#هجين_الظلام
حلقة ٤٠ و الاخيرة
ركضت العلوية الي ما يوم طلعت الشارع دون عباية ...
بس من شافت سماح واكعة من طولها و الدم من كصتها ..
دنكت يمها سندتها ..
- ها خية فلشت راسج المصيوبة المشهورة ..
ما حجت سماح شي بس ظلت تتلوى ...وتون ..
- علوية راسي ..
جان الالم مثل جاكوك يضرب براسها و حست بعيونها تغوش فشكت بضغطها ...
بدة يرتفع ...
مجان احد موجود من اولاد العلوية كلها بشغالهة وابن عباس بجامعتة ...
جان وقت ضحى بهدعش ..
دزوا على مضمد بالمنطقة اجة من الجيرانهم هو ...
شاف الضربة وهو يعقمها ..
- .. يمة جرح مو عميق بس اضمدة الج ...
حتى ما يحتاج مستشفى ...
ظلت نورس تباوع وصفت وي رفيجاتها الفضوليات يتبسبسن ..
خزرت العلوية ام رنا و هي ووحدة من الجيران الطيبات سندن سماح يردن يكومنها ..
- ام رنا .. ساعة السودة الناسبناكم شلون نسوان مفضوحة وصلفات وجدي رسول الله اذا ما اخلي عباس يربيلج بتج ام العلوم جن ما يسموني علوية بت رسول الله ...
و طبعا دخلوا سماح لبيت السيد.. ترتاح ...
ظلت كربلا متخوفة من دكة امها راحت لغرفتها وكعدت وسكتت وبالها زين عباس ايفاد...
وهي متوجسة خاف يكلولة ..
خاف تخسرة ظلت تدعي رب العباد
- ياربي بس طلعني من هاي المشكلة بعد مالي غرض بأحد التوبة اصير ادمية بس خل تفوت سلامات صخام بوجهي بس لا يكولون لعباس ويطلكني ..
......................
ببيت بيان صبا تنظف وتسال رقيم ..
- شو عمتي تاخرت .. هي كالت من تطبخ اتعلم منها و راح تعلمني اصير سنعة ..
- اكلج بيان على جة اكوم اطبخ .. لو عمتي من النوع الي تحب الكرشة والسوالف جا كلت خذتها السوالف ونست ما طابخة ...
طلعي الدجاج نسوي تشريب عالسريع ... راح اخابرها انت طلعي الدجاج .
- رقيم تكدرين توكفين هواي خاف مو زين ..
- حبيبي جسمي تعب من النوم خل اتحرك زينة انة بس انتم مدللينيشاقتها اختها
- مو على مودج انت شنو وادللج على مود النونو اريد اصير خالة و اريدة ينولد بالسلامة ..
كرصتها رقيم
- عابت يلة اخابر عمتي ...
دكت على عمتهة وبصوت مبين باجي الم
- ها يمة ها حبيبة ...
- يمة وينج تاخرتي وبيان ما يحب طبخي يحب طبخج..
- يمة تعبانة تعور راسي و شوي ارتاح وارجع سوي شغلات كلي مشي الغدة ..
- خاف يرزلنا يكول انت واختح و مدبرتن غدة راح اسوي تشريب ...
- لا يمة ما نريد تشريبج تسويه زفر عدج اما تكلين الكبة او دولمة لافتها ومكملتها بالفريز خليها ع النار بس تعريك لا تجثريلها ماي
- صار يمة ...
طبعا بيان برجعتة ذبة نواف يم بيتة ...
مد ايدة وفتح الباب تلكتة صبا
- الله يساعدك ..
ويساعدج خوية وين امي ..
- راحت لبيت السيد الصبح وماكو .. خابرتلها رقيم تكول تعورت براسي
كمز من مكانة
- مو خوش رايحلها باي ..
رجع لبس حذائة وطلع وهو يخابرلها ...
- شبيج يمة بيش متعورة
و لأن تعرف ابنها شنو ظلت متوترة شتكلة وهي ما تحب مصايح ومشاكل ...
- ها يمة ماكو شي بس انضرب راسي بباب بيت السيد ما انتبهت و عالجوني و ماخذة ابرة ونمتلي شوي ..
هنا يم العلوية شوي وجاية
- لا شتجين انة جايج ادري غير تنتبهي يا يمة لو ضاربة عينج شكول لألله يمة لا تطلعين انت صاحبة ضغط و من شوي يرتفع تدوخين وما شوفين دربج يمة اليحبج يجيج جم مرة اكلج ما تسمعيلي الله يهديج يمة .
بداخل سماح حسرة و كلب منكسر ..
- يمة شسوي بعد .. هم اجي يم العلوية وهي مرة جبيرة ما بيها يومية تجيني ..
بس وصل جانت نورس كاعدة ببابهم ويمها رفيجاتها ..
و دك سوالف ...
تعوذ من الشيطان
- اعوذ بالله من مرة بس نميمة و غيبة و الله بيوم يدخلوج القبر خوش منكر ونكير يشتغلونج غسل ولبس ووين اليوجع ...
بس شافتة كامت وهي تحاجي رفيجاتها شو ذن راحن وهي تكلب بعيونها جنها مسويتلها سواية ...
دخلت و سدت الباب مثل الشاردة هز ايدة ...
طلعلة ابن عباس جان مبين توة واصل ..
- هلا بابو نسب تعال تفضل ..
- لا مشكور خوية بس خل امي تطلعلي ..
- تعال عمي يريد يحاجيك ...
استغرب بيان ودخل للديوان ...
دخل السيد الجبير وهو مبين عليه ضايج و مهموم ...
- احنا تدري عدنا اشغال ما نكدر نلزم البيوت حتى النسوان تهيد من المشاكل .
و صراحة يا بعد عمك بيتنا ما يوم حسنا انسمع اليوم ببابنا الناس تلتم و مرت ابوك تهد واختك تطر بيتنا لبيت اهلك بلا اذن معدنا هيج احنا ...
استغرب بيان
- بس كلي شصاير .. ؟
سولفلة كلشي ...
دنك بيان خجلان من السيد و مهموم من سوالف مرت ابوه واخته ...
- يصير خير سيد ما يصير خاطرك الا طيب...
دزلي امي وكربلا خل تجي وياي ...
- عمي كربلاء جنتنا غلطت عدها رجال يحاسبها بس يرجع وانة ناوي اخلي حد .. وخابرت رجلها راجع باجر ..
ظل بيان مدنك
- عمي منها لرجلها انة تعبت فشلتنا و هي صارت منكم وبيكم و رجلها خل يكسر شوكتها من هسة لا تالي تتمرجل عليه مثل سواية مرت ابوية بابوي ...
طلع واخذ امه وياه وصلها للبيت نومها و غطاها جانت صبا تحوم لكت بسماح الام الي مكدرت حوراء تحسسها ...
- بيان شبيها عمتي ...
محجة شي عيونة حمرة من الاعصاب و ما يتحاجة ...
امه توصيه
- يمة وليدي هدي يمة ما بية مشاكل تولي يمة ...
- يمة سكتي واليسلم راسج ...لو ما السيد حجالي تسكتين وتضيعين حكج ...
طلع و راح لرقيم الي جانت تحضر بالغدة ...
- رقيم ما اشتهي انة طالع تسأل امي كليلها نام و تعبان ...
- بيان قبل شوي خابرت سعاد و سولفتلي الصار حباب عوفهم بلا مشاكل ..
رفع حاجب وكللها ...
- من كل عقلج !
كضتة من زندة ...
- بيان عوف خالتي هاي بيها بلة و عمتي شسوي تروح للسادة المفروض من كركر دخلتلهم امي سماح تكف ...
عصر ايدها حيل
- اي بلة يا متحجية ... شلون بلة لان هذي طايحة الحظ دخلت لبيتهم جنة الناس تكف بعد متطب وتدخللهم رقيم انت مريضة ما اريد يلوحج طشار فلا تدخلي ..
خلا و طلع ورقيم تضرب بخدها
- يمة شلون بيه حيسويها كاتل ومكتول ...
راحت لعمتها بس ما حجت شي
- يمة .. يمة ...
صوت تعبان ومتاذي وهي تفز من نومتها
- ها
- يمة راح اجيب غداج هنا ..
ونت من الم راسها وهي تكللها
- ما اشتهي بس حبوب الضغط ناوشيني ياه ..
- اكلي شوية يا الله تشربين دواج صبا اخذي وسام مسويها هوسة وامي سماح مريضة ...
وسام ما قبل حاجاها ..
- بيبي منو وياج بس كليلي اروح اضربة ...
جرتة وبوستةوهي بين تغمض عينها وبين تفتحهم
- يمة فدوة للوليدات ..روح يبعد كل عشيرتي وطوايفي العب وي صبا
يمة صبا يصبيان لعبيه بالاكسو ...
ضحكت صبا و ووسام
- بيبي اكس بوكس
..
- اي يمة نسيتة روحوا اناملي شوي راسي مصدع ..
.................
ببيت ابراهيم .....
يدك بالباب محد يفتح لا وقافلاتة ....
رفس الباب وهو يطلع حركتة بيه ...
خابر سعاد الي ترجف وتكلة
- خوية هدي والله بعد امي ما توصل لامك بس هدي
جان معصب كلش كلش
- انعل ابوج بت الكلب فتحي الباب لا ادفنج وي امج اليوم ...
- خوية تهدي يا الله افتح ...
- لا تفتحيه ...
سد النقال وضمة بجيبة ....
و طفر من الحايط وركض لباب المطبخ دفرة و دخل شردت البنات و سعاد و ام نورس للغرف ...
دخل على ابوه ..
- وينها ال ** بت ال * تضرب امي خوب كرب وبلاء فلتت مني ولجن مفضوحات نزلت روسنا بالمنطقة من سوالفجن ...
صاحت بيه نورس
- ابن سميح **** الحرامية جاي تتمرجل علي ...
دفر الباب و ظل يدفر بيه لمن كسره ...
هجم عليها وخنكها ...
ظلت تصرخ ...
ابوه بكرسيه يبجي ويصيحة
- يبة عوفها لا تموت وتنسجن و انت وحيدي ...
من سمعت سعاد بامها تصيح لحكوني ركضت توخر بيان و تدفع بيه مهما يكن تبقى ام ..
- لك عوف امي تخبلت ...
دفع سعاد ووكف يباوع لابوه ..
- لهنا وبس لهنا وانتهت وياكم سابقا فرقتوني عن امي
هسة ما اسمح تقتلوها الي ..
يبة مصرفكم يوصلكم وبيتي هذا تحت تصرفكم...
امر عليك بين فترة وفترة تبقى اب و الله موصي بطاعتك..
بس يبة خوات معندي بعد...
بجت سعاد وهي تحضنة
- خوية انة شعلي بس مردتك تموتها تبقى امي ..
وخرها ..
- جزعت منجن كلجن تركني بحالي .. اجيكم عادي اسال و اوفرلكم كلشي ...
- خوية مرايدة منك مصالح رايدة اخو
- انة امي عبدة وغريبة و مو مستواكم فدوم تستنقصوني لان بيه عرج من العبيد .
لذا اجة الوكت الي احفض بيه كرامتي ..
قطع بيان علاقتة بأهلة و حتى موصللهم بس يخابر ابوه الي رجع لسيرة البجي والتوسل ..
- يبة مريض ما تسأل علي يبة بس سعاد مداريتني ...
طبعا منعهم يواصلونة ببيتة ومنع رقيم وصبا يرحلهم ...
اما كركر ...
بيوم رجعة عباس اخذها لغرفتهم و كتلها كتلة ..
- ولج شنو هاي لاعبة لعب بالناس شوفي كركر يمين دين لو مو احبج ما تجرين عدل اطلكج ...
جانت بالزوية تناشغ وهي تحضن جسمها الي مورم ...
- امي تاج راسج ولج عبالي انعدلتي وتداريهم طلعتي من جوة لجوة اي شكوة بعد عليج اطلكج .
و امي تخدمينها ورجعة لبيتي ما ارجعج ...
و هسة خل ادكج دكة بعد على طلعتج دون اذن حتى تتوبين ..
ظلت تبجي وتتوسل
- تبت لا تضرب ...
غمضت عيونها وهي تناشغ شكد بيان يضربها ابد ما تهتم ابد ما يردعها بس الا عباس
..
لا ويهددها بالطلاق هذا اذا طلقها تخسر دفو حبة ..
تخسر كلشي وترجع لاهلها مطلقة ..
- لا تضرب تبت .. اسوي التريدة ما اريد اخسرك ..
- ترحين تطيحين على راس امي و على طليقة ابوج..
- بيان ما يقبل نطب بيتة اعلن هل شي ما يريدنةهز ايدة
- عمي حكة اذا جزعتن الولد و شردتنة ...
استغفر ربة على ساعة الغيظ
- استغفر الله و اتوب اليه ... كربلائي ما اريد اخسرج احبج هواي بس قلة ادب ما اتحمل لا تجبريني اخسرج لا تجبريني اخذ قرار اطلكج ...
شافها تريد تكوم ما تكدر ظلت تبجي من الم رجليها ..
كومها و باوعلها حس راح يحن بس قرر يضبهة شوي فرسم بملامحة عبوس و عصبية
.
- يلة روحي طيحي على راس امي ..
هزت راسها وطلعت و عباس وراها جانت تسبح العلوية شافت جنتها دارت وجهها عنها ...
وهي سبح وتستغفر الله ..
خزر عباس كربلاء ...
دنكت و باست راس عمتها و طلبت السماح ...
جرت نفس العمة
- و الله عباس مرتك هاي ما تنزلي من بلعومي ما اهضمها بس بعد الفاس وكع بالراس ..
جر عباس نفس و بخجل حاجة امه ..
- علويتنا لا تصعبيهة علي هي تابت وراح تشوفون كربلاء جديدة و اي شكوة منج لو على تافه والله وجدي ورسولة اطلك حتى لو ارجع اعيش احلم بطيفها ...
نزلت دمعة كربلاء
- مو كدامهم ..
فشلها
- اششش صوتج ماكو ما ينسمع ..
ظلت مندنكة ...
امه ....
- عباس كلمة الطلاق تهضم المرة يولدي و انت حلفت وانت معصب ما يجوز ابني ....
- ان شاء الله راح تشوفينها بنت الج لان اعرف كربلاء ورى ما ادبتها ما تجازف بية تدري خبل اسويها واطلك لو مو حبيبتي وامنيتي لسنين ...
بيوم بيان ورقيم ما يتحاجون لان عرف بيها متخابرة وي كركر...
فسكت و محاجاها و ظل اسبوع ابد ما يحاجيها من شافته سوالة زعلة هم هي تركتة ...
فهو نايم وتعبان منا صيف سبالت ...
خلت ايدها تسند وجهها وبقت صافنة عليه مبتسمة ..
تباوع لملامحة رموشة طويلة مثل سعفات البصرة ثخينة كلش
و لونة البرونزي خلاها تنبضله بمل شوق بكل حب ....
ابتسمت اكثر وتقربت منه وهي تباوعلة .. .
حست شوي ووجها يلزك بوجهة وشفايفها قريبة كلش من شفايفة ...
رجعت مكانها وايدها جوة خدها وهي نايمة و صافنة عليه
فتح عيونة متفاجأ مثل الي بنومتة وحس بشخص يمه ففز .
انحرجت و متريد تطخ راس سوت روحها صافنة و مو
منتبهتلة و كانما تفكر و مو تتأمله ...
انطاها ظهره ورجع كمل نومتة ...
ابتسمت وبكلبها
- فدوة للزعلان ...
تقربت منه و خلت راسها على راسة وحظنتة . .
و شاورتة
- لا تزعل من اليحبك ..
دار وباوع بعيونها و ابتسم ..
- تعاي ...
شبكها وخلا راسهة على صدره وهي حظنتة حيل اله ...
مرت ايام واسابيع تقريبا شهرين او شهر واسبوع
جان شهر الثامن عيد ضحية ...
و من ورى ملحة امه راح يعايد ابوه و خواتة المجمعات ...
صفن يذكر امه امس .. و امه جانت ما تحب قطع صلة الرحم ..
فجانت تنصح ابنها على صلة الرحم ..
- ابني صلة الرحم الله و الرسول موصين بيها وابوك واخواتك مالهم غيرك وكل بيت ما يخلو من مشاكل ..
وليدي شتزرع تحصد ذريتك تتعلم منك شنو تسوي باجر هم تكبر وتقلدك علم ولدك عالرجة الحنية و ع صلة الرحم ولا تزرع كره ..
لان الكبار تنسى والجهال تعود ...
فخلي ولدك تعود الحنية والكلب الصافي
هز راسة و كلها باجر عيد واروحلهم ..
- اي وليدي عفية اخذ عيال بيتك وروحوا
- واذا ما اجنج يعايدنج مثل ما اروح اعايد ابوية و خواتي ..
ابتسمتلة
- ما ندور يوليدي بدل صير انت الافضل ..
دخل و جان ابوه بالديوان ...
و البنات ملتمات ضحكة وسالفة ومظاهر العيد بس دخل دنك حب ايد ابوه (باسها )
يبة كل عام وانت بخير ...
شبكة ابوه وهو يبجي
- يبة كل هل فترة ما تجي وتسأل ليش وليدي لجن مو ابوك انة ومريض ...
- يبة تعرف ليش
- حكك وليدي ما الومك حكك ...
كام يريد يسلم على خواتة شافهن دارن وجوهن ...عدا نسرين و سعاد سلمن عليه ..
و البقية بدن شوي شوي ينسحبن ...
من امرن كلهم يدورون جنهم ما يشوفوني
يابة جة امي غريبة ما يردوني ...
بين الحك بسبب لجمات اخوتييبو فاضل دخيلك بين الحك
بعجل حط شارتك بالكصو بية ...
وكفاتي شاهد لهم طابع بهدمي
و هسة نكروني ..
وكت حاجاتهم روحة تطك الباب
و من تخلص و لا جنهم يعرفوني
الي انطوني ظهر ومن اجبل يدورون
نفسهم ذول الجنت انطيهم عيوني ...
و كلمن مشى بدربة ... و طش ضعنا
و صار دربهم سوى وانة بدرب خلوني
ظل بيان منحرج و هاي رقيم بس دك سوالف وي بنات عمها ...
- رقيم يلة للبيت امي وحدها يلة صبا ...
ما قبل ابوه ..
- يبة تبقى تتغدون عدنا
و سعاد و نسرين حسن بسواية خواتهن ونذالتهن كلهن صفن وي امهن و كربلاء ...
سونها وحدة بوحدة لان عباس وقت المشكلة خابر بيان تجي كربلاء تطيح على امها سماح واخوها بس بيان رفض وكلة بس توصل اطردها ...
فهنا ردلة الصاع صاعين .
مسحت سعاد دمعة وباوعت لنسرين و بصوت ناصي..
- شفتي العايقات نبذن اخوهن سندهن بتصرفهن يكلله روح لا تجينا يطردن الرجال من بيتة لجن هذا مو بيتة اشتراه بفليساتة ..
- اشش بيان لا يسمع خية ما يستحن هم يجي يوم يدكلة تلفون تعال الحكنا ..
اخذ بيان عائلتة وطلع و هو لمعة بعيونة و شعور النبذ يرافكة ...
دمعتة بطرف عينة بس اعتز بيها جانت الدمعة عزيزة حس ما يستاهلن يذبها لخاطرهن ...
بس بقت الدمعة مغيمة غيمة حمرة ببياض عيونة تحركة و تأذي كلبة ...
رقيم
- بيان شبيك ..
- رقيم ما عايدني دارن وجوهن و عافن المكان شتتوقعيني انة بعد احاجيهن لا والله ...
وانتفضت البصرة ...
ضد الظلم و الطغيان ....
٩/٣ ...
الشارع البصري
مظاهرات تطالب بالاصلاح و تطالب بتوفير عمل للبطالة ...
حالات اصابات كوليرا بسبب مياه البصرة الملوث ...
مرت الايام و يزداد الوضع سوء وتحولت المظاهرة السلمية لمواجهات ..
بعد استشهاد متظاهرين ٢ في قضاء القرنة ...
و بدة يصاعد الامر للاسوء ..
واندس المخربون بين صفوف المتظاهرين لتشويه سمعة الانتفاظة ...
نواف وبيان مروا يشوفون محلاتهم خاف تعرضت للنهب من بعض النفوس المريضة
الي تنتهز فرصة توتر الوضع ...
وطبعا كوة وصلوا العشار .. لان الطرق مقطوعة ..
اجة تلفون لنواف الي كال ...
- شنووو استشهد ....
باوع لبيان و كلة ..
- من عموميتي و صديق الي توفى بالانتفاظة اروح للمستشفى
كال هذا و شغل سيارتة ...
- رايح وياك ...
رقيم تنتظر صار مغرب وماكو بيان و الوضع كلش متأزم ...
ظلت تروح وترجع وايدها على ظهرها و ام بيان هم ضال بالها ...
اتصلت عليه ...
يدك وماكو هذا خلاها ازيد تقلق ...
الساعة بثمانية بالليل هن لا اكل ولا شرب ويتباجن وصوت الرمي بالشارع وريحة حرق التايرات جان مغطي على الجو ...
وسام يلعب يمهن و بيدة لفة سوتلة صبا ...
- يمة سماح بيان ماكو ...
الخوف ...
و لقلق اخذ من حيلهن ...
- ما تخابرن نواف
- يمة ما عندي رقمة ....
- ولج غبية خابري مرتة شبيج ثولة ...
حست رقيم بدمعتها بطرف عينها اول مرة ترزلها عمتها هيج ..
اتصلت بنهلة هم ماكو ... ما ترد ..
ورى نص ساعة ...
اتصلت نهلة ..
- ها رقرق .. جنت بفاتحة و ما اكدر ارد عليج ..
- نهلة نواف رجع الظهر بيان لسة ماكو ..
حجت نهلة بزعل...
- بيان لا نحاجيه ولا يحاجينة ورجلي راح لبيت واحد من سادة البطاط ... استشهد ... راحوا تشيعه ..
- اكيد بيان وياه لان هم طلعوا سوى ..
- والله انة من عيالي اجن علي كالن نواف وي عمومتنا و الوضع متأزم واحد من عشيرتنا استشهد ...
- يارب يمتة نرتاح .. نظل يومية هيج ...
سمعت صوت الباب دخل بيان مترب و عيونة مبينه حمرة ..
بيان يتأثر بسرعة و يبين بعيونة اذا باجي او يضوج...
ركضت رقيم وشبكتة وهي تبجي ..
- والله ظل بالي و الله كلت هاي هية بعد ... راح ...
شبكها وباسها بكصتها ...
- ماكو شي حبي لا تخافين تعالي يا غاليتي ..
جانت امه واكفة ومبين حيلها بايد .. وحيدها هو وتخاف عليه ..
- باس امة ايد تشبك امة وايد تشبك مرتة ...
- الوضع مو تمام ورى الشهداء الي قدمتهم البصرة المتظاهرين قرروا حرق الاحزاب والقنصلية الايرانية..
- اي حل بيهم يستاهلون ...
اجت صبا ..
- الحمد لله على سلامتك ابو وسيم ..
- مشكورة كتكوتة البيت ..
ضحكت و راحت تسوي العشا ...
بعد ما انتهت الانتفاضة باسلوب الاتبريد ...
وسيلة هي انو الدولة اقتنعت بمطالي الشعب
البصري و استلمت فايلات تعين للشباب
و كذلك قررت تعمير الاحواض التصفية ...
منا كويت كالت نتبرع باحواض ومنا كاظم الساهر .
المهم انتهت الانتفاضة وكل الي حصلة الشعب البصري ..
تحسين المياه في بعض الاماكن وامكن ثانية بقت بعدها تجود لاجل مي نقي يكفي لحوائجها
نسبة الملوحة قلت عن السابق وكذلك نسبة التلوث ..
بس عموما الخدمات ما وفرتها الدولة والى الان البصرة مهملة وهي محافظة نفطية ...
اخيرا بعد ولادة التوأم ...
جان يصادف بشهر الواحد من سنة ٢٠١٩ بيوم بارد ....
دنك بيان وهو يبوس طفلينة ...
- رقيم شحلاتهم ههه بس هذا اسمر كلش جنة امي يشبها ...
صاحت بيه امه
- لا يمة معانيه على اهلك ...
بس السمار
بس البنية جنها امها همزين جا شيمشيها الك...
ضحكو و كللها ...
- يمة شنسميهم انة ورقرق ما اتفقنا على التسمية كلنا اذا ينولدون بسلامة تسميهم ...
- يمة الولد سميه امير و البنية اميرة
رقرق
- لا يمة شو مو حلو اميرة
بيان كللها
- خلص اميرة ملكة المهم اسم ...
- ردت اسميها صافنازسماح
- يمة بيان اذا مريتك بنفسها صفي. مدري شنو سموها ليش لا
.
- لا يمة ببالي اسم سلمى للبنت بس ...
شاف رقيم ضاجت غمزتلة امه يغلق الموضوع
- اي المهم بما ان اسم اميرة احسة شوي مو حلو و اسم صافيناز احسة ثكيل امي ما تلفضة..
افكر باسم كلة احاسيس كلة عاطفة ولطف ..
- شنو ...
باوع لرقيم
- رقة
- شنو اسم البنية ادري اسم كلة رقة
- لا هو الاسم رقة
- شلون ..
- اي شبيجن هذا اللون قررت وخلص رقة .
تعاي رقة تعاي يبعد ابوج ..
دنك يبوسها جان تعقج وجهها وتبجي . .
ضربتة امه
- شو وخر انت ولحيتك ولك لا تطولها تسمرك بالزايد وصير جنك ..
شافتة يضحك و هو يلعب بلحيتة .
- بجداحة واحركها الك بس لا زينها وشوف
باس راس امة ...
الوقت الحالي ...
ايران مشهد ...
سكينة غريبة بالنفوس اليدخل للرضا يحس بشعور حلو
رضاء النفس .. وانيس الوجدان ..
السلام عليك يامولاي يا غريب الطوس
كلمات نطقهن بيان وهو داخل حرم الأمام
من زار وطلع ...
رفع راسة للسمة و شاف سرب من حمام مر يسلم عالضريح وطار
.. و فراشة جانت تفتر يم بيان ...
تروح كم متر وترجعلة..
وين ما يمشي حس الفراشة تتبعة ..
حس روح سلمى وياه ..
دمعت عيونة .
- مشتاكلج ... لو تدرين شكد مشتاكلج...
بقوا بأيران اسبوعين ونسة ومراجعة ع رجلين رقيم..
اخر شي قرر الدكتور بعد ما تفطم التوم تسوي عملية لان العلاج ميصير لمرضع...
كاعد وهو يباوع للابتوبة للقصة الي اليوم ختمها بعد مضافلها الاحداث الاخيرة قرر مثل ما مسح خواتة من حياتة يمسح هذي الذكريات الاليمة الي مر بيه ...
داس على دليت ....
و مسح كلشي كتبه لان بقاء هذي السطور حيذكره طول عمره بخذلان اهل نبذوه لانه ابن عبده
يتمشون بشوارع ايران ...
بعد ما زاروا حسوا بمشاعر جديدة داخلهم و حسوا بسكينة واستقرار...
و هم على انغام تراطن العجم يبتسمون ...
.
باوعتلة وبعيونها رسمت نظرة حب حست نفسها تطهرت من كل الضغائن
ما كذب القال الرضا انيس النفوس و اليدخلة يحس بمشاعر تجلب الابتسامة لوجهة
اما بيان بعد الزيارة حس بطمئنية مجان يحسها قبل جان شعور الانتماء طغى على مشاعرة و تنافس وياها شعور الحب فتساوت المشاعر بين انتماء وحب يتجددعنده عائلتة تعوضه عن حياة النبذ الي الى الان يعانيها من ورى جحود خواتة
- بيان خواتك يردن صلح ما كافي يعمري زعل
ابتسم بجروح ...
- مو انة الي اختاريت القطيعة تدرين بالعيد شسوو ...
هذا اختيارهم ما يردوني هسة انة ما اريدهم خل يتحملون العواقب ...
بحاجاتهم ما اقصر لو ينعال عليهن هم ما اقصر بس يا رقيم وربج الكلب جفل وجزع منهم ..
و صدكي يردن يحاجني عدهن مصلحة انت شوفي شيردن انة حاضر بس لا يلعبن دور يحبني او حنينات علي ...
ترى حبل الجذب كصير وينكطع و حب المودة والاخوة بينا انكطع...
دنكت رقيم بضوجة ورى ما حست بيه قرر ينبذهم مثل ما نبذوه ...
و يمكن ابوه الرابط الوحيد الي يمر عليه و اذا صادف
تواجدهن تتلاكة عيونهن بعيون بيان و تحجي قصة
هجين التميز العرقي الي نبذوه بس لان امه سمرة...
من هذي القضية بدا نبذ بيان .. وبعدين توالت امور ومواضيع ...
حالهم حال سبحة بيد طفل يلعب بيها ويشمرها مثل ما يريد وفجأة انكطعت السبحة .
تطشر خرزها بكل مكان ..وصعب بعد تلم ...
حست ايد تنمدلها باوعت لايد بيان وعيونة المبتسمة التلمع بالحب ...
ابتسمتلة و مدت ايدها وخلتة بيده ...
جان وعد بالحب بس بصمت..
ما يحتاج للكلام ..
اكو امور الفعل والعشرة والمواقف هي تبينها ..
ما يحتاج لعتاب او غزل او عبارات منمقة
تمت
بحمد الله
الساعة ١٠ و ٤٣ دقيقة
يوم الاثنين بتاريخ ٢٥ اذار من عام ٢٠١٩
قريبا رجل من بلد اخر .
او ضفائر صبرية
للذكرى / ختمت قصتي هذي وانة كاعدة على جنطة الملابس كدامي غراض مرزومة وكراتين ماعين و البيت احسة مستوحش لان حنتركه لبيت ثاني
حسيت للحظة بحنان تجاه بيت رافقني بحوادث معينة و حبيت اعتذر من هذا البيت على تركه لكن الضروف جانت اقوى ...
و حنطلق لبيتي الجديد الي حتبدي بيه بكل زوية وحايط ذكرى جديدة بيت اخلي بيه لمستي وارتبة على ذوقي
الخاتمة ...
السلام عليكم
هسة اجة وكت اكلكم ليش كتبت الهجين بأسلوب انتقالي الزمن ...
القصة من نهاية عام ٢٠١٧ يعني سنتين معلن عنها
و تحت اسم نزف روح
المفروض تتناول حياة ثلاث اصدقاء
اثنين تعذروا ومقبلو اكت عن حياتهم .
لذا بقت القصة مركونة ..
و اسمها نزف روح...
بيوم نسولف وي صديقاتي كالتلي صديقتي ليش ما تكتبين عن زنوج البصرة .
هنا بدت رحلة ندور قصة لعائلة تسمح تكون قصتهة مثل...
بمنطقتي كان هناك هجين . بس مكدرت اكتب عنه الى ان صديقتي راسلتني و عرفتني على احد الشخصيات ..
و بدت رحلتي وي الهجين ..
اجة وقت اختار سرد باسلوب ما مطروق .
بما ان القصة ما مطروقة واول من طرح قضية السمر والزنج اني و من سنتين جان اعلان . فقط..
فلازم اختارلها سرد ممطروق
هواي تطرقوا لاسلوب البطل يذكر الماضي ويرجعون بالرواية للماضي هواي استخدموا اسلوب الماضي سالفة وتطرح بين الشخصياتحبيت اجعل من بيان ذلك الكاتب الضمني تحت قصة تروى بلسانين
لسان انا الراوي اي الكاتب الي هي اني ...
لسان انا البطل اي بيان وهو يروي قصتة النا ومن وجهة نظره فقط اي هو الكاتب .
القصة تمتاز بتنوع السرد
- انا الراوي اي الكاتب
- انا البطل اي لسان الشخصية
الماضي بالقصة انطرح انواع
الاول من وجهة نظر كاتبنا بيان
الثاني وجهة نظر كل شخصية كذكرى
ثالثا
وجهة نظر الشخصية كسالفة تحكى ...
رابعا وجهة نظري بطرح القصة بلسان الكاتب
..
المواضيع الي تناولتها القصة هي
الموضوع الاساسي
* العنصرية كالتميز العرقي والنبذ
بسم الله الرحمن الرحيم ....
(يَا أَيُّهَا الَّذِينَ آمَنُوا لَا يَسْخَرْ قَوْمٌ مِّن قَوْمٍ عَسَىٰ أَن يَكُونُوا خَيْرًا مِّنْهُمْ وَلَا نِسَاءٌ مِّن نِّسَاءٍ عَسَىٰ أَن يَكُنَّ خَيْرًا مِّنْهُنَّ ۖ )
*العنصرية كالتميز بالألفاظ اي تنابز الألقاب
بسم الله الرحمن الرحيم..
(وَلَا تَلْمِزُوا أَنفُسَكُمْ وَلَا تَنَابَزُوا بِالْأَلْقَابِ ۖ بِئْسَ الِاسْمُ الْفُسُوقُ بَعْدَ الْإِيمَانِ ۚ وَمَن لَّمْ يَتُبْ فَأُولَٰئِكَ هُمُ الظَّالِمُونَ )...
مثلا تسمية العازبة بعانس و تحديد عمر لسن الزواج و الثلاثين هو بداية عنوسية هذي يسموها تميز لفظي وهو انواع ...
احيانا ناس مو جميلة و نسخر منها هذا همات تحت لواء عنصرية الالفاظ من نطلع تعلوقة على خلقة الله ...
( ان تعيب المنقوش فأنت إذا تعيب الناقش.. )
اي ان عيبت على المنقوش اي المخلوق فانت تستهزا مما خلقه الله
ان عيبت على الناقش هنا تكفر بالله فهو الناقش الذي وضع لكل مخلوق قوامه وله حكمة بذلك ...
التميز كاقليم جنوبي و انطرح كتلميح
البصرة مهملة الحكومة ما توفرلها ابسط حقوقها رغم هي معطاء واساس الخير في العراق
طرحت القصة ايضا مضامين عدة لا يسعني ذكرها وردت بين الاسطر ...
شكرا لكم ولمتابعتكم
أتمنىٰ إستمتعو بقراءة قصتي وأشكر وجودكم الطيب 💙
............................
🍀🍀🍀🍀🍀🍀🍀
أينما كان محلي في قلوبكم لا تنسوني من دعائكم
…………………………………………………………………
أنت تقرأ
هجين الضلام
General Fictionباوعلها بخزرة و تفل بالارض يحتقرها 《 دمرتيني من سنين ومن حبيتج جانت هل ليلة دمار اكبر الي كملتي اذيتي يا رقيم 》 ظلت تبجي 《 لا تفهم خطأ ليش عمي مكلك شلون ميكلك؟ قبل العرس》 اخذ جوازة و جنطتة و باوعلها و كال 《 للأسف حبيتج》 و عافها راح ...
