هجين الضلام

بارت39وقبل الاخير

#هجين_الظلام
حلقة ٣٩ وقبل الاخير ...

الالم جان اقوى من طاقتها ..
ظلت تتلوى والبنات يحاولن يشيلنها شغلت ابتسام سيارتها ...
.
و سعاد تحاول تتصل ببيان جان ينطي مشغول ... وما يجاوب
ظلت تدردم ...
- شدعوة شوف الحظ النوب غلق نقالة عيني ازعجناه عود هو مرتك الوكعت وتخربطت قابل مرتي ...
هزت ايدها ..
- الاستاذ ما يرد وتالي غلقة ....
راحت كربلا يم رقيم..
- حبيبتي هسة ناخذج مستشفى خاف مصران الاعور ...
وخرتها رحاب....
- وخري انت وفستانج يسحسح يا مصران هذا وهي تنزف ...
بجت رقيم..
و صارت روحها ببيان ... وهي تناشغ ...
- اريد بيان جيبولي ياه متت ما اكدر
اجت ام بيان تركض ووياها ام داود الي رجعت صداقتها بام بيان ...
بس طبن هزت كربلا ايدها تدردم ..
- يكول امي مريضة .. شو شبيها جنها فرس الريس تتمركض
سندنها وهن يمشنها ونقاط الدم على الرخام ...
النزف مجان قوي ... بس الالام جانت حيل تاذي ...
بقسم النسائية والولادة ...
الساعة عشرة ليلا..
طلعت ابتسام وي الدكتورة الي فحصت رقيم ..
طبكت سماح حلكهة حيل وهي تعصر بشفايفها ودردم على بيان
- هو وين ولى بهل ليل ...
- و الله يمة مدري شمر مرتة علينا وكللها اجي عليج ب ١٢ و جان كاشخ كلش ...
جرت ام بيان نفس
- هو اليطلع غير يحجي يكول وين مولي ...
و هذا وليدي يهتم برويحتة وعايفنا هسة راس براس
يا الله طلعت عمتجن ووياها الدكتورة
راحت يمهن
- ها بشرن شخيرهة
ابتسمت ابتسام و مثل طبيعتها الهادئة الي توحي بالبرود رغم هي داخلها غير .
- ام بيان راح يجيج حفيد جديد بس كون تلتزمون كلش بالتعليمات لان الحمل ضعيف ..
و تدرين وضعها شنو جان ...
- يا صلوات بلكت يتصافون ملينة من ضيجة الخلك ...
- هي هسة نايمة النزف توقف ...
جنة هذا الجنين يصارع حتى يعيش ...
فتعاونو انتم هم اي حركة ممنوع...
و اي علاقة زوجية الى ان تستقر بالحمل ممنوع ...
خجلت ام بيان ...
- عود انت فهمي ابن اخوج ...
عمي لو راد شي وليدي مينكدر ...
كلش خربان مو بيان الربيتة ..
ابتسمت ابتسام واخذتها على صفحة ...
- ام بيان منا الدكتورة ...
حبيبتي بيان مر بضروف و حياة صقلتة لهذا الشي وبعدين انت كل الي ببالج ابنج ذاك الطفل العفتيه ترى كبر وصار رجال لا وتزوج مرتين و عندة طفل من المرحومة وهسة مرتة الثانية حامل ..
عاملي ابنج كرجل مو طفل ...
دنكت ام بيان بحنية وهي تذكر وليدها الطفل..
- بيان بروحة طفل يا ابتسام وما يكبر بنظري ..
وصيت البنات من يرجع وليدي ابو وسيم يجيب وياه ملابس لمرتة نبدللها خطية ..
- الليلة يبيتونها هي ما نزفت هواي الحمد لله ...
باوعت ام بيان لسيد عباس و نواف ..
- مشكورين يمة ما قصرتم..
تعبناكم ...
- حجية خل نوصلكم ..
- يمة موجودة سيارة عمتهن توصلهن انة باقية وي مرية بيان ما يصلح تنترك وحدها ..
ابتسام
- حبيبتي انت روحي مابيج حيل انة ابقى روحو خل يوصلكم السيد ..
و من يرجع بيان خل يجي لمرتة كافي لطلطة ...
ساحة سعد ..
تمثال البيذنجانة
لبس بيان بوت ابو تايرات (سكوتي حذاء بتايرات ) وبدة وي جماعتة ينافسهم وهم يسابقون على الرخام الابيض و يمرون يم الساعة ...
سمع صوت اتصال وكف وراد يزحلك ويوكع شاف سعاد تخابر وكربلا هم مخابرة ..
- خب طيرن لازكاتلي اكيد طلباتجن الما تخلص خل اشوف روحي ولو مرة بالسنة ...
غلق نقالة وظل يدفع بتايرات حذاء ...
اجة صاحبة يمه وظل يدور داير مدايرة وهو يدفع بتاير حذاءه ..
- اللمة ناقصة نواف ..
يا الله بعد ما جنا ولد منطقة وحدة من زغر هسة تفرقنا ...
ضحك بيان..
- ماكو فراق .. جاي نلتقي.. كل فترة ...
اسبوع الجاي اخذ المرة ايران للعلاج ..
بس اول اونسها كم يوم ما سوينا شهر عسل ...
بعد صادفت مرض مرتي وسافرت ركض ركض..
الله يرحمها و يسكنها فسيح جناته ...
باوع للساعة ...
- كل هذا الوقت طار ولا حسيت بيه ..
شباب خل نروح نتعشا بمطعم شوي بعيد خوية مروان كافي لعب ...
يلة نتعشى ونرجع البيت هسة ب ١١ .. تأخرت على امي ومرتي ...
مروان ...
- هي مرة بالعمر يلة خل نروح شنسويلك بعد...
محمد...
- اكلكم نروح للجزائر لو اقرب لبيان للجبيلة نتعشى بمطاعم منطقتهم ..
بيان..
- اي هيج احسن حل الي هم حتى ما تضطرون توصلوني لمنطقتي قبل لا ترحون...
بالجبيلة قرب مول تايم ...
اختاروا مطعم شعبي طاولاتة بالشارع بنص الجزرة الوسطية ...
بيان مرتبك..
- هذا مطعم نظيف بنص الشارع و عشرين ايد تلعب ؟ ليش ما نروح للمندي اعشيكم كباب سليماني حار ...
- لا يابة ...
شوفهم نضاف ....
كعد بيان وهو متردد ...
- شتاكلون ...
- جيبلنا صينية مشكل ..
- كيلو مشكل كافي ..
انتجة مروان و هو يضحك..
- يبة وين اخلي الكيلو ببطني بطنك بطن محمد ...
ضحك بيان ...
- بطني متعلمة اكل صحي وقليل بس انتم مفجوعين ..
كيلو ونص وتنجبون وتاكلون بسكتة ..
صدك مال عمك ما يهمك مال ابوك ابجي عليه مو من جيبكم لو من جيوبكم جا والله سويتوها نواشف ...
ورى العشا تبرع محمد ياكلون بنوتلا بلاس ..
و طكو صور يم عارضة البصرة وراحو سختو بالمول ..
و الوقت ما دارولة بال...
شكد حاولت ام بيان تتصل ببيان هم مغلق .
طبعا راحت وي عباس ونواف ...
جان عباس يحاجي نواف..
- هذا بيان وين رايح ..
الاوضاع مو تمام اكو بالشركة الي اشتغل بيها حركة على مظاهرات راح تصير وكل جمعة اعتصامات ... ..
- حقها العالم .. اكو مناطق الماي يوصللهم طين ..
غير الديدان وريحة منهولات ...
خاصة المناطق الارياف والشعبية ..
وكف عباس ينتظر الاشارة الخضرة ...
التفت لام بيان ..
- خالة شوي ونوصل مبينة تعبانة اوصلج بيتكم لو بيت الحجي ابراهيم..
- خالة انة تذبني ببيتنا الاول وصل البنيات لبيت ابوهن ...
- تدللين خالة ...
بس نزلن البنات اجتها صبا بجنطتها ووراها وسام منعس يفرك بعيونة ...
- عمة سماح وياج ..
صعدت وسلمت
وصعد وسام و خلا راسة بحضن بيبيته
وهي تسلم
- مساء الخير مولاي
- هلا بالوردة عمو شو لامة جوالاتج ...
ضحكت
- اروح عد اختي احسن ...
ظلت ام بيان تلوب مرة تتصل ببيان مغلق مرة بابتسام تطمنها تكللها كعدت وكلت ..
- الحمد لله احسن و دزيتلها عشا بس الشفية وينه ..
- و الله لسة ماكو ...
- هو اليطلع المن يغلق نقالة ...
الساعة تقريبا بثنعش و نص تمشى لبيت اهلة دك الباب لان قافليه من جوة ..
طلعتلة كربلاء
- منو
- انة خل رقيم و امي وصبا يطلعلي ..
- فتحتلة الباب وانهدت بيه
- المن قافل نقالك مرتك تنزف بالمستشفى بايتة وياها عمتي
- شنوو ليش ما كتولي و شبيها ..
- بيان لا ظل عاد تكمز بالحجي جنك واحد ماكول عشاه ...
كتلك انت قافل نقالك و البنية طلعت حبلة و دبجت وردحت ونزفت الطفل حالتة حرجة ..
- هي شلونها ...مو مهم الطفل
ما انتظر كركر طلع وفتح نقالة وخابر ..
عمتة شرحتلة وطلبت منه يجيب ملابس لان خطية ملابسها ضيكة مال حفلات ومنا تلوثت دم ..
فتح باب البيت ..
اما ام بيان ..
ورى ما نومت صبا و وسام بغرفتها وغطتهم ..
طلعت وهي قلقانة ..
تتصل ببيان وماكو ..
ظلت بالحديقة مرة تباوع من الباب مرة ترجع بالمرجوحة ..
مرة تتمشة وكلبها ماكلها اكل على وليدها ...
جانت ام بيان تروح وتجي ومرة تتصل مغلق وهي بالها ظل يلعب على وليدها ...
هم ليل وهم الدنية مدري شلونها ...
الساعة ١١ ونص وهو ماكو ..
راحت كعدت بالحديقة ...
وهي تسمع رمي بعيد..
خافت كلش ...
و اندعت رب العباد...
" الظاهر هذا الدعاء راح يبقى يلازمني طول حياتي ..
ياراد يوسف ليعقوب ردلي وليدي سالم...
الساعة بالوحدة فتح الباب ودخل مستعجل و هو يخابر نواف ...
- اريد سيارتك ..
- بيان انت ما تسوق لا تسوي حادث
- لا انة عندي اجازة بس ما احب اسوق ولا احب السيارات لا تخاف كلشي تمام ...
ماحس الا حجارة برجلة تلفت شاف امة كاعدة برة
باوع لامة معصبة ترخص من نواف
- شوي ومار عليك ...
- ها يمة شو كاعدة ...
شمرت حجارة ثانية على رجلة بس طفرها ...
- جاي من فجريات الله ولك يمتة تثكل وصير زلمة ..
- يمة شبيج اكضي وقتي بالشغل بس كل شهرين ثلاثة اتلاكة وي ربعي الي بالزبير و نفتر شمسوي ..
- تدري مرتك بالمستشفى خليلك مسؤولية انت صاحب عائلة وطلعات فايت وكت بطلها تطلع حدك لل ١١ شكو للوحدة تسكر انت لو تكبسل ..
خلا ايدة على حنجة ..
-اعوذ بالله خلا علاكة السكوتي على صفحة وهسة ب ١٢ ونص يا وحدة هاي .....
خابرت عمتي راح تتصل بامن البوابة يدخلوني يلة يمة اريد ملابس لرقيم مريحة شوي ..
بالمستشفى ...
انطة عمته الملابس جانت رقيم صفرة وكاعدة ...
نسى الزعل و دنك بوسها براسها و حظنها ..
- شلونج هسة ..
بصوت تعبان.
- زينة ..
كعد يمها وحضنها وباس راسها و خلا راسها على صدره وهو يسالها ويهتم بيها ...
- هسة بدلي ملابسج هذا ضيك ياذيج ...
التفتت لعمتها..
- عمة مدام جاب ملابس اخذيني للحمامات اغسل وابدل لعبت روحي و هذا الفستان عبالك متكمطة بيه ..
جان ضايج من الحمل مو وقتة كلش ..
باوع لرقيم ..
- ولو مو وقتة بس تنزليه ...
وسعت عيونها و باوعت لعمتها الي تفاجأت..
- رقيم صحتج اهم وهذا من اولها مبين حمل متعب ..
ووراج عمليات ترميم لجلد رجليج ...
و العلاج الي تاخذيه والعملية متصير وانت حامل ...
رجفت شفايفها ..
- تطلب مني اقتل طفلي ..
الطفل الي انتظرة اكثر من ١٢ سنة الطفل الي احلم بيه ليل نهار ..
حلمي اصير ام تريد اقتل حلمي لا بيان شنو رجلي شنو استعيد جمالهن ...
بيان الي ببطني روح جاي تنازع حتى تبقى ..
رجلي مو مهمات اكدر ورى ما اولد ابني اسوي العملية ..
بس مو على مود رجلي اذب طفلي واقتلة وانة علاجات وبطلاع الروح حبلت و منو يكول اذا اجهض رحمي يستقبل طفل جديد وتعرف وضعي شنو ..
　
باس راسها ...
- على راحتج بس ردتج تستعيدين ثقتج لان انت رجليج سوتلج عقدة تبعديني عنج بسببهن ..
دنكت ونزلت راسها ..
- مو بس هذا السبب..
كحت ابتسام تنبههم ..
- بيان رقيم حملها ضعيف و لازم اهتمام و علاقة ماكو
الى ان يستقر الحمل ..
التفت بيان من بين جتفة وابتسم..
- ابشرج عمة ناشفة وربج وجفاف عاطفي من ورى عنادها يلة انة انام برة مدام باجر يطلعونها ما ارجع للبيت ..
اي شي تحتاجوه اتصلن بية ..
اليوم الثاني قررت الاخصائية تبقيها و مكتبت خروجية فراح بيان يجيبلهم غدة ...
اما كربلا جانت تودع خواتها و تبوسهن ..
و عباس سلم عليهم ..
سعاد راح ترافق اختها ووياها اخو عباس الجبير ومرتة من يزفوهم يرجعون والعرسان يبقون بشهر عسلهم ...
ورى يومين ببغداد ...
بعد ما لبست كربلاء بدلتها و ام الصالون طلعتها ازغر من عمرها
رمشت على عباس يجي ...
فرها بسيارتة بعض مناطق بغداد بأيد يسوق و ايد كاضة ايدها ...
- اخيرا كربلائي راح نصير زوج وزوجة ...
ابتسمت وانغرت بحبيبها الي فضلها على اجمل البنات ..
- راح انزل حالة بالواتساب ...
فتحت بيانات ..
ونزلت صورة ... تقصف بيها خالتها ...
عرسان و عليها مضغوطين مني اخذت حبيبي ..
و كتبت حالة ... هنا تريد اهله يشوفونها ...
مبروك على السيد اني ...
باوعلها تبتسم .
- دومها حبي الله يستر شمنزلة حالة ههههه
- حبي اغيظ رفيجاتي و كل شخص كرهني و ساهم بفراكنا خل يعرف احنا انجمعنا ...
و الحب انتصر بعناد العواذل ...
صفن عليها ورجع يسوق
- حبيبة جنج دستي حيل الي فرقنا اهالينا و خصوصا امج ...
باوعتلة ..
- اريد اقصف خالتي عباس اليوم عروس انة عوفني براحتي ...
ظلت كل ساع تدخل تشوف منو شاف الحالة ...
من شافت خالتها شايفتها ودازتلها رد..
- عاد وين شهر العسل تركيا لو باوربا ... خل يسويلج رحلة شهر كامل كل اسبوع بدولة ..
لوت كركر حلكها وبكلبها كالت متصيرلها جارة ..
ظل عباس عين عليها وعين على الطريق ..
- ضيعت سيارة اخوي ...
خل نوكف لمن يوصلون النا ...
شافها ضايجة وضحك..
- جنج انت الي انقصفتي ..
- عباس هاي خالتي اشك عدها كلب و مَحَنة بتها بالمستشفى ولا تسال و بتها مراهقة ولا تسال ابد من قبل عرس رقرق قطعت كلش والبنات بطلن هم يراسلنها شنو من ام هاي ...
سكت عباس ما راد يدخل بس حجة حجاية
- البركة ببيت عمهن و ابن عمهن ...
باوع بالمراية
- وصلت السيارة يلة قربنا من الفندق يا حلو .
دنكت خجلانة ...
غمزها بعين ... و شغل مولد ...
ابتسمت وكلتلة
- اكو اغنية امنيتي اسمعها بليلة عرسي
ردها ...
- ما اسمع اغاني تعودي طباعي وتعلمي عليها ..
سكتت وهي تفكر بذكاء لازم ابد متعاند السيد اذا تريد تمتلكة تمتلكة بذكائها ...
ابتسمت ..
- اي حبيبي أصلًا الاغاني حرام الحمد لله الي وهبك الي حلالي تهديني ..
شافتة يبتسم ..
جان واكف برة الغرفة يسولف وي اخوه ..
و زوجة اخوه و سعاد يم العروس يحاجنها ...
هي بداخلها فرحانة عباس صار رجلها ..
طلعن من دخل عباس وهو يبتسم ..
وكفتلة و دنكت ..
لو شكد مجان البنت تكبر تبقى داخلها مشاعر رهبة اول ليلة عرسها ..
حست بحرارة خدودها ...
و عباس ما سكت ..
- فديت الخدود مالاتي ..
تدرين كربلا اول ما عشقت خدودج الحمرة ...
- اخوي يكول علي زركة ههه
ضحك
- يغار منج هو الازرك ابو سمارة ..
- هيووو لقبة القديم هسة ما يحب احد يصيحة يضوج
وكف كدامها ..
- اي يضوج و بعد شنو ظلي تسولفيلي قصص عن اخوج ..
ترى عرسان احنا يا اخوج يا اجلح ...
شال المغربي عن راسها ...
لابسة بدلة مزندة و تبرز الصدر و تسريحتها عالية ..
لان هي مو حفل و من الصالون للفندق منو شايفها ..
حتى صور بالاستوديو بس ...اكو ناس اذا حفل حتى لو قاعة مختلطة يلبسن بدلات محجبات ..
طلع نقاله و اخلة سلفي وياها وهو حاظنها و يعض خدها وطك كم سلفي بحركات حلوة ..
ضحكت ...
- كللها ضحكي ... ما تدرين بالضيم الجايج ترى كدامج ٢٥ سنة فراق بعد انت تعرفين شقصد ناوي اطلعهن من عيونج
دنكت وحستة قريب منها
حست احترت ..
- ها شتريد..
ضحك عليها
- لا ما اريد بس اسلم عليج من زمان ما شايفج شو تعاي شلونج شلون صحتج..
شبكها وبوس خدودها وهو يسلم ...
يريد يشيل الارتباك منها ..
- عباس وخر ترى اصرخ والم الفندق ايدك على السحاب ترى ما اقبل
- ترى انت طفلة ولا جنج اربعينية ...
كعدها وهو شافها مرتبكة ..
- شو تعاي اقرا عليج اية بلكت الله يهديج جنج جاهل ..
و نبدي زواجنا نصلي حتى الله يبارك بينا .
- و هذا طن المكياج ...
- ما اريدج بمكياج احب كركر على الطبيعة ...
ورى نص ساعة جانت مبدلة روب نوم وهو سروال و بدي
.
و يباوعون للبلازمة ..
شافها مندمجة
- النوب هندي بليلة عرسنا ..
- اي خوش مسلسلة
- شنو رأيج نصير هنود هنا ...
ضحكت
- شبيك عباس مستعجل ليش طلع المثل على اسمك ينطبق عليك عباس المستعجل ..
- ٢٥سنة انتضرج و مستعجل جا لو ما مستعجل فد خمسين سنة وياهن عالواهس شو تعاي زودتيها عوفج من الهنود و خليج وياي ..
جرها اله و باس كصتها ونزل يبوس خدودها وشفتها
جان يحس بمشاعره ما يكدر يسيطر بعد وهي تحس بكلبها ينبضلة وي كل دكة احبك احبك ياحب سنيني ..
ثاني يوم بعد البشارة رجع السيد الجبير ومرتة وسعاد للبصرة وعافوا العرسان .. .
الايام تمر ...
و رقيم طلعت من المستشفى و قرر بيان بغرفتهم تستقر لان صبا وي امه وابنة ..
ابد ما تقربلها جان كل همة يهتم بيها يدللها رغم داخلة ضايج لان كل شوي تذكره بليلة عرسهم لو تبجي
هرمونات الحمل ماثرة بيها ..
من رجعت كربلا اشتغلت العزايم بين العائلتين ..
و اخر عزيمة عزمهم بيان ببيتة ...
اجت سعاد تطبخ وي ام بيان لان رقيم بالفراش .. منوع حركة زايدة بس الضرورة ..
ظلت كركر تفتخر بعباس وعرسهم صح مو حفل بس اسعد ايام حياتها ...
بس طلعوا تلكت رقيم بيان .
- ترى ما خليتلي ذكرى لزواجنة حلوة شذكر بيان حرام عليك و الله شكد ما تمر سنين تبقى هذي ببالي وموقف منك ...
ظل ساكت ..
عدللها المخدة و خلالها الصينية بحضنها و بدل ما يوكلها مثل كل مرة خلا وطلع .
بيوم جان يشربها دواها ...
جاب المشط ورتبلها شعرها ..
و هو يبتسم ..
- جنت ارتب شعر سلمى من تتمرض هي من نوع تحب الدلال ..
صفن بحنين لمرة مستحيل يلكة مثيلتها ..
صح الكلب حب و اختار رقيم بس عقلة جان يحب سلمى ... جانت زوجة وام واخت وصديفة استوفت كل صفات الزوجة الصالحة ..
شاف رقيم ضاجت ووخرت ايده عنها ..
باس خدها وكللها ..
- بس هسة عندي رقو اهتم بيها ...
رفع راسها وبكل احساس حب حس برفة بكلبة و حس بلهفة .. وهو ياخذ شفايفها ببوسة عميقة ...
حست هي بكل مشاعر الحب تجتاحها .. حست بتجاذب بين خلاياها وخلاياه مثل المغناطيسية رفعت ايديها وشبكتة الها ببوسة طويلة ...
و خر عنها ...
- شكد بعد ومراجعتج بلكت الدكتورة ترحم بحال العريس الي ما تهنة بعرسة و تنطيني الاوكي ...
ابتسمت
.
- اوكي بشنو ....
غمزها وكللها
- اوكي يعني اوكي فهميها يلة اروح للمحل ...
شافتة يلبس جواريبة و يطلعلة حذاء يصبغة ...
اجتها رسالة ..
كروب عائلي مسوياتة و ضايفاتها...
قرت الرسائل بين بنات عمها كل وحدة تحجي برجلها مسويتة الرجل المثالي عدا نسرين تنزل غلط على رجلها و دعاوي ...
انغاظت رقيم من بيان شو ما كل ما يجي بيدة وردة لو هدية مثل نواف صاحبة ..
برطمت وكلتلة ...
- عود من ترجع تعلم من نواف شلون تعامل مرتك وتدلعها ...
التفت مستغرب شبيها هاي
- ليش هسة قبل شوية شجنت اسوي مو اغازلج و اهتم بيج ..
- حسرة علي خواتك مدللات اميرات ببيوتهن
باوعلها وكللها ..
- ويكلك لا تعصب لا تستعجل برد فعلك .. مو انة هسة كلب ابن ست طعش كلب محترم نفسي من فترة و ما معصب تتمضيكي و تدلعي ولج اشتغلتلج ممرض و خادم و مدللج منو رجال يسوي سواياتي و كل هذا ما مدللج ...
و الله يا الله صدك لو كال المثل ..
لو عليمن حتى مثل ما اكولة لا تلكيه حجة لعركة ..
يابة هذا انة يعجبج لو لا
بجت ...
- هو غير مريضة و تداريني يعني هذا مو دلال اريد تجيبلي ورد وهداية و اريد تكولي اشعار ...
و تكعد يمي مو نواف يشتغل قلل طلعاتك .
هز ايده
- اي و اعزل المحلات و اكعد هنا اسوكلكم اشعار و كلمات غزل بكل وقت بعد لا شغل ولا عمل ناكل قصايد لنزار مثلا خب طيري غير اروح على رزقي.
و من اتواجد يمج ما مقصر ...
- تريد حجة لعركة شوف لا احاجيك ولا تحاجيني ...
هز ايدة
- بعد احسن خايبة وزعلتهم وهاي سوالف خواتي بطليها يجذبن عليج شافنج ثولة تصدكين و يهنبلن يمج .
شو نواف حالة من حالي ع رزقة عود بالليل يفرغ لبيتة .
ومن نشتري هداية احنا سوى ترى يعني نهلة تكذب مو عايف شغلة وبالدقايق يوزع ورد و اشعار ..
و كربلا شو السيد خوش ضابها نفس ما تتنفس و هم مشغول ترى ذن يهجمن بيتج اذا تغارين منهن و تسوين مشاكل ..
استمرت ام بيان تزور السادة ..
و بيومها الظاهر متعاركات ام داود وي كركر ...
فتلكت العلوية تحجي على كركر وتشتكيها ..
- و الله ملسونة كدام رجلها شكل و كدامنا شكل ...
قنعي بيان يحاجي عباس يرد لبيتة و الله تعبت تالي عمري هاي تكلي علوية لكو .. لو تكلي عباس اخذني عناد بيج ..
ما رادت سماح تدخل تدري كملتها بكعة ...
- علوية انة مرة غريبة وهن بنات رجلي ترى ما يسمعلي ولا يسمعن لاخوهن ادخل بيان تالي تجي بوجهنا ...
يمكن كركر سمعت الحجي بالمكلوبي ...
انتهزت فرصة عباس ايفاد باربيل .. يبقى اسبوعين ..
هدت على العلوية تصيح..
- شوفي اكلج ترى مزودتها انت شمسويتلج هذن جناينج يوزنج علي لان انة ادور الشغل الهن واقسمة ..
ام داود - يمة مشية عليج العباس رجعوا لبيتكم انة مرة مريضة ما بية دروب امج و تعلومها ..
- ااااا تحجين على امي .. اكيد منج الصوج يمة سماح شو كلما تجينا تصير مشاكل ..
روحي لبسي عباتج و هدي على ابوها .
- شوف يبة احنا اعيال بيت تجي امي سماح توزهم علي ومشلوع كلبي مكوماتني ومكعداتني كراب حاجي ابنك يلم امه من بيت عيالي ...
صيح ابراهيم عليهن ..
- الله لا ينطيج تزوجتي ومالج رداد خل يجي رجلج انة احاجيه ولج هيدي كضي كاعج يالصلفة تتبلين عالناس و عمتج تشكي منج ...
دخلت نورس ..
- شلووون سميح تريد تهجم بيت بنتي ..
اخذت عبايتها وطلعت ...
لحكتها كربلا وسعاد وراها ..
- يمة وين رايحة .
تمشي وهي تدردم بعلو صوتها
- افلش بيتها عليها..
- يمة هي عدنا فدوة لا تتعاركين مناك عيالي تنعكس علي ...
جانت سماح بالباب توها طالعة والعلوية تتوسل بيها
- خية سودة بوجهي لو ما حاجية هاي الصلفة هيج تحجي عليج لا خية رفيجتي انت تجين غصبن عليها والماعاجبها تطلع من بيتي .
مسحت سماح عيونها
- عفا عليج خية هن ادري ما يحبني استغربت والله ترحيبهن بيه بس الظاهر مراعات مصالحهن يم وليدي ..
اجت نورس و كضت ام بيان من متنها
- ولج تهجمين بيت بنتي ولج يا **** بواكة زلم من لفيتي رجلي تدوهن عليج يا حرامية ... بكتي ذهبنا كبل و تنطيه لصاحبج ...
الحجي بالشارع والناس التمت بين اليسمع بين اليهدي بين الي يتبسبس ..
العلوية
- ولجن توليتن المرة بباب بيتي ..
سعاد تجر بامها الي لزمت طابوكة وشمرتها على طليقة رجلها وكعت متكومة بالشارع ....
يتبع ...