<<صباح يوم جديد >>
لف عليها ونطق : يلا كنوز يلا تاخرنا باقي ساعه على الرحله
نطقت وهي تعدل الطرحه : يلا عزام ها شوفني خلصت
مشى ياخذ الشنط ومشت تتبعه ونزلو قابلتهم فاطمه ونطقت
من شافتهم : هاه ماشين ؟
هز براسه عزام : اي والله يمه تاخرنا ان شاء الله نلحق
كنوز : بنحلق ان شاء الله
فاطمه : اي يلا روحو الله يوفقكم تروحون وترجعون بالسلامة وهاه ياعزام ابي فديو خص نص للحلوه اللي جنبك ابي اشوف فرحتها وافرح معها
ضحك عزام وابتسمت كنوز ونطقت كنوز وسط حياها : بابعد عمري ياخالتي
رفع يده عزام ياشر على عيونه : ابشري يمه قرب يسلم على راسها وطلعو وهم يسمعون الدعوات تسبقهم ركبو السياره يتوجهون للمطار .."
<<الساعه ٦ المغرب >>
فتحت عيونها تسمع بكاء زهر مالي الغرفه مسكت على راسها تحس بصداع وضغط الدنيا كلها على راسها تنهدت ووقفت تمشي لها رفعتها تهزها وتحاول تسكتها مشت تطلع من الغرفه وزهر بيدها ونزلت تحت وهي تهز بزهر ثبتت عيونها عليه تشوفه واقف يناظر من خلف الزجاج للحديقه ومن سمع حسها لف وابتسم بواسع ثغره يمشي لها ووقف قدامها ورفع يده يتحسس جبينها وتنهد براحه بلعت ريقها تشوف نظراته وتشهد على اهتمامه لها بس مو قادره تغفر له صدت بعيونها عنه رفع يده يحك طرف شاربه ونطق : تبين نطلع !
سكتت واكتفت بانها تمشي من جنبه وتحتفظ بحروفها لها مشت تجلس على طرف الكنب وتحتضن زهر لها مسح وجهه ومشى لها يجلس جنبها يفضل السكوت او بالاصح انتهت حروفه مايبي يضغط عليها لانه يعرفها حق المعرفه يعرفها انها صعبه جدا بعد مو شوي وقرر يعطيها الوقت اللي تحتاجه لين ترضى عليه من نفسها مو بضغط منه ابدا لفت عليه من طلع جوالها من جيبه يعطيها ياه ناظرته لثواني طويله بنظرات تملاها الاسئله بس كل اللي تعرفه من هل الاسئله ان الندم يملا عيونه وتعرف بعد انه يحبها ويتنفس هواها ونطق يقطع هالنظرات كلها : حقك علي للمره الالف
بلعت ريقها تسمع نبرة الاسف منه نبرة الالم الندم المشاعر السئيه اللي يعيشها لوهله تجاهلت كل المشاعر اللي بداخلها ونطقت : ابي اطلع
انفكت عقدة حاجبينه وابتسامه تحوف ملامح وجهه حوف ورفع اصبعه ياشر على خشمه يلبي طلبها ونطق وسط ابتسامته: على خشمي ومن عيوني الثنتين امري انتي بس تدللي كل اللي بخاطرك اطلبيه طلباتك أوامر أنتي بس قولي وش ودك والباقي ازهليه يلا قومي عازمك وترا امي داقه تبي
زهر نوديها عندها وبعدها نروح يلا قومي مد يده ياخذ زهر من بين يدينها ويطلع وقامت تتبعه ونطقت تكلم نفسها : لاتضعفين هيام لاتنسين وش جاك منه لا لا هيام لا تكفين لا تنهدت وطلعت الغرفه وراه ..."
وبعدها بساعه تقريبا انتهو وطلعو يركبون السياره ومشى نايف لبيت اهله يوصل بنته والصمت سيد الموقف وقف عند الباب ولف عليها ياخذ زهر منها ونزل يعطي امه وهيام بالسياره تنتظره وكم دقيقه ورجع لها يركب وحرك من عند البيت لمشاورهم سرحانه تناظر الشارع وقطع سرحانه من وقف السياره عند مكان غريب على انظارها واول مره تشوفه عيونها
وقف السياره ولف عليها ينطق : يلا انزلي
لفت تناظر المكان وتناظره ونطق نايف : اي لحظه قبل ننزل ابي اطلب منك طلب
رفعت حاجبها بتساؤل ورجع يكمل كلامه : واتمنى انك ماترفضين اوعديني انك ماترديني
ميلت شفايفها وضحكت بسخريه ولفت راسها عنه ونطقت بهدوء نبرتها : اللي جالسه اعيشه بسببك مايسمح لك تطلب مني شيء ولعلمك طلبت منك اطلع لاني ابي اغير جو مو لاني ابي اطلع معك
هز براسه لها ونطق : اعرفيه بالاول يمكن حتى انتي محتاجه هالطلب !
لفت عليه تنطق : خلاص نايف رجعني البيت ماب....
نطق يقطع كلامها : اششششش عارف وش بتقولين انا ماصدقت تطلعين علشان ارجعك ونزل يمشي لها ويفتح الباب من جهتها قرب لها
ونطق بهدوء نبرته : اوعديني صدقيني بيغير اشياء كثيرة وبيفيدنا الاثنين
شتت عيونها وميل راسه لها واشر لها بمعنى انتظر وعدك ونطقت بعد ثواني طويله من صمتها : اوعدك
ضحك نايف بواسع ثغره ونطقت باستفزاز من ضحكته : اخلص علي وش طلبك !؟
مسك يدها ونزلت معه يدخلون المكان المجهول لها والمعلوم له مشت تتبعه ووقف نايف ووقفت معه وعقدت حاجبينها من شافت الباب الفاصل بينهم وبين هالمكان ونطق : قبل افتح الباب طلبي منك نعيش هالليله ليله تعارف من جديد ننسى كل شيء شيء انعاش نحرق صفحات العتاب والزعل ونكتب صفحات الحب الجديد بس هالليله تكفين
ارتخت ملامح وجها بعد فهم وتجمعت الدموع بعيونها
شد على كفها ونطق : وعديتني !
هزت براسها بمواقفه لانها فعلا تحتاج شيء يغير نفسيتها
ابتسم نايف ونطق : ادخلي وبجيك يلا
لف ينزل مع الدرج تاركها على اعتابه ونطقت
تناديه : نايف !! هذا وش يسوي !؟
لفت تناظر الباب من سمعت الموسيقى تملي المكان والدلالة على ان الصوت خلف هالباب ومشت ترفع يدها على مقبض الباب بفضول وتساؤل بداخلها فتحته ودخلت واتبدلت ملامح وجها الباكي الحزين لملامح الفرح والرضا من اللي امتلى بعيونها ضحكت تمشي بالممر اللي اشبه بحديقه ورد مشت والضحكه تسيطر على ملامح وجها مشت متجاهله كل المشاعر السيئه خلف هالباب رجعت تضحك من قلبها فعلا لفت من نطق من خلفها : لو سمحتي !
عقدت حاجبينها بعدم فهم ورجع ينطق : ابي اشتري باقة ورد
ابتسمت بواسع ثغرها تنطق وسط ابتسامتها : ورد ؟
هز براسه ياكد كلامه ونطق : اي نعم ورد
ميلت شفايفها ورفعت يدها لتحت دقنها ونطقت : اللون والنوع ؟! واذا ماعليك امر الشخص يعني يختلف الورد ونوعه من شخص لثاني !
ابتسم نايف بواسع ثغره من بدات تتجاوب معه
ونطق : قبل اقولك عن نوعه ولونه ولمين ممكن اقول لك اني ابي
اتعرف عليك ؟
رفعت حاجبها من مد يده لها يخطي الخطوه لتعارف : نايف
مدت يدها تصافح يده ونطقت : هيام
ونطق وسط ابتسامه تحتوي ثغره : عاشت الاسامي
هزت براسها تنطق : عاشت ايامك
سحبت كفها من بين كفه ونزل عيونه لكفوفها ونطقت: ماقلت لي ؟
هز براسه بعد فهم ونطقت : النوع واللون ولمين ؟
همهم لها ونطق : عشان هالاسباب انا جاي ابي اعرف كل نوع وبعدها اقرر وش اللي يناسبني ويناسب الشخص اللي انا جاي عشانه
لفت تناظر حولها ونطقت : من وين نبدا !
رفع يده ياشر لنوع من انواع الورد ونطق : من هاذي مثلا
لفت تناظر النوع وابتسمت ومشت لها وهو يتبعها نزلت تلم كم ورده بيدها ونطقت : اوركيد اسمها اوركيد من الزهور النادره غريبه بس بنفس الوقت جميله يعني تقدر تقول وجودها صعب جدا
ونطق نايف من خلفها : اجل وقع الاختيار
ضحكت بواسع ثغرها وضحك معها من شاف الضحكه اللي اشتاق لها فعلا ونطق لها : ابي ابيض لاني جربت اعتذر لها بكل الوانه بس مافاد عشان كذا واثق انه بيغير اللي ماقدرت انا اغيره
تحولت ضحكتها لابتسامه حزينه وهزت براسها له ومشت تجمع من اللون وهو يناظرها ويتاملها خلصت من الباقه المتكامله ورفعت عيونها له
ونطقت : خلصت
مشى لها واخذ الباقه منها ونطق : ان شاء الله ترضي غرورها
ميلت راسها بعد معرفه ونطقت: اذا عن الاوركيد بيرضي غرورها اما عن الشخص اللي جايبه ماادري بس حط في بالك اي شخص يحب الاوركيد مستحيل يرضى بسهوله تدري ليه ؟!
نطق بتساؤل يحتويه : ليه ؟؟
ونطقت تجاوبه : لانه بكل بساطه زيه صعب جدا
لانت ملامحه ونطق : بس الحب يسهل كل صعب
هزت راسها بمعنى نفي: لا احيانا مايكون كافي
مشى يقطع المسافه ونطق : كافي صدقيني كافي يغير كل شيء يسهل كل صعب يلين كل حديد وكافي يخلي الحار بارد والبارد حار يشعل ويطفي وكل هذا بختياره هو مو بختيار المحبين ."
صدت بعيونها عنه تعرف وتفهم كلامه والاهم من هذا كله تعيشه وتحس فيه ولاهي قادره تنكر ابدا تحبه لحد الجنون تهيم فيه لحد الفناء تعشقه لحد الموت تحترق عشانه وتدفى عشانه
ونطق نايف يقطع كل التفكير والصمت : تعالي معي
رفع الورد بين يدينه ومشى وهي خلفه وقفت تناظر الطاوله الدائره اللي تجمع كرسين وشموع ثنتين طوال سحب الكرسي ومشت تجلس ومشى يجلس قدامها فتح زجاجه المشروب يملي اكوابهم ويطرح عليها اسئلته وهي تجاوب متناسيه زعلها منه وكل اللي جالسه تسويه بانها توفي بوعدها له رجع ظهره على الكرسي من انتهى الكلام وانتهت الاسئله والاجوبه انتهت الحروف وصارت تناظره ويناظرها تعاتب بعيونها ويعتذر لعيونها تزعل ويراضي تشوفه كيف ثقيله عيونه متراخيه ملامحه كيف امتلى الياس بصدره بانها تسامحه نزل راسه وابعد عيونه واخذ زقارته ورفع ولاعته وماحس الافيها تسحب الزقاره من يده قبل تحتضن شفايفه وتجلس بحضنه تجمد بارضه يناظرها ونطقت : قلت لي الحب كافي يسهل كل صعب يلين كل حديد وكافي يخلي الحار بارد والبارد حار يشعل ويطفي وكل هذا بختياره هو مو بختيار المحبين صح ؟!
هز براسه بهدوء يسمعها وكملت كلامها: اجل اسمع انا كل اللي بقوله لك مو بكيفي بكيف هالحب لانها لو جت علي ماسمعت حرف ولو جت علي حرقتك وذبحتك وشربت من دمك تدري ليه لاني اكرهك وبقلبي غضب الدنيا عليك بلعت غصتها تحاول تخفي دموعها بس للاسف سيطرت عليها بس مو بكيفي هذا اللي مجنن عقلي وقاهرني على نفسي انه مو بكيفي احبك والله احبك واعشقك واموت منك ياهلاكي تكفى حس فيني حس فيني بموت بسببك وبسبب هالحب اللي قاعده اعيشه لك اه نايف اه ليش تسوي فيني كذا ليشش شدّها من ظهرها يمحي معاني البعد ، شهقت تعلن دموعها مرتجف كل ما فيها سحبها يميلها عليه وانثنى عليها بإنعطاف كامل يروي عطش رغبته وينبت الشعور الطاغي المتسيد المتفرد المتمرد المتمكن منهم اثنينهم غارق فيها ومغرقها معه وكانه بحر ثاير وموج غاضب ماترك لها ولا له فرصه في اخذ النفس طريقهم خالي من محطات الوقوف يعرف العواقب بمجرد مايبعد خايف من النفس نفسه قبله غير عادلة يملاها الخوف الشديد وبعد مده انتهت هالعاصفه الشديده بكل مشاعرها ابعد عنها تارك انفها على انفه وجبينه على جبينها غمض عيونه بشده من سمع نبرة صوتها الباكي وسط انفاسها العاليه اثر قبلتهم تنهد من صوتها اللي ماترك له عقل ونطق بهدوء وسط غرقه فيها : اشش خليك عارف وش بسمع بمجرد مااتركك لاتنسين وعدك لي ليله تعارف قلنا مو ليله عتاب وكلام يسم البدن
ونطقت وهي مو باقل حاله منه : تعارف ؟ انت خليت فيها تعارف !
ضحك يهز براسه لها : ماتركتي لي عقل كيف اتعرف عليك وانا اعرفك اكثر منك بس وش اسوي ابي اسوي اي شيء علشان ارجع
اسمع حسك واشوف ضحكتك
رفعت يدها تتحسس وجهه وتشوف عيونه المليانه فيها وتشهد على سكرات العشق اللي يعيشها من ملامح وجهه الحمراء تشوف تاثير نارها عليه رفعت نفسها تحضنه دفن راسه بصدرها شد عليها ونزلت دموعها من الحاله اللي هم فيها ..."
<<الساعه ١٢ بالليل تحديدا الشرقيه >>
ونطق : تصدقين مافيني نوم
تاففت تنطق : ولا انا بموت خوف من بكره
لف وحط يده تحت راسه ونطق : من وشو خايفه كم مره اقولك لازم ماتتوترين وارجع اقولك الثقه بالكلام هاذي اهم شيء
قامت تجلس ولفت عليه : مدري مو قادره اسيطر على توتري امسك يدي شوف
ابتسم عزام يمسك يدها ويشوف برودتها ونطق : قومي نطلع
رفعت حاجبها تنطق : نطلع ؟ الحين ! منجدك !
هز براسه لها ياكد كلامه : اي نطلع هيا قومي ماراح نطول
وقف وسحبها مع يدها ضحكت وهي تقوم معه فتح باب الغرفه واللي كانت تطل على البحر مباشره رفع يده على اكتافها ومشى معها بتجاه البحر ونطق : وش يذكرك فيه بحر الشرقيه !
ابتسمت كنوز تتذكر موقفها معه بعد خطبتهم
ونطقت : يذكرني بوقاحتك
اعتلت ضحكات عزام و اتسعت ابتسامته كنوز من سمعت ضحكته ونطق عزام : ياحلو ذيك الليله
شدت على خصره اللي كانت تحتضنه من الجنب ولفت على البحر تناظر الموج وهي تحمد ربها ان نصيبها كان معه
شد عليها ونطق : تعالي
سحبها مع يدها ونطقت : لا عزام اخاف اطيح
شد على كفها ونطق : ماراح يصير لك شيء نمشي حوله بس يلا
مشت معه يمشون على حدود البحر وهو يسولف لها عن بكره ويحاول يخفف من توترها وهي تسمعه بكل حب وشغف يحتويها ..."
طال الحضن وطالت جلستها بحضنه ناسين الدنيا ومن فيها وهم
باحضان بعضهم ونطقت تناديه : نايف !
فتح عيونه يرجع لواقعه ورفع راسه يناظرها ونطق: قولي !
وجت بتقوم و شد عليها ونطق: خليك
رفعت خصل شعرها بحيا ونطقت : ابي اطلبك طلب بسيط واعتبره حل عشان هالقلب يرضى عليك
هز براسه يستقبل سوالها ويرفع خصل شعرها ونطق : قولي اسمعك بعدين سبق وقلت لك انتي تامرين ماتطلبين ودامه لرضاك اعتبريه صار
رفعت يدها تتحسس عروق جبينه البارزه ونطقت : ادري إني معقده وابيك تحاولني ابي ارضى والله لايكون ببالك اني ابي ازرع هالقسوه والزعل انت مو عابر سبيل عشان اقسى عليك بس مو قادره انسى تقدر تحاولني لين ارجع هيامك ؟!
رفع يده يمسك يدها اللي تعتلي جبينه يقبلها بكل مافيه ونطق : بحاولك وبحبك زود واخلي حياة نايف تفنى على رضاك ."
ابتسمت وسط دموعها ورفع يده يمسحها ونطقت وسط دموعها : لاتلومني لو ازعل لاني مو مصدقه للحين كيف طلع منك كل هذا وانا
متعوده على كل هالحنان منك ."
شتت انظاره ورجع يناظرها ونطق: لو قلت لك اني كنت خايف وقتها بتسامحيني ؟
عقدت حاجبينها تناظره بعدم فهم ونطقت : خايف !
هز براسه ياكد كلامه ونطق : اي خايف
رفعت اكتافها بتساؤل ونطقت : من وش خايف !
قوس شفايفه ورفع حاجبه ينطق : خفت تكونين اخترتي تعيشين حياتك بدوني
لانت ملامحها ونطقت بحده: شلون نايف شلون يعني انت متوقع اني ممكن اسوي شيء مثل هذا !
بلل شفايفه يكمل كلامه: من رجعت البيت ومالقيتك حسيت اني رجعت نايف الاول رجعت نايف الوحيد والناس حوله بس وحيد لان قلبه مو معه خفت ان اللي صار يخليك تبعدين وانتي تعرفين مااقوى هالبعد عشان هالسبب ماقدرت اتمالك نفسي ووسط خوفي من هالفكره طريتي مساعد وقتها والله ماشفت ولا شيء قدامي يعني كل اللي سويته كان نابع من خوف بداخلي مو قوه وانتي تعرفين اني قاسي وقوي مع الكل الا عندك اكون الضعيف الخايف
وقفت تبعد عنه ووقف معها وماحس الا بكف على وجهه غمض عيونه ورجع يناظرها ورمت نفسها عليه تحضنه بكل قوتها ونطقت : اصحى على نفسك وش هي الحياه بدونك عشان اتركك واعيش بحياه خاليه منك رضيت والله رضيت والله احبك والله اسف انا ، اني خليتك تخاف اسف انا ، انت مو ضعيف انت مو قاسي انت مو خواف انت اعظم انسان شافته عيني حنون رغم كل اخطاك انت نايف حبيبي انا اعرفك اكثر من نفسك عشان كذا انا اقولك انت فيك حنيه هالدنيا كلها انت عيوني تعرف وش يعني عيوني بعدك عني كان بيذبحني وبياخد زهر من يدي زي مااخذ اخوها انت الحياه بعيوني ولا عمرك تفكر مجرد تفكير بهالفكرة سكتت من اختلطت دموعها بحروفها وابعدت عنه وهي للحين تحاوط عنقه ونطقت تدري وش ممكن يبعدني عنك !
هز براسه يتساءل ورجعت تكمل : الموت لما انتهي من الدنيا لما اصير سراب غيرها وعد ماغيب عن عينك وعد مارخص محبتنا حبيبي ساعة الفرقى ابيها اخر همومك اخر مخاوفك انت نايفي حبيبي عيوني وقلبي وروحي وابو زهرتي الخوف مو لك الخوف لدنيا كلها الا لك تسمعني عمرك لاتخاف لاني طول هالعمر بكون معك .""
نزلت دموع عيونه من كلامها من حروفها اللي اشبه بالغيث على صدره ونطق : بسم الله عليك رجعت راسها على صدره ونطقت وهي
باحضانه : لاتخاف نايف لاتخاف انا معك معك
ابتسم نايف ورفع يده يمسح شعرها ونطق : لابو اللي يخاف وانتي له .."
<~يوم جديد يوم تدشين كتاب كنوز بدار النشر تحديدا ~>
واقف جنبها وهي تراجع كلامها ونطقت : عزام متوتره
تنهد عزام ينطق: ياحبيبتي معليك كل شيء بيكون تمام وش قلنا احنا !
هزت براسها تنطق بكلامه لها : كل شيء بيكون زين التوتر ماراح يسوي شيء غير انه يخرب تعبك
ضحك عزام وهز براسه ينطق : اييه هذا هو خلي هالكلام براسك يلا روحي انا معك لاتخافين روحي الناس تنتظرك يلا كنوزي يلا حبيبي انتي قدها واثق فيك
بلعت ريقها تشوف الناس ونطق عزام : يلا روحي انا معك
هزت براسها تنطق : يلا زين تعال قدامي
ابتسم عزام يهز براسه ومشى معها يوقف قدامها ويشوف تجمع الناس حولها ويشهد نجاحها يشوف اسمها يكبر قدامه يشوف محبة الناس لحروفها يشوف ضحكتها يشوف فرحتها ضحك يناظرها ويتاملها بكل ذرة حب بداخله لها رفع جواله يصورها ورجع جواله بجيبه من انتهى وهو يتكتف يناظرها ...."
طلعت ضحى من الغرفه تركض لامها ونطقت : يمه شوفي عزام ارسل كنوز
جت فاطمه تناظر معها ونطقت : ياعمري عليها احبها هالبنت الله يوفقها يارب
ابتسمت ضحى تنطق : اي والله عسل كنوز تستاهل كل خير بروح اوري ابوي
ركضت ضحى تطلع من المطبخ وضحكت فاطمه تنطق بصوت عالي : شوي شوي لا تطيحين وراك عرررس
دخلت ضحى الصاله وهي تجلس جنب ابوها ونطق تركي : شفيك
مدت الجوال له وهي تنطق : بابا شوف كنوز
اخذ الجوال منها تركي يناظر الفديو ابتسم يشوف الفديو ونطق : ماشاءالله الله يوفقها يارب ويصير اسمها بكل مكان
ابتسمت ضحى تنطق : امين يارب
لفو على دخول سعود الصاله وجلس بالطرف الثاني من ابوه ونطق : شفيك صياحك بالبيت ؟ ميل راسه يشوف الجوال مع ابوه وضحى .."
<<بيت فيصل >>
الكل بالصاله حول بعض وفديو كنوز مالي البيت والدعوات تحوفها منهم
ونطقت الجوهره : ياعمري ياكنوز الله يوفقها يارب ويبلغني فيها كل خير
فيصل : اي والله مجتهده ولكل مجتهد نصيب
لفو على شهقة نهار ونطق فيصل : ولددددد
فهد : الله يخرش العدو وش فيك !
شروق : حيوان انت وش فيك !
الجوهره: نهاروه شفيه !
وقف وهو عين عليهم وعين على الرساله الواصلة له والسبب في هالحاله اللي هو فيها ونطق بصوت مسموع لهم : توظفت
اعتلت اصوات صراخهم بفرحه وعدم تصديق
وقفو يباركون له ونطق نهار لفهد : فهد امانه اقرا احس اني مو مصدق
ضحك فهد ياخذ الجوال منه ونطق : لا صدق من قدك توظفت وبتعرس
لفو على بكاء الجوهره وضحك فيصل ومشى نهار لامه ينطق : يمه وش فيك !
ونطقت وسط فرحتها فيه : مبسوطه لك الحمدلله يارب
ابتسم نهار وهو يحضنها له وابتسم بواسع ثغره فهد وشروق بعد وفيصل اللي يناظرهم ابعد عن امه ينطق : يلا تجهزو تجهزو
اعتلت اصوات الضحكات عليه ونطق فيصل : اقول اعقل واثقل
نهار : معليك يبه عاقل عاقل
فيصل : اي مره واضح
وطلع من عندهم يركض وضحك فهد ينطق : بيروح يبشرها و الدنيا كلها بتدري الحين لفت الجوهره على فيصل تنطق : دق على نايف خله يجي هو
وزوجته على الغدا اليوم
هز براسه فيصل وهو ياخذ جواله يدق على نايف اللي ماكان اقل فرحه منهم وهو يناظرها حوله وقدامه وسارح فيها ويقبل يدها كل ثانيه ويقدم اعتذاره على كل لحظه زعلها فيها لف على صوت جواله يدق وضحكت هيام تنطق : رد !
ونطق وهو مفهي فيها : بعدين مشتاق لك الحين
ابتسمت تنطق : معليك عندك بنطفي نار شوقك بس رد
لف ياخذ جواله ونطق لها قبل يرد : ابوي !
هزت براسها تنطق له : اي رد عليه
رفع جواله له ورد عليه وقامت هيام من عنده لزهر وهي تاخذها ودخلت غرفة الملابس وتسولف لها وكم دقيقه لفت على نايف يدخل عندها ونطق : الدنيا قايمه قاعده واحنا مادرينا عن احد
عقدت حاجبينها ببعض تنطق: ليه وش اللي صاير !
قرب لها يجلس على طرف التسريحة وهي واقفه قدامه ويمسك يد زهر
نطق : اول شيء كنوز وعزام راحو الشرقيه عشان تدشين كتابها ثاني شيء نهار توظف ثلاث شيء تجهزي اهلي عازمينا على الغدا بعد شوي وختم كلامه بضحكه على ملامح وجها
ونطقت له : هووب شوي شوي
ضحك نايف ورفع يدينه الثنتين يشيل زهر ونطق : شايفه كيف الدنيا تفرح لفرحتي وتزعل لازعلتي
ابتسمت بواسع ثغرها واخذت اطراف خصل شعرها بيدها
ورفع حاجبه نايف ينطق: شفيك ؟
هزت براسها بمعنى ولا شيء ابتسم نايف يناظرها ونطق : يلا تجهزي مافي وقت
ومشت تطلع من الغرفه وضحك نايف ونزل راسه لزهر يناظرها
ونطق لها : دوختني امك ماعاد فيني عقل ابتسم وقام يتبعها .."
اخذ الكتاب بيده ومشى لها رفعت راسها من سمعت صوته ينطق : ممكن توقعيك حضرة الكاتبه!
وقفت كنوز وضحكت بواسع ثغرها وابتسم عزام ونطق: ياكبر فرحتي فيك
لفت تناظر حولها تشوف المكان الشبه خالي مشت تطلع من خلف المكتب عنده مسكت كفوفه الثنتين ونطقت : وياكبر حبي لك وياكثر الامان بوجودك وفرحت قلبي وروحي بشخص مثلك نجاحي هاليوم كله بفضل الله ثم بفضل شخص داعم مثلك رفعت اطراف رجولها تحضنه وشد عليها عزام ابعدت عنه بعد ثواني طويله من هالحضن ونطق عزام : ماسويت شيء تستاهلين كل خير وعقبال مايجي تركي يشهد على كل شيء شهدته اليوم
ضحكت كنوز تنطق : يارب
نزل يده من على خصرها ومشت ترجع للمكتب ونطقت : تبي توقيعي اجل
ضحك عزام ينطق : اكيد
ابتسمت تاخذ الكتاب وتوقع باسمها والتاريخ وتقدمه له اخذه عزام منها
ونطق : يلا تعالي ورانا فرحات نعيشها
ابتسمت ومشت تاخذ شنطتها وتمسك كفه وتطلع معه .."
وقف نايف عند بيت اهله ونزلو يدخلون واستقبلتهم شروق تفتح الباب لهم ونطقت : زهري حبيبي هاتها نايف مدت يدها تاخذها من نايف
ونطق نايف: شوي شوي
ناظرته بنص عين ونطقت : متى بكبر في عيونك ؟
ضحكت هيام تنطق : هووو سلمي طيب
ضحكت شروق ومشت تسلم على هيام ونطقت: خلاص نايف شفته امس
ضحك نايف يضربها بخفه على جبينها
ودخلو الصاله ودخلو العيال يتجمعون على زهر ابتسم نايف يناظرهم لف يناظر هيام وهي تناظرهم والابتسامه على ثغرها ونطق بداخله : اهاه يانايف شلون زعلتها والضحكه ماتليق الا على مبسمها
لفت تناظره من حست ان عيونه عليها رفعت حاجبها تتساءل عن نظراته لها ونطقت بهدوء وبصوت مسموع لهم اثنينهم : شفيك !
هز راسه بمعنى ولا شيء واعتدل بجلسته ونطق بهدوء : كثري منها
ميلت راسها بعدم فهم ونطقت : وش هي !
لف يناظر اهله ويشوف انشغالهم بزهر ورجع عيونه لها ونطق: ضحكاتك
ابتسمت بواسع ثغرها وابتسم من شاف ملامحها كلها تبتسم له
وقطعت الجوهره كل هالنظرات والابتسامات تنطق : نايف يلا وانا امك قوم انت وهيام الغدا جاهز حياكم وقفو كلهم يجتمعون على الطاوله والضحك والسوالف تسيطر على المكان بالكامل ."
تنحنح نهار واخذ الملعقه يمررها بداخل الصحن لاجل يلفت انتباهم عليه ونطق : شوفو ياعائلتي الكريمه انا انسان انهرت نفسيا وجسديا عشان اوصل للحظه هاذي واتوقع والواضح لي قبل يكون واضح لكم اني كفو ورجال قول وفعل صبرت ولصبر حدود يعني انا ادمي ابي اعررس والوضع طول يعني ماله داعي يطول اكثر من كذا
ضحكت شروق تنطق : عشنا وشفنا نهار يعرف يتكلم
ضحك نايف وابتسم فهد وثواني واعتلت اصوات الضحك منهم كلهم ونطق نهار بغيض من شروق : شوفي انتي انا انصحك تاكلين وتسدين حلقك عشان مااحتفل في خلقتك
الجوهره : اسكت انت وياه وبعدين نهار اصبر خير توك ماكملت ساعتين من قالو لك توظفت انت من وين جايب هالشفاحه كلها
فيصل : اي اسمع كلام امك واعقل ولف على هيام ينطق لها شوفي وانا عمك انتي ابخص بابوك كلمي الدلخ ذا ان شافه كذا بيهون
ابتسمت هيام تنطق : معليك ياعمي ماراح يهون
ضرب نهار بيده على طرف الطاوله يتفق مع كلامها ونطق : اي هذا الكلام الزين
لف نايف ينطق لها : بنزوجه بس خليه يثقل بالاول
ميلت راسها له تنطق بهدوء نبرتها: نايف شفيك اللي يسمعك يقول مجنون خلاص خليه ينبسط وبعدين عادي انا اعرف واحد كذا يركن ثقله عند
باب البيت ويدخل خفيف
ابتسم بدهشة ورفع يده يفتل شاربه ابتسمت من شافت نظرات عيونه
بالطرف الاخر من الطاوله نطق فهد : نهاروه شرايك تكلم عمي تركي انت
رفع عيونه فيصل ينطق : نعم ؟ وش قلت استاذ فهد وش اللي بكلمه هو ليه ماوراه احد ماوراه اب
مسح على دقنه فهد ينطق : يايبه الله يخليك لي انا اشوف ان معه حق هالمره اشغلتونا تخرج تخرج وجيب الشهاده ويوم تخرج وجابها قلتو توظف وتوظف والحين ماعاد لقيتو شيء قلتو انتظر وخلك ثقيل وش الاعذار ذي
سكت فيصل وهو فعلا ناوي يكلم تركي بس يبي يلعب باعصابه
ونطق نايف : معليك ماراح يصير الا كل خير
هز براسه نهار وابتسم لهم من شاف وقفتهم معه ..."
<<وبعد مرور اربع شهور يوم زواج ضحى ونهار تحديدا >>
واقف ويناظر بشته قدامه وعاجز يفرق بين حلمه وواقعه والضحكه شاقه وجهه شق قلبه على جناح طير موب بصدره واخيرا هاليوم صار يومه صار اليوم اللي بيعيش معها تحت سقف واحد اخذ جواله يرسل لها
<<عند عروستنا >>
جالسه على الكرسي والبنات حولها وتقريبا انتهت من مكياجها وشعرها ابتسمت بواسع ثغرها لين بانت غمزاتها من شافت الهير ستايل تركب لها الطرحه على شعرها وهي للحظه هاذي عاجزه توصف شعورها رفعت جوالها تناظر رسالته لها : كيف عروستي ؟
ابتسمت ملامح وجها بالكامل وهي ترد عليه : احتاج قرصه عشان اقدر استوعب اللي انا فيه نهار قولك قاعده احلم ؟
ضحكت من شافته كاتب : صدقيني ولا انا قادر افرق بس كل اللي اعرفه انه لو كان حلم اتمنى ان يفنى عمري وانا نايم
تجمعت الدموع بعيونها تناظر فستان زفافها واللي كان يوشك لها انها تعيش واقع وتناظر البنات يضحكون وكل وحده مشغوله بنفسها رجعت انظارها لجوالها تكتب له : نهار عيوني تقول انها بدات تصير احلامنا واقع وشوفتك هي اللي بتخلي كل حواسي تحلف لي وتقسم انه مو حلم انتظرك بالزفه من تقبل علي وانت تسمع عزفي بهاليوم المميز ."
تنهد بمشاعر سعيده على قلبه ولاول مره يعيشها بهالشكل لف يشوف باب الغرفه يدق مشى يفتح الباب وضحك من شاف العيال كلهم عند الباب ونطق نايف : للحين ماخلصت يلا الناس قربت تجي
رفع انامله لشعره ونطق : نايف قلبي يعورني
ضحكو العيال كلهم ونطق عزام من بينهم : يخوي عادي شعور طبيعي كلنا كذا
دخل سعود يوقف قدامه ونطق بضحكه : وش فيه وجهك احمر كذا !
فهد : ياولد افرح من قدك الليله ليلتك
سند : حسافه انتهى جدولنا عليك يانهار
الكل : ههههههههههههههههههههههههههههههههههههههههه
نصار : يخوي مالومه احس الموضوع يوتر الصدق
نايف : لا يوتر ولا شيء الامور طيبه يلا وانا خوك اللبس خلنا ننزل
رفع سعود عيونه لفهد وضحكو يقربون منه ويرفعونه يدخلون للغرفه تحت صراخ نهار ونطق : ياكلاب نزلني انت وياه ناوين على اعضائي ولا وش
ونطقو كلهم بصوت واحد : عريسنا يا بدر بادي دامت لياليك السرور
و عريسنا يا عطر زاهي غلب على كل العطور
جينا بمنقاش الأيادي نخرق بها عين الحسود
يمينها جات بيمينه بأسمى المعاني والشعور
و اخذتها و انت الموفق حوريه من بلاد النور..."
ارتفعت اصواتهم وفرحتهم بنهار وعند البنات نفس الحكايه ضحك وسوالف وقهوه وتصوير واجواء الفرح تطغى على المكان طلعت هيام من بينهم
تنطق : يلا بنات ترا تاخرنا انا بروح غرفتي البس والبس زهر وبعدها ننزل امي تدق
وفعلا الكل راح غرفته ماعدا شروق وجود مع ضحى
دخلت غرفتها تلبس زهر خلصت ومشت تلبس فستانها الازرق انتهت ووقفت عند المرايا تفتح بوكس مجوهراتها ....."
عند العيال طلعو من الغرفه ونطق نايف لسند بممر الفندق : اسمع انزلو انا رايح الغرفه شوي وجايكم
هز براسه سند ونزلو العيال كلهم القاعه
لفت من دخل الغرفه وابتسمت تشوف نظراته لها وتبدلت ابتسامتها لضحكه ونطقت : شفيك تعال
مشى لها يرفع يده يمسك كفها ويخليها تدور حول نفسها ونطق : نفس بالضبط اول ليله وش هالحلاوة ذي يابخت كل عين بتشوفك واولهم انا والله ان الأمور تطيب ويزين حالها لا من عيني قابلت عينك
قربت له ترفع يدها على صدره أبتسم يمسك كفها يضمّه بين كفوفه ، رفع عيونه من كفها يتأمل سحرعيونها الميت والطايح بغرامها ونطق بدون مايسمح لعيونه ترمش : عز الله انه من نالك نال السبع المعجزات
ابتسمت تعشق كلامه من اول حروفه لاخر شيء يختم فيه وهي عاشقه مُتيمه له بس عقلها واقف على اول حروفه تنطق له : مو طبيعي قد ايش حروفك فرح تتشكل بداخلي بس عندي سوال يافرحي وبهجة خاطري ممكن تذكرني بمقصدك من قلت نفس اول ليله وش كنت تعني فيها ؟
ضحك نايف يتذكر اول ليله عاشها لوحده وحس بنبض قلبه وخوفه ورعبه ونطق : اول ليله شفتك فيها وازيدك من الشعر بيت هالذكرى لي وحدي بدونك
رفعت حاجبها تنطق : افا والله
رفع يده لشعرها يعدله لها ونطق : تذكرين اول ليله جيتي عندنا وخطبتك فيها
هزت براسها وكمل كلامه : شفتك فيها من طلعت من المجلس قاصد الفكه من كل اللي حولي ومن الموضوع اللي كتم على انفاسي دخلت مع المدخل الخلفي وشفتك بفستانك الازرق بشعرك المغطي متونك لعيونك الخادرة واحمرار مبسمك الممتلي يعني تقدرين تقولين صابني بالعيون والحجاج الذبوحي وأحمر المبسم اللي مايعالج صوابه قلبي ماهدا من ذيك الليله ليومك هذا عرفتي وش قصدي بنفس اول ليله بالضبط !
جمدت ملامحها من سمعته ونطقت : يعني كنت انت ؟
رفع حاجبه نايف ينطق بعدم فهم : وش قصدك !
ضحكت هيام تنطق : يمه منك كل هذا يطلع منك انتبهت للباب وصوتك اللي كان خلفه وسمعتك من كنت تتكلم مع سند بس توقعت إنك ماشفتي
لانت ملامحه ونزل نظراته لإصبعه اللي ثبته على ثغرها وأبتسم من إحمرار شفايفها وحدة عيونها السبب في قله ثباته رفع عيونه لها ينطق : مادريت ان هالزواج بيحي عروق قلبي الميته
رفعت كفها تاخذ يده اللي فوق ثغرها وتقبل كفه من فوق بعمق ونطقت من نزلت يده : احبك
نزل انظاره لكفه يشوف اثر مبسمها الاحمر فوقه مسك دقنها يثبت وجهها قاصد ثغرها بس قطع هالحوار كله بكاء زهر ضحك نايف وهيام معه ومشى لها ينطق لهيام وهو يرفع بنته : فكتك زهر مني رفعها له ، الله الله وش هالفستان هذا وش هالاسم على مسمى
مشت هيام للمرايا والابتسامة مرسومه على وجها وهي تناظرهم بالمرايا وتلبس حلقها ودبلتها اخذت المناكير الاحمر ومشت تجلس على طرف السرير وتحط منها انتهت وهي تهف عليها وتنتظرها تجف
وقف ينطق لها : يلا ننزل تاخرنا ترا ابوي بيسويني عشاء لضيوف
نطقت وش انشغالها باظافرها: باقي ماخلصت
نطق وهو يعدل شماغه : وش باقي مااشوف ان باقي شيء !
رفعت يدها ونطقت : انتظرها تجف والبس كعبي وبنزل
تنهد يمشي لها ونزل بطوله ياخذ كعبها ويلبسها ابتسمت تناظره كيف يلبسها كعبها ونطق بضحكه: هيام وش له هالطول كله يعني صح انك قصيره بس مو لذي الدرجه زين اني جلست معك عشان اشيل زهر لانك
لوشلتيها بتطربقين انتي وياها
ضربته على ركبته بطرف رجلها تنطق : خير نايف وش هالفال ذا وبعدين انا مو قصيره انت الطويل بزياده
ضحك نايف ووقف وهو يرجع ينحنى لها ويقبل خدها وضحكت تشوفه يميل عليها وابعد من طاح عقاله بحضنها وفز يمسكه ونطق وهو يضرب بخفه على طرف انفها : قصيره غصبا عنك ومابينك فرق انتي وزهرتي ثنتينكم بناتي عندك مانع !
شهقت توقف معه وتنطق : خيررر نايف خيررر وش اللي بنتك !
عدل شماغه وهو يضحك عليها واخذ زهر ونطق : اعجلي يلا
لبست عبايتها وهي تتكلم عليه وهو يضحك طلعو يركبون المصعد
ونطق : يابنت الحلال خلاص انا القصير الناس بتسمعك فكينا
تكتفت تنطق له : اي زين خليه يخلص الزواج واوريك
هز براسه وعض شفته يكتم ضحكته ونطقت : وش يضحك ؟
فتح المصعد وطلعو ونطقت من خلفه : تكلم وش اللي يضحك استاذ نايف!
التفت لها وهو يحاول مايضحك على انفعالها : اششششش مافي شيء يضحك امشي وقف عند باب القاعه ونطق : امسكي زهر وشوي شوي وانتي تمشين
ضربته على كتفه تنطق بحده: لا ياشيخ احلف بس
حك طرف حاجبه : اسف وحقك علينا خلاص يلا تاخرت بعدين لاتدخلين على الناس وانتي كذا وجهك وكاني سويتلك مصيبه اضحكي وش صار لك توك تمام وجت بتتكلم ونطق قبلها : هوووووب خلاص اسكتي خلاص يلا باي مشى يطلع لقسم الرجال وهو يضحك عليها رفع كفه يشوف اثر روجها ونطق : والله لو الحياء من هالامه لانقشه على جلدي مسح كفه ودخل بخطوات راكده يوقف جنب ابوه واخوانه ولف فيصل عليه ونطق نايف : اهدا اهدا كنت مشغول بتسفل فيني اجلها لبعد العرس .."
ونطق فيصل بغضب : والله لو اني مااشوف الشنب خاط وجهك ان لاخلي اللي يسوى واللي مايسوى يلحق عليك
تنحنح نايف ينطق : يارجال استهدي بالله شوفني جيتك
لف نايف لسند ونطق سند : عاش من شاف زولك يويلك هذا اللي يقول شوي وجاي محد يعرف شويه حقتك ذي غيري الا وش كنت تسوي كل هالشويه !
ونطق نايف بحده : انكتم سند انكتم وعض على شحمه كان ماودك اهد فكك
ضحك سند ونطق وسط ضحكته : نمزح الوالد فصل عليك وترجعها علي شفيك قبيت علي
هز براسه نايف ينطق : اللي ينبش بالحكي لايزعل اذا جاه
ونطق سند : امحق سوال امش امش العرضه تنتظرك من اليوم تسال عنك وكل شوي اقول لها جاي
ضحك نايف غصب عنه وبادله سند الضحكه واخذ السيف يعرض
فيه وسند يقابله .."
وقت الزفه تحديدا وقت ان كل هذا يصبح واقع وقت يشوف لون قلبها على الفستان ووقت تشوفه يطل عليها ببشته وقت تصير الكفوف ببعضها وقت تصير الاحلام واقع بنظرهم وقت الدنيا تصير كلها نغم عزف ايقاعات تتزين بعزفها وقت تصير الدنيا ورديه حلم وحقيقه بنفس الوقت ."
واقفه امام الباب الفاصل بينها وبين الحضور وتنتظر من تبدا تخطي خطوتها لبدايه حياه جديده وفعلا انفتح الباب وخطت خطواتها وعم المكان بصوت عزفها الراقي والفريد من نوعه وابتسمت تشوفه واقف عند الكوشه بانتظارها وابوها وامها واخوانها وعمها والبنات واقفين امامها ابتسم نهار من قلبه يشوفها ويسمع عزفها انتهت من زفتها اللي كانت في قمة الجمال و مشى لها يقبل راسها وتقدم لها ابوها ومن شافته ماتحملت انها ماتحضنه دمعت عيون تركي يشد عليها وابعدت عنه من حست ان دموعها بدت تاخد مجراها ولف تركي يوصي نهار عليها وسلمت على عمها اللي وعدها بانها ماتفرق عن بناته ولفت تحضن عزام وبعده سعود ونطق سعود لها : شوفي اعترف اني بشتاق لك بس شوي مو كثير
ضحكت ضحى تضربه على كتفه ونطق عزام : اعوذ بالله منك ومن مشاعرك اللي تقطع الرزق
سعود : سد حلقك وبعدين انتي شفتي الضربه ذي احمدي ربك اننا قدام الناس ولا كان مسطك بالعقال لين تقولين امين
لفت ضحى على عزام تنطق : هذا وش دخله معكم
بقق عيونه عزام ينطق : لاتهاوشو تهاوشو انتي وياه مرضان انتو لف عزام يهمس باذن ابوه : الحق على عيالك بكره وانت في الاخباريه اخ يضرب اخته في ليله زفافها عاني علمتك بكيفك
التفت تركي ونطق بحده : سعود قدامي يلا وشغلك عندي اذا ماربيتك الليله انا ماافهم
ضحك نهار وضحى وعزام معهم ونطق سعود لاعزام : اوريك انا يأم زكي
انفجر عزام يضحك ومشى تركي وطلعو كلهم وراه
واجتمعو البنات عند ضحى يرقصون معها لين انتهت هالليله كلها
طلعت ضحى مع نهار وكان يساعدها تدخل الغرفه دخلت ودخل وراها وابعدت بشته من على اكتافها وعدلت شعرها وجاء نهار يوقف قدامها صارو بغرفه وحده وباب مسكر عليهم وجاء وقت التلاقي وقت تصبح الدنيا حضن قرب لها يحضنها شدت عليه وتنهد نهار بكل ذره شعور بداخله وابعدت عنه
تنطق : شوي واجيك
عقد حاجبينه ببعض ونطق : وين بتروحين ؟
اخذت شنطتها تطلع السماعه الصغيره شغلتها وهي ترجع له مدت
يدها له : رقصه اول ليله تحت انغامي
ضحك نهار بعلو صوته وسحبها مع يدها ضحكت وضحك معها ينطق : ناويه على عقلي انتي !
بانت غمازاتها من كثر ضحكاتها معه ونطقت : احبك نهار
لانت ملامحه ونطق بشعور سعيد يعيشه : اعشقك ورب اللي خلقك وجابك في طريقي ورب اللي خلاك ضحى بنهاري
قرب لها يقبلها بعمق ويرفع يده لربطات فستانها من الخلف وانتهت هالليله عليهم اثنينهم بفرح وسعاده تحاوطهم...."
عند باب القاعه عند نايف وسند ونايف يدخن وسند يسولف له عن زواجه ورفع يده نايف يناظر الساعه ونطق : سند ماودك تنام الساعه ١
تغيرت ملامح سند ونطق : اي روح روح والله انك ماتستحي الشرهه على اللي واقف يسولف لك
ضحك نايف ونطق وسط ضحكته: وش فيك بعدين عندك خبر اني كل يوم اسمع السالفه ذي ؟؟
مشى سند يتعداه ورمى نايف زقارته تحت رجله ومشى خلفه وهو يمسكه مع رقبته ونطق : امزح معك وش في نفسك ضيقه كذا !
ضحك سند بسخريه ونطق : اسمعو ياناس اسمعو وش يقول الله واعلم مين اللي نفسه ضيقه
اعتلى صوت ضحك نايف ومشى يدخلون ونطق له : خلاص بسمعك يلا تعال
غمض عين وفتح عيونه الثانيه ونطق : للاخير ؟!
هز براسه نايف ياكد كلامه ودخلو يجلسون في لوبي الفندق لاجل
نايف يسمع له .."
دخل الغرفه وهو يناديها ونطق : كنوز !
نطقت من خلف باب الحمام : هاه عزام !
مشى يدق الباب ونطق: وش تسوين لايكون غيرتي ؟
فتحت الباب وتنهد يشوفها ونطق : منجدك انتي كنتي بتخلين كل هالجمال والكمال يفوتني سحبها مع يدها معه ولف عليها وابتسم يناظرها ونطقت : يوه عزام ميته تعب خلاص
ابعد شعرها عن وجها وهو يمسكها مع عنقها ونطق : تعب وش ؟
رفعت اكتافها بعدم معرفه ونطقت : ماادري بطني ودايخه
سحبها يجلسها معه على السرير وهو يتفحصها ونطق : من متى ليش ماقلتي لي ؟
ونطقت وسط تعبها : من ساعتين كذا تعب عادي عزام ابي انام بس
ورمت نفسها بحضنه من حست ان الدوخه تتمكن منها ونطق عزام : كنوز شفيك لاتخوفيني وش فيك يلا المستشفى قومي معي
هزت راسها بنفي ونطقت بهدوء نبرتها : ولا شيء عزام مابي
مستشفى بنام بس
تنهد ورفع يده الثانيه يسحبها ويسدحها بحضنه .."
عند غرفه ايمان من كانوهيام وايمان وشروق وجود يسولفون
ونطقت هيام: يابنات بموت تعب الله ياخذ هالكعب رجلي مااحس فيها
ايمان : والله مالومك شايفه طوله
شروق : بنات ابي اكل مااكلت لقمه يلا نطلب
ايمان : انا مابي والله
هيام : ولا انا
شروق : خير كلو معي وانتي جود ؟
جود : اي اطلبي
شروق : كفو عليك
ايمان : هيا هيا انتي وياها بنام انا
ضحكت هيام ونطقت: شوف الحيوانه تطردنا
ايمان. : اي خلاص روحي اخمدي انتي وياها وبعدين وين نايفك عنك ؟
نزلت راسها على المخده وهي تنطق : مدري عنه
شروق : يلا جود تعالي عندي نطلب اكل ونتابع فلم عزتي لاخوك بتطرده كل مازانت الجلسه
ضحكو البنات ماعدا ايمان : وجععععع ياشروق وبعدين ارحمي البنت عيونها انتهت وانتي كل شوي تعالي نشوف فلم وش هالطاقه تعالي افصل البطاريه اللي بظهرك
شهقت شروق تنطق : عمى ايمان قولي ماشاءالله الله يكفيني شرك
جود : خلاص يلا تصبحون على خير يلا شروق
طلعو البنات ومشت ايمان تنسدح جنب هيام وزهر وسطهم ونطقت ايمان : وش فيك انتي ونايف تاقبعتو مره ثانيه
هزت براسها وهي مغمضه عيونها وسادحه على بطنها ونطقت ايمان : صدق ان البس مايحب الا خناقه
فتحت عيونها هيام ونطقت : اي صادقه عشان كذا جالسه معك
ضحكت ايمان ونطقت وسط ضحكتها: وجععع ياحماره
هيام : اششش قصري صوتك لاتقوم زهر .."
تافف نايف وهو يسمع سوالف سند اللي ماتخلص ونطق : سند الساعه كم بتخلص يخوي خلاص راسي بينفجر بكره نكمل
سند : استغفر الله يا ربي
نايف : اي استغفر ربك احسن من هالهرج كله انا ماعاد اشوف بروح انام بكره بسمعك لين تقول بس يلا قوم قدامي
وقف سند معه وطلعو ونطق سند بالمصعد : بكره وانت محضر عندي
اشر نايف بيده على خشمه ونطق : على هذا بس فكني الليله
طلعو وراح سند غرفته ومشى نايف غرفته دخل وهو يفرك عيونه وشماغه على كتفه وعقاله وطاقيته على راسه ورفع حاجبه من ماشافها مشى للحمام يدق الباب ونطق يناديها : هيام ؟ بنت ! وين راحت ذي الساعه ٣ الفجر ..
جلس عزام قدامه وهو ينطق : كنوز قومي معي المستشفى وش هالعناد ذا كله
نطقت وهي ميته من الآم : عزام ماقدرت اتحرك من مكاني وبعدين ماني رايحه المستشفى
وقف وهو يمشي بالغرفه : قومي كنوز لايكون ولاده قومي
تاففت تنطق وهي شاده على نفسها : عزام للحين بسادس مادخلت السابع حتى
جلس قدامها وانفجرت تبكي وتوتر عزام ونطق : بروح انادي هيام تشوف لنا حل انتظريني جايك مشى يطلع برا الغرفه لغرفتهم ...
عند هيام رفعت راسها من نطقت ايمان : هيام ردي اعرفه زوجك بيكسر ابواب الفندق غرفه غرفه لين تردين عليه فردي وخلصونا انتي وياه
تاففت ترد عليه ونطقت : هاه نايف !
نايف : وينك فيه ان شاء الله ؟
اعتدلت بجلستها ونطقت : عند ايمان
نايف : اعجلي دقيقه وانتي عندي
هيام : لا بنام عندها
نايف : لا ياشيخه اعجلي اقولك هذا اللي ناقص تنامين عندها
هيام : ماني جايه يلا باي وقفلت بوجهه
ابعد الجوال عن اذنه ونطق بغضب : وتقول لي ليش تعصب ياصبر الارض على عنادك لف للباب اللي يدق بقوه ونطق : الله يخارجنا في ذا الليل
فتح الباب يشوف عزام ونطق : شفيك ؟
ونطق عزام وهو يلاقط انفاسه : نايف هيام وينها
ونطق نايف : عند ايمان شفيك في شيء تكلم نشفت دمي
نطق عزام وسط خوفه عليها : كنوز تعبانه مدري وش فيها
ركضو اثنينهم لغرفه ايمان يدقون الباب
ولفو البنات على دق الباب ونطقت ايمان : يمه قلت لك بيسوي لك قروشه روحي شوفي وش فيه لايفشلنا من الناس
تاففت هيام وهي تقوم فتحت الباب وتغيرت ملامحها من شافتهم ونطقت بخوف : يمه وش فيكم ؟
عزام : كنوز هيام كنوز تعبانه تعالي معي شوفي وش العله
ونطق نايف بحده : اعجلييي
ركضت الغرفه تاخذ عبايتها وتلف طرحتها ونطقت ايمان: شفيه ؟
هيام : كنوز تعبانه بروح اشوفها وخلي زهر عندك
مشت تطلع وتسكر الباب وتمشي معهم لغرفه عزام دخلو ومشت هيام لها وكنوز منهاره تبكي ونطقت : كنوز شفيك تعبانه من وش
ومشى عزام لها ينطق : كنوز مو وقت عنادك امشي المستشفى
ونطقت هيام بحده : نايف خذ عزام واطلعو برا يلا
سحب نايف عزام يطلعون من الغرفه ..."
عند سند اللي كان مو قادر ينام من كثر تفكيره اخذ جواله ونطق : يمكن نامت الساعه ٤ مافي احد صاحي غيرك رفع الجوال وضحك من شافها تدق عليه ورد عليها ونطقت ايمان : وش سبب سهر الجنتل ؟
ابتسم سند ونطق: ماجاني نوم طلعتي نفس الوضع !
تنهدت تنطق : لا والله فيني نوم بس زهر عندي
سند : ليه !
اخذت نفس تسرد له وش صار: مدري وش صار بس لاحظت على كنوز البارح ماكانت طبيعيه طلع سند من الغرفه لغرفتها وهو يدق الباب عليها لفت
تنطق : هاه شكلها جت يلا سند بعدين اكلمك وقفلت وهي تمشي تفتح الباب
ودخل سند وبلعت ريقها ايمان تنطق : وش جابك انت
دخل وهو يجلس على طرف السرير ونطق : بشوف وش صار ويمكن انام هنا
بققت عيونها تنطق بصدمه : نعم ؟! صاحي انت تخيل احد يشوفك
سند : اللي سمعتيه وبعدين تراك زوجتي اهجدي
بللت شفايفها تنطق: سند قوم يلا هيام بتجي في اي لحظه
تنهد سند ولفو على بكاء زهر ونطقت ايمان : عاجبك يالله كيف اسوي الحين
مشت لها ترفعها وتهزها وارتفع صوت بكاء زهر وقام سند يشيلها ويحاولون يسكتونها ..."
تنهدت هيام من هدت كنوز ونطقت : باقي مطوله كنوز على الولاده مغص عادي يلا سلامتك واذا رجع الالم روحي المستشفى وبلاش عناد
هزت براسها كنوز وطلعت هيام من عندها وفزو عزام ونايف لها
ونطقت لهم : مافي شيء مغص عادي استفرغت وارتاحت اخذت ادويتها ووضعها تمام
نايف : متاكده مو ولاده !
تاففت هيام تنطق : ولاده ايش يانايف وهي بالسادس باقي
تنهد عزام ونطق : اهههخخخخ الحمدلله
هيام : اذا رجع الالم عليها ودها المستشفى تسمع
هز براسه عزام ومشى يدخل لها ولف نايف لها : يلا يلا امشي
تاففت تمشي معه ونطقت : انا بروح ا....
قطع كلامها حدة صوت نايف : وين تروحين ان شاء الله اقول قدامي يلا
تاففت تنطق : بجيب زهر نايف باخذ زهر واجي ماراح اطير
مشو لغرفه ايمان ودقت هيام الباب
ولفت ايمان تنطق : يمه جت سند ادخل الحمام بسرعه بسرعه
سند : يابنت انتي صاحيه زوجتي تراك خيررر ومشى يفتح الباب وغمضت عيونها ايمان بغيض منه ."
ورفع حاجبه نايف ولفت هيام تناظره ونطق نايف : اااايوووووااااا
دخلت هيام الغرفه من سمعت بكاء زهر
ونطقت ايمان : هياموه لاتفهمون غلط ترا....
قطعتها هيام تنطق: اي بكره افهمك صح ان شاء الله الحين ماني قادره افتح عيوني
اخذت هيام زهر ونطقت ايمان: شلون كنوز ؟
هيام : زينه الحمدلله يلا اخليك مع سندك
طارت عيون ايمان ونطقت : خير انتي الثانيه .."
ضحكت هيام ومشت تطلع
<<<عند الباب >>>>
نايف : وش تسوي ياحيوان ترا اخوها هنا يكون بعلمك يعني
سند : ياشيخ احلف بس ياشيخ دز امها
وجاء نايف بينطق وطلعت هيام وقرب لسند ينطق : سكر الباب واذلف لغرفتك لحد يشوفك الفندق مليان وكلهم يعرفونك اعقل
ومشى نايف وراها ودخلو غرفتهم ونزلت زهر على السرير ومشت ونطق نايف : وش الحركات ذي ؟
لفت عليه تنطق: حركات وشو !
رفع حاجبه ينطق: حركات وشو ! شوفي حركات بنام عند فلانه بنام عند علانه اخر مره اسمعها سامعه ؟
تاففت تمشي له ونطقت: نايف خلاص نايف تعبت ترا اذا خمدنا وقمنا
قول اللي تبي ."
مشت للحمام توضي وطلعت تصلي الفجر ومشت ترمي نفسها على السرير بتعب مسح على وجهه ومشى يغير ملابسه ويوضي ويصلي فرضه ونام وراها
....."""
رجع سند يدخل الغرفه وهو يسكر الباب من خلفه ونطقت من شافته : زين كذا فشلتنا من الناس يالله وش يفكني منها الحين ؟!
ضحك سند وهو يمشي لها ونطق : قلت لك استعجلي علينا وخلينا نتزوج بس انت راكب راسك
صدت بعيونها عنه تخفي ضحكتها ونطقت : الدنيا اصبحت طيب وماودك تروح واوعدك الليله نحدد الزواج
ابتسم سند ينطق وسط ابتسامته: الليله ؟! وعد !
هزت براسها له ونطقت : وعد والله بس روح اخف عزيز يجي في اي لحظه
تنهد وقام وقامت توقف معه ومشى لها يقبلها ويترك قلبها يتراقص ابعد عنها بعد ثواني عديده ونطق : الثالثه ثابته ايمان عجلي فيها قبل اعجل فيها انا
توسعت عيونها بصدمة تنطق بتوتر منه : وش ثالثة سند ؟!
غمز لها بعيونه ونطق : انتي اخبر وش انا قاصد
ارتعد داخلها من كلامه اللي زرع خوف وتوتر بداخلها ومشى يطلع من الغرفه وهي تفكر وش ممكن يصير بالثالثه ..."
انتهى ✅
قراءه ممتعه
لاتنسون النجمه ⭐️
كومنت حليو لو سمحتو 🫶🏻💙
