نأى بنفسه بغرفة المكتب الخاصة بعمه بعد تلك المشادة الكلامية بينه وبين أخته الصغرى وأختار أن لا يعقب على حديثها الذي آلمه وأكتفى بلحظتها بالنظر لها نظرة تخاذل وتركهم متوجها للمكتب، وها هو لا زال هناك حتى بعد مرور ما يقرب من الساعتين.
اختارت ياسمين أن تتركه بمفرده بتلك اللحظة وهي تعلم ما قد تجابهه إن ما تدخلت بالحديث أو حاولت أن تلطف الاجواء فآثرت على تركه حتى يهدأ من تلقاء نفسه كما اختار البقية من عائلته نفس الموقف وجلسوا بالبهو يتحدثون لما آلت اليه الأمور.
نظر مراد لتلك التي لم تكف عن البكاء منذ شجارها المزعوم وسحبها ليجلسها بجواره وبدأ حديثه معها مربتا على ظهرها بحنان:
-اهدي يا چنى وكل شيئ له حل.
رفعت وجهها ترمقه بنظراتها الحزينة وتكملت وغصة بكائها لا تزال عالقة بحلقها:
-هتقولي اصبري لما فارس يهدى وهيغير رأيه بس يا أونكل مامي معندهاش وقت والتحقيقات شغاله ومحبوسه على ذمة القضية.
رد مراد مهدئا صوته بعد أن أزعجه نبرة صوتها العالي:
-كده كده النيابه بتوكل محامي من عندها لو المتهم معهوش محامي ف...
قاطعته مندهشة من حديثه:
-هو حضرتك عايز مامي تحضر مع محامي درجة تالته عشان يجيب لها اعدام!
زفر بأنفاسه بعد أن يأس من تهدأتها وتكلم أخيرا:
-أنا عارف إن الوضع كله صعب بس انتي ضاغطه على فارس جامد اوي وكمان بتتهميه بحاجات محصلتش، وقت مدحت ما دخل السجن فارس فضل واقف معاه ووكله أكبر فريق محامين لحد ما...
عات لمقاطعته من جديد:
-لحد ما خد حكم ب10 سنين ودلوقتي مطلوب مني أسكت لحد ما مامي تاخد حكم زيه او اكبر منه بحكم أن معهاش فريق المحامين اللي حضرتك بتتكلم عنه.
تدخل مازن بنهاية حديثها:
-كلنا كنا هناك وشوفنا اللي حصل يا چنى، وأنتي نفسك شوفتي مامتك بتعمل ايه وكلامها مع فارس ومحاولاتها إنها تشككه في نسبه وعيزاه بعد كل ده...
هنا رفع مراد حاجبه ولم يستطع أن يتكهن عن أي شيئ يتحدث ابنه، ولكنه كان قد استمع لدينا وهي تقص عليه حديث فريدة المهترئ وقت القبض عليها واتهامها لفارس أنه أراد لها السجن هي وابيه المزعوم:
-ايه حكاية النسب دي؟ ودينا برده قالت لي كلام شبه كده!
انتبه مازن لما ألقاه على مسامع والديه واضطر ان يخبرهما بما علمه:
-فريدة هانم كدبت على فارس وقالت له إن عمي مدحت هو ابوه وإن عمي ماهر الله يرحمه كان عارف وساكت وفارس اضطر ينبش قبره عشان يعمل تحليل اثبات نسب عشان يتأكد.
بالطبع وﻷنهما طبيبين فقد تحدثا تباعا واحدهما يعقب على الآخر:
-اصلا فارس لو عمل تحليل ﻷي عينه مني أو من مدحت هتطلع فيها تطابق لأننا أخوات.
وأضافت دينا موضحة:
-وعشان يتأكد لازم يقارن بين النسب وساعتها يتأكد انهي منهم هو ابوه الحقيقي.
