هجين الضلام

بارت18

#هجين_الظلام
حلقة ١٨

وخرت عنه بس رجع حضنها وراسها على صدره ميخليها تبتعد ..
شردت سعاد تدردم
- جا خجلت وكلت اختي واكفة بدل ما تشبك عرس خل نفرح بيك
اما رقيم صفنت بعيونة الذهبية و كالت
- بس انة ما فتنت عليك ...
عكد حاجبة
- شلوون ؟!!!
باوعتلة وهي بعدها معصبة منة و حاسمة قرارها ما تقبل بيه كافي ذلة نترت بيه
- اممم شلون هذا اللون! هم تتهمني مو ..
صوت نورس:
- رقيم كافي تنعثل يلة لدوامج ...
باوعلهن و عرف رقيم مو هي الفتنت بس من وين عرفوا بيه مواعد ؟!.
نورس
- تأخرتي روحي ..
صاحت بخالتها ..
- مو انة خراعة خضرة مخليني مو ؟ عبالة اني فتنت وانت يا استاذ بيان باي حق متهمني كل هل تهم ليش بيان مو جنت انة الوحيدة الي تسندك وكت شدتك بس للاسف بيان انت انسان حاقد وأناني اعرف ليش تشك بيه دائما بسبب غلطتي بحق امك ...
بيان انة ما فتنت عليك رغم ردت اضوجك لان تحب وحدة ما تستاهل من تعاركت وياك ذاك اليوم بعد ما سمعتني اتخابر وي صابرين جان هناك شاهد ثالث يصنت
صاحت نورس
- كتلج سكتي !
ضربت رقيم حذائها بالكاع وصاحت:
- لا ابد ما اسكت بيان خالتي نورس سمعت حجينا وراحت لامي واتفقن يتصلن باهل صابرين امي حاجت اخوها توزه لان امي رادتك تخطب...
دنكت وهي متحسرة على سنين الذلة و رمشت سريع حتى عيونها ما تدمع .
- لان اهلي رادوك تخطبني و ما مقبول عدهم تحب مثل صابرين وتزوجها ابد مقررين اني وياك نزوج ..
حبكن الخطة ونفذنها ردت انبهك بس ما لحكت و الباقي تعرفه، و صار الصار شكرا استاذ بيان و من رخصتك تاخرت على دوامي ..
طلعت فصاح
- قصتنا ما انتهت رقيم انت حوطتي نفسج بالشبهات انت السكتي فتستاهلين السنوات الي انظلمتي وانركنتي بيها انت جبرتيني ما اثق بيج شنو يصير اتصور الج ايد بيه تصرفاتج دون اتزان اضافة من شهدتي ضد امي صرت اخلي احتمال كل مصيبة يخلولج دور بيها انت يا رقيم مخليتي الثقة تنبني بينا ابد جنت ذيل الحية الي تخطط و انت تنفذين وجريتو نهلة لنفس الاسلوب .
عدلت جنطتها و باوعت بانعكاس وجهها بجام الباب ..
شافها تعدل بنفسها ممهتمتلة مد ايده وجر الدنبوس الي فوك من كصتها بموديل بالشال مسويتة وكال بنتر:
- شوفي اذا لكفتج مسويه هذا الموديل متلومين نفسج واضح اسمع الوياي بالسوك يحجون على هيج بنات الفاظ مو حلوة صح موديل و عادي بس الناس تطلع شبهة بكلشي فعوفي هاي الفيكة مال الدنبوس ما احب احد يحجي على عرضي ..
هزت ايدها وتجاهلتة و طلعت ...
جر نفس و هو يدردم و علا صوتة
- عيديها وهزي ايدج و شوفي ... يا طايحة حظ هاي علي تهزين ايدج ..
دارت عليه وصيحت:
- كافي كافي عاد شبيك جايبتك خالتي سماح بعركة شنو ها كل ما تشوف واحد منا بس تتعارك متنا وملينا بدل طبعك هذا تعبتنا ترى ...
خزرها ولوى ايدها:
- اي فعلا بعركة وي خالتج و رادت تموت بيها ظلت مشمورة بالكاع ترافس لمن جابتني ..
اجت نورس وخرت ايده عن رقيم .
- عوفها عود من تصير مرتك صدك تعال ادبها اذا علت صوتها عليك..
نفخ و كال لنورس
- يمة لا تدخليني ترى محترم نفسي و ما متجاوز عليج
هزت ايدها نورس و طلعت
- هذا الناقصني تجاوز علي ....
طلك ..
- تحلمين ..
طلع بيان وهو ببالة نية الزيارة ...
اما نهلة خابرت لرقيم
- حبابة لا تداومين خل ننزل للسوك ضروري حبابة للعشار ..
- ولج راح اوصل للمدرسة ..
- اهوو انت مو مجازة حبدل و امر عليج للمدرسة قدمي درسج على ما اجي ..
- لا اله الا الله اوكي ..
بدلت نهلة وكملت وطلعت ..
اما كربلا كاعدة و بيدها النقال.. والساعة ٨ الصبح صارت ...
- ادري امس ليلة عرسهم اليوم شكو ما اجاوب رسايلي رايحة اخابر ...
اجت صبا كعدت يمها ..
- اي حبابة خابري اشتاقيت لكفاية ..
دكت كربلا هواي يا الله جاوبت كفاية
- هلا حبي كركر .. اسفة والله هواي داكة بس نايمين كعدت على نقالي يرن
انهدت كربلا
- انت شكو مجاوبين رسايلي اي عيني نربيهم ولغيري يصيرون ..
- هههه شربيتي مني كل الي بيني وبينج ٩ سنين ..
- ربيتج و لو ما انة ما تزوجتي ابو سلعوم ...
همست كفاية
- اششش ولج وانت شكو قابل عرفتيني عليه و بعدين منو ابو سلعوم انجبي حبيبي يخبل يموت يكتل ..
جانت كربلا كل كلمة تسمعها من كفاية تميل بجسمها وياها و ردت
- اووي يكتل هااا ايا طايحة الحظ انطيناج خجولة و فقيرة وهسة انحرفتي الا اكول للعتوي عليج يربيج ويطلكج وتجيني يمي خيتج انة يا بالذات ...
ردت كفاية
- تف تف تف منج فال الله ولا فالج الله يخليه الي و يبقى خيمة تفييني، اهووو منج كركر اشتغلت سوالف العوانس عاد ..
- عوانس! ولج كفية عود تزوجتي و بعد انت مو عانس ايا عنصرية عيب تكليلي عانس كولي عزباء كولي ممزوجة تركوا الفاظ تجرح المقابل .
لوت كركر حلكها و صفنت و هي تسمع همس بس ملكطته شنو ..
- اكلج ريلج (رجلج) ابو سلعوم يدغدغج شو تحاجيني وشوي و نوصتي بضحكة من نامت عليج طوفة ..
ظلت تبجي
- ليش ولج عفتيني ليش حال الظيم حالي بلياج ..
دخلت نورس و هي تباوع لبتها
- لج كفية وينج شو احجي و ما جاوبين و شنو هل توشوش وي منو تشاورين اكيد ابو سلعوم ..
هم محد رد عليها ..
- كفااااية وينج شنو جا انة احجي وحدي ..
سمعت ضحك و كلام غزل ...
ضربت صدرها
- ياا طايحة الحظ تصخم وجهج كفاية هذا شيسويلج بسيطة انة الكم لا و ما تجاوبيني مو ..؟!
سدت النقال ورفعت راسها لكت امها تباوعلها متخصرة
- ليش ما تستحين عروس و رجلها تكليلها شيسويلج!
بجت
- يمة عفية طلكوها هذا رجلها جنة يدغدغها و هي بس تتمضحك ولا جاوبتني نستني و ظليت بحدي احجي اريد كفاية لو ادري ما خليتها تزوج..
رفعت ام رنا ايدها للسما
- حكمتك يارب هم عوجة وهم جنها غراب البين و هم خبلة منو ياخذها و الله الشايب الي يخطبج كبل انطيج ..
طلعت منها و كربلا صفنت وهي بعالم الخيال تخيلت بنفسها مزوجة وعدها اطفال ...
و بنص حلمها نغزها كلبها و اختنكت ظلت تكح و تكح و تشهك مدري شبيها لمن وكعت مغمي عليها ..
جانت اغمائة دقايق قليلة وانتبهت وهي صافنة عالسكف متدري شبيها بس خدار بصابيعها و رجلها كوة تشيلها ..
ببطء بدت تمرنها لمن تحركت كامت تسحسح بروحها شربت مي هواي وهي مدمعه وصفرة ...
رجعت لفت راسها نايمة وهي مريضة ..
بس كتمت الالم داخلها ...
من طلعن بالتكسي نهلة تباوع لرقيم مبينه كلش تعبانة ووجها مصوفر ومهمومة ...
- رقيم لا تضوجين مدام عرف بالحقيقة اكيد حبيبتي حيراجع حساباته.
دنكت رقيم
- نهلة انة حيل مجروحة يعني هو عندة نفسة انظلمت زين وانة شنو ذنبي بعد سنة اعتب الثلاثين ضاع عمري وانة انتظره شكد اسال نفسي ليش رقيم تنتظرين وهم ليش تدرين ما الكة الجواب الا على امل يرجع الي اقشمر روحي بهذا الامل ...
سوك العشار هو من اكبر الاسواق في البصرة و هو مركز جملة ايضا ...
الوقت جان ضحى و هن يتمشن بسوك البنات و يكلبن بالموديلات و صلن لمحل بيان كالت رقيم ..
- اخوج دامج محلة وي صاحبة شوفي مسوينة محل واحد شكبره و ضايف ملابس اطفال خوش مرتبيه فاتحين الحايط الي بالنص ..
ابتسمت نهلة وهي تلمح نواف يعدل باحدى المونيكان( دمية عرض ملابس) و هو يلبسها حجاب و يلفة ...
- رقيم وصلنا اااح
باوعتلها رقيم ..
- شبيج سنحتي!
نهلة وهي تبتسم
- نواف يخبل يارب اجعله بعلا لي
ضحكت رقيم
- اممممم بعلا لهاااا صرنا نحجي فصيح .
- اشش انتبهلنا لا ننفضح خليج طبيعية
رقيم وهي تضحك
- عيني انة طبيعية انت الي مو طبيعية ...
ظل يكلب بالحجابات وعينه عليها ابتسم متحسر ..
من شاف ايدها خالية من رباط لزوج فكال بداخلة زين والست جهال عجيب بيان كال مزوجة بس احتمال ما تلبس حلقة اكو بيهن ميلبسنها ..
تقرب يمها وهو بيدة شال
- احم تفضلي هذا اللون شنو رأيج بيه ..
باوعتلة ورفعت راسها و باعت ثكل ..
- لا .. انة اشوف شكرا ..
باوع و رجع ورى وهي تكلب ورقيم تكلها ..
- يلة ولج تاخرنا ..
- على راحتنا العتوي ما موجود ...
استغرب نوفل شيحجن صار عتوي بالموضوع ..
تحسر بداخلة و حاجة نفسة نواف معقولة مالك نصيب بهذا الجمال لا وست جهال ما مبين ..
- احم اختي ... اختي .
باوع لوسام عبالة ابنها ركز بينهم بالدم شي يوحي قرابتها او ابنها ...
- تعال عمو شسمك ..
طلع من جيبة حامض حلو وخلاه بيدة و هو يحوس يريد يتاكد الولد ابن منو منهن شو هاي ممبينة مخلفة هذا الثور شطولة و الثانية جسمها مليان اكو احتمال وسام ابنها ولو هم ممبينة مزوجة ...
- وسام .
عكد حاجبة وسألة
- وسام ايش ..
خزرت رقيم وسام لان اخذ الحامض حلو ابو نفس دنية ..
اجت نهلة يمه و اخذت وسام وكلتلة
- ابو نفس دنية .
كال نواف
- لا ليش خطية على راحتة تعال وسومي ..
باوعت رقيم لنهلة ما مرتاحة و كلتلها ..
- ترى تأخرنا واذا يعرف بيان بينا يعلكنا من البنكة
صفن نواف بيان ووسام اكيد مو صدفة ..
حاجة نهلة يستدرجها
- اختي شوفي هذا المحلين فتحناهم سوى ذاك لملابس الاطفال اذا تردين عدنا ماركات ..
نهلة
- ها اي شكرا هسة نشتري لوسام ..
ابتسم
- وعدنا هم تلبيسات لازغر من وسام اذا عندج بعد طفل ازغر منه ..
وسعت عيونها ورادت تبجي من الصدمة
- ازغر منه شتقصد !
جانت حجايتها مال وحدة مصدومة و حيل مقهورة و منغاظة
استمر يحجي
- اختي اكيد ابنج السادس زغير كلش ادزج على محل تلبيسات رضع و الله ماركة تركية وصلتلنا ..
تخيلوا وياي الموقف يمكن رادت تبجي رجفت شفتها و مدت اصبعهة تاشر على نفسها
- ابني السادس ! تقصد ابني انة ؟بس ....
رمشت سريع وحومرت عيونها ..