هجين الضلام

بارت15

الحلقة ١٥

اسفة ابني نوحس علي ملحكت اراجع البارت اي خطأ عذرا مقدما
حسيت باوجاع هذاك المراهق ترجعلي واني بالثلاثين فقد منتظر و ذكريات حياة صعبة علي والم وجراح ...
شفت ابني مشيول الغطة منة رحت غطيته وبوستة وجريت حسرة كلبت بنقالي جان اخر اتصال لسلمى من فترة طويلة ...
- شنو مشكلتج ما تحاجيني شنو هاي الغيبة اروح ارجع و اشوف شنو فلمها بس خاف لا ما الكاها يجوز وي صديقاتها برحلتها الترفيهية بس اول تالي رحلة دون هل ولد المسكين شلون انطاج كلبج تعوفين وسام مو هو روحج كلها .
و الله يا امي ولا اكو مثل كلبج نسوان متعافية محد حارمهن من جهالهن ويتعافن على نعمة الله، الله يساعد كلب امي الي انتزعوني منها بالكوة ...
طلعتلي جكارة و رحت للسطح واني منتجي عالسياج و ادخن جكارتي جكارة ورى جكارة بردت حيل يمكن ساعتين وانة عالسطح نار الي بكلبي نستني برد الشتة ..
دخلت وجن النوم جافاني و رجعت للابتوب برجفة و قهر و حزن و الم ووجع جان متاعي لذاك الماضي وانة ادخل بسفينة الزمن اخترق الحاضر للماضي بدوسات اصابيعي صرت عازف حروف و كلمات على مسرح بيانو لابتوبي حروفي صامتة و كلماتي خرسة بس الاوجاع و الانين الي بدواخلها جان جبير جان نزف روح شاب انجرح بعنف و جانت هذي السنة اسوء سنة بحياتي شدوا احزمة الامان و تعالوا سافروا وياي لعالمي الماضي ....
بطرقات اصابعي سریعة بدت كلمات معانات ...
(الماضي)
ظليت كاعد انوح واني اباوع للشط الخالي من منتظر بس شباب تغط تدور و ترجع ماكو اتصلوا بغواصين متمرسين تابعين للبحرية ...
اخوي فجأة اختفى و مرت ابوية بالكاع تذب تراب و تصيح ...
- لج سمااح تدعين علي، بعيدة و ما خلصت من فالج الاسود لج ابنج ضيعلي الولد الي سنين عمري انتظرتة لج اشوفة يكبر كدام عيني لج بعد ما حلا بعيني راح ..
ظليت صافن على حقد هذول البشر اما رقيم ظلت عالراك كاعدة وتبجي و تحجي بكلام ما مفهوم اجتها الحالة مدت رجليها بالشط و كامت و هي تمشي بالراك
كمت وهجمت عليها يومها كتلتها كتلة (ضربتها) اول مرة اطك بقسوة و منو رقيم المدللة بس رادوا يخلصونها مني جنت متهستر اخر شي شباب التمت توخرني ومنا خالها يجرني .
باوعت لابوية و مرتة الكاعدين بالكاع وعينهم بالشط ويبجون ..
- هاي الحية بهذلتنا ...
رجعت باوعت للشط و ركضت ذبيت اغوص ادور اخوي بلكت الكاه وبيه نفس ...
طولت اني جوة بالشط و من حسيت راح اختنك طلعت اتنفس و عيني على ابوي يصيح
- يا يابة يا بوية لحكوني الثاني غط وما طلع بوية انكسر ضهري وسود ويهي ( وجهي )
جان يصرخ و هو يكمز مكانة منهار من لمحني كعد بالكاع يبجي و سجد عالرمل و رجعت غطيت بالشط و انة ابجي و ادور وصلت يم سفينة نصها غركان و نص لا غطيت كلت خاف جرف التيار منتظر هنا ...
فص ملح وذاب ...
تخبلت وكتها ما قبلت ارجع للبيت بدو اهلي يتحضرون للعزاء ويعزلون البيت بس ينتظرون الجثة تبين و يقيمون فاتحة ..
بذاك اليوم ما رجعت كلش ظليت مكابل الشط ملابسي يمي واني بطرك الشورت انتظر الصبح و اغط ادوره ..
ايست منه عايش بعد ...
و بقى بس اريد جثتة ... حاجيت الشط
ملح ودموع مايك يابحر هم
كم غالي خذت والروج هم هم
اخوي لجان صاحب والسند هم
خذيته وراح من مابين ايديه
# بيان الزبيري
حسيت بخالي وراي من حجة
- كافي ابني كافي يلة للبيت عمتك بالها يمك ..
بس ظليت احاجي الشط وابجي ..
-اجرع بالالم واشرك بالجروح
قهر يكبل يودع قهر ويروح
اعوفك يلجفيت وداعة الله وروح
بملح شطك الروج يلجم بيه
كعد خالي يمي يبجي و هو يحظني:
- تعال ابني خلص مات بقت بس ننتظر الجثة تطفح ....
- خالو شوداه غير الحية شوداه ..
- استغفر ربك ابني هذا يومة وصل يلة امشي ...
ملحكنا نكوم شفت ابوية يسند مرت ابوي وكعدو عالراك و يبجون وهي تنوح ..
- يمة منيظر يا نظر عيني يمة ... ما ردت منك معاش و لا ردت من جدرك غموس ردتك يمنيظر سند الي و عون ......
سمعت خالي يكول:
- الله يصبرج يا خيتي على مصابج ..
كامت وهي تاشر بيديها ..
- يمحسن خوية مامش خبر ايست و اكطعت الضنة ...
شبكها وهو يواسيها
- الجزع حرام خوية
- يخوي تكلي لا تبجين و بيدي جهزت العرس و الفرشة منصوبة خوية وليدي راح بزر شيبي مالحكت بيه اتهنة ...
بوس راسها:
- كافي يلة ابو بيان كعدتنا هنا ما جيب شي الشرطة و البحرية وحتى الشباب الطيبة ما قصروا دوروا ما لكوه
انتبهتلي و اجت بشحاطتها تضربني ..
- ولك ما تخلا منك يكولون يشهدون الك مو بس ما اصدك غركتة يلحسود من يومك تكرهة ..
وظلت تضرب وجهها كبالي وتخمش بضافيرها خدودها
- يبوووو يبوووي وليدي منيظر يبوووو
لزموها خالي وابوية ...
مرت ايام ما اريد اروح للبيت بقيت يم عمتي و امي اتصلت مرة و خبرتها شهكت خطية وبجت يبقى ذكريات طفولة منتظر ببالها ..
بنفس الوكت قوتني لا انهار بس اني جنت كلش متاثر ...
صابرين محصلة رقمي واتصلت تعزيني و بنفس الوكت تكلي صار عدها نقال ..
سالتها وانة مالي خلك احجي
- رقيم انطتج الرقم ..
- ها حبيبي لا بس سالت صاحبك نواف ..
جريت نفس .
- و شكو انت تحجين وي ولد شنو هاي الجرائة لا تعيديها بعد ..
طبعا سديتة وذبيت نفسي على جرباية ابن عمتي الي خلاها الي بايام تواجدي ...
ثاني يوم اجت عمتي تمسح بعيونها وهي تكولي
- بيان يلة يا امي لكوه امشي تودعة توهم طلعوه من الطب العدلي هسة بالحسينية يغسلوه ..
باوعتلها
- شو محد كلي يمتة لكوه يمتة اخذوه للطب العدلي ..
- الفجر لكاه صاحب لنج و صيد سمك بشباك و بلغ ...
بس ما كتلك شفتك نايم وانت ايام ما تنام ..
عمك توة خابر نؤاس يجي يمكن يوصل بالليل وحدتة بعيدة مو بالبصرة حظة المصخم نقلوه .
باوعت لعمتي واني مثل المخبل
- يعني منتظر طلع ميت ..
شبكتني تبجي ..
وخرتها و اني ادك على راسي لمصابي ..
- و الله رغم فاتت ايام كلت اكيد عايش ما مصدك خوية يومية اروح للشط المنية من عساه ما بقت بيه مية خوية شمالني اليوم تعاجزت والله تعبت خوية ادور وماكو ..
- بيان كافي لكاه صياد الفجر جثتة طافحة كافي خلص انتهى ..
لبست دشداشتي الزبيرية البيضة و شماغي الاحمر وانة اصيح و اركض للحسينية .
- خويةةة جيتك خوية عضيدك انة خوية كلت بيدي ازفك بعرسك مو لكبرك خوية ...
تعرفون شط و ايام بيه الميت الغركان شكلة ورى ايام بالشط يضخم
و ياخذ شكل ازرك و منتفخ و مخيف بقيت صافن ما همني الجثة بحالة التفسخ تبدي تطلع ريحة كل الهمني هذا مو اخوي ... رغم هاي اثر ايدة اعرفه و هذي ملامحة بس لا شلون اصدك منيظر الحلو المدلل هيج حالة استغفرت ربي هو هذا البشر تاليتة جثة تتعفن و بالتراب شكد ناس تمشي بطمع يعميها لو تخلي الله بين عيونها محد باجر ياخذ وياه لا فلوس ولا مكانة بس حفنة تراب تلمة و اعمالة تقيمة يم رب العالمين ...
بدت ايام العزاء جان بذاك الوقت الفاتحة ثلاث ايام وبيهم يجرها اسبوع حتى من تخلص الفاتحة والختمة يوم ثالث يبقون جادر اسبوع خاصة الناسهم هواي وتروح وتجي عليهم ...
وي وصول نؤاس المغرب تلكتة جهال المنطقة ...
- عموو غرك منتظر وبيان ...
نؤاس الي يعرفة بس منتظر بس من كالوا بيان تصور اني رحت اطلع اخوي و غركت ...
اليسمع خبر فجأة ما يفكر يظل مصدوم و ينسى اني سباح و غواص ممتاز و الغوص هوايتي ..
دخل جان مغرب الناس تعشت وراحت لبيوتها وبس كم مرة كبار شافن نؤاس و طلعن وخواتي رقيم ما بينت حابسة روحها و بين تجيها هستريتها وبين يغمى عليها بوكتها ما اشتهيت اشوفها كلش ...
دخل وذب جنطتة وهو يبجي و يصيح ..
- منتظر وحشة الدار خوية و لكم صدك بيان هم غركان شنو هل مصيبة ...
تلكنة خواتي يصرخن ويلطمن و هو يدك عالراس والصدر كلش منهار ..
صاحت رنا وهي تخمش وجهها:
- خويةةة ولك نؤاس خوية راح خييي
اجة سلمان وكض ابنة و صاح
- كافي باجر تجيجن نسوان شبعن لطم ...
بس ظلن يلطمن ويصرخن ونؤاس يدور علي من كلولة انة ما غركان
اجة لكاني بالغرفة بدشداشتي و ادخن جكاير و عيوني حمرة طفيت الجكارة ..
حظني يشم بية
- شوداكم للشط المنية ودتكم ..
- نؤاس راح اخوي ردت ادفنة ما قبل ابوية اروح وي الدفانة راح هو و رجل رنا دفانة ما اخذني ادفن اخوي ...
دك عمي الباب و صار صريخ عالي مثل السامع خبر ..
وصاح علينا
- توضوا صلوا صلاة الوحشة يوبة اخوكم دفنوه استقر بدار اخرتة ...
ايام صعبة علي حالي تبهذل هملت نفسي و اناقتي و شغلي .. امي تتصل ترفع من معنوياتي و هاي الفترة تتصل بية كل يومين كل ثلاثة حسيتها تجازف هواي ...
الاسود صار هدومنا كلما اذكر فرحتي بيه من عقد احس بمرارة الحنظل بحلكي وغصة تخنكني كرهت رقيم كلش لدرجة حجي ما احاجيها ...
كرهتهم كلش ...
و استمريت اتواصل وي صابرين بالنقال خاصة هي اشترت واحد من فترة قليلة ...
زاد جنون رقيم و ابتعادي عنها جننها اكثر فضلت تفتعل المشاكل ..
بدت المدارس واتفقت وي صابرين اتواصل وياها بس الجمعة لان سادس واريد اطلع معدل ..
احنا هسة بشهر الرابع من عام ٢٠٠٦ ...
حزني بعدة جديد ما انطفى يمكن قليل الرجال يلبس اسود على اخوه اني سويتها عدا فترة الدوام المدرسي ممنوع ..
لحيتي كل هل اشهر طويلة حتى المدرسين انطوني انذار و كوة عمتي قنعتني ازينها ما ترجع الراحوا بيت ابوي ما كمت اروحلة بس الجمعة حتى اشوف صابرين واروح ورى العشا اطلع من الصبح حتى محد تفكدني بس اثنين نؤاس من يجي باجازة و اذا صادف جمعة واوكات ميصادف وجودة ورقيم بس نظرات بيني و بينها نظرة عيونها الذابلة تكلي كلام ممفهوم بيها حسرة وحزن
و نظرتي الها كره وحقد ...
و كل عادة دخلت الجمعة بهدعش بالليل اسمع مرت ابوي بغرفتنا تنوح فما دخلت ما اريد اصطدم بيها ..
خاصة هي ام واعذرها ابنها عزيز حتى فرشة عرس مشتريتلة و بيوم تشيعة خلوها على تابوته و زينو بيها كبره ..
سمعت صوت نؤاس يواسي مرت ابوية صعدت عالدرج لبدت لمن طلعت وراحت غرفتها ..
دخلت الغرفة شبكت نؤاس
- همزين اجيت جاي باجر امر اشوفك كبل لا التحق ..
- اي اجي الجمعة بس وهناك عد عمتي احسلي ما بقى شي على شهر المراجعة ..
- بيان محتاج فلوس الله عليك راتبي خير من الله طلعلي مبلغ بس انة شنكة عزة نفس عندي ابوي ما امدلة ايدي ..
- خوية خلي فلوسك بجيبك ..
- خايب شبيك دخذ تحتاج ملازم ..
دنك بيان:
- بالعطلة ما اشتغلت تدري نفسيتي تعبت كلش و مدبر اموري اشتغل حاليا بمحل ملابس نسائية واني كاعد بيه ادرس اني اشتغل بيه من العصر لليل تدري دوام ..
- خوية لا تشلع كلبي اخذهن ..
- ابد انة اجيت اشوف صابرين والا ما اجي هذا البيت تعبني هواي ..
جاي اترك الغرفة لان صابرين دزت رسالة هي عالسطح ..
كلي نؤاس: يابة هاي كضي وكت وياها وبس ترى مو مال تزوجها لاتخليني احجي و اكلك عنها كيت وكيت ..
　
- تكذبون حتى تحرموني من حبي مثل ما حرمتوني من امي و اختك حرمتني من اخوي ..
صاح مستغرب:
- و اختي شكو اكيد انت مو واعي لحالك و بالمناسبة سمعت راح يزوجوك رقيم ترى ما تلكة مثلها و انت اولى ببنت عمك منريد غريب يظل يتعيقل براسنة ..
باوعتلة
- منو كلكم ازوج هاي اكرهها يا اخي اكرهها ..
- من يكعدون يحاجوك اكيد تصير اخو خيتك بس تخلص سادس يعقدولكم بس تدور سنة منتظر ..
جريت نفس وكلت
- متوازي ادخل حية بت امها لحياتي
- اكعد خل احاجيك من تعرف اكيد راح ....
قاطعتة
- سد الموضوع كلش بلا ما نتخارب ..
خليتة وطلعت وانة اكول لان مخبلة تلزكوها بيه و الله يا الله بخبالها ضيعت منيظر و هسة تردون تضيعوني هم والله اذا جبرتوني و حاربتوني لخليها معلكة واشرد ...
شفتها كالعادة بيوم الجمعة تطلع تباوع للساعة جنها تكلي كل ساع انة اطلع اشوفك اجيت لو لا او بنظرتها ليش ما تجينا بعينها شوق و ادري بداخلي رقيم تحبني بس بالي ولا يمها كل موقف منها تكرهني بيها ..
شافتني اصعد الدرج ركضت كضت ايدي نترت بيها
- شنو هل صلافة استحي ..
نزلت دموعها:
- بيان ترى صابرين بدت تسلك طرق مو راحة ..
هزيت ايدي
- خطة جديدة توكعيني مو خافي الله بعراض الناس ..
- شوف ما راح تزوجها تزوجني انة اهلي ميقبلون اخذ غريب ..
هزيت ايدي
- مو جانلج حبيب بس فرطتي بيه ضيعتيه
شفتها عكدت حواجبها
- هواي تحجي علي بظهري وهسة كدامي شقصدك بلة
خزرتها وصعدت
بخبال كالت
- ما تتهنا بسيطة ..
تجاهلتها و استمريت بعلاقتي وي صابرين امتحنت السادس شديت حيلي كلش بتشجيع امي ..
بس وانة بالامتحانات انقطع اخر اتصال بامي جانت تخابرني و انكشفنا انجر التلفون عبالة مصاحبة وحاجاني وضحتلة ..
- خالو انة بيان خالو دخيلك لا تسوي لامي شي و خلينا بس تلفون نتواصل
- لانعل ابوك لابو الخلفك ساعة السودة الشفناكم بيها بعد لا تتصل و حتى الشريحة اكسرها ومنعول الوالدين الي يخلي لفطيم شريحة بعد ..
سمعت بجي امي وتوسلها و حتى فاطمة مدري شتحجي وتبجي انكطع الاتصال وانكطعت امالي وياه
بعدها بساعات خالي الي بالخارج اتصل يعاتبني لان اخوه مرزلة و كاطع صلتة بيه لان فاطمة معترفة شلون جان طريق التواصل ..
هذا ربكني بالامتحان الضروف المريت بيها دمرتني كلة من ابوي لو ما جان مؤذي لو حياتي طبيعية جا ما وصلت يدمر حتى دراستي دارت سنوية منتظر و نتايجي ما تبشر بخير درجاتي خمسينات .. انة والمعهد
هاي سنة من مصيبة لثانية ابد ما ارتاحيت و همات هاي السنة عدم رسوب بسبب طائفية صارت و معارك الحكومة منريد نطرقلها ...
رجعت لبيت ابوي لان عطلة و التقي بصابرين ..
بيوم ابوي صاحني
- اكعد بيان نسولف هذا اخوك راح لدار حقة وبت عمك صارت الك ابني وي منتظر ولا حسينا بتردد من حاجيناه بس انت الله يسلمك يهو اليحاجيك تطفر بالوجه ..
جنت مدنك و بداخلي اكول يمكن من سنة اول مرة يكعد يسولف وياي هو عمري كلة بس السلام بينا اشوفة ما يعرف يطرح موضوعة علي ..
كمت دون تفاهم:
- يوبة اترخص رقيم شابة اي واحد يجي عليها انطوها انة مالي نفس بيها ..
- انجب مو كيفك اكعد افهمك
- يوبة لا تفهمني ولا شي من رخصتك ..
طلعت لشغلي و بالليل من رجعت لكيت رقيم تخابر من نقال امها
- ههههه لو منج انة اقبل ولج هذا ابو الفلوس مو دايرة عالفكريات شنو شتحجين هههه حبيبتي هذا اليحقق احلامج و خليجي بعد شتردين ..
شافتني و سدتة وابتسمت
- مبروك بيان صابرين راح تزوج امراتي ...
مدت لسانها تشمت خابرت و بعصبية حاجيتها
- هسة تصعدين للسطح
اجاني صوتها
- نهار ولك ننشاف
- صعدييي لا اسويهة فضايح
- صار بس شبيك!
ظليت احاجيها وسويت البايات ثنين ثنين لمن وصلت السطح ..
وانة معصب بس شفتها انطيتها راشدي
- تنخطبين ها وتناقشين رقيم ترى سمعت المكالمة ما تحملتي لمن اكون نفسي دورتي الفلوس صابرين ..
بجت وكالت
- لا مجبورة اخوي وامي فرحانين لان خليجي بس انة ما وافقت رقيم نصحتني بس انة احبك ..
درت وشفت رقيم تباوعلي خايفة بباب السطح تهز براسها لا ورى شوي خالتي ام نؤاس صعدت تلعلع و اخو صابرين هم اجة سحل اختة و بس اسمع الصريخ ..
صارت هوسة وهد علينا اخو وعمام صابرين يردون كوامة سوها انة متحارش ببتهم وهي تشر ملابس
و بتهم مخطوبة ...
توقعت رقيم الفتانة رايحة لامها وسولي كبسة وامها مخابرة صاحبتها كايلتلها انطيني ابنج اريده بشغلة ..
و من محاجيتة منهدة بيه يا اختك كذا يا عالسطوح يا مفترة على خطيب بتي لموا بتكم ...
بس هم داروها علينا و اتصور كد ما موتوا حبيبتي ضرب خلوها تنكر حبنا و تتهمني الاحقها انتهت علاقتي بصابرين بسبب رقيم ...
انهارت حياتي و كل احلامي بسبب رقيم ..
وبديت اتحرك على السفر خارج العراق بس احتاج فلوس لجواز جي بذاك الوقت يطلع من بغداد..
حاجيت عمتي كتلها اريد استفاد عجبتني تجارة الملابس بس اريد راس مال دين و من كتلها المبلغ انطتني وكالت لا تتقيد اعتبرهم فلوسك انطتني زايد عن حاجتي بوستها و شبكتها حيل و كتلها ان شاء الله حتى لو تاخرت عليج ارجعهم لا يوم تظنين بية سوء
ضحكت
- وليدي الفلوس فلوسك صدك جذب لا تشيل هم ..
بقت اعاقب رقيم و انطيها درس العمر
كعدت يمها كضيت ايدها وانة اكره ايدي الي كضت ايدها و كتلها
-فكرت بكلامج صابرين انطوها لغيري و اريد اقهر صابرين اذا بعدج ترديني انة موافق حتى اخطبج
- اي اي انة احبك من زمان والله كوة مصادقتها الغبية سحبوا نقالها منها بس شفتها امس وي هذا الامراتي مشتريلها نقال يبووو ماكو منه و انطتني رقمها و مبينة متونسة وياه و فرحانة انت غبي عبالك تحبك ..
همزين الله كشفها الك
باوعتلها وردت اتفل بوجهة على جذبها حب من الطفولة مستحيل تنساني بهاي السهولة ...
بس بكلبي كتلها اذا ما اخليج معلكة ما اطلع ابن سماح اذا ما اخليهم يتوسلون بس اطلكج و اشلع كلبهم انة الج ..
ظلت تحجي و فرحانة كلش
- بيان ما مصدكة بس وعد اخليك تحبني و ما ارجع بعد على كولتك لخبالي هسة انة كتلج على حبي الك من زغرنا وانت تدري بحالتي تجيني خبال من شغلة مريت بيها خلتني احس بنقص ..
جانت تحجي وانة اجر نفس اريد اكوم
- اي تحسين بنقص لانج غيورة تحسدين غيرج حتى لاحظت من دارت سنوية منتظر المرة التخطبج لابنها تروح و ما ترجع خبر اكيد شافت عيوبج
لسة اذكر من باوعتلي منكسرة وتبجي و هي تكول و تصيح نفس الكلام الكالتة لمنتظر
- انة ما بية نقص لا تشوف نفسك علي مسوي فضل زين
كتلها
- هي شبيج ترعصين من تحجين وشكلت انة غير النسوان التجي تشرد من تشوفج انت و سمج
بجت وشردت من يمي
- حرام عليكم ما بية نقص كلشي ما بية مثل اي بنية هم ازوج وافرح ...
بلغت ابوي موافق ..
- اكعد ابني نسولف لازم تعرف رقيم و حالتها ..
رفعت ايدي قاطعتة ما اشتهي اخذ وانطي و ياه ..
- اعرف اعرف كلشي اعرف هي رقيم تضم شي كتتهن كلهن و قابل يعني قابل فد شي سهلة ان شاء الله ...
جنت اقصد على حبها و اعترافاتها الي و على حالتها الخبالات
كلي ابوي فرحان
- الله يبارك بيك ابني ما ننطيها غرب بنيتنا النا احسن و حتى الي خطبنها لولدهن راحن وما رجعن حظها هذا
هزت راسي اي و طلعت وانة اخطط و اخطط ..
عقدت عليها محكمة و شيخ و الحفل هل مرة ما عندي اخو يفرحلي ولو نؤاس ما قصر ولا عموميتي و ازواج خواتي بس مو مثل الاخو من يفرح الاخوه طبعا ما عشت اللحظة لاني اصلا ناويلهم نية ...
صابرين تزوجت وسافرت وي رجلها بيوم عرسها وكفت بالشارع مجروح و اباوع عليها و هي تبوس اهلها باوعتلي بنظرة ودخلت سيارة الخليجي و اخر مرة هاي اشوفها بيها ..
حسيت بنفسي منهار و مهموم و الهوة مختنك بريتي ...
سافرت بحجة تجارة و رقيم جهزت للعرس و الكل يحظر و حددو العرس قبل المدارس حتى بدلات عرس و الحنة اشترتها مشترة ...
كتلهم اتاخر ببغداد و طبعا بس استلمت الجواز كبل لسوريا سافرت ...
باوعت للساعة بالخمسة الفجر
- كل هذا الوقت وانة اكتب ورى ما صليت رجعت ...
طفيت لابتوبي وحضنت ابني ونمت ...
الحاضر ....
كعدت رقيم الصبح و هي تتمغط
- كربلا جربايتج مريحة عاشت ايدج حيل ارتاحيت بيها
بوزت
- ما فاتحتها سبيل خفنا منج لا تتخبلين وعزلناج عليها ...
ضحكت
- لا تخافين مبية شي ما ارجع للماضي تعودت عالنبذ بس الله لسة عطر اخوج بيدي من كضيتة ادري يسبح بالعطر هل بيان ...
- رقيم خطة الروب نورطة بيج ونخلص ...
- لا خل اصير مؤدبة اول ههههه
- كومي يالمؤدبة ورانة شغل اليوم انت عصري مو ...
- اليوم انة ما اداوم ماخذة اجازة اريد اروح للكشافة بلكت تقرالي بختي ..
صبا
- لج رقو وصلت بيج للكشافات امهات السحورة
- لا بس اشوف بختي
ضحكت كربلا
- هو بختج مصخم ميحتاج كشف و صرف فلوس انطيني الفال وانة ازوجج ياه ههههه بدل متنطين الكشافة فال ..
كعدت رقيم
- الله و اكبر من عرضتجن بطلت ما اريد اكشف برصيد عن طريق الفيس وهاي هية .. ابن بيان شو وينة شكعدة من وكت هذا الولد بس اجة للعراق تعلم لطلطة ..
غمزتها كربلا و هي تكعد بكفاية:
- اكو اب رجع اخذ ابنة خايف من الحية على كولتة لا تتخبل و تخنك ابنة ..
ضاجت رقيم
- سالفة امس غلط خطة فاشلة لان بيان اذكر يتخوف من هيج حالات استغرب تقرب وانة امثل الي اجتها حالة خبال ...
كربلا:
- كبر بربج واحد عمرة ٣٠ ترديه يخاف من صياحج و اااا روحي لحكوني كضيتيها هيج تصرخين جن بكة كارصتج .
- اكيد راح لشغلة اروح اشوف الولد ترى ما اعض انة ..
راحت صعدت باوعت للسطح مفتوح بابة سدتة و راحت لغرفتة لكتة بعدة ما كاعد كعدت صافنة عليه تقربت من وجهه و شافت رموشة الطوال بشرتة البرونز جانت كلش تجذب لونة و سماره حلو انتبهت خدودة بيهن لون حمار خليط ممتاز للونة ..
- يمتة تحن ...
غطتة زين وهي تفكر بمقترح كربلا جان يدك نقالة اخذتة باوعت
- ام وسام ملاذي اممم
باوعت لبيان و اخذت النقال و طلعت برة و فتحت خط ..
حجت سلمى خليط عراقي مغربي تدري بيان ما يحب المغربية ...
- الو بيان اسفة ما عيطت عليك (اتصلت ) كنت مشغولة
حجت رقيم بدلع و نعاس
- الوو انت ضرتي اكيد شلونج بيان نايم خطية امس للصبح سهران وياي اذا تردين اكعده يحاجيج ..
تثاوبت و صوت تنفس حاد لسلمى وصللها بعدين حجت
......

يتبع