بعد ماانتهت ليلتهم الحلوه ورجعت قلوبهم تنبض لجل بعض بشده اصبحت الدنيا عليهم فتح عيونه وابتسم من شافها قدامه وزهر وسطهم قام يدخل الحمام وطلع يشوفهم على حالهم عض على شفته يناظرهم ونطق بداخله: يالله وش هالنعم اللي انا فيها يارب لك الحمد اتسعت ابتسامته اكثر من شاف زهر تفتح عيونها وتعلن صباحها الاول مع ابوها ضحك وهو يمشي لنص السرير ويسحبها ويشيلها وينزل فيها تحت جلس على الكنب وهي واقفه على صدره ضحك نايف يشوف نظراتها له وقرب يبوس انفها ونطق : وش اسوي انا ياربي عض على شفته يناظرها وهو واصل لاخر مراحل الخرفنه عليها ورجع ينطق وهو يسولف معها : اي زهرتي وش رايك باللي قاعد يصير راضيه عن تصرفاتك انتي وامك فيني ابتسم بواسع ونطق : وش تقول للبنت انت والله شوفي بابابا هاذي فعايل امك انا مالي دخل الله يعينك عاد بصير افضفض لك انتي تخيلي امس انها قالت لي لازم انا اكون اول وحده اعرف عن كل شيء يخصك بس يلا مااتوقع انها بتغار منك يعني نستبدلك مكان سند ضحك وهو يقرب ويبوس كل شبر بوجها ورجع ينطق : عز الله انك زهرتي صدق وش هالحلاوه ذي هاه يابابا خفي علي قلبي ماعاد يقدر يتحمل كل هذا عاد انتي بنتي يعني ماراح ترضين اني اتعذب كذا صح اما امك لو اقول لها بتعاند اكثر واتمنى انك ماتشبهينها بالعناد لاني بنهار وقتها ونزلت هيام تناظرهم
ونطقت بضحكه: اغار عليك حتى منها
ضحك يعض شفته ونطق لزهر : سمعتنا
مشت تجلس جنبهم ونطقت وسط ضحكتها: شوف كيف تناظرك
ابتسم نايف وهز براسه: وش ذبحني انا غير هالعيون
ضحكت هيام تناظر زهر ونطقت : اعقلي يازهر اعقلي بابا لي
ابتسم نايف ورفع حاجبه : وهي من لها ؟؟
رجعت راسها على الكنب ونطقت : انت بعد بس خف شوي واحترم غيرتي
ضحك نايف يهز براسه لها : مقدر مقدر انتي تشوفين الحجم والنظرات
ضحكت هيام تحط راسها على صدر نايف ووجها يقابل وجه زهر ونزل راسه يبوس راسها وابتسمت هيام وهي تحس براحه الدنيا كلها ......."""
~<<بيت تركي >>~
جالسه وهو جنبها وهي منهاره عليه وهو يطلبها تعيد خبر حملها
كل شوي: عزام خلاص مو معقول كل شوي تبيني اعيد خلاص انبح صوتي وانا اعيدها
تنهد عزام وهو يتقدم لها ونطق : وش اسوي مو مصدق
رفعت حاجبها تنطق : لا والله وش اللي انت مو مصدقه هاذي رقم مليون اللي اقولك فيها اني حامل لي يومين اعيدها
ابتسم عزام ينطق : يالله الشعور غريب كنوز لاتلوميني
ضحكت كنوز ونطقت : شفت كيف بس تصدق حتى انا مو مستوعبه
هز براسه عزام ينطق : ياكبر فرحتي اهاه ياكنوزي
ونطقت وسط ضحكتها : حبيبي انت
اخذها عزام يحطها بحضنه وشدت عليه كنوز وهي بتموت من فرحتها معه وهو مو باقل فرحه منها ...""
تحت على الفطور ضحكت فاطمه تنطق: الحمدلله اللي رجع عقلها لراسها
وضحك تركي ينطق : معليك هي عاقله بس الظروف اللي مرت فيها كانت اقوى بس دامها وعت على نفسها هذا اهم شيء والله يوفقهم يارب
هزت براسها فاطمه وهي تحمد ربي اللي رجع هيام لنايف
رفع عيونه تركي يناظر ضحى اللي نايمه على الطاوله وضحك ياشر لفاطمه لفت فاطمه تناظرها ورفع عيونه سعود وضحكو يناظرونها وقام سعود لها وهو ياخذ منديل ويبرمه من الاعلى ويدخله بانف ضحى انزعجت وهي ترفع يدها على وجها وفتحت عيونها تناظر سعود وضحك تركي وفاطمه معه رفعت راسها تفرك عيونها ونطقت : الله يسلط ع.......
قطعها تركي ينطق : على الشيطان
لفت عيونها لابوها تنطق : بابا انت جالس تشوفه بذبحه ولدك ذا
ضحك تركي يهز براسه : وش منومك مو عندك جامعه ولا بتروحين
تكملين نومتك هناك ؟!
غمضت عيونها ونطق سعود : الناس تتهاوش على مقاعد الجامعه وانتي تنامين فيها اخس بس
لفت عليه وهي تمسك كوب المويه وجت بتسكبه على وجه سعود ونطقت فاطمه : نزلي الكوب ضحى نزليه ورفعت عيونها لسعود
وانت تعال انثبر وفكنا من شرك
لفو يناظرون كنوز وعزام نازلين وجلسو معهم على الطاوله والابتسامه تطغى على ملامحهم اخذ من الاكل يحط لها ونطقت فاطمه وهي تناظر نظرات عزام لكنوز تنحنحت كنوز وهي بتموت من نظرات عزام لها قدام اهله وتقدمت له تنطق : عزام نزل عيونك مو وقتك
عض على شفته يكتم ضحكته وعرف انها استحت اثر نظراته لها ونزل عيونه ولف يناظر امه ونطقت فاطمه : جعلها دايمه هالضحكة بس لها سبب ولا ؟!
ضحك عزام يناظر امه وابوه واخوانه اللي يناظرونه ونطق عزام : لها سبب
رفعت حاجبها فاطمه وابتسمت بنفس الوقت ونطقت : وش هالسبب ؟
فرحنا معك
لف عليها عزام ورجع يناظر امه ونطق : الحفيد الثاني جايكم
شهقت ضحى بفرحه لهم ونطقت : الللللله منجدكم على البركه
عزام انت و كنوزي
ابتسم تركي ينطق :ماشاء الله على البركه
ونطق سعود يبارك لهم
وضحكت فاطمه بفرحه تحتويها وتحوفها لعزام وهي كانت تتمنى تشوف عياله ودمعت عيونها ونطقت : مبروك يمه والله يتمم عليك يا كنوز بالسلامه
ابتسمت كنوز تنطق : امين يارب ويبارك فيكم كلكم
أبتسم عزام يوقف لامه وهو يحاوطها ونطق : فطومه تبكين ؟!
ضحك تركي يناظر فاطمه ونطق ؛ هرمت لجل هاللحظه
ضحك سعود وقام يوقف من الجهه لفاطمه ونطق : فطومه انتي تبكين لآنك كبرتي واحفادك جالسين يكثرون ، ولا لان عزام بيجيه ولد اعترفي اوعدك محد يعرف قولي لي باذني "
ضحكو تركي وضحى وكنوز وعزام ولفت فاطمه تضرب سعود على صدره ونطقت وسط دموعها : وش هالكلام سعود اكيد ابكي من فرحتي لعزام
ابتسم عزام وحضن فاطمه وبكت فاطمه بصوت من فرحتها واللي كانت توصف دموعها بانها دموع الفرح لفرحتها الاولى عزام اول عيالها
ونطق تركي بصدمه من صوت بكيتها : فطومه ؟؟؟!!
رفع حاجبه سعود وجلس على ركبه قدامها ورفع يده يدغدغها وصرخت فاطمه وضحكو عليها كلهم ونطقت : سعووووددد بذبحك ابعددد
ضحك سعود من صراخها وضحكت فاطمه ولفت على تركي
ونطقت : انا في وجهك فكني منه
ابتسم تركي من شافها تتعزوا فيه ووقف وهو يرفع سعود مع تشيرته
ضحك عزام ينطق : دامها جت للقائد خلاص اعرف ان الموضوع انتهى يلا القم ياسعود ونطق تركي لسعود وهو ماسكه : ودك تروح تداوم وتشوف
شغلك قبل مااحتفل فيك واوريك الظرافة صح؟!
ضحكو كلهم يناظرون سعود ونطق : اي بروح اصلاً انا مشغول وتاخرت
ابتسم تركي وابعد يده واخذ اغراضه سعود وطلع من البيت
ولفت فاطمه تناظر تركي : كفو والله عرفت اتعزوا بمين
ضحك تركي وعزام وكنوز وضحى ونطق تركي : افا عليك ، يلا انا بروح وراي دوام ولف على كنوز وعزام ينطق : الله يرزقكم الذريه الصالحة المعافاة يارب .."
ابتسمت كنوز تنطق : امين يارب
وطلع تركي وقام عزام وطلعت كنوز وضحى معه يوصلهم لجامعتهم ....."
اخذ سند جواله يدق عليها وثواني ووصله صوتها : وش عنده الجنتل من صباح ربي ؟!
ضحك سند ونطق وسط ضحكته: داق اقولك جهزي نفسك لاني تواصلت مع اهلك ننتظرهم يومين كذا يسالون وبعدها اجيك ونخطب رسمي .
بلعت ريقها بخوف تنطق : منجدك سند ؟؟؟!!
هز براسه وكانها تشوفه ونطق : اي نعم ليه مو عاجبك ؟!
عضت شفتها بحماس وصدمه بنفس الوقت: قول والله
ابتسم سند ينطق : والله وان شاء الله ربي يكتبك من نصيب الجنتل
عضت على طرف اصبعها ونطقت بفرحه تسكن خلايا جسمها : يوووه سند كانك استعجلت شوي !
ابتسم سند ونطق: لا استعجلت ولا شيء وبعدين انا ماعاد فيني صبر خلاص انتظر اليوم اللي يرتبط اسمك جنب اسمي ويجمعني معك سقف واحد .
ضحكت ايمان وابتسم بواسع ثغره سند وهو يسمع ضحكتها ونطقت وسط ضحكتها: والله شوف حتى انا انتظر لاني ودي اعقلك
ضحك سند ونطق : والله شوفي انتي انا عاقل بس انصحك ماتشوفيني وانا عاقل لانها بتلوع كبدك مني .."
ورجعت تنطق ايمان بضحكة: لا والله اجل خلك مطفوق وجنتل بنفس الوقت "
ووقف سند عند المركز ونطق : اي انا قايل لك ترا شخصيتي هاذي احلى
ميلت شفايفها تنطق : اي زين خلك عليها
ابتسم بواسع ثغره ونطق : يلا زوجتي المستقبليه انا وصلت المركز جهزي نفسك وردي على اهلك بسرعه وفكينا من الثقل والغموض
واعجلي يرحم لي والدينك...."
لفت خصل شعرها على اصبعها ونطقت بابتسامة لاحظها سند بصوتها : بشوف يعني هذا زواج لازم افكر واستخير وانتظر اهلي يسالون عنك واذا شفتك مناسب لي وشافوك اهلي بعد تناسبني وقتها تقدر تجي يلا باي ياالجنتل وقفلت منه وهي تدفن وجها بالمخده وتصرخ بحماس داخلها ...."
ابعد الجوال عن اذنه ونطق : اي هين نشوف ابتسم يدخل المركز ومن دخل قابل الفريق سالم وسلم عليه سند ونطق : وينه نايف مااشوفه يداوم
وهز براسه سند ونطق: اي ياطويل العمر مكسوره يده واخذ اجازه
ونطق الفريق سالم: يلا مايشوف شر ومشى يطلع ودخل سند مكتبه ....."""
<<بيت نايف وهيام >>
قامت من جنبه للمطبخ تفتح الثلاجه ونزلت راسها تناظرها وكانت خاليه ومافيها الا كم نوع خضار ولبنه تاففت تنطق : نايف كان عايش على الطاقه الشمسيه ومشت تطلع الصاله وقفت قدامه ورفعت يدها لخصرها
ونطق : نايف الثلاجة فاضيه شلون كنت تاكل الايام اللي راحت ؟!
رفع عيونه لها ونطق: ماكنت اكل بالبيت
تنهدت وهي تنطق : اي اجل جهز نفسك نروح نشتري اغراض للبيت واغراض لزهر
هز براسه نايف ومشت تدخل المطبخ اخذت صامولي واللبنه وقطعت خيار وسوت اثنين شاهي حط زهر على الكنب من نامت وهي بحضنه وقام يدخل لهيام بالمطبخ لفت عليه ونطقت: تعال هذا فطورك اليوم وبكره ابشر بالدلع
ضحك نايف ومشى لها وهي تاخذ الصامولي وتقطعه من فوق وتحط اللبنه بداخله وترش الزعتر عليه وتحط الخيار سكرته واعطته نايف اخذه وهو ياكل سحبت له كرسي وجلس نايف عليه ورفعت نفسها تجلس على رخام دولاب المطبخ وتسوي سندوتش لنفسها اكلت وهي تسولف معه ابتسم نايف يشوفها تحرك رجولها على الدولاب وهي تسولف معه ضحكت بخفوت هيام وابتسم نايف يناظر ضحكتها وسكنت روحه اخيرا وقت شاف ضحكتها قدامه وهو بهالحظه سعيد من كل قلبه انه رجع يشهد على فرحتها وضحكتها وسوالفها اللي تطلع من عذب منطوقها ونطقت : فهمت يعني مدري وش اللي مخوفها اخذت كوب الشاهي تشرب منه ولفت تناظر من ماسمعت صوته ولا اي تفاعل منه على سالفتها ونطقت باستغراب: وش فيك اكلمك انا ؟!
ابتسم وهو حرفيا مايدري وش كانت تقول له ورفع يده يحك حاجبه
ونطق : عفوا هيامي بس حرفيا ماكنت اسمع وش قلتي ولا حتى وشهي سالفتك
نزلت الكوب من يدها ونطقت له : لك ساعه تناظرني وانا اسولف كيف ماسمعت ؟! تراك هنا جنبي مو بالمريخ وش كنت تفكر فيه !
ابتسم وسكت نايف يناظرها بهدوء ويتأملها بعيونه بدون ما ينطق
بحرف واحد ويجاوبها على كلامها .."
رفعت حاجبها بعدم فهم من حالته الغريبه وهي من اصبحت معه وهو بس يناظرها ويتاملها ونطقت بتساؤلات تدور بداخلها : نايف وش فيك ؟ تعبان فيك شيء ؟ يدك تعورك ! ليش كذا ساكت ؟!
رفع عيونه يثبتها عليها وينطق : انا ناسي التعب وكل اسبابه وانتي تسالين عن التعب واذا عن يدي مافيها شيء بس قلبي اللي فيه اشياء تقدرين تعالجينه؟؟!!
رفعت حاجبها هيام تنطق : وش فيه قلبك !
وقف لها وقرب منها ورفع يمينه يحاوط خصرها ورفع عيونه لها
ونطق : فيه انتي وش قولك تقدرين تعالجين قلبي منك ؟
توردت ملامحها تتفجّر إحمرار من نظراته لها وكان فعلا غريب لها ونطقت تحاول تخفف توترها من نظراته : افا والله انا سبب تعبك ؟
هز براسه نايف ينطق : اي نعم وسكت وهي تناظره
ورجع ينطق : بس بنفس الوقت دواي وراحتي ومسكني وحاجتي
وسروري ومسرتي عض على شفته بعد ماانتهى من كلامه
توترت من عضة شفايفه وكلامه وابتسم نايف يناظرها ونطق بهدوء: كنسلت مابي اتعالج خليني اتعب وياليت كل اتعاب الدنيا تجي كذا ."
وبلعت ريقها هيام لانها شعرت بيده تشد على خصرها اكثر وكانت ساكته وهي تشوفه وتسمع كلامه وماتنكر انها توترت من قربه ومن حست بأنها تسمع صوت أنفاسه العاليه واللي تثبت انه فعلا يبيها ورجع ينطق من شد على خصرها يقربها منه اكثر: آمنتي صدري وريحتي كل شعور خايف بداخلي
ارتبكت تصد بعيونها عنه وتقدم بوجهه ونزل لنحرها يقبلها فيه ورجعت بظهرها وقبل ترجع اكثر ثبتها بيده بحيث يمنع حركتها
لانت ملامحها بتوتر منه ومن رغبته الشديده فيها امتلى نحرها بعلاماته الموزعه عليه ابعد عنها يناظرها ونطقت بهدوء: ترا خفت
ابتسم ينطق بنفس نبرة صوتها الهادئة واللي تبين فعلا انها خايفه : مني !
هزت براسها هيام: فيه احد غيرك هنا ؟
ضحك نايف ونطق وسط ضحكته: ليه اكتشفتي اني قليل ادب ؟!
لانت ملامحها بصدمه تناظره وابتسم نايف يناظر ملامحها المتوترة ورجع ينطق : الخمس شهور كانت كفيله بانها تخليك تخافين وتتوترين مني ؟وين جرأتك وين اللي بتعوضني عن كل لحظه عشتها بدونها !!
بلعت ريقها ونطقت : ورفعت يدينها على عنقه من الخلف
ونطقت : موجوده ودك فيها ؟!
هز براسه نايف ونطق : ودي فيها تقدرين ترج......
قطعت كلامه من قبلته تقطع كل كلمه وامنيه بينطق فيها ونزلت خصلات شعرها على وجهه وهو يبادلها بكل شوق داخله ابعدت عنه وانفها على انفه ونطقت : مادريت انك تحب جرأتي كذا !
ابتسم نايف ينطق : هو وقفت على جرأتك وبس ؟انا مفتون ومجنون فيك
ابتسمت هيام وتوردت ملامحها ونطقت : البعد ماسوا فيك خير "
هز براسه نايف وضحك ينطق : خير ؟! وين الخير وانتي بعيده عني ! الا شر قصدك بعدك ماسوا الا الشر ابعد يده عن خصرها يرفع فيها خصلات شعرها ويرجعها خلف ظهرها ورجع يده يحتضن خصرها من جديد "
ابتسمت بواسع ثغرها ورفعت راسها عنه من سمعت صوت جوالها
ونطقت : بتكون محاصرني كذا لمتى ؟!
ضحك نايف وهو ملاحظ انه فعلا مانع الحركه عنها بسبب يده اللي تضم خصرها النحيل ورفع حاجبه ينطق : ماادري انتي قولتك نجلس كذا لمتى ؟!
ابتسمت هيام تنطق : اتوقع صار كل اللي تبيه
هز براسه نايف بمعنى لا ونطق : باقي ماصار شيء يلا ننتظر كم اسبوع كذا
بلعت ريقها وفهمت قصده من كان يقصد انها تنتهي من الاربعين قربت منه تحاوط عنقه ورفعها مع خصرها ينزلها ومشت تطلع الصاله تاخذ جوالها وترد على ايمان
ونطقت هيام: ياأهلا ياأهلا
ابتسمت ايمان تنطق بفرحه :هياموه وينك عني قلبي بيوقف
عقدت حاجبينها هيام تنطق : بسم الله عليك بس وش عندك ليه بيوقف !
ضحكت ايمان ونطقت وسط ضحكتها : اسمعي نايف جنبك ؟
لفت هيام تناظر نايف اللي واقف برا وتشوفه من خلف القزاز يدخن ونطقت هيام لها : يدخن بالحوش وش فيك انتي خوفتيني ؟!
اخذت نفس ايمان تقول لها كل شيء وصرخت هيام تنطق وسط
صرخاتها : ككذذاااببهه منجدك انتي ؟
ضحكت ايمان تنطق : والله توي مقفله منه يووووه هيام بطني فيه فراشات
صرخت هيام تنط على الكنبه وتنطق : اسكتي ايمان كلنا ."
اعتلت ضحكات ايمان ونطقت وسطها : حيوانه يبي لي اجلسك قدامي واستجوبك عن ليلة امس الا تعالي على طاري أمس ماوريتيني شكلك
ابتسمت هيام بواسع ثغرها تتذكر ليلة امس وتنطق : نسيتك تبين الصدق
شهقت ايمان وضحكت هيام ونطقت ايمان: وجع ياحماره طيب تعالي عندي واوريك وش اسوي فيك زين زين .."
ضحكت هيام واخذت خصلات شعرها تلفها باصابعها وتنهدت تنطق : وش اسوي ايمان قلبي انتهى خلاص انا اصلاً جالسه العب على نفسي في اني احبه بقلب واحد نايف يبي له تريليون قلب علشان يقوى على حبه ."
ابتسمت ايمان تنطق: هيام تكفين وش هالكلام الحلو ووش هالصباح الاحلى ؟
ابتسمت هيام تنطق : الله يديمها يارب
رفعت يدينها ايمان تدعي ان الايام الحلوه تدوم وتطول وتحوفهم من كل صوب
وضحكت هيام من سمعت الامين تطلع من قلبها قفلت منها وقامت
تاخذ زهر وتطلع الغرفه لف من شافها تطلع رمى زقارته ودخل يطلع وراها
وهي تطلع ملابس لزهر تلبسها ودخل نايف ونطقت له : تعال اجلس عندها بروح اجيب باقي اغراضها ومشى لها نايف وانسدح جنبها ولف على شهقت هيام رفع نفسه ونطق :شفيك ؟!
حطت يدها على ثغرها ونطقت :نسيت موعد تخريم اذن زهر يالله
ونطق نايف: متى الساعه كم ؟!
ورجعت تنطق له : عشره باقي ساعه تتوقع يمدي ؟
هز براسه نايف ونطق :اي يمدي اخلصي تعالي لابسيها ويلا بروح البس انا
مشت هيام لزهر وقام نايف يلبس خلصو وطلعو يركبون السياره ونطقت هيام لنايف : تقدر تسوق ؟!
هز براسه بمعنى ايه ومشى للمستشفى ونزلو للموعد قبل تجي عشره بكم دقيقه دخلو يجلسون بالانتظار وينتظرون متى يجي دور زهر لف نايف يناظر زهر بيد هيام وضحكت زهر له وضحك نايف وهيام معه ونطقت: ياربي ماتدري وش بيلحقها الحين
وفعلا جاء دورهم ودخلو وخاف نايف عليها واخذت هيام زهر تحطها على الكرسي ونطق نايف للممرضة: خفي عليها وبشويش
هزت الممرضه براسها وغمضت عيونها هيام بخوف عليها وقربت الممرضه وهي تخرم اذنها وحط يده نايف بثغره يعض عليها من سمع بكاها العالي وهو يشتم بالممرضه : قايل لك بشويش يابنت *******
وبكت هيام مع زهر ونطقت : بعمري ياماما بعمري مشت لها ترفعها بين يدينها وقرب نايف يناظرها تبكي عض على شفته ونطق : ليته راح الموعد جعله بضلوعي عنك ونطق لهيام ؛ عطيني ياها
رفعت هيام زهر لنايف واخذها نايف يشيلها بيد وحده ومجرد ماشالها سكتت وابتسم وضحكت هيام وسط دموعها وطلعو من المستشفى وزهر بيد نايف ورفع المفتاح لهيام تسوق ومشى يركب وزهر معه ومشت هيام تشغل السياره
ولفت عيونها هيام تناظرهم ورفعت يدها تمسح دموعها وتنطق : قاعده احس بتانيب ضمير ليتني ماتذكرت الموعد .."
ولف نايف يناظر هيام ونطق : وليتني ماقلت لك يمدي ..."
~~<<مكان اول مره نزوره جامعة نهار تحديدا قاعة الاختبار>>~
سلم الدكتور الاوراق عليهم اخذ نفس عميق وهو هذا اختباره ماقبل الاخير ويعلن تخرجه من الجامعه زفر انفاسه واخذ قلمه يملي ورقته بالاجابات ومر الوقت عليه وهو يحل ويفكر قد مايقدر وقف عند اخر سوال واعلن انتصاره على اختبار اليوم واللي كان كفيل بانه ينسيه كل تعب امس سلم الورقه وطلع يمشي بممرات الجامعه ونطق : باقي واحد وينتهي تعب شهور طلع لسيارته واخذ جواله يدق عليها ونطقت ضحى : هاه بشر ؟
ابتسم نهار ونطق : الحمدلله احلى اختبار مر علي ابشرك
زفرت ضحى براحه ونطقت : يااااه نهار باقي واحد الله ييسره يارب
ابتسم يشغل سيارته ونطق : يارررب اهاه ضحى احس اني مو مصدق
ونطقت ضحى بفرحه على انجازه : يلا روح للبيت ريح لك كم ساعه كذا وبعدها قوم ذاكر وهاه نهار تكفى شد حيلك خلاص اخر ماده
تنهد وانبسط فعلا ان الايام عدت على خير ونطق : ازهليني معليك
ابتسمت وقفلت منه ووصل البيت ونزل وطلع لغرفته ونام بعد تعبه ليلة امس كلها وهو يذاكر لجل يطلع بالنتيجة المرضيه هاذي ......"""
ركبت السياره بعد ماشرت كل شيء تحتاجه لزهر وكان نايف بسياره مع زهر ونطق نايف من ركبت : اسمعي احسك جيتي بدري ايش رايك ترجعين تكملين !
ضحكت هيام وهي فعلا تاخرت عليه ونطقت : شفت كيف زين اني اصريت عليك ماتنزل معي خلك مع زهرتك ياحلوكم مبسوطين وهي ناسيه البكاء اصلاً بحضنك انا عارفه انها بتاخذ مكاني بس يلا مو مشكلة انا اعرف شلون اخليك ترجع لي وانتي يانونو لازم انفرد فيك .."
ضحك نايف ونطق وسط ضحكته: هيام امانه منجدك تغارين منها ؟
رفعت حاجبها ونطقت بضحكه : مدري انت وش رايك ؟!
عض شفته وضحك بنفس الوقت ونطق : لحد يسمعك لاني ماقد شفت
ام تغار من بنتها .
ميلت شفايفها وهي تتذكر علاقة امها بابوها ونطقت : الا والله فيه واقرب مثال فطومه امي تنهار اذا قربنا من تركي ابوي واللي هو زوجها "
ضحك نايف ونطق وسط ضحكته: يعني وراثه الموضوع
هزت براسها هيام ونطقت: اي نعم وراثه بس ترا امزح معك مرا حابه علاقتك بزهر هاذي وهي صغيره باقي وواضح انها بتاخذ عقلك مستقبلاً ابتسم نايف ورجعت تنطق من جديد : تصدق ودي ارجع اراجع كل شيء بحياتي
عقد حاجبينه نايف ينطق بعدم فهم: ليه !
ونطقت هي تجاوبه على رغبتها الشديده في انها ترجع تشوف كل شيء صار بحياتها : ودي اعرف وش الخير اللي سويته بحياتي عشان املك شخص مثلك
سكنت ملامحه يناظرها وهو حاليا يعجز عن الرد ابتسمت تناظر الحنان الفائض بنظراته والوفره الكبيره بحبه واللي كانت تبين من عيونه وهي حاليا ماتحتاج اي رد منه غير انها توصل له فعلا انه كان دخوله بحياتها من اعظم الخيرات اللي عاشتها وتمتعت فيها ونطقت بضحكه
على نظراته : ودك بباستا من يديني
ضحك نايف ورفع يده يحك شاربه ونطق : ودي فيها
اشرت على عيونها الثنتين ومشت يرجعون لبيتهم وصلو ونزلو واخذو الاغراض معهم ودخلت هيام تسوي الباستا لهم وانتهت وهي تاخذ الاكواب تملاها بالثلج وتسكب الكولا على الثلج عضت شفتها ونطقت : ابداعاتك هياموه جالسه تزيد خلصت واخذت الصحن وطلعت فوق بالغرفه وكان جالس بالارض يسوي كرسي زهر ونطقت : هاه بشر عرفت ؟
هز براسه نايف: اي خلصت ومشت تحط الصحن على السرير
ونطقت : يلا تعال
وقف ومشى يجلس قدامها وهو ياكل معها ورفع راسه لها وهو
ينطق : ابداعاتك انا ملاحظ انها زايده
ضحكت هيام وهي ترفع حاجبها وتنطق : افا عليك ياحبيبي باقي ماشفت شيء
ابتسم نايف وهو ياكل وشهقت هيام ورفع عيونه نايف ونطق : هيام كثرت شهقاتك ايش فيه ؟؟؟!
ضحكت وهي تنطق : اسمع اسمع تخيل يانايف تخيل وش صار !
ارتخت عيونه لها وتنهد ونطق : وش صار !
ابتسمت وعدلت جلستها وهي تقول له عن خطبه سند لايمان
وفتح عيونه على الاخير بصدمه وخصوصا ان سند مايخبي عنه شيء ونطق :انتي متاكده غريبه ماقال لي !
هزت براسها تاكد كلامها ونطقت : اي متاكده هي قالت لي بس صدق غريبه سند ماقال لك .."
ونطق نايف لها : اعطيني جوالي وراك
قامت تاخذ الجوال وتعطيه واخذه منها وهو يدق على سند ورد عليه سند ونطق نايف: سند ياكلب وشو له ماتقول لي من متى وانت تخبي عني شيء ؟
عقد حاجبينه سند ينطق : وشو اللي خبيته ؟
وقف نايف يطلع من الغرفه وينزل تحت ونطق نايف : انت خاطب البنت من متى ؟
وعرف سند وش يقصد ونطق : كم مره دقيت عليك ؟
رفع حاجبه نايف ونطق : ولا مره
سند : لا ياشيخ احلف بس ! داق عليك فوق العشرين مره
ابعد الجوال عنه نايف وهو يناظر المكالمات الفائتة و فعلا شاف اتصالات سند ورجع الجوال لاذنه ونطق : ماشفتها
سند : والله اكيد ماراح تشوف مشغول كنت
ضحك نايف ونطق: خلك مني الحين وش سويت انت ؟!
اخذ نفس سند ونطق : كلمت اهلها وانتظر يردون علي ونروح نعقد رسمي
رفع حاجبه نايف ونطق: تعقد ؟! انت اخطب بالاول
ونطق سند: لا ياخوي هم قالو لي اذا صار نصيب تصير الخطبة والملكة بنفس اليوم وتبغى الصدق احسن انا ماعندي صبر
وكمل يقول له التفاصيل ونايف يتجاوب معه ......""
طلع من دوامه وهو ياخذ جواله ويدق عليها وثواني ووصله صوتها ونطق :كنوزي خلصتي امر اخذك ؟!
كنوز : باقي محاضره كذا انت خلصت بدري ماعرفتك !
ضحك عزام ينطق : قايل لك بتعدل
ابتسمت تنطق : اي كفو عليك اسمع ساعه كذا وتعال
عزام : يلا اذا قربتي تخلصين قولي لي قفل منها وهو يمشي بالشوارع ويضيع وقت وينتظرها تخلص وطرت بباله ملاذ عكس طريقه لبيتها ومشى يوقف عنده ونزل يدق الباب ورجع يدق اكثر من مره بس مافي اي رد منها عقد حاجبينه من ماسمع ردها وحس باحد خلفه ينطق : يالطيب
لف عزام يناظره ونطق :نعم ؟!
مشى له ومد يده يسلم على عزام وصافحه عزام ونطق هو: انا احمد ساكن هنا واتوقع انك انت عزام صح ولا انا غلطان ؟!
ورفع حاجبه عزام ونطق : والنعم فيك يااحمد وانا عزام منت بغلطان
بس مافهمتك وش تبي ؟!
طلع احمد المفتاح من جيبه يعطيه عزام ومد يده عزام ياخذ المفتاح ونطق احمد : كنت طالع بيوم من الايام من بيتي وجت عندي صاحبة البيت وطلبت مني اذا جيت اعطيك المفتاح وتقول لك مشكور على كل شيء وتتمنى تسامحها
استغرب عزام ونطق : من متى ؟!
ميل براسه احمد : اوووه من شهور بس تقريبا حدود الخمس شهور كذا
وعرف عزام انها مشت بعد لقاء كنوز معها هز براسه ونطق : مشكور يعطيك العافية وراح احمد ومشى عزام يركب سيارته ونطق لنفسه : والله مدري وش اقول بس يلا بحفظ الرحمن يالجاحده تتافف وحرك من عند البيت للجامعه ينتظر كنوز تخلص وفعلا خلصت وطلعت له ركبت وحرك عزام بدون ماينطق بحرف وهو يفكر بملاذ ولفت كنوز تناظر صمته واللي ماكان من عادته ونطقت : فيك شيء ؟؟
هز براسه ونطق : لا ولا شيء كيف يومك ؟
رفعت حاجبها تناظره بس ماكررت سوالها ونطقت : زين معليه
سكت عزام وسكتت كنوز معه ووقف عند البيت ونزلو يدخلون غرفتهم ...."
<<العشاء الساعه ٨ونص >>
ولف سند يناظر جواله اللي يدق وجمد وجهه من شاف الرقم اخذه يرد ونطق اخو ايمان : السلام عليكم انت سند صح ؟
بلع ريقه سند ينطق : وعليكم السلام اي نعم انا سند امرني ؟
اخو ايمان : انا عزيز اخو ايمان
توتر سند ونطق : اعرفك قول ؟
عزيز : سالنا عنك وماشاء الله ذكرك بالخير يسبقك ونتشرف فيك وننتظرك الجمعه ان شاء الله
ضحك سند بخفوت بحيث مايسمعه ونطق : الشرف لي ياعزيز ان شاء الله الجمعه الجمعه
وقفل سند منه وعض على شفته بفرحه عجز يستوعبها ونطق : كانها صارت يالجنتل وقف يطلع من غرفته لغرفة جود طق الباب ووصله صوتها واللي كان يسمح له بالدخول دخل ومشى يجلس جنبها ونطق : جوجو
ناظرته جود تنطق : قول وش فيك ؟!
ابتسم سند ينطق : شوفي تعرفين انك انتي الباقيه لي من اهلي كلهم صح ؟ وتعرفين بعد انك كل شيء بالنسبة لي واني اشوف الدنيا فيك هزت براسها جود له وتعرفين بعد اني كبرت واحتاج اسس بيت
رفعت حاجبها جود تنطق بصدمه من كلامه والمقدمات اللي جالسه تسمعها منه : مافهمت سند وش هالمقدمات كلها اعرف كل شيء بس
وش سبب هالكلام كله ؟!
مسك كفها ونطق : انا بتزوج
فتحت عيونها جود على الاخير ونطقت بخوف : ايش !!
شد على كفوفها الثنتين ونطق : بتزوج بس معليك ماراح يتغير عليك شيء بعيش معك بنفس البيت وبعدين اللي باخذها انتي تحبينها
رفعت حاجبها جود وهي بهالحظه مو فاهمه ولا شيء: مين هي ؟!
ابتسم سند وهو يعرف ان جود مجرد ماتعرفها بتتغير ردة فعلها ونطق : ايمان
انصدمت اكثر ونطقت بصدمه اكثر : ايمان مين ؟ ايمان ايمان اللي نعرفها
ضحك سند وهز براسه بمعنى ايه : ايوووووه هي
ضحكت جود ونطقت وسط ضحكتها وقامت تحضن سند وشد عليها وابعدت عنه تناظره ونطقت: سند ايمان انت متاكد انها هي
ضحك سند ورفع يده بشعرها يبعثره ونطق : اي هي ايمان
عضت شفتها بفرحه لانها تعرف ايمان وتحبها وواثقه انها بتكون كل شيء لسند ابتسمت ونطقت براحه : اهنيك على الاختيار صح اني ماكنت ابيك تتزوج وتجي وحده مااعرفها بس دامها ايمان الله يوفقك يارب معها
ضحك سند لانه كان شايل همها وانها ترفض هالشيء : ياروحي ياجودي لهالدرجة تحبينها ؟
هزت براسها جود تنطق : مره احبها واحسها اختي فعلا
تنهد سند براحه : زين جهزي نفسك الجمعه بنروح لهم
رجعت تحضنه وضحك سند ورفع يده يشد عليها وابعد عنها وطلع لغرفته واخذ جواله يدق عليها ومن شافت اتصاله ضحكت وهي ترد عليه : هلا
ابتسم سند من سمع نبرة صوتها ونطق : اهلين ماتوقعت بهالسرعه توصلني موافقتك ؟
ضحكت ايمان ونطقت وسط ضحكتها: خفت تنهار علي وقلت ارفق فيك
ضحك سند ونطق وسط ضحكته: اي زين انك عارفه اني بنهار
توردت ملامحها ونطقت: الجمعه اكيد ؟
ورفع شعره عن جبينه ونطق : اي اكيد جهزي نفسك وصدقيني
انتظره بفارغ الصبر
بللت شفايفها ونطقت : معليه باقي ٣ايام على يوم الجمعه بتمر بسرعه
تنهد سند بفرحه وراحه وصلت شعورها لمسامع ايمان
ونطق : على خير ان شاء الله يلا تصبحين على خير وراي دوام ولازم اقوم بدري وقفلت منه وهي ميته من فرحتها وخصوصا انها بتكون له بعد ثلاث ايام
......""
ابتسمت وتنهدت براحه من نومت زهر ومشت له تنسدح جنبه وهمست له من جاء ينطق : اششش بتقوم ماصدقت تنام
ابتسم وعقد حاجبينه من شافها تنام بعيد عنه ومو من عادتها ونطق : امس قلنا علشان زهر بس اليوم وش عندك
لفت عليه واشرت على يده ونطقت : اخاف اعورك
فتح ذراعه اليمين ونطق : ماراح اتعور منك تعالي
قربت منه ودخلت بحضنه وابتسم نايف يحس فيها تحرك اناملها على صدره وهو ساند راسه على السرير ويلعب بشعرها ونطقت: احس اني متحمسه للجمعه مو مصدقه انه فعلا ايمان بتتزوج
ابتسم نايف ينطق : الله يوفقهم يارب
هزت براسها هيام وتنهدت ونطق نايف بضحكة
من تنهيدتها الطالعه من قلبها : وش سببها ؟؟
ضحكت وهي بحضنه و رفعت راسها تناظره وسكنت ملامحها من شافته من قرب عيونه ورمش أهدابه لسواد شاربه ودقنه لنظرة عيونه وسبق وقالتها له انها تحب ذبول عيونه من يناظرها ويتاملها وسكت نايف ينتبه لنظرات التأمل منها ورفعت اصابعها بخفه تلمس شاربه ونطقت بهمس : سببها راحه بقربك
مسك كفها يبوسها ونطق :جعلها دايمه ياعيوني
ابتسمت بخفوت ورغبه في انها تبوسه بعد كل هذا القرب وصوته وريحته ونظراته الهادئة والمليانه بمشاعر الحب نزلت عيونها لثغره وفهمها نايف وقربها منه لجل يبادر هو ابعدت عنه وهي تحضنه وتغمض عيونها على صدره وبعدها بكم دقيقه سبقها ونام وراها ......""
~~<<يوم الجمعة المغرب واليوم المنتظر عقد قران سند وايمان >>~~
كان جالس على طرف السرير ويناظرها وهي تسوي مكياجها بكل دقه خلصت ولفت عليه وابتسمت تناظره ونطقت : وش تفكر فيه ؟
ضحك عزام ووقف لها وهو يسحبها معه لسرير ونطق : كم اخذ منك وقت علشان تطلعين بكل هالجمال ؟؟
ونطقت كنوز بكل براءه : يعني حدود الساعه ونص كذا بس
ليش تسال بوش يهمك فيه ؟!!
ونطق عزام بضحكه انها جاوبته : زين اجل سهالات لاني بدمر كل هذا
شهقت من فهمت نيته وخبثه وضحك عزام وهي تضربه على كتفه ومسك يدها ونزل عليها وتقدم يقبل عنقها وميلت راسها من حست بثغرة على عنقها ورفع راسه يناظرها وحطت يدها على ثغرها ونطقت : تكفى لا
ضحك عزام ونزل يقبل يدها اللي فوق ثغرها وابعد عنها وتنهدت وقامت تبعد عنه واخذت عبايتها تتبعه وطلعت وراه يتوجهون لبيت ايمان لجل
عقد القران ...
عند ايمان كانت تتجهز بكل حب وهيام وضحى عندها وقفت ضحى عند التسريحه وهي تطبل عليها ورفعت يدها هيام تغني : زفو العروس زفوها وعلى الورد مشوها وضحى تكمل معها وتحمست ايمان وهي توقف وتغني معهم ورفعت يدها هيام تزغرط وتضحك ونطقت وسط ضحكتها: مين كان يصدق ان ايمان بتتزوج اخيرا ياربي اخيرررررراااا
ضحكت ايمان تنطق : يوووه يابنت ماتوقعت لو واحد بالميه ومن مين بعد من الجنتل والمطفوق من سندوه
ضحكو البنات واخذت ضحى جوالها تشغل اغنيه والبنات يرقصون وشوي واجتمعو كلهم عندها بالغرفه يرقصون بفرحه لايمان وهي فرحتها بهالوقت ماتضاهي اي فرحه .....
وعند الرجال بالمجلس دخل المملك وجلس بوسط المجلس وبدات مراسم عقد القران واجتمعت يد عزيز اخو ايمان بحكم انه هو الوالي عليها بيد سند رفع جواله نايف يصور سند وهو ينطق : قبلتها زوجة لي على سنه الله ورسوله ابتسم نايف بواسع ثغرها وفرحان من قلبه لصاحب عمره وسند ايامه
وقف سند وهو يسلم على كل الرجال اللي بالمجلس ويسمع المباركات منهم كلهم ووقف عند نايف وهو ماقدر مايحضنه وابتسم نايف وشد عليه ونطق وهو حاضنه : مبروك ياالسند منك المال ومنها العيال الله يتمم عليكم بخير
ابتسم سند من قلبه ونطق : الله يبارك بعمرك اهاه يانايف احس ان.....
قطع كلامها نايف وضحك وهو ينطق : اسكت اسكت المجلس
مليان بعدين عبر "
ضحك سند وهو فعلا يناظر المجلس المليان بالمعازيم ونطق : يعني ماكذبت من قالت اني مطفوق .."
ضحك نايف وهز براسه ورجع ينطق سند : بس اني سند تميل الدنيا ومااميل
ارتفعت ضحكات نايف ونطق : لابوها مدحه قلتها لك
ضحك سند ومشى يسلم عليهم كلهم ورجع يجلس وقام اخو ايمان ياخذ موافقتها
وفعلا واقفت ورجع اخوها وصرخو البنات اللي كانو كلهم ورا الباب ضحكت ايمان تسلم عليهم كلهم اشتغلت الاغاني وهم يرقصون معها وجلست هيام جنب ايمان ونطقت ايمان لهيام بصوت عالي : هياموه اسمعي كلمي نايف شوفي سند متى بيدخل ؟
قربت منها هيام تنطق بنفس الصوت : مااسمعك صوت الاغنيه عالي
ورجعت تنطق لها ايمان بصوت اعلى وهزت براسها وقامت تطلع برا علشان تدق عليه فتحت شنطتها وهي تدور جوالها وتاففت من تذكرت انها نسيته فوق مشت للباب بس كان مقفل من الاطفال اللي دخلووسكرو الباب ورجعت تدق بس محد فتح لها من صوت الاغاني العالي ونطقت : يوووووووههه لابوكم من صغار شلون ادخل الحين وجوالي مو معي بعد اوووووف بس مااهتمت ابدا فتحت شنطتها وطلعت مرايتها الصغيره وروجها الخمري اللي يليق على فستانها الابيض الطويل بفتحه لركبتها ونحرها المكشوف كله وطرف الفستان اللي كله ورد ابيض وهي تعشق هاللون خصوصا انه ابيض وفيه ورد بعد حطت روجها ورشت عطرها ورجعته وسكرت الشنطه وهي ترجع تدق بس محد فتح لها وتذكرت ان ايمان قالت لها في مدخل من الخلف ونطقت : يلا هيام امشي حسبي الله على عدوك ياايمان مين قال لي اقوم انا ومشت للمدخل بس ماهي فاهمه وين هي بتروح بس جالسه تمشي على كلام ايمان مشت وهي كل شوي تتعثر من الكعب زفرت بغضب وخوف من احد يشوفها بهالحاله اللي هي فيها عضت على شفتها من بدا الخوف يطغى عليها
طلع برا بالحوش يدخن كعادته حط زقارته بين شفته ورفع الولاعه
يشعلها وهو يناظر حوله
رفعت فستانها بيدها ونزلت تاخذ كعبها بيدها الثانيه تركض وهي بتموت وتخاف احد يشوفها او حتى يلمحها تاففت بضيق وهي تنطق : حسبي الله على بيتكم ياايمان وش هالمتاهات ذي كلها انا مين قال لي اطلع والمشكله جوالي داخل يالله سمعت صوت الرجال وركضت تدخل خلف الجدار وهي وضعها مايسمح لها ابدا بان احد يشوفها نحرها كله مكشوف وفتحت الفستان توصل لركبتها رجعت ظهرها للخلف على الجدار بالضبط وكتمت انفاسها وتنفست براحه من مشو الرجال بدون محد يلمحها عضت على طرف اصبعها
ونطقت : شلون ادخل الحين وش اسوي نزلت راسها تناظر اذا في احد حولها ماشافت احد وشدت على فستانها بحيث تقدر تمشي ركضت والكعب بيدها ولفت تناظر اذا في احد خلفها ورجعت تناظر قدامها من حست انها ارتطمت بجسم عريض رفعت عيونها من كان نايف بلعت ريقها وفتح عيونه على الاخير من شافها ورفع عيونه يناظر اصوات الرجال اللي تقترب منهم نزع شماغه من على راسه يلفه على اكتافها وسحبها يدخلها معه ورا الجدار بلعت ريقها بخوف وهو يحضنها بحيث محد يقدر يلمحها وهو حاليا يفور ويغلى من العصبيه وقت شافها رافعه نص فستانها من تحت لركبتها لجل تركض ونحرها المكشوف كله سحبها معه يدخلها خلف المستودع الخارجي وبعيد عن المجلس والناس ونطق بكل غضب يحتويه : وش مطلعك برا هاه ؟ يا انك بتموتيني قبل يومي ياانك
متعطشة لموتك لامجال لخيار ثالث ؟!!
تنهدت تنطق : نايف طلعت ابي ادق عليك بس كان جوالي فوق
والباب تقفل وماقدرت ادخل حاولت ادق بس اصوات الاغاني عاليه .."
تغيرت ملامحه ونطق: احد شافك قولي لي علشان اقلب الليله عزاء !
خافت منه لانها تعرفه وتعرف غيرته الشديدة وتكره هالغيره ونطقت : تكفى نايف اقولك الباب تقفل من وراي من طلعت
رص على اسنانه ونطق بحده : جاوبيني ؟!!!
بلعت ريقها وامتنعت عن الايجابه وضرب بيده على الجدار من خلفها وغمضت عيونها بذعر وتوتر ونطقت : محد شافني والله محد شافني غيرك
وسكت يمسح على وجهه ورجع يناظره فتحت عيونها بخفه تشوف نظراته عليها ، عضت شفايفها تمنع دموعها تنزل ونطقت : نايف خلاص قضينا محد شافني ليش تكبر المواضيع بعدين قلت لك اني اكرها
رفع حاجبه ينطق : مين هي ؟!
ميلت شفايفها ونطقت: غيرتك اكرها
سكت وهو يعرف انها تخاف من غيرته ونطق : اضبطي نفسك وماراح تشوفينها
هزت براسها تنطق : مضبوطه معليك والحين ممكن تغير نظراتك
هاذي لانك جالس توترني وتخوفني فيها
نزل راسه وهو يناظر فستانها ويتاملها وزاد توتره ونار غيرته وهو متاكده لو ان احد شافها كذا بيجن جنونه ونطق : والله يا هيام لو ان احد شافك والله ان تدفعين الديه ريال ينطح ريال
بلعت ريقها وزاد خوفها ونطقت : محد شافني لاتخاف خلصنا
تكفى نايف خلاص .."
زفر بغضب ورفع عيونه يناظرها وثبت عيونه عليها وطالت نظراته لها وهو ماسكها بعيونها من اعلاها لاسفلها وهي بهالحظه ماتنكر انها جالسه تفور ماتدري وش سبب هالنظرات كلها وعضت شفتها وهي ناسيه كل التحذيرات عن هالحركه وابتسم بخفه وسحبها مع خصرها وجلس وهي بحضنه على الدرج المقابل للمستودع وهو يقبلها بعمق بثغرها وسرعان ما ارتخت بین یده ، تبادله ودموعها على خدها اثر خوفها من نظراته لها رفعت ذراعيها تحاوط رقبته وشد على خصرها وهو مستمر يكرر قبلاته بثغرها ابعد عنها وفتح عيونه يناظرها جالسه بحضنه ويدها تحاوط عنقه من الخلف خوف من انها تطيح بلعت ريقها وهي اول مره تخاف من قبلاته بهالشكل متعوده عليها بس هالمره كانت غير وخصوصا انها اشعلت نار وشرار غيرته اللي هي تخاف منها ونطق هو : قايل لك لاتعضينها قدامي لاني بهالوقت مقدر امسك نفسي وهالحركه قادره انها تخليني انسى حتى غيرتي واخذ حقي من هالنار اللي بصدري من ثغرك بللت شفايفها بخجل ورفعت يدها تبعد يده اللي تحاوط خصرها وقامت تبعد عنه
ورفع يده ياشر لها ترجع بحضنه ونطق : ارجعي
هزّت رأسها بالنفي ونطق بحده : مو طيب لك لو احط رجلي بالارض
بتندمين كثير بعد مو شوي تعالي
بلعت ريقها ومشت له أبتسم بخفه يسحبها له ويرجع يحتضن خصرها من جديد ونطقت هيام : ناي...
قطعها وهو ينطق : باقي لك وجه تتكلمين ؟!
رفعت راسها لعنقه ونطقت : انا احس معك بامان الدنيا كلها تكفى
لاتقلب كل هالاحاسيس خوف .."
بلل شفايفه ونطق وهو يمسح على ظهرها : وانتي لمتى بتخلين نار الغيره تكويني ؟!
ورفعت ثغرها تقبله بعنقه وكانها تقدم له اعتذار عن اللي صار ورجعت وجها تناظره مبتسم ويناظرها ونطق :عندك خبر ان ثغرك دواء لكل داء يصيبني وانا اقولك ياها كل ماحسيت اني افور من نارك بيكون ثغرك هو اللي بيطفي هالنار المشتعله فيني ."
ابتسمت تناظره وهي حرفيا بتموت من خجلها ونطقت وسطه : حلالك
رفع حاجبه نايف وابتسم بطرف ثغره ونزل لها يقبلها من جديد وابعد عنها بعد مااشبع كل خليه بداخله وعيونه بعيونه ظلوا على هالحال ثواني معدودة رفع عيونه يناظر المكان حوله وهو تكه ويجيب اعايد الدنيا كلها وقفت تبعد عنه ووقف معها لف الشماغ عليها ومشى فيها لعند قسم الحريم وشاف الباب مفتوح ونطق :ادخلي واعطيني شماغي ابعدت الشماغ عن اكتافها ورفعته على راسه وحط عقاله يعدل نسفة شماغه ورفعت اصبعها تمسح ثغره من اثر روجها من قبلاته لها ابتسم نايف يعض شفته ودخلت وراح هو ونطق وهو ماشي للمجلس وريحتها تمشي معه على ثوبه : مصيبه هالبنت ضحك ودخل المجلس يجلس بمكان وحده بحيث ريحة عطرها ماتوصل لحد غيره ورفع عيونه لسند اللي قام لجل يدخل عند ايمان ....."
وعند سند اللي دخل وهو عيونه ماتشوف غيرها ابتسم بواسع ثغره من شافها واقفه وتنتظر دخوله بجمال فستانها العنابي وشعرها المنسدل على ظهرها للورد اللي بيدها اسرع بخطواته لها وهو يقبل جبينها ومسك كفها بكفه ونطقت ايمان : اخيرا يالجنتل صار اللي تبيه "
ضحك سند بخفوت ونطق : اللي ابيه ؟ وانتي ماتبينه ؟!
ميلت شفايفها ونزلت عيونها ونطق سند : ترا متعود عليك سليطة لسان السكوت والخجل مايناسبك وضحك وهو شاد على كفها
ابتسمت ايمان وسحبت جود الدبل تعطي سند اخذها منها وهو يلبسها وتلبسه ونطق لها : مبروك علينا
اتسعت ابتسامتها ونطقت له : يبارك فيك
عدل بشته واعتدل بوقفته من جت جود تصورهم مع بعض ابتسم لها سند وهو يشوف فرحتها له ورفع يده يناديها تتصور معهم مشت ترفع الجوال وتتصور معهم سلفي ورفع ذراعه سند على اكتاف ايمان وجود وتصورو مع بعض ورفعت يدها جود تحضن سند وشد عليها وابعدت عنه وهي تبكي رفع يده سند يمسح دموعها ونطق : ايش قلنا احنا قلنا ماراح يتغير شي عليك
لفت ايمان لجود تنطق : جودي يووه تبكين معليك بعيش معك ونسولف
ونسهر ونحش باخوك الجنتل
ضحك سند وضحكت جود وسط دموعها ولف سند على ايمان المبتسمه ونطق : مصره على الجنتل
هزت براسها ايمان : لان جووووووي الالقاب بعدين ماتحس ان الجنتل احلى من مطفقوق ؟!
ضحك سند وهز براسه ولف لجود : مين قدك انتي وياها بتلقون احد تحشون فيه كل ليله وحلال بعد مسامحكم "
غمزت ايمان لجود وضحكت جود وهي تبعد عن سند قطعو الكيكه وجلس شوي معها وطلع للمجلس دخل وهو يجلس جنب نايف وابعد نايف عنه ولف سند لنايف : وجع خير وشو له تبعد ؟
حك شاربه نايف ونطق : خلك عندك وانكتم مالك دخل
عقد حاجبينه سند ونطق : ياولد وش فيك بسولف لك !
هز راسه نايف بالنفي واستغرب سند ونطق: يابن الناس وش العلم وش فيك ؟
وقف يطلع من المجلس وفاحت الريحه على سند وضحك سند وهز براسه: اني عارف والله اهاه ياربي وش هالرجال يارب استر علي لاصير زيه.
طلع نايف يركب سيارته ونطق : وش هالعطر !
عند هيام اللي كانت بغرفة ايمان من رجعت من عنده وهو هز كيانها كله ويدها مانزلت من على ثغرها مشت توقف عند المرايا وتشوف ثغرها الخالي من روجها اللي كان يملي ثغرها قبل تشوفه بلعت ريقها واخذت شنطتها ترجع تحط منه من جديد ومشت تنزل لهم تحت جلست جنب ايمان ولفت ايمان عليها :وين كنتي انتي مستحيل ارسلك مكان وترجعين لي بسرعه !
لفت هيام عليها ونطقت بغضب : لانك حيوانه انتي السبب اصلاً بكل
اللي صار لي .."
عقد حاجبينها ايمان بعدم فهم: وش انا مسويه ؟! وبعدين وش صار فيك !
ارتسمت ملامح القهر على وجها ونطقت : شفتي يوم قلتي لي اطلعي دقي على نايف شوفي سند متى بيدخل وهزت براسها ايمان وكملت طلعت واجي افتح شنطتي الا الجوال مو موجود كنت ناسيته فوق جيت ابغى ادخل وسكرو عيال اخوك الباب بوجهي ودقيت بس اصوات الاغاني كان عالي ورحت لمدخل الخلفي اللي قلتيه لي وكان مقفل بعد وطلع لي نايف بوجهي ولعن وجهي بسببك ياحماره وانتي هنا مبسوطه ماشاءالله عليك وانا اكلتها ..
عضت على شفتها ايمان تكتم ضحكتها ونطقت : يوووه كل هذا صار لك
رصت على اسنانها ونطقت : انكتمي ايمان انكتمي
هزت براسها ايمان وهي تضحك عليها ونزلت راسها لجوالها وهي تشوف اتصال منه قامت من جنب ايمان ترد عليه
ونطق نايف : تمشين ؟! مو قادر اجلس بالمجلس بسبب
ريحة عطرك اللي عالقه بثوبي
هيام :انت السبب بعدين انت مو قادر تفرق بالمكان تحسب كل مكان بيتنا
ابتسم بطرف ثغره ونطق : احمدي ربك انها جت على كذا
وسكتت بدون ماترد عليه ونطق نايف : اخلصي علي الحين بتطلعين ولا كيف !
لفت تناظرالبنات ونطقت :اصبر عطني دقيقه وارجع ادق عليك
نايف : اعجلي
مشت للبنات وشافت كل الناس راحو الا اهلها واهل نايف ونطقت لهم : بنات بتروحون ؟!
لفت ايمان عليها : لا مافي روحه باقي الاستديو التحليلي
ضحكت هيام وهزت براسها ورفعت جواله تدق عليه وتقول له انها ماراح تروح قامت تاخذ زهر من يدين امها وابتسمت لها وهي ترفعها بين يدينها ..."
طلعو العيال كلهم عند السيارات ودق سند على شباك سيارة نايف ولف نايف ينزل الشباك ونطق سند : سكني انت وش تسوي هنا
تافف نايف ولف عليه ونطق : انت بتسكت ولا شلون ؟!
ضحك سند وتكى بيده على حافه الدريشه ونطق : اي بسكت خلاص
واجتمعو العيال عند دريشة نايف ونطق عزام : بتروحون احس باقي بدري
ونطق سند : بدري ودكم نقلبها صباحي
نهار : اي والله
ونطق سعود : ودكم نروح الملعب نلعب كوره
فهد : اي تم يلا
سعود : بس الاكيد ماراح نلعب بالثوب روحو غيرو اول
نايف : ارسل الموقع ونتقابل هناك
لف عزام لنصار ونطق : يلا تعال معي انت
مشو كلهم يروحون يغيرون الثياب ورجع نايف لبيته يغير ملابسه ويلبس تشيرت وشورت وحذاء رياضي وطلع يركب سيارته وكلهم نفس الشيء
التقو كلهم بالملعب ونطق نايف : انا معي سند وعزام ونصار وانتو
الباقي بفريق .""
ونطق سعود : خير يالنسيب انتو اربعه احنا ثلاث
نايف : خلاص طلعو واحد حارس مرمى
رفع يده نصار ونطق : انا
رفع حاجبه نايف يناظر سعود : يلا تمت
وتوزعو يلعبون كلهم تحت صراخهم وضحكاتهم ...."
<<وعند البنات ببيت ايمان >>>
جالسين بالارض والتوزيعات قدامهم والقهوه ويسولفون عن الملكه
نطقت ايمان بضحكه : هياموه شفتي حنان ترا جت
شهقت هيام ونطت : كذذذذذاااااابببهه ماشفتها متى جت ؟
ايمان : اي والله جت سلمت علي واعطتني هديتي وقالت انها بتسافر شهر عسل للحين ماسافرت كان عند زوجها شغل
حطت هيام اصبعها بحلقها وتمثل انها بتستفرغ
ونطقت : بعععععععععوووووهه ياكرهي ياربي انك تصبر زوجها
ضحكو البنات ونطقت ضحى : اي وحده ايمان
ايمان : اللي لابسه رمادي جت عندي وسلمت علي شفتوها انا متاكده
ونطقت كنوز : ايي عرفتها عرفتها
وضحكت جود تنطق : اي حتى سالتني عنك
هزت براسها ايمان ونطقت هيام : وانا وين كنت ليش ماشفتها
رفعت حاجبها ايمان وضحكت بنفس الوقت ونطقت : مشغوله مع نايفك
اخذت هيام المخده ترميها عليها : وجع ياكلبه بعدين وش شغله فرشني وغسل شراعي ليتها انكسرت رجلي قبل اسمع كلامك واطلع
ونطقت شروق بتساؤل: لالالا تكفين لاتقولينها اي وش صار ؟!
بلعت ريقها هيام ونطقت : الكلبه اللي جنبك قالت لي اطلعي كلمي نايف شوفي سند متى بيدخل ولفت هيام على زوجه عزيز اخو ايمان : وانتي مريم الله يسامح عيالك هم قفلو الباب و اتوقع كلكم تشوفون فستاني وشافني نايف عاد مايحتاج اقولكم وش صار خصوصا انتي ياكنوز وشروق اخوكم وتعرفونه
ونطقت كنوز بخوف : اي والله اني اعرفه مايحتاج
ونطقت ايمان بضحكه وهي تبي تحرج هيام : اي هيام وش صار بعدها ؟
لانت ملامحها بخجل ونطقت : ماصار شيء شوفي انا اعرف وش تبين توصلين له لكن انا اوريك والتهزيء اللي جاني بطلعه من عيونك
ضحكو البنات عليها.."
ونطقت شروق : اجل اسمعو وش صار لي انا تخيلو مره طلبت من مطعم اخر الليل المهم وطبعا ماطلبت الا لما تاكدت انه مداوم ذاك اليوم وفهد كان مبتعث وقتها ونهار مايدري الله وين حاطه المهم طلبت حول الساعه وحده بالليل ووصل المندوب على جيت نايف اهاه ياذاك اليوم ذبحني مافكني منه الا ابوي ونمت بدون عشاء من الفصله
ونطقت هيام: خيرر وش يعني اكل ترا !
ضحكت كنوز تنطق : اقول احمدي ربك ترا نايف تغير يوه يازمان العسكريه تتطبق في البيت
ضحكو البنات ولفت شروق على كنوز : تذكرين يوم قفطه ابوي يدخن ؟
ضحكت كنوز ونطقت : لاتذكريني يوووه يالرعب
رفعت حاجبها هيام : وش النتيجه طيب ليومك ذا والزقاير ماتطلع من حلقه
شروق : مسكه ابوي قبل مايدخل العسكريه تقريبا ورا البيت يدخن تعالي شوفي لعن وجه وجهه بس الاخ مايمشي الا اللي براسه لين تعب ابوي نفسياً وتركه
ميلت شفايفها هيام تنطق : يوه يابنات ودي احل مشكله الدخان ذي تدرون اني وصلت لمرحله احس ان الدخان عنده اهم مني
ونطقت ايمان: انتبهي والله حاولي وبعدين يده مكسورة يعني الدخان
بيضره اكثر بهالفتره لين يلتئم كسره
زفرت هيام تنطق : اني اعرف بس ايش اسوي فيه
مريم : حاولي طيب
شروق : لو احد بيقدر كان قدر ابوي
تضايقت هيام وهي فعلا خايفه عليه ونطقت كنوز : خلاص فكونا
اي ايمان متى بيكون الزواج ؟
رفعت اكتافها ايمان تنطق : مدري والله باقي بس في ناس زواجهم قريب مررره
ضحكت ضحى تنطق : يمه احس اني بموت خوف
وضحكت هيام من ضحكت ضحى ونطقت : اخيرا احس انه اكثر زواج انتظره
ابتسمت كنوز تنطق : الله يتمم كلنا والله متحمسين وطبعا نهار اكثر واحد متحمس ياعمري عليه صبر كثير
شروق : اي والله بيموت وتعب من كثر مادرس
هيام : نزلت درجاته طيب ؟
ضحى : باقي اتوقع بكره يارب يعدي فيها كلها
شروق : بيعدي معليك لانه اكل الكتب اكل انا كنت شاهده
لفت ضحى على مريم تنطق : مريوم لازم تجين انتي
ابتسمت مريم وهي تنطق : ابشري ان شاء الله اول الحاضرين
بادلتها الابتسامه ضحى ونطقت : تنورين والله
ولفت هيام على ايمان : ايمان ياحيوانه ليش ماقد عرفتينا على مريم
ايمان: ايش دخلني انا هي ماتحب ترا كلموها
ورفعت عيونها هيام لمريم : مريم لازم نشوفك بكل جمعه
هزت براسها مريم ونطقت : ان شاء الله
قامت هيام من بينهم وهي تاخذ جوالها وتدق على امها بحكم انها راحت واخذت زهر معها وثواني ووصلها صوت فاطمه : يمه هاه كيف زهر عذبتك ؟
ضحكت فاطمه وهي تناظر زهر ونطقت: لا بسم الله عليها ساكته وجالسين نسولف سوالف جده لحفيدتها
ضحكت هيام ونطقت: زين يلا انبسطو وقفلت منها وهي ترجع للبنات ......"
~الساعه ٢:٣٠ ص ~
انتهومن لعبهم بالملعب بعد مامرت ليلتهم كلها هناك جالسين بالعشب الاخضر ويسولفون ونطق عزام: يوه ياتعب صدق سعود وربي انك تتعب خلاص قدرت جهودك "
ضحك سعود وهو واقف وهم بالارض من اثر تعبهم : ياعيال منجدكم خير !
ونطق سند:خير ؟! انا وش جابني توي عريس مفروض اني عند المدام
ضحك نايف ينطق : منى عينك اني اعرفك
بادله الضحكه نهار : سند وش شعورك وانت غادرت العزوبية ؟
ابتسم نايف يناظره ونطق سند : اقولك انتو ماخليتوني استوعب باقي جايبيني اركض بالملعب مفروض تعشوني بمكان زي الخلق
بقق عيونه فهد ونطق : واللحم اللي دقيته عند الناس هذا وشو ؟
نصار : ياسند ياكذاب الشحم يقطر من يدك كيف باقي تبي تتعشى !
ضحكو العيال وضحك نايف بعلو صوته ينطق : معليكم هو مشفوح والاهم من هذا كله مطفقوق .."
وفز سند يبعد عنه من كان ساند ظهره بصدر نايف ونطق : بس جنتل ؟
اعتلت ضحكات نايف ونطق وسط ضحكته: اي جنتل عند مدامك بس
رفع حاجبه سند ونطق :وسند لك تميل الدنيا ومااميل
مسح شاربه نايف وهم يفتله ونطق : عمري ماندمت على كلام قلته زي مانمت على اني قلت لك هالكلمتين انت بتجلس تذكرني فيها كل شوي ؟؟
هز براسه سند ياكد كلامه: اي نعم
ونطق عزام:شسالفة الجنتل ؟
رفع حاجبه نايف وضحك ونطق:قول له
انحرج سند ونطق وسط احراجه : والله شوف يبو تركي انا اقول هي صارت زوجتي يعني ماينفع اقول لك خلاها مستوره
ضحك نايف وهو يناظره ونطق عزام :اي زين خلاها مستوره
واضح وراك بلاوي
سند : افا بس
ونطق سعود لنهار : قرب العرس هاه بشر طلعت درجاتك ؟
ابتسم نهار ونطق وسط إبتسامته : باقي اتوقع بكره
ضحك فهد ونطق : وكيف تتوقع ناجح ولا حامل ؟
بادله سعود الضحكه ونطق : ححححاااااااممممل
ضربه على كتفه نهار ونطق : الله لايوفقك ياشيخ تراني بموت خوف فكني من شرك وفالك اللي يسد النفس اقولك اكلت الكتب اكل وانت تقول حامل بدري عليها جامعه تحملني بعدين وش حامل انت وياه وجععع صدق
الكل : ههههههههههههههههههههههههههههههههههههههههههه
لف نهار على فهد ونطق : تكفى فكني منك انت الثاني فكوني من الجامعه خلاص تراها واقفه بنص بلعومي ."
رفع يده نايف لساعه وهي تشير لساعه ٣ ومر الوقت عليهم بدون مايحسون فيه ابعد سند عنه وقام من بينهم وهو يدق عليها واستغرب انها للحين مادقت عليه ووصله صوتها تنطق : نعم ؟
رفع حاجبه ينطق : انتي مو مضبوطه اليوم وش اللي نعم !
ميلت شفايفها تنطق : وش تبيني اقول لك هلا قلبي ! هلا عيوني! هلا روحي !
ضحك يعض شفته ويكتم ضحكته وهو يسمع نبرة صوتها : لا خليها لك
شهقت تنطق : وش خليها لك ؟ ماتبي تكون قلبي وعيوني وروحي !
مسح طرف خشمه ونطق : لاني كلها بدون ماتقولين
صرخت تنطق وسط صراخها : وويييععع خيرررر
وضحك نايف ونطق : اي زين انا اوريك الووييعع ذي رجعنا للسانك الطويل
تنهدت تنطق : وينك ؟
نايف : بالملعب
رفعت حاجبها تنطق : شلون يعني ؟
نايف : وش اللي شلون بالملعب نلعب كوره
ونطقت بتعجب : ويدك !!
نايف : وش فيها يدي مافيها شيء !
هيام : يعني كوره انت شفيك مستهتر كذا لو جاك شيء ولا طحت ؟!
نايف : مافيني شيء بخير
هيام : اكيد ؟
نايف : اكيد اسمعي يلا تجهزي جايك
هيام : ااا نايف ترا امي اخذت زهر بنروح ناخذها اول
نايف : تمام يلا قفل منها ومشى يرجع للعيال ونطق : يلا قومو لمتى
بتجلسون هنا ؟ الساعه ثلاثه
وقفو كلهم ونطق نهار : فهد روح خذ شروق والله ماقدرت تعبان
هز براسه فهد بمعنى طيب ."
وطلعو كلهم وركب سند سيارته وضرب كفوفه ببعض : البنزين
ونزل من السياره لعند سيارة نايف وفتح الدريشه له ونطق سند : البنزين مايوديني خطوه خلص ونسيت اعبي
نايف : وكيف بتسوي الحين ؟
رفع اكتافه سند بمعنى ماادري ونطق نايف: خل واحد من العيال يوديك
سند : وكيف اخذ جود ؟
نايف : معليك تروح مع شروق اختي ولف نايف يفتح الدريشه من جهته وهو ينادي نهار ونزل له نهار ونطق نايف له : خذ سند معك بنزينه مخلص
هز براسه نهار ومشى سند يركب معه واخذ جواله نايف يدق على فهد ورد عليه ونطق نايف : فهد خذ اخت سند مع شروق وصلها سند مايقدر خلص بنزينه وراح مع نهار بوصله
بلع ريقه فهد وهو فعلا يبي يشوفها ونطق : تمام
وقفل منه نايف وحرك للبيت ودقايق ووصلو كلهم
قامو البنات يسلمون على ايمان ومريم بعد ليله حلوه قضوها مع بعض وطلعت هيام لنايف وكنوز وضحى لعزام
ومشت جود تحضن ايمان وهي حاليا تحسها صارت منهم فعلا هي واخوها وشدت عليها ايمان واخذت جوالها جود تشوف رساله من سند
محتواها : روحي مع شروق سيارتي مافيها بنزين مقدر اجيك
تاففت وهي ماتحب تمشي مع احد ومشت ورا شروق وقالت لها وطلعو لسيارة فهد وركبو وخفق قلب فهد بخوف من شافها وحرك من عند البيت وبنص الطريق شهقت شروق ولف عليها فهد ونطقت : فهد تكفى ارجع نسيت جوالي
هز براسه فهد بدون ماينطق وهو يرجع للبيت ووصلو ولفت شروق على جود : جود باخذ جوالي واجيك
بلعت ريقها جود بخوف ونطقت: بنزل معك
ورفع عيونه فهد لها يناظرها ونطقت شروق : يابنت الحلال ماراح اطول باخذه واجي خليك هنا وفتحت الباب وهي تنزل
وجلست تفرك بكفوفها وهي حاليا بتموت من خوفها ورجفتها خصوصا انها ماتتقبل اي احد ماتعرفه وهو عيونه بالمرايا مانزلت وهو يناظرها ونطق يكسر حاجز الصمت : مبروك لسند الله يوفقه يارب
شدت على كفوفها بخوف وسكتت بدون ماترد عليه وعقد حاجبينه فهد بستغراب والتزم الصمت وتمنى انه مانطق و بدا يلاحظ تغيرات بملامح وجها اما عندها تجمعت الدموع بعيونها وهي حاليا في لحظه بتنهار وركبت شروق وحرك فهد وهو يناظرها وطول الطريق عيونه مانزلت من عليها ووقف عند بيتهم ونزلت وهي ترجف منه ومن سواله الاقل من العادي بس عندها كان كارثه ."
ورفع عيونه فهد يناظرها لين دخلت ومشى وهو مصدوم انها ماردت عليه
ولف على شروق ونطق: فيها شيء ؟
لفت تناظره ونطقت : مين
بلع ريقه ونطق باسمها : جود
رفعت حاجبها شروق ونطقت : وش فيها وليش تسال ؟
بلل شفايفه ونطق: مدري يوم نزلتي تاخذين الجوال حسيت انها توترت
وهزت براسها شروق : اي هي ماتحب اي احد وعندها رهاب اجتماعي وتخاف حتى احنا ماتعودت علينا الا بعد فتره طويله حتى بالملكه
طول يومها بالغرفه
رفع حاجبه فهد وسكت بدون ايجابه على الكلام اللي سمعه منها
ونطق بداخله : وانت جاي تبارك ماشاءالله عليك ماتقصر راعي واجب .."
وقف عند بيت تركي ونزلت هيام تاخذ زهر ومن نزلت ونزل نايف وسند بظهره على باب السياره اخذ دخانه وسحب منه وحده وولعها وطلعت له بعد مااخذت زهر وتاففت من شافته واقف ويدخن ومشت تركب لف يناظرها من ركبت انتهى من زقارته وحطها تحت رجله وفتح الباب يركب وحرك لبيتهم ووصلو وهي ساكته طول الطريق نزلت واخذت زهر معها ودخلت وطلعت للغرفة ومشى يطلع وراها حطت زهر بسريرها ومشت تنزل عبايتها
ونطق لها : كيف جمعتكم ؟
ونطقت هيام وهي تنزل كعبها : حلوه انبسطنا
هز براسه: حلوه ؟ وش فيك ساكته طيب فيك شي ؟
هزت براسها له بمعنى لا ورفع حاجبه نايف ونطق بحده: هههيااامم
رفعت راسها له ونطقت : شفيك !
مشى لها وجلس جنبها ونطق : تكذبين عيني عينك تكلمي وش فيك ؟
رفعت شعرها عن عنقها وهي تنطق : خايفه عليك بس هذا اللي فيني
عقد حاجبينه نايف ونطق بعدم فهم : ليه وش مخوفك ؟
مسكت يده ونزل عيونه نايف ونطق : وش فيك تكلمي !
اخذت نفس ونطقت : شوف انا اعرف ان الموضوع صعب بالبدايه بس مع الايام بيسهل معك نايف تكفى ماعاد ابيك تدخن
تافف وصد عنها ونطق : هذا موضوعك ؟!
تنهدت وهي تنطق : نايف الله يخليك تكفى حاول وانا بساعدك
وقف يبعد عنها ونطق: مااقدر هيام مااقدر
وقفت معه وهي تمشي وراه لغرفة الملابس : تقدر ليش ماتقدر لاتحط في بالك انك ماتقدر وقتها فعلا ماراح تقدر ."
هز براسه ونطق : يصير خير قفلي على الموضوع فيني نوم الارض
فكيني من الكلام هذا الحين مشى ياخذ ملابس ودخل ياخذ له شور بعد الملعب
تاففت هي ونطقت : مافي فايده وش اسوي فيه اوووف
ومشت ترفع شعرها وتمسح مكياجها وتغير فستانها ومشت تعلق فستانها الابيض جنب ثوبه ضحكت تتذكر الموقف اللي جمعها فيه وقربت تشم ثوبه وضحكت من وصلتها ريحة عطرها ومشت تاخذ جوالها وهي تصور فستانها جنب ثوبه واخذت عطرها ترش منه وطلعت له وهي تنسدح جنبه ونطق من وصلته ريحتها : وش هالعطر هيام جديد صح مقد شميته قبل كذا ؟!
ابتسمت وهزت براسها له ونطقت: اي جديد حلو ؟
ابتسم وهز براسه لها ونطق : حلو بس انه فضيحة
ضحكت ونطقت وسط ضحكتها: والله انت الفضيحة
مسح على وجهه ينطق : بالله عليك ؟!
ضحكت تهز براسها له ونطق : تكفين لاعاد ترشين منه
رفعت حاجبها تنطق : ليه توك تقول حلو ؟!
لف لها وسحبها تكون على صدره ونطق : لانه الحلو لاتحطين منه لانه
ضيع صوابي كله
توردت ملامح وجها وابتسمت ونطقت وسط ابتسامتها: خله يضيع وش وراك ؟
رفع حاجبه ونطق : لاوالله يعني عاجبك انك جالسه تضيعين صوابي و تطيرين عقلي اكثر؟؟
ابتسمت تهز براسها بمعنى ايه ونطقت : في قمة اعجابي بعد
ضحك نايف وهو يناظرها ونزلت راسها تنام على صدره بعد يوم حافل ...."
انتهى ✅
قراءه ممتعه
ولاتنسون ⭐️
