جالسه وهو قدامها وجاء النادل يسالهم وش
يشربون ولف لها عزام : وش تشربين
كنوز : شاهي
ابتسم عزام ولف لنادل : اثنين شاهي
راح النادل بعد مااخذ طلبهم ونطق عزام : على فكره محد ينافسك بالشاهي
لفت وابتسمت وبادله الابتسامه وجت اكواب الشاهي واخذ الكوب يحطه قدامها اخذت ظروف السكر تذوبها بكوبها ورجعت ظهرها على الكرسي وتناظر الابراج قدامها وعزام يناظرها ونطق : شفتي يوم نزلتك المكتبه
لفت له وهزت براسها له بالايجاب وكمل عزام : نزلتي وكنت واقف عند الباب واشوفك وشفتك بحاله من عرفتك ماشفتك فيها ، جاني فضول اعرف وش كتبتي رجعنا ونمتي واخذت الدفتر وقريت كلامك ووقفت عيوني على اخر كلامك من كتبتي هل الحب كافي ؟؟! لتخطي ؟ .
وانا اقولك كافي بالنسبه لي انا وانتي كافي كافيييي وراح اخليه كافي بس بدون مااقولك شيء لانك ماتحبين الكلام بتشوفينها انتي في افعالي ."
ونطقت كنوز: وليش قريت ؟!
عزام : لاني بصير من يوم ورايح اركض ورا كل ورقه انتي تكتبين فيها وش اسوي مجبور اذا الي تكتب ماتنطق
لفت راسها وابتسمت وابتسم عزام لها واخذ كوبه يشرب منها ....""
اظلمت الدنيا وكانت بالمطبخ تسوي بوب كرون خلص وحطته بالصحن وطلعت له : هاه اخترت الفلم ؟!
ونطق وعيونه على التلفزيون : اي يلا تعالي
هيام : عن وش يتكلم
نايف : مدري سند يقول حلو مشت تجلس جنبه ورفع ذراعه على اكتافها
وحطت صحن البوب كرون بيدها وهو ياكل معها خلص نص الفلم وهي تحلل كل شيء يصير وهو يشاركها حط يده على ثغره من حس بالنوم يداهمه
ولف عليها : هيام بروح انام ماعاد اشوف وغير كذا بكره لازم اداوم من بدري
ابعدت عنه : اجلس نكمل الفلم
نايف : لا والله تاخر الوقت مره
هزت براسها له : خلاص روح نام
نايف : وانتي ؟
هيام : لا انا بكمل الفلم انت روح واصلن مافيني نوم
هز براسه ووقف وقبل جبينها : يلا تصبحين على خير
هيام : تلاقي الخير
وطلع نايف الغرفه ورفع راسه لجواله من شاف رساله من سند محتواها:
لاتنسى بكره من بدري الفريق سالم ينتظرنا لاتتاخر
وكتب له : تمام ماراح اتاخر حط جواله وغط بنومه ......."""
خلص الفلم ونزلت الصحن من يدها ونطقت تكلم نفسها : يلا هيام وقتك قامت وهي تطلع الغرفه وتمشي على راس اصابعها ودخلت غرفه الملابس وفتحت الدرج واخذت بدلته وفكت رتبه ونجومه وحطتها بالدرج واخذت عبايتها وطلعت ونزلت المطبخ وهي تاخذ ولاعه ومكعبات اشتعال وطلعت برا البيت ومشت شوي تبعد عن البيت وحطت يدها على ثغرها بخوف : حرام عليك هيام وسكتت تناظر البدله لا مو حرام مو هو حرق فستاني هو بدا فيها أنا مالي دخل هو السبب عادي عادي خليه يتادب علشان مايعيدها رمت البدله وحطت المكعبات فوقها واشغلت الولاعه من فوق المكعبات ووقفت نطقت بخوف : يمه انا شسويت ياربي بيذبحني رجعت تدخل البيت وهي ميته خوف جلست بالصالة وبلعت بريقها من حست بتهورها ......."
انتهى ✅
قراءه ممتعه
لاتنسون ⭐️
