هجين الضلام

بارت29

هجين_الظلام
حلقة ٢٩

ماضي ....

بعمر مراهق ... جانت تمشي وي صديقاتها و تسولف ..
محست الا صديقاتها ينبهنها .....
- ولج شوفي الملاك النازل من السما ...
- وينة ...
- غبية هذاك النوب واكف صافن عليج ...
عدلت كذلتها و باوعتلة بخزرة ...
- هذول جيران سمعت فلشوا بيتهم الحكومة و اخذوا ولدهم عدموهم
فاجوا كعدوا هنا كبالنا ...
- ولج هذا يخبل جنه معجب بيج يكركر ...
دنكت وضحكت ...
- ما منتبهة ...
اي عينة عليج ...
- عوفج منه شوفي ابن الرفيق .... يومية يكض ركن المدرسة من اطلع يباوعلي .. بس ما اريد علاقات افكر اكمل دراسة ما اريد اكرر خطا خواتي ...
يلة باي اشوفجن باجر ..
ظلت واكفة شوي تنتظر صديقاتها يرحن شافت بنية محجبة و لابسة صدرية دخلت للبيت الي كبالهم مبينة تعبانة كد ما ماشية اكيد مدرستها بعيده ...
ظل الولد عينة عليها وهو يبتسم ...
رجعت خزرتة ورفعت راسها بتعالي و دخلت ..
شافها باوعتلة نظرة اخيرة قبل لا تسد الباب ...
رفع حاجب و باوعلها بنظرة عود هذا الغرور والتعالي لشنو ..
كربلا ....
من شفت هذا الشاب شي تلخبط داخلي . .
بس جان هدفي اكبر هو اكمل دراستي ...
جانت الي محاولة تبطيل بالرابع ابتدائي بس من وحدة من خواتي بطلت و شفتها عانت حيل قررت ارجع يمكن بطلت فترة اسبوع و رجعت ...
طبعا كالعادة لكيت مشاكل و عرايك امي وخالتي تتفق على امي سماح ..
جنت اوكف وي امي و اسمع تخطيطهن تعلمت منهن المرة لازم شغلتين تحفظهن ما تقبل بمنافسة على رجل ولا تقبل رجل يسيطر عليها ..
من هذي التربية انبنت شخصيتي ....
تربيت ببيت كلة بنات وابوية شفتة سوى الهوايل بأمي على مود الولد .. و شكد تعارك وياها على الزواج لمن خطبتلة امي ام سعيد ...
كرهت جنس الرجال بداخلي هيج حسيتهم يستقون على المرة ..
يمكن انة بداخلي تمرد و تصور كل رجل يحاول يمحي شخصية المرة فلازم نتغدا بيه كبل لا يتعشا بينا ..
انطبعت اسلوب امي بية شوي بهاي الفترة اخبث على ابن سماح العبدة و رغم كرهي لاي شي اسمة ذكر ..
جنت اميل لمنتظر بس حتى ازرع تفرقة بينة وبين بيان ..
جنت حيل متأثرة بالمشاكل الي بالبيت و وانعكست بسلوكي ..
داخل البيت جنت هيج مثل اي غبية تسمع كلام امها ...
بس جنت اوكات اوكف وي امي سماح اروح لامي واكللها
- انت تكولين تكرهنا شو ما تكره اشوفها تهتم اكثر منج .
و جان نصيبي امي تغلط او تتفل علي او تضربني هنا تعلمت هاي الامور جنت اكثر وحدة متأثرة بأمي ..
من بعد الاهانات الحصلتها زدت قساوة جنت اكره امي سماح لان شلون قبلت تدخل على ضرة وتهجم بيت مزوج فجانت امي سماح ضحية لمخططات ...
خارج البيت عالم ثاني بالمدرسة البنات تحبني ..
يعتبرني طيبة وخجولة ..
و طبعا مروة فجأة انقلت بثانويتنا ..
احنا جنا ثانوية من الاول متوسط للسادس اعدادي ..
مجانت مدارس هواي بذاك الوقت ... و مدارسنا بعيدة ...
و جانت ....
يمنا مدرسة ولد اعدادية شوي مسافة عنا ..
بيوم طلعت وشفت الشاب ابن الجيران الجدد هم يباوعلي يبتسم ..
هذا الولد مثل شمس دومة مشرق الوجه و مبتسم ..
جانت بالسبعة وربع طريق طويل للمدرسة ..
و من فترة يطلع وي طلعتي ووراي ..
بس هل مرة وياه بنية تمشي بنفس طريقنا ..
فلت حذائي جان قبقلي ..
استحيت وانة ارجع على حذائي و عيني اجت بعينة
مدري شصارلي يومها حسيت انفاسي ونبضي ما
منتضمة حسيت كلبي الي خليهت متحجر ضد اي
عنصر ذكوري اليوم تحركت داخلة مشاعر ...
لبست حذائي ومشيت وانة ادردم على صديقاتي ما اجن علي اليوم نروح سوى..
دخلت المدرسة وافترقت البنية عن الشاب بيده كتبه و توجه لاعدادية الولد ..
دخلت للصف والبنية دخلت وياي كعدت برحلة وحدها جانت كدامي دارت علي
- السلام عليكم .. انة مروة جيرانكم ...
اليوم يا الله طلع نقلي للمدرسة ... رادوا ينقلوني ورى نص السنة بس اخوية عباس ما قبل كال بعدنا ببداية السنة فعادي نحصل نقل ..
باوعتلها لابسة حجاب و برنسيسة سودة و جواه قميص اسود ..
سمعت من ابوية من اجو يكول
يعرفهم ناس متعففين و خوش ناس
بس ولدهم انعدمو ورى الثورة الشعبانية(قبل الناس تسميهم غوغاء )
اتهموهم باطل وهم مالهم بالمعارضة شغل ...
وحتى وقعوا براءة من معدومينهم و ما سووا
فاتحة جانت الناس تخاف المعدوم ما اله فاتحة وتدفع الاهل ثمن رصاصة الي ينعدم بيها ..
ناس تريد تعيش ...
كامت تتبرة من ولدها .. حتى تستر على بناتها والي بقوا من ولدهم
والا مصيرهم بالمقابر جماعية ..
ابتسمتلها ..
- اي ليش لا هم ويانا بنات تروح وتجي .. احسن مما وحدنا ...
- ما كتيلي بأسمج اهلي ما يقبلون اطلع لبنات الجيران بس شفت بناتكم هواي ..
- اي و عندي اخو واحد منتظر ..
صفنت مروة ..
- ها .. بس امي اشترت من مرت ابوج هاي السمرة طوخ مكانيس و يمها ولد جان يلعب اسمر هو هذا منتظر ..
ضجت بيومها جنت استحي من مرت ابوي و من ابنها ما اكول لصديقاتي اخوي بس هم يدرون .
كلها تعرف امي سماح زوجة ابوية وبيان اخوي من ابوي ..
- ها .. اي هذا بيان اخوي من ابوي قصدت انة منتظر اخوي من الام والاب ..
- ها ..
ندستني صديقتي الكاعدة يمي ..
- هاي اخوها الجبير عدموه و عمها هم شكو تحجين وياها ...
همست ..
- ابوية يكول اعرفهم باطل التهمة و بعدين خوش بنية صارت صديقتنا ..
- لا عيني اهلي ما يقبلون اخوها وعمها بالغوغاء شفتي العام شسوو حتى المستشفيات ما سلمت .
غير الفرهدوا المخازن مال الغذائية . ...
كربلاء ..
- شوفي ما احب احجي بسياسة ابوي يكول دخلت ناس مخربة فشلت ثورتهم ..
اما ذول عمها واخوها ناس اندرج اسمهم بتهم مالهم علاقة ..
- بكيفج انة ما اجي عليج بعد ولا اروح وياج واذا تصادقيها والله .. انسيني و راح اكوم من يمج ..
- مو كربلا الي تتهدد شبيج تعرفيني ما احب احد يحاول يأمرني او يخيرني تردين تنهين صداقتنا كيفج ...
- سهلة كربلاء سهلة ....
الا اكول لمج عليج تمشي وي مخربين غوغائين ...
التفتت مروة وهي تبجي ..
- لا تحجين علينا مو مخربين ...
كربلا...
- انة حكعد يمج ..
كامت كعدت يمها ..
استمرت صداقتي وي مروة و تعمقت ...
ما عفتها ابد لان الاكثر يخاف يمشي وياها ..
وامي وصللها وترزلني بس انة عنيدة تحجي منا اروح
لبيت مروة منا واخذ سعاد الي صادقت بتهم الثانية ..
تعمقت علاقتنا ببيت الجيران بس امي وخالتي ولا طيقهم ...
بناتهم ما يجنا .. الا للضرورة كلش ووياهن لازم ولد يجيبهن واذا يدخلن النا همين وياهن ولد زغير ...
شوي يختلفون عنا احنا نطلع ونطب بلا حساب ولا كتاب ..
صح عمي ما يقبل هذا الوضع بس مرتة مسكتَته ..
جنت صديقة لمروة وسعاد تصادقت وي بتهم همات ..
جنت اروحلهم ..
شفت امهم ما تقبلتني و دائما تبسمرني .
- يمة لفي راسج حرام التفرع ..
..
جنت من ادخل واطلع منهم اوكات اشوف عباس ..
احس بعيوني من تتلاكة وي عيونة مشاعر غامضة تصيبني ..
تكسر حقدي و كرهي للذكور و تهشمة مثل الجام من يتهشم بحجارة و يظل بس الطشار ... متناثر ممكن يجرحنا و ممكن اذا انتبهنا زين تمر بسلامات ...
هيج احساسي جان لعباس .. حب على خوف من المضموم ..
بدت علاقتي جدية بعباس بيوم مروة جابتلي رسالة منه ..
بالبداية رزلت مروة و رفضت اقرا الرسالة ..
بس بيوم بالحلة ..
نمشي وهو ورانا ...
شافتة اختة وابتسمتلة و باوعتلي ...
- كربلاء عباس يريد يحاجيج ترى نيتة زواج بس يدخل جامعة عادي اهلة يقبلون يزوج يعني بعد سنة و يخطب و احسج راغبة بيه ..
شفتة يمشي بالتوازي ويانا بس بينا وبينة مسافة جبيرة حتى لا يبين جاي ويانا ..
ظل يباوعلي و اباوعله ..
- السلام عليكم كربلاء ليش ما قريتي رسالتي كل نيتي وياج شريفة ..
ما حاجيتة عفت مروة ومشيت سريع جسمي كلة يرجف ...
جنت لابسة تنورة كصيرة ام الكسرات جواها كولون ابيض و مسوية شعري ضفيرة طويل كلش شعري و شقاره عالي ...
بداخلي اكول شلون يحبني و يرغبني
هذا الحلو وانة مو حلوة اهلي يعيبون علي ويستهزؤون مني كل سلاحي جان لساني ...
سمعت مروة تصيحني ...
- كربلاء اوكفي يمعودة عباس ما يعض بس راد يفهمج نيتة شنو ..
ظليت اسبوع ما اروحلهم استحي و من اتلاكة وياه من يجيب اختة بس نظرات و كالعادة مبتسم ...
بيوم طلعت اتاخرت مروة ما اجت علي وورانا مشي للمدرسة ..
ظليت واكفة ببابنا انتظرها استحي اروح من ورى الصار ..
بديت انتبه على مشاعري ..
جنت واكفة وهو واكف و عيونا متلاكية متحاضنة ...
بقصة حب انولدت ...
طلعت امي سماح وهي تريد تبيع شغلها حتى توفر مصرف لبيان .
شافتني واكفة اباوع وابتسم لعباس خزرت عباس فدنك و دخل مستحي ..
حاجتني امي سماح ..
- شو لسة ما رايحة للمدرسة شعدج بالبيبان ..
- ها ... وانت شعليج ترى مو امي انت ..
- انجبي مصيوبة لسانج مطلعتة شبرين روحي لدوامج ..
- كلج خلك عبدة مالج غرض ..
انتظر مروة تأخرت ...
راحت دكت الباب كلت هاي شراح تسوي بس لا تكول لاهله ابنكم كاض البيبان لبناتنا ..
بس شفتها تباوست وي ام داود الي مبين عليها تعب و قهر .. موت ابنها ... الجبير بتهمة ممسويها ..
ورى شوية طلعت مروة وبعينها نظرة فهمتها ...
مشينا وكالت ..
- عباس يريد يحاجيج .. شتكولين .. العصر بحجة نروح للسوك و هو يوصلنا ... تدرين اهلي ما يقبلون اطلع وحدي ..
وانت كولي لامج تردين شغلات من السوك
.
- اهلي ما يهتمون ما دام عمي ما يدري .. و ابوي هم ..
- يعني قابلة ... ولج حسيت بيج تحبينة والله اخوي يموت عليج .
- مروة .. اخوج حلو وانيق وهواي تنعجب بيه شمعنا انة بالضبط ..
- حبيبة انت حلوة ومالج غرض باليحجي هاي الاهل
يميزون بين اخ واخ تدرين انة يكولولي احلا خواتج .. مو معناتها خواتي مو حلوات
التقيت وي عباس و بدينا علاقة جدية وصلت نلتقي ...
جان اجمل حب بحياتي ما يوم عباس استغلني ابد اصلا يخاف علي ودائما يغار ويلمحلي لازم اتحجب بس نزوج يلبسني حجاب وعباية راس ..
بوقتها جنت يمكن على موده كلشي اسوي .....
و شكد جنت اضحك على احلامة حتى حدد شكد اطفال يصير عدنا ...
بس من دخلت للرابع عام جان هو كلية هندسة مدني سمعت من بنات يحجلي ...
- ولج هذا دايرة عليه بت حزبي جبير ...
تدرين جان بالاتحاد الطلبة ..
ومن عدموا منهم شباب فصلوه ...
بس بقى قيادي الشخصية مهيب .. و بالجامعة اله وضعه الخاص كلها تعرفه و هاي زهراء عافت الصيدلة و حولت هندسة على مود عباس ..
جانت وياه بالاتحاد كبل لا ينفصل ... و سمعت ..
حيل لازكتلة ..
وشكد شحوتت معحباتة وتدزلهن بنات تطيرهن من دربها ..
بيومها حسيت بشعور جديد علي شعور الغيرة ..
بس التقيت بيه ...
حاجيتة بعصبيتي والفاظي ..
واتهمتة يخون ...
- شتحجين هاي زميلة الي شبيج حبيبتي ادري تغارين بس مو هيج .
- عباس والله اذا اسمع بيك تلعب علي والله اقتلك
.
يومها ضحك و كال ..
- كربلاء يمتة تصيرين مرتي خدودج بيهن عضة ترى حبيتج على مود خدودج ..
ضجت من حجيه عفتة وهو وراي ..
- حبيبة تعاي توبة ما اتغزل بعد .. لا تتوقعين احب غيرج ترى بنات تغار منج وتشوه سمعتي يمج ..
- ذن بنات الاتحاد مو راحة امهات الولد دايرات عليك...
هنا رزلني .
- كربلاء الفاظج ما احب الجسرة .. خليها ببالج كلمتي هاي بعد صوتج ما يعلى و لا يحجي بهذا الاسلوب ..
اول مرة هيج تحجين شجاج..
- اي وشلون تمنعني قابل خطيبي لو زوجي انت بس .. بس ..
ابتسم هنا و ضحك
- بس شنو ؟
- ماكو شي ..
- بس حبيبج .. سمعي كربلاء اكو بنات منافقات احتمال اكو من وصى البنية توصلج هذا الحجي صدكي يردون يخربون بينا ..
- زين .. بس بعد لا تحجي وياها .. ولا تصور ترى حتى الصور شفتهن متت قهر ..
- ولج زميلة بالجامعة وياي شبيج لاكفة لا عاد تأزمينها .. عود عندي خبر الج ...
- اي ... شنو ..
- راح احاجي امي تخطب احنا نزوج من وكت ... و انة دخلت جامعة فيقبلون يزوجوني ..
هسة اخطبج و نزوج و اخليج تكملين دراسة بس كل شكلج ولبسج يتغير ما اريد هيج لبس كربلائي ..
- عود من نزوج الله كريم ...
- ما بقى شي حبي و هاي الخدود تصير الي ..
عباس ....
من كتلها ما بقى شي ونزوج و هاي خدودج تصير الي ..
شو هاي ضاجت كلش و ما عرفت شبيها ..
- شبيج كربلائي ...
- عباس ... هواي بنات حلوة ليش حبيتني انة مو حلوة .
طبعا صدمني حجيها ...لانها بنت حليوة و تعجبني
- شنووو منو المو حلوة ... كربلاء لا تخلين شخص يستنقص جمالج .. ماكو شيء خلقه الله مو حلوة لان الله جميل شلون يخلق شي مو حلو يا حبيبتي .
كل شخص اله جمال مختلف...
شفتها صارت حمرة وخلت ايدها على خشمها ..
- بالبيت يعيبون علي اخواتي و ..
قاطعها ..
- عادي حتى انة يعيبون علي ذول يغارون منج عميان اسم الله عليج ..
هنا شفتها شهكت ..
- شنووو انت يعيبون عليك صخام ..
- اي يكولون علي هاي شامتك مخربتك ... هي وحمة تمي تنست بحبة بركة و طلعتلي هنا جنها شامة تدرين على هاي شيكلولي
- شيكلولك ...
-همزين انت ولد تتغطى بلحيتك لو بنية جا محد يزوجك شفتي يتنمرون علي انة ضحية مثلج ..
و ضحكت وانة اواسيها هي حلوة بس خشمها شوي جبير مبوز بس مو مهم عندي ...
- ترى تبالغ مو جبيرة وحمتك هاي بكد فرخ ذبانة ..
خزرتها ...
- تشبيهاتج حسنيها .
باوعت للحيتة على الوحمة جانت ظلالها مبين شوي بطرف حنجة ... بس لحيتة مغطيتها ..
هي شايفتها لان الحكومة مانعة الطلاب تربي لحية
بس بالعكس تحسها تنطيه جمال شكلها مثل شامة جوزية نهاية حنجة بشوي ..
حتى هواي حبتها تبين شامة حلوة ..
- ترى ممنوع اللحية شعجب ما مزينها ..
　
- ازينها وطول .. اليوم اريد ازينها لان البروف طردني من المحاضرة اليوم ..
- يا جا دربالك لا تنفصل زينها يومية ..
جانت تريدة دون لحية ...
تحب تشوف الشامة الي جوة حنجة ...
شافها مركزة بحنجة حك شعره وضحك ورجع اشر على وحمتة الجميلة ..
- ها كربلاء ... تحبينها مو ...
دنكت مستحية ...
قرر عباس يحسم الموضوع و بس رجع للبيت كعد يم امه ..
- يمة .. اريدج بسويلفة
- اي وليدي كول ..
- اريد ازوج ...
- يا يمة بس امر و هاي بت عمك موجودة ..
دنكت..
- اريد عامية ما اريد علوية ولا بت عمي
- يمة ليش تروح للغرب وبنات عمك الله يستر عليهن مصليات صايمات ..
- يمة اريد بت ابو رنا بتهم كربلاء .. يمة لو هذا المركب لو ما اركب
ضربت وجهة
- ياا يمة انا ام داود ، ولك عباس ولك ابني تزوج مفرعة ..
- يمة ازوجها واحجبها واعلمها علينا ..
- لا يمة لا .. هاي امها تسوي تجمعات نفاق وغيبة لا يمة لا تورطني وي هذول ..
هاي ام سعيد مشبعيها ظيم وظلايم .
و حتى هاي كربلاء مشبعة مرت ابوها قهر ...
- يمة الله يخليج ..تنعدل يمي و الله احبها ..
- انسى ...
اما كربلا كاعدة بسكتة طلعت كتاب بحجة تقرا تباوع لرسالة عباس ..
كلام غزل وحب ابتسمت ...
ما حسيت الا امي سماح تجر الكتاب وشافت الرسالة
..
كورت الورقة وخليتها وراي ..
- انطيني الي بيدج ..
- لا .. روحي يالعبدة روحي يم صنان ..
- كربلاء سوالف مراهقة ما تلوكلنا يكضج ابوج وعمج يذبحج و الله .
- وانت شكو ..
عافت سماح و شردت وهي تضم الرسالة بصدرهة ...
و كل مشاعرها متوترة .. ظلت ترجف وتهتز ..
وهي تلمح لامي وخالتي البنات تحتاج متابعة ..
بس تناولنها بلسانهن ويومها صارت مكافش روس ..
بس خالتي ام نؤاس ذكية صح هي منطت بيه كدام امي سماح بس حسيتها تصف بيه وتراقبني ..
و بيومها ..
طلعت كالعادة لملتقانا ..
نسولف واشوف خالتي وراي تجرني و ضربتني..
- لا تضربيها و الله كايل لامي تخطب ....
- شنووو تخطب منو يا تايه يا صايع ولك شنو انتم وننطيكم ناس غوغائين و مخربين .. متوازين ننطيكم ..
هزت ايدها وجرت كربلا للبيت خبرت امها ووزتها
- بتج تمشي وي ابن بيت سيد ابو داود ...
يومها كربلاء انكتلت بصوندة دارن عليها ..
و هددنها يكولن لعمها يذبحها ..
لبست امها عبايتها وراحت هادة على بيت الناس دون ما تفكر بهيج راح تكسر بخت بتها...
دكت الباب حيل طلعت ام داود و اتناولتها غلط ..
- ابنكم الي عود سيد يتعرض لبتنا والله اوصلها عشاير وابليكم بالفرقة الحزبية تردون تخطفون بتي .
يومها قرروا يخطبون البنية .. لان مو بيت السيد يتعدى بعراض الناس ..
جانت بالمدرسة .. و مروة تراويها صور عباس بالجامعة وهاي بعدها لازكتلة ..
يومها تعاركت وي مروة ...
- هاي ماتابت من رحنا للجامعة سفرة علمية حاولت احاجيها..
وشفتها يمه بس اخوج خزرني ارجع وي المدرسة و الطالبات ..
اكيد بينهم علاقة هاي غير حجي توصلة الي بيد كرابتهم عباس ما حبني يريد ينسى حبة المستحيل لبت الحزبي وهو ابن ناس عدموا ولدهم ...
- شتحجين انت غبية مو ولج عباس رايدج ..
- لا ما اثق يضحك علي اكيد .. يريد يزوجني لاني غبية يلعب براحتة حتى وي بنات الحزبين ..
سكتت كربلا ..
- المهم اليوم العصر جاين يخطبنج صيري عاقلة لا تضيعين الاول والتالي...
دزو زوجة سيد داود جانت ام نواف بعدها بحيلها و ياها ام داود ..
و وحدة من خوات عباس ..
طبعا طلبنها و هنا لعلعت الهن ام رنا بلسانها
- و الله ما تستحون شلون انطيكم بنتي ولكم انتم خونة مخربين غوغاء
و ظلت تشتم وتغلط على شهداء العائلة ..
وصاحت كربلا الي هددنها اذا توافق يخلن ذبحها حلال ..
دخلت كربلاء وهي ترجف و بالها حجي البنية الي نقلته عزت عليها كرامتها مخليها بديل لحبيبته ..
السؤال الي دائما تسال نفسها ليش اختارها هي وخشمها وشكلها العادي ...
صدكتة من كال حلوة تخبلين وخشمج مو مهم ..
صدكت غزله وكل كلامة الي جان بس يلعب عليها اكيد من ورى الفضيحة السوتها امها اجوا اهلة يخطبون والا ما اجو.
قهرها خلاها مجرد معبر يعبر عليه ينسى بيها زهراء.
قهرها جبروت الرجل الي كرهتهم و هسة وكعت بشباك العنكبوت وكعت بالفخ بعد ما امنت بعباس وتصورتة مختلف ..
رفعت راسها وبقسوة الي قررت تصير مرافقة لحياتها ..
- خالة على اي اساس اقبل بيكم مو من مستواي اقبل بناس مخربين خونة للدولة و للقائد ...
لا خالة روحي لبيتكم ما اريد ابنج ... اصلا كليلة البينا جان لعبة لمراهقة ولعبتها ... و مو هو الرجال الي يلائمني ما اعتبرة رجال اصلا والله يا الله ازوج المهتلف عود من عقلجن ...
و حجت خالتها ..
- اصلا البنية لكرايبي محجي بيها ...
انطردوا اهل عباس ...
و
من وصل خبر الرفض لعباس .. انصدم حيل انصدم .
الخاينة المراهقة تلعب عليه
- ولكم انة عباس تلعب علي مراهقة والله اكسر خشمها وخشم اهلها اخذها نهيبة ..
صاح بيه اخوه
- انجب مو بيت السيد يتعدا اعراض الناس .
- انتة مالك شغل بيه مالكم شغل
صاح بيه الاخ الاكبر من بعد المرحوم داود
- شنو سايبة ولك بيدي اذبحك هاي المفرعة تنساها و بت عمك موجودة ..
- وروح رسول الله اكطع قسمتها خل اشوف منو ياخذها اشيع عليها و الله انة الها ولكم اريد افش كلبي .
- اششش انفضحنا روح سجاد دز على عمامك هذا الا اليوم نربيه ..
تجمعوا عليه و ضربوه ...
وتعال الا تزوج بت عمك ...
- ولكم وخروا وحق جدي ما اترك كربلاء .
صاحت امه وهي تلطم
- راح تموتون ابني الله لاينطيكم بيت الزبيري الله يطلع حوبتنا بيكم وخر احمد يمة اخوك ..
وخر خوية ابو زين العابدين تركوه والله اخذه واهج من الزبير كله بس تركوه ..
يومها بغرفتة شمر روحة بالكاع وهو يبجي كرامتة وجرح كلبة ..
كام و طلع رسايلهة و انهار ظل يضرب بالحايط ..
و يصيح
- ولج اعلمج وروح داود و عمي العيرتني بيهم الا املكج الي و اعذبج انة الج اعلمج يا حقيرة ..
نبض وجهة بعروكه و حس بعرك بارد يلفع وجهة و كل
ملامحة منتفظة مثل انتفاضة ثورة قائدها مقتول فما
يكدر يسوي الا تهديد عسى ولعل فرصة تجي و تنقلب الامور لصالحة ...
ام و خالة كربلاء ظلن يشهرن ببيت السيد يم جماعاتهن وغيبتهن ..
و راد ابراهيم يوصلها عشاير من وصلة حجي عباس الا انهبها ...
ظل يدز حجي بيد الجهال و يشيع عن كربلاء حبيبتة وطالع و ماشي وياها ...
اخر يوم لكربلاء بالمدرسة تعاركت مروة وياها ..
- ها كربلاء انهجم بيتج على هاي السالفة ولج يا صلفة ليش هيج مشيتي بالغش ما كلتي مخطوبة ولعبتي على اخوي .
كذبت كربلا حتى تنقذ كرامتها ...
- اي احب قرايب امي وراح ازوجه .. عادي تسلينا على السيد اخوج غبي وصدكني ..
بيومها كربلا و مروة صارت من الروس ...
من رجعت بحدها بالطريق تمشي ..
و لحكها عباس كضها
وضعة متبهذل وحالتة حالة
جان يجر بيها حست راح ينفذ تهديدة ..
ضربتة ودفعتة وركضوا ولد يتعاركون وياه ..
- حبيبتي هاي فنة اليدخل ..
شافها ترجع لورى تريد تشرد فكللها ...
- ليش ولج .. روحي الله لا ينطيج و لا يهنيج بزواج ويارب ما تصيرلج قسمة وظلين على كلب اهلج المتكبرين .. روحي بجاه رسول الله عند الله تبقين تتمنين العرس ولا تحصليه ...
وصل الموضوع لاهلها من الشافوا الحالة بطلوها اهلها ودزوا تهديد للسادة ...
هنا قرروا يبتعدون بقى بس ابو ام نواف وهو احد عمام عباس الي بقت وي ابوها بالزبير خاصة هي ارملة و رجعت تعيش بيت ابوها بعد اعدام زوجها ...
ورى فترة من شافوا عباس معاند .. كلش .. الا ينهب كربلاء ويلكة طريقة يخطفها
خلوا ناس تكلة تزوجت ....
فبطل ما يروح للزبير ابد حتى لبيت عمة ابو مرت داود ما يوصل يشوف ابن اخوه من يجوهم ..
و تزوج بت عمة الي بعد سنة ورى الولادة جابتلة توم وماتت ...
جانت ضعيفة و دائما مريضة وهو مهمل جان يمكن متقربلها مرات معدودة ...
الحاضر ......
على صفناتهم و تلاكي العيون جانت هاي الذكريات الصامتة ببال كل واحد منهم من غير حجي وسوالف ....
- ها كربلائي صافنة
- اي بهاي الدنية انت هم صفنت المن فاتحين كام ..
- امتع عيوني بحلالي ...
- اروح انام عباس عفية ..
- نامي مالج غرض بيه ثبتي النقال بحامل و نامي اباوعلج ..
استحت ..
- ما اكدر البنات يمي نايمات ...
التفتت رقيم وصبا نايمات ...
- روحي باجر جايج العصر شوي نسولف ...
ابتسمت و هي تعدل الهدفون على اذنها وتهمس بلاقطة الهدفون وتباوعلة ..
- زين لحيتك ....
صفن بعيونها شاف بيهن حنين و نظرة بعيدة يدريها تحب شامته من غير ما تكلة يدري تحبها ...
- ليتني هدفونك الذي لامس شفتيك ...
اموت بهاي الشفايف لك ماناكل عسل من الله حلوين ..
غمضت عينها مستحية من حجية وصارت حمرة الحمد الله الليل ساترهة ..
- تصبح على خير..
ثاني يوم رقيم وبيان تعاركوا
- بيان اول يوم العطلة والله تعب علي حباب حيل تعبانة خليها نهاية العطلة ..
- لا ششوف منج ودوامج ..
- اخذ اجازة زوجية
- شوفي نهاية اول اسبوع العطلة وهاي هي بعد ما كو تاجيل ...
- اهووو..
طلعت ضايجة ..
اندك الباب وطلع لكة السيد جاي ..
- يا هلا مولانا تفضل ... زارتنا البركة ...
- احم .. اجيت على مود .. يعني ..
باوع البيدة وانطاه لبيان
- هذي حلويات ...
- المن هاي التكلفة
- عمي تكلفتيش سويلي طريق ..
دخلة للصالة و صاح بيان ..
- بنات ضيافة لسيد عباس ...
ركضت كربلاء وهي تكرص بخدودها و عدلت وجهها خلت مكياج وهي لابسة كيلوت و بدي حصر ...
باوعت لجسمها زين خوش ضعفانة بس بعد تحتاج ..
نزعت الكيلوت لان حستة ميلائم جسمها هسة . .خل تضعف بعد ..
لبست فستان كلوشة ...
جواه ستريج ...
و طلعت ورى ما مشطت شعرها الطويل..
اخذت الضيافة من سعاد ..
- شلوني ..
- تخبلين ما اوصيج خية لسانج حصانج ان صنته
صانج ان خنته خانج . بعد خيتج الولد بالصالة صوتج لا تحجين عالي ولا تجفص الزلم تحب النويعمة
بالحجي و الي تبرز انوثتها مو رجال يحاجي رجال ..
- قصدج علي هذا الحجي شو جيبي جنج رفش ينصح
هزت سعاد ايدها ...
- ربحنا ..
دكت الباب و دخلت و بيان يحوس .. ما حجة هل مرة لان دخلت دون حجاب ..
بس شلغم ما طلع ..
كعدت هي هم ومدنكة .. وبيان وعباس يسولفون لاحظت بيان يفتح مواضيع .
و عباس يسد يريدة بس يكوم ..
شافتة ظل يضرب بيدة ع ايد القنفة وهو يسولف ..
- اكول عمي ما وراك شغل راح تتأخر على محلك ..
ظل بيان يكلب بنقالة
- لا ما يصير سيدنا اعوفك و اطلع مو حلوة نعوف ضيوفنا ..
- بيان عود سد الباب وراك من تطلع يا عمي اريد مرتي براس كلمة ...
خجل بيان السيد هذا اله هيبتة و من حرجة استحى وطلع بس عاف الباب مفتوح ...
كام عباس سده و ابتسم ..
- خرب يومك بيان امس انة ما نايم و هذا شلغم ..
باوعت كربلا ..
- اذا جاي تهدد و تضرب ترى اكوم ...
- يا بت الناس شكتلج و خايفة مني ...
- اذكرك توليتني ضرب ...
ضيك فتحة عيونة ...
-
- تجاوزين .. تجفصين تصيريلي جنج زلمة و لسان و صوت عالي اموتج و الله بس تجرين عدل ادللج ..
لوت حلكها وهزت ايدها
- بدة الديج يعوعي علي ... اكلك لا تهدد ما احب احد

..
قاطعها ..
- المهم اول جية الج ما اضبج خليج مرتاحة لمن اصيدج ...
كام وكعد يمها و كض ايديها ..
- مشتاقلج .. و الله ما مصدك انت وخدودج الي ..
رفعت حاجب وضحكت تذكرت جان يكلها احبج على خدودج من يريد يضوجها ..
-
- كربلائي ولو سمنانة بس ابقى احب خدودج لونهن يذكرني بلون الاجانب هيج ابيض احمر ..
جنت ضعيفة و احبهن .. هسة متفحات ..
باوعتلة
- تقشمرني ماكو رجال يحب السمن .. وانة سمنت عود ضعفت شوي اكلي دايت على مود صحتي ..
- ما يهمني شكلج ...
شافته يلزم ايدها بيده رجفت وهي تحس ناوي يسوي شي ما حست الا جرها بحضنه
- بوياااه سنين احلم بحضنج محروم ولج من جنه احضانج متت من كالوا تزوجت ..
لو شايفة حالي و الله ينكسر خاطرج علي ..
- تريد تكول تحبني ما اصدك ما اثق برجل كذابين ...
- رجعت تخرب اللحظة اكلج انت سكتي حلكج ما ينفك يبث سموم خليني مرتاح ..
رفع وجهها اله و ما حست الا عض خدها صاحت تبجي..
- و الله جنت احلم يجي يوم اعض هل خدود ...
- ااخ هاي شبيك انجلبت ..
ضربها على حلكها..
- تأدبي حسني ملافظج بيج كتلة بصوندة ... بس اليوم راح اغلس لان اريد...
باسها .. .
وسعت عيونها وتريد تدفعه بس ثبتها بيديه ...
حست داخت واغمى عليها ..
- شبيج ..
فتحت عيونها ..
- هاا ... لا هيج بس محد بايسني ...
هز ايده ..
- احجي عدل عوزج بعد يبوسج احد كبلي .
رجع يريد يبوسها بس دفعتة وشردت حست بعقلها الطفولي عكس عمرها .
يسيطر عليها ركضت مثل طفلة تريد تطلع وهي دايخة وترجف كيانها كلة متوتر عثرت بالدواسة ووكعت ..
غمت روحها على ثاني مرة توكع كدامة الظاهر راح تكضيها وكعات ...
كومها وكللها ..
- اسم الله شجاج تتعثرين ركزي بدربج ..
زين مبدلة لبسي عبايتج وحجابج خل نطلع .
هزت راسها اي ..
- كربلاء عباية راس و جواريب انة اغار عليج انت بيضة كلش ما اريد احد يبصبص ..
　
- بس للحوزة البس عباية راس البس صايا لو جبب ..
- كربلاء عاداتنا تتعلميها هاي اختج لبست عباية الراس ما بيها شي تعلمي على عادة العيال ..
ترى عدنا مبوشايات يجوز بس نزوج تتبوشين ..
- شبيك عباس ولا جنك مهندس مثقف و نهلة ما بوشاها نواف ..
- و الله نواف براحتة مرتي انة بكيفي . ... وانة ما اريد احد غيري يشوفج على العموم البوشاية ما مقررين بعد الزواج و نشوف روحي لبسي الكتلج عليهن ..
حست بجبروت الرجل يتسلط عليها وهذا الشي ما تحبه بس خل تسايرة شوي بيها طلعة وي الحب ما تريد تخربها ...
السماوة ...
.
.
.
مرت ايام و ام بيان مريضة ضغطها يعلك ما يستقر ...
اجت العطلة وراح ابن اخوها سال كالولة شايلين
و محد يدري وين وهو ما سال اكثر شاف الناس السالهم بس تحجي معلك
يا راخوا بلا ردة جا طلكوني من رجلي جا بتهم باكتة ..
فمكدر ياخذ وينطي بالحجي ...
بس وهو بالتكسي شاف واحد مو غريب عليه وكف التكسي و سلم عليه و تباوسوا ..
- وسأله عن بيت الزبيري
- و الله يا خوي سمعت ابنهم رجع .. و شالوا بس الناس تكول اخذ اهلة للخارج لانه مجنس
- يا بلد
- يمكن المانيا و ناس تكول بهنكاريا و ناس بروسيا وحدة من هاي الدول اخذهم و هاجروا ..
هز راسة و ترخص و كال لابو التكسي
- لكراج الموحد اخي
- تدلل....
هذا الموقف ينطبق عليه الناس ع المظاهر تأول و تضخم .. كلشي ..
و طبعا رجع وبلغ عمتة الي زادت تعب و قهر ايست من ابنها كلش .
نهاية الاسبوع الاول
وصلنا لعرس بيان و رقيم
يتبع .....
-