~<<بشوراع دبي ~>>
لف عليها يحتضن كفها بكفه ميلت شفايفها تنطق : نايف تراني حاقده عليك
ضحك يقبل كفها ونطق : اني داري
صدت بعيونها عنه وسحبها مع كفها يميلها عليه وصفق راسها على الدركسون شهقت وضحك نايف ينطق وسط ضحكته: ياليل الليل صدق نجي نبي
نكحلها نعميها
رفعت يدها تتحس راسها و نطقت: في شيء ؟!
وقف السياره على جنب الرصيف ولف لها ينطق : ابعدي يدك
نزلت يدها ورفع يده يتحسس راسها ونطق : مافيك الا العافيه تعالي ابوسك
رجعت بظهرها تنطق : مريض انت !!!
ضحك يسحبها يقبل راسها ونطق : الحين صدق صدق مافيك الا العافيه
ضحكت تناظره ونطقت: حيوان تجرح وتداوي بنفس الوقت
غمز بعيونه لها ونطق : اجرح ؟ افا اجرح الدنيا كلها ولا اجرحك
ابتسمت تنطق وسط ابتسامتها الواسعه : عيوني الثنتين وكل حياتي
ابتسم نايف يشعر بخفه بداخله بهاللحظة تنهد من كثرت مشاعر الحببُ بداخله ورفع حاجبه يرجع ظهره ويشغل سيارته ويكمل طريقه لمكان سهرتهم الاولى بدبي وقف سيارته ونزل يفتح الباب من جهتها ومد كفه ينطق : هات يدك يا برنسيستي الحلوه
ضحكت تمد يدها له مسك يدها ومشو يدخلون و يصعدون الدرج ويدخلون ومسك اكتافها الثنتين يدخلها ونطقت من دخلت : واوووووووو
ابتسم ينطق : شرايك ؟
لفت عليه تنطق : واووو نايف واوووووو مشت توقف تناظر المكان الخيالي لفت عليه تنطق بذهول : ناايفف مو قادره استوعب اللي قاعده اشوفه
مشى لها ينطق : استوعبي ليلتنا طويله توو بدري على عدم الاستيعاب
عضت شفتها بحماس تناظر طول الابراج وجمال المكان والبحر والورد وشموع وفازات طويله تحتوي كل المكان تكتف يناظر ضحكتها ابتسم يناظرها ويناظر ملامحها السعيده لفت عليه تنطق: نايف مافي احد الا احنا وين الناس !
ابتسم ينطق : المكان لك الليله مافي احد يشاركك فيه
بققت عيونها بدهشه تنطق : شلون يعني ؟!
ابتسم بوسع ثغره ينطق : حاجزه لك استمتعي واتركيني انا استمتع فيك
قوست شفايفها ودمعت عيونها وقربت له ترفع يدها تحتضنه دفنت وجها بعنقه تغمض عيونها اخذت نفس تملى حواسها بريحته ونطقت : الله يخليك لي يانايف
ابعدت تناظره ونطق بابتسامه عريضه مرسومه على وجهه : ويخليك لي ولايخلي حياتي من وجودك ، تبكين !
رفعت يدها تمسح دموعها ونطقت : ابكي بس صدقي ان دموعي هاذي حب وفرح مو شيء ثاني
مشى ياخذ كفها يجلسون على طاولتهم وحولهم الورد والشموع والبحر وابراج دبي : فكي عباتك مافي الا احنا
ابتسمت تنزل عبايتها خلف الكرسي وتنثر شعرها على اكتافها تترك الهواء يداعبه رفع شماغه لفوق واخذ صحنها يحط لها اكل وقدمه لها اخذت الصحن من يده تاكل منه وهي مليانه حبُ معه ....
<<بيت تركي >>
اعتلت ضحكات كنوز تناظره يعيش قصه غرام مع تركي ونطقت وسط ضحكات عاليه : عزام خلاص عاد زودتها
رفع راسه من كان يدغدغ تركي ببطنه و تنهد يقبله ونطق : ياساتر
ونطقت وسط ضحكتها: ذبحت الولد
ضحك ينطق : تكفين كنوز مو قادرر
ابتسمت تنطق : كلنا مو قادرين بس عاد الشكوى لله
عض شفته يناظر حجم تركي لف خلفه لجواله اللي كان يدق مد تركي لكنوز واخذ جواله يرد ونطق : هلا نصار
نصار : انزل انزل تحت انا عند الباب وجيب تركي معك
عزام : وش تبي فيه
نصار : اخلص ابيه
عزام : يلا اذلف جايك
وقف ونطقت كنوز : وين ؟
قرب لها ياخذ تركي من يدها ونطق : نصار تحت بروح له ويبي تركي
كنوز : لا عزام هواء برا يصير له شيء ولا يمرض
عزام : ماراح يمرض هاتيه
تنهدت تمده له ونطقت : انتبه عليه
هز براسه وتقدم يقبل خدها وطلع وتركي بحضنه أبتسم يشوف نصار نازل من السياره ويتقدم له ياخذ تركي من يده عض شفته مايقاومه وقبل خده اتسعت ابتسامة عزام وهو يناظر نصار ونطق : انت ماتستحي !
هز راسه بنفي ومشى يركب السياره ضحك عزام يتبعه وركب جنبه
نصار : لازم اتزوج انا
ضحك عزام ينطق وسط ضحكته: قايل لك اعجل
هز براسه ونطق : لازم لازم ابي كذا ورجع يقبله ومده لعزام وهو يحرك من عند البيت ....
انتهت من اكلها بعد سوالف سعيده مرت بينهم نزلت ملعقتها من انتهت من اكلها رفعت يدها تجمع خصلات شعرها المتطايره من الهواء وقف يسحب كرسيه جنبها ونطق : بالعافيه اولا ، ثانيا بخاطري اسالك عن سوال يدور ببالي واحتاج اجابته
عقدت حاجبينها تنطق : يعافيك ، اسال قول !
رجع ظهره على الكرسي ونطق: وش يذكرك تاريخ اليوم فيه !
شتت نظراتها تحاول تدور اجابه ونطقت : تاريخ اليوم ؟ ماادري صراحه
رفع حاجبينه ينطق: توقعت انه ماجاء على بالك
تقدمت له مو فاهمه شي ابدا ونطقت : مو قاعده افهمك !
هز براسه يقرب لها ويثبت عيونه عليها ونطق: اليوم تاريخ زواجنا ، زواجنا الاول ، زواج الانتقام ورغبة اخذ الثار من ماضي وحاضر زواج المصلحه زواج الخطط والمشاريع اللي انبنت على ظهري انا وياك واللي ماكنا نعرفها وكل اللي نعرفه وقتها انه رغبه انتقام منك لاجل قضيه اجبار عشتها معك تاريخ يشهد على موت اثنينا لاجل نرجع نحيا حياة جديده ليله تشهد على احتراقها وفوحان ريحتها من لهب كان يشب فيها وتدريجيا يوصل لي ويحرقني يشعل النار بجوف صدري ، ليلة عجز وقسوه وقنوط وقلة حيله اخذتك وانا وقتها مو قادره القط انفاسي وانتي حولي مكتوم من كثر الدخان اللي اشمه من نارك ، تسكر علينا باب ووقتها حسيت اني مقيد وعاجز افك قيدي
خايف من هالليله تدفعني ثمن حياه باكملها سودت حياتي وامتلت بالسواد والظلام ومالقيت نفسي الا انا طايح في غرامك ماقدرت اتقبل الفكره ولا حتى اعترف فيها لنفسي لاني بكل بساطه انا والاعتراف زي الشمس والقمر ماتلتقي
ومن حسيت اني على وشك افقدك خفت وانا ٣٠ سنه ماعشت الخوف ، اعترفت لاول مره من وعيت على وجه الدنيا ولا اخذت وقتها شيء من هالاعتراف انهزمت وكنتي اول هزائمي انحرق كبريائي بنارك وصرتي اخر امالي واخر احلامي واول حياتي ومنتهاها صبرت وعجزت انهي هالحب من جاني الرفض منك طلعت من مدينه بكبرها عشان انسى مادريت انك فيني وان روحك معلقه فيني اكتشفت وقتها اني جالس العب والف وادور ، شلون اهرب من روحي جزعت وكرهت الدنيا ومن عليها وكرهت نفسي وكرهت الحب وتمنيت الموت يزورني باي لحظه لين ماجاني اتصال غير حياتي كلها باللحظه وركضت لك و الدنيا مو قاعده تشيلني وقتها ، ومن سمعت احبك للمره الاولى منكً حسيت ان السواد والظلام اللي كنت فيه انمحى وتلونت دنيتي كلها رجعت احيا بعد ماكنت ميت ، كلمه وحده كانت كفيله بانها تغير حياتي كلها ، استبشرت واستهلت كل سنيني العجاف ، وتعلمت وقتها ان الحب قادر أنه يحوّل الصحاري القاحلة إلى جنان، ينبت الغصون والأوراق في الجذوع المَيّتة، يروي ظمأ كل عطشان ، قادر انه يغير البني ادم لاغرب نسخه من نفسه ، ويجمع اثنين مايتشابهون ابدا ويتركهم مع الوقت شبه بعضهم ، يمحي الاوهام لانها بكل بساطه مع الحب تكون مجرد كلمه معناها واسع بس على نفسها مو على المحبين ، ينهي المسافات لن بكل بساطه الخطوه قبل توصلين لها بتشوفيني سباق لها قبلك ، الحب يحقق المعجزات والدليل انه حقق حبنا جمع شمس وقمر في آن واحد ، الحب قوي باس وما ينغلب بس غلبنا ، عرفتي هالتاريخ ؟ التاريخ هذا خلاني اشوف الدنيا واعيشها واعيش عشانها ، التاريخ هذا خلاني احاربك ، واطيح فيك ، وارفضك ، وانهزم بك ، واهرب منك ، وارجع لك ، واقاومك ، وانتهي فيك ...
بلعت ريقها بتكرار من كل كلمه انقالت ومن كل حرف طلع منه وكانت تشهد على صدقه من عيونه غمضت عيونها ونزلت راسها بين كفوفها تنهار بدموعها من سمعت قصه كفاحه فيها شتت عيونه عنها يناظر كل شيء حولهم الا هي يسمع بكاها الشديد وقف لانه مايبي يمنعها من دموعها بهاللحظه مشى يناظر الشوراع والبحر ، رفعت راسها تناظره واقف ومعطيها ظهره عضت على شفتها تكتم بكيتها مسحت دموعها ووقفت بهدوء تمشي له وهي زعلانه بانها شلون ماتذكر هالتاريخ رفعت يدها لكتفه ولف بعيونه من حس بيدها على كتفه والتفت كله لها ، رفعت كفوفها تمسك دقنه وتنهمر كلها تقبله بكل شغف فيها بكل حب تعتذر له على جهلها التام بهالتاريخ واليوم ابعدت عن ثغره وهي سرحانه في تفاصيل وجهه ونطقت وانفها بالقرب من
انفه : أحبك أحبك أحبك أحبك أحبك أحبك أحبك أحبك اهخ نايف والله العظيم أحبك ، أحبك لدرجه اني اكرره كلمه أحبك انت اعظم من الحب نفسه انت ماتوصفك كلمه انت معجزه خلقها الله لي م ع ج ز ه فاهم علي ؟ اسف حبيبي والله اسف ، اسف اني ناسيه تاريخ خلق الله فيه معجزه لي اسف اني خليتك تعاني وتحس انك عاجز وحاير اسف لاني ماسمعتك "وانا احبك "من اول لحظه اعترفت فيها لي ، انا مو بس أحبك نايف انا اشوفك دنيا اشوفك وطن وامان اشوفك حنيه وراحه ورضى اشوفك شيء اكبر من الشعور نفسه انت كثير على كل شيء نايف كثير حتى قلبي انا وصلت لمرحله اشوفك كثير على قلب واحد انت يبي لك قلوب الامه ذي كلها عشان توسع حبك ،غمضت عيونها ترجع تقبله من جديد رفع يدينه لخلف عنقها يبادلها و انحنى يقبل عنقها ، نحرها ، عظام ترقوتها ويرجع يجدد تاريخ هاليوم بصوره حلوه ..."
<<<كوفي نهار الساعه ١١ مساءً >>>~~
وأقف وهي معه بالكوفي اللي كان خالي من كل الناس الا منهم التفتت من شاف كل شيء على اجمل مايكون ونطق لها : هاه شرايك يحتاج نعدل شيء بعد ولا خلاص !
ابعدت عن الطاوله اللي كانت سانده نفسها عليها تمشي له ونطقت : خيال كل شيء تمام
ابتسم يرفع يده على كتفها ويمشون حول الكوفي ونطق : بكره احتاجك معي تكونين هنا نتساعد لازم نقدم خدمه على كيف كيفك ويكون كل شيء مثل مايبون الزبائن واحسن وهالشيء لايمكن يكون الا اذا كنتي معي
ابتسمت تبان غمازتها ونطقت: بكون معك وبنشتغل سوا وبتتكلم كل الرياض عن كوفي نهار وحبه حبه بيكبر اسمعك وبنفتح فروع بكل الممكله وهذا كله بيكون واحنا مع بعض
ابتسم نهار بوسع ثغره يتقدم لها يقبل طرف ثغره
وابعد عنها يناظرها وصدت بعيونها عنه وهي تضحك وضحك نهار ينطق وسط ضحكته : كوب ماتشا يالحياويه ؟
عضت على شفتها ترجع تناظره ونطقت : ماقول لا
ابعد عنها مستمر في ضحكته يمشي يطلع كوبين وياخذ الماتشا يخفقها بالصحن ويملي الاكواب حليب وثلج رفع عيونه يناظرها ماسكه شفتها السفليه وتناظره ضحك نهار وهو يصب الماتشا بالاكواب وياخذها ويمشي للبيانو ورفع حاجبه ياشر لها تجيه مشت له ونطق نهار : هالمره علي
ضحكت تنطق بنبره ساخره منه : ماشاءالله صرت تنافسني !
غمز لها بعيونه ونطق :تتحدين مااسكر عليك
هزت براسها تتحداه ، مد لها الماتشا والضحكه تملي ثغره وجلس على الكرسي ورفع يده على البيانو ينطق : اجل اسمعي
ابتسمت بخفه تسمع عزفه وماتنكر انه صابها نوع من الاعجاب غمضت عيونها تدخل عالم من احساسه رجعت تناظره وتشرب من الماتشا اللي بيدها انتهى يرفع يده ونطقت : صراحه واوووووو
رفع حاجبه باعجاب من نفسه ونطق : قايل لك بصك عليك
ضحكت تسحب كرسي وتجلس جنبه يعزفون على البيانو بموسيقى جديده ...."
~<<دبي امام المطعم >>~
ماسكه الورد اللي اعطاها ياه وسانده ظهرها على باب السياره وهو جنبها يدخن نفث دخانه
ولف عليها ينطق: الماخذ عقلك يتهنى به
انتبهت عليه تلف له وتنطق : هني نفسك
ضحك يرجع زقارته بثغره ورفع عيونه يناظر البحر امامه ورفع يده يناظر ساعته واللي كانت تشير لساعه ١٢ ونص رفع يده لشماغه ينزله من على راسه ويفتح السياره يدخله بعثر شعره بيده ونطق : تعالي
عقدت حاجبينها تنطق : وين نروح !
مسك يدها يقطعون الشارع و يمشون للبحر ونطق : وش تشوفين !
لفت تناظر البحر حولها ونطقت : بحر
سكت يمشون للسفن والقوارب وشدت على كفه تنطق : نايف !
لف عليها ينطق : بنركب ماتبين !
ابتسمت بخفه تنطق: انوو ابي بس الوقت تاخر الحين
نايف : لاتاخر ولا شيء يلا
ضحكت تمشي خلفه يدخلون داخل الميناء وفلت يدها يكلم الرجال المسؤول عن القوارب والسفن والتفت عليها يناديها ورمشت عيونها بذهول تمشي له من نادها ركب القارب قبلها ومد يده ينطق : هات يدك وشوي شوي
مدت يد واليد الثانيه تضم الورد فيها تمسكت بيده ونطقت : لا اطيح
رفعها يدخلها القارب معه ونطق : ماراح يصير لك شي وانا معك
ابتسمت تنطق : ادري والله
واعتلت ضحكتها تنطق : انت اللي بتبحر فينا ؟!
ضحك يهز براسه وينطق : اي ليه طايح من عينك ؟!
رفعت حاجبها تنطق : تفضل نشوفك
ابتسم نايف يناظر فرحتها اللي مو قادره تخفيها وابتسامتها الواسعه واللي تدريجيا تنقلب لضحكات عاليه توصل احساسه له مشت له وحرك نايف القارب يبحر فيهم ونطقت : منت بهين والله
غمز لها بعيونه ينطق : افا عليك ازهليني
مشت تفسخ عبايتها وطرحتها وتنثر شعرها على اكتافها اخذت نفس هيام تتأمل الموج وصوت البحر وهدوء المكان والهواء اللي يداعب طرف فستانها التايقر تمسكت بالقارب ترجع راسها مليانه حب مو قادره تعبر عنه لفت من وقف القارب ومشى لها يحضنها من الخلف ضحكت تنطق : الجو خيالي نايف
همهم لها يوافقها الراي رفعت كفوفها تمسك ذراعينه اللي حاضنتها
ونطق : توفقنا بالوقت
ابتسمت تهز براسها وتنطق : نايف وش انا بدونك ودي اعرف !
قبل كتفها المكشوف ينطق : كامله والكمال لله بس انتي مو ناقصه عشان
تكملين فيني ."
لفت براسها عليه تقبل عنقه بخفه ابعدت تنطق: كل شيء هين مرن سعيد مريح مليان حب مليان سعاده حبك متفجر فيني لابعد حد تدري لاي درجه ! لدرجة اني مو قادره افهم سعادتي واعبر عنها
ابتسم يقبل ثغرها وضحكت تناظره ورجع يقبلها وسط ضحكاتها ورفعت ذراعينها لشعره وعنقه وتمسكت بظهره تقبله وحط يدينه يحاوط ظهرها وابتعد عنها يحط جبينه على جبينها وينطق : دايمه سعادتك ياكل حياتي
ابعدت عنه تجلس وجلس جنبها يولع زقارته ونطق : اي وش صار لك في غيابي ؟
ابتسمت تحرك يدها بمويه البحر ونطقت : من قال لك غبت ؟
رفع حاجبه ينطق وزقارته تتوسط ثغره : نعدلها لك وش سويتي باليومين الماضيه ؟
هزت راسها من عدل صيغة سؤاله وهي تحكي له وش صار بهاليومين لف يعطي البحر ظهره تتوسط يده زقارته وعينه عليها نفث دخانه ورمى نهايه زقارته بالبحر وانحنى لها يقبل عنقها وغمضت عيونها من قطع كلامها ورجعت بظهرها على اسوار القارب من انهمر عليها دفعه وحده مو قادر يتمالك نفسه من ليله امس وهي ملاحظه اندفاعه الشديد تجاهها عضت شفتها تشعر بقبلاته تتكرر على عنقها صوت الحب مسيطر على هالليله بشكل عجيب اختلفت اليالي بس مااختلف التاريخ تغيرت النفوس والمشاعر واستقر الحب بجوفها ، وكل واحد فيهم يتنافس مين يحب الثاني اكثر ، الحب عالي وواضح ومطمئن ولا يعرف التردد بينهم ، صوت يشبه الربيع حيّ وحر لا حيرة فيه ولا تساؤل ، مندفع مو قادر يحكم الكم الهائل من المشاعر المتفجره بصدره لدرجه انه مو قادر يستوعب انهم حاليا يتوسطون البحر افكاره فيها مو سامحه له يستوعب زمانه ومكانه كل اللي يبيه هي فقط غيرها عليه السلام ، اجراس الحب والعشق والهيام تقرع طول هالليله رافضه الاستقرار ، وهالليله كانت تشهد ان صدورهم تشع بالحب والانسجام ابعد عنها ينطق : انا داري اني ماني طبيعي اليوم
هزت راسها بنفي تنطق : كل شيء منك عسل على قلبي
رفع راسه يمسح على وجهه وشعره يحاول يثبت نفسه وقف على حيله يناظر البحر الساكن يكره نفسه من يكون كذا بس كل هذا يرجع لها هي السبب الاول والاخير في قلة هالثبات كلها بلع ريقه بتكرار ووقفت تاخد الورد اللي جنبها وتناظره معطيها ظهره تعرف انه مايحب يضعف بالطريقه ذي وتعرف بعد انه يحب يحكم نفسه مو نفسه إللي تحكمه ابتسمت ونزلت يدها تسحب الشريطه اللي تحتضن الورد تحرره اخذته ترتبه من جديد وهالمره ورد احمر ماتنكر انها صابها اعجاب للون بس برضو مايحل مكان الابيض ابدا ونطقت وسط انشغاله
بالورد : لاتتعب عمرك بالتفكير والتساؤلات مالك مفر مني نايف
ابتسم والتفت يناظرها ويناظر التفاصيل اللي كانت سبب في هالاندفاع كله فستانها التايقر اللي يكشف اغلب مفاتنها ظهرها صدرها اكتافها والهواء اللي كاشف نص ساقها وشعرها الاسود المتناثر على اكتافها للورد اللي يتوسط يدها للبحر المستقر خلفها ضحك يهمس لنفسه : وتبي الثبات عز الله انك تبطي عظم
طلع جواله من جيبه مايقاوم المنظر ياخذ لها صوره دون علمها طال وقوفه عند لحظه تستحق الوقوف تستحق التامل واخذ صوره تخلد بتاريخ اليوم اللي سبق وكان تاريخ موتته بهالدنيا واليوم يشهد لنفسه انه هالتاريخ كان بدايه حياه جديده له يملها الراحه والحب والسعاده تغير وتحول وتبدل حاله لافضل حال وكل هذا يرجع لها مشى لها يرفع ورده من الورد اللي امامها ورفعت تناظره
ونطقت : شفيك !
رفع حاجبه ينطق: مدري وش فيني ؟؟
ابتسمت تاخذ الورد الفاصل بينهم كله لبين يدينها وترفع ذراعه تدخل تحتها وتنزل الورد على صدره تنهد نايف يرفع خصلات شعرها ويغرس الورده اللي بيده فوق اذنها ابتسمت بوسع ثغرها ترفع يدها للورده المستقره فوق اذنها وبين شعرها ونطقت : عطني قصيده نايف
شد على خصرها ونطق بهدوء نبرته : فدوتك مافات من الايام واللي عاد جايه يا بعد عمر مخاسيره معك عندي غنيمه
انتِ الفارع بقد وجد واسماء وكنايه من عشق مثلك يجوز من الهوى
وشداد ريمه
ليه لا وانتي بحسنك لذوات الحين آیه لا ذهب لا ماس لا ياقوت لا احجار كريمه....."
ابتسم يشوفها تحرك اناملها على أزرار ثوبه ورجع انظاره للبحر ..."
<<<بيت فيصل قبل الفجر >>>
فتحت دولاب ملابسها تقلب فيه وتطلع شيء تلبسه للجامعه اخدت كم لبسه بيدها ومشت لجود تنطق : جوجو اي احلى من هذولا ؟
نزلت جوالها جود تلف عليها ونطقت : ليش كلها نفس اللون !
ميلت شفايفها شروق تنطق : احبه وملابسي كلها نفس اللون معلينا وش البس منها لبكره اووف البرزنتيشن ذا قروشني
وقفت جود تاخذ الملابس من يدها تناظرها ونطقت : شوفي اللبسي شيء رسمي
واخذت طقم بنطلون وجاكيت رسمي وردي وبدي حرير ابيض
ونطقت : هذا مره حلو سوي شعرك ستريت بيطلع مره خيال عليك
لفت شروق تناظر اللبس ونطقت : اي زين مره حلو
هزت براسها جود ترجع لسرير ونطقت شروق : اسمعي انا بروح لفهد اوريه البرزنتيشن اذا في شيء يعدله لي شوي وبجيك
بلعت ريقها من الطاري واخذت شروق الاوراق تطلع برا الغرفه لغرفه فهد دقت الباب تدخل عنده رفع عيونه لها ونطق : هاه بشري !
مشت تجلس قدامه ونطقت : امسك شوف
اخذ الورقه من يدها يقراها وهي تناظره تترقب ردة فعله ونطق من انتهى من قراءتها : شوفي تمام عليك بس عندك مشكله صغيره في الخاتمه
تاففت تنطق : يالله يافهد هاذي عاشر مره اعيده ومانمت من امس وانا اكتب واعيد وازيد فيها
لف ياخذ القلم من على الطاوله اللي جنبه وهو يعدل لها الخاتمه ونطق : امسكي خلاص كذا تمام يلا اقريها اشوفك
اخذت الورقه من يده ونطق فهد : يلا قومي وقفي وكانك الحين قدام الدكتوره والطلاب قدامك
وقفت قدامه ورجع ظهره على السرير يناظرها وهي تقرا قدامه ويعدل لها كل ماحس ان عندها غلط ونطقت من انتهت : هاه تمام كذا !
هز براسه ينطق : اي كفو عليك كذا تمام وزي ماقلت لك لا تقرين من الورقه كثير انسي منها بس اهم شيء اعرفي الاساسيات ومعليك الدرجه بالجيب
ابتسمت تنطق وسط ابتسامتها: زين يلا مشكور ياولد كندا استفدت من دراستك
ضحك يناظرها ونطق : العفو هاه لاشوفك ناقصه حتى الربع
غمزت له بعيونها تنطق : افا عليك ازهلني يلا بروح البنت تنتظرني
تلاشت ابتسامته ونطق : مانامت !
التقت شروق تنطق : لا للحين كنا نسولف مع ون ...... لحظه لحظه انا الحين ليش قاعدة اقول لك وبعدين انت ليش تسال عنها ؟!!
بلل شفايفه ينطق بوهقه : ولا شيء خلاص اذلفي سكري الباب وراك
ميلت شفايفها تناظره ونطقت : مااقتنعت بس يلا طلعت من الغرفه ترجع غرفتها دخلت تسكر الباب خلفها وتدخل لجود حطت اوراقها على الطاوله ونطقت جود بتساؤل: وش قال لك ؟
شروق : البرزنتيشن!؟؟
هزت براسها جود و نطقت شروق : يقول تمام وعدل لي كم شغله وان شاء الله الدرجه كامله
صدت بعيونها عنها تناظر حولها وبللت شفايفها ماتدري هي ليش قاعده تسال من الاساس والتفتت تناظر شروق من نطقت : وسالني عنك بعد
خفق داخلها واحمرت ملامح وجها تنطق : عني !
هزت براسها شروق تمشي لها وتنطق من جلست بالقرب منها : مستغرب آنك ليش للحين مانمتي ؟
شدت بيدها على المفرش ونزلت انظاره شروق لنحرها اللي بدا يتغير لونه ونطقت بضحكه : شوفي اخوي واعرفه لاصار في خاطره شيء بس خذي راحتك ماراح اقول شيء ابتسمت تقوم من مكانه ترتب اغراضها لدوامها
عضت على شفتها تكتم دموعها وتسيطر على خوفها الشديد وخصوصا بعد كلام شروق وانها فاهمه كل اللي صاير بينهم رجعت ظهرها تنسدح وتكتم وجها بالمخده لاجل ماتسمعها شروق لكن هيهات انفجرت تبكي بصوت مسموع التفت شروق بخوف تمشي لها ونطقت : بسم الله عليك شفيك ؟!
رفعت كفوفها لوجها وجلست شروق جنبها تنطق : يمه جود شفيك ؟!
هزت راسها بنفي ترفض فكره ان فيها شيء مسكت كفوفها
شروق تنطق : جود والله مو قصدي اسمعيني جود !
قامت تبعد عن شروق تركض للحمام - تكرمون - دخلت تنهار بدموعها وركضت خلفها شروق تدق الباب وماكانت تسمع ردها وكل اللي
قاعده تسمعه صوت شهقاتها .."
رفع يده لثغره من كان يثاوب ونزل انظاره عليها من كانت نايمه بحضنه رفع انظاره يناظر طلوع الفجرعليهم ونطق يصحيها : هيام بنت !
تحركت بانزعاج ورجع يناديها لين قامت ووقف يشغل القارب يرجعون بعد ليله طويله عاشوها بنص البحر ...
وقف القارب ورفع ثوبه من تحت يطلع منه ويطلعها معه وضحك يناظرها دايخه ونطق : خلاص تحملي
مسكت ذراعه من حست انها مو قادره تمشي من كثر نعاسها ابتسم
ونطق : خليك هنا بجيب السياره وبجيك
هزت براسها ومشى يقطع الشارع لسيارته ركب يمشي لها ومشت تركب معه ومشى نايف للفندق ومن وصلو نزلو يدخلون ويطلعون غرفتهم ونطق من دخلو : صلي قبل تنامين
هزت براسها ومشت تنزل عبايتها وطرحتها تاخذ ملابسها وتدخل الحمام تغير ملابسها وتمسح مكياجها سكرت ازرار بجامتها وطلعت تصلي وترمي نفسها تنام على صدره ....
~~يوم الخميس تمايم تركي ولد عزام ~~
وصلو كلهم لبيت تركي من امتلى بالناس اجتمعو العيال كلهم عند الباب يستقبلون الضيوف والناس اللي جاين لاجل عزام وفرحته بقدوم طفله
اجتمعو بالمجلس ولف تركي لسعود ينطق : قوم صب القهوه لرجال وش عندك جالس ؟
لف يناظر نهار وينطق : قوم ساعدني
ميل شفايفه نهار ونطق : قم انت ماتعرف تسوي شيء وحدك لازم الخلق كلهم يساعدونك قهوه ترا استح على وجهك
ولف نايف ينطق لسعود من كان جنب نهار : قوم انا بصب معك
سعود : حي عينك يازوج اختي الله ياخذ اختيارات وضيح عمري ماستفدت منها
وغرز نهار كوعه ببطن سعود وتاوه بالالم من كوع نهار
ضحك نايف ونطق وسط ضحكته: حي نباك يلا قم
وقف نايف ومشى سعود جنبه ينطق بهدوء: اشكر هيام على هالاختيار ياشيخ
تنحنح نايف ينطق : اشكرك انت لكن اخفض صوتك لو سمحت
ضحك سعود ينطق: مسوي الرجل الغيور ترا اختي بعد محد سمع لاتخاف
ابتسم بطرف ثغره واخذو دلال القهوه يصبون لرجال اللي يملون المجلس .."
ابتسمت كنوز تناظر البنات متجمعين على تركي ونطقت
فاطمه : بنات الولد انكتم
شهقت ضحى تشوف تركي بيد شروق ونطقت : خير انا ابي بعد هاتيه
شروق : تخسين ماتاخذينه ماصدقت اخذه من يد اختك
ميلت شفايفها تنطق : زهر وين ؟!
ضحكت هيام تنطق : وراك مع ايمان
مشت ضحى تجلس جنب ايمان وتمسك كف زهر من كانت نايمه
على كتف ايمان ونطقت بضحكه : هيام مااذكر متى اخر مره شفت عيون زهر مفتوحه اربع وعشرين ساعة نايمه
ضحكو اللي بالمجلس كلهم ونطقت هيام بهدوء : وجع ياضحى خيرر قولي ماشاءالله انا اوريك
ضحى : ماشاءالله ماشاءالله
وقامو البنات يصبون القهوه ويوزعون الحلويات بهالمناسبة السعيده عليهم ولفت هيام تشوف بكاء زهر ونطقت : حسبي الله على عدوك ياضحى
ضحكت ضحى تنطق : يمه والله ان عيوني بارده
شروق : اي واضح ماشاءالله
مشت هيام تاخذ زهر وتطلع بالممر وتحاول تسكتها : بس ياماما بسس ولفت على طلوع جود من المجلس والواضح انها مخنوقه ونطقت لها : تعالي جود تعالي
مشت جود خلفها وطلعو لغرفه هيام ونزلت هيام زهر على السرير ونطقت لجود من كانت عند الباب واقفه : تعالي اجلسي شوي بس بسوي لزهر رضعتها
هزت براسها تدخل تجلس جنب زهر وابتسمت هيام تناظرها تسولف مع زهر ومشت هيام تاخذ زهر ترضعها ونطقت لجود : اي وش صار معك !
بللت شفايفها جود وصدت بعيونها عنها وكررت سوالها هيام : قولي جود اسمعك افا تستحين مني !
لفت جود تناظرها ونطقت بهدوء نبرتها : ينتظر مني رد
رفعت حاجبها هيام تنطق بذهول: رد !! رد ايش !
جمعت كفوفها جود ببعضها ونطقت: شعوري تجاهه وقال انه بيكلم سند يخطبني بس يبي يسمع ردي قبل
انصدمت هيام وهي تنطق : متى صار كل هذا ؟
تنهدت جود بضيق تسرد لها كل اللي صار بينهم ونطقت هيام: اي وانتي وش ردك ؟ تبينه !
اختفت ملامح وجها وتنهدت هيام من لمحت موج عيونها نزلت زهر على السرير وتقدمت تمسك كفوف جود وتنطق : جود حبيبي انتي اسمعيني لفت جود تناظرها وكملت كلامها هيام : شوفي انتي مصير نصيبك يجي سوا الحين ولا بعد ميه سنه وفهد مو ناقصه شيء انسان واعي ودارس وفاهم خليك من الكلام هذا كله انتي تبينه ؟
شدت على كفوفها ونطقت بصعوبة بالغه : ماادري هيام كل شيء ملخبط فيني
عضت على شفتها هيام من حضنتها جود شدت عليها وهي تمسح على شعرها ونطقت هيام: جود اسمعيني انا معك بس قولي لي انتي تبين فهد ولا لا !
ابعدت عنها تناظرها ونطقت وسط دموعها وحيره شديده تعيشها : حتى لو ابيه للحين انا صغيره ووضعي مايسمح تعرفين الحاله اللي انا اعاني منها والرهاب اللي فيني من كل اللي حولي
هيام : شوفي الرهاب اللي فيك مو عائق لك ابدا وانا متاكده ان فهد عنده علم واذا على عمرك عادي ياكثر البنات اللي تزوجو وهم للحين يدرسون وبعدين انتي هاذي اخر سنه لك وبعدها داخله الجامعه انتي فكري بالموضوع وخذي راحتك لاتستعجلين ابدا وانا معك باي قرار تاخذينه
رفعت يدها تمسح دموعها ونطقت : وسند اخوي ؟
عقدت حاجبينه هيام تنطق : شفيه !
تنهدت جود تنطق وسط تنهيده طويله : ماراح يوافق
ميلت شفايفها هيام تنطق : الحين انتي خلي عنك سند فكري بنفسك .."
<<~الساعه ٢ ونص تقريبا >>,,
ميلت شفايفها تناظر وجها بالمرايا وكل تفكيرها بجود وفهد لفت تناظره تشوفه سادح جنب زهر ويضحك معها ونطقت له : نايف
همهم لها ومشت تجلس بالطرف الثاني لسرير ونطقت : بقولك شيء
رفع راسه لها ينطق : قولي
اعتدلت بجلستها تنطق : بس توعدني ماتعصب
رفع حاجبينه ينطق : مااعصب ؟! وش عندك !
ميلت شفايفها وهي حست انها بدات تندم بس بنفس الوقت بتنفجر
لو ماتقول له : فهد يبي يتزوج
بقق عيونه يناظرها بعدم فهم: فهد مين !
تاففت تنطق: وش اللي مين فهد اخوك
هز براسه ينطق : ماشاءالله وانتي وش عرفك بكل هذا هو اللي قال لك ؟
هزت راسها بنفي تنطق : ماقال لي
رفع حاجبه ينطق : وش عرفك اجل ؟
تنهدت من حست انه بدا يصعبها : عرفت وخلاص الحين ماتبي تعرف مين بياخذ ؟
هز راسه بايجاب وينطق : مين بياخذ !
بلعت ريقها تترقب ملامح وجهه: جود اخت سند
تغيرت ملامحه وجهه بصدمه ينطق : تستهبلين !
تقدمت له ونطقت: نايف شفيك عادي وش فيك يبيها وبيتزوجها واذا على ان البنت صغيره عادي حتى ضحى اختي اخذت نهار وهي توها دخلت الجامعه
غمض عيونه من فار دمه ونطق : مو نفس الشيء
تاففت تنطق بغيض منه : نايف سند متزوج وعنده حياه غير جود بيجلس كل ماراح مكان حط جود عندكم مو منطق لو انها متزوجة فهد من زمان مو افضل كلم سند نايف بيفهم منك
بقق عيونه ينطق : انتي منجدك تراني مو قادر افهمك تبين اروح اقول لسند زوج اختك لفهد اخوي احسن وافضل من انك تجيبها عند اهلي كل مارحت مكان ؟
مسكت على وجها من عجزت تماما تتناقش معه ونطقت : انا قلت كذا ؟
نايف : مدري عنك وش تبين اقول لسند ؟
اخذت نفس عميق تنطق وسطه : ان فهد يبي يتزوج اخته
رفع حاجبه ينطق بذهول منها : ماشاءالله عليك شلون يعني وفهد ماعنده لسان يتكلم !
وقفت تنطق بانفعال منه ومن طريقه كلامه : انا حماره من قال لي اقولك الكلام معك ضايع اخذت زهر وهي تطلع وتسمعه يتكلم من خلفها تاففت تنطق
لنفسها: ليش تقولين له اووف هيام خربتي كل شيء اوووف
نزلت تجلس بالصالة اخذت جوالها تقلب فيه بضيق يجتاحها وماحست الا هو ساحب الجوال من يدها ويجلس على الطاوله قدامها صدت بعيونها عنه ورفع يده لدقنها يلف وجها له ونطق : اول شيء اذا جيت اتكلم معك لاتعطيني ظهرك وتمشين لين اخلص كلامي ، ثاني شيء انا ماني ضد اخوي واعرف ان فهد رجال فاهم وعاقل وقادر انه يفتح بيت ماعندي شك ابدا فيه
تنهدت بضيق منه ونطقت : ترفع صوتك علي وتبيني اوقف اسمعك ؟ تعقب اسويها
تنهد ينطق وسط تنهيدة طويلة طلعت منه : نعتذر منك بس الكلام اللي سمعته منك اجبرني انفعل
سكتت تشتت انظارها ومسك كفها ينطق : تبين اكلم سند ؟ رفع يده ياشر على خشمه ويكمل كلامه : ابشري على خشمي بس قبل كل هذا ابيك تقولين لي من وين عرفتي وايش اللي صار بالضبط
بللت شفايفها ونطقت: مو لازم تعرف نايف
مسح على شاربه وهو يرجع ينطق لها : عشان اقدر اتصرف قولي
ميلت راسها بعدم رغبه بانها تقول له حرف واحد يخص هالموضوع بالذات ونطقت من كان يصر عليها بنظراته : مقدر اقولك لك وش صار بالضبط بس عرفت من جود وخلصنا
زفر يحاول يخفف من عصبيته ونطق : تكلمي هيام
وقفت بتمشي ومسك يدها يمنعها تقوم ورجع يجلسها قدامه ونطقت : نايف مابي اقول خلاص لاتضغط علي البنت وثقت فيني وقالت لي ماني قايله لك انتهينا
هز براسه ونطق : زين روحي
اخذت زهر بين يدينها وهي تطلع الغرفه مشت تنزل زهر بسريرها وتمشي تغير ملابسها وتمسح مكياجها رفعت شعرها تشد الروب على جسدها انتهت وطلعت تشوفه سادح قفلت الابجوره ومشت تنسدح وتنام ....."
<<<قبل الفجر بساعه >>>
وافقه تتمايل على عزفه وضحكت بعلو صوتها وضحك نهار معها ينطق : يلا تعالي دورك
مشت تجلس قدام اله البيانو الكهربائية وهي تفكر باغنيه ونطقت : قوم ارقص لي طيب
ضحك نهار بعلو صوته ينطق : تستهبلين!
رفعت حاجبها تنطق : وش استهبل لي ساعه وانا ارقص يلا دورك
وقف ينطق بضحكه : يلا بس اعزفي لنا شيء مصري
ضحكت بحماس تنطق : يلاااا يلااا
وقف قدامها ورفعت يدها تعزف عزف على اغنيه مصريه ضحكت تملي ارجاء الغرفه بضحكتها وضحك نهار وهو يرقص لها واختل توازنه وشهقت من دق باب الغرفه فصل فيش البيانو وبلع ريقه من كان فيصل يدق الباب
ونطق : حسبي الله على شيطانك ياوضيح ابوي بيلعن خيري
عضت على شفتها بخوف تنطق : روح روح افتح بيكسر الباب على راسك وعلى راسي معك
مشى يفتح الباب ونطق فيصل : اشهد بالله انك قليل حياء وعليك قل صح
ميل شفايفه نهار ونطق : وش انا مسوي ؟
ومد يده فيصل يمسكه مع اذنه ونطق : الناس باخر الليل تقوم تصلي وتطلب الله يوفقها ويستر عليها وانت قالب لي البيت مرقص
غمض عيونه نهار ينطق بهدوء نبرته: مرقص ! اول شيء يبه الله يخليك لي ماعاد احد يقول مرقص ثاني شيء مو حرام عليك تفشلني قدام زوجتي ساحبني مع اذني وانا رجال طول بعرض قدامك
شد على اذنه فيصل ينطق بغضب : واكسر راسك بعد
هز راسه ينطق بقلة حيله: معليه تمون
فيصل : شوف نهار انت رجال تبي تنضبط ولا والل....
قطع كلامه نهار ينطق : فكنا بالله بنضبط خلاص بس فك اذني بتخلعني لو ادخل عليها باذن وحده
ابعد عنه فيصل ينطق : البس والحقني على المسجد بسرعه
نزل انظاره لساعته ينطق : يبه باقي نص ساعة على الاذان
مشى فيصل ينطق : لاعيد كلامي نهار ترا قلبي مو راضي عليك خليني اوصل وانت مو وراي
تنهد نهار ونطق : جايك جايك
رجع يدخل الغرفه ونطق من شافها خلف الباب تسمع كل هالحوار : حسبي الله ملقوفه انتي وش حاشر اذنك بالباب ؟!
ضربته على كتفه تنطق : انكتم وتعال اشوف اذنك
رفع يده يغطي عليها ونطق : مافيها شيء
ضحكت تشوف اذنه حمراء ونطقت : ياعمري كيف لو انه شايفك وانت ترقص مصري من شوي
ضحك نهار ينطق : كان صلو علي مع الفجر
ضحكت وهي تضربه على صدره وتنطق : بسم الله عليك
ابتسم نهار ينطق : تخافين علي وضيحي ؟
ابتسمت تنطق وسط ابتسامتها ووضوح غمازاتها : اي اخاف ماعاد القى رقاصه ترقص لي اخر الليول
اعتلت ضحكات نهار وضحكت معه ورفعت يدها تضرب كفها بكفه
ونطق : حيوانه
شهق وهو يركض لدولابه ينطق : انا اليوم ميت مافيها كلام بدخل اوضى طلعي لي ثوب
ضحى : كلب فجعتني وبعدين مابيمديك تلبس اكيد عمي وصل المسجد
انتهى من وضوءه وطلع يركض : تستهبلين تبين اروح بشورت
مشت تنسدح ونطقت : طلع لك انت ثوب وش دراني انا كلهم سوا
ركض لدولاب ياخذ ثوب يلبسه ونطق : انا اوريك انا استاهل من قال لي اخذ وحده داشره
شهقت ترمي المخده عليه ونطقت : نعم نعمممم منت بقاعد يالرقاصه
ضحك من كلمتها وهو يمشي لها يقبل ثغرها ونطق من ابعد عنها : احلى داشره بالدنيا وطلع يركض من الغرفه
ضحكت تنطق : مريض صدق ...."
<<<بيت سند >>>
قامت بعد ماشافت الشمس تخترق الغرفه مسحت على وجها ولفت تشوفه نايم قامت وهي تدخل الحمام خلصت وطلعت مشت ترفع نص شعرها وتطلع من الغرفه دخلت المطبخ تسوي لهم فطور ولفت من شافت جود داخله عليها ونطقت ايمان بخوف : شفيك جود ليش عيونك كذا !
مسحت على وجها وهي تاخد كوب تصب لها مويه ونطقت : مافيني شيء بس مانمت امس
هزت براسها ايمان تنطق : اكيد انه نوم مو شيء ثاني ؟
همهمت لها تاكد كلامها ونطقت ايمان: زين ان اليوم جمعه مافي دوام
هزت براسها جود ونطقت : سند ماقام ؟
ابتسمت ايمان تنطق : لا للحين تعالي ساعدينى
ابتسمت لها جود تبادلها الابتسامه ومشت تساعدها يلخصون فطورهم اخذت جود الاكل تحطه على الطاوله ونطقت جود : يلا روحي قومي سند
هزت براسها ايمان تمشي لغرفتهم تقومه ورجعت لجود بالصاله وكم دقيقه وطلع لهم سند ابتسم يناظرهم ومشى يجلس بينهم ونطق : لالااا وش
الحركات ذي
ابتسمت جود تنطق : هاذي ايمان
لف على ايمان يناظرها بنص عيونه : توي ادري آنك تعرفين تطبخين ؟
ابتسمت تنطق : مواهب جديده توي حتى انا اكتشفها
ضحك سند ونطق : طلعت بالوقت المناسب
ضحكت تهز براسها واخذت اكوابهم تصب لهم شاهي وهي تسمع ضحكاتهم وماينكر سند ابدا ان وجودها واضح بينهم ومستبشر كل خير في ايمان ابتسم يشوف ضحكات جود وسوالفها مع ايمان ويشوف ايمان كيف تعملها مع جود طول عمره كان خايف من فكره انه يتزوج يوم من الايام بس اليوم انتهت كل مخاوفه ابتسم فعلا ابتسم من قلبه و براحه يحس فيها ويعيشها ...."
<<<بيت تركي قبل الظهر>>>>
ابتسمت وهي ترفع عيونها من على كتابها له تشوف ضحكاته مع تركي وسوالفه معه رجعت انظاره لكتابها تكمله وسرعان مارفعت عيونها من سمعت الباب يدق ونطق عزام : هاذي امي
هزت براسها تنطق : افتح لها
وقف وتركي بيده يفتح الباب لها وعضت شفتها فاطمه من شافت تركي بيده ضحك عزام ونطق : لاتقولين شيء والله اني ميت مو قادر ليش محد قال لي ان شعور الابوه كذا ؟!
ضحكت فاطمه تنطق : حتى لو قلت لك ماراح تحس فيه لين تجربه والله رزقك وقدر انك تعيشه مو بس تسمع عنه
تنهد يحمد ربي على هالشعور اللي يشعر فيه وابتسمت فاطمه بوسع ثغرها ونطقت : كنوز صاحيه ؟
هز براسه ونطق : ادخلي
مشت تدخل وأبتسمت كنوز تسكر كتابها من شافتها ومشت فاطمه تجلس قدامها ونطقت بضحكه : حتى وانتي نفاس الكتب ما تنزل من يدك وش هالام المثقفه !
ضحكت كنوز وابتسم عزام ودخلت الشغاله بالصحن تحطه قدام كنوز
ونطقت فاطمه : شوفي هاذي اكله كانت امي الله يرحمها تسويها لي من ولدت بعزام والله قدر اني اسويها لك الحين
ابتسمت كنوز تشوف حنيه فاطمه عليها ونطقت : ماتقصرين ليش تتعبين نفسك !
فاطمه : تعبك راحه يلا كلي شوفي انتي ماراح تتقبلين طعمها بس صحتك اهم من طعمها
غمض عيونه عزام من فتحت فاطمه الحافظه وداهمته الريحه ونطق : هذا ووشو هذا ؟!
ضحكت فاطمه تشوف وجهه كنوز وعقدت حاجب عزام ونطقت : اكل حريم وش عليك انت
ضحك ينطق وسط ضحكته: وش اكل حريم ؟
ونطقت فاطمه بضحكه: مالك فيها عزام
هز براسه ينطق : زين خلاص بسكت
لف يناظر كنوز وملامح وجها ونطق بضحكه: هذا اكل الحريم البنت بترجع
ضحكت فاطمه تنطق : معليك منه
لفت كنوز تناظره وضحك ينطق : ودي انقذك صراحه
كنوز : تكفين ياخاله مقدر
انفجر عزام يضحك ونطقت فاطمه بضحكه من ضحكته : يابنتي وش عليك من الطعم تبين العافيه انتي ؟
هزت براسها تنطق : اكيد اني ابي العافيه
فاطمه : اجل كلي وانت ياعزام انا اوريك عشان ثاني مره ياتكون محضر خير ياتنطم
هز براسه يسكت وهو يترقب ملامح وجه كنوز من اكلت ونزل انظاره لتركي اللي على صدره ينطق له : امك تحتاج فزعه تكفى ياتركي تفاهم مع جدتك
وقفت فاطمه تاخذ ملعقه وتتوجه لعزام ونطقت : افتح حلقك
بقق عيونه ينطق : وش دخلني انا !!
فاطمه : بسرعه
عزام : يمه شفيك توك تقولين اكل حريم
فاطمه : افتح اقول وانت ساكت بسرعه
ضحكت كنوز وهي تقوم تاخذ تركي من يده ونطق لها : انتو منجدكم خير وخالقي م.....
قطعت كلامه فاطمه تنطق: لاتحلف بتاكله وانت ماتشوف الدرب بعد
وتقدمت تجلس جنبه على الكنبه ونطق لكنوز : كنوز الحقي علي خير مو منطق وش دخلني انا انتي الوالده مو انا يكون بعلمك يعني
رفعت يدها فاطمه تمسك فكه وتدخل الملعقه بفمه وركض للحمام من حس انه بيستفرغ ضحكت كنوز وفاطمه معها ونطقت : اي مايبي لك الا كذا
طلع من الحمام على ضحكاتهم ونطق: حرام عليك يمه وش هذا اللي سويتيه فيني ؟! ولف على كنوز ينطق : وانتي عادي عندك اكلتيه ؟
فاطمه: عادي يمه الحياه تجارب شارك كنوز تعبها
رفع حاجبه ينطق: وش دخل امانه ؟؟
كنوز : لها معنى عندها
ضحكت فاطمه تهز براسها ونطقت : كفو عليك اي لها معنا
تنهد ينطق: حامت كبدي والله
مشى ياخذ كوب المويه يشرب منه بعد غثيان داهمه ...."
<<<الساعه ١١ مساءا >>>
رفعت يدها تمسح على وجها وعيونها وهي تحس بارهاق وارق شديد ومو قادره تنام قامت تطلع الغرفه فتحت درج الادويه تدور لها على منوم وتاففت من شافته مخلص وقفت تاخذ جوالها وتدق عليه ونطقت بثقل صوتها من رد عليها : نايف وينك ؟
نايف : توي طالع من الاسطبل شوي وجاي تبين شيء !
جلست على السرير تنطق : اي ابي منوم راسي بينفجر مو قادره انام
نايف : وش فيك تعبانه ؟
هيام : لا بس فيني صداع المهم برسل لك صورته
وقفلت منه وهي ترسل له الصوره وغمضت عيونها تحاول تنام دون جدوى
وقف عند الصيدلية ياخذ الدواء انتهى وهو يركب سيارته ويتوجه لبيته نزل وهو يدخل ويرقى الغرفه دخل يشوفها تتوسط السرير مشى لها يناديها فتحت عيونها تنطق من رفع يده يتحسس جبينها : جبته !
هز براسه ينطق : اي جبته مده لها وقامت وهي تاخذه تشرب منه ونزلت راسها على ركبته ونطقت: نايف راسي بينفجر فيني صداع مو طبيعي
رفع يده لجبينها ونطق: بسم الله عليك
ونطقت وسط ثقل راسها وصداعها الشديد : كلمت سند !
رفع حاجبه وهو يشوف هاللحظه هي اللحظة المناسبه في انه يعرف
كل شيءمن بدا مفعول الدواء ونطق : اي كلمته
وابتسم يسمعها تتجاوب معه : وش قال لك!
رفع يده لشعرها ونطق: قال لي ان جود ماتبي تاخذ فهد وماتفكر انها تتزوج
ضحكت تنطق وابتسم نايف : شلون ماتبيه الا تبيه
نزل براسه عليها ينطق بهدوء نبرته: يعني جود تحبه ؟
هزت براسها تنطق :شكلها يقول انها تحبه
ونطق نايف : من متى !
سكتت ونطق نايف لنفسه من حس ان بدات مفعول الحبوب : مو وقته
مسك وجها ونطق لاجل تصحصح معه : اي هيام من متى فهد يحبها ؟
فتحت نص عيونها تنطق وسط نوم يداهمها : من زمان نايف من زمان
بلل شفايفه ونطق: اي من زمان متى يعني ؟
رمشت عيونها بتعب وهي تنطق : من زمان من كان سند يروح ويتركها عند اهلك وجود عرفت انه يحبها من شراء لها العطر
عقد حاجبينه ينطق بذهول: عطر ؟ عطر ايش
رجفت عيونها تناظره وهي تبدا تسرد له كل شيء من طقطق لسلام عليكم حاجبه مانزل من ملامح الصدمه اللي تعتليه من كلام فهمه ومن كلام مايدري وش هو بالضبط من نامت بس يقدر يقول انه اخذ حاجته من هالموضوع كله ورفعها يحط راسها على المخده ويغطيها ووقف يناظر زهر نايمه ومشى يطلع من الغرفه اخذ جواله يدق على فهد ويخرج من البيت لسيارته ونطق من رد عليه فهد : وينك
فهد : في البيت وش عندك!
شغل سيارته يحرك من عند البيت ونطق : شوي وانزل لي تحت
فهد : فيك شي ؟؟
نايف : اذا دقيت عليك انزل يلا
قفل بوجهه قبل يسمع رده وضرب بيده على الدركسون يحاول يخفف من غضبه ونطق : هين زين
وقف عند بيتهم ودق على فهد ينزل له ورفع عيونه يناظره من طلع من البيت
نزل الدريشه ونطق فهد : وش فيك ؟
شد نايف على الدركسون بيده ونطق بهدوء عكس اللي داخله : اركب
ركب فهد ولف نايف عليه ينطق : اي فهد والنهايه معك !
رفع حاجبه فهد ينطق: نهاية ايش ماني فاهم عليك !
سكت نايف يناظره فتره ونطق من طال سكوته : وش علاقتك بجود ؟
بلع ريقه فهد وصد بعيونه عن نايف ورفع يده نايف يمسح طرف انفه وينتظر رد فهد ونطق فهد من حس ان هذا الوقت المناسب بانه يتكلم : ابيها حلالي لا يروح بالك بعيد ودامه وصلك العلم فاكيد انك تعرف كل شيء
هز براسه نايف واخذ زقارة يولعها ونطق من نفث دخانها : تحبها تقوم تسوي كل هذا بدون علم اخوها ؟!
تنهد فهد ينطق: انا مستعد اكلم سند وافهمه كل شيء
رجع زقارته بثغره ، ورفع حاجبه فهد يشوف هدوءه الغريب وانه متعود عليه يصارخ ويكسر كل اللي قدامه ويمد يده احيانا ونطق بحيره : نايف وش تبي سوال ؟ تراني ماني صغير عقلي براسي وشوري باخذه مني هاذي حياتي وماراح اسمح لك انت بالذات تدخل فيها لن سبق وسمعتك وضيعت سنين عمري في شيء انا ماابيه .."
رفع حاجبه نايف مذهول من كلامه ونطق : واذا قلت لك ماراح تتزوجها !
ضحك فهد وهو ينزل من السياره وتقدم يرد عليه من خلف الشباك : انشغل بنفسك نايف كلنا ندري وش سويت عشان حبك
فتح الباب وهو يرمي زقارته ومشى له ينطق بالقرب منه : لاتقارن لن مافي شيء يخليك تقارن
تنهد فهد من حس ان الحوار بدا يطول : ليه ودك اذكرك وش سويت ؟
ضرب بيده نايف على زجاج السيارة ونطق : زوجتي هاذي تسمع في فرق انت عارف وش اللي صار وجدك وش سوا فيني وكيف انه دمر حياتي ولا فالح تحفظ لي كم كلمه وتجي تقولها يالعاشق الولهان
مسح على وجهه فهد وهو ينطق : اللي هو اللي هو نايف ماتفرق معي انا احب البنت وباخذها غصب عنك واذا لاحد حق بانه يرفض فهي هي غيرها ماله دخل تسمعني !
هز براسه نايف ينطق : لاتتحداني فهد
وتقدم فهد يقرب منه ونطق : هالمره يا انا يا انت
ومشى يدخل ونطق نايف من خلفه : اجل حطها براسك انك انت الخسران من الحين
ضحك فهد وهو يدخل ويسكر الباب خلفه تافف نايف ومشى يركب سيارته وحرك لبيته وسط غضب يحتويه ..."
<<<صباح يوم جديد >>>
فتحت عيونها تناظر حولها قامت وهي تجلس بنص السرير ولفت تناظر مكانه ماتشوفه جنبها مسحت على وجها وهي تقوم مشت لزهر ومن شافتها نايمه مشت تدخل الحمام خلصت وطلعت وهي تصلي ومن سلمت قامت تلبس سكرابها رفعت شعرها واخدت لابكوتها ونزلت وعقدت حاجبينها تشوفه بمنظر كان كفيل بانه يدب الخوف بداخلها فاتح ازرار ثوبه العلويه لصحن الزقاير الممتلي لزقاره اللي تتوسط ثغره مشت له تجلس جنبه ونطقت
بهدوء وخوف : ناايف
بلعت ريقها من ماسمعت رده ومسكت كفه تنطق : لاتخوفني
لف لها يناظرها ونطق : مافيه شي
شتت انظارها له وللمكان ونطقت : متاكد ؟!
دفن اخر زقارته بالصحن اللي امامه ووقف ينطق : خلي زهر ماني مداوم اليوم
وقفت خلفه تنطق : نايف خير اتكلم انا صح وش فيك تكلم ؟!
لف لها ينطق : مافيني شيء اقولك
تقدمت له تنطق بخوف والواضح لها انه ابدا مو طبيعي رفعت يدها لدقنه تناظر وجهه ونطقت : شفيك
غمض عيونه ومسك كفوفها اللي على وجهه ينزلها ونطق : روحي تاخرتي
ومشى يطلع الغرفه يرمي نفسه على السرير وينام بلعت ريقها من تركها مكانها بتساؤلاتها وخوفها عليه عقدت حاجبينها وهزت براسها وهي تاخذ اغراضها وتلف حجابها وتطلع من البيت ركبت سيارتها تتوجه لدوامها .."
قبل العصر بساعه طلعت من دوامها بعد نهار طويل راح وهي خايفه عليه من شافته بمنظره الصباح اللي كان غريب على انظارها طلعت تركب سيارتها ترجع بيتها دخلت وهي تطلع الغرفه فتحت الباب تشوفه نايم وزهر تبكي تاففت وهي تمشي لها تشيلها وتسوي رضعتها و تصرخ تناديه : نااايفففف
فتح عيونه يسمع بكاء زهر وصراخها عليه تافف وهو يرجع المخده على وجهه ميلت شفايفها بغضب ونزلت زهر بسريرها ومشت له ترفع المخده من على وجهه ونطقت: قوووومم
رفع يده لوجهه ينطق : هيام ماني رايق ترا اقصري حسك
صرخت عليه تنطق بحده : ماني قاصره حسي انت بتتكلم زي الخلق ولا كيف
رفع كفوفه لوجه ونطق: وش تبين اقولك تقابعت انا وفهد خلاص ارتحتي
جمدت ملامح وجها تنطق : نايف تكفى قول انك ماقلت له انك تعرف
تنهد يصد بعيونه عنها ونطقت وهي تجلس قدامه : قلت له ! وش قلت لك انا سوال مو قلت لك لايدري شفيك نايف !
قام يجلس قدامها ونطق : درا وخلاص انتهينا وانا حالف يمين اني لاعلمه شلون يتحداني مره ثانيه
رفعت حاجبها تناظره بذهول : يتحداك ؟ بوش تعلمه !
نايف : انه يفرق بين حياته هنا وحياته بكندا وان الوضع يختلف ولا رايح عند البنت يقول لها انتظر منك رد ولا مو بس كذا يقول لي بياخذها غصب عني وعن اخوها خير وين عايشين !
رفعت شعرها عن وجها تنطق : نايف لحظه لحظه مين قال لك انه قال لجود انتظر منك رد ؟
رفع حاجبه يعرف انها ماكانت بوعيها ومو فاكره انها هي اللي قالت له كل شيء وهي مو حاسه بنفسها ونطقت تكرر سوالها : مين قال لك نايف مينن!
رجع انظاره عليها ونطق: انتي
بققت عيونها تنطق : ايش ؟ انا ! متى قلت لك!
وقف يقوم ونطق : امس
ومشى يدخل الحمام مسكت على وجها تنطق : متى قلت له متى ؟ وقفت تمشي ولفت انظاره للحبوب اللي كانت على الطاوله مشت لها ترفعها وتاففت من قرت على الكرتون انها من اعراضها الجانبيه الهلوسه ونطقت : يالللله انا وش سويت اووف ياربي
لفت من طلع ينطق : لاتبالغين مصيري كنت راح ادري
مشت له تنطق : تكفى نايف تكفى طلبتك لاتوقف بطريقه شفيك خله ياخذها وش عليك انت بالنهايه هاذي حياته وله حق بانه يقرر مين راح تشاركه حياته ليش تعقد وانت اكثر واحد تعرف وش صار فينا تكفى نايف عشان خاطري خله ياخذها لاتصعب الموضوع عليك وعليه
هز براسه ينطق : يصير خير
اخذ سجادته يفرشها ويصلي وقفت تناظره ونطقت تترجاه : نايف
جلست على طرف السرير تناظره وتنتظره يخلص ، انتهى من صلاته وسلم ولف عليها ينطق : سوي لي قهوه
تنهدت تنطق من بروده معها : نايف وش البرود ذا !
نايف : زين روحي سوي لي قهوه وبعدين نتفاهم
وقفت تنطق : زين انتبه لزهر
هز براسه ومشت تطلع من الغرفه وتنزل تسوي له قهوه ...."
اعتلت ضحكته على سوالف ايمان لهم ولف ياخذ جواله من جيب بنطلونه من كان يدق عقد حاجبه وهو يرد ونطق : هلا فهد
فهد : سند انا تحت انزل بغيتك بكلمه راس
سند : جايك
قفل منه وابعد الجوال عنه ونطقت ايمان : مين !
وقف ينطق : هذا فهد يقول انه تحت يبيني بموضوع بروح اشوفه
اختل توازنها ورجفت كفوفها بخوف ، وهزت براسها ايمان ومشى يطلع وينزل له ومن شافه واقف ركب معه وتقدم يسلم عليه ونطق سند : يالله انك تحييه
ابتسم فهد ينطق : الله يسلمك ويبقيك
سند : امرني وش بغيت
فهد : مايامر عليك عدو باخذك نروح كوفي الا ان عندك شيء او مواعد احد !
هز براسه سند ينطق : ابد ماعندي شي
فهد : زين حرك من عند البيت لكوفي من الكوفيهات القريبه منهم وقف ونزلو يدخلون وجلسو على احد الطاولات وطلب فهد لهم قهوه ونطق سند : قول فهد
اعتدل بجلسته وتقدم ينطق بدون تردد وهو واثق بكل كلمه تنقال منه: شوف سند انا بدخل معك بالموضوع من البدايه ولا ابي الف ولا حتى ادور انا ابي اختك لي على سنه الله ورسوله
رفع حاجبه سند وهو مذهول منه ومن طلبه المفاجئ: والنعم فيك بس..
هز براسه فهد ينطق : بس انها صغيره وانا اقولك العمر مو عائق ابدا ولا راح اوقف بوجها دراستها وتكملها لو بغت تكملها باخر الدنيا انا جاهز واذا على الوظيفه فانا فاتح لي مشروع وانت اول واحد اقول له ويعرف عن هالموضوع ، طول الايام اللي راحت كنت إشتغل عليه ودخله مكفيني وزود
شتت نظراته سند ونطق : ماقدر اقول لك شيء حاليا
هز براسه فهد ينطق: ابد خذ راحتك
سكت سند وهو يرفع كوب قهوته يشرب منه ...
تااففت هيام وهي تلف عليه من كانت تنتظر كلمه منه وكان ملتزم الصمت ويشرب من قهوته ويقلب بجواله ورفع عيونه يناظرها من سمع ضجرها
ونطق : عسى ما شر !
اخذت كوب القهوه من يده ونطقت : لي ساعه انتظرك متى بتتكلم ان شاء الله !
رفع حاجبه بعدم معرفه ونطق : عن ايش اتكلم !
عضت على شفتها بغيض وهي تنطق : نايف وش البرود هذا انا قاعده احترق وانت بكل بساطه مو هامك شيء
تنهد يمسح على وجهه ونطق : وش تبين اسوي اقوم اكسر الدنيا على راسك واعلمك شلون تخبين علي شيء مثل هذا !
قوست شفايفها تناظره ونطقت : سوي اللي تبي بس فيني مو في غيري تكفى نايف لاتصير اناني
ابعد ظهره عن السرير يتقدم لها ونطق : انتي تشوفين اني اناني ! هيام تراه اخوي كانك ناسيه اذكرك
سكنت ملامحها تناظره وهي تعرف وواثقه اتم الثقه بانه مو اناني ابدا
ونطقت : ولاني اشوفك مو اناني مابيك تسوي شي تندم عليه بعدين خل فهد بحاله نايف خله يعيش ويختار لاتعيشه الجبر مرتين يكفي اللي راح من عمره وهو يدور خياراته الصحيحه
صد نايف عنها يرجع انظاره لجواله ميلت شفايفها دون جدوى من هالنقاش وقامت تدخل غرفه الملابس تغير سكرابها ..."
وعدت الايام لين صارت اسبوعين وكل الايام اللي مرت ، مرت بكل غرابه بكل بخوف وانتظار وسكوت مريب نقاشات طويله وكلام ماله اول من تالي يدور بينهم بشكل يومي لكن بدون فايده مو واضح لها ابدا مبتغاه ولا حتى وش يفكر فيه تعرفه وتعرف اطباعه وتعرف ان صعب وقوي باس بس مو لدرجه انها تكون عاجزه بانها تعرف وش اللي يدور بداخله ، وعن فهد اللي مرت أيامه ينتظر خبر من سند يا يرفعه لسابع سماء او يهوي فيه لسابع ارض وماينكر صدمته بانه للحين ماشاف شيء من نايف ، اما عند سند اللي كلم جود عن الموضوع وطلبت منه يعطيها مهله تفكر فيها وللحين ماوصله الرد منها ."
طلعت من غرفتها وهي تفرك بيدها ومشت له ونطقت من شافته جالس بالصاله : ايمان وين !
سند : بالغرفه
هزت براسها ونطقت بتوتر شديد : سند
همهم لها ونطق : قولي اسمعك
جود : انا موافقه على فهد
ابتسم يهز براسه ونطق بضحكه : متاكده من قرارك ؟
هزت براسها تاكد كلامها ونطق : يعني اقول له انك موافقه
جود : ايه
ابتسم لها وتقدمت تحضنه وشد عليها سند وطلعت إيمان تناظرهم
ونطقت : اوووه وش عندهم الاخوان اليوم ؟!
مشت تجلس بالطرف الاخر ونطق سند بضحكه : وافقت
ضحكت ايمان تنطق بفرحه : صدق والله !
هزت براسها جود ورفع يده سند يحضنهم ثنتينهم وسط فرحه تدور بينهم .."
رفعت راسها من سمعت جوالها يدق ابعدت ظهرها عن الكنب ترد عليها
ونطقت : هلا ايمان
بلعت ريقها تناظره من كان جنبها وبلغتها ايمان بموافقه جود وقفت تمشي وتطلع من عنده للحديقه و نطقت : منجدك متى ؟
ايمان : توها من شوي قالت لسند انها موافقه
تاففت هيام تنطق : زين بلغي سند لايقول لنايف شيء
ايمان : وش عنده زوجك ذا مايبي يفكنا شره
تنهدت هيام تنطق : ماادري ايمان وش قاعد يدور براسه ومو راضي
يقول لي شي الله يستر بس تبين الصدق ماني متطمنه ابدا لسكوته
تنهدت ايمان تنطق : معليك ماراح يسوي شيء في النهايه اخوه
هيام : ان شاء الله اتمنى المهم قولي لجود تقولك هيام مبروك قبل الزحمه
ضحكت ايمان تنطق : اصبري باقي بدري على المباركات خلي مشكله اللي عندك تنحل
هيام: معليك انا له يلا باي
قفلت منها وهي تحط الجوال بجيب بنطلونها الخلفي ومشت للورد تناظره اخذت سلتها ومقص وهي تقص منه اخذته ودخلت الصاله نزلت الورد على طاوله الطعام ومشت تاخد كل الفازات الموزعه بالبيت وتغير الورد اللي بداخلها رفعت انظارها تناظره وسرعان مارجعت انظارها للورد وهي تقص اطرافه ونطق نايف : جهزي نفسك بعد اسبوعين
رفعت حاجبها تنطق: ليش ؟
ابتسم بطرف ثغره ينطق: نخطب لفهد ونزوجه
نزلت المقص من يدها وهي تناظره بصدمه وقفت تمشي له ونطقت : نايف !!
سحبها تجلس على فخذه ونطق: مو نايف اللي يحرم اخوانه من فرحتهم لاي سبب كان صح اني مقهور من فهد بس برضو ماني قاسي لدرجه اني اخرب حياته حطيها براسك وعلقيها حلق باذنك وتراني انا بنفسي اللي كلمت سند وخطبت اخته لفهد اخوي ، وكل الكلام اللي قلته لفهد كان مجرد كلام لاكثر ولا اقل عقلي براسي هيام مقد فقدته عشان انكد على اخوي واحرمه يكمل حياته مع الانسانه اللي يشوفها بتكمل نص دينه وتكمل الفراغ اللي بحياته
دمعت عيونها ورمشت بذهول تناظره ونطقت : ليش ماقلت لي طيب ليش تخليني على اعصابي طول الايام اللي مضت !
شد على خصرها ونطق: عشان اذكرك مين نايف لان من الواضح لي انك بديتي تنسين مين انا .
تلعثمت مو قادره تنطق وهي ماتنكر فعلا انها كانت شاكه من كثر سكوته انه يسوي شي ونطقت وهي مو قادره ترتب كلامها : نايف يعني انت السبب سكوتك ماترك فكره ماحطها ببالي
نايف : في اني ممكن اضر اخوي ؟؟
صدت بعيونها عنه ورجع ينطق : في اني ممكن احرمه سعادته ؟
رجعت انظارها عليه ونطقت بهدوء نبرتها : ماقصدي كذا
هز براسه ينطق : وش قصدك اجل ؟
سكتت فعلا لان ولا كلمه راضيه تطلع معها وضحك يهز براسه ورفعها من على فخذه ينزلها على الكنب ووقف يطلع ونطق وهو ماشي : لاتنتظريني ماراح ارجع بدري
تنهدت تنطق : يالله انا وش دخلني يقلب علي يعني هو بنفسه قال لي انه تهاوش مع فهد يالله يانايف اخذت جوالها ترجع تدق على ايمان ومن ردت عليها
نطقت: ايمان تعالي عندي تكفين
ايمان : شفيك
تنهدت تنطق: فيني جني اخلصي علي تعالي وقفلت الجوال ترميه على الكنب ورفعت راسها من سمعت بكاء زهر وقامت تطلع الغرفه ...."
~~<عند ايمان >~~
ابعدت الجوال عنها من قفلت هيام بوجها ونطقت : ياكثر مشاكلك
تنهدت تمشي لسند بالصاله من كان مع جود ونطقت : سند انا بروح لهيام
عقد حاجبينه ينطق: الحين ؟!
هزت براسها ونطقت : تبيني
سند : زين روحي
ايمان: تمشين معي جود ؟!
هزت راسها بنفي تنطق : عندي داوم بكره
ايمان : اجل يلا انا بروح
ومشت تدخل الغرفه لبست عبايتها واخذت مفتاح سيارتها وهي تطلع من البيت كله نزلت تركب سيارتها تتوجه لهيام ومن وصلت نزلت وهي تدق الباب مشت وطلعت هيام من سمعت الباب يدق ونطقت ايمان من فتحت لها : شفيك !
تقدمت تحضنها ورفعت يدها ايمان تشد عليها ونطقت : شفيك يابنت خوفتيني !
ابعدت عنها هيام تناظرها ونطقت : ادخلي
مشت ايمان تدخل وجلسو بالصاله ونطقت هيام : تبين اجيب لك شي ؟
تاففت ايمان تنطق : مابي شي تكلمي وش فيك!
تنهدت هيام تنطق وسط تنهيدتها : تخيلي ايمان ان نايف هو اللي خطب جود لفهد من قبل فهد يكلم سند وانا طول الايام اللي راحت حاطه يدي على قلبي من انه يسوي شيء ويخرب كل هالزواج وزعلان علي يقول لي شلون تفكرين اني ممكن احرم اخوي سعادته وتخيلي اني ماقدرت ارد عليه بحرف واحد لاني فعلا كنت خايفه من سكوته ، وكنت طول الايام اللي راحت وانا اسحب الكلام منه تسحيب ولوهله نسيت ان نايف تغير وماعاد نايف الاولي لاول مره احس اني مو قادره حتى اني احط عيني بعينه نظراته لي كانت كفيله اني احس بتانيب ضمير مو طبيعي
تقدمت ايمان بصدمه تنطق : انتي متاكده سند ماقال لي ان نايف كلمه !
هزت براسها تنطق: اي اكيد متفقين اثنينهم محد يعرف ، وش اسوي ايمان ؟
رفعت حاجبها بعدم استيعاب وهي تنطق : مو قادره استوعب
تنهدت هيام تنطق : مو فارق معي شيء الحين الا نايف حاقده على نفسي شلون كنت شاكه فيه وانا اعرف ان مافي مثله بالدنيا هاذي كلها
نزلت راسها بين كفوفها وهي تبكي ونطقت ايمان : اسمعيني هيام اسمعيني رفعت راسها تناظره ايمان وسط دموعها وكملت كلامها ايمان : اول شيء انتي مالك علاقه هذا اولا مو هو بنفسه قال لك انه ماراح يعدي الموضوع خصوصا بعد هوشته مع فهد يعني هو السبب في انه يخلق الشكوك هاذي كلها بداخلك
رفعت يدها تمسح دموعها ونطقت وسط بكاها : حتى لو حتى لو ايش ماكان انا اعرف نايف ، نايف مافي منه على وجهه التاريخ ، نايف تغير وتبدل كل شيء فيه تغير وكانه انخلق من جديد وهالشيء انا قاعده اشوفه بعيوني اسبوعين ايمان اسبوعين وانا ماليني الخوف منه
رفعت يدها ايمان تحضنها ونطقت ايمان وهي تهديها : اششش تعوذي من ابليس
هيام : تدرين هاذي اول مره مااسمعه يصارخ كان هادي معي بشكل فضيع هادي لدرجه اني ماقدرت احط عيني بعينه وانا طول الايام اللي راحت وانا اقولك نايف لايدري سند لايقول لنايف شيء وكاني فعلا متاكده
انه ناوي شر لاخوه
ابعدت عنها تناظره ونطقت : قلبي يحرقني ايمان
مسكت ايمان وجنتيها تنطق : امسحي دموعك اول شيء وثاني شيء معليك نايف بيعذرك لانه هو من البدايه حط الشكوك هاذي كلها فيك بتعدي ياحياتي انتي لاتشيلين هم وبعدين مو مفروض انك مبسوطه الحين يعني مخاوفك كلها إنتهت ونايف بنفسه حل كل هذا وفهد بياخذ جود وكل شيء بيمشي على نصابه الصحيح صدقيني
صدت بعيونها عنها وقامت تدخل المطبخ اخذت كوب تمليه مويه وتشربه دفعه وحده وتحاول تعيد ترتيب نفسها بعد ماتبعثرت وتدري بعد ان محد قادر يلم كل هالشتات غيره طالت مواساة ايمان له ومن تاخر الوقت لين صارت حدود الساعه ٢ قامت ايمان توقف ونطقت : يلا هيام انا تاخرت وسند قاعد يدق انتبهي لنفسك ومن يرجع نايف قولي لي
هزت براسها هيام وحضنتها ايمان وسلمت عليها وطلعت سكرت الباب خلفها وهي تمشي بالحديقه تنتظره ومرت ليلتها كلها انتظار لين صارت حدود الساعه ٤الفجر ورفعت راسها من كانت تسنده على ركبها من سمعت اذان الفجر وهو للحين مادخل عندها خفق قلبها وهي تاخذ جوالها من جيبها تدق عليه ونزلت الجوال من مارد عليها وتاففت تنطق : وينك نايف وينك
طلعت الغرفه توضي وتفرش سجادتها وتصلي انتهت وهي تسلم وقامت تجلس بنص السرير وقامت مسرعه من سمعت الباب الخارجي يتقفل دليل على دخوله تنهدت براحه وهي تنزل تحت ومن شافها واقفه والواضح انها كانت تنتظره ونطق : مانمتي ؟!
مشت بهدوء له وهي تحتضنه دفنت وجها بصدره ونطقت : لا تسال وانت تدري ان عيوني ماراح تقدر تغفي الا وانت جنبي
رفع يمينه لشعرها ونطق : قلت لك بتاخر
تنهدت تنطق بهدوء: ليش ماترد علي ؟
نايف : ماشفت اتصالك
ابعدت عنه تناظره ونطقت وكفوفها على صدره : لا تكذب علي وانا اعرفك اكثر حتى من نفسك
ضحك يهز براسه ونطق بسخريه : اي واضح انك تعرفيني
نزلت راسها تشتت انظاره ورجعت تناظره وتنطق : اعرفك والله اعرفك حق المعرفه واعرف بعد اني مااهون عليك
نايف : ومن قالك انك تهونين عندي ؟!
هيام : اجل ليش تخيلني اعيش شعور اكره طول عمري وهو تانيب الضمير ليش تخليني اكره نفسي لاني زعلتك وانت تعرف اني ماارضى اشوفك تزعل علي لاول مره احس ودي اشوفك تكسر وتصرخ علي ولا اني اشوفك تتكلم معي بكل هالهدوء وانا ادري ان بداخلك فيضانات عتاب ، عاتبني اصرخ علي اعترف انك زعلان علي بس لاتسكت كذا وانا ادري ان ودك بالكلام حتى لو كان عتابك بيجرحني راضيه بس اهم شيء مااشوف عيونك تزعل علي
وهمس بهدوء تام : واذا قلت لك اني مو زعلان منك
قوست شفايفها من حست انها بتبكي ونطقت : كل هذا ومو زعلان ؟
ضحك يهز براسه ونطق : والله مو زعلان
لانت ملامحها تنطق : وهذا كله وشو ؟!
نايف : كنت احتاج اصفي ذهني
رمشت بخفيف تناظره ونطقت: يعني انت الحين مو زعلان علي ؟
ابتسم يهز براسه بايجاب ونطق: اي نعم وبعدين على اي اساس تحكمين اني زعلان علي انا قلت لك شي ؟
هزت راسها بنفي تنطق: ماقلت بس شفت زعلك بعيونك
نايف : كم مره بقول لك الزعل ...
قطعت كلامه تنطق : الزعل ماانخلق بينا
هز براسه ورفع اصبعه يضرب طرف انفها المحمر اثر دموعها ليله امس كلها ونطق : دامك عارفه وفاكره وشو له تقولين اني زعلان منك ؟ وبعدين انتي كنتي تبكين ؟!
هزت براسها تنطق : من طلعت ودموعي مانشفت
لانت ملامحه وهو ياخذها معه يطلعون غرفتهم دخلو وسحبها معه الحمام يغسل ملامح وجها ورفع يده يبعد خصلات شعرها ونطق : لو باقي اشوفها ذاك الوقت صدق بزعل عليك اخذ منديل يجفف ملامح وجها المبلله اخذها معه يتوجهون لسرير انسدح ونطق : تعالي
رفعت راسها تنزله على صدره ونطقت : انت حقيقه ولا خيال ؟
ضحك ينطق وسط ضحكته: وش تشوفين ؟!
غمضت عيونها تنطق : ماادري بس كل اللي اعرفه انك بين الاثنين
ابتسم يقبل رأسها ونطق : مالنا بالخيال خلينا على الاولى
ابتسمت تلمس حنيه مو عاديه حنيه تخليها تعجز تفرق بين الحقيقه والخيال ورفع يده لخصلات شعرها اللي على ذراعها ونطق : مافي دوام اليوم ؟
فتحت عيونها ورفعت راسها تناظره : يالله نسيت منه
رفع يده لدقنها ونطق : اعتبريها اجازه من عندي
ضحكت تنطق : شلون يعني!
رفع حاجبه ينطق : شلون عاد ماندري بس اعتبري انها محلوله
رجعت راسها على صدره تنطق : انتهى اجل
ضحك وهو يلف خصلات شعرها على اصابع يده وماهي الا ثواني وهي غرقانه بنومها ....."
>>يوم الخطبه وكتب الكتاب تحديدا <<<
واقف امام المرايا عاجز يصدق انها بتكون له ومو راضي يصدق من قال له سند انها واقفت وواثق انها بتكون اصح قرارته واجمل وخياراته عاجز يستوعب انها كم ساعه وتكون زوجته حلاله على مايرضى الله ورسوله التفت يشوف الباب يدق لف يمشي لباب ويفتحه ونطق بذهول من فتحه : نايف ؟!
ابتسم نايف يناظره ورفع حاجبينه ينطق : بتخليني على الباب ؟
ابعد فهد كتفه على باب الغرفه ونطق : ادخل
مشى نايف يدخل الغرفه وسكر فهد الباب واتجه له ونطق نايف : مبروك
انصدم فهد بعدم فهم لحالته الغريبه كم اسبوع مهدده بالخساره والحين واقف قدامه يبارك له ونطق : يبارك فيك
ابتسم نايف ينطق : عارف وش قاعد تفكر فيه بس انا جايك اقطع شكوكك باليقين واقولك لك راضي اخسر قدامك لان الخساره ربح معك ، الله يوفقك ويبني بيتك وابشر باللي يسرك ويرضيك انت عضيدي كانك ناسي تعرف وش يعني عضيدي يعني معك بالحلوه قبل المره تحزم وشد حزامك فيني وابشر بعزك وحط ببالك حاجه بخاطرك والله العظيم ماخليها لين تصير قدام عينك
تجمد فهد ولاول مره يسمع نايف يتكلم معه كذا وتقدم له يحضنه وابتسم نايف يشد عليه ونطق فهد : مشكور جد شكرا كنت محتاج اسمع منك هالكلام انت بالذات
ابتسم نايف ونطق: لا تشكر مو بينا
ولفو اثنينهم على دخول نهار عندهم ونطق : هيا أبوي ينتظر
هز براسه نايف ووقف فهد يعدل نسفت شماغه وياخذ بشته وطلعو ينزلون تحت ركبو سيارتهم يتوجهون لبيت سند لاجل يتممون مراسم هاليوم .."
<<وعند البنات >>
ابعدت هيام من انتهت من مكياج جود ونطقت : اشوف لا خلاص كل شيء تمام
ورجعت انظاره للمرايا تناظرمكياجها ونطقت : مو كانه اوفر شوي ؟
هزت راسها هيام بنفي تنطق: لا اوفر ولا شيءٍ كذا مره حلو
وتقدمت ايمان تنطق : واوو مره خيال خلاص روحي البسي ترا الرجال صارو بالمجلس يلا
بلعت ريقها ماتنكر توترها الشديد وخوفها وبروده اطراف جسدها من هاليوم ماتدري وش بتكون حياتها بعد هالقرار الكبير اللي اخذته وتقدمت ايمان تجلس على ركبها قدام جود ونطقت وهي تمسك كفوفها : ادري انك خايفه وادري ان بخاطرك تهونين ويتفركش كل شيء وكلنا مرينا بنفس شعورك بس انا اقولك لو يرجع فيني الوقت ورا ماخفت وضيعت هاليوم كله بالخوف عيشي تفاصيل كل شيء وان شاء الله يطلع فهد قد الهقوه ويصونك ويملي حياتك ويكون لك كل شيء انا معك باي وقت تمام جودي
هزت براسها جود وتقدمت تحضن ايمان ونطقت هيام : ايمان ياحيوانه حتى انا ببكي ."
عند الرجال بالمجلس من كان كل شيء عائلي على طلب جود وطلبت كل شيء يكون بيوم واحد رفع انظاره فهد من دخل المملك ونهار خلفه وجلس وسط سند وفهد وجمع كفوفهم فوق بعضها يلقي عليهم صيغة النكاح وهم يرددون وراه لين انكتبت جود من نصيب فهد وقام سند يسلم على فهد ويبارك له وتقدمو العيال يسلمون عليه ويباركون له وطلع سند ياخذ الايباد لجود دق الباب الفاصل بينه وبينهم وطلعت ايمان له ونطق : له له يابنت وش الجمال هذا
ضحكت ايمان تنطق : شرايك !
وابتسم ينطق وسط ابتسامته العريضة: وتسالين بعد !
عضت على شفتها تناظره ونطقت: عيونك الحلوه
وتقدم يقبل خدها ونطق : نادي عروستنا
ضحكت ايمان وهي تدخل تنادي جود وماهي الا ثواني وطلعت له وتنهد من شافها وعيونها بالارض مشى يقرب منها ونطق : خايفه ؟
رفعت عيونها له ومشت ايمان تدخل تاركتهم وحدهم ونطقت جود وسط رجفة صوتها : سند احس اني تهورت
لف يحط الايباد على الطاوله خلفه ومسك يدينها ونطق : شوفي ياعيوني انتي لو ماني واثق اني سلمتك لشخص الشخص الصح ولا ماخليت شيء يتم هالليله توكلي على الله وانا معك موجود دايم وراك بسندك بكل وقت بكل ثانيه ولاتنسين بيوم انك في ذرى قلبي وعُيوني توكلي على الله وانا اخوك
بلعت ريقها بتكرار من رفع الايباد لها طالبها تتوكل على الله رجفت يدها وكل جسدها من تممت موافقتها وانكتبت له رفعت يدها تحضن سند وشد عليها وهو يقبل راسها ونطق : الله يوفقك يارب ويبلغني فيك كل خير
ومشت ترجع للبنات واعتلت صرخاتهم يباركون لها ويحاولون يخففون من خوفها الملحوظ ..."
رجع ة سند للمجلس وتنهد فهد من نطق سند : على البركه
ابتسم فهد ينطق بفرحه : الله يبارك بعمرك ..."
مشت هيام تشغل السماعات ووقفت وسط البنات وهي ترقص وابتسمت جود تناظرها ورفعت جوالها شروق تصورها وهي تتمايل بخصرها ولفت كنوز وهي تناظر شروق ونطقت : ارسليها لنايف
ضحكت شروق تنطق : افا عليك الحين
ضحكت ضحى تنطق : بتذبحكم
ومشت ايمان تقابلها وترقص معها ضحكت شروق وهي تركض هي وضحى يرقصون معهم ونطقت ايمان: ايوووواااا عاشووو
ضحكت هيام وهي تمشي تسحب جود ترقص معهم قامت جود بعد اصرار من هيام وهي ترقص معهم وضحكت فاطمه والجوهره يناظرهم ويصفقون لهم وسط فرحه تحوفهم بهاليوم ..."
رفع جواله من وصله اشعار من شروق رفع حاجبه وهو يفتح المقطع يشوفها ترقص جمدت الدم بعروقه يشوفها بطريقه لاول مره يشوفها فيها رفع انظاره يناظر العيال وافقين يسولفون تنهد مو قادر يحتمل ونطق بهدوء نبرته وبصوت مسموع له وحده : انا أعلمك ان ماخليتك تعيدينها لي الليله ولا انا ماافهم
حفظ الفديو وهو يمسح على وجهه ويدخل جواله بجيبه وانتهت هالليله وجاء الوقت اللي جود تروح مع فهد طلع لسيارته يركب وينتظرها .."
مشت ايمان تاخذ اغراض جود تطلعها لسند واخذت هيام عبايتها وطرحتها تلبسها بللت شفايفها جود والبنات يحاولون يهدونها ونزلت مع سند ورفع عيونه فهد من شافها خلف سند وسرعان مانزل من السياره يساعد سند بالاغراض بلعت ريقها ومشت تركب معه وركب سند شنطتها ونطق لفهد : تكفى يافهد تراني سلمتك روحي
رفع يده فهد لكتف سند ونطق : وروحك امانه عندي لاتوصي عليها بعيوني
ابتسم سند ورفع يده يضرب على كتفه ونطق : هذا العشم موفقين
هز براسه فهد ومشى يركب بلع ريقه يشغل السياره ويحرك من امام البيت للفندق وطول الطريق والصمت سيد الموقف وانتهى صمتهم من وصلو ونزل فهد يفتح الباب من جهتها وتقدم يساعدها مسك يدها اللي اختفت بحجم يده وشدت بيدها الثانيه على عبايتها ومشت معه وماحست على نفسها الا وهي بحضنه من تعثرت من الكعب والتف كعبها رجلها ونطق فهد : بسم الله عليك
رفعت عيونها تناظره وهي بتموت بارضها مو قادره تسلك خطاويها ونطق فهد : جاك شيء ؟!
هزت راسها بنفي وعضت شفتها وهي تحس بالالم في رجلها بس من كثر توترها تجاهلته ابعدت عنه تحاول تمشي وتعتدل بوقفتها مسك يدها وهم يدخلون الفندق طلعو لغرفتهم ودخلت تسبقه واخذ اغراضهم وهو يدخل خلفها فسخت عبايتها وطرحتها وبلعت ريقها من الالم اللي تعيشه اثر تعثرها من شوي رصت على اسنانها ولفت من حست فيه يدخل عندها ووقف مكانه يشوف فستانها الناعم اللي كان على طولها بالضبط باللون الابيض وطرحتها لطوق الورد اللي كان من صنع انامل هيام هديه لها بهاليوم ماقدر يخفي ابتسامته ابدا منظرها كان كفيل يخلي الابتسامات تتشكل على ملامح وجهه ومشى لها وهو يطلع الدبل من جيبه ونطق: ممكن تعطيني يدك
شتت نظراتها عنه وهي تمد له يدها ابتسم فهد وهو يمسك يدها يلبسها الخاتم ومد لها دبلته ميلت شفايفها على جنب وهي تاخذها منه تلبسه ونطق : مبروك
صدت بعيونها عنه وابتسم فهد ينطق: بسمع صوتك طيب !
هز براسه من حس انه قاعد يوترها ونطق: انا برا بالصاله خذي راحتك
ومشى يطلع من الغرفه ويجلس بالصاله ، مشت تسكر الباب خلفه ونزلت بطولها تفسخ كعبها وعضت شفتها تشوف الدم مالي كعب رجلها بلعت ريقها بتكرار ومشت الحمام تغسل رجلها طلعت تجلس على السرير ورفعت يدها تحط المناديل على كعب رجلها تحاول توقف الدم اللي يتصبب منها ونزلت دموعها من الالم اللي تحس فيه وقفت تاخذ شنطتها تطلع كل مافيها لاجل تاخذ لصقات الجروح اللي بداخلها وعضت شفتها من طاح عطرها ينكسر بالارض
ولف من سمع صوت الزجاج ومشى يدخل الغرفه ولفت تناظره وبلع ريقه من رجعت نفس الريحه تنتشر على حواسه من جديد وترجع تجدد كل شعوره باول لقاء ، اي هي نفس الريحه نفس الوقفه بس مو نفس الموقف هالمره حلاله هالمره زوجته ثبت انظاره عليها يشوف كيف احمرت ملامحها و ارتفعت حرارتها و تاه كل مافيها ونزلت انظارها للعطر المكسور امامها والمنتشرة ريحته بالغرفه والواصله لانفاسهم اثنينهم ماتدري كيف طاح منها بس الاكيد انه طاح اثر فرط توترها و قلقها الشديد من الدم اللي كان ينزل من رجلها استشعرت قدومه ناحيتها و لجهتها يتوقف مقابل لها تماماً ب الوقت اللي هي تراجعت فيه للخلف و انظارها مشتته مابينه وبين زجاج العطر ، انحنى ونطق : خليك مكانك ورفع اكمام ثوبه يجمع زجاج العطر وسرعان مارفع راسه يشوف الدم على كعب رجلها رفع انظاره يناظرها ونطق : ياساتر مالي كم دقيقه من تركتك امداك تجرحين نفسك ؟!
نزل كل اللي جمعه على الارض ووقف على حيله وهمست بهدوء
نبرتها : انجرحت من كنا برا مو الحين
رجف رمشه يسمعه صوتها الهادي وهي تحاول تصحح له ونزل بطوله يشيلها
نست شلون تتنفس انقطع الاوكسجين عندها من صارت بحضنه وقريب منه بشكلٍ لايُعقل نزلها على السرير ونطق : بجيك
مشى ياخذ مناديل ورجعت تنطق بنفس النبره اللي خلته يلتفت لها بقبله قبل اي شيء ثاني : عندي لصقات جروح بشنطتي
بلع ريقه مو قادر يتخطى نعومة صوتها وهز براسه ياخذ اللصقات من شنطتها ويمشي لها ، جلس قدامها وهو يرفع فستانها لاجل يكشف عن كعبها و ينشف دمها تنهد ينطق بخوف : تعورك ؟
هزت براسها تنفي شعورها بالام انتهى يحط لصقات الجروح على جرحها ونطق : انتبهي مره ثانيه ماعندي استعداد اشوفك تتالمين
ناظرته واستقر سواد عيونه وسط سواد عيونها ونطق من حس انه قاعد يخليها تعجز تلقط انفاسها وقام من عندها ياخذ شنطتها ويحطها امامها ونطق : هاذي اغراضك تبين اساعدك بشيء ؟
هزت راسها بنفي ومشى يطلع من الغرفه رفعت يدها تشيل طرحتها وتغير فستانها وتلبس بجامتها وتمسح مكياجها ورفعت المفرش تدخل تحته تحاول تخفف من توترها وتهرب منه بالنوم ...."
اعتلت ضحكاتها تنطق : تستهبل صح ؟
ابتسم من ضحكتها وينطق : لا ياشيخه عند الناس عادي بس عندي استهبل ؟
مشت تجلس جنبه ونطقت : خير نايف مو منجدك صح ؟
تنهد يرجع ظهره على السرير ونطق : منجدي يلا قومي اخلصي علي
ضحكت تنطق وسط ضحكتها العاليه من طلب منها ترقص له : اي ان شاء الله اذا حجت البقره على قرونها ذاك الوقت رقصت لك خير وين عايشين ؟!
تافف ينطق : وانا حالف يمين ماتغمض عيونك الليله الا وشفت اللي شفته على الواقع فانصحك نصيحه تختصرين على نفسك وعلي وتقومين
ضحكت ماتستوعب اللي تسمعه منه ونطقت : الحمد لله والشكر يمه شفيك قمت اخاف منك ومن طلباتك
رفع يده لشاربه يفتله ونطق: اعجلي يابنت وراي دوام ابي انام
وقفت تناظر زهر وشافتها نايمه ونطقت : مو صاحي وجت بتطلع من عنده ووقف يسحبها ونطق : شفيك انتي على بالك قاعد امزح
ضحكت بسخريه ونطقت : نايف هيي اصحى خير ماني راقصه
تافف ينطق : مو على كيفك بسرعه وش تبين اغنيه ؟
عضت شفتها تكتم ضحكتها ونطقت : وش المقابل !
ضحك ينطق وسط ضحكته: لا ياشيخه ؟
همهمت له ونطقت : اجل وش على بالك !
هز براسه ينطق: اللي تبين بس اخلصي علينا
هيام : اهخخخ بس لو امسك شروق بحتفل فيها
ضحك يبعد عنها ونطق : هاه وش احط لك ؟
ضحكت تنطق : اي شيء يلا
جلس وهو يشغل لها ووقفت قدامه ترقص له وسط ضحكاتها العاليه على نظراته لها وابتسم نايف وهو مو قادر يرمش يناظرها من اقصاها لادنى دونها لحدود خصرها النحيل لشعرها الطويل الاسود اللي كان يتمايل معها لفستانها الاحمر لصوت خلخالها اللي كان يطرب مسامعه انتهت الاغنيه ووقفت تنطق بضحكه : خلاص ؟!
رفع حاجبه وهو يمسح على وجهه ونطق : انا كيف كنت افوت كل هذا ؟!
ضحكت وهي توقف قدامه ومسكها يسدحها قدامه وينزل عليها يقبلها ويستفرد فيها ."""""""""""
انتهى ✅
قراءه ممتعه
لاتنسون ⭐️
