هجين الضلام

بارت34

# هجين الظلام
حلقة  34

كعدت سماح اليوم الصبح وتحس بكلبها رجفة ....
ظلت مثل التحوم ... و ما تعرف شبيها ...
- صبحنا وصبح الملك الك يا رب العباد ..
اصبحت باسمك ..
وامسي باسمك و ما بطل لساني من دعائي ما بطلت يارب ادعوك بدعوة يعقوب و اصبر صبر ايوب ..
ربي حققلي هذا الطلب ....
يا راد يوسف ليعقوب عجل برد وليدي عمر خلص ما يوم طلبت منك العجل بس العمر خلص يربي خل اشبع منه بواخر سنين عمري ..
لا يأست من رحمتك و لا بطلت من رجائي تنطيني مرادي ..
ورى ما خلصت دعائها نزلت اديها و مسحت وجهها ..
و كالعادة الصبح اول ما تصبح لابنها ... مثل ما المسة تكولة مسية العافية عليك ...
- يمة صباح الخير يوليدي شحالك مهموم فرحان
جوعان لو شبعان يارب سهل اموره ووكف ولد الحلال
بطريقه يارب حبب الناس بيه و لا تخلي احد بيوم يضره وياذيه ..
بوقت الضحى....
حست بكلبها رجفة جديدة وقوية ... و راسها ينبض بصداع خفيف ....
فصاحت على مرت ابن اخوها
- شوفيلي ضغطي ما بية يرتفع واروح مستشفيات ...
ورى ما قاست ضغطها ..
بجهاز قياس ضغط وبيه مؤشر لحالة القلب و النبض ...
- ضغطج زين عمة بس شو الجهاز اشر بنبضج سريع ...
- يمة ما ادري من كعدت شلون احس رفة بكلبي ..
و احس نفسي مدري شبية ...
تدرين يبنيتي لو بس تقبلون تاخذوني للبصرة والله اندل ابني ...
كلبي كلب والدة يمة يدليني وين مكان وليدي بس شسوي لرجلج يتململ من روحتي وياه ...
- عمة من سنين متعلعلة انت مو مال سفر لوحدج و ابو ما وتدرين عمي الله يرحمة منعنا نطيعج ماراد علاقة برجلج السكران ...
الله لا ينطيه فضحنا بالمحلة يومية يسكر باب بيوتنا يريد يرجعج جنت جاهل بس فاهمة ( هي جنتهم وبت اخو سماح الوسطاني يعني بت عم لرجلها )
- بنيتي، سنين فاتت منو هسة بحال منو .. الله يعلم الرجل شحالة ..
انة كل همي وليدي .. ما رايدة شي من الدنيا بس وليدي ...
لو اسولف سالفة عمج الله يرحمة ودكتة الناقصة وياي للمخابيل هم مايصدكون حالي ....
ام يحرمونها ضناها .. والله الي بالفاتحة نسوان تنيناتي (نفس عمري / من جيلي )
لو شايفتهن عبالك بنات بيوت صبيات ...
وانة حال الظيم حالي ..
اخ .. بس شكول الله يرحمك يخوي روح محولل ومبري الذمة ..
- عمة امشي بالحوش ليش بالغرفة حابسة روحج ..
- يمة مابية حيل والله خليني حبيبة وروحي شوفي شغلج ...
باست راس عمتها وطلعت تكفكف شغل .. خاف ناس تجي تلاجي (تعزي ).
ورى فترة حست بسوالف فرح وضحك تسمع ضحك وحجي بالممر يم باب غرفتها ... وتوسل شاب يريد امة ...
حست بكلبها مثل طير يرفرف ...
سمعت ابن اخوها ...
- هههه والله خايف الحجية تنصدم وتروح بيها ولك خل انطيها علم ..
- هي هنا مو ... ماكو يمها احد سولي طريق..
- لا محد ..
- مالي صبر راح ادخل الها ...
- اوكف ولك ما تدري بيك وهي مريضة لا تروح بيها ...
- زين كولولها مشتاك جايج من بعيد وعزيز اخيرا وصل ...
اختلطت وي كلماته شهكات بجيه .. وهو يحاول يتماسك ..
صاحت عليهم ..
- يمة ابو مازن وليدي منو جانة (ج =ي لفظ خليجي )
بس ابو ليان دخل الغرفة وي واحد من و لد اخوته وسد الباب ...
سمع صوت بجي امه و ترحابها بخالة ..
بعد ما كدر بادت رجليه و ظل يرجف ...
مو بيدة شايفين الي يترقب يلاكي عزيز...
بعد فراق طويل شلون حالة يصير ..
كل خلاياه ترجف مو بس نبضة يعلا ويصدح بنشيد التلاكي من بعد فراق...
جان ابو ليان يحضنها و هي تعاتبة بعينها عتاب ...
تمسح بعيونها وهي ترجع تعاتبه وهو يحاول يمهدلهة...
- تصدك تجذب عايفني ما تسال لا ماكو عذر يبو ليونة ماكو ...
لو تريد تحارب الكون على مود خيتك الكسرها الزمن بس خفت لا الح عليك على وليدي كلكم تخافون من المرحوم ..
- خوية بسج بجي و لا تعاتبيني والله المرحوم كطع الوصال .. حاولت اواصلة من غير حسابات يحضرني مللني والله ....
على طرف شفايفها سؤال...
تريد تكلة وليدي من هج هم تعرف اخباره لو هم الاتصالات بينكم مقطوعة ..
بس هو سبقها و باس راسها يراضيها ..
- جايبلج وياي هدية .... عزيز غا...
ملحك يكمل لان بيان مكدر ينتظر ابد مو بيده هو من النوع العجول وهو هم مو صبور ...
ينتظر هاي اللحظة من سنين ...
دخل ...
رفعت راسها ....
عيونها توسعت فركتهن رجعت باوعت رجعت لبست النظارة الي معلكة بركبتها بسنسلة خاصة ...
بعيونها وحشة ليل وصبح لسنين مرت وحشة وهجر اليوم انتهة بوصال ..
صيحة هسترية تحررت من شفايفها .. بيديها تريد ترفع نفسها تكوم ...
تخونها الرجلين البادن بمكانهن ..
- يماااا منو جايني يبعد طوايفي ... يماااا يبعد حيلي ونظري.. ياا عود صدك ...
حجيها ممربوط تهسترت كلش وهي تبجي وتضحك ..
- يااا ولا اصدك .. لا حلم هذا .. مو علم والله حلم ..
خوية ابو ليان عود صدك ...
يمااااا يوليدي .. يكليبي .. يا بعد هلي وعشيرتي ....
تريد تكوم الحيل باد من مفاجاة مو بالحسبان ...
تلاكت دموعهم كبل المحاضن ....
دموع محبوسة اخذت حكم براءة ..
ونزلت على الخدود بسرعة مثل نهر ...
ووكعت من حنجة على ركبتة مثل شلال .. من يهدر من عالي ويوكع يتهشم على صخور الزمن ..
الحرمان شي صعب مثل صخرة تغلف كلوبنا نحاول بتصرفاتنا منبين شكد محتاجين للمسه حب وحنان من ام مفقودة ..
الحرمان ميعرف معناه بس الضايك ضيمة يحولنا مكسورين ضعيفين بداخلنة نستجدي الرحمة و الحنان من ناس هم ولا يهمهم امرنا ..
هذا هو بيان الزبيري محروم حنان ...
هو يباوع ورهبة خذتة ...حس بابن خالة يدفعة لامه
- شبيك تصفصفت مكانك ولك روح لامك هي من ايام مريضة مابيها تكوملك ...
وهي تصيح...
- وليدي بعد طوايفي مابيه حيل تدنة ليا
بلحظة يريد يشمر نفسة بحضنها هي كامت على ركبها وتريد تنهض شمر روحة على ركبه يمها و حضنها عصرها اله حيل مثل ضلع اله
نحيبها ونحيبه تلاكن بنغمة وحدة .
- اااخ يمة يمة ... اااخ يمة ... يا ريحة جنة يا امي يا حرماني منج با كلبي وكلي انتي يمة
يشم بيها وينحب وبجة الموجودين وياهم ..
- وليدي يماااه ...
تشبكة وهي تبوس بيه تحضنه وشم بيه ...
و تون و تحن بنعاوي ...
يمة الولد يبني اريدك للحمل يمة لو طاح ...
يمة ردتك تشيل النعش وتدفني ...
يمة روحي وروحك فرد معلاك وثنينا ما نهوى الفراك
من دك الهوى الباب ...
حسبالي جابلنه الاحباب..
وشمدريني الهوى طلع جذاب ...
يمه كعدنه
اكبال الباب ننتظر شوفت الاحباب
كعدنه...
ولكعده طويله...
مراضيع حركتهة الشمس...
علا نحيبهم وهو يشبكها حيل ما يكدر يوخرها عنة لا يطلع حلم مو حقيقة ...
- يمة مشتاكلج و الله يمة ما مصدك ... عبالي للموت تظلين حسرة بكلبي .. مشتاكلج بكد رحمة الله
احمدك و اشكرك ربي .. ما قصرت يا ربي .
وخر شوي عنها و رجع حضنها رجع دنك يبوس ايديها ونزل يبوس رجليها دنكت تجرة
- حرام يبني حرام ...
- لا يمة اريد ابوس الجنة ....
وتلاكة الغصن بشجرة فيايه ..
بحضن الام فياي يظلل عليه كل حرمانة ... نحيب .. وبجي .. وشهكات مشابكة ..
كعدوا واحد يشكي للثاني فراقه ....
- يمة مشتاكلج مامصدك ... يمة لو تدرين الحياة شسوت بية وانة شسويت بيها ....
لو انت موجودة يمكن هواي امور تغيرت...
جان يمها كاعد كل عيونها عليه ما اهتمت للبقية بس بعينها ابنها ..
مسحت دموعه وجرتة تشبكة حيل وتشم بيه ...
الضنا عزيز .. وغالي .. و اصعب فراك من يحرمون الام ضناها ..
شافت لحيتة العالية ...
وهي تلمسها وعيونة ذبلانة مبين هالات دايرهن مبين انو عده هزول رغم هي ماتعرف شنو بنية جسمة بالسنين الفقدتة بس البشر يبين من وجهة اذا متعوب حتى لو نشوفة لاول مرة ..
- وليدي مريض انت ؟
- يمة راسج سالم مرتي توفت ....
انتبه لابنة بس يباوع بعيونة
مستغرب الموجودين
شافه مستغرب هذول السمران
منو فصف ورى ابو ليان الاسمر الوحيد الي يشبههم بس يعرفة ومتعود عليه ....
اشر لابنة ..
- وسام تعال ولك هاي بيبي..
بقى الولد مكانة جامد ....
فراح جرة وجابة يم امه ..
- يمة هذا وليدي ...
شبكتة وحضنتة شم بيه ..
- يا يمة شحلاتة تعال حبيبي تعال ترى هواي علي ابني يرجع لا ووياه هدية عدي حفيد...
..
شاف ابنة يوخر بيها مستغرب ومتخوف ...
وخزرة ابوه بسكتة وبكلبة يكول هم حظوظ يم ام رنا وخواتي يروح يبيع ميانة
يم بيبيتة مسوي روحة خايف اللوتي ...
- تعال ياحلو .. تعال انت وليدي ولك انة بيبي يمة ليش تشرد تعال حبيبي خل اشمك ...
- بابا عمو ابو ليان افتح منها هاي كلها صخام تتلفني ..
مو مثل السود الي باوربا شو هاي جلحة
انحرج بيان وحك ركبتة وراد يغطي الموقف
- هذا ظل فترة يم عمته هو ما يقصد عليكم طبعا لا ..
بس هو لكط الفاظ شوي فيجمعهن مثل ما يريد يعني هو ...احم ..
شافهم مدنكين ضامين ضحكة رغم حزنهم بس الطفل كسره بكلامه ..
طبعهم مرح ومتعود على ناس تمسهم بلونهم و ياخذونها الكلمة بمرح ...
بيان بكلبة الغبي فشلني لازم اعلمه غلط التميز بين ناس وناس كلنا من ادم وحوا
ضحكت امه
- ولك بيبي اليوم اخليك بحضني حتى تصبح اجلح مثلي ...هههه
جان بيان يخزر بابنة الي دنك و حس حجة شي عيب و مو لائق ...
فتربيتة الي علمتها ياه امه يعتذر
- اسف ..
بوستة
- يروحي شحلاتك زين انة مصخم لوني وانت كلك كيك و حليب يمة مال اكلك اكل ..
- لا .. مدام ما بغاش ..
ظلو يبتسمون على كلمته مدام ...
بالليل انفرد بامه من فرشوله يمها ...
يسولفون تساله احواله ويجاوبها ..
وهي هم تكلة على كل المر بيها ...
اجة وسام بينهم وهو يكللها ..
- ممكن سؤال يا حجية ..
نتر بيه ابوه
- كول بيبي يا لوتي مو ما اعرف سوالفك ..
- مدام الحجية احلى ...
- خوش مصطلحاتك لا كوللها بيبي ..
رجع باوع لبيبيته
- عجبني شكلج عيونج حلوة حيل بس ليش لونج ما يلمع الي عدنا هناك باوربا سوادهم يلمع حتى جدو ابو ليونة ... حلو ..
باوعتلة ومثل طبعها تنزل لعقل طفل ...
-يمة ذكول من الله راضي عليهم مرتاحين ..
رد يسالها ...
- و جدو ابو ليان مرتاح .. زين هو مو اخوج ؟
ضحكت لان هذا يسال هواي .