هجين الضلام

بارت 27

#هجين_الظلام
حلقة ٢٧

..

دخلن و بدخلة كربلا وهي تفوت يم باب مضيف الزلم طلع عباس و سد الباب وكفت ...
التفاتة ... عيون تلاكت ... عتب حزن ...اشتياك هذي جانت لغة عيونها ..
بس ملكت بعيون عباس غير برود تجافي و قسوة ..
حركة بفجة تبين بسمة احتقار ...
وراها غض بصرة ودنك ... و همس بصوت مجروح..
- يعني وين داخلة يم الزلم هيج انت شايفة روحج كد الزلم يا كربلاء ..
روحي خوية مناك النسوان ...
باوعتلة بتكبر و غرور بتعالي ..
- وانت شكو عندي اخو يحاسبني اذا اخترقت وكر الزلم و غرورهم .. للعلم قبل ماداخلة لبيتكم فمنتبهت و ما وكفت حتى ... حتى ادخل هنا ... بس وكفت لان ...
سكتت ...
- ولج بعدج مدخلتي ولسانج شطولة كلاشنكوف مو لسان، بس هين كربلاء الخيانة و الغدر صدكي ادفعين ثمنة روحي لا ينتبه احد لوكفتنا ..
طلع اخوه من الديوان فشردت كربلاء و اخوه يباوع ...
- عباس شنو شبيها الاخت .. شو مبينين واحد يعرف الثاني .....
باوع عباس وابتسم ...
- لا تستغشم لو ما انت موضع اسراري الاخت دخلت برجليها لعرين الاسد ..
ضحك اخوه ..
- بطل ولك ... عيب هاي اخت نسيبنا صدك امي حجتلي جنتنا اخت البنية الي ردتها بس لا هاي هي مو كالوا نطيناها ..وعرست
عباس ..
- يخوي هواي كالوا ... عوفك منها هاي اجت لظيمها ...
- يلة وصي العلويات بالضيافة..
- تدلل ...
داخل البيت هناك الي رحب من كلبة وهناك الي شايل بكلبة قهر ..وحقد ....
مثل ام داود والدة عباس ..
اشتغلت كربلاء تلميح..
- شلونج يمة شخبارج ... شعجب ما جايبة الجهال وياج.. اوو نسيت يا جهال اكيد هسة انت جدة و احفادج تارسة البيت ....
وسعت كربلا عيونها وكوة كاضة لسانها.
- جهال! شنو؟ ... لا هواي هذا لا وفوكها انة جدة و احفادي تارسين البيت ...
- اي غير اهلج نطوج لكرابتكم و ما رضوا بينا ..
لوت كربلا حلكها و كالت ..
- نصيب مصارت شنسوي ...
لوت كربلا حلكها- هاي من كل عقلها تحجي لا وشلون تباوعلي من جوة جوة ..
ام داود
- و الله زمن دار و البيت الي تخافون تدخلولة انتم بضيافتة لا وبتكم جنتنه مو يمة نهلة ..
شتكولين .....
صفر وجه نهلة و دنكت ..
- اي بيبي ...
نهلة بداخلها : الحجية خوش شايلة بكلبها علينا و مشتغلتنا من تزوجت وتجي لعمتي تكضيها تبسمر وساكتة
بس هاي كربلا روحها بخشمها ولسان
ما تسكت الله يستر كون تصير ذكية
لان كلشي تسويه ينعكس علي ..
ظلت كربلا تنافخ و ورم وجهها من الضوجة
ومن ضعف نهلة انقهرت ما ردت بيبية نواف
شكد تموت من المرة الي شخصيتها ضعيفة ..
ظلت كربلا بس تجر نفس وطلعه بصوت اااحح
دارت اخت عباس جانت وياها بالمدرسة ..
- كربلاء و الله عنيتي علي ..
ابتسمت كربلاء ..
- انة هم شلونج مروة!
- الحمد لله انة زينة بس شدعوة هيج سمنانة ..
كحت كربلا و بكلبها شوف الثانية الظاهر ذن راح يستلمني قصف ...و حسد ...
رسمت بسمة لطيفة بحلكها..
- مروة كسل غدة درقية ..
طبعا جانت انسب كذبة تغطي على سمنتها ....وكملت ..
- بس ضعفت شوي اكل دايت ...
دخلت بنية حامل كعدت يم بيبيتها ..
ام داود
- تعالي زهراء بنتي يمي تعالي يا بت العزيز ..
باوعت لكربلا..
- هاي بت سيد عباس تزوجت ابن عمها و هي
ويانا بالبيت بس عباس طلع ببيت وحدة من اخذ
المرحومة ااخ سودة علي تفرهدت تفرهد منا
... سودة علي عباس من ورى المرحومة مرتة
ظل وفي ما تزوج موت روحة قهر من بعد ام بيتة و بعدها ما رهمتلة مرة ...
صفر وجه كربلا وحست الخنكة اجتها ..
اشرت على مي ..
باوعت ام داود .
- يا سلامات يمة شبيج اكيد تذكرتي المرحوم رجلج ووفيتيلة مثل ابني ايه دنية تاخذ الزين و تعوف الموزين ..
و اشرت على كربلا ..
الي شربت مي ..وشركت بية لا بعد ما تتحمل ..
لوت شفايفها من جهة لجهة وهزت ايدها ...
- اكول خالة شنو السالفة شايفة جهالي بذيالي مجلبة لو جايبة بنيتي الحامل وياي مرة تكولين شكد عندج جهال ..مرة احفاد هسة ارملة ....
جانت نسرين تكرص كركر بس استمرت ..
- نسرين لا تكرصين ما شفتي حجيها جنها رشاشة تصلي صلي .. و اخر شي سوتني ارملة ..
خزرتها رنا و هي تتعذر من العلوية لان حست
جناينها و بناتها صفنن على كربلا ولسانها من رزلت الحجية ... ..
- خالة السموحة كربلا مو قصدها هيج تحجي بس تريد توضحلج هي بعدها بنية ما مزوجة بعد النصيب ..
لوت ام داود حلكها ..
- ياااا داود يبني.. قصدج معنسة اي هاي حوبة السادة بيكم و الله يعباس حوبتك بمكانها .دايما مجربة ..
كربلاء..
- والله يا خالة كلنا عدنا حوبة قابل احنا كفار ...
وسيد عباس يشور ...
اجت نهلة يم اختها تشاورها
- كافي لا تفضحيني عمتي تباوع عليج و هسة يكولون ملسونة ..
هزت كربلا ايدها ..
- اكلج تولتني اكس مربع بلسانها عوزها بس تكول يا يمتة تطلكتي و الله لو نخابر بيان نمشي .. و الله لو ما عيب الا ابهذلها
نهلة وهي تعض شفة
- صوتج ليش عالي ولج كافي ..
جانت صبا تبتسم وهي بيدها نقال هدية بيان الها خاصة بعد سالفة امها من خطفتها خلاه الها للطواريء ويراقبون نقالها .. لا تنحرف ..
ظلت كربلاء على اعصابها لمن خلصت العزيمة و
كاعدات يشربن جاي و صبا تراسل بيان وتبتسم ...
وحجتلة عن لسان كربلاء وضافت بهارات ..
- بيان الحك نروح كربلا طولت لسانها على العلويات يبووو يخوي فشلتنا ..
تمت رؤية الرسائل ..
يكتب...
- شنو الفلم ..
كتبت ...
- عاركت العلوية ام سيد داود و تجاوزت .
رجعت العلوية تتحارش بكربلا ..
- صدك يمة شنو امج ما اجت شنو تستنكف ..
كامت كربلا و طلعت كبل لا تسويها من الروس ..
ووكفت برة بالشارع و هي معصبة ..
دزت رسالة لرنا ..
-ختموا الكعدة انة بالشارع راسلن بيان يكوم كافي طلابة مو تزغنبنا المن باقين لقلة التقدير ..
ذب عباس الحاوية بالحاوية الرئيسية عالشارع و رجع يدفع بحاويتة للبيت ..
شافها بنص الشارع وجها مبوز فعرف امه اكيد مستلمة كربلا ..
خلا الحاوية مكانها و كلها بنتر ..
- دخلي شعندج وحدج .. بنص الشارع ...
انهدت بيه تطلع حركة امة .
- اكلك اعرفك تعرفني عبالك ثاردة وياك من شفتني تتأمر علي مالك غرض محد يحكم كربلاء.. لا شو ما ادخل شسوي يعني ..
نطط عيونة و كض ايده لا يضربها .. سمعها ..
- بيج كتلة مال كل هاي السنين انة الج يا صلفة ..
عوجت حلكها تقلدة
- بيج كتلة مال سنين دجرب مد اصبع وشوف ما تايهتلك اخلي بيان يكسرك ..
جرت نفس و كحت و رجعت حجت ..
- ها و كل لأمك ترى عيب حجيها مرة وين جهالج مرة يمتة ترملتي لو احفادج .... و فشلتني يم نسوانكم ..
ضافت بهارات شوي و زودت ..
- و كالت يمتة طلاكج ترى ما مزوجة .. فهمت ما مزوجة ولا اريد زواج بلا وجع راس ..
انطاها ظهرة وضحك ..
باوعت لظهره و غمضت عيونها وهي تتمناه حلالها
- بعدج لسانج الطويل و تعاليج و ما تغيرتي ممتع ... حلو هيج من اكسرلج هذا الخشم والعنفوان احس بلذة اكبر ..
دخل يم الباب .
لحكتة
- شتقصد ؟! ليش تهدد ...؟
بس سكتت ورجعت ورى من شافت بيان و ابو حيدر و زوج نسرين طلعوا وشوي وطلعت البنات ..
خزرها بيان ..
عباس .
-
- مو روحة هاي يا جماعة بعد وكت ..
ابو حيدر
- تسلم خوية و انتم تشرفونا اسبوع الجاي ...
باوع ابو حيدر لكربلاء ..
- ها كركر شو هنا ؟...
هفت على وجها ..
- - اختنكت رطوبة جوة و تدري بية ما اتحمل ..
فردت هوا نضيف ..
بوز عباس ودنك و هو كاض روحة و بكلبة فهم تلميحها على امه ..
حاجة نفسة وهو يوعد ويتوعد .
هينة كربلائي هانت كتلتج و الله ياما متحلف بيج بس عبالي النصيب رحمج مني و الله وجدي رسوله لو ادري ما معرسة الا اخذج من زمان و اراويج شلون اكص هذا اللسان ..
وصلهم عباس بسيارتة لان جبيرة عائلية ..
كعدت كل ساعه تسوي فعالية تدوس دكمة الجامة تفتح وسد الجامة وهو فاتح تدفئة خبثت عليه .
استحى من بيان يطفي التدفئة ..
باوعلها بمرايتة ...
و التقت النظرات شاف بعيونها خباثة ...
بس ابتسم و كال ..
- من رخصة الاخوان ممكن الاخت تسد جامتها فاتح تدفئة ..
دار بيان وخزرها ...
و راسلها بنقالة
جري عدل كافي فشلتينا ..
قرت الرسالة ودزتلة رسالة
محد يحكمني ما تفرض سيطرتك ما ارضخ كتلك اول ما وصلت من السويد لا تتوقع اطيعك وارضخ ..ما ناقصني بس عتاوي وديوجة عرب تتمرجل علي ..
ظل بيان على اعصابة .. شيوصلة ناويلها بصوندة بس سؤال بخاطرة منو تقصد بالديج ..
وصلوا نزلوا بيان ورجال خواتها وخواتها ...
هي كاعدة ورى يم الجامة ما راحت طلعت من الباب المفتوح ..
عينها على عباس الي قريب من بابها واكف
وسوي روحها الباب مقفول ما تعرف تفتحة ..
البنات دخلن للبيت بس ولدهم بالشارع يسولفون ويضحكون و مندمجين باوع عباس
بطرف عينة عليها وعرف لعبة هاي المغرورة ..
جر نفس تعمدت تسوي روحها الباب جهتها ما ينفتح......
فتحلها الباب هذا قصدها كلش يفهمها و الا ما طلعت من الباب الثاني ..
تريدة يفتحلها الباب ظل يدردم
- سايق البرنسيسة انة ...
نزلت وتباوعلة بطرف عينها وحجت عليه ...
- رجاءا سد الباب عود ...
جر نفس ... و استغفر ربه ..
مسح كصتة بيدة و مشط شعره بصابيعة لورى ..
فنسحرت بحركته و حست بنبضها يزيد وفراشات الحب بين عيونها تتحارش ..
عباس ...
- ها كربلاء اكيد هاي حركاتج مكشوفة حتى احاجيج مدام اخوج و زلم خواتج ملتهين بالسوالف ..
رفعت حاجب و كالت
وهي تسوي روحها تعدل لبسها وجنطتها و مدنكة لا ينتبهولها تحاجيه وهو حتى لا ينتبهولة
طلع من الجقمجة جفية مسح جام وسوى روحة ينظف بالسيارة و يحاجيها من غير ما يلتفت عليها ..
- لا بلة شو عيد الكلتة ترى ما اسمع زين طرمة اسم الله عليك ..
هااا كلت ادور حجج و احاجيك بس اوكف اوكف
هو شنو انت حتى انة ادور حجج على مودك .. اصلا ما مالي عيني .. بالنسبة الي ما تسوى شي ..
و الدليل خليتك تخطبني ورفضتك ..
عصر وصلة القماش الي بيدة وراد يشمرها بوجهها ..و حلف يمين الا يندمها
- بسيطة ولج تستهانين بية مو ؟ ولج اقتربت
ساعة دخولج جهنمي الحمرة اعلمج اذا ما اشبعج
طك اكعدج و اكومج بكتلة على لسانج هذا ما اسمة سيد عباس وحك جدي رسول الله و
حلفت دين قسم جايج حسابج قريب ( اطك=اضرب )
باوعت على بيان ملتهي بالسوالف .. و دنكت عود تعدل حذائها ..
- لا بلة ... يمة يمة خفت منك ولك انة ما يحكمني رجال .. لاتضحكني مالك سلطة علي وتشبعني طك ...
كامت و عدلت نفسها على صوت بيان
- دخلي شعندج
- حذائي فلت و شديت البزيم اوك رايحة.. داخلة
مشت وهي تتلفت وراها السيد عيونة صار بياضهن احمر من العصبية ونبض بخدة وصدغ ا
لجبين عرج السادة حسب ميكول المثل طك عرج الهواشم (يعني عصب الى ابعد حد و اعلى درجة )
ابتسمت بشماتة وهي تباوعلة معصب تمشي وتتلفت لورى ممنتبهة لدربها داست حجارة بكعبها و الوت رجلها وتكعبلت بالكاع ووكعت على وجهها ...
صاح كدام اهلها وهو يمشيلها
- الله .. الله سلامات اختي ... خوما تأذيتي .
بس من وكف كبالها ورفعت وجهها اله فشلانة
ابتسم و همس بصوت بس الها سمعها
- حل ترى سيد و اشور بيج ...كومي يبنية الناس تباوع ...
ركض بيان و هو يكومها ..
- شبيج ...ما شفتي دربج ..
نترت ايدها وكامت بسرعة تنكت ملابسها من التراب ودخلت شاردة من الفشلة ...
باوع بيان لعباس..
- خوية اعذرنا لان تعبناك ..
من دخل بيان راحلها ..
- ولج ما تستحين مرة بكد امج ترادديها ايا طايحة الحظ ..
رفعت راسها ..
- و انت شكو و تحاسبني ..هم حاسب نفسك رجال عود هي يا الله ..
سد الباب وطلع الصوندة و لسعها ..
- استحقيتيها لعد ... منو ولج مو رجال انة الج ..
السويد ...من ورى تعب سفر رجعت لبيتها وكلها تعب ...
تمشي و بيدها عكازة تسندها ..
المرض اخذ حيلها ...
الطب يأس من حالها ...
و عايشة على المسكنات ...
رغم تسكين الالم بالعلاج بس جان الالم مثل سكين تكطع تمزق بوحشية احشاءها ...
رجعت تلفظ انفاسها الاخيرة ببيتها ...
توقعت بيان يبيعة لانه ملكه بس فرحت من لكت البيت على حاله ..
احلى ايام كضتهن بيه ....
الصديقة تنعرف بالشدايد و منار جانت اكثر صديقة رافقتها ..
عافت بلدها و كل مشاغلها و بقت تهتم بمريضة ...
سلمى ...
　
- منار كنبغي كنام تعبت مبغاش اقعد الم كتير شديد منار ..
نزلت دموع منار وهي تمسك ايديها ..
- سلمى اعتقد (ق=ء) حان الوقت ترسلي بطلب جوزك ...
صرخة من اعماقها روحها بين نيران مرض تحرك دواخلها و بين حياة ميؤوس منها طلع منها صوت صرخة اعتراض ..
- لا منار ... مبغاش اقف بوجه فرحته مابقاش حاجة يتزوج .
منار..
- شو انت كيف تقبلي بهيك حاجة بتقدمي جوزج لضرتك شو هدا يا ...
نزف خشمها دم وشوي حلكها مسحت خشمها ...بكلينس ..
و انرسمت على ملامح شفايفها ابتسامة موت و تلون وجهها بصفار شبح الرحيل ..
- مبغاش اخوض صراع فاشل يمنار انا صافي نهايتي ...
ورى شوي ...
- منار عيطي على طبيب طلبي منو يكتبلي رشيتة مسكن اقوى مسكن لألمي .. راني كنموت الم بزاف ...
هزت منار راسها و كامت تتصل بطبيب سلمى الي بالسويد ...
مرت الايام و رد بيان عزيمة السادة بعزيمة جبيرة ...
كربلا ما شافت عباس بيها تعذر عن الجية بحجة مشغول ...
كعد بيان يم ابوه وحاجاه على الشيلة ... الاب رفض يفارك الزبير ...
بس اخر شي كدر يقنعة وهذا خلا ام رنا بس تدردم ..
- هاي تاليتها نعوف ديرتنا و اعوف رفيجاتي والله بيان مهجولنة مدري وين اوي شدعي عليك يبن سماح من عساك ما شفت راحة..
سمعها ..
- ليش تدعين .. هو هيج و الحظ مصخم مو بعد تدعين علي ...
بس عناد بيها ثاني يوم حمل وشال ...
اسبوع يا الله استقروا ...
بس قرر ورى العطلة ينقلهن للمركز حتى لو يدفع فلوس او يحصل واسطة ...
بدت رقيم تشتري جهاز العرس ...
و تعمدت كربلا تتنازل لرقيم وتحاجيها وصالحها بس حتى تاخذها وياها يشترن جهاز رقيم ...
اوكات تلتقي عباس هيج خطف لان نفس المنطقة ...
اما عباس ...
قرر اجة وقت خطبة كربلا...
تعنى لمحل بيان و حاجاه ..
- بيان محتاجك براس كلمة ممكن ؟
-
- اي سيد تفضل تأمرني ..
- ما ادري شلون ابديلك .. جايك بطلب وانت الحكم و ان شاء الله ما تردني ..
- سيد لو تطلب عيوني املصهن الك ..
ابتسم عباس و حك لحيتة ..
- لا ما اريد عيونك اريد اختك على سنة الله و رسوله ..
- بس ما عندي الي تلائمك اكيد تريد عشرينية ثلاثينية هي بقت بس وحدة مواليد ٧٨ عمرها ٤٠...
- بيان غير هل مركب ما اركب افهمني احتمال تدري لو ما تدري قبل ٢٥ سنة طلبت اختك ...
طلعت نسوانة مهيونة و مطرودة السبب شنو ابو نواف و عمي عدمهم صدام انت تدري مالنا شغل بالسياسة واي حزب معارض الشغلة تلفيق و راحوا شهداء ظلم ..
الناس تخاف تنطي بناتها اوكي ... بس جان لازم اسلوب مريح بالرفض من غير تهديد و من غير اهانات لو نكاومكم ونشتكي عليكم ..
المهم معلينا الزمن تغير و الله لو ادري بيها ممتزوجة اخطب من ورى السقوط ..
كتلك انة صريح وياك و هسة اريد ازوج اختك شتكول ...
انة مهندس مدني متمكن .. اداوم بشركة و عندي مكتب مقاولات هندسية ...
ملتزم ما امدح نفسي انتم صرتم ويانا نسابة واهل ..
و ما الكة احسن من اختك واذا تريد تسال عني اسأل ..
ابتسم بيان ..
- سيد شسال نعرفكم شنو و النعم منك و من اهلك بس ما اريد اتفاشل وياك مدري شلون اوصلك ياها هسة تكول ينطي بختة يكسر بختها بس هاي اختي تهجم بيوت من لسانها ...
انتجة عباس وضحك و بكلبة كال هذا بيان شكد فطير خوش موكف قسمة اختة بهيج حجي..
- و الله بيان المرة مثل المهرة حسب الخيال الي يروضها .. اذا خرطي .. لا خربت و اذا حوك يعرف يلزم لجامها زين تصير تمشي بامر خيالها .. ومثل ما يريد ...
خوية شكلت و شور البنية بس اذا رفضتوني هاي الثانية اريد سبب مقنع للرفض ..
- بيان انة خليتك بالصورة حتى لا تجي تكول لحكوني اختك سوت كذا وكذا ..
ضحك ..
- لا ما اكول و لا اشتكي هسة انتظر الرد الاخير حاول تقنع اختك بيان ..
السماوة ...
كاعدة و هي بين حسبة وحسبة و تنوح ...
دخل ابن اخوها باس ايدها ..
- كوة عمة شلونهن عيونج ..
- الله يكويك وليدي .. ضواهن بدة يخفت يروح عمتك و ما ينورهن الا وليدي بشوفته ..
مسحت دمعة وهي تلبس نظارتها ...
- عمة اليوم شفت ولد جاي للسماوة زيارة لناس ..
هو جان بمحلتنا بالزبير بس شال عام ٢٠١٦ ...
للناصرية ...
سالتة على بيت الزبيري شحوالهم ...
كال حوبة عمتك طلعت بيهم ...
مات شبابهم كلهم بس واحد بقالهم و شرد من سنة ٢٠٠٦ يكولون بسوريا.
ضربت سماح خدودها ..
- ولك بس لا وليدي مات احجي ...
- لا عمة .. منتظر غرك و البقية بحادث نؤاس
وابوه و بيان الي شرد لسوريا .. و كل هذا
اليعرفة و يكول يكولون طالع من سوريا لدولة
اوربية و ميعرف شسمها ..و طليقج متشلل يعني بيتهم انهجم ...
ظلت تبجي ...
- ااخ يبني ايست و انكطعت الضنة ... هاي هي بعد من اموت ماكو شيال تابوتي ..عمة منيظر ادريه من زمان بس اخ يشبابك نؤاس ...
- عمة لا تبجين ...
جاي ادور على رقم لعمي بلكت يدري بيه وين .؟
- عمك كف عنا يولدي من ورى مصايب ابوك ..
بس ابن اخوها كللها ..
- هو ابوي هسة جنة متندم بس يكابر بس خل تجي العطلة تدريني مدرس و حتبدي امتحانات و ما اكدر اسافر منا للعطلة .. بلكت من اهلة احصلج رقم بيان بالخارج اكيد واصلهم ..
- صدك يمة تروح ..
- - عمة اروح بلكت اوكع على اثر للدولة الي ابنج بيها ..
نزلت دمعة فرحة و امل بباجر يمكن لقاء قريب يمكن اثمر الصبر والدعاء بالاجابة...
- و ابوك .. ما يسويلنا طلابة ما اريد يأثر بيك ..
- حاجيتة وجنه يريد يتبارى الذمة وياج ...
كامت و راحت توضت تصلي الركعتين الي اعتادتها للحاجة ...
تقريبا رقيم خلصت جهازها وتحدد موعد العرس اول يوم العطلة ...
كاعدة يم بيان و راسها على صدرة وهي مستحية من جرائته ..
رفع راسها بيده و دنك يبوسها .
- شفايفج ما ينشبع منهن بس هين ما بقى شي ..
و الغزالة تصير مرتي ..
ضحكت و بخجل رفعت راسها و باست خده ..
كام ..
- لازم احاجي كربلا يلة حبي اروح لهاي و كون تقبل بالسيد خطبها..
بس كربلا رفضت عباس لان تعرف غايتة ينتقم ...
عصب عليها بيان ..
- تزوجيه وغصبن عليج فاهمة غصبن عليج لان منطي كلمة ماكو حجة ترفضين بيها عباس ..
- مو كيفك لا تسوي روحك علي رجال ..
نطط عيونة و انطاها بوكسي بجتفها ..
و طلع جاب الصوندة يريد يضربها وكفت ام رنا بوجهة
- احترم الاكبر منك ..
- من تربيها تحترمني و تحسن الفاظها ..
ذيج الساعة احترمها كتلج وخري خل اربي هاي الجلبة ..
من ورى امها مدت ايدها جرتة من شعره ..
- ماكو رجال يسيطر علي و عباس ما اريده ..
- مو بكيفج ..
تفلت بوجهة و ركضت شردت لغرفتها ..
- انة الها اليوم انة الها ولج تطلعين قابل تظلين
محبوسة ولج بيدي ازفج اله ما ترديه لان مو
حضينة تدمغين عليه انت مثل امج و خالتج تردين رجال خرطي تلفيه بصبعج بس يكربلا ...
خليها ببالج عباس ازلمة و الله دواج لكيتة يالصلفة ..
شمر الصوندة و طلع وهو معصب ..
خلالة طابوكة وكعد برة و هو يجر نفس ويدخن ..
شاف عباس يطلع من بيتة الي بصف بيت اهلة ..
جاي يركب سيارتة بس شاف بيان من وجهة معصب ..
راح اله ...
- السلام عليكم ..
- و عليكم السلام سيد ..
ركز بملامح بيان ..
- شصاير اكو واحد بعد ايام يعرس هيج متنرفز ..
اخذ عباس بلوكة و كعد عليها يم بيان
- سيد تعبت حيل و البنية رفضت و انة مستحي منك انطيتك كلمة .
كض عباس عصة وبدة يرسم بالكاع خطوط وهمية
- زين اتفقنا تبينون شنو سبب الرفض سامعين
علي حجاية اشرب ما اصلي ما اصوم انسان مستهتر هاي ثاني مرة انرفض بيان ...
دنك بيان ...
- ما بيك عيب شحدها ترفض ..
- الزواج ماهو بالكوة يبو وسام ..
صفر وجه بيان من الفشلة من سمع بالحديقة حجي كربلا معصبة .
- من كل عقلة العتوي يضربني و الله اروح هسة و احاجيهم ما اريد ازوج مو كوة ..
جانت رقيم والبنات يكضن بيها ..
طلعت و جان تبلع ريكها من شافت عباس و بيان برة ...
خزرها عباس اما بيان زمخ بيها ...
- فوتي جوة ..
- رايحة لزهراء على مود باجر درس الحوزة .. ما فهمت شرح السيد و .. و...
بداخلها ...
خرب يمة هذا مو سيد عباس سيد غضب شلون يباوع خوفني ..
بيان ...
- رجعي للبيت ماكو طلعة ...
رجعت بس مو خوف من بيان لا من مخوزر عباس حست الشارد كل الكدعنة ...
جر بيان نفس ونفخ بتعب و قهر ..
خلا عباس ايدة على جتف بيان ..
- تهون لا ضوج و باجر ادز نسوان على مود التفاصيل كبل كعدة العداد و كل طلباتكم مجابة ..
بيان ...
- و هاي رافضة ..
- اوصي بنتي تقنعها هي وياها بدورة حفظ و تجويد القران ...
- الله كريم يا خوي ..
كالعادة كل جمعة وسبت ... دروس قران تحضرها وهذا ثاني اسبوع تحضر ..
و حسب الشروط من تروح للحسينية تلبس عباية راس و جواريب و حنجها ميطلع من الحجاب يعني تلتزم ..
من اسبوع التزمت تصلي و حذفت الانستا الي جانت تستخدمة لتقضية وقت ..
و سوت جديد عادي و حساب خاص ...
لبست و خلت العباية على راسها هاي فرصة توصل لعباس رفضها عن طريق مروة ..
جانت تدردم ..
مو كربلاء إلي يجبرونها هي يا الله عود يكدرولي لا ما يكدرولي ورب الخلقهم ...
و هذا بيان صايرلي زلمة اعلمة الحقير شلون يمد ايدة علي ..
همزين العتوي طالع لشغلة ...
اخذت الكتب بيدها وسجلها و طلعت ...
مشت كم بيت و صلت يم بيت عباس شافت سيارتة ...
فكرت تحاجيه بس لا مو خوش خطوة ...
دكت باب اهله و عينها على بيت عباس
طلع عباس جان عد اهلة ...
و يدري بجيتها زهراء كلتلة كربلاء خابرت جاية عليها حتى يرحن ...
ظلت تمتمت ..
- زهراء اخذت رخصة من عمها لان شوي تعبانة اليوم ..
هزت راسها ما حجت رادت تكلة رفضت بس ما كدرت لسانها انعكد ..
مشت ...
ركب سيارتة ولحكها ..
- صعدي ...
باوعتلة ...
- شنووو لا بلة ..
- كتلج صعدي اخذتلج رخصة من السيد كتلة خابر اخوها ما تكدر تجي ..
دارت تريد ترجع للبيت ...
- لعد ارجع للبيت الف راسي و انام ..
نزل من سيارتة و كلها ..
- مخبل انة تصعدين بلا فضايح لا احد يلمحنا ويؤول اريد احاجيج ..
- انت سيد و متدين هذي خلوة محرمة اصعد وياك ..
- استغفر الله لو تعرفين معناتها ما حجيتيها بس انت غبية ثولة يلة صعدي .. و عوفج من تديني ..
الله يدري شكد شايل بكلبي عليج كربلائي ..
رفعت راسها وتذكرت هذا دلعها الي جان يدلعها بيه ..
ابتسم وهي داخت بعيونة التركوازية و صعدت ..
صعد و ساق سيارتة وهي مصفنة ...
- ليش رفضتي ..
بغرور و لسان ..
- ما تلائمني لاني اذا ازوج ازوج رجال من صدك ..
كض بريك وكف وهو يصيح عليها ..

يتبع ....