عسى الله يجيب لقى وتطيح عيني بعينك |....
وعند نهار كان جالس بالسياره من بعد ماراح نايف ويكلم ضحى
ضحى:نهاراحس فيك شيء وضعك مو طبيعي
نهار :مافيني شي ضحى
ضحى:اشفيك ساكت جالسه اسحب منك الكلام تسحيب
نهار :طفشت ضحى طفشت مليت
ضحى:من وشو
نهار :وتسالين كمان ضحى ابيك ابيك خلاص تعبت الي متى حالنا بيكون كذا طال الموضوع وانا ماعاد فيني صبر
ضحى:وش تبينا نسوي نهار مابيدي شيء
نهار :الا بيدنا بيدنا نختار حياتنا انا جالس اتعذب بكل يوم عشته وانا مو معك
وسكتت ضحى من حست انه فعلا تعب وهي مو باقل حاله منه وسكت نهار معها وعرف انها تضايقت مو هي برضو مالها ذنب
وقرر انه يقطع الصمت الي صار :كيف الشرقيه
وعقدت حاجبه من سواله :زينه معليها واهلي نوعا ما تقبلو العيشه هنا واحس ابوي ارتاح نفسيا صار من دوامه للبيت يعني تعدل الوضع خصوصا بعد الي صار والتوتر الي صار
نهار:زين وسكت يفكر كيف يفتح الموضوع معها ويعرف وينهم عايشين
ااا ضحى
ضحى:قول
نهار :في واحد اعرف يبي يجي لشرقيه ويسالني كيف الوضع وكذا وقلت اسالك كيف الايجارات وانتو وين ساكنين
وبدات ضحى بكل براءه داخلها تقول لنهار عن الحي الي هم فيه جاهله سبب سواله اي نهار بس هي حلوه الشرقيه وبحرها حلو والناس الي فيها حلوين بعد بس لو كان سبب جيتنا لها بظروف احسن من الي عشناها كانت العيشه فيها بتكون حلوه ولو انك هنا وماتغير علي شيء كنت بكون مبسوطه ..
ونزل الجوال نهار وكتب الموقع الي قلت له ضحى والاماكن القريبه منهم وارسلها لنايف
سند :الحين كيف نعرف وينه هو
نايف :انتظر نهار
سند :نهار وش دخله
نايف :يحب اختها
سند :اشفيكم ياعيال فيصل على بنات تركي مانتو صاحين
وسكت نايف يناظر الطريق ونزل عيونه للجوال وشاف رساله
نهار الي كان كاتب فيها الموقع
نايف :هذا هو ارسله
سند : زين يلا نشوف وش اخر هالحب
هز براسه نايف وكمل طريقه ..
راسها على رجول فاطمه وتبكي
خافت فاطمه عليها و من الي موصل هيام للانهيار هذا :يمه وش فيك علميني
وهي مو قادره تتكلم من شهقاتها الي مانعتها تقول كلمه وحده
ورفعت راسها وجلست قدام امها ووجها مليان بدموعها
فاطمه :يمه قولي لي وش فيك تكلمي انا امك بساعدك فيك شيء قولي صار لك شيء احد سوا لك شيء احد زعلك تكلمي يمه قولي لي لاتخلين قلبي يحترق عليك هيام انتي ماتبكين الا من شيء افتحي قلبك لي يمه افتحيه
ولفت وجها هيام وش تقول لها تقول لها جالسه ابكي عليه لاني ابيه ولاني فرطت فيه وابعدت عنه كيف تقول لها انها من بعد فرقاه لاهي ميته ولاهي حيه وقلبها امتلى بالجروح والندوب كيف تقول لها قمت اشوف الكون بعيوني ولا شيء كيف تقول لها انها بدت تشم دخان يطلع منها من الحريق الي بداخلها كيف تفرغ لها انها كسرت قلبه امتلت الاحزان فيها على حالها فيها ضيقه وتحس قلبها بيحترق بداخلها ورجعت تحضن فاطمه اهاه تعبانه يمه تعبانه
واخذتها فاطمه تشد عليها :بسم الله عليك الرحمن الرحيم
دفنت وجها بحضن امها وبعد دقايق من بكاها وانهيارها نامت بحضن فاطمه بدون ماتحس بنفسها ونزلت عيونها فاطمه من شافتها ارتخت بحضنها وكانت نايمه ابعدت عنها وهي تغطيها وطلعت فاطمه وهي نامت نامت من كثر تعبها من انتهت طاقتها .......
وصلو الشرقيه بعد ساعات وحط نايف جواله وصار يعطي
سند وسند يبحث عن الموقع بقوقل ماب
نايف :طلع لك
سند :اي هذا هو مكتوب
ولف نايف واخذ الجوال من يد سند وحطه قدامه وصار يمشي على الموقع :عنده مسجد وقدام المسجد بقاله تمام وصار يمشي لين دخلو الحاره
سند :هذاك هو المسجد وشوف البقاله قدامه
ومشى نايف لين وقف قدام المسجد
وصار سند يتلفت :ياولد كيف نعرف وين البيت في مليون بيت
كيف نعرف بيت تركي
وسكت يناظر البيوت الي موجوده قدامه :سند مامعنا الا نسال احد عنه
هز راسه سند بمعنى ايه :خلاص انزل لهم شوف الرجال الي عند المسجد
وفك الباب نايف ونزل لهم ووقف عندهم :السلام عليكم
ولفو عليه يردون السلام
نايف :يارجال انا جاي لصاحبي وارسل لي الموقع بس ماكان دقيق مره
واحد من الرجال الموجودين:وش اسم صاحبك
نايف :اسمه تركي ذياب تعرفون وين يكون بيته
هز راسه الرجال :اي وانا عمك لف من عند المسجد يمين وخل البقاله يسارك وادخل مع الدخله الي هناك بيكون بوجهك معروف بيته اكبر بيت بكل الحاره
نايف :تمام جعلك تسلم ومشى يرجع لسياره وركب
سند :هاه بشر قال لك
نايف :اي اي
سند :يلا امش
ومشى نايف متجاهل الخوف الي بصدره ودقات قلبه المسموعه وتوتره :يقول اخلي البقاله يساري تمام هاذي هي يساري وهاذي هي الدخله
سند :انت ماشي صح الحين
نايف : اي هذا وصفه ونزل راسه يناظر :يقول اكبر بيت هنا
وفتح الدريشه سند شوف هذاك اكبر بيت
زاد توتر نايف وخوفه وصار يبلل شفايفه من كثر ماتوتر وحط يده يفك زرار ثوبه وبدا يتعرق جسمه وبان على وجهه من وقف بنص الشارع
ماقدر يخطي خطوه بعدها شد بيده على الدركسون
ولف عليه سند :وش فيك امش
ونايف كان واقف ويناظر البيت توتر كثير
وقرب منه سند :نايف ولد
وكان ثابت بنظرته حتى ما لف عليه
يسمع صوت قلبه وجلس يسال نفسه هو وش جالس يسوي وش الشيء الي بيتغير بجيته مادرا انهم كلهم جالسين يموتون ويتعذبون ويحترقون اكثر اثنين عاشرو الزعل واكثر اثنين في الهوى مغرمين زادت حراره جسمه ولف براسه من سمع السيارات متجمعه ورا ويسمع اصوات البواري
سند :ولد وش فيك الناس وراك
بلع ريقه ووقف قريب من البيت يقدر يشوف الرايح والجاي
سند :نايف
ولف عليه نايف :هاه
سند :وشو الي هاه خوفتني وش صارلك
نايف :خايف اني اندم على هالجيه
وصد بعيونه سند عنه من لقى ان مافي شيء يقدر يقوله له ..
فتحت عيونها وتناظر الغرفه ماحست بنفسها من غفت حست جسمها متكسر كله جلست بنص السرير وهي تلف راسها يمين ويسار :اهههخخخخ ظهري وقامت من سريرها ودخلت الحمام ووقفت عند المرايا تناظر وجها الي كان تعبان وكان واضح عليها اخذت لها شور ولبست الروب وطلعت مشت تجلس على كرسي التسريحة ابعدت المنشفه عن شعرها واخذت المشط وهي تمشطه ورطبت يدها ووجها وقامت مدت سجادتها ولبست جلالها و صلت صلاة الاستخاره خلصت وقامت تنزل لهم وشافتهم بصاله
ومن شافتها فاطمه أبتسمت بحزن عليها :تعالي يمه تعالي
ومشت هيام وجلست بينهم
فاطمه :تبين اقول لهم يحطون لك اكل
هيام :لا يمه مو مشتهيه شيء
فاطمه :بس يمه انتي ماكلتي شيء ووزنك نزل هيام مره
هيام :مالي نفس الحين اذا جعت باكل معليك
وسكتت فاطمه ماودها تضايقها
عزام :يلا انا استاذن بروح ولا تنتظروني على العشاء ماراح اجي الا متاخر وهو طالع دق على نصار
نصار :اخيرا تذكرتني
عزام :متذكرك متذكرك لا تخاف
نصار :اي زين
عزام :رحت لملاذ اليوم
نصار :لا والله ماقدرت اقوم اكلمك بالفراش
عزام :ياولد ارحم عمرك بتموت من كثر النوم قمت احسك ميت مو حي
نصار :وجع جعلك الوجع ميت بعينك هلكتني انت وملاذ وبعدين تقول ليش نايم وفتح الباب وطلع عزام وطلع المفتاح من جيبه
نايف :هذا عزام وضرب بيده على الدركسون هذا البيت
سند : وصلنا اجل
وهز براسه نايف :وصلنا
راحت الساعات عليهم وهم عند الباب يناظرونه وصارت الساعه ٨م
وقامت هيام : يلا انا بروح المستشفى
تركي:هيام ماتقدرين تكلمينهم يغيرون شفتك صباح
هيام :يبه اليوم اخر يوم بالشفت الليلي يعني من بكره يبدا دوامي الصباح
هز راسه تركي بمعنى ايه :يلا زين الله يوفقك ويقويك
ولفت تمشي وتطلع غرفتها تلبس علشان تروح دوامها
بالسياره ...
تافف سند ولف على نايف :يخوي حرام عليك من الظهر واحنا هنا ابي ارتاح ابي اكل من الصباح ماكليت شيء خاف الله فيني انت وحبك الي امرضني معك
غمض عيونه نايف من حلطمة سند :سند مو ناقصك ماراح اتحرك من هنا
سند :اسمع انا بنزل البقاله بشتري اي شيء تبي شيء
نايف :لا
سند:اعرفك عدو الاكل بعدين انت من امس مانمت
نايف :شايف وش جالس يصير اساسا انا نسيت ان في شي اسمه نوم
سند :ان شاء الله تطلع بشيء على هالتعب الي جالس يصير فيك
وعسى الله يجيب لقى وتطيح عينك بعينها وتنتهي متاعبك وتنول مرادك
وسكت نايف وهز براسه لسند ونزل سند يروح البقاله ونزل راسه لنايف قبل يروح
سند :فكر يخوي وش تبي اجيب لك
نايف :شفيك انت ترى بقاله مو مطعم خلاص جيب لي معك
سند :لو مطعم ماسالتك
وابتسم نايف اني عارف يلا روح واعجل
وراح سند ولف نايف يناظر البيت من جديد وتلاشت ابتسامته من شافها تطلع من البيت ووقفت الغصه بنص حلقه ولا قدر يحكم نفسه ولا حتى شعوره فاضت مشاعر الشوق فيه حمرت ملامحه وهو يناظرها وحتى عيونه اللي يحسها تحترق من كبحه لدموعه مارمش يخاف يرمش وتختفي من قدامه اربع شهور وهو يشوفها في باله بس الحين صارت قدام عيونه وده ينزل وده يروح لها ويقول لها انها كانت بالنسبه له اربع سنين مو شهور بس عاجز يخطي اي خطوه ركبت سيارتها ومشت وشغل السياره ومشى وراها وعينه على سيارتها وصارت تمشي وهو وراه يبعد عنها بمسافه علشان ماتشوفه وتلاحظه
ارتفع صوت انفاسه وهو مو قادر يسيطر عليها دخلت السيارات بالمسافه الي تفصل بينهم وصار يحاول انه مايضيعها بس للاسف ضاعت وماعاد شافها ومشى ووقف على الرصيف ونزل وصار يصرخ بعلو صوته نزل يده على ركبته من حس انه انهلك نفسيا وبدا يدوخ من تعبه ورفع راسه من دق سند عليه بس ماقدر يرد عليه من ارتخى جسمه وميل على الارض مغمى عليه من تعبه وقلة نومه وتوتره وخوفه وحراره جسمه ..
واقف بنص الشارع ويدق عليه بس مارد عليه نايف وماعنده سياره علشان يقدر يتصرف ورجع يدق مره مرتين ثلاث :وينك نايف وووووينكك
وكان طايح بالارض ومو حاس بشيء ووقفت له وحده من السيارات ونزل منها واحد وهو ينزل لمستواه وحط يده يتحسس رقبته وتنفس براحه من شاف ان فيه نبض ونزل يده على جيب نايف من سمع جواله يدق ورد عليه
سند :نايف وينك شفيك ماترد
الشخص :اخوي انا شفت صاحب الجوال طايح بالارض والظاهر انه
بس مغمى عليه لن عروقه تنبض
سند :وش قاعد تقوووووول انت وش تقول وينه الحين
الشخص :بالشارع
وكان يصرخ على الرجال الي يكلمه :وين اي شارع شارع وشوووو وقفل منه من قال له وهو يركض علشان يطلع للخط العام ووقف على الرصيف يشوف له تاكسي يوصله وهو مايعرف ولا شيء بالشرقيه جن جنونه وصاريصارخ على الناس الي بشارع من رفضت السيارات توقف له ارتفع صوته وصار ياشر بيده لين وقفت سياره له ركب معه وهو يقول له عن المكان الي قال له الرجال عنه ودقايق ووصل سند ونزل يركض من شاف سيارة نايف وهو قدامها وطايح بالارض والرجال فوق راسه
ونزل له سند وهو يصرخ ناايففففففففففف ولد نايف تسمعني نايف وتسارعت انفاسه وكأنه ينازع روحه ونطق : نايف نايف يرحم لي الي جابك رد علي نايف رفع راسه يناظر اللي حوالينه وصرخ: اسعاف احد يتصل على الاسعاف ويكلم الرجال الي واقف عند راسه ويناظرهم ومسكه سند :تسمع وش اقول لك دق على الإسعاف بسرررررررررعه ونزل عيونه لنايف وصار يهزه مع كتوفه بس نايف مو حوله وصار يصرخ على كل الناس الي حوله ودقايق ووصل الاسعاف وشالوه وركب سند معه وطارو فيه للمستشفى ونزلوه وسند وراه ودخلوه الطوارئ وكان سند معه ويناظره وهو مو قادر يوقف علي حيله
اخذو الممرضين الاكسجين وركبوه له وصارو يدورون له وريد علشان المغذيه وركبوها له ...
بالمستشفى دخلت وكانت تشاور نفسها وتصارع قلبها ومشاعرها وتكتم كل شيء بداخلها تبي تتخلص من شعورها الي كاتم على انفاسها دقت باب غرفته بس ماسمعت اي رد منه وفتحت باب المكتب بس ماكان موجود :هذا وين راح
لفت من شافت وحده من الممرضات وراها وقالت لها : Where is the doctor mosaed ?
الممرضه : He has a lot of patients in the emergency department ...
هزت براسه ودخلت المكتب مشت تشوف الاستيكر الي على المكتب اخذته وكتبت رقم ابوها وكتبت تحت الرقم هذا رقم ابوي وانا موافقه وحطتها على المكتب بعد صارع دار بين قبلها وعقلها بس هاذي هيام تسمع من عقلها
اكثر وخرجت من المكتب...
بعد دقايق صحصح نايف وفتح عيونه ومشى له سند :نايف انت بخير
وهز براسه نايف وحط يده على راسه من كثر الصداع :وش الي صار
تنهد سند وجلس قدامه :خفت عليك خفت يكون صار لك شيء كذا نايف كذا تخليني وتروح وانت تعرف اني مااعرف بالشرقيه شيء
سكت نايف يناظر سند ولفو من دخل الدكتور
ووقف له سند :دكتور كيف وضعه
الدكتور : كل شيء تمام بس أنخفض الضغط عنده
سند :دكتور نصحته له يومين ماسك خط سفر ولا نام ولا حتى اكل شيء
الدكتور :هذا سبب فقدان الوعي الي حصل بسبب الجهد الزايد نايف انت لازم ترتاح تنام كويس وتاكل كويس
وهز براسه نايف بمعنى طيب
سند :معليك دكتور خله علي
الدكتور:اي انتبه عليه وخلك معه
سند :لاتوصي حريص متى نقدر نطلع
الدكتور:اذا خلصت المغذيه تقدرون تطلعون وطلع الدكتور
سند :سمعت وش قال يخوي الله ياخذه حب مسوي فيك كذا وش فيك انت وش فيك بتذبح عمرك من بيعوضك نفسك اذا صار فيك شيء ومن يعوضني انا نايف ياخوي خاف الله في نفسك ترى الصحه اذا راحت ماترجع
وسكت ورفع راسه يناظر المغذي
وسند يناظره ويشوف قد ايش التعب مبين عليه ويعرف ان كل كلمه قالها له ماراح تفيد شيء شعور يجهله سند ولاهو عارف قدر الشيء الي جالس يعيشه نايف تنهد :نايف بروح اجيب السياره وامر الصيدلية اجيب
علاجك واجيك تمام
نايف :تمام لاتتاخر
هز براسه سند بمعنى ايه: ماراح اتاخر عليك وطلع مر الصيدلية الي جنب المستشفى وطلع وهو يدور تاكسي يوصله لسياره ودقايق ووصل ونزل واخذ السياره ومشى للمستشفى
رفع عيونه من خلصت المغذيه ولف من شاف الممرضه تدخل فكاتها له وطلعت وجلس بنص الكرسي ومسح على وجه ومسك على راسه من كثر الدوخه والصداع الي يحس فيه ..
واقفه بنص القسم الاوراق بيدها وتناظر لابيانات المرضى وكانو وراها ممرضين ودكاتره يتناقشون عن الحالات وكان الدكتور يكلم الممرضه
الدكتور:فكيتي المغذيه للمريض نايف
الممرضه :اي دكتور
الدكتور :تمام اذا طلع دخلو المريض الي بالانتظار مكانه اعطيني ورقته
اعطته الممرضه وصار يقرا الورقه وشاف هيام قدامه
الدكتور :هيام الحاله الجايه عندك شفتي الغرفه الي هناك وياشر لها انتظرو المريض الي فيها يطلع ودخلو الي برا
هيام :تمام دكتور واخذت الاوراق الي بيده وصارت تقرا فيها وتمشي ووقفت بالارض من شافت الاسم الي مكتوب على الورقه نايف فيصل الخالد وتسمرت من قرت الاسم :لالالا اكيد تشابه اسماء تشابه هيام تشابه اسماء اكيد مو هو موهو موهو لالالا وركضت الغرفه بس كانت فاضيه مافيها احد وركضت للممرضين الي واقفين وهي تسارع انفاسها ودقات قلبها :الي كان بالغرفه رقم سبعه وينه وينه
الممرضه :توه طلع
رمت الاوراق الي بيدها وطلعت وهي تتلفت حولها وتناظر الرايح والجاي وكانها مجنونه من شافت اسمه ..
<<بالسياره >>
لف سند عليه :الحين نروح مطعم نتعشى وبعدها نروح نشوف
لنا فندق ننام فيه ومن اصبح افلح
وتافف نايف :سند والله مالي نفس فيني غثيان مابي شيء
سند :لا ياشيخ انت اصمخ ماتسمع انت الدكتور وش قال لك
من شوي بعدين انا ماني جالس استشيرك
وحط يده ينزل المرتبه ونزل ظهره عليها وحط يده على راسه
وسكت سند مايبي يزيد عليه ووقف عند مطعم ونزل ياخذ لهم اكل ورجع السياره ومشى يدور فندق ..
وهي واقفه عند باب المستشفى وتناظر ومن شافت ان مافي احد جلست جنب الباب ولمت ركبها لها ونزلت راسها عليها وصارت تكلم نفسها :هيام شفيك صرتي تتوهمين يعني محد اسمه نايف بدنيا كلها الا هو هيام افهمي نايف راح راح خلاص نايف مو موجود اربع شهور اربع شهور هيام وانتي مالمحتي حتى طيفه الحين بيجيك وبنفس المستشفى ورفعت راسها وقامت تدخل ومن دخلت شافت مساعد قدامها والابتسامة على وجهه ومشى لها
مساعد :كنت عارف انك بتوافقين
وصدت بعيونها ومشت تتعداها ولف يناظرها وفسرها مساعد انها مستحيه منه بس بالحقيقه هي مو قادره تناظره ولا حتى توقف معه ..
وصلو الفندق ودخلو الغرفه ورمى نفسه على السرير
سند :تعال كل بعدين نام يلا ولا اسمع حرف واحد اخلص علي
نايف :سند اقولك مابي
سند :يخوي اشفيك انت خلاص كل علشاني يلا
وجلس نايف وفرك عيونه وقام وجلس معه وتعشو وقام نايف ومشى لسريره وهو يفصح ثوبه ومشى له سند :امسك هذا العلاجات خذلك منها بس اصبر اجيب لك مويه ولف سند يجيب مويه له ومن رجع شاف ظهر نايف ملفوف عليه بالشاش :نايف وش هالي بكتفك
ونزل راسه وتنهد :هذا سبب رجوعي من المهمه العسكريه احترق المعسكر وكنت بداخله
تافف سند :انحرقت نايف انحرقت وساكت يخوي وش الي جالس يصير
فيك علمني لاتموتني ناقص عمر
نايف :واذا قلت لك اني ماني حاس فيه تصدقني
سند :يخوي حرق حرق وش الي منت حاس فيه
واشر نايف بيده على قلبه :مو العن من الحريق الي هنا ورفع جسمه كله على السرير تمدد وغمض عيونه وقام سند يسكر الانوار ومشى ينسدح
لسرير الي جنبه ونام وراه ....
كانت واقفه وتحاول تلم نفسها وتقنع نفسها انه تشابه اسماء لاكثر ولا اقل
وطلعت جوالها من شافت ايمان تتصل عليها تنهدت وردت عليها
ايمان:هيام شلونك حبيبي
هيام :الحمدلله زينه
ايمان : اسمعي حجزت رحله بكره العصر الساعه ثلاثه مابيجي الساعه سته الا وانا عندك واذا مره تاخرت سبعه
هيام :ايمان
ايمان :قولي
هيام :قلت لمساعد اني موافقه
سكتت ايمان تسمع الكسره الي بصوتها :بهالسرعة
هيام :استخرت وقلت له
ايمان : الله يوفقك ويسخره لك يعوضك عن كل شيء عشتيه
حركت راسها يمين ويسار وكانها تقول لها ماراح انساه يلا ايمان
انا بقفل عندي شغل
ايمان :يلا تمام بكره اشوفك وسكرت هيام وقامت تطلع تكمل شغلها
<<الصباح ببيت تركي >>
كان تركي بالغرفه وفاطمه تسولف له عن موقفها مع هيام
فاطمه : حالتها مو عاجبتني صارت تجلس بين اربع جدران وحدها ولا بداوم
تنهد تركي : ماقالت لك شيء طيب
فاطمه :ولا شيء غير انها تقول لي انها تعبانه وبيني وبينك ماودي
اسالها احسها ماتبي تتكلم
تافف تركي :اسمعيني فاطمه اجلسي معها ...
نزل راسه من شاف جواله يدق برقم غريب
فاطمه :مين
عقد حاجبه تركي :مدري رقم غريب
فاطمه:طيب رد
اخذ جواله ورد :نعم مين معي
السلام عليكم معك ابو مساعد
تركي :وعليكم السلام ومين ابومساعد ذا ماعرف واحد اسمه ابومساعد
انا ابوه وطالبين القرب منكم ونطمع في نسبك ونبي اكبر بناتك
وعقد حاجبه تركي وكمل ابو مساعد : وزي ماقلت لك ودي اني اناسبك ولدي دكتورويشتغل وشايل نفسه مو ناقصه الا الزواج واذا ماعندك مشكله ودنا المغرب نزوركم بالبيت ونتعرف عليكم
وسكت تركي من طلبه المفاجى الي صدمه : الله يحيكم انتظركم المغرب اجل وقفل
فاطمه :وش فيك وجهك انخطف لونه
رفع عيونه لفاطمه ونطق :هذا واحد داق يخطب ويبون هيام
فاطمه :ايش
تركي :انا بعد مصدوم ويقولون بيجون الليله وولده دكتور ومو ناقصهم شيء
فاطمه :وهيام طيب اسالها
تركي :قال لي بجيك ماقدرت ارده خليهم يجون ونشوف لهم
ونسال هيام واذا ماتبيه قالنا له يضرب الباب
هزت راسها فاطمه بايه
تركي :جهزو كل شيء بالمجلس وقام يطلع من الغرفه
وكان مساعد مبسوط وسعيد جدا من قال ابوه انهم بيروحون المغرب لتركي
قام وطلع وبدا يجهز نفسه ويحلق ويعدل نفسه علشان هالليله
كانت بغرفتها وجالسه ولفت من دخلت عليها فاطمه
فاطمه :يمه هيام في ناس دقو على ابوك يبون يخطبونك
ولفت عليها هيام وبلعت ريقها ماتوقعت بكل هالسرعه مساعد يدق على ابوها وعضت على شفتها من توترت
فاطمه :يمه معليك نشوفهم وتشوفينه واذا تبينه الله يوفقك
واذا ماتبينه مانتي مجبوره ومحد راح يغصبك على شي
هزت راسها هيام وطلعت فاطمه وهي تنزل الصاله وشافت
عزام وسعود وضحى وكانت سرحانه وجلست بينهم
وضحى تناظرها ودقت عزام ولف عزام يناظر امه :يمه وش فيك
لفت فاطمه عليهم :في واحد دق على ابوك وخطبو هيام وقالو اليوم بيجون
عزام :وشو وليش اليوم وش هالسرعه
فاطمه :مدري طلب من ابوك وابوك يقول ماقدرت ارده عندك شغل
خلصه من الحين لايجي المغرب وماتكون موجود
ضحى :وهيام تبيه
رفعت كتوفها فاطمه بعدم معرفه: ماادري قلت لها وقالت لي تمام
ضحى:هيام قالت تمام غريب
سعود :ومين هو نعرفه احنا
فاطمه :لا مانعرفه بس يقول ولده دكتور ومو ناقصه شيء والغرض من الزياره اننا نتعرف عليهم وهم يتعرفون علينا
عزام :ان كان فيه خير الله يوفقهم ..
الساعه ٣العصر كانت ايمان بالمطار وركبت الطائره
دخلت ضحى عليها وهي جالسه وتفكر هل الي تسويه صح ولا
جالسه تجرم في حق نفسها
شبكت كفوفها ضحى ببعض :هيام
ولفت عليها هيام تناظرها
ابتسمت ضحى وجلست جنبها :هيام انتي تبين تعيدين التجربه
سكتت هيام وتناظرها وقامت هيام توقف عند الدريشه
وحست ضحى انها تضايقت وقامت لها : قررتي وش بتلبسين
وهزت هيام براسها بمعنى لا
ضحى:اجل تعالي نشوف شيء تلبسينه ومسكت هيام تسحبها معها لدولاب
فتحت ضحى الدولاب وصارت تطلع الفساتين :اااا شوفي هذا احسه حلو
ولا هذا وصارت تاخذها وتحطها على هيام
وهي ساكته وتناظر ضحى
ضحى :تعالي شوفي ذا مرره حلو وبيطلع عليك بيرفكت
هيام : بس اوفر على مناسبة زي ذي
ضحى :لا اوفر ولا شيء البسيه
هيام :ابي الاسود
ضحى:ليش اسود البسي لون فاتح فكي نفسك من الغوامق البسي
ذا يلا انا بروح وانتي ابدي تجهزي يلا وخرجت ضحى ووقفت هيام تشوف فستان ملكتها ونزلت دموعها ومسحتها بسرعه ونطقت :مادراعنك هيام مادرا عنك خلاص لازم تختارين نفسك الين متى وانتي بتنتظرينه خلاص انسي نايف انسيه نايف راح مو قلتي ماتبينه ولا تحبين حبه خلاص هذا نتيجة قرارك ...
طلعو من الفندق ونزلو السياره وركبو
سند :يلا على البيت
ومشى نايف لبيت تركي يوقف قدامه بنفس وقفته امس ولا يدري وش سبب هالوقفه بس يحس نفسه مايبي يبعد على الاقل يكون قريب منها ..
اخذت الفستان بعد ماحاولت تقنع نفسها انها لازم تنسى نايف وتتعايش مع حياتها الجديده وتتقبل مساعد جلست وهي تتجهز وبدات تحط مكياجها وتخط كحلتها وتسوي شعرها ولبست وتعطرت ودخلو عليها فاطمه وضحى
وشهقت ضحى من شافتها :يالله هيام وش هالزين
فاطمه :بسم الله عليك يمه تهبلين
ضحى:صراحه بيموت المعرس من الجمال الي نشوفه تصدقين لو اني رجال تزوجتك وصارت تضحك من قرصتها فاطمه
فاطمه :انتي ماتستحين على وجهك
ضحى :اااه يمه وش فيك وانا صادقه شوفي الحلاوه
ابتسمت هيام لهم :عيونكم الحلوه
فاطمه :يلا انا بنزل للشغالات اكيد انهم على وصول وطلعت
ونزلت فاطمه واخذت المبخره وصارت تبخر البيت والمجلس ونزلو تركي وعزام وسعود ووقفت فاطمه تبخرهم
فاطمه :استودعتكم الله تعال يمه عزام ابخرك
ومشى لها عزام وقربت المبخره منه :جعلني ابخرك وانت عريس
سعود :انا بطلع قبل تحول علي فطوم
وضحكت فاطمة :انت وش فيك ماراح اقولك تزوج لاتخاف
عزام :اي والله الله يعين بنت الناس الي بياخذها
طارت عيونه سعود :وجعععع خلاص وجع قسم انها من المحظوظين وان ربي واهلها راضين عليها
عزام :اي اي صح صادق الا ياشين حظها ودق الباب
تركي : خلك منه وروح افتح لناس يلا وانت ياسعود معي على المجلس
عزام :يبه هو الصغير خله هو يفتح
تركي :اطلع انت استقبلهم يلا اخلص الناس عند الباب
سند :وش السالفة ايش السيارات ذي
عقد حاجبه نايف يناظر قدامه السيارات والناس الي عند البيت ونطق :ماادري
وفتح عزام الباب ودخل مساعد وابوه وناس
من جماعتهم وامتلى مجلس تركي
سند :يخوي الوضع مو طبيعي وش هالمناسبة
نايف :ماادري الوضع غريب ومو مطمن
ونزلو عيونهم من شافو سياره التاكسي توقف عند الباب ونزلت منها ايمان
سند : اووووه هاذي صديقتها صح الممرضه ذيك اي عرفتها عرفتها
نايف :اي صديقتها
اخذت جوالها تدق على هيام وردت عليها
ايمان :هيام انا برا شلون ادخل الحين وش هالزحمه مين عندكم
هيام :هذا مساعد واهله جاين
ايمان :ايش منجدك ذا صاحي امس تعطينه الرقم واليوم جاي
بيتكم وش هالخفه بعدين ليش ماقلتي لي
هيام :ماامداني اطلعي الحين بقول لضحى تقابلك وقفلت منها ودخلت ايمان
نايف :كيف اعرف وش الي صاير الحين
سند : اجلس نشوف وش الوضع
وسحب دخانه وهو يولعه وعيونه على البيت
<<بالمجلس>>
ابومساعد :احنا جاين ياتركي نبي القرب منكم ونخطب بنتكم هيام لولدنا مساعد
تركي :الله يحييكم شرفتونا ان كان لكم نصيب عندنا فالنا الشرف اننا نناسب هالوجيه الطيبه وان كان ماجمعنا نصيب فدخلتكم علينا تكفينا في اننا نعرفكم ونتعرف عليكم بس الحين القرار بيد البنت وتعرف ياابو مساعد لازم نسال في النهايه هذا زواج عشرة عمر ماهو يوم ولا يومين
ابو مساعد :انكم تسالون عنا هذا حقكم بس الي اعرفه ياتركي اذا ابو
البنت موافق مانسال البنت
رفع حاجبه عزام وتنرفز من كلامه ونطق :بس ياعمي احنا نسال لانها هي الي بتعيش معه مو احنا وزي ماقال ابوي اذا لكم نصيب عندنا ياهلا ومرحبا واذا مالكم تشرفنا بمعرفتكم احنا مانجبر ياعمي .
تلعثم ابو مساعد من كلام عزام وهز راسه وسكت
مساعد :معليه خذو راحتكم واعطونا خبر
وقرب تركي من عزام قوم شف لاختك وعلشان يدخل الولد يشوفها
وقام عزام وهو مرتفع ضغطه ومو مرتاح لابو مساعد ولكلامه قام وهو يطلع لهم ودق باب الغرفه وطلعت له فاطمه
فاطمه :هاه يمه وش صار
وعض على شفته يكتم غيضه :ماارتحت له لاهو ولا ابوه ومابلعته بعيشة الله
فاطمه :ليه وش الي صار
عزام : مسكت نفسي قاعد يقول ان اذا ابوي موافق مو لازم نسالها ماعجبني وان شاء الله هيام ماتوافق
فاطمه :هو قال كذا
عزام :اي قالها وسط الناس يحمد الله ان المجلس مليان تافف اسمعي يمه ناديها بسرعه يبي يشوفها
ولفت فاطمه ودخلت الغرفه :هيام يمه يلا قومي عزام عند الباب ينتظرك انزلي تحت علشان يشوفك
بلعت ريقها ومسكت كفوفها ببعض وشدت عليها ورصت على اسنانه وتحس بحراره تمشي بجسمها وصارت تتنفس بسرعه واول من جاء ببالها نايف او بالاصح ماطلع من بالها وواقف لها بنص حياتها رفعت راسها من مسكة يدها ايمان : هيام يلا انزلي
ناظراتها وتجمعت الدموع بعيونها وكانت تترجها بانها ماتبي تنزل وفهمتها ايمان :روحي هيام بس بيشوفك روحي وبعدها قرري
ولفت على امها :يمه تكفين مابي انزل
فاطمه:هيام يمه وش فيك انزلي شوفيه واذا ماتبينه نقول له مالك نصيب وانتهينا يلا يمه عزام عند الباب
ومسكتها ايمان مع يدها :هيام انزلي يلا
وصار عزام يدق الباب ونطق :يمه شفيكم اخلصو علي
هيام :يمه مابي انزل تكفين يمه مابي
وضربت فاطمه بيدها على رجله :اسمعو وش تقول هيام وش فيك ماصرت افهمك اكلمك اليوم اقولك واحد بيجي يخطبك ماقلتي لي شيء والحين تقولين مابي انزل بتجنني هالبنت
وطلعت ضحى لعزام :عزام تقول ماتبي تنزل
عزام وشو الرجال تحت ينتظر وش الي ماتبي تنزل
ضحى :ماادري شفيها
عزام :ابعدي طيب بدخل عندها
ضحى :ايمان داخل دقيقه اقولها تلبس عبايتها ودخلت ضحى ايمان البسي عبايتك عزام بيدخل اخذت ايمان العبايه ولفت طرحتها
ودخل عزام ومشى لهيام
عزام :هيام ليش ماتبين تنزلين
وسكتت ولفت وجها وجلس عزام على ركبه قدامها :اكلمك انا ليش ماتبين تنزلين عندك خبر انهم بيجون امي قالت لك ليش مارفضتي ليش يوم صار تحت قلتي مابي
وكانت ساكته وصاده وجها عنه
عزام:هيام اكلمك انا اعطيني سبب طيب اقوله لهم ماردت عليه وتافف وعض على شفته وحط يده على فكها يلف وجها له وشافها تبكي وثار دمه تبكين تبكين هيام ماعاش والله الي يبكيك ماعاش وانا اخوك ماعاش الي ينزل دمعتك
وانفجرت تبكي :عزام تكفى مابيه مابيه
وقرب منها عزام يحضنها وثواني وابعد عنها :والله ماتاخذينه وراسي يشم الهوا اعتبري هالليله ماصارت ووقف ومسكته فاطمه وش بتقول لهم
عزام :بقول لهم مالكم نصيب عندنا يزعلون يرضون مايهمني اهم شيء ماتسوي شيء هي ماتبيه ونزل يركض للمجلس ودخل عليهم ياعمي ابو مساعد ويا مساعد البنت ماتبي واحنا ماتعودنا نجبر مالكم نصيب عندنا
وقف تركي وسعود معه ومساعد وابو مساعد كلهم يناظرون عزام
ابو مساعد:وش تقول انت
عزام :الي سمعته ياعمي مالكم نصيب
وواقف تركي يناظر عزام بصدمه وسعود بنفس حالته
ابو مساعد :لكم الشرف اساسا اننا فكرنا نناسب ناس مثلكم انتو
الي خسرتو مو احنا وولدي كثير على بنتكم
تركي :احترم نفسك يابو مساعد احترم نفسك تراك ببيتي
وصار يسب ويشتم ومساعد يمسكه وعزام يرد عليه وسعود ماسك عزام
ولف عزام نظره لمساعد :خذ ابوك واضرب الباب انت وياه
ووقفو بالدرج يسمعون اصواتهم المرتفعه وصوت عزام العالي والطاغي عليهم
وسعود ماسك عزام وعزام مو قادر يمسك نفسه وصار كل الي بالمجلس يهدون الوضع بس عزام ماعاد سكت
وتركي يصرخ على عزام علشان يسكت
مساعد :احشم نفسك انت وابوك
وصار يصرخ عزام : نعرف الحشيمه قبل نعرف وجهك انت وابوك اذلف اطلع اذلف
وسحب مساعد ابوه وطلعو وجامعتهم معهم
سند :طلعو هذا هم طلعو وصارو يناظرونهم سند ونايف
نايف :يخوي وش السالفه
توزعو على السيارات ومشو وطلع عزام برا وغضب الدنيا كلها على راسه وازرار ثوبه مفتوحه ويصرخ ووقف قدامه سعود
سعود :شفيك انت وش فيك
عزام :ماتسمع الحيوان هذا هو ابوه وش يقول راضي يعني
راضي يتكلم علينا كذا
سعود :يخوي ماني راضي بس مو كذا
عقد حاجبه نايف من شاف عزام وسعود بالشارع
سند :يارجال وش العلم
ودخلو البيت ونزل نايف من السياره ولف ظهره من شاف واحد يناديه
الرجال:انت من امس وانت واقف هنا وش علمك
بلع ريقه نايف وتلعثم ونزل سند من حس نايف توتر
سند :ارحب ياعمي
ولف الرجال عليه وكمل سند :احنا الحين ماشين امس كنا جايين لواحد هنا بس ماحصلنا احد بالبيت واليوم رجعنا بس البيت شوف عينك كان فيه ناس ولا كان ودنا نروح بس ماودنا ننزل بدون مانعطي صاحب البيت خبر
الرجال :اي بيت
سند :بيت تركي تعرفه
الرجال :اي اعرفه تونا طالعين من عنده
سند: عسى ماشر وش هالسيارات
الرجال:كانت في خطبه لبنت تركي الكبيره بس ماتمت
ورفع حاجبه نايف :خطبه ؟
الرجال :اي خطبه بس رفضو تركي وعياله يعطون الولد بس معهم حق لان البنت رفضت ومن قالو لهم انها رفضت صارو يغلطون على تركي وعياله
سند :تمام ياعمي يعطيك العافيه
الرجال :الله يعافيك وراح الرجال
ولف سند يناظر نايف:ولد اسمع يقولك ماتمت صحصح معي
ماتمت تسمع ماتمت
وكان نايف ساكت وسند يناظره من بانت عروق نايف
سند :اكلمك انا اسمعني ماله داعي تعصب ارجع اقولها لك ماتمت
وجلس نايف على ركبه وصاريرددها خطبه خطبه خطبه
سند :قوم قوم معي لاحد يطلع وانت هنا قوم
ووقف نايف وارتفع صوته :تسمععععع وووش يقول يقولك خطبه جاي واحد ياخذها مكاني ياخذها بارده مبرده وانا جالس اذوق الويل علشان اطولها وصار يمشي لبيت تركي وسند يسحبه
سند :صاحي انت صاحي وين تبي تبي تفضحنا انت وش فيك انجنيت
ووقفو بنص الشارع قدام بيت تركي بالضبط:انت تتوقع ان باقي معي عقل وصار يضرب على راسه كنت حاس قلبي مو متطمن
سند :ياشيخ يرحم لي والديك امش لايطلع احد منهم واحنا هنا امش
وصرخ نايف عليه :لو تموت محد راح ياخذها لو تموت بذبحها والله لاذبحها واذبح الي بيصير لها لو احد اخذها تسمع انا مانلتها تبي الحيوان هذا ينولها
سند :اششششششششش اسكت اسكت وصار يسحبه ونايف يقاومه وركبه السياره ونايف يصرخ عليه :لاتحرك السياره سند لاتحرك السياره تسمع لاتحرك السياره
ولف سند عليه انت مجنون مجنونننننن تبي اخليك هنا تجيب فينا مصيبه
نايف :انا ابي اجيب مصيبه ايش تبيني اسوي تبيني اروح واخلي احد يجي ياخذها مني صح
سند :انت حماررررر ثور غبي دلخ يقول لك الرجال ماتمت انت تفهم ولا ماتفهم هي رفضته رفضته القرار جاء منها
ولف نايف يناظر قدامه
سند :يخوي اسمعني اسمعني عجزت معك وعجزت افهمك وعجزت فيك البنت ماوافقت ماوافقت ماتبيه هي رفضت واهلها رفضو معها
وسكت نايف ونزل راسه بين كفوفه من جت بس في باله فكره ان احد بياخذها غيره جن جنونه وصار مايحكم نفسه ولا يحكم شعوره ..
ايمان :خلاص هيام انتهى خلاص حبيبي خلاص
وكانت تبكي: ايمان كنت بكون لغيره كنت باخذ غير نايف ايمان غيره ايمان تدرين امس شفت مريض بالمستشفى نفس اسمه وصرت اركض زي المجنونه
ايمان :شلون ؟
هيام :ماادري اكيد انه تشابه اسماء ولا ايش جابه المستشفى والشرقيه تحديدا
ومسكتها ايمان من يدها هيام اسمعيني انتي تبين نايف
هيام :ابيه ايمان ابيه ابيه بكل شيء بعيوبه بكبريائه بشره بخيره ابيه ابيه ايمان
وحضنتها ايمان خلاص هيام خلاص اشش وقومي معي غيري فستانك يلا قومي وقامت معها هيام ودخلت هيام الحمام ومشت ايمان تفتح جوال هيام بس كان مقفل وصارت تجرب ارقام بس مافتح معها ورمت
الجوال وهي تفكر وشلون تسوي ..
وطلعت هيام من الحمام ومسكتها ايمان :تعالي يلا ورفعت لها المفرش ودخلت داخله هيام وانسدحت جنبها ايمان وصارت تمسح على شعرها وتفكر بخطه تفك هيام من الي هي فيه وصارت تتكلم بداخلها : معقوله هو معقوله تشابه اسماء ماادري الوضع غريب معقوله انه جالس يعاني نفس معانتها طيب اربع شهور وين كان دامه يحبها صدق وين كان طول الاربع شهور ونزلت عيونها من شافتها نامت قامت من جنبها وصارت تدور بالغرفه ولبست عبايتها وطرحتها وطلعت من الغرفه ومشت لغرفه ضحى ودقت عليها الباب وفتحت لها ضحى ودخلت ايمان
ضحى :شفيك ايمان
ايمان :اسمعيني ضحى بقول لك كل شيء تمام
عقدت حاجبها ضحى وجلست قدامها ايمان وصارت تقول لها كل شيء ..
بغرفه تركي كان جالس وكاتم غيضه وفاطمه قدامه
تركي : انا شلون كنت بزوجها لواحد كلب مثل هذا شلون
تنهدت فاطمه : خلاص تركي راح بالي مايحفظه
تركي : ليش رفضت تنزل
رفعت كتوفها فاطمه :ماادري قالت ماتبيه ودخل عندها عزام وبكت من شافته وصارت تطلبه انها ماتبي تنزل وعاد صار الي صار
تركي:لاحول ولا قوة الا بالله اووووف
ايمان :والحين نبي نحل هالمشكلة لازم نجيب رقم نايف بدون ماتدري
وضحى الي كانت تناظرها بذهول :الحين هذا كله صار لهيام وانا ماادري عنه
ايمان :مو وقت عتاب اختك تعبانة وحالتها صعبه وانت
ملاحظه التغيرات الي صارت فيها
تافف ضحى :وش الحل الحين من وين نجيب رقم نايف
ايمان :ماادري علشان كذا انا جايه عندك
وسكتت ضحى من طرا على بالها نهار :طيب ايمان انتي الحين روحي لها وانا بحاول اشوف حل واجيب الرقم
وقامت ايمان :يلا انتظرك
هزت راسها ضحى وطلعت ايمان ترجع لهيام
واخذت جوالها ضحى ودقت على نهار ورد عليها
ضحى:نهار اسمعني وصارت تقول له كل شيء صار
نهار :كل هذا صار منجدك انتي
ضحى :اي والله والحين ابي منك رقم جوال نايف وسكت نهار
وكملت ضحى اسمعني نهار الغريب مو هنا الغريب ان هيام تقول شافت مريض امس جاها المستشفى نفس الاسم
نهار :بالمستشفى وش تقولين انتي
ضحى:قاعد اقولك تشابه اسماء
نهار :اي تشابه اسماء نايف عندكم بالشرقيه
وشهقت ضحى :يعني ماكان تشابه اسماء
نهار :يلا يلا بدق عليه
ضحى :نهار لاتقول له عن موقف المستشفى تسمع دق عليه على اساس انك بتتطمن وارسل لي الرقم لاتنسى
نهار :طيب طيب وقفل منها وهو يدق على نايف ورد نايف عليه
نهار :نايف وينك
نايف :بالشرقيه وش الي ويني
نهار :يلا تمام انت بخير
نايف :اي
نهار :تمام يلا مع السلامه كنت بتطمن عليك وقفل منه
وتنفس نهار براحه اخذ الرقم وارسله لضحى
ومن شافت نهار ارسل الرقم دقت على ايمان وردت عليها
ضحى :ايمان جبت الرقم بسرعه تعالي مااقدر اجيك اخاف
هيام تقوم وتحس بشيء
ايمان :يلا جايه جايه وقامت ايمان لها وفتحت لها ضحى الباب ودخلت عندها
ضحى :شوفي ارسلت الرقم لك
ونطت ايمان على ضحى وضحكت ضحى وابعدت عنها
ايمان :من وين جبتي الرقم
تلاشت ضحكه ضحى :ايمان معليك جبته ومو قلتي لي تبين الرقم هذا هو
ايمان :يلا مو مهم اهم شيء جاء الرقم
هزت راسها ضحى بايه :بتدقين الحين
ايمان :اي ان شاء الله يرد
<<بالفندق >>
كان على سريره وسند بالكرسي الي جنه ونايم
ولف ظهره بينام بس لف من شاف جواله يدق واخذ الجوال
وشافه رقم غريب ورد
نايف :نعم
عضت شفتها ولفت على ضحى وحطت الجوال على سبيكر
نايف :الووو مين
ايمان :نايف
نايف :اي من معي
ايمان :انا ايمان صديقة هيام اتوقع انك تعرفني
قام وهو يوقف :اي عرفتك وش فيه هيام فيها شيء
ابتسمو ايمان وضحى من سال عنها
وكملت ايمان :لا مافيها شيء بس تقدر تجي الشرقيه
ماتردد دقيقه وحده في انه يقول لها :انا بالشرقيه
ايمان :يعني مو تشابه اسماء
عقد حاجبه نايف:مافهمتك
ايمان :اقدر اشوفك طيب ضروري والليله اذا تقدر
نايف :ارسلي الموقع جايك
ايمان :تمام وسكرت منه وقامت تصرخ هي وضحى ويضحكون اهاه مانسى طلع حتى هو عايش نفسها اوووووووهه اخيرا حضنتها ضحى الحمدلله وابعدت عنها ضحى :بتروحين له
ايمان :اي اي بروح يلا وتعالي عند هيام علشان اذا قامت ماتحس بشيء
وطلعت ايمان من الغرفه وضحى معها ودخلت ايمان اخذت شنطتها ومفتاح سياره هيام وطلعت وقربت منها ضحى وهمست :علميني وش يصير تمام
ايمان :تمام تمام خليك عندها ونزلت ايمان وطلعت الشارع وركبت السيارة ومشت لين وقفت عند حديقه واخذت جوالها وارسلت الموقع لنايف ودقائق ووصل ونزل لها وكانت واقفه وتنتظره ومن شافته اشرت له ومشى لها نايف
ايمان :اهلا شلونك
كان جالس يلقط انفاسه الي جالسه تضيع منه :الحمدلله وانتي
ايمان :انا ماراح اكون بخير لين اقولك لك كل شيء تعال نجلس هناك
مشت ونايف وراها وجلسو على احد الكراسي الي بالحديقه
وحطت كفوفها فوق بعض ونطقت :شوف نايف انا بختصر عليك وليش دقيت عليك دقيت علشان اقول لك ان هيام ماصارت هيام وان الحب
صار متبادل بينكم
فتح عيونه يناظرها بذهول وصدمه من كلامها من قالت له الحب
صار متبادل بينكم وكملت ايمان يعني من الاخر نايف هيام تحبك وتعبانه من بعدك صارت مجهوله لكل الي حولها تغيرت جدا من بعد ماطلعت من حياتها هيام مو عايفتك وتبيك بس الظروف الي بينكم هي الي وصلتكم للمرحله هاذي
وانت موقادر تنساها وانا متاكده وهذا سبب وجودك هنا وهي مو باقل حاله منك اقطع مسافتك الباقيه معها بس السوال الي ببالي وين كنت
طول الاربع شهور الماضيه ؟
كان يناظر ايمان وهو مو مصدق يحس نفسه يحلم واذا كان
حلم يتمنى انه مايقوم منه وبلع ريقه:كنت بدوره عسكريه
سكتت ايمان تناظره وعرفت انه كان بنفس وضعها واسوء
نايف :انتي الحين عارفه وش تقولين انتي متاكده من كلامك
ابتسمت ايمان :عارفه علشان كذا دقيت عليك هيام تحتاجك نايف وانت نفس الشيء ماتحس انه كفايه فراق كفايه ايام عشتها بدونها وعاشتها بدونك ووقفت ووقف نايف معها الحقني ومشت تركب السياره وركض يركب سيارته ويمشي وراها ودمعت عيونه من حجم الكلام الي سمعه وصار يمشي ورا ايمان ووقفو عند بيت تركي ونزلت ونزل معها ومشت له
ايمان :اسمع تعال ورا البيت وبجيبها لك ودخلت البيت وراح نايف يركض ورا البيت وهو حاليا مو حاس بشيء و الاكيد انه مو مصدق
ولا شيء من الي صار له
دخلت ايمان الغرفه عندها وشافتها صاحيه وضحى جالسه جنبها
ومشت لها :هيام قومي معي ابيك بسرعه بوريك شيء عند السياره حقتك
عقدت حاجبها هيام :وشو ايمان
ايمان :الحين انتي امشي معي وانا اوريك بسرعه وصارت تسحبها
هيام :يالله ايمان مالي خلق
تافف ايمان :امشي يابنت اخلصي علي بسرعه
هيام :اووووف ايمان اوف اصبري البس عبايتي طيب
ايمان :بسررررعه
هيام :مشت هيام تفتح الدولاب وتلبس عبايتها وتلف طرحتها ونزلت مع ايمان
وصارت تسحبها ايمان مع الدرج وهيام وراها وش فيك ايمان خوفتيني
ايمان :اشش امشي وبس الحين تعرفين
سحبتها ايمان معها وطلعو برا البيت
هيام:انتي شفيك هاذي السياره وين بتوديني ايمانننن
ماردت عليها ايمان :وهيام تصرخ عليها ايمان اكلمك انا ايمان
ايمان :اشش بقولك شيء ورا البيت امشي
وكانت هيام تقاومها :انتي صاحيه وين بتوديني اخر الليل ورا البيت ايمان وجع
ووقفت فيها ورا البيت ايمان :اسمعي بسالك سوال واحد بس
تمام وابيك تجاوبيني
هيام :انتي مريضه عقلك وينه ابي اعرف مطلعتني علشان
تساليني سوال مريضه انتي
تافف ايمان :اي مريضه اسمعي تذكري يوم كلمتك وقلتي لي لو يوم
جاني نايف وقال لي انه يبيني وش قلتي بعدها
حطت يدها على خصرها وتاففت
ايمان :جاوبي وش قلتي لي بعدها
هيام :وش جاب نايف على بالك الحين ابي اعرف وش جابه
ايمان :اووووف يابنتي جاوبي اخلصي علي
هيام :اي قلت لك قلت لك لو جاني نايف بيوم وقال لي انه يبيني ماراح ارده
ابتسمت ايمان:اجل جاء الوقت الي ماتردينه وراحت ايمان وصرخت عليها هيام وقبل تكمل كلمتها تسمرت بارضها من سمعت صوت تعرفه زين
غمض عيونه ورجع يناظرها وهي واقفه ومعطيته ظهرها
نايف : ابيك ابيك تسمعين ابيك وابي ارجعي اعيشك وابي ترجعين لي واحبك اكثر ابي ارجع املكك ومشى قدامها ووقف يناظرها ارتفعت اصوات انفاسهم واصوات قلوبهم وصارت تناظره ويناظرها لدقايق طويله ودمعت عيونهم من كثر شوقهم ولهفتهم واقفه وتناظره وكانها تحلم اما عنده فهو مو مصدق للحين ورجع يكمل : ابيك وودي فيك ورغبتي فيك ماانتهت وللحين ابيك واطمع فيك وابيك حلال لنايف وابي قلب نايف يرتوي فيك وابي الدنيا ترضى فيك وابي قلبك وابي شعورك لو انك نار ابيها لو انك جحيم راضي احترق معك راضي ابيك كلك لي لحالي وبس مابي احد يشاركني فيك ابي امسي واصبح على وجهك ابي انام واغفى على حسك وعلى وجهك ونظرة عيونك محتاجك ابي جفافي يتبلل بجيتك
ابي تعبي ينتهي عندك مثل مابدا عذابي من عندك ..
واقفه قدامه وتناظره وتبكي من كلامه وشوقها الي دمرها ودمر
نفسياتها ودمره معها
وصارت ترجف ونطقت :ناييف
وابتسم وغمض عيونه من سمع اسمه منها :عيونه عيون نايف عيونه
وصارت تتكلم وسط دموعها : نايف انا تعبت تعبت نايف بدونك تعبت في غيابك تعبت منك وتعبت عليك نايف اشتقت لك نايف اشتقت لك
غمض عيونه من سمعها تتكلم معه لاول مره بهالشكل هذا وكملت من لما لفيت تعطيني عرض اكتافك وانا وقلبي التفتنا لك نايف احبك احبك احبك واموت فيك واموت منك واموت عليك والاربع شهور كانت سنين علي سنين اليوم يمر علي بسنه اشتقت لكل شيء فيك ولكل شيء جمعني فيك وكل الايام الي كانت معك بشرها وخيرها طول عمري عقلي الي يقودني بس الحين قلبي الي يرد عليك نايف ابيك ابيك نايف وهالمره ماراح اردك ماراح اردك نايف انا ابيك
وضحك وسط دموعه وضحكت معه وقربت تبي ترمي نفسها بحضنه بس حط يده يفصل بينهم ونطق :انتي الحين ماتحلين لي بدخل اكلم ابوك وبعدها اوعدك ماراح تطلعين من حضني
ووقفت مكانها وحطت يدها الثنتين تحطها على وجها وصارت تضحك وهو يضحك معها ونقدر نقول جاب الله لقى وطاحت عينه بعينها ....
هيام:بس ابوي نايم الحين
نايف :نصحيه
وضحكت هيام :نايف اسمعني باقي شوي وتصبح انتظر لين تصبح وبعدها تكلمه
نايف :انا اصبر لصباح ماعاد فيني شده هيام
هيام :نايف اسمعني انتظر لين تصبح بعدها نكلمه
وجلست تقنعه لين وافق
نايف :خلاص ادخلي انتي الحين وانا بحاول اصبر نفسي لين تصبح
ووقفت تناظره ماتبي تدخل وانفجر يضحك عليها
هيام :نايف وشلون ادخل
نايف :يعني نصحي ابوك
وضحكت :لا خلاص خلاص روح وبكره اشوفك
نايف :مو على كيفك بكره بعد ساعتين وانا عندك
ابتسمت ودخلت البيت وركضت تطلع غرفتها
ومشى لسيارته :اوووووووووه وتنفس براحه بعد ماكان مكتوم في
طول الشهور الي غابت فيها عنه ركب سيارته ومشى للفندق ورفع صوت المسجل من حس ان قلبه يرفرف بداخله جاب الله لقى وياحلوه من لقى
دونك ماقدرت اعيشً أنا صوتك انا احساسك
أنا نبضك ويكفيني كفايه انت بهالدنيا
واحبك يانظر عيني ..ظلام الليل في صبحي
اذا انك تخليني تصدق يانظر عيني
بدونك ماقدرت اعيش احس إنك هوى قلبي
وكل نبضة بشرياني وغلاك انت ملى عمري
ومالي كل وجداني حنين الشوق ياخذني
لعينك انت وداني لان قلبي معك راضي
ولايسال حبيبي ليش.....
وصار يردد مع الاغنيه وهو بيموت من الفرحه بداخله واخيرا ضحك وفرح قلبه ورضت نفسه وانزرعت بقلبه حدائق الدنيا كلها وقف عند الفندق ووقف وقبل ينزل اخذ جوال ودخل يحجز تذاكر ومن لقى اتسعت ابتسامته اكثر ونزل يدخل الفندق ودخل الاصنصير وصل الدور وفتح الغرفه ومن دخل شغل انوار الغرفه ومشى لسند يقومه وسحب المفرش عنه
وصار نايف يغني عند سند وسند يفرك عيونه
نايف :قوم نايم قوم الدنيا صارت عيد وانت نايم قوم
وصار سند يناظره بنص عين :انت مريض متناقض عندك انفصام مره تضحك مره تزعل مره تحزن مره تغني مجموعه انسان انت
وصار يضحك نايف :اهاه ياسند الدنيا رضت علي رضت
سند :وش الي رضت وش تقول
وجلس نايف قدامه يقول له ....
اما عندها مو باقل حاله منه مبسوطه وسعيده كيف تبدل حاله كذا ومشت تحضن ايمان وضحى ومن شافوها صارو يضحكون عليها وهي بحاله غريبه طايره طايره من فرحتها :اهاه بنات اهاه قلبي قلبي يابنات احس اني بموت ايمان اقرصيني وضحكت ايمان وهي تقرصها
هيام :يعني مو حلم
وضحكت ضحى:يمه هيام شفيك كذا
هيام :الحب ضحى الحب الحب وصارت تدور حول نفسها وتغني
ووقفت عند ضحى :ضحى تكفين اعزفي لي
وضحكو عليها وقال ايمان :يويلي البنت انجنت
ضحى :تبين ابوي يقوم وياخذ البيانو ويكسره على راسي وعلى راسك
هيام :تكفين ضحى ابي اسمع شيء
ضحى :يلا امشي بس اذا صار في البيانو شيء ترحمي على نفسك
هيام :ياشيخه اعطيك روحي الحين لو تبين بس اعزفي لي
ضحكت ضحى: يلا تعالو ننزل تحت
ومشو وراها ونزلو وفتحت ضحى البيانو وجلست على الكرسي حق البيانو
ضحى :بعزف شيء يناسب وضعك الحالي
ياه إستنيت الفرصه تجيني و أحكي معاك
ياه أحكي و أقولك ع اللي في قلبي اللي بيهواك
ياه إستنيت الفرصه تجيني و أحكي معاك
ياه أحكي و أقولك ع اللي في قلبي اللي بيهواك...
وصارت البنات يرقصون عندها وايمان الي ميته ضحك على هيام بس مبسوطه وهي تشوف ضحكتها وفرحتها وصارت تمسكها ايمان
وترقص معها وكملت ضحى ..
شايف حبيبي شايف
سامع همس الشفايف
وكلام قلبي اللي خايف
يحكي لغيرك هواه .....
