جُــــــمران!

بـ١٥

صباح يوم جديد فردوس وجمران يلعنون فيه كونهم مصاصي دماء بسبب تغييرات جسمهم المفاجئه مثل بروز الانياب بدون سابق انذار، يحترقون من اي شيء فيه العشبه مكون ! هذا غير بروز عظام الظهر والكتف بدون سابق انذار ولكنه مؤلم بشكل غريب

( الجامعه / الممر )

فردوس : لو شفتيها قولي سلام ومري قسم بالله لو تخرفنتي لا تشوفين شيء ماشفتيه
جمران : يحول الله تهديدات من اول الصبح
فردوس : العلم جاك
جمران : لو انك طاريه مليون
فردوس : ع اساس انه م عندك
جمران تضحك : ول

- سدى وليانا يمرون -

سدى : سلام
الكل : عليكم السلام
سدى : جمران ممكن شوي ؟
جمران : ان شاءالله شو؟

خذت سدى جمران على جنب وبدت تتكلم وتقولها : جمران ما ودي يصير بيننا عداوه بسبب كلام لحظة غضب لو سمحتي
جمران : انا ماعندي مشكله معاك لكن صاحبتك سبت حتى اشكالنا ؟ يعني اوكي نشد بالحكي بس ع الشكل عاد؟؟؟
سدى : معك حق وليانا غلطانه لكنها تنرفزت لان كثر م نسوي مب عاجبكم شيء وانا احاول ف كل ذا بس عشان تصفى القلوب واتأكد انه رضيتي
جمران : انزين سدى شكرا لانه تحاولين هالكثر بس انا خلاص راضيه تمام الرضى ولا عندي اي مشكله معك او مع ليانا
سدى : طيب الحمدالله وبخصوص الحفلات ترا كل حفل له ثيمه مب يعني انه نحن او الحضور كذا
جمران تضحك : صراحه م كان عندنا مشكله بس كنا مستغربين شوي
سدى تضحك : انتظروا الجاي بتنصدمون اكثر الثيمات مجنونه هنا والطلبه كل مره يطلعون  لي بفكره م صارت
جمران : تدرين ماتوقعتك رئيسة مجلس طلاب
سدى : اوف ليش عاد؟ شو سويت؟
جمران : ما اقصد بس بالعاده طلبه دوافير يمسكون المنصب هذا واشكالهم نظرات وحاله - تضحك -
سدى : لا وييييين مجلس الطلاب صار كله ع الفعاليات وخصوصا ذا كوينز ما عاد صار مجلس للمنفوع الاكاديمي
جمران : صح شسالفة ذا كوينز هذي
سدى : موضوع طويل لا خلصنا كلاس بقولك اياه فالكانتين
جمران : اتفقنا

.......

ردت جمران لفردوس اللي كانت تنتظر ع الباب وتراقب نظراتهم وكلامهم لبعض وتنتظر على جمران الزله

فردوس : هذا وانا توني موصتنك لو عدا ع كلامي ساعتين شو بتسوين؟ بتتزوجينها؟
جمران تكح : اييي لاتخليني اطشر الماي كله
فردوس : ادخلي بس ادخلي مالت عليك مسويه قو عند كل حد واخرتها منهاره لي عند وحده من العامه
جمران : والله مدري شو سوتلك هالبنت - تضحك -
فردوس : البنت مسكينه م سوت شيء لكن انتيييي العله ماينفع فيك شيء مهما راويتك وسويت
جمران : هديييييي ماصار شيء والله كله كلام وسواليف عاديه
فردوس : الله يستر بس

( طاولة ليانا وسدى )

ليانا : ها ع شو عزمتيها هالمره ؟ حمام بيتكم ؟
سدى : شدعوه
ليانا : الا م يتأمن لك تروحين عندها يزر عقلك
سدى : رقعت مصيبتك امس
ليانا : ليش ان شاءالله؟ منو امرك
سدى : عقلي لان مابا نتمشكل مع حد نحن بنقابله نص يومنا
ليانا : والله من الانبطاح يا شيخه
سدى : والله م ترضين لا بهذا ولا ذاك المهم خلي الموضوع كذا وعلاقتنا وديه عشان م اضطر ارقع مره ثانيه
ليانا : تحسسيني انهم شيء كبير على حرصك هذا
سدى : عاد تصدقين احسني ملزومه فيها وانها م تفهمني غلط لكن ليش ماعرف والله
ليانا : اقول ملزومه بنفسك وبس خل عنك هالعلوم
سدى : صدق ليانا والله احس في شيء يربطني فيها بس ليش مدري
ليانا : الدكتوره وصلت ياليت تنربطين فيها وبشرحها احسن