هجين الضلام

بارت10

الحلقة العاشرة ... انتزاع ....

(احداث ماضي )

دفرت امي نورس الباب و وسعت عينها بالمنظر كدامها وصرخت:
- عزةةةةةة يمصخمين لك ابراهيم فوك ما علموك ولد الحرام عالشرب جاي تخوني وي هاي استغفر الله شلون الك نفس بيها.
لملّمت امي نفسها وهي تحس بأهانة انوثتها و كرامتها بس جانت ... تفكر بية ركضتلي لكتني بزوية كاعد حضنتني وبداخلهة الم وجروح... النظرة الي شفتها بعين امي لسة اذكرها جانت نظرة وحدة ما بيدها شي و ما تملك غير الدعاء الدمعة الي بعيونها من خلت خدها بخدي حسيت جوتني جانت دموع كلب ام محترك على ابنها ....ظلت تفرك بيدي ورجلي تدفيني وتحضني تحوم علي مثل حمامة تخاف على فروخها، شالتني لغرفة خواتي وهي تخليني يم الصوبة و تدفي بية وتتحسب الله :
سماح: - سودة علية يومة بية ولا بيك، رفعت ايدها واحتسبت ربها وهي تكول:- يارب ترضاها هم صايرة بيا زمن احنا والله حرام هم اكو اب مسويها ويذب ابنه بالبرد لا غطة و لا شي ... يارب حسبي الله و نعم الوكيل...
جانت كاعدة يمي و كلتلي
-يومة، بيان وليدي شمعتي .. بعدك بردان ؟
باوعتلها و حبيت استجلب اهتمامها رغم هي دفتني يم الصوبة وغطة جابتلي فكتلها:-
- اي بردان كلش شبكيني خل ادفة اكثر ....
ضميت نفسي بحضنها وكضيتها بيدية حيل مجلب بيها لا تكوم و تعوفني لان الغيرة داخلي جبيرة اغار على امي من كل الناس و اريدها بس الي ...
باوعت لكربلا :
-بنيتي ريكي اخوج صبيلة حليب دافي يدفيه على ما اسبح.
كامت كربلا و كلتلها:
-يومة سماح امي ما تقبل تكول مالجن غرض بهذا الاجلح ...
نفخت سماح:
- ااوووف ربي؛ شنو من ملة دخيلك ربي، راح تنكلب بينا الدنية، ابو ميريد ابنة، واخت متريد اخوها، سترك ربي! حنن كلوب الناس على وليدي ...
بيومها ما رحت للمدرسة و ظليت مقيد امي و لازكلها وين ما تفتر بالبيت اني وراها و عيني عليها يمكن احساس داخلي يجي يوم افقدها ....
استمرت الحياة بهاي السنة على نفس المنوال و نورس تفتعل المشاكل حتى تنطرد امي....
بعام ١٩٩٩ اني سادس ابتدائي، بدت ملامحي تبرز وبشرتي تنطي لون محبب برونزي سمار جميل داكن بيه لمحة ذهبية اليشوفني يستغرب اني ابن ام سعيد و زاد رونق عيوني من جمال ملامحي وشكلي .... ...
جان عد بيت خالي مناسبة طهور فرحت وي امي، طبعًا نادرًا تاخذني الخوالي، اعتقد يحسسونها اني نشاز عنهم، او لأن والدي رجل ابيض و خوالي يكرهون ابوية فيكرهوني على كرهم للوالد ...
جاي نلعب وي ولد وبنات خالي اني مثل اي طفل يستهضم من يصيحوه ابن ابو العرك ...
المشكلة الي صارت ابن خالي غش بالدعبل وشفتة واني تعاركت وياه فعيرني ..
-لو بيك خير مو ابوك يشرب عرك ..
جبت الدعبلة وشمرتها عليه وكعت بسنونة و نزل دم منه و هجمت اضربة بوكسيات لان اني اصلًا عصبي و من اعصب ما احسب حسابات قبل اي ضربة ولا الجأ للتفاهم افقد حس الادراك التموا يردون يشيلوني منه و طلعوا الكبار يصيحون ويغلطون علي ...ضربني خالي و هد على امي .... بين الغلط وبين حتى الفشاير ...
-كل ما جيبين هذا..........، و ياج يسوي طلايب بعد منو ابوه غير ابوه شراب و ساقط امداني على الورطة التورطناها وي هاي الملة الزفرة ...
امي :
- خوية على كيفك جهال! اليوم يتعاركون ، باجر يصاحبون وبيان اني اطيح حظة شلون هيج يسوي احسبها بوجهي ....
دفع امي و كلها
- يا جهال ها .. شوفي الدم لو كاسر سنون الولد ربحي ببن ابو العرك ..شوفي سماح لو ما اخوج ذاك قنعنا و الا اني ما قابل تاخذين ابيض ناس مشكلجية و خوية بلا زعل تجين هلا بيج بيتج بس هذا الوكح لجيبيه وياج..
ضربت امي صدرها :
- يا خوية صدك تحجي ليش خوية غير هذا ابني ...
زعلت امي وهي تبجي و ظلت محتارة ترجع هسة تتعير هذا حال المرة من تصيرلها مشكلة ببيت اهلها تسكت و تتحمل لا تتعير بيهم من ترجع كبل موعد رجعتها ..
للعصر انسحبنا والطريق كلة ترزل بية وتضربني على وكاحتي
:- لك هااا اها هاي ذاني جريتها اذا بعد اخذتك لخوالك، ليش بيان حرمتني من طلعتي بعد لهلي ليش يومة ما تعرف تكعد حالك حال الصبيان بس عرجك نكس على ابوك ...
دخلت هي للبيت واني عفتها لان رقيم و صديقاتها يلعبن يم بابنا وكفت اباوع لجيران جدد حطو يمنا ..
رحت اشيل من السيارة غراض وياهم واساعدهم
طلعت بنية بكدي انطتني نساتل بيدها
: شكرا شسمج اني بيان ..
ضحكت على اسمي و كالت
- و اني صابرين ذكن البنات خواتك
-اي و بت عمي هم تجين اعرفج عليهن ..
ضحكت وكالت :
- اي اريد العب وياهن ...
- انت بيا صف ..
كلتلي :- اني بالسادس ابتدائي وانت ..
دنكت و اني احاجيها:
:- اني همات بالسادس راح تداومين ويانا ..
اجة نؤاس وجرني ...
:- تعال شعندك يم هذول مبين عليهم محافظات شفت شلون تحجي تعال لا صير زنانة و توكف يم البنات ...
درت شفت رقيم مبوزة و اجت دفعتني وكلتلي:
- نكلك تعلب ويانا ما تقبل تكول ما العب وي البنات وهسة داك سوالف وي هاي الغريبة ..زنانة كرطفوا ذانة على لعب البنيات ....
و ظلت تكرر بهاي الاغنية القديمة الي اصولها اعتقد فارسي و كفاية تصيح وياها هم و تصفك رغم شطولها اول متوسط و ابوية ممنعها من طلعة الشارع ...
جر منتظر رقم و كلي ..
- بيان تعال للبيت لا امي سماح تبسطك، ليش ما تلعب وي خواتنا و رقيم..
- ما لعبت وي صابرين جيران جدد ساعدتهم و هي وياي راح تداوم ...
..
رغم برائة الطفولة بس لاحظت رقيم تغار من صابرين بالمدرسة من تجي صابرين اوقات يمنا رقيم تسويلها عركة و تفشلني وي صديقتي جانت غيرة طفولية بس بعدين دمرت كلشي بسوالفها ...
يوم جمعة عطلة الكل كاعد بس ابوية يروح بالجمع اذا زوج اختي عندة سفر على مود احجار الي كوة يجيبها فترة حصار و مو بسهولة تتحصل ..
او اذا عمي يتعاجز الجمعة يفتح محلة .... يضطر ابوية يفتح محل اليديره عمي هو عدهم محلين صاغة فضة واحجار ثمينة و شراكة بين رجل اختي الي من عمومتنا و عمي وابوية ..
شفت رقيم طلعت من غرفة امي نورس ووياها امها بس رقيم مدنكة و جنها متريد تباوع بوجهي ...
رحت لامي و كتلها :
- يومة يومة يمتة يستوي الغدة؟
كرصت خدي وكلتلي :-