هجين الضلام

بارت12

الحلقة ١٢

باوعلي خالي و ما رف كلبه، حيل متاثر بكلام الناس اليوصله و حيل كره اي شخص من طرف ابراهيم حتى لو كان انة ...
-خالو اريد امي.
طردني خالي ومحسب حساب طفولتي الي احتاج امي محسبوا تعلقي بيها اذا حالي هيج شلون حالها ...
- روح بيان لبيتكم، ماكو امك بعد روح يلة امشي منا ساعة السودة الي انطينة واحد مو من ثوبنا مرة ..اني يهيني و يضحك الناس علي ... والله ضفرها متشوفوه.
لو اخر نفس بحياتي لو اعرف اهج من البصرة كلها ..
كعدت بالكاع ابجي طردني ادريه يكرهني من زمان بسبب كرهة لابوية ، و خوش اجته عدله ...
مشت اموري بهاي السنة على هل منوال واني يومية اروح لخوالي لبيوتهم بلكت يدخلوني لامي بس ما حنو ابد ...
و ما اعرف اذا امي عايشة ميتة ثبتوا عليها التهمة وقتلوها بسكتة هيج جانت تجيني افكار خاصة من اسمع من الناس تتبسبس و رقيم اخ من رقيم الكذابة خليط مشاعر الكره و الصداقة بداخلي الها.
بشهر المراجعة اقرا وبالي يم امي و كلبي ينغزني عليها ما جنت اركز ابد ستر الله على صابرين تشرحلي المهمات من نروح دروس تقوية بالمدرسة ...
و اهلها مخليلها مدرسين خصوصي اني محد فكر بيه مجرد ولد ضاميه للضيجات ولوقت العوز يجي خيري ....
زادت صداقتي بصابرين و تعلقت بيها وهذا زاد من غيرة رقيم الي تريد صداقتي بس الها ...
و بدت تفتعل مشاكل بالبيت واني اتعاقب حتى لو ما غلطان ..
اليوم كاعد ادرس و هي طبعا خلصت امتحاناتها هي ومنتظر ويلعبون و لاحظت منتظر من فترة يتقرب مني حسيت رقيم تدفعة لهذا الشي .. تريد تكسبني عن طريق اخوي الي امه تمنعة مني فجأة تجبر على امه وتمرد و صار الي اخ و صديق و بدت علاقتنا تقوة و حتى لو رقيم من اتجاهلها صار منتظر ابد ما يسمعلها حس بقيمة اخوه خاصة من يتعارك وي ولد المدرسة او المنطقة صرتلة سند و ظهر و هو بدة يقابلني بالمثل
اجاني و صاحلي ...
- بيان .. بيان تعال ابوي يصيحك .. بس دربالك معصب اجة من الشغل ..
رحت لابوي و كلي بعصبية:
- الناس تكلي ولدكم يومية بباب خواله اسمع ولك بعد لهاي السقط متروح هاي مو امك عندك امك نورس ما مقصرة مو ابني الينذل لهذول ...
رفعت وجهي بوجهة و بعيون مدمعة هزيت راسي و طلعت ادرس .
سديت الكتاب و اجت رقيم وهي تتلفت استغربت شبيها هاي ..
تبعتها شفتها تخلي كلادة الدلة بصندوك امي نورس
- منين جبتيها:
كمزت و صارت صفرة و تريد تحجي متكدر ثواني وهي تبلع ريك و انربط لسانها تعابير وجهها و خوفها وهي تباوع للباب و خلت اصبعها كدام حلكها اشارة تفهمني اسكت لا يجون مرت ثواني الي مكدرت تحجي و وبجت وهي تكولي :
- امي ضمتها عدها حتى لا يشوفها عمي ابراهيم، من تبقى بصندوق خالة نورس.
جريت الكلادة منها
- هاي الي كالن امي باكتها ايا كذابات ...
كلتلي خايفة:
- اشش امي ما ترحم تموتني دك حبوب لا تحجي اسكت اجيت ارجعها حتى يرجعون خالة سماح ...
- شترجع و سويتنها مصاحبة، و بوكتنها الذهب شهدتي بهذا يا ثولة و حرمتوني منها عبالج ترجعين الكلادة ترجعيها لا يا رقيم امي نورس متفقة وي امج اذا شافت الدلة رجعت للصندوك اصلا بيدها تضمها هل مرة ...خسرت امي اني وانتم كل واحد بحظن امه ...
انفتح الباب و دخل ابوية وصاح:
- شنوو شتكولون تعاي رقيم ...
كدر ابوية بين راشدي لرقيم وبين رزالة يستجوبها وحجت كلشي ..
ما اطول عليكم علاقة ابوية بنورس صارت سطحية بس ابوية ضعيف كدامها عبالك ساحرتة مثل ميت بيد مغسلجي يصير من ترادده و اتصور يخاف من عمومتها ناس شرانين ...
بدة والدي يتحرك على ترجيع امي رغم هاي الاشهر الفاتت و مخلا ناس واسطة السيد والشيخ و اعيان العشائر خوالي قفلوا و حتى كلولهم انسوا هل سالفة ماكوا مرة يمنا ....
ايس الوالد من خوالي خصوصًا خوالي شالوا و ما ادري وين اختفوا فجأة ...
الاهمال العانيتة و الجوع ببيت متمكن...
ماديا بعد ما صار ابوية مينشاف .....بس من يجي ينام بالليل زاد الانفلات بالبيت خصوصا امي نورس واختها كل همهن ونساتهن وشكال الجيران و يم الجيران شيعن على امي اشكال و ألوان دمرني من واني طفل ...
بهذا العمر كمت اطلع اطب ماكو الي يفتقدني.... كلمن عليها بجهالها ....حتى اشتغلت ابيع علاليك نايلون حمال و الي احصلة اشتري اكلي شربي لان مرت ابوية تنطيني فضالة بناتها ومنتظر واني استهظم الانسان دون كرامة وعزة نفس ميسوى شي، كبر عقلي وتفكيري كبل عمري و شفت بالسوك اشكال والوان الزين والشين ...
وانة بعمر ١٤ سنة شربت اول جكارة علمني عليها كاظم سوسة هذا ولد يشتغل وياي حمال ...
جنت اشربها واني بالسوك اخاف من خواتي او مرت ابوي او حتى الحية رقيم تحس علي ..
بيوم ولد توسطلي .... اشتغل بفرن صمون و هنا اكلي على ابو الفرن وهم ينطوني صمون الي
استمريت بهاي الشغلة لحد عام ٢٠٠٤ بعد سنة عالسقوط الاوضاع متوترة شوي حتى خواتي من يطلعن حجاب كفيان شر رغم من تحسنت الاوضاع واستقرت بعد سفري للخارج ذبنة هن وبنات عمي ..
ما انكر ابوية يحدد مصرف الي بس مرت ابوية تشيل منه بحجة البنات ملتزماتهن اكثر او تاخذ من مصروفي وتنطيه لاخوي منتظر ..
......سن الخمسطعش اني رابع عام سنة .....
سن حرج بتكوين شخصية مراهق الولد وياي يلبسون اشكال الوان واني اروح للبالات اشتري لوازمي لان نادرا اهلي يذكروني بشي يمكن بالاعياد احصلي لبس بيه خير لان ابوية بيده ينطيني العيدية و هم يخلي ويطلع ومنشوفة الا قليل كلش ..
طبعا تاب من الشرب ولجا للدين صلاة وصوم يمكن بداخلة ذنب ميكدر يتخطاه و يمكن يريد من الله يرجعلة الانسانة الي جانت تشعله صابيعها عشرة وهو الي بيده طردها ...
من كدي و تعبي كدرت اشتريلي نقال بالاقساط ...و
بهاي السنة كدرت من اقارب لامي احصل رقم خالي الي بالخارج
و من سألت عن خالي ابو فاطمة وابو حازم كالولي ميعرفون وين شالوا و كللولي خوالك من سالفة امك حيل انعزلوا وتحسسوا من الاقارب والغرب ...
......
كدرت اتصل بخالي و سالته اذا امي سفروها يمه نكر وكلي امك عد خالك ابو فاطمة ....
و سألتة عن مكانهم ما انطاني العنوان وين بس اكدلي مو بالبصرة هم ، و كلي امك زينة وخالك مانعها و مهددها اذا تتواصل وياكم يقتلها و يكول للناس غسل عار ابني اني اجيبلك اخبارها وتعذر كلي خوالك يعاركوني ويقاطعوني .. وكلي .. اني حصير بيني وبين امك حلقة وصل ادلك اخبارها وادزلها اخبارك الى ان تفرج ...
و هنا كمت اعرف اخبار امي بس مو مثل ما اسمع صوتها كلت تهون بلكت يوم من الايام اكدر اوصللها واهد عليهم بيوتهم اذا ما ينطوني امي بس خل اكون نفسي و اجيب الطب ...
بيوم نغزني كلبي راسلت خالي وكتلة ..
- خالي فدوة اروحلك هاي امي والله بالي يمها خو ما مريضة خو ما يهينوها والله ما عدها شي و ابوي اجة يعتذر ويرجعها بس خالي عاند
- وليدي بيان الناس من تحجي بسالفة تحورها و ابو فاطمة خالك ما يرجعها لسبب ابوك فضحنا فضيحة و حتى بعد ما اجة ابوك يرجعها مرت ابوك تشيع شنسوي على مود الولد نرجع هاي الساقطة البواكة ..يعني منو يصدك امك بريئة ...
من نجحنا من الابتدائية و تفرقنا نادرا اشوف صابرين بس اوقات عالسطح تبتسم و تنزل و بديت ادور حجج اصعد السطح بلكت اشوفها .. اني هسة رابع علمي وهي ثالث لان بالثالث عادت سنة فجنت اتقرب من رقيم ومكمت اصدها لان صابرين وياها وشجعتها تصادق وياها ولو حسيت رقيم مجبرة تساير صابرين ...
مرة على السطح تشر ملابس وكفت يم السياج جان ليل طفيت ضوة السطح حتى لا احد يلمحني ...
شفتها تجي يم السياج جنها شافتني عدلت ربطتها على شعرها وكالت ..
- شلونك عاش من سمع اخبارك و الله دنية امس جنا نلعب سوى ..
استحيت من نفسي جنت اجسس و كشفتني ..
- احم انة بخير شلونج صبري ..
ضحكت و حسيت بضحكتها بمشاعر حلوة ..
- بعدك تكلب اسمي لاسم ولد ههه ترى صابرين اسم حلو ..
- اي صحيح .. بس يعجبني اسميج صبري ههههه من كتلتي الولد الي شمر عليج طين من جنا نريد نروح لامتحان وزاري الابتدائية لا وشمرتي حجار عليه ..
همست وهي تباوع للباب مال سطحهم ..
- اي بس كبرنا والطفولة انتهت يا بيان
ظليت ادور حجج اطول بحجي وياهة ..
:- صبري اريد اسألج عن رقيمة بت عمي شلونها بالمدرسة ..
- زوينة شكد احاول تتعمق صداقتنا بس مدري ليش احسها باردة وياي ...
كتلها
- والله يا صابرين رقيم من شهور مو رقيم تجيها فترات تنعزل وتبجي و تكول مريضة ... امها اخذتها دكاترة كل تحاليلها طبيعية ...
- اي لاحظت هل شي بالمدرسة ...يلة اترخص صاحولي ..
شفتها وهي تروح وتمشي بمشية انوثية عبالك عارضة ازياء ...
نزلت جوة
كضيت السبحة الي بمعصمي و فتحتها واني اسبح بيها واقرا اسماء الله المنقوشة عليها ...
شفت رقيم تباوعلي و سالتني ..
- وين جنت شسوي على السطح ...؟
بس جنت مبتسم و اني بعالم احلام المراهقة دخلت لغرفتي وي منتظر ..
كام منتظر :
- بيان امي تريدني لرقيم بس احنا زغار يعني كلما اكعد يمها تكلي هاي الك لاتخلي بيان ياخذها شوفها تهتم بيه اكثر منك ...
باوعت لاخوي البطران يا رقيم هاي مو ببالي ...
- منتظر انة رقيم ممخليها ببالي ارتاح من هاي الناحية اصلا ولا افكر بيها بس مجرد بت عم ..
شفت اخوي ارتاح و رقيم فتحت الباب فارتبك اخوي ودنك شفت بعيون رقيم حزن وهي تباوعلي خلت ملابسنا وكالت..
- عود صفطوهن وين نؤاس شو ماكو .
- طلع وي جماعتة ..
جان هذا جواب منتظر الها فتجاهلتة و باوعت الي ..
- بيان بنطرونك بس فركتة انشك بايد ليش ما تكول لابوك يشتريلك هل بالات ماتفيدك ...
انحرجت منها وكتلها :
- عوفج من هاي السالفة و صدك اذا محتاجة انت ومنتظر اشرحلكم فيزيا رياضيات اني حاضر ...
منتظر:
- لا ما اريد شرحك ترزلني كدام رقيم توكع هيبتي ...
كلتلة :
- و الله اني فاهمة موادي بس تجيني هاي اللزكة تريد افهمها ما تحس على روحها شكد جاي اكللها انتبهي عالمدرسة بس لو بيها خير ما عادت سنة ..صابرين الكسولي
عاتبتها :ليش ولج هاي جانت صديقتي شنو رأيج اشرحلكم اني المادة ..
باوعتلي بتك عين و عين سدتها جن ما عاجبها ..
- اوووف ترى شنو هل ظلم اكيد تفكر بيها مو وتريد تدرسها و الا ما كاتلتك اني ومستقبلي ...
كللها منتظر: شبيج على كيفج ولا صيحين على بيان اكبر منج عيب و انت شكو مهتمة يدرسها او لا ..
شمر قمصلته عليها
- انطيها لكربلا تخيط الفتك البيها .
و طلع معصب ..
هزت رقيم ايدها وطلعت تدردم
- منيظر مصدك روحة عود يحكمني هي يا الله ...
بديت انطي دروس لصابرين و رقيم الي حست بنظراتنا وابتساماتنا ..
مر شهر وشهرين و قوت الصداقة وصار الى حب عذري بينا ..
بديت بيد رقيم ادز رسائل واشعار لصبري ..
بيوم رقيم ما تحملت حجت ..
- اي كلي بلة شنو هاي الرسائل و هذيج تطك صفنات وتبتسم، شوف اكلك تمشي طريق خطا اهلها ما ينطوها ..
شمرت عليها مي بيدي من الكلاص فصاحت ..
- لك لاااا شبيك ...
باوعت لبطنها وكتلها:
- شوف الكرش ههههه وتتحجة على صابرين وتعيب
..غير تخبل اكلج صدك رقيم اريد اشوف صابرين عالسطح روحي حبابة بحجة دراسة شي وكليلها تصعد بالليل ...بس ها دربالج من كربلا هاي سوسة حبوبة خيتي الحلوة لا تجفصين انت صندوق اسراري..
خزرتني رقيم : اي مصالح صرت صندوق اسرارك ، ما احجي العب براحتك يا مراهق بس صدك شمعنة بالليل شعدكم ...
توسلت بيها :
- بالنهار الناس تنتبه بالليل محد يحس بينا نطفي اضوية السطح ...
بلعت ريكها وهي بدموع عيونها كالت:
- بيان ترى اهلها ما ينطوها الك اولا امها صديقة خالتي وامي وسون امك كدام امها استغفر الله بعد افهم ...
وثانيا امها تكول احنا اصلنا بدون ورحنا فترة بالناصرية عشنا وهسة رجعنا و تفكر تشوفلها واحد خليجي حتى يسحبهم ... يعني اقطع الامل ...
عصرت السبحة حيل و كتلها معاند .
- اكو ناس جاهة اكو ناس تتوسط؛ منكطعت هم تفرج يلة حبوبة روحي كليلها والله بس استلم اسبوعيتي اشتريلج هدية ...يلة بعد اخوج
باوعتلي رقيم وكالت:
- اولا انت ابن عمي مو اخوي فاهم خليها ببالك و امممم هديتي تطلعني للساحل شتكول؟
باوعلها:
- اهووو بعيدة هاي.
بجت: لو تكدر تطلع وياها جا طرت بيها طير ..
رجعت باوعت: بيان صابرين تريد تدخل تمثيل و امور ما تعجبك لك اي مناسبة بالمدرسة بالفرصة تجمع البنات وتتمركص ..
صيحت على رقيم: واذا ... ! بنات بينجن وعيب تحجيلي تحرجينها.... هي صديقتج لازم تحفظين غيابها ..
- بيان شدعوة هيج عصبت على مود هاي و الله هي تعتبرني صديقة بس اني لا ... يلة رايحة اكللها وامري لله.
انتظرت الليل احر من الجمر و بس دكت الساعة ١٢ كلهم نايمين صعدت بسكتة لكيتها يم السياج وهي لافة نفسها لف عن البرد.
- احم ... شلونج ..
- هلااو .. شلونك انت ترى متت برد من زمان انتظرك .
- ااا .. احم .. ااا ااكول صبري افندي شمسوي بمدرستك بالاحتفالية ..
ضحكت ودنكت:
-هذي رقيم ما تضم سالفة ابد ..زين عوفك مني بس كلي شنو هل صوت العليك لك فرحتلك من فزت بمنافسة المدارس للقران الكريم بيان اريد اسمع صوتك باغنية اذكر بالابتدائية المدرسات يطلعنك بالاناشيد والاشعار برفعة العلم ..
جريت نفس وكتلها:
- صوتي مو احلا من جمالج .. صابرين اذا يوم من الايام صرت طبيب اهلج ينطوج الي ..
شفتها ترددت وغيرت الموضوع
- منا لذاك اليوم الله كريم ..
سولفنا وحجينا و حتى غنيتلها لحاتم العراقي ..
قبل عطلة وزاري المراجعة للثوالث ...
رقيم وصابرين رجعن و رقيم صفرة وتبجي من الالم هذي البنت دومها معلولة من شهور وهي على هاي الحالة ..
مخلت امها طبيب و كل التحاليل طبيعية ..
فتت اريد اطلع شفت صابرين ساندتها ركضت اسال :
- خير شبيج رقرق ...
جان صوتي بدة بخشونة بداية نضج الرجولة بهاي المرحلة و شواربي خطت ...
　
بس شافتني رقيم بجت...
- بطني توجعني الحكني بيان ...
باوعت لحجابها طالعة نص الكذلة حجاب كفيان شر هذا لو بيدي بصوندة احجبهن من صدك و الله متاكد ذن بس الاوضاع تهدأ يذبنه و يرجعن للبسهن ....
اجت امها و سندتها وتشكرت من صابرين وكلتلها سلميني على امج ..
- الله يسلمج خالة ..
اخذت ام نؤاس بتها ودخلت باوعت صابرين لبابهم و كلتلة:
- بالليل نسولف نفس الموعد اوكي ..
ابتسمت و اول مرة انطقها
- احبج ..
ضحكت و دنكت وراحت ..
درت راسي لكيت نؤاس يباوعلي وكلي:
- هاي البنية بس تتمضحك ما تستحي ..
كتلة : لا تاخذ اعراض الناس خوية انطيني طريق اروح اجيب جنسيتي لا تكضني سيطرة و راي شغل ..
وخر عن الباب و سوالة درب يفوت بس كضة من جتفة وكلة:
- غبي انت فكر اكول لعمي يشتغل عامل ترى يعلكك
جريت نفس وكتلة:
- عود من يصيرلي اب و يحسسني بأهميتي خل يعترض اممم خل اكلك شي العمل عبادة واني من اشتغل احس اني مهم سويت شي مو كاعد واخذ مصرف من الماما و البابا ...
ضحك نؤاس: خوش تبسمر اني كمت اطلع وي ابوي اتعلم الصنعة وابوك هم بدة يعلم منتظر شعجب ما يعلمك هاي صنعتنا اب عن جد ...
- و الله ما اعرف ... حكلة من باب المجاملة لا يكول يوم انت ما تريد تتعلم يا الله من رخصتك ..
استمر الحال على ما هو عليه و من اقترحت على ابوية رده الي
- يوبة انت هاي الشغلة متلوكلك هاي مو شغل العبيد ..
انصدمت كلش والله بكلامة كلش انصدمت، و فشلت لو ما كايلة هل كد متحمل على امي لان مرجعوها اهلها اله طلع حركتة بية ..
- اني مو عبد يوبة حتى سماري حلو مو اسود كلنا عبيد لله يوبة من رخصتك بس ترى اني اشتغل منا ومنا حتى لا تكول ما تعرف و ما كتلي يلة اروح اجيت للعشار بشغلة ادور ملازم ...
طلعت منه ووجهي حار كلش من الفشلة و كوة ابلع غصتي رحت يم الشط بجهة الكورنيش حاليا و هنا جانن تماثيل الشهداء الي شالوهن ...
كعدت على مصطبة وما همني الجند البريطاني جنت بعيد عن سيطرتهم اشمر حجار بالشط واغني لكاظم الساهر ..
دك نقالي الي هو نقال اسمة الملك حسب ما اذكر ..شفت منتظر يتصل
- خوية وينك؟ انة يم عبد الله بن علي .. يم المركزية ..
- هلا منتظر اني يم الشط ..
و انطيتة مكاني ... نزعت قميصي و بنطلوني واني بالشورت ذبيت بالشط احب اسبح مثل اي بصراوي يموت عالشط ..
اجة منتظر و هو يدورني اني انطيتة دالة يم بدر شاكر السياب شوي كدام على اول صبة ...
و كف يباوعلي اسبح ..
- مخبل لك برد ..
صحت عليه اضحك:
- وين البرد على ابواب الصيف هههه ...
رجعنا للبيت لكينا عمي مخبوص و خواتي يبجن فسال منتظر
- شبيكم
صاحت كفاية
- منيظر بيان رقيم لحكو رقيم ....
- شبيها رقيم ...
جانت امي نورس تلطم و خواتي يبجن و ما فهمنا شكو شصاير ...
حس تعب من كل هل ماضي لو بيدة يسوي دليت ويمسح ماضيه مو مجرد هل اسطر ع سطح اللابتوب
وقت الحاضر ... عام ٢٠٠١٧ ..
المغرب نزل صلى وورى العشة صاح لكفاية ..
- كعدي .. شتفقتم وي المرة ...
دنكت و ابتسمت وكالت:
- ان شاء الله خير ..
نفخ بقلة صبر مدري ليش من يكعد وي هذن الظلال يحس مختنك بس مجبور بيهن كون بليلة ويوم ينكسحن لبيت ازواجهن ..
- اي ادري خير، بس احجي غير افهم يمتة تجي زلمهم لو ماكو زلم عدهم مثل حظي الولد الوحيد وي هل شلة الظالة ...
- اي حيجون ....اكيد بس احنا ....منو يكعد وياهم، لازم تشوف عمامنا.
نتر بيها
- بعد علميني.. مو شغلج ... مفهوم!
كلتلة تناكرة:
- ترى انة اكبر منك شو مطيقني وصيح علي هسة هانت واخلص من شكولك ..
جر شعرها
- شكولي هاي هي الي حتكعد وي المغضوب عليه الياخذج وشكولي هاي هي الي تروح تفتر على عمومتنا من العشيرة تجيج تكعد بخطوبتج ..
اجت سعاد
- خوية عوفها لا تعب نفسك وياها اجيبلك جاي ...
باوعلها وكللها:
- لا ما اريد وين وسام ..
- يم كربلا ورقيم ..
- اوك اخذ نقالي و اطلع متواعد وي جماعة ..
- خوية استريح اني اجيبلك النقال ...
جانت كربلا و رقيم صافات للولد من صعد بيان غرفتة اخذنة لغرفتهن ووحدة تغمز للثانية ..
رقيم :
- الله حبيبي شنو هذا نقال ابوك شو انطيني اكلب بيه ..
باوعلها وسام وكللها
- كيف تاخذي نقال دون اذن صاحبة ماما تكول حشومة ميصير عيب ..
لوت كربلا حلكها
- ابو حشومة بس نريد نشوف شنو بالنقال يلة حباب ..
كام و باوعلهن
- لا ما يصير حشومة عليج لازم تكولي لبابا اول ..
باوعت رقيم لكربلا و اشرت بوجهها ها شلون معاند
كامت كربلا:
و دغدغ بوسام: يمة الولد يمة شعرك هذا يخبل على بيبيتك ملولو .. همزين الطفر طلعت بشعرك ولا غير شي ..
ظل يضحك و رقيم اخذت النقال جان بصمة وهمات بيه نمط راحت فتحتة من النمط مثل ما حفضتة من وسام ..
كلبت الواتساب وضاجت من كلام بيان رسائلة وي سلمى يتوسل بيها و اخر رسائل سلمى ممجاوبتة ...
عين على وسام وعين على النقال ركض وسام وشرد يلعب برة ... ونسى سالفة النقال ..
كربلا:
- يلة بسرعة اني حوكف بالباب اراقب ...
رقيم:
- ولج اكثر من ساعتين نقنع بيه ما ينطي النقال هل فصعون خبيث على امه ...
ضحكت كربلا:
- شمدريج بمه شايفتها كولي خبيث على ابوه العتوي ..
بجت رقيم:
- لج كركر لج هاي مرتة تخبل عبالك عمرها ٢٥ ولا جنها جبيرة عزة اكول بالواتساب نازللها غزل لج احترك كلبي ..
كربلا وهي تبوز:
- كافي دلع عاد كافي شربي ماي بارد وكلبج يبرد كاتلة روحج على هل اجلح ...
- ولي يخبل ولج و الله اتمنى بس نظرة كلمة حب منه هذا الما عاجبج ...
كربلا :
- اووف خية ادري بيج جم مرة اكعد الكاج تبجين لان ما يرد على رسائلج وانطاج حضر ..
- من مات ابوية عود راسلتة يجي ياخذني مرتة انة بس ما جاوبني حضرني ..
- فكيت الحضر من الواتساب، يحليله عنده فيس...
صاحت كربلا وتركت المراقبة
- يحليلة ما هذا عنده فيسبوك يالها من اعجوبة .. شو خايبة طيري.. جنج حالي من تحجين ..
ضحكت رقيم و طلعت صور لبيان و باست صورتة ..
وهي تطوطح بجسمها يمين يسار و تبوس بصورة بيان بالنقال وتدزهن لنقالها ع الواتساب ...
- اغلط بعد وياي احجي علية بالفركة ما وصيك انطي بية سوي الي يعجبك راح ابقى احبك اريدك انة اريدك ...صعبة اتبرى منك يسوى الدنية حظنك و اريدك انة اريدك سوي اليعجبك و راح ابقى احبك اريدك انة اريدك ..
شايف مطر بالصيف هيج كلامك شكد ما تذلني ارتاح بغرامك ابقى اريدك لو يمك الكة الموت وذلتي وجروحي ابقى ابكلبي اضمك ولا من حبي احرمك ادري ما اهمك اريدك انة اريدك واضعف اني يمك و اصير انسان ثاني اريدك انة اريدك ..
ظلت تغني و كربلة نست المراقبة و تهزلها ركبة و تتمركص بالباب ....
- اي رقيم لو يدري بيج العتوي يشوي على ذاناتج بصل ...
بالصالة يريد بيان يجي ياخذ نقاله من ابنه اجاه ابنة جان من الحديقة ..
بحزم و خزرة:
- جنت برة ؟
فرك صابيعة الولد وبرطم و نزل راسة وجر الكلمة ببجية ..
- بالحديقة العب ...
جره وبوسة حيل
- لا تبجي يبوك وين نقالي بس لا ضيعتة ..
اشر للممر
- هناك يم عمة رقيم وكربلا ..
نتل روحة نتل وكام بيان ركض شاف كربلا تهز بباب الغرفة بالممر دفعها ودخل ..
سمع رقيم وهي تغني وتبوس بنقاله جر النقال منها حيل
كمزت
- بيان ...
باوعلها وكللها وهو يشوف شمسوية بنقالها فاتحة الحضر و دازة صوره لنقالها ...
- تحبيني تموتين علي مو !
رجفت شفايفها و لمعت عيونها السود بحزن و شوك المفارك ...
- تدري كلش زين لا تحاول تحجي باستهزاء من مشاعري ..
بس صريخ نورس والبنات خلوهم يركضون يشوفون شصاير ..
معرفوا شنو صاير بجت رقيم منو مات شبيجن صرخن وسعت عينها من المنظر الي كدامها وظربت صدرها ...
- عزة ....
و عصب بيان وصاح ....
- الا انعل والدية ابن الكلب ....
وطلع وهو هاد ....
يتبع ...